1, 2. (a) Ndi muoni upi unadikhira atumiki a Mulungu? (b) Ninji cinafuna kutiphedza toera kudikhira muoni? (Onani cithundzithundzi cakutoma.)

AKRISTU akudzodzwa ali na cidikhiro cakufunika kakamwe. Iwo asadikhira kuenda kakhala kudzulu. Mpostolo Paulu alonga kuti cidikhiro ceneci ndi ‘muoni wakucemerwa kudzulu na Mulungu.’ (Afilipi 3:14) Kudzulu, iwo anadzatonga na Yezu Kristu mu Umambo wace mbaphata basa pabodzi na iye toera kuphedza anthu akhale aungwiro. (Apokalipse 20:6) Ceneci ndi cidikhiro cakutsandzayisa kakamwe! Mabira anango asadikhira muoni wakusiyana. Iwo asadikhira kukhala kwenda na kwenda m’Paraizu pa dziko yapantsi, pontho cidikhiro ceneci cisaatsandzayisa kakamwe!​—2 Pedro 3:13.

² Paulu akhafuna kuphedza Akristu andzace akudzodzwa toera kupitiriza kukhala akukhulupirika mbawina muoni. Iye aapanga: ‘Pitirizani kunyerezera pinthu pyakudzulu, tayu pya pantsi pano.’ (Akolose 3:⁠2) Iwo akhafunika kuikha manyerezero awo ku cidikhiro cawo cakukhala kudzulu. (Akolose 1:4, 5)  Kunyerezera nkhombo zinafuna kutipasa Yahova kusatiphedza toera kuikha manyerezero athu pa nkhombo zenezi, mwakukhonda tsalakana khala tisadikhira kakhala kudzulu peno pa dziko yapantsi.​—1 Akorinto 9:24.

3. Kodi Paulu acenjezanji Akristu a ku Kolose?

³ Paulu acenjezambo Akristu pya ngozwi zakuti zinaacimwanisa kuwina muoni. Mwacitsandzo, iye alembera Akristu a ku Kolose thangwi ya Akristu authambi akuti akhayesera kukomeresa Mulungu mukubvera Mwambo wa Mose m’mbuto mwakukhulupira Kristu. (Akolose 2:​16-​18) Paulu alongambo thangwi ya ngozwi zinaoneka cincino zakuti zinaticimwanisambo kuwina muoni. Iye afokotoza kuti tinacalira tani pifuno pyaulukwali, pontho tinacitanji tinganentsana na banja yathu peno abale athu mu mpingo. Uphungu wa Paulu unatiphedzambo kakamwe lero. Natenepa tendeni tidinge macenjezo mangasi anagumanika mu tsamba idalembera iye Akolose.

4. Thangwi yanji pifuno pyaulukwali pinaticimwanisa kuwina muoni?

⁴ Pidamala Paulu kucenjeza abale ace thangwi ya cidikhiro cawo, iye alemba: ‘Pipheni mphapo pifuno pya m’manungo mwanu ku pinthu pya pantsi pano, pyaulukwali, pyakuzuda pyonsene, pyaukali, pyakusirira pyakuipa na pyakuumirwa, sawasawa ninga pyakulemedza madzimunthu.’ (Akolose 3:⁠5) Pifuno pyaulukwali pinakwanisa kukhala pyakuwanga kakamwe mbatiluza uxamwali wathu na Yahova na cidikhiro cathu ca ntsogolo. M’bale m’bodzi abuluswa mu mpingo thangwi ya pifuno pyace pyaulukwali. Pidabwezereswa iye mu mpingo alonga kuti pifuno pyace pyaulukwali pikhadawanga kakamwe kwakuti adzadzindikira “mwakudembuka kakamwe.”

