Kodi Musathawira Kuna Yahova?
‘Yahova asaombola umaso wa atumiki ace, mbakhonda kuonesa nyatwa onsene anathawira kwa iye.’—MASALMO 34:22.
NYIMBO: 49, 32
1. Atumiki azinji akukhulupirika a Mulungu asapibva tani thangwi yakusowa ungwiro?
MPOSTOLO Paulu alonga: ‘Ndine munthu wakusowa basa!’ (Aroma 7:24) Lero, atumiki azinji akukhulupirika a Mulungu asapibvambo tenepo. Thangwi yanji? Thangwi maseze tisafuna kukomeresa Yahova, tonsene tabalwa na madawo, pontho ndife akusowa ungwiro. Natenepa, panango nee tisapibva mwadidi tingacimwana kunkomeresa. Akristu anango akuti akhadacita madawo makulu akhala na manyerezero akuti Yahova cipo anaalekerera.
2. (a) Lemba ya Masalmo 34:22 isapangiza tani kuti atumiki a Mulungu nee asafunika kupasika mulando? (b) Tinapfundzanji mu nsolo uno? (Onani bokosi “ Ntsonga Ikulu ya Nsolo Uno”)
2 Bhibhlya isatipanga kuti tingathawira kuna Yahova, nee tinadzakhala na mabvero akupasika mulando. (Lerini Masalmo 34:22.) Kodi pisabvekanji kuthawira kuna Yahova? Tisafunika kucitanji khala tisafuna kulekererwa madawo athu na Yahova? Tinakwanisa kugumana matawiro a mibvundzo ineyi mukupfundza pya masasanyiro a mizinda yakuthawira ya mu Israeli wakale. Masasanyiro anewa akhacita khundu ya cibverano ca Mwambo adzapitirwa m’mbuto pa Pentekoste mu caka 33. Mbwenye Mwambo ukhabuluka kwa Yahova. Natenepa, kubulukira m’masasanyiro a mizinda yakuthawira, tisapfundza kuti Yahova asaona tani madawo, nyakudawa na ale anatcunyuka. Cakutoma, tendeni tidinge kuti thangwi yanji mu Israeli mukhali na mizinda yakuthawira, pontho ikhaphatisirwa tani.
‘SANKHULANI MIZINDA YAKUTHAWIRA’
3. Ninji pikhacitika kuna m’bodzi wa Aisraeli angapha munthu mwakufuna?
3 Yahova akhadzudzumika kakamwe munthu angaphiwa mu Israeli. Khala m’bodzi wa Aisraeli apha munthu mwakufuna, akhafunikambo kuphiwa. Munthu akhacita pyenepi akhali ‘nyakubwezera ciropa’ wakuti akhali m’bale wamamuna wa munthu adaphiwa. (Numero 35:19) Munjira ineyi, akhakwanisa kulipa umaso wa munthu adaphiwa mwakusowa mathangwi. Mwambo unoyu ukhaaphedza toera kukhala na makhaliro akucena mu Dziko Yakupikirwa. Yahova alonga: ‘Lekani kupswipisa dziko inakhala imwe’ thangwi yakupha munthu.—Numero 35:33, 34.
4. Ninji pikhacitika kuna m’bodzi wa Aisraeli angapha munthu mwasusudeu?
4 Mphapo ninji pikhacitika kuna m’bodzi wa Aisraeli akhapha munthu mwasusudeu? Maseze apha mwasusudeu, iye akhali na mulando wa ciropa thangwi yakupha munthu. (Genesi 9:5) Mbwenye kuna munthu unoyu, Yahova alonga kuti akhafunika kulekererwa. Nyakupha munthu mwasusudeu akhafunika kuthawa nyakubwezera ciropa mbaenda ku nzinda ubodzi mwa mizinda mitanthatu yakuthawira. Iye akhafunika kukhala kweneko toera kutsidzikizwa mpaka kufa kwa nyantsembe wankulu.—Numero 35:15, 28.
5. Thangwi yanji masasanyiro a mizinda yakuthawira asatiphedza toera kudziwa mwadidi Yahova?
5 Masasanyiro a mizinda yakuthawira nee akhadacitwa na munthu. Iwo akhadacitwa na Yahova. Iye alonga kuna Yoswa: ‘Panga Aisraeli toera asankhule mizinda yakuthawira.’ (Yoswa 20:1, 2, 7, 8) Yahova alonga kuti mizinda ineyi isafunika kukhala yakupambulika. Natenepa, kubulukira m’masasanyiro anewa tisapfundza pinthu pizinji thangwi ya Yahova. Mwacitsandzo, asatiphedza toera kubvesesa mwadidi ntsisi za Yahova. Pontho asatipfundzisa kuti tinathawira tani kuna Yahova lero.
