‘Ndinafamba mu Undimomwene Wanu’
‘Yahova, ndipfundziseni pya njira yanu. Ndinafamba mu undimomwene wanu.’—MASALMO 86:11.
1-3. (a) Tisafunika kuona tani undimomwene wa m’Bhibhlya? Perekani citsandzo. (Onani cithundzithundzi cakutoma.) (b) Ndi mibvundzo ipi inafuna ife kutawira mu nsolo uno?
LERO, anthu ali na nsambo wakugula cinthu muloja buluka penepo mbaenda kacibweza. Pontho anthu angaphatisira interneti toera kugula cinthu, pisakhala pyakukhonda nentsa kucibweza angaona kuti nee ciri ninga mukhacifunira iwo peno nee ciri mwadidi. Natenepa iwo asaphemba kucinja toera apaswe cinango peno abwezerwe kobiri yawo.
2 Ife nee tisafunika kucita pyenepi na undimomwene wa m’Bhibhlya. Tingamala ‘kuugula,’ nkhubveka kuti tingamala kuupfundza, cipo tisafunika ‘kuugulisa,’ nkhubveka kuusiya. (Lerini Misangani 23:23 Tradução do Novo Mundo da Bíblia Sagrada; 1 Timoti 2:4) Ninga pidapfundza ife mu nsolo udamala, ife taphatisira ndzidzi uzinji toera kupfundza undimomwene. Panango ife tasiyambo basa yakuti ikhaticitisa kukhala na kobiri izinji. Panango nee tisabveranabve na anthu anango ninga pikhacita ife kale, manyerezero na macitiro athu acinja, peno tasiya misambo na macitiro anakhonda kukomeresa Yahova. Mbwenye ife tiri na cinyindiro cakuti undimomwene udapfundza ife ndi wakufunika kakamwe kupiringana pinthu pyonsene pidasiya ife.
3 Yezu alonga nsangani wa nyamalonda wakuti akhasaka miyala ya ntengo ukulu kakamwe. Pidagumana iye mwala ubodzi wakuti ukhali wadidi kakamwe, mwakukhonda dembuka agulisa pyonsene pikhali na iye toera kugula mwala unoyu. Mwala unoyu ukhaimirira Umambo wa Mulungu. Munjira ineyi Yezu apangiza kuti undimomwene mbudakhala wakufunika kakamwe kwa ale anausaka. (Mateu 13:45, 46) Mudatoma ife kwene kupfundza undimomwene, unalonga pya Umambo wa Mulungu kuphatanizambo undimomwene onsene unagumanika m’Bhibhlya, ife tikhali dzololo toera kusiya pinthu pyonsene toera tikhale nawo. Tingapitiriza kufuna undimomwene, cipo tinausiya. Mbwenye mwakutsukwalisa, atumiki anango a Mulungu asasiya undimomwene thangwi nee asauonabve ninga cinthu cakufunika. Ife cipo tisafunika kucita pyenepi! Ife tisafunika kubvera uphungu wa m’Bhibhlya unalonga kuti pitirizani “kufamba mu undimomwene.” (Lerini 3 Juwau 2-4.) Pyenepi pisabveka kuti tisafunika kuikha undimomwene pa mbuto yakutoma, mbatipangiza pyenepi munjira inaphatisira ife umaso wathu. Ndi munjira ipi anthu anango ‘asagulisa’ undimomwene peno kuusiya, pontho thangwi yanji? Ifembo tisafunika kucitanji toera kucalira pyenepi? Pontho tinacitanji toera “kufamba mu undimomwene”?
NDI MUNJIRA IPI ANTHU ANANGO ‘ASAGULISA’ UNDIMOMWENE, PONTHO THANGWI YANJI?