5. Tinatsidzikizika tani m’makhaliro akuti anaikha pangozwi umaso wathu wauzimu?

⁵ Tisafunika kucita mphole-mphole tingagumanika m’makhaliro akuti anatitsogolera kuswa midida yadidi ya Yahova. Mwacitsandzo, ndi pyandzeru kwa ale anabanyirana kubverana madire anafunika iwo kukhazikisa ninga kukhumbatirana, kumpswompswonana na kukhala pawo okha. (Misangani 22:⁠3) Panaonekambo ngozwi zinango mu ndzidzi unenda ife kubasa, peno tingaphata basa na mamuna peno nkazi wakuti nee ndi wathu. (Misangani 2:10-12, 16) M’makhaliro anewa, musafunika kulonga kuna onsene anaphata na imwe basa kuti ndimwe m’bodzi wa Mboni za Yahova, khalani wacilemedzo na calirani kupfinyirana diso. Tinakwanisambo kuyeserwa toera kucita pinthu pyakuipa tingatsukwala peno kutsoperwa. Natenepa, panango tinafuna citsalakano ca munthu unango. Panango tinakhala na cilepelepe kakamwe mbitifuna kubanyirana na munthu onsene anaona ife. Mungakhala na mabvero anewa, lekani kucita cinthu cakuti cinakucimwanisani kuwina muoni. Sakani ciphedzo ca Yahova na ca abale mu mpingo.​—Lerini Masalmo 34:​18; Misangani 13:20.

6. Thangwi yanji tisafunika kucita mphole-mphole pakusankhula ubalangazi?

⁶ Toera kupha pifuno pyaulukwali, tisafunika kukhonda ubalangazi waulukwali. Lero, ubalangazi uzinji usatikumbusa pinthu pikhacitika mu Sodhoma na Gomora. (Yuda 7)  Anthu anacita nyimbo, mafilimu na maprogramu a televizau asapangiza ulukwali ninga pinthu pyakutawirika pyakuti nkhabe kuphekesa munthu. Ife nee tisafunika kutawira ubalangazi onsene unapereka dziko. Tisafunika kusankhula mwadidi pinthu pinafuna ife kuona na kubvesera. Nee tisafunika kutawirisa kuti kusankhula kwathu ubalangazi kuticimwanise kuwina muoni.​—Misangani 4:23.

7. Ndi nyatwa zipi zakuti panango zinaoneka mu mpingo Wacikristu?

⁷ Tisakomerwa kakamwe kucita khundu ya mpingo Wacikristu. Tisapfundza Mafala a Mulungu pa misonkhano, pontho tisatsalakanana unango na ndzace mwaufuni. Pyenepi pisatiphedza toera kupitiriza kunyerezera muoni. Mbwenye midzidzi inango tinaphonyana maonero na abale peno alongo athu. Tingakhonda kumalisa nyatwa zenezi mwakucimbiza, pinaticitisa kukoya pinthu muntima.​—Lerini 1 Pedro 3:8, 9.

8, 9. (a) Ndi makhaliro api anafuna kutiphedza toera kuwina muoni? (b) Tisafunika kucitanji toera kukhazikisa ntendere khala tatsukwaliswa na m’bale wathu?

⁸ Tisafunika kucitanji toera kucalira kukoya pinthu muntima mbatiwina muoni? Paulu alonga kuna Akristu a ku Kolose: ‘Ninga anthu akusankhulwa na Mulungu, akucena na akufuniwa, khalani antsisi, akukoma ntima, akucepeseka na akupirira. Pitirizani kupirirana na kulekererana unango na ndzace. Lekereranani sawasawa ninga mudakulekererani Yahova. Kusiyapo pyenepi pyonsene, khalani aufuni, thangwi usacitisa anthu kukhala akuphatana.’​—Akolose 3:12-14.

⁹ Ufuni na kukoma ntima kunatiphedza toera kulekerera anango. Khala m’bale peno mulongo alonga peno acita pinthu pyakuti pyatitsukwalisa, tisafunika kukumbuka ndzidzi udalonga ife peno udacita ife pinthu pyakukhonda thema kuna anango, iwo mbatilekerera. Kodi mwapibva tani mu ndzidzi udalekererwa imwe? (Lerini Koelete 7:​21, 22.) Tisafunikambo kunyerezera kukoma ntima kwa Kristu mukugumanya atumiki a Yahova. (Akolose 3:15) Tonsene tisalambira Mulungu m’bodzi ene, tisamwaza mphangwa zibodzi zene, pontho tisathimbana na nyatwa zibodzi zene. Tingakhala akukoma ntima, aufuni na akulekererana unango na ndzace, mpingo unadzakhala wakuphatana mbitipitiriza kunyerezera muoni.

