1. Ndi mabvero api akuti atumiki anango a Yahova panango anakhala nawo?

 NDI pyakuwangisa kakamwe kudziwa pinalonga lemba ya Masalmo 149:4. Iyo isalonga: “Yahova asakomerwa na mbumba yace.” Mbwenye midzidzi inango anango asatsukwala kakamwe mbatoma kunyerezera: ‘Kodi ine ndine wakufunikadi kuna Yahova?’ Atumiki azinji akukhulupirika a Yahova, kuphatanizambo a mu ndzidzi wakale akhalambo na mabvero ninga anewa midzidzi inango.—1 Sam. 1:6-10; Yobe 29:2, 4; Mas. 51:11.

2. Ndi anthu api anakhala akutawirika kuna Yahova?

² Bhibhlya isapangiza kuti anthu akusowa ungwiro anakwanisa kukomeresa Yahova mbakhala akutawirika kuna iye. Munjira ipi? Ife tisafunika kukhulupira Yezu Kristu mbatibatizwa. (Juw. 3:16) Tingacita pyenepi tinapangiza pakweca kuti tatcunyuka madawo athu, pontho tapikira kucita cifuno ca Yahova. (Mabasa 2:38; 3:19) Yahova asakomerwa kakamwe tingacita pinthu pyenepi toera kufendedzera kuna iye. Mu ndzidzi unawangisira ife toera kucita pidapikira ife, Yahova anationa ninga akutawirika kuna iye na axamwali ace a ponda ndipondembo.—Mas. 25:14.

3. Ndi mibvundzo ipi inafuna ife kutawira mu nsolo uno?

³ Mphapo thangwi yanji anango asanyerezera kuti Yahova nee asakomerwa na iwo? Ninji pinacita Yahova toera kupangiza kuti asakomerwa na ife? Pontho tinawangisa tani cinyindiro cathu cakuti Yahova asakomerwa na ife?

THANGWI YANJI ANANGO ASANYEREZERA KUTI YAHOVA NEE ASAKOMERWA NA IWO?

4-5. Maseze mupibve kuti ndimwe wakusowa basa, ndi pinthu pipi pyakuti munakwanisa kupinyindira?

⁴ Azinji asapibva ninga akusowa basa kutomera uwana wawo. (Mas. 88:15) M’bale unango anacemerwa Adrián alonga: “Kutomera kale, ine ndikhapibva ninga wakusowa basa. Ine ndisakumbuka kuti mu uwana wanga ndacita phembero toera anthu a pabanja pathu apite mu dziko ipswa. Mbwenye ine ndikhapibva kuti  nee ndikhali wakuthema toera kupita mu dziko ipswa.” M’bale unango anacemerwa Tony adakuzwa na anyakubala akuti nee ndi Mboni za Yahova alonga: “Anyakubalanga cipo andipanga kuti akhandifuna peno kuti akhakomerwa na ine. Ndzidzi onsene iwo akhapangiza kuti ine nee ndikhacita pinthu mwadidi.”

⁵ Khala midzidzi inango musapibva kuti ndimwe wakusowa basa, kumbukani kuti Yahova akusankhulani toera kuntumikira. (Juw. 6:44) Yahova asaona pinthu pyadidi piri na m’bodzi na m’bodzi wa ife, pontho asadziwa mwadidi ntimathu. Kusiyapo pyenepi, iye asationa mwakusiyana na njira inaoneka ife. (1 Sam. 16:7; 2 Kro. 6:30) Natenepa, Yahova angalonga kuti ndimwe wakufunika kuna iye, imwe munakwanisa kun’nyindira.—1 Juw. 3:19, 20.