4. Thangwi yanji anango nee apitiriza kufamba mu undimomwene mu ntsiku za Yezu?
4 Mu ntsiku za Yezu, anango adatawira undimomwene pakutoma nee apitiriza kufamba mu undimomwene. Mwacitsandzo, pidacita Yezu cirengo toera kudyesa mwinji wa anthu, iwo antowera pidaenda iye kuntunda unango wa Bara ya Galileya. Buluka penepo Yezu alonga cinthu cakuti iwo atsukwala naco. Iye alonga: “Ine ndinakupangani na cinyindiro consene kuti mungakhonda kudya manungo a Mwana wa munthu, mbamukhonda kumwa ciropa cace, imwe nee munadzakhala na umaso.” Mbuto mwakusaka kudziwa mabvekero a mafala anewa, iwo alonga: “Mafala anewa mbakunentsa kakamwe; mbani anakwanisa kuabvesera?” Na thangwi ineyi, “anyakupfundzace azinji abwerera ku pinthu pikhadasiya iwo nduli, pontho nee akhafambabve na iye.”—Juwau 6:53-66.
5, 6. (a) Thangwi yanji anango lero asasiya undimomwene? (b) Pinakwanisika tani kuti munthu asiye undimomwene?
5 Mwakutsukwalisa, anthu anango lero asasiyambo undimomwene. Thangwi yanji? Anango asadzudzumika thangwi ya macinjo a kubvesesa kwathu vesi ya Bhibhlya, peno thangwi ya pinthu pidacita peno pidalonga m’bale wakudziwika kakamwe. Anango nee akomerwa na uphungu wa m’Bhibhlya udapaswa iwo, peno anentsana kakamwe na m’bale peno mulongo mu mpingo. Pontho anango atowezera pipfundziso pyauthambi pya anyakupanduka na anango akuti asalonga uthambi thangwi ya ife. Anewa ndi mathangwi mangasi adacitisa anango kusiya Yahova na mpingo. (Ahebheri 3:12-14) Iwo mbadacita mwadidi kakamwe kunyindira Yezu ninga pidacita Pedhru. Pidabvundza Yezu apostolo ace khala iwo asafunambo kuenda ninga pidacita anthu anango thangwi yakutsukwala na mafala ace, Pedhru atawira: “Mbuya, tinaenda kuna ani? Imwe ndimwe ali na mafala anapasa umaso wakukhonda mala.”—Juwau 6:67-69.
6 Anango asiya undimomwene mwapang’ono pang’ono, panango mbakhonda dzindikira kuti akuusiya. Munthu anasiya undimomwene mwapang’ono pang’ono alandana na bote inakwatika na madzi buluka pa gombe. Bhibhlya isatipanga kuti tisafunika kucita mphole-mphole “toera tikhonde kupeuswa mu cikhulupiro.” (Ahebheri 2:1) Kazinji kene munthu anapeuswa mu undimomwene nee asanyerezera kucita pyenepi. Mbwenye iye asatawirisa kuti uxamwali wace na Yahova uthowe, natenepa mukupita kwa ndzidzi usamala. Tisafunika kucitanji toera pyenepi pikhonde kucitika kwa ife?
TISAFUNIKA KUCITANJI TOERA TIKHONDE KUGULISA UNDIMOMWENE?
7. Ninji cinafuna kutiphedza toera tikhonde kugulisa undimomwene?
Mbwenye ife nee tisafunika kusankhula kuti ndi undimomwene upi wa m’Bhibhlya unafuna ife kubvera, mbatipwaza unango
7 Toera kupitiriza kufamba mu undimomwene, tisafunika kutawira na kubvera pinthu pyonsene pinatipanga Yahova. Tisafunika kuona undimomwene ninga cinthu cakufunika kakamwe mu umaso wathu, mbatitoweza uphungu wa m’Bhibhlya mu pinthu pyonsene pinacita ife. Mambo Dhavidhi acita phembero mbapikira Yahova kuti: ‘Ndinafamba mu undimomwene wanu.’ (Masalmo 86:11) Dhavidhi akhadatonga kufamba mu undimomwene, ifembo tisafunika kucita pibodzi pyene. Tingakhonda kucita pyenepi panango tinatoma kunyerezera pontho pinthu pidasiya ife thangwi ya undimomwene, ngakhale kubwerera pontho ku pinthu pyenepi. Mbwenye ife nee tisafunika kusankhula kuti ndi undimomwene upi wa m’Bhibhlya unafuna ife kubvera, mbatipwaza unango. Ife tisafunika kufamba mu ‘undimomwene onsene.’ (Juwau 16:13) Mu nsolo udamala, tapfundza pinthu pixanu pyakuti panango tapisiya toera kupfundza na kuphatisira undimomwene. Cincino tendeni tione kuti tinacitanji toera tikhonde kubwerera ku pinthu pyenepi pidasiya ife nduli.—Mateu 6:19.
