1-2. Munthu asafunika kucitanji mbadzati kubatizwa?

 MU PYAKA pixanu pidapita, anthu azinji kakamwe abatizwa mbakhala Mboni za Yahova. Azinji mwa anthu anewa akhala ninga Timoti, wakuti apfundziswa undimomwene “kubulukira mu uwana.” (2 Tim. 3:14, 15) Anango apfundza undimomwene mbali akulu, anango mbali ankhalamba. Mwacitsandzo, pyaka pingasi nduli, nkazi m’bodzi adapfundza Bhibhlya na Mboni za Yahova abatizwa pikhali iye na pyaka 97 pyakubalwa!

² Khala panango imwe muli kupfundza Bhibhlya peno anyakubalanu ndi Mboni za Yahova, kodi mwanyerezera kale kubatizwa? Ceneci ndi cifuno cadidi! Mbwenye mbamudzati kubatizwa musafunika kuperekeka kuna Yahova. Nsolo uno unafokotoza kuti pisabvekanji kuperekeka kuna Mulungu. Pontho unakuphedzani toera kuona kuti thangwi yanji nee musafunika kunyinyirika kucita pyenepi khala muli dzololo toera kubatizwa.

PISABVEKANJI KUPEREKEKA KUNA MULUNGU?

3. Longani pitsandzo pinagumanika m’Bhibhlya pya anthu adaperekeka kuna Yahova.

³ M’Bhibhlya, kuperekeka kusabveka kusankhulwa toera kucita cifuno ca Mulungu. Aizraeli akhali dzindza yakuperekeka kuna Yahova. Mbwenye anango mwa iwo akhadaperekeka munjira yakupambulika. Mwacitsandzo, Aroni akhabvala “cidzindikiro cakucena cakuperekeka,” cakuti cikhali lezi yakuyetimira ya ouro ikhali kutsogolo kwa nguwo yakuphimbira nayo nsolo. Lezi ineyi ya ouro ikhapangiza kuti iye asankhulwa toera kutumikira Yahova munjira yakupambulika ninga nyantsembe  wankulu. (Lev. 8:9) Anazireu akhalimbo akupereka kuna Yahova munjira yakupambulika. Fala yakuti “Nazireu,” yathumburuzwa mu fala Yacihebheri yakuti nazirʹ, inabveka “Munthu Adaikhwa Pakhundu,” peno “Munthu Adaperekeka.” Anazireu akhafunika kubvera mitemo yakupambulika inagumanika mu Mwambo wa Mose.—Num. 6:2-8.

4. (a) Mungaperekeka kuna Yahova, ndi cinthu cipi cinakhala cakufunika kakamwe kuna imwe? (b) Fala yakuti ‘kukhondeka’ isabvekanji? (Onanimbo foto.)

⁴ Mungaperekeka kuna Yahova, kucita cifuno ca Mulungu kusakhala kwakufunika kakamwe mu umaso wanu. Imwe musasankhulambo kukhala nyakupfundza wa Yezu Kristu. Yezu alonga: “Munthu anafuna kunditowera, asafunika akhondeke ekhene.” (Mat. 16:24) Ninga ntumiki wakupereka kuna Yahova, musafunika kukhonda pinthu pyonsene pyakuti nee pisabverana na cifuno cace. (2 Akor. 5:14, 15) Pyenepi pisabveka kukhonda “mabasa aunyama” ninga ulukwali. (Agal. 5:19-21; 1 Akor. 6:18) Kodi kubvera mitemo ineyi kunacitisa kuti umaso wanu ukhale wakunentsa? Imwe nee munakhala na maonero anewa khala musafuna Yahova, pontho muli na cinyindiro cakuti kubvera mitemo yace kunakuphedzani. (Mas. 119:97; Iza. 48:17, 18) M’bale unango anacemerwa Nicholas alonga tenepa: “Imwe munakwanisa kuona mitemo ya Yahova ninga mpanda unakupingizani kucita pinafuna imwe peno ninga mpanda unakutsidzikizani toera mukhonde dyiwa na nkhalamu.”

5. (a) Munaperekeka tani kuna Yahova? (b) Kuperekeka na ubatizo pyasiyana tani? (Onanimbo foto.)