6. Paulu akhapibva tani mu ndzidzi ukhanyerezera iye madawo ace akale?

⁶ Mbatidzati kudziwa undimomwene, anango a ife panango acita pinthu pyakuti mpaka lero pisaacitisa kupasika mulando. (1 Ped. 4:3) Ngakhale ale akuti asatumikira Yahova mu ndzidzi uzinji panango asapitiriza kuwangisira toera kusiya pinthu pinango pyakuipa. Ndiye tanimbo imwe? Kodi midzidzi inango musapibva kuti Yahova nee akulekererani? Khala ndi tenepo, ndi pyadidi kukumbuka kuti ngakhale atumiki a Yahova a mu ndzidzi wakale akhalambo na mabvero anewa. Mwacitsandzo, mpostolo Paulu akhatsukwala kakamwe mu ndzidzi ukhanyerezera iye madawo ace. (Aroma 7:24) Ndimomwene kuti mpostolo Paulu atcunyuka madawo ace buluka penepo mbabatizwa. Ngakhale tenepo, iye akhaoneka ninga “wangʼono kakamwe pakati pa apostolo” na “nyakudawa kakamwe.”—1 Akor. 15:9; 1 Tim. 1:15.

7. Tisafunika kukumbukanji tingatcunyuka madawo athu?

⁷ Yahova apikira kuti anatilekerera tingatcunyuka. (Mas. 86:5) Natenepa tingatcunyuka na ntima onsene madawo athu, tinakwanisa kukhala na cinyindiro cakuti pinalonga iye ndi pyandimomwene, thangwi iye atilekerera kale.—Akol. 2:13.

8-9. Tinakwanisa tani kukunda mabvero akuti pinacita ife nee ndi pyakukwana toera kukomeresa Yahova?

⁸ Ife tonsene tisafuna kucita pizinji toera kutumikira Yahova. Mbwenye midzidzi inango, anango asanyerezera kuti pinacita iwo nee pyakwana toera akhale akutawirika kuna Yahova. Mulongo unango anacemerwa Amanda alonga: “Kazinji kene ndisanyerezera kuti kutumikira Yahova mwakukwana ndi kucita pinthu pizinji ndzidzi onsene. Na thangwi ineyi, ndisayesera kucita pinthu pyakuti nee ndinapikwanisa. Ndingakhonda kwanisa, ndisatsukwala, pontho ndisanyerezera kuti Yahova atsukwalambo.”

⁹ Tinakwanisa tani kukunda mabvero akuti pinacita ife nee ndi pyakukwana toera kukomeresa Yahova? Kumbukani kuti Yahova ndi wakulinganira. Na thangwi ineyi, iye nee asafuna kuti ticite pizinji kupiringana pire pinakwanisa ife. Yahova asakomerwa na pyonsene pinacita ife, tingapicita na ntima onsene. Kusiyapo pyenepi, imwe munakwanisa kunyerezera pitsandzo pya m’Bhibhlya pya anthu adatumikira Yahova na ntima onsene. M’bodzi mwa iwo ndi Paulu. Iye aphata basa mwaphinga mu pyaka pizinji, acita maulendo a nsindzo wakulapha kakamwe, pontho aphedzera toera kukhazikisa mipingo mizinji. Mbwenye mu ndzidzi udacinja makhaliro ace, iye nee akhakwanisabve kumwaza mphangwa ninga kale. Kodi Yahova asiya kukomerwa na pikhacita iye ndzidzi unoyu? Nkhabe. Paulu apitiriza kucita pikhakwanisa iye, pontho Yahova ampasa nkhombo. (Mabasa 28:30, 31) Munjira ibodzi ene, pinakwanisa ife kucita m’basa ya Yahova panango pinacinja mukupita kwa ndzidzi. Mbwenye pyakufunika kakamwe ndi mathangwi anatikulumiza toera kucita pyenepi. Cincino tendeni tione njira zingasi zinatipasa cinyindiro cakuti ndife akutawirika kuna Yahova.

 YAHOVA ASAPANGIZA TANI KUTI NDIFE AKUTAWIRIKA KUNA IYE?