8. Kodi Nkristu anakwanisa tani kusiya undimomwene angakhonda kuphatisira mwadidi ndzidzi wace? Perekani citsandzo.
8 Ndzidzi. Toera tikhonde kusiya undimomwene, tisafunika kupitiriza kuphatisira ndzidzi wathu mwandzeru. Tingakhonda kucita mphole-mphole, panango tinabvunga ndzidzi uzinji kakamwe na masendzekero, ubalangazi, interneti, peno kuona televizau. Maseze pinthu pyenepi nee ndi pyakuipa, panango tinaphatisira ndzidzi wakuti kale tikhauphatisira toera kupfundza na kumwaza mphangwa. Pyenepi pyacitikira Emma. * (Onani cidzindikiro capantsi.) Pikhali iye ntsikana, akhakomerwa kakamwe kufamba na makavalo, ndzidzi onsene ukhakwanisa iye akhafamba nawo. Mbwenye iye akhapasika mulando thangwi yakuphatisira ndzidzi uzinji mu ubalangazi, natenepa atonga kucita macinjo. Emma apfundzambo kubulukira , wakuti akhacitambo masendzekero akuthamanga na makavalo. kuna mulongo anacemerwa Cory Wells * (Onani cidzindikiro capantsi.) Cincino Emma asaphatisira ndzidzi uzinji toera kutumikira Yahova, pontho ali na ndzidzi uzinji toera kukhala na banjace pabodzi na axamwali akuti asatumikirambo Yahova. Iye asaona kuti ali na uxamwali wakuwanga na Mulungu, pontho ali wakutsandzaya kudziwa kuti asaphatisira ndzidzi wace mwandzeru.
9. Pinakwanisika tani kuti pinthu pyakumanungo pikhale pyakufunika kakamwe kuna ife?
9 Pinthu pyakumanungo. Toera kupitiriza kufamba mu undimomwene, nee tisafunika kutawirisa kuti pinthu pyakumanungo pikhale pyakufunika kakamwe kwa ife. Pidatoma ife kupfundza undimomwene, tadzindikira kuti kutumikira Yahova ndi kwakufunika kakamwe kupiringana pinthu pyakumanungo, pontho takhala akutsandzaya kusiya pyenepi thangwi ya undimomwene. Mbwenye mukupita kwa ndzidzi panango tinaona anango mbakagula mitcini ya ndzeru na mitokodzi ipswa peno pinthu pinango. Panango tinatoma kunyerezera kuti tikuluza pinthu pyenepi peno nee tinakomerwabve na piri na ife, mbatitoma kusaka kakamwe pinthu pyakumanungo kupiringana kutumikira Yahova. Pyenepi pisatikumbusa pidacitikira Dhema. Iye akhafuna kakamwe pinthu pya dziko mbasiya basa ikhacita iye pabodzi na mpostolo Paulu. (2 Timoti 4:10) Panango Dhema akhafuna kakamwe pinthu pyakumanungo kupiringana kutumikira Mulungu. Peno iye nee akhafuna kusiya pinthu pikhafuna iye toera kutumikira pabodzi na mpostolo Paulu. Pyenepi pisatipfundzisanji? Panango kale tikhafuna kakamwe pinthu pyakumanungo. Tingakhonda kucita mphole-mphole, tinatoma pontho kufuna pinthu pidasiya ife mpaka kusiya undimomwene.