⁵ Munaperekeka tani kuna Yahova? Imwe munampanga m’phembero kuti munalambira iye basi, pontho munaikha cifuno cace pa mbuto yakutoma mu umaso wanu. Mungacita pyenepi, munapikira kuna Yahova kuti munapitiriza kunfuna “na ntima wanu onsene, na umaso wanu onsene, na ndzeru zanu zonsene  na mphambvu zanu zonsene.” (Marko 12:30) Anafuna dziwa kuperekeka kweneku basi ene ndimwe na Yahova. Mbwenye ubatizo usacitwa pakweca toera kupangiza kuna anthu kuti imwe mwaperekeka. Kuperekeka kwanu ndi pikiro yakufunika kakamwe, pontho Yahova asadikhira kuti mucite pidapikira imwe.—Ekl. 5:4, 5.

THANGWI YANJI MUSAFUNIKA KUPEREKEKA KUNA YAHOVA?

6. Ninji cinacitisa munthu kuperekeka kuna Yahova?

⁶ Thangwi ikulu inakucitisani kuperekeka kuna Yahova ndi yakuti musanfuna. Ufuni unoyu nee ndi thangwi ya mabvero basi, mbwenye ndi thangwi ya “cidziwiso candimomwene” na ‘kubvesesa pinthu pyauzimu’ pidapfundza imwe thangwi ya Yahova mbapicitisa kuti ufuni wanu kuna iye uthimizirike. (Akol. 1:9) Pidapfundza imwe Bhibhlya mwakhala na cinyindiro cakuti (1) Yahova ndi wandimomwene, (2) Bhibhlya ndi Mafalace, pontho (3) iye asaphatisira gulu yace toera kukwanirisa cifuno cace.

7. Munthu asafunika kucitanji mbadzati kuperekeka kuna Mulungu?

⁷ Ale anaperekeka kuna Yahova asafunika kudziwa pipfundziso pyakutoma pya m’Mafalace na kubvera mitemo ya Yahova. Iwo asawangisira toera kupanga anango pinthu pidapfundza iwo m’Bhibhlya. (Mat. 28:19, 20) Ufuni wawo kuna Yahova usathimizirika, pontho iwo asafuna kulambira basi ene iye. Nee ndi pyenepi pinacitika kuna imwe? Mungafuna Yahova munjira ineyi, imwe munaperekeka na kubatizwa thangwi ya cifuno canu. Imwe nee munacita pyenepi toera kukomeresa mpfundzisi wanu wa Bhibhlya peno anyakubalanu, peno thangwi axamwali anu ali kucitambo pyenepi.

8. Kupereka takhuta kunakuphedzani tani toera kuperekeka kuna Yahova? (Masalmo 116:12-14)

 ⁸ Munganyerezera pinthu pyonsene pidakucitirani Yahova, imwe munafuna kupereka takhuta kakamwe kuna iye, pontho munafuna kuperekeka kuna iye. (Lerini Masalmo 116:12-14.) Bhibhlya isalonga kuti “muoni onsene wadidi na wakulungama” usabuluka kuna Yahova. (Tiya. 1:17) Ukulu kakamwe mwa miyoni ineyi ndi ntsembe ya Mwanace, Yezu. Thangwi yanji? Thangwi kubulukira mu ciomboli, imwe munakwanisa kukhala na uxamwali wakuwanga na Yahova. Pontho Yahova akupasani cidikhiro cakukhala m’maso kwenda na kwenda. (1 Juw. 4:9, 10, 19) Na thangwi ineyi, kuperekeka kuna Yahova ndi ibodzi mwa njira zakupangiza kuti musapereka takhuta kakamwe thangwi ya ufuni wace ukulu na nkhombo zonsene zidakupasani iye. (Dheu. 16:17; 2 Akor. 5:15) Njira ineyi yakupereka takhuta isalongwa mu nsolo 46, khundu 4, ya bukhu yakuti Tsandzayani na Umaso Kwenda na Kwenda!, pontho khundu ineyi iri na vidhyu ya mphindi zitatu ya nsolo wakuti Perekani Ntsembe Zanu Kuna Mulungu.

MULI DZOLOLO TOERA KUPEREKEKA KUNA YAHOVA NA KUBATIZWA?