IYE ASAFUNIKA ‘KULONGA PIDACITA IYE’ KUNA AKULU A MPINGO
6, 7. (a) Fokotozani basa ikhali na akulu a mpingo pakutonga munthu adapha ndzace mwasusudeu. (Onani cithundzithundzi cakutoma.) (b) Thangwi yanji nyakuthawa akhafunika kuenda kalonga kuna akulu a mpingo?
6 Khala m’bodzi wa Aisraeli apha munthu mwasusudeu, akhafunika kuthamanga kuenda ku nzinda wakuthawira ‘mbalonga pidacita iye’ kuna akulu a mpingo pa nsuwo wa nzinda. Akulu a mpingo akhafunika kuntambira mwadidi. (Yoswa 20:4) Mukupita kwa ndzidzi, iwo akhaenda naye kuna akulu a mpingo a mu nzinda udaphiwa munthu. (Lerini Numero 35:24, 25.) Akulu anewa angalonga kuti cidengwa cacitika mwasusudeu, iwo akhabweza pontho munthu unoyu ku nzinda udathawira iye.
7 Thangwi yanji nyakuthawa akhafunika kulonga kuna akulu a mpingo? Akulu a mpingo akhafunika kucita pyonsene toera mbumba ya Israeli ipitirize na makhaliro akucena na kuphedza munthu adapha ndzace mwasusudeu toera kulekererwa na Yahova. Nyakudziwa pya Bhibhlya unango alonga kuti nyakuthawa angakhonda kuenda kuna akulu a mpingo, akhafunika kuphiwa, thangwi nee abvera ntemo udakhazikisa Mulungu. Iye athimiza kuti munthu anapha ndzace mwasusudeu akhafunika kuphemba ciphedzo na kuciphatisira toera kupitiriza kukhala maso. Angakhonda kuenda ku nzinda ubodzi mwa mizinda yakuthawira, m’bodzi wa acibale a munthu adaphiwa akhali na ufulu wakumupha.
8, 9. Thangwi yanji Nkristu angacita madawo makulu asafunika kulonga kuna akulu a mpingo?
8 Lero, toera kukhala pontho na uxamwali wadidi na Yahova, Nkristu adacita madawo makulu asafunika kuenda kalonga kuna akulu a mpingo toera amphedze. Thangwi yanji pyenepi ndi pyakufunika kakamwe? Cakutoma, ndi Yahova akhazikisa masasanyiro a akulu a mpingo toera kutonga anthu anacita madawo makulu. (Tyago 5:14-16) Caciwiri, akulu a mpingo asaphedza nyakudawa wakutcunyuka toera akhale pontho wakutawirika kuna Mulungu mbacalira kucita pontho madawo. (Agalata 6:1; Ahebere 12:11) Cacitatu, akulu a mpingo ali na cidzo, pontho apfundziswa toera kuphedza nyakudawa wakutcunyuka kupungula mabvero ace akupasika mulando. Yahova asalonga kuti akulu a mpingo ndi ‘mbuto yakuthawira condzi.’ (Izaiya 32:1, 2) Masasanyiro anewa ndi njira ibodzi isapangiza Mulungu ntsisi zace kwa ife.
9 Atumiki azinji a Mulungu asalulupirwa angalonga kuna akulu a mpingo mbatambira ciphedzo. Mwacitsandzo, m’bale m’bodzi anacemerwa Daniel acita madawo makulu, mbwenye amala miyezi mizinji nee kulonga kuna akulu a mpingo. Iye alonga: “Nakuti pakhadapita ndzidzi uzinji, ndikhanyerezera kuti akulu a mpingo nee mbadakwanisabve kundiphedza.” Ngakhale tenepo, iye ndzidzi onsene akhadzudzumika gopa kudzindikirwa madawo ace, pontho angafuna kucita phembero akhaona kuti cakutoma akhafunika kuphemba kulekererwa kuna Yahova. Pakumalisa, iye aphemba ciphedzo ca akulu a mpingo. Iye alonga: “Mwandimomwene ndikhagopa kufendedzera akulu a mpingo. Mbwenye pidamala ine kulonga nawo pyakhala ninga munthu abulusa ntolo ukulu pa nsolo panga.” Natenepa, Daniel akhakwanisa pontho kulonga na Yahova mwakusudzuka. Lero iye ali na cikumbuntima cakucena, pontho asatumikira ninga ntumiki wakutumikira.