10. Tinakwanisa tani “kubvesera” Yahova mbalonga kuti ndife akufunika kuna iye? (Juwau 16:27)

¹⁰ Bhibhlya. Yahova ndzidzi onsene asasaka njira zakupangiza kuna atumiki ace kuti asaafuna, pontho asatsandzaya kakamwe na pinacita iwo. Bhibhlya isalonga maulendo mawiri akuti Yahova apanga Yezu kuti iye akhali Mwanace wakufunika na ule anakomerwa na iye. (Mat. 3:17; 17:5) Kodi imwe musafuna kubva Yahova mbakupangani mafala ninga anewa? Lero, Yahova asaphatisira Bhibhlya toera kulonga na ife. Ife tinakwanisa “kubva” Yahova mbalonga kuti ndife akutawirika kuna iye tingaleri mafala a Yezu anagumanika m’bukhu ya Mateu, Marko, Luka na Juwau. (Lerini Juwau 16:27.) Yezu atowezera mwadidi kakamwe makhaliro a Babace. Natenepa, tingaleri mafala adidi adalonga Yezu kuna anthu akusowa ungwiro, ife tinakwanisa kunyerezera kuti ndi Yahova analonga mafala anewa kuna ife.—Juw. 15:9, 15.

11. Thangwi yanji tingathimbana na pinentso nee pisabveka kuti nee ndife akutawirika kuna Yahova? (Tiyago 1:12)

¹¹ Pinthu pinaticitira Yahova. Ndzidzi onsene Yahova ali dzololo toera kutiphedza. Mwacitsandzo, iye asatipasa pinthu pyakumanungo pyakufunika kuna ife. Mbwenye midzidzi inango Yahova asatawirisa kuti tithimbane na pinentso, ninga pidacitika na Yobe. (Yobe 1:8-11) Ngakhale tenepo, pyenepi nee pisabveka kuti nee ndife akutawirika kuna Yahova. M’mbuto mwace, unoyu unakwanisa kukhala mwai toera kupangiza kuti tisafuna kakamwe Mulungu na kun’nyindira. (Lerini Tiyago 1:12.) Pontho tinakwanisa kuona kuti Yahova asatifuna mu ndzidzi unatiphedza iye toera kupirira pinentso.

12. Tisapfundzanji na citsandzo ca Dimitri?

¹² Onani pidacitikira m’bale unango wa ku Azya anacemerwa Dimitri. Iye aluza basa yace, pontho amala miyezi mizinji nee kugumana basa inango. Natenepa, iye aphatisira ndzidzi wace toera kumwaza mphangwa, pontho pyenepi pyapangiza kuti iye akhanyindira Yahova. Buluka penepo, iye atoma kuduwala, pontho nee akhakwanisa kufamba. Iye atoma kupibva kuti akhali mamuna na nyakubala wakusowa basa. Pontho akhabvundzika khala Yahova asapitiriza kukomerwa na iye. Ntsiku inango namasiku, mwanace wantsikana anfendedzera pakama yace mbampasa tsamba ikhali na lemba ya Izaiya 30:15 inalonga kuti: “Imwe munadzakhala amphambvu mungapitiriza kukhala akukhurudzika mbamundinyindira.” Buluka penepo,  iye alonga: “Baba, mungabva kupha, kumbukani lemba ineyi.” Dimitri adzindikira kuti banjace ikhali na cakudya, nguwo na mbuto yakukhala thangwi ya ciphedzo ca Yahova. Iye alonga: “Pinthu pikhafunika ine kucita basi ene ndi kukhala wakukhurudzika mbandipitiriza kunyindira Mulungu wanga.” Mungathimbana na pinentso ninga pyenepi, nyindirani kuti Yahova anakutsalakanani, pontho anakuphedzani toera kupirira.