9. Thangwi yanji munthu nee asafunika kukakamizika toera kuperekeka?

⁹ Panango musaona kuti nee muli wakukhunganyika toera kuperekeka kuna Yahova na kubatizwa. Panango musafunika kucita macinjo mu umaso wanu toera kubvera midida ya Yahova peno musafunika kudikhira pang’ono toera kuwangisa cikhulupiro canu. (Akl. 2:6, 7) Nee ndi anyakupfundza Bhibhlya onsene anathambaruka mu ndzidzi ubodzi ene, pontho nee ndi anapiana onsene anaperekeka na kubatizwa na thunga ibodzi ene. Na thangwi ineyi, wangisirani toera kuona pinthu pinafunika imwe kucinja mwakubverana na pire pinakwanisa imwe kucita, tayu mukulandanisa na anango.—Agal. 6:4, 5.

10. Munacitanji mungadzindikira kuti nee muli wakukhunganyika toera kuperekeka na kubatizwa? (Onanimbo bokosi ya nsolo wakuti “ Kuna Aphale na Atsikana Akuti Anyakubalawo Ndi Mboni za Yahova.”)

¹⁰ Maseze mudzindikire kuti nee muli wakukhunganyika toera kuperekeka kuna Yahova, lekani kubwerera nduli. Phembani Yahova toera akuphedzeni kucita macinjo mu umaso wanu. (Afil. 2:13; 3:16) Imwe munakwanisa kukhala na cinyindiro cakuti iye anabvesera maphembero anu, mbakuphedzani.—1 Juw. 5:14.

THANGWI YANJI ANANGO ASAGOPA KUPEREKEKA NA KUBATIZWA?

11. Yahova anatiphedza tani toera tipitirize kukhala akukhulupirika kuna iye?

¹¹ Anango akuti ali akukhunganyika toera kuperekeka na kubatizwa asapitiriza kunyinyirika. Thangwi yanji? Thangwi iwo asagopa kuti angamala kubatizwa anacita madawo makulu mbabuluswa mu mpingo. Khala imwe musagopa pyenepi, nyindirani kuti Yahova anakupasani mphambvu “toera mufambe mwakuthema ninga munafunira” iye. (Akol. 1:10) Iye anakupasanimbo mphambvu toera kucita pinthu pyadidi. Iye aphedza kale anthu azinji toera kucita pinthu pyadidi. (1 Akor. 10:13) Na thangwi ineyi, ndi anthu akucepa kakamwe anabuluswa mu mpingo. Yahova asaphedza atumiki ace toera apitirize kukhala akukhulupirika.

12. Tinacitanji toera ticalire kucita madawo makulu?

¹² Anthu onsene asayeserwa toera kucita pinthu pyakuipa. (Tiya. 1:14) Mbwenye imwe munakwanisa kusankhula pinafuna imwe kucita mungayeserwa. Undimomwene ndi wakuti ndimwe anafunika kusankhula pinafuna imwe kucita na umaso wanu. Maseze anthu anango asalonga kuti nee tinakwanisa kutonga  mabvero athu na pinthu pinacita ife, unoyu ndi uthambi. Imwe munakwanisa kutonga mabvero anu mbamucalira kucita pinthu pyakuipa. Natenepa, mungayeserwa, imwe munakwanisa kucalira kucita cinthu cakuipa. Mphapo ninji pinafuna kukuphedzani toera kucita pyenepi? Phemberani ntsiku zonsene. Pfundzani Mafala a Mulungu mwakukhonda phonya. Lekani kudjomba misonkhano. Mwazani mphangwa zadidi. Kucita pyenepi mwakukhonda phonya kunakuphedzani toera kupitiriza kukhala akukhulupirika kuna Yahova. Pontho lekani duwala kuti Yahova anakuphedzani toera mukwanise kucita pyenepi.—Agal. 5:16.

13. Thangwi yanji Zuze ndi citsandzo cadidi kuna ife?

¹³ Pinakhala pyakukhonda nentsa toera kupitiriza kukhala wakhulupirika kuna Yahova mungacita cisankhulo mbamudzati kuyeserwa toera kucita madawo. M’Bhibhlya muli na pitsandzo pya anthu azinji adacita pyenepi maseze akhali akusowa ungwiro. Mwacitsandzo, nkazi wa Putifare ayesera kazinji kene kunyengerera Zuze toera apite naye m’mabonde. Mbwenye Zuze akhadziwa kale pikhafuna iye kucita. Bhibhlya isalonga kuti “iye akhonda” mbalonga: “Ndinakwanisa tani kucita cinthu ceneci cakuipa kakamwe, mbandidawira Mulungu?” (Gen. 39:8-10) Mwakukhonda penula, Zuze akhadziwa pikhafuna iye kucita mbadzati kuyeserwa na nkazi wa Putifare. Na thangwi ineyi, pyakhala pyakukhonda nentsa kuna iye toera kucita pinthu pyadidi mu ndzidzi udayeserwa iye.