10, 11. (a) Thangwi yanji bibvu ndi yakugopswa? (b) Tisafunika kucitanji toera kucalira bibvu?

¹⁰ M’Bhibhlya muli na pitsandzo pinapangiza kuti bibvu inaticimwanisa kuwina muoni. Mwacitsandzo, Kaini akhala na bibvu na Abheli mbamupha. Kora, Dhatani na Abhiramu akhala na bibvu na Mose mbansandukira. Mambo Sauli akhala na bibvu na Dhavidhi mbayesera kumupha. Ndi thangwi yace Bhibhlya isalonga: ‘Kule kunakhala bibvu na nthonga, pinthu nkhabe kulungama, kusacitwambo pyakuipa pinango pyonsene.’​—Tyago 3:16.

¹¹ Tingawangisira toera kukhala aufuni na akukoma ntima, nee tinakhala na bibvu. Mafala a Mulungu asalonga: ‘Ufuni ndi wakupirira na wakukoma ntima. Ufuni nkhabe kucita bibvu.’ (1 Akorinto 13:⁠4) Toera kucalira bibvu, tisafunika kuwangisira toera kuona pinthu ninga munapiona Yahova. Tisafunika kuona abale na alongo athu ninga makhundu a manungo mabodzi ene, akuti ndi mpingo. Bhibhlya isalonga: ‘Phindi  ibodzi ingapaswa mbiri, maphindi onsene anakomerwambo.’ (1 Akorinto 12:16-18, 26) Cingacitika cinthu cadidi kuna m’bale wathu, ife tisafunika kukomerwa naye pabodzi, m’mbuto mwakukhala na bibvu. Nyerezerani citsandzo cadidi ca Yonatani, mwana wa Mambo Sauli. Yonatani nee akhali na bibvu mudasankhulwa Dhavidhi toera kukhala mambo, mbuto mwa iye. Iye awangisa Dhavidhi na kumphedza. (1 Samwele 23:16-18) Ninga Yonatani, tisafunikambo kukhala aufuni na akukoma ntima.

12. Ndi uphungu upi wa Bhibhlya unafuna kuphedza banja yathu toera kuwina muoni?

¹² Tonsene pa banja tingaphatisira midida ya Bhibhlya, banja yathu inakhala yantendere na yakutsandzaya mbatiwina muoni. Paulu apereka uphungu uyu kuna mabanja: ‘Imwe akazi, bverani amuna anu ninga munafunika mwa Mbuya. Imwe amuna, pitirizani kufuna akazi anu, mbamukhonda kuanentsa-nentsa. Imwe ana, bverani anyakubala anu mu pyonsene thangwi ipi mphyadidi pa maso pa Mbuya. Imwe ababa, lekani kutsukwalisa ananu thangwi anadzakhala akugopa.’ (Akolose 3:18-21) Nee musatawira kuti banja inakhala yakutsandzaya amuna, akazi na ana angaphatisira uphungu unoyu?

13. Kodi mulongo anaphedza tani mamunace toera kutumikira Yahova?

¹³ Panango ndimwe mulongo wakumanga banja na munthu wakuti nee asatumikira Yahova. Kodi munacitanji khala musapibva kuti iye nee asakutsalakanani mwadidi? Musafunika kuipirwa peno kuketesana naye? Mungaketesana naye, pinancitisa kufuna kutumikira Yahova? Panango nkhabe. Mbwenye mungamulemedza ninga nsolo wa banja, munaphedzera banja  yanu toera kukhala yantendere mbamupasa mbiri Yahova. Citsandzo canu cadidi cinacitisa mamunanu kufuna kutumikira Yahova, monsene mbamuwina muoni.​—Lerini 1 Pedro 3:1, 2.

14. Kodi m’bale asafunika kucitanji khala nkazace nee asamulemedza?

¹⁴ Panango ndimwe m’bale wakumanga banja na munthu wakuti nee asatumikira Yahova. Kodi munacitanji khala musapibva kuti nkazanu nee asakulemedzani? Khala musampwekera toera adziwe kuti ndimwe anatonga panyumba, kodi iye anakulemedzani? Mwandimomwene nkhabe. Mulungu asafuna kuti mutowezere citsandzo ca Yezu toera mukhale mamuna waufuni. (Aefesi 5:23) Yezu, wakuti ndi nsolo wa mpingo, ndzidzi onsene iye ndi wakupirira na waufuni. (Luka 9:46-48) Mungatowezera Yezu, mukupita kwa ndzidzi nkazanu anadzafuna kutumikirambo Yahova.