13. Ndi anthu api akuti Yahova anakwanisa kuaphatisira toera kupangiza kuti asakomerwa na ife?

¹³ Abale na alongo athu. Yahova anakwanisa kuphatisira abale na alongo toera kupangiza kuti asakomerwa na ife. Mwacitsandzo, iye anakwanisa kukulumiza m’bale peno mulongo toera kulonga mafala akubalangaza pa ndzidzi wakuthema. Ndi pyenepi pidacitika kuna mulongo unango wa ku Azya mu ndzidzi ukhali iye wakutsukwala kakamwe. Iye aluza basa yace, pontho atoma kuduwala kakamwe. Buluka penepo, mamunace acita madawo makulu mbasiya kutumikira ninga nkulu wa mpingo. Iye alonga: “Ine nee ndikhadziwa kuti thangwi yanji pinthu pyenepi pikhacitika, pontho ndatoma nyerezera kuti panango ndacita pinthu pyakuipa mbandisiya kukhala wakutawirika kuna Yahova.” Mulongo unoyu acita phembero toera Yahova ampangize khala mwandimomwene asanfuna. Mphapo Yahova acitanji? Mulongo unoyu alonga: “Akulu a mpingo acedza na ine mbandipasa cinyindiro cakuti Yahova asandifuna kakamwe.” Mukupita kwa ndzidzi, iye aphemba pontho ciphedzo ca Yahova. Iye athimiza: “Ntsiku ibodzi ene idacita ine phembero kuna Yahova ndatambira tsamba ya abale mu mpingo. Mu ndzidzi ukhaleri ine tsamba ineyi yakuti ikhali na mafala akubalangaza ndaona kuti Yahova akhandibvesera.” Mwandimomwene, kazinji kene Yahova asapangiza kuti asakomerwa na ife kubulukira mafala akubalangaza anatipanga anango.—Mas. 10:17.

14. Ndi njira ipi inango inapangiza kuti Yahova asakomerwa na ife?

 ¹⁴ Yahova asapangizambo kuti asakomerwa na ife mukuphatisira abale toera kutipasa uphungu. Mwacitsandzo, Yahova aphatisira mpostolo Paulu toera kulembera mipingo matsamba 14. M’matsamba anewa Paulu alembambo uphungu wamphambvu, mbwenye waufuni. Mphapo thangwi yanji Yahova atsogolera Paulu toera kulemba uphungu unoyu? Thangwi Yahova ndi Baba waufuni kakamwe, pontho iye asalanga anace “anafuna iye.” (Mis. 3:11, 12) Natenepa, tingatambira uphungu wakubulukira m’Bhibhlya, pyenepi nee pisabveka kuti nee ndife akutawirika kuna Yahova, mbwenye pisapangiza kuti iye asatifuna. (Aheb. 12:6) Ndi pinthu pipi pinango pinapangiza kuti Yahova asakomerwa na ife?

PINTHU PINANGO PINAPANGIZA KUTI YAHOVA ASAKOMERWA NA IFE

15. Yahova asapasa ani nzimu wace wakucena, pontho pyenepi pisatipasa cinyindiro cipi?

¹⁵ Yahova asapasa nzimu wace wakucena ale akuti ndi akutawirika kuna iye. (Mat. 12:18) Natenepa bvundzikani: ‘Kodi ine ndisakwanisa kupangiza misapo ya nzimu wakucena mu umaso wanga? Kodi ndine wakupirira kakamwe cincino kupiringana mu ndzidzi udatoma ine kutumikira Yahova?’ Mungakulisa kakamwe misapo ya nzimu wakucena wa Mulungu, munakhalambo na cinyindiro cakuti Yahova asakomerwa na imwe.—Onani bokosi ya nsolo wakuti “ Misapo ya Nzimu Ndi . . . ”

16. Yahova asaphatisira ani toera kumwaza mphangwa zadidi, pontho musapibva tani thangwi yakudziwa pyenepi? (1 Atesalonika 2:4)