14. Tinacalira tani kucita madawo tingayeserwa?

¹⁴ Munatowezera tani citsandzo ca Zuze? Imwe munakwanisa kusankhula cincino pinthu pinafuna imwe kucita mungayeserwa. Pfundzani kukhonda mwakucimbiza kucita pinthu pinaida Yahova, ngakhale kupinyerezera. (Mas. 97:10; 119:165) Mungacita pyenepi, imwe nee munadawa mungayeserwa. Imwe munadziwa pinthu pinafuna imwe kucita, thangwi mwacita kale cisankhulo.

15. Munthu anapangiza tani kuti ‘akusaka Yahova na ntima onsene’? (Ahebheri 11:6)

¹⁵ Panango imwe musadziwa kuti mwagumana undimomwene pontho musafuna kutumikira Yahova na ntimanu onsene, mbwenye musaona kuti nee muli wakukhunganyika toera kuperekeka na kubatizwa. Imwe munakwanisa kucita pinthu ninga pidacita Mambo Dhavidhi. Imwe munakwanisa kudembetera Yahova: “Mulungu, ndidingeni, pontho dziwani ntima  wanga. Ndidingeni, pontho dziwani pinandidzudzumisa. Onani khala ndiri na manyerezero akuipa, pontho nditsogolereni munjira ya kwenda na kwenda.” (Mas. 139:23, 24) Yahova asapasa nkhombo ale “anansaka na ntima onsene.” Mungawangisira toera kuperekeka na kubatizwa munapangiza kuti mukunsaka na ntima onsene.—Lerini Ahebheri 11:6.

PITIRIZANI KUFENDEDZERA YAHOVA

16-17. Yahova asabweresa tani kuna iye ale anakuzwa na anyakubala akuti ndi Mboni za Yahova? (Juwau 6:44)

¹⁶ Yezu alonga kuti anyakupfundzace asabwereswa na Yahova. (Lerini Juwau 6:44.) Nyerezerani kuti mafala anewa asabvekanji kuna imwe. Yahova asaona cinthu cadidi muna m’bodzi na m’bodzi anasankhula iye toera kuntumikira. Iye asaona m’bodzi na m’bodzi wa ife ninga ‘munthu wace wakufunika kakamwe.’ (Dheu. 7:6) Iye asakuonanimbo munjira ibodzi ene.

¹⁷ Panango ndimwe m’phale peno ntsikana anakuzwa na anyakubala akuti ndi Mboni za Yahova. Panango munapibva kuti muli kutumikira Yahova basi ene thangwi anyakubalanu ali kucita pyenepi, tayu thangwi Yahova akusankhulani. Ngakhale tenepo, Bhibhlya isalonga: “Fendedzerani Mulungu, iye anakufendedzeranimbo.” (Tiya. 4:8; 1 Kro. 28:9) Mungatoma kufendedzera kuna Yahova, iye anakufendedzeranimbo. Yahova nee asakuonani basi ene ninga munthu anacita khundu ya nsoka. Mbwenye asaona m’bodzi na m’bodzi wa ife, kuphatanizambo ale anakuzwa na anyakubala akuti ndi Mboni za Yahova. Munthu unoyu angatoma kufendedzera kuna Yahova, Yahova asafendedzerambo kuna iye, ninga pinalonga lemba ya Tiyago 4:8.—2 Atesalonika 2:13.

18. Tinapfundzanji mu nsolo unatowera? (Masalmo 40:8)

¹⁸ Mungaperekeka kuna Yahova mbamubatizwa, imwe musatowezera citsandzo ca Yezu. Iye aperekeka kuna Babace mbacita pyonsene pikhafuna iye. (Lerini Masalmo 40:8; Aheb. 10:7) Mu nsolo unatowera, tinapfundza pinthu pinafuna kukuphedzani toera mupitirize kutumikira Yahova mwakukhulupirika pakumala kubatizwa.