1-2. Ndi nkhombo zipi zinakhala na munthu angamala kubatizwa?

 IFE tisakhala akutsandzaya kakamwe tingabatizwa mbaticita khundu ya atumiki a Yahova. Ndi mwai ukulu kakamwe kukhala na uxamwali wakuwanga na Yahova. Ife tisatawirambo mafala adalonga nyamasalmo Dhavidhi kuti: “Nyakutsandzaya ndi ule anasankhula imwe [Yahova] mbamum’bweresa dhuzi na imwe toera akhale panyumba panu.”—Mas. 65:4.

² Nee ndi anthu onsene anatawiriswa na Yahova toera acite khundu ya atumiki ace. Ninga pidapfundza ife mu nsolo udamala, Yahova asafendedzera ale anapangiza kuti asafuna kukhala na uxamwali na iye. (Tiya. 4:8) Mungasankhula kuperekeka kuna Yahova mbamubatizwa, imwe munafendedzera kuna Yahova munjira yakupambulika. Khalani na cinyindiro cakuti mungamala kubatizwa, iye ‘anadzakutsanulirani nkhombo mbamukhonda kusowa cinthu.’—Mal. 3:10; Yer. 17:7, 8.

3. Ndi cinthu cipi cakufunika kakamwe cinafunika ife kucita tingamala kubatizwa? (Ekleziaste 5:4, 5)

³ Ubatizo ndi kutoma kwa umaso wanu toera kutumikira Yahova. Mungamala kubatizwa, musafunika kuwangisira toera kucita pinthu mwakubverana na pidapikira imwe, maseze muthimbane na mayesero a cikhulupiro. (Lerini Ekleziaste 5:4, 5.) Ninga nyakupfundza wa Yezu, imwe musatowezera citsandzo ca Yezu na kubvera mwadidi matongero ace. (Mat. 28:19, 20; 1 Ped. 2:21) Nsolo uno unakuphedzani toera kucita pyenepi.

PITIRIZANI KUTOWERA YEZU MWAKUKHONDA TSALAKANA MAYESERO

4. Ndi munjira ipi anyakupfundza a Yezu asakwata “muti wakusikimizira”? (Luka 9:23)

⁴ Mungamala kubatizwa nee pisabveka kuti nee munathimbana na mayesero. Yezu alonga kuti anyakupfundzace mbadathukula  ‘muti wakusikimizira.’ Mwandimomwene, iwo mbadacita pyenepi “ntsiku zonsene.” (Lerini Luka 9:23.) Kodi mafala anewa asabveka kuti Yezu akhalonga kuti atowereri ace ndzidzi onsene mbadathimbana na nyatwa? Nkhabe. Iye basi ene akhagomezera kuti kusiyapo nkhombo zikhafuna kukhala na iwo, mbadathimbana na nyatwa. Zinango mwa nyatwa zenezi mbazidakhala zakunentsa kakamwe.—2 Tim. 3:12.

5. Ndi nkhombo zipi zidapikira Yezu kuna ale anawangisira kuikha Umambo wa Mulungu pa mbuto yakutoma?

⁵ Panango imwe muli kutcingwa na acibale anu, peno panango mwasiya pinthu pyanu pyakumanungo toera mukwanise kuikha Umambo wa Mulungu pa mbuto yakutoma. (Mat. 6:33) Khala ndi tenepo, khalani na cinyindiro cakuti Yahova asaona mabasa anacita imwe mwakukhulupirika. (Aheb. 6:10) Panango imwe mwakwanisa kuona kuti mafala adalonga Yezu thangwi ya pyenepi ndi andimomwene. Iye alonga: “Ule adasiya nyumba yace, abale ace amuna peno akazi, pai wace, mai wace, anace, peno munda wace thangwi ya ine na thangwi ya mphangwa zadidi, anadzatambira pizinji kupiringana 100 mu ndzidzi uno—nyumba, abale amuna na akazi, amama, ana na minda, kubulukira mu kutcingwa, pontho ntsogolo anadzagumana umaso wakukhonda mala.” (Marko 10:29, 30) Nkhombo zinatambira imwe ndi zikulu kakamwe kupiringana kuwangisira konsene kudacita imwe.—Mas. 37:4.