‘IYE ASAFUNIKA KUTHAWIRA MU NZINDA UBODZI MWA MIZINDA INEYI’
10. Kodi nyakupha munthu mwasusudeu akhafunika kucitanji toera kulekererwa?
10 Toera kulekererwa, nyakupha munthu mwasusudeu akhafunika kuthawira ku nzinda wakuthawira wacifupi. (Lerini Yoswa 20:4.) Umaso wace ukhanyindira kuenda ku nzinda mbakhala kweneko mpaka kufa kwa nyantsembe wankulu. Pyenepi pikhaphemba kuwangisira kakamwe. Iye akhafunika kusiya basa yace, nyumba yace na ufulu wakufamba. * (Onani cidzindikiro capantsi.) (Numero 35:25) Mbwenye pikhali pyakufunika, thangwi angabuluka mu nzinda mbadapangiza kuti akhapwaza mulando wace, pontho akhaikha umaso wace pangozwi.
11. Nkristu asafunika kucitanji toera kulekererwa na Mulungu?
11 Lero, nyakudawa wakutcunyuka asafunikambo kucita pinthu toera kulekererwa na Mulungu. Iye asafunika kusiya macitiro ace akuipa. Pyenepi pisaphataniza kucalira cinthu consene cakuti cinancitisa kugwa m’madawo. Mpostolo Paulu alonga pinthu pidacita Akristu akutcunyuka a ku Korinto. Iye longa: ‘Thangwi yakutsukwala ninga munafunira Mulungu. Kwakucitisani kukhala aphinga, akucena, akuipirwa, akugopa, kufuna kutcunyuka na kusasanyira cidadodomeka!’ (2 Akorinto 7:10, 11) Natenepa tingacita pyonsene pinakwanisa ife toera kusiya kucita madawo, tinapangiza Yahova kuti tisadzudzumika kakamwe na makhaliro athu, pontho tisadziwa kuti tisafunika kucita pinthu toera kubverwa ntsisi.
12. Kodi Nkristu asafunika kucitanji toera apitirize kubverwa ntsisi na Yahova?
12 Kodi Nkristu asafunika kucitanji toera kupitiriza kubverwa ntsisi na Yahova? Asafunika kusiya kucita pinthu pyonsene pyakuti pinantsogolera toera kucita madawo. (Mateo 18:8, 9) Mwacitsandzo, khala axamwali anu asakunyengererani toera kucita pinthu pinakhonda komeresa Yahova, musacalira axamwali anewa? Khala musawangisira kakamwe toera mukhonde kumwa mwakupiringana midida, musacalira makhaliro onsene akuti anakutsogolerani toera kumwa mwakupiringana midida? Khala musathimbana na pifuno pyaulukwali, kodi musacalira mafilimu, website, peno pinthu pinango pyakuti pinakucitisani kukhala na manyerezero akuipa? Kumbukani: kuwangisira konsene kunacita imwe toera kubvera mitemo ya Yahova ndi kwakufunika kakamwe kwa iye. Nkhabepo cinthu cisapha kakamwe kupiringana kukhonda khala na uxamwali na Yahova. Munjira inango, nkhabepo cinthu cisatsandzayisa kakamwe kupiringana kufuniwa na Yahova “kwenda na kwenda.”—Izaiya 54:7, 8.
‘MIZINDA INEYI INADZAKHALA YAKUTHAWIRA KWA IMWE’
13. Thangwi yanji nyakuthawa angafika ku nzinda wakuthawira akhapibva kuti apulumuka?
13 Nyakuthawa angafika mu nzinda wakuthawira akhapibva kuti apulumuka. Yahova alonga pya mizinda ineyi: ‘Inadzakhala yakuthawira kwa imwe.’ (Yoswa 20:2, 3) Yahova nee akhaphemba kuti nyakuthawa atongwe pontho thangwi ya nseru ubodzi ene. Kusiyapo pyenepi, iye nee akhafunika kugopa thangwi nyakubwezera ciropa nee mbadakwanisa kupita mu nzinda toera kumupha. Nyakuthawa angapita mu nzinda, pikhaoneka kuti apulumuka thangwi akhatsidzikizwa na Yahova. Iye nee akhali n’kaidi. Iye akhali na umaso wakutsandzayisa, thangwi akhakwanisa kufamba, kuphedza anango na kutumikira Yahova mwaufulu.