¹⁶ Yahova asapasa basa yakufunika kakamwe yakumwaza mphangwa zadidi basi ene ale akuti ndi akutawirika kuna iye. (Lerini 1 Atesalonika 2:4.) Onani kuti mulongo Jocelyn aphedzwa tani thangwi yakumwaza mphangwa. Ntsiku inango iye alamuka mwakutsukwala. Iye alonga: “Ine nee ndikhali na mphambvu, pontho ndikhapibva wakusowa basa. Mbwenye ine ndikhatumikira ninga mpainiya, pontho ntsiku ineyi ndikhafunika kuenda kamwaza mphangwa. Natenepa ndacita phembero mbandienda kamwaza mphangwa.” Ntsiku ibodzi ene namacibese Jocelyn amwazira mphangwa nkazi unango anacemerwa Mariya, pontho iye atawira kupfundza Bhibhlya. Pidapita miyezi mingasi, Mariya alonga kuti iye aphemba Mulungu toera am’phedze mu ndzidzi udafika Jocelyn panyumba pace. Jocelyn apfundzanji na pinthu pyenepi? Iye alonga: “Ine ndapibva ninga kuti Yahova ali kundipanga: ‘Ine ndisakomerwa na iwe.’”  Ndimomwene kuti nee ndi anthu onsene anafuna kutawira mwadidi tingaamwazira mphangwa. Mbwenye tinakwanisa kukhala na cinyindiro cakuti Yahova asatsandzaya kakamwe tingawangisira toera kumwazira mphangwa anango.

17. Mwapfundzanji na mafala adalonga mulongo Vicky thangwi ya ciomboli? (Masalmo 5:12)

¹⁷ Yahova apereka ciomboli toera kuphedza ale akuti ndi akutawirika kuna iye. (1 Tim. 2:5, 6) Mphapo ndiye tani khala nee muli na cinyindiro cakuti ndimwe wakutawirika kuna Yahova maseze musakhulupira ciomboli, pontho mwabatizwa? Kumbukani kuti ife nee tinakwanisa kunyindira mabvero athu ndzidzi onsene, mbwenye tinakwanisa kunyindira Yahova. Kuna Yahova, onsene anakhulupira ciomboli asaoniwa ninga akulungama, pontho iye apikira kuti anadzaapasa nkhombo. (Lerini Masalmo 5:12; Aroma 3:26) Mulongo unango anacemerwa Vicky adzindikira kufunika kwa kunyerezera mwadidi ciomboli. Iye alonga: “Mwakukhonda dembuka, ndaona kuti Yahova andipirira mu ndzidzi uzinji. . . . Mbwenye mwandimomwene pikhali ninga ndiri kulonga kuna Yahova kuti: ‘Ufuni wanu nee ndi wakufunika kuna ine. Ntsembe ya Mwananu nee ndi yakukwana kuna ine toera kuphimbira madawo anga.’” kufunika kwa ciomboli, atoma kupibva kuti iye asafuniwa na Yahova. Ife tinakwanisambo kupibva kuti tisafuniwa na Yahova na kuona kuti ndife akutawirika kuna iye tinganyerezera kufunika kwa ciomboli.

18. Ndi cinyindiro cipi cinafuna kukhala na ife tingapitiriza kufuna Babathu wakudzulu?

¹⁸ Ndimomwene kuti maseze muwangisire toera kuphatisira pyonsene pidapfundza ife mu nsolo uno, midzidzi inango panango munatsukwala peno munapenula khala Yahova asakomerwa na imwe. Pyenepi pingacitika, kumbukani kuti Yahova asakomerwa na ale “anapitiriza kunfuna.” (Tiya. 1:12) Natenepa pitirizani kuwangisa uxamwali wanu na Yahova, pontho wangisirani toera kubvesesa njira zinaphatisira iye toera kupangiza kuti asakomerwa na imwe. Pontho kumbukani kuti Yahova “nee ali kutali na mʼbodzi na mʼbodzi wa ife.”—Mabasa 17:27.