6. Thangwi yanji musafunika kupitiriza kucalira ‘pinthu pinasirira manungo’ pakumala kubatizwa?

⁶ Pakumala kubatizwa, imwe musafunika kupitiriza kucalira ‘pinthu pinasirira manungo.’ (1 Juw. 2:16) Pyenepi ndi pyakufunika thangwi imwe munapitiriza kukhala wakusowa ungwiro. Panango midzidzi inango munakhala na mabvero ninga akhali na mpostolo Paulu. Iye alemba: “Muntima mwanga ndisakomerwa kakamwe na mwambo wa Mulungu, mbwenye m’manungo mwanga ndisaona mwambo unango mbukamenyana na mwambo wa m’manyerezero anga, mbundicitisa kukhala bitcu wa mwambo wa madawo uli m’manungo mwanga.” (Aroma 7:22, 23) Panango munatsukwala thangwi ya kupitiriza kuthimbana na mabvero akucita pyakuipa. Mbwenye kukumbuka pikiro idacita imwe kuna Yahova mu ndzidzi udaperekeka imwe kuna iye kunakupasani mphambvu toera kukunda mayesero. Mwandimomwene, pikiro idacita imwe kuna Yahova inakuphedzani toera kuthimbana na mayesero. Munjira ipi?

7. Kuperekeka kuna Yahova kunakuphedzani tani toera mupitirize kukhala wakukhulupirika kuna iye?

⁷ Mungaperekeka kuna Yahova, imwe musakhondeka mwekhene. Pyenepi pisabveka kuti imwe musakhonda pifuno pyanu pyakuti mbapidakucitisani kutsukwalisa Yahova. (Mat. 16:24) Natenepa mungathimbana na mayesero, imwe nee munafunika kunyerezera pinafunika imwe kucita. Thangwi imwe munagumanika kuti mwasankhula kale pinafuna imwe kucita toera mupitirize kukhala wakukhulupirika kuna Yahova. Imwe munakhala dzololo toera kukomeresa Yahova. Pontho munakhala ninga Yobe. Maseze athimbana na nyatwa zakunentsa kakamwe, iye alonga na cinyindiro consene kuti: “Ine nee ndinasiya kukhala munthu wakukhulupirika!”—Yobe 27:5.

8. Kunyerezera phembero idacita imwe toera kuperekeka kuna Yahova kunakuphedzani tani toera kucalira mayesero?

⁸ Munganyerezera phembero idacita imwe toera kuperekeka kuna Yahova, munakhala na mphambvu toera kucalira mayesero onsene. Mwacitsandzo, imwe nee munasirira munthu unango wakuti nee ndi nkazanu peno mamunanu. Thangwi imwe mwapikira kale kuna Yahova kuti cipo munacita pyenepi. Mungakhonda tawirisa kuti mabvero akuipa akule muntima mwanu, imwe nee munafunika kuthimbana nawo ntsogolo. Imwe ‘munacalira kupita na njira ya anyakuipa.’—Mis. 4:14, 15.

9. Kunyerezera phembero idacita imwe pa kuperekeka kunakuphedzanimbo tani toera kuikha Yahova pa mbuto yakutoma?

 ⁹ Ndiye tani khala mwapaswa basa yakuti inakupingizani toera kugumanika pa misonkhano Yacikristu? Imwe musadziwa pinafuna imwe kucita. Thangwi pyenepi mbapidzati kucitika, imwe mukhadacita kale cisankhulo cakuti nee mbamudatawira basa inakupingizani toera kugumanika pa misonkhano. Natenepa, imwe nee munatawira basa ineyi buluka penepo mbamuyesera kusaka njira yakupitiriza kuikha Yahova pa mbuto yakutoma. Kunyerezera citsandzo ca Yezu kunatiphedza. Iye akhali dzololo toera kukomeresa Babace. Ninga Yezu, khalani dzololo toera kucalira mwakucimbiza pinthu pyonsene pyakuti pinatsukwalisa Mulungu adasankhula imwe kutumikira.—Mat. 4:10; Juw. 8:29.

10. Yahova anakuphedzani tani toera ‘mupitirize kutowera’ Yezu pakumala kubatizwa?

¹⁰ Undimomwene ndi wakuti nyatwa na mayesero pinakupasani mwai toera kupangiza kuti muli dzololo toera ‘kupitiriza kutowera’ Yezu. Mu ndzidzi unacita imwe pyenepi, khalani na cinyindiro cakuti Yahova anakuphedzani. Bhibhlya isalonga: “Mulungu ndi wakukhulupirika, iye nkhabe kudzatawirisa kuti muthimbane na mayesero akuti nee munakwanisa kuapirira, mbwenye mayesero angabwera, iye anadzakusakirani njira yakubuluka nayo, toera mukwanise kupirira.”—1 Akor. 10:13.

MUNAPITIRIZA TANI KUTOWERA YEZU?