10. Ninji pinafunika ife kucalira?
10 Kubverana na anango. Toera kupitiriza kufamba mu undimomwene, nee tisafunika kutawira kupeuswa na anthu anakhonda kutumikira Yahova. Pidatoma ife kupfundza undimomwene, kubverana kwathu na axamwali pabodzi na abale athu akuti nee ndi Mboni za Yahova kwacinja. Anango asalemedza pinakhulupira ife cincino, mbwenye anango asaipirwa napyo. (1 Pedhru 4:4) Mwandimomwene, tisacita pyonsene pinakwanisa ife toera tibverane na abale athu mbitikhala akukoma ntima kuna iwo. Mbwenye nee tisapwaza midida ya Yahova toera kuakomeresa. Ninga munalonga 1 Akorinto 15:33, axamwali athu a ponda ndipondembo asafunika kukhala anthu anafuna Yahova.
11. Tinacalira tani manyerezero na macitiro akuipa?
11 Manyerezero na macitiro akuipa. Toera kufamba mu undimomwene, tisafunika kukhala akucena, peno akusowa midonthi, pamaso pa Yahova. (Izaiya 35:8; lerini 1 Pedhru 1:14-16.) Pidapfundza ife undimomwene, tacita macinjo mu umaso wathu toera kubvera midida ya m’Bhibhlya. Anango acita macinjo makulu kakamwe. Mbwenye ife tisafunika kupitiriza kucita mphole-mphole toera tikhonde kucinja umaso wathu wakucena basi ene thangwi ya pinthu pyaulukwali. Ninji pinafuna kutiphedza toera kucalira kucita pinthu pyaulukwali? Nyerezerani pidapereka Yahova toera tikhale akucena. Iye apereka Mwanace wapantima Yezu Kristu, toera kudzatifera! (1 Pedhru 1:18, 19) Ndzidzi onsene tisafunika kukumbuka kuti ntsembe ya Yezu ndi yakufunika kakamwe, pyenepi pinatiphedza toera kupitiriza kukhala akucena pamaso pa Yahova.
12, 13. (a) Thangwi yanji tisafunika kuona mafiriyadu ninga munaaonera Yahova? (b) Tinapfundzanji mu ndima zinatowera?
12 Misambo na macitiro akuti nee asakomeresa Mulungu. Acibale athu, andzathu akubasa na akuxikola, panango anayesera kutikulumiza toera ticite nawo pabodzi maphwando awo. Ninji pinafuna kutiphedza toera tikhonde kucita misambo na mafiriyadu akuti nee asakomeresa Yahova? Tisafunika kupitiriza kukumbuka kuti thangwi yanji Yahova nee asakomerwa na mafiriyadu anewa. Tinakwanisa kusaka mphangwa m’mabukhu athu toera kubvesesa kuti mafiriyadu anewa atoma tani. Tinganyerezera mwacidikhodikho mathangwi a Bhibhlya anaticitisa kukhonda kucita khundu m’mafiriyadu anewa, tinakhala na cinyindiro cakuti tikufamba munjira ‘inakomerwa na Mbuya.’ (Aefesi 5:10) Tinganyindira Yahova na Mafalace, nee tinagopa pinanyerezera anthu anango.—Misangani 29:25.
13 Ife tisafunika kufamba mu undimomwene kwenda na kwenda. Ninji pinafuna kutiphedza toera kupitiriza kufamba mu undimomwene? Tinapfundza pinthu pitatu.
KHALANI WAKUTONGA TOERA KUFAMBA MU UNDIMOMWENE
14. (a) Kodi kupitiriza kupfundza Bhibhlya kunatiphedza tani toera tikhonde kusiya undimomwene? (b) Thangwi yanji udziwisi, kulanga na kubvesesa pinthu ndi pyakufunika kwa ife?
14 Cakutoma, pitirizani kupfundza Bhibhlya mbamunyerezera pinapfundza imwe. Khazikisani ndzidzi toera kucita pyenepi. Mungapfundza kakamwe, munafunambo kakamwe undimomwene mbamukhala wakutonga toera mukhonde kuusiya. Lemba ya Misangani 23:23 NM isatipanga toera ‘tigule undimomwene, udziwisi, kulanga na luso ya kubvesesa pinthu.’ Kudziwa undimomwene wa m’Bhibhlya nee pyakwana. Mbwenye tisafunika kuuphatisira mu umaso wathu. Tingabvesesa pinthu, tinakwanisa kubveranisa pinthu pikhadziwa ife na pinapfundza ife cincino. Udziwisi usatiphedza toera kucita pinthu pinadziwa ife. Midzidzi inango undimomwene usatilanga mukutipangiza macinjo anafunika ife kucita. Natenepa tisafunika kutawira mwakucimbiza kulangiwa na Bhibhlya, thangwi kulangwa kweneku ndi kwakufunika kakamwe kupiringana parata.—Misangani 8:10.