15. Mamuna Wacikristu anapangiza tani kuti asafuna nkazace?

¹⁵ Paulu apanga amuna akumanga banja: ‘Imwe amuna, pitirizani kufuna akazanu, lekani kuipirwa kakamwe na iwo.’ (Akolose 3:19) Mamuna waufuni asalemedza nkazace. Munjira ipi? Iye asabvesera maonero a nkazace na asadziwa kuti pinalonga iye ndi pyakufunika kakamwe. (1 Pedro 3:7) Maseze nee ndi ndzidzi onsene wakuti mamuna anacita pinthu ninga munafunira nkazace, mbwenye angabvesera maonero ace, pinamphedza toera kucita pisankhulo pyadidi. (Misangani 15:22) Mamuna waufuni nee asafunika kuphemba nkazace toera amulemedze. M’mbuto mwace, iye asafunika kuwangisira toera nkazace amulemedze ekha. Mamuna angafuna nkazace na anace, iwo anakhala akutsandzaya na kutumikira Yahova pabodzi mbawina muoni wa umaso.

16, 17. Aphale na atsikana, munacalira tani kuipirwa mungapaswa uphungu na anyakubalanu?

¹⁶ Aphale na atsikana azinji asanyerezera kuti anyakubalawo nee asaabvesesa peno asanentsa kakamwe. Kodi imwe musanyerezerambo tenepo? Panango imwe munaneta kakamwe thangwi ya mikakamizo ineyi mbamutoma kupenula khala ndi pyadidi kutumikira Yahova. Mbwenye mungasiya kutumikira Yahova thangwi ya pyenepi, munadzadzindikira kuti nkhabe munthu anakufunani kakamwe kupiringana anyakubalanu anatumikira Yahova na axamwali anu mu mpingo.

¹⁷ Nyerezerani basi: Khala anyakubalanu cipo akusandikani, imwe nee munapenula khala iwo asakutsalakanani? (Ahebere 12:8) Mwandimomwene anyakubalanu nee ndi aungwiro, natenepa njira inafuna kukusandikani iwo panango nee munakomerwa nayo. Mbwenye lekani kudzudzumika na pyenepi. M’mbuto mwace, yeserani kubvesesa mathangwi adaacitisa kulonga na kucita pinthu munjira ineyi. Pontho angakupangani pinthu pyakuti nee musakomerwa napyo, khalani wakupfulika. Bhibhlya isalonga: ‘Munthu wandzeru asasankhula mafala anafuna iye kulonga, pontho asakhala wakupfulika.’ (Misangani 17:27) Wangisirani toera kukhala munthu wakukola mwauzimu anatawira uphungu mwakupfulika, mwakukhonda tsalakana njira idaperekwa iwo. (Misangani 1:⁠8) Lekani kuduwala kuti kukhala na anyakubala anatumikira Yahova ndi mwai ukulu kakamwe. Iwo asafuna kukuphedzani toera mukhale maso kwenda na kwenda.

18. Thangwi yanji muli wakutonga kupitiriza kunyerezera muoni?

¹⁸ Mwakukhonda tsalakana khala tisadikhira kuenda kakhala kudzulu peno m’paraizu pa dziko yapantsi, tonsene tiri na cidikhiro cakutsandzayisa kakamwe. Cidikhiro cathu ndi candimomwene. Cisabuluka kwa Nciti wakudzulu na pantsi, wakuti asalonga: ‘Dziko inadzadzala na udziwisi wa Yahova.’ (Izaiya 11:9) Mwakukhonda dembuka onsene pa dziko yapantsi anadzapfundziswa na Mulungu. Unoyu ndi muoni wakufunika kakamwe wakuti nee tisafunika kuuluza. Natenepa, ndzidzi onsene kumbukani kuti Yahova apikira pyenepi kuna imwe, pontho lekani kutawirisa nee cinthu cibodzi cikupingizeni kuwina muoni!