11. Ndi ipi ibodzi mwa njira zadidi kakamwe toera kupitiriza kutowera Yezu? (Onanimbo foto.)

¹¹ Yezu atumikira Yahova na ntima onsene, pontho ndzidzi onsene akhacita phembero kuna iye. (Luka 6:12) Mwandimomwene, ibodzi mwa njira zadidi kakamwe toera kupitiriza kutowera Yezu pakumala kubatizwa ndi kupitiriza kucita pinthu pyakuti pinawangisa uxamwali wanu na Yahova. Bhibhlya isalonga: “Mwakukhonda tsalakana kuti tathambaruka mpaka papi, tendeni tipitirize kufamba munjira ibodzi  ene.” (Afil. 3:16) Kazinji kene, ife tisabva pitsandzo pya abale na alongo adawangisira toera kucita pizinji m’basa ya Yahova. Panango iwo akurusari Xikola ya Amwazi Mphangwa a Umambo peno aenda kaphedzera kumbuto iri na amwazi mphangwa akucepa. Khala makhaliro anu asakutawirisani, imwe munakwanisambo kukhazikisa cifuno ceneci. Atumiki a Yahova asasaka njira zakucita pizinji m’basa yace. (Mabasa 16:9) Mphapo ndiye tani khala cincino imwe nee munakwanisa kucita pyenepi? Lekani kunyerezera kuti nee ndimwe wakufunika thangwi yakucimwana kucita pyenepi. Cakufunika ndi kupitiriza kupirira. (Mat. 10:22) Lekani duwala kuti Yahova asatsandzaya mungacita pinakwanisa imwe mwakubverana na makhaliro anu. Pyenepi ndi pyakufunika kakamwe toera mukwanise kupitiriza kutowera Yezu pakumala kubatizwa.—Mas. 26:1.

12-13. Munacitanji mungaona kuti nee muli kucitabve mabasa a Yahova mwaphinga? (1 Akorinto 9:16, 17) (Onanimbo bokosi ya nsolo wakuti “ Pitirizani Kuthamanga.”)

¹² Munacitanji mungaona kuti nee muli kucita phembero na ntima onsene peno nee musakomerwa na utumiki ninga pikhakomerwa imwe kale? Pontho munacitanji khala nee musakomerwabve na kuleri Bhibhlya ninga pikhakomerwa imwe kale? Pyenepi pingacitika kuna imwe pakumala kubatizwa, lekani kunyerezera kuti mwaluza nzimu wa Yahova. Nakuti ndimwe akusowa ungwiro, mabvero anu midzidzi inango asacinja. Mungaona kuti nee mukucitabve mabasa a Yahova mwaphinga, nyerezerani citsandzo ca mpostolo Paulu. Maseze akhawangisira kutowezera Yezu, iye akhadziwa kuti midzidzi inango nee mbadakhala na cifuno cibodzi cene toera kucita pikhafuna iye. (Lerini 1 Akorinto 9:16, 17.) Iye alonga: “Maseze ndicite pyenepi mwakukakamizika, ndisafunika kupitiriza kupicita, thangwi ndasankhulwa toera kucita pyenepi.” Munjira inango, Paulu akhali dzololo  toera kucita mwadidi utumiki wace mwakukhonda tsalakana mabvero akhali na iye.

¹³ Munjira ibodzi ene, lekani kucita pisankhulo mukutsogolerwa na mabvero anu akusowa ungwiro. Wangisirani toera kucita pinthu pyadidi mwakukhonda tsalakana mabvero anu. Thangwi mungapitiriza kucita pinthu pyadidi, mukupita kwa ndzidzi panango mabvero anu anacinja. Mbwenye mu ndzidzi wakuti mabvero anu adzati kucinja, kucita pfundziro ya munthu paekha, kucita phembero, kugumanika pa misonkhano na kumwaza mphangwa, pinakuphedzani toera kupitiriza kutowera Yezu pakumala kubatizwa. Abale na alongo angaona kupirira kwanu m’basa ya Yahova, iwo anawangiswa kakamwe.—1 Ates. 5:11.

“PITIRIZANI KUONESESA . . . PITIRIZANI KUDINGIKA”

14. Musafunika kupitiriza kucitanji, pontho thangwi yanji? (2 Akorinto 13:5)

¹⁴ Mungamala kubatizwa, musafunika kupitiriza kudingika mwekhene. (Lerini 2 Akorinto 13:5.) Midzidzi inango ndi pyadidi kuona khala mukucita phembero ntsiku zonsene, kuleri na kupfundza Bhibhlya, kugumanika pa misonkhano na basa yakumwaza mphangwa. Yeserani kusaka njira toera kucita pinthu pyenepi mwakutsandzaya. Mwacitsandzo, bvundzikani tenepa: ‘Kodi ine ndisakwanisa kufokotoza kuna anango pipfundziso pyakutoma pya m’Bhibhlya? Pana pinthu pinafunika ine kucita toera utumiki wanga ukhale wakutsandzayisa kakamwe? Maphembero anacita ine asapangiza kuti ndisanyindira Yahova na ntima onsene? Ndisagumanika pa misonkhano Yacikristu mwakukhonda phonya? Ndisafunika kucitanji toera ndibvesere mwadidi misonkhano na kupereka mitawiro yadidi?’