15. Kodi undimomwene usatitsidzikiza tani ninga sintu?
15 Caciwiri, khalani wakutonga toera kuphatisira undimomwene mu umaso wanu wa ntsiku na ntsiku. Bhibhlya isalandanisa undimomwene na sintu ya nyankhondo. (Aefesi 6:14) Mu ndzidzi wakale, sintu ikhatsidzikiza nyankhondo angaenda kunkhondo. Mbwenye iye akhafunika kumanga mwadidi sintu yace, thangwi sintu yakukhonda kumangwa mwadidi nee ikhaphedza nyankhondo. Kodi undimomwene usatitsidzikiza tani ninga sintu? Kunyerezera undimomwene wa m’Bhibhlya ndzidzi onsene, kunatitsidzikiza toera kucalira manyerezero akuipa, pontho kunatiphedza toera kucita pisankhulo pyadidi. Tingathimbana na pinentso pikulu peno kuyeserwa toera kucita cinthu cakuipa, undimomwene wa m’Bhibhlya unatiphedza kakamwe toera kucita pinthu pyadidi. Ninga nyankhondo wakuti nee akhaenda kunkhondo angasowa sintu, ifembo nee tisafunika kusiya undimomwene. Ife tisafunika kuwangisira toera kuphatisira undimomwene m’makhundu onsene a umaso wathu. Nyankhondo akhafunikambo kuikha supada mu sintu yace. Tendeni tione kuti tinacitambo tani pyenepi.
16. Kodi kupfundzisa undimomwene kusatiphedza tani toera kupitiriza kufamba mu undimomwene?
16 Cacitatu, citani pyonsene pinakwanisa imwe toera kupfunzisa anango undimomwene wa m’Bhibhlya. Bhibhlya isalandaniswa na supada. Ninga nyankhondo wakuti asapitiriza kuphata mwadidi supada yace, ife tisafunikambo kupitiriza kuphata na manja mawiri Mafala a Mulungu. (Aefesi 6:17) Ife tonsene tinakwanisa kukhala apfundzisi adidi, ‘mbatiphatisira mwadidi mafala a undimomwene.’ (2 Timoti 2:15) Tingaphatisira Bhibhlya toera kupfundzisa anango, kudziwa na kufuna kwathu undimomwene kusathimizirika kakamwe. Pontho tisakhala akutonga toera kupitiriza kufamba mu undimomwene.
Undimomwene ndi muoni wakufunika kakamwe wa Yahova
17. Thangwi yanji undimomwene ndi wakufunika kakamwe kwa imwe?
17 Undimomwene ndi muoni wakufunika kakamwe wa Yahova. Iwo usatiphedza toera tikhale na uxamwali wakuwanga na Babathu wakudzulu. Uxamwali unoyu ndi wakufunika kakamwe kwa ife. Yahova asatipfundzisa pinthu pizinji, mbwenye nee ndi pyenepi basi! Iye apikira kuti anapitiriza kutipfundzisa kwenda na kwenda. Natenepa, lemedzani undimomwene ninga mwala wa ntengo ukulu. Pitirizani ‘kugula undimomwene, pontho lekani kuugulisa.’ Buluka penepo, khalani ninga Dhavidhi adalonga: ‘Ndinafamba mu undimomwene wanu.’—Masalmo 86:11.
^ ndima 8 Dzina yacinjwa.
^ ndima 8 Pitani mu JW Broadcasting, pontho sakani pa ENTREVISTAS E EXPERIÊNCIAS > A VERDADE TRANSFORMA VIDAS.