Munakwanisa kunyindira kuti Yahova anakulekererani (Onani ndima 14-16)
14. Kodi Nkristu wakutcunyuka asafunika kukhala na cinyindiro cipi?
14 Atumiki anango a Mulungu adacita madawo makulu asapitiriza kukhala na mabvero akupasika mulando, maseze atcunyuka. Anango asapibva kuti Yahova cipo analekerera madawo adacita iwo. Khala musapibvambo tenepo, khalani na cinyindiro cakuti Yahova angalekerera, asacita pyenepi na ntima onsene. Nee musafunika kukhala na mabvero akupasika mulando. Pyenepi ndi pidacitikira Daniel adalonga ife. Pidamala iye kuphedzwa na akulu a mpingo, akhala na cikumbuntima cakucena. Iye alonga: “Nee ndiribve na mabvero akupasika mulando. Pidamala kutsalakanwa madawo anga, pyonsene pyamala. Ninga pidalonga Yahova, iye asakwata madawo athu mbaasiya kutali na ife. Cipo tisaaona pontho.” Nyakuthawa angapita mu nzinda wakuthawira, iye nee akhagopa nyakubwezera ciropa kuti anadzapita mu nzinda toera kumupha. Munjira ibodzi ene, Yahova angalekerera madawo athu, ife nee tisafunika kunyerezera kuti iye anatitcunyusa pontho thangwi ya madawo athu.—Lerini Masalmo 103:8-12.
15, 16. Kodi Nyantsembe wathu Wankulu asacitanji kuna ife?
15 Mwandimomwene, ife tiri na mathangwi mazinji toera kunyindira ntsisi za Yahova kupiringana Aisraeli. Pidamala Paulu kulonga kuti akhapibva ‘wakusowa basa’ thangwi nee mbadakwanisa kubvera Yahova mwakukwana, iye athimiza: “Ndi nkhombo za Mulungu mwa Yezu Kristu Mbuyathu.” (Aroma 7:25) Kodi iye akhafuna kulonganji? Maseze Paulu akhathimbana na pifuno pyakucita madawo, pontho akhadacita madawo nduli, mbwenye iye akhadatcunyuka. Natenepa akhanyindira kuti Yahova amulekerera kubulukira mu ntsembe ya ciomboli ca Yezu. Nakuti Yezu aperekeka ninga ciomboli, ife tinakwanisa kukhala na cikumbuntima cakucena. (Ahebere 9:13, 14) Ninga Nyantsembe Wankulu, Yezu “anakwanisambo kupulumusa pa midzidzi yonsene anthu onsene anaenda kuna Mulungu mwa iye.” (Ahebere 7:24, 25) Mu ndzidzi wakale, nyantsembe wankulu akhaphedza Aisraeli toera kukhala na cinyindiro cakuti Yahova analekerera madawo awo. Thangwi ya Yezu, ninga Nyantsembe wathu Wankulu, tiri na mathangwi mazinji toera kunyindira kuti ‘tinabverwa ntsisi na kuphedzwa pa ndzidzi wakuthema thangwi yakukoma ntima kwa Mulungu.’—Ahebere 4:15, 16.
16 Toera kuthawira kuna Yahova, tisafunika kukhulupira ntsembe ya Yezu. Lekani kunyerezera kuti ciomboli basi ene cisaphata basa kuna anthu onsene. Mbwenye khulupirani kuti imwe munakwanisa kuphindula na ciomboli. (Agalata 2:20, 21) Khulupirani kuti thangwi ya ciomboli, Yahova analekerera madawo anu. Nyindirani kuti ciomboli cinakupasani cidikhiro cakukhala maso kwenda na kwenda. Ntsembe ya Yezu ndi muoni wa Yahova kwa imwe!
17. Thangwi yanji musafuna kuthawira kuna Yahova?
17 Mizinda yakuthawira isatiphedza toera kubvesesa ntsisi za Yahova. Masasanyiro anewa a Mulungu asatipfundzisa kuti umaso ndi wakufunika kakamwe. Asapangizambo kuti akulu a mpingo anatiphedza tani, kutcunyuka kwandimomwene kusabvekanji, pontho tinakhala tani na cinyindiro consene cakuti Yahova atilekerera. Kodi musathawira kuna Yahova? Nkhabepo mbuto inango kusiyapo kuthawira kuna Yahova. (Masalmo 91:1, 2) Mu nsolo unatowera, tinaona kuti mizinda yakuthawira inatiphedza tani toera kutowezera Yahova, Mulungu waulungami na wantsisi.
^ ndima 10 Mwakubverana na Encyclopaedia Judaica, pisaoneka kuti banja ya munthu adapha ndzace mwasusudeu akhafunikambo kuenda kakhala pabodzi na iye mu nzinda wakuthawira.