15-16. Mwapfundzanji na citsandzo ca m’bale Roberto?

¹⁵ Imwe musafunikambo kupitiriza kudingika mwekhene toera mudziwe pinthu pinacimwana imwe kucita. M’bale anacemerwa Roberto alonga pinthu pidancitikira pinapangiza kuti ndi pyakufunika kudingika tekhene. Iye alonga: “Pikhali ine cifupi na pyaka 20 pyakubalwa, ndikhaphata basa midzidzi mingasi pa sumana. Ntsiku inango pidakotoka ine, nkazi unango akhaphata basa na ine andipanga toera tiende kunyumba kwace. Iye andipanga kuti tinakhala tekhene pontho akhafuna kupita m’mabonde na ine. Pakutoma ine nee ndampanga kuti thangwi yanji ndikhakhonda kuenda kunyumba kwace, mbwenye buluka penepo ndampanga kuti nee ndinaenda, pontho ndanfokotozera mathangwi ace.” Roberto akhonda kucita madawo, pontho pyenepi ndi pyadidi kakamwe. Mbwenye mukupita kwa ndzidzi, iye anyerezera pyenepi, pontho adzindikira kuti akhafunika kucita pinthu munjira yakusiyana. Iye alonga: “Ine nee ndakhonda na ntima onsene peno  mwakucimbiza ninga pidakhonda Zuze nkazi wa Putifare. (Gen. 39:7-9) Mwandimomwene, ndadzumatirwa thangwi yakuona kuti pikhali pyakunentsa kuna ine toera kukhonda. Pyenepi pyandiphedza toera kuona kuti ndisafunika kuwangisa uxamwali wanga na Yahova.”

¹⁶ Imwe munaphedzeka kakamwe mungadingika ninga pidacita Roberto. Maseze mukhonde kucita madawo mungayeserwa, bvundzikani: ‘Kodi ndakwata ndzidzi ungasi toera kukhonda?’ Mungaona kuti musafunika kucinja, lekani kutsukwala. Komerwani thangwi mwadzindikira pinthu pyakuti nee musapicita mwadidi. Citani phembero kuna Yahova thangwi ya pinthu pinacimwana imwe kucita, pontho citani pinthu pyakuti pinakuphedzani toera kubvera mitemo yace.—Mas. 139:23, 24.

17. Ninji pinacitika tingakhala akukhulupirika kuna Yahova? Perekani citsandzo.

¹⁷ Ife tinakwanisa kupfundza pinthu pinango na citsandzo ca Roberto. Iye alonga: “Pidakhonda ine kuenda kunyumba kwa nkazi akhaphata na ine basa, iye alonga: ‘Iwe wapembera!’ Ine ndambvundza kuti akhafuna kulonganji. Iye alonga kuti xamwali wace ampanga kuti aphale na atsikana onsene akuti ndi Mboni za Yahova asacita pinthu pyakuipa ncibisobiso angakhala na mwai wakucita pyenepi. Natenepa iye akhafuna kuona khala pidampanga xamwali wace ndi pyandimomwene. Ine ndatsandzaya kakamwe thangwi pidacita ine pyapasa mbiri dzina ya Yahova.”

18. Muli wakutonga toera kucitanji pakumala kubatizwa? (Onanimbo bokosi ya nsolo wakuti “ Misolo Yakuti Munakomerwa Nayo.”)

¹⁸ Mungaperekeka kuna Yahova mbamubatizwa, imwe munapangiza kuti musafuna kucenesa dzina yace mwakukhonda tsalakana pinafuna kucitika. Pontho khalani na cinyindiro cakuti Yahova asadziwa nyatwa zinathimbana na imwe na mayesero anakunda imwe. Iye anakupasani nkhombo thangwi yakuwangisira kwanu toera kukhala wakukhulupirika. Khalani na cinyindiro cakuti mukuphatisira nzimu wace wakucena, iye anakupasani mphambvu toera mukwanise kucita pyenepi. (Luka 11:11-13) Na ciphedzo ca Yahova, imwe munakwanisa kupitiriza kutowera Yezu pakumala kubatizwa.