Kodi Manyerezero Anu Asabverana na a Yahova?
“Cinjani manyerezero anu toera mukwanise kudziwa mwadidi pinafuna Mulungu.”—AROMA 12:2.
1, 2. Munathimizira ife cidziwiso cathu thangwi ya Yahova, tisapfundzanji? Perekani citsandzo.
NYEREZERANI kuti munthu unango apasa muoni mwanang’ono. Buluka penepo anyakubalace ampanga toera “apereke takhuta.” Iye anapereka takhuta, makamaka thangwi apangwa. Mbwenye mu ndzidzi unakula mwana, iye asadzindikira kuti thangwi yanji anyakubalace akhadampanga kuti ndi pyakufunika kupereka takhuta angacitirwa pinthu pyadidi. Natenepa, thangwi yakupfundziswa, iye nee anadikhirabve kupangwa kuti apereke takhuta.
2 Pyenepi pisacitikambo kuna ife. Pidatoma ife kwene kupfundza undimomwene, tapfundza kuti ndi pyakufunika kakamwe kubvera matongero a Yahova. Mbwenye munathimizira ife cidziwiso cathu thangwi ya iye, tisapfundza pizinji thangwi ya pinafuna iye, pinaida iye, pontho tisaona njira inatsalakanira iye pinthu pinango. Tingatawirisa kuti pisankhulo pyathu na makhaliro athu atsogolerwe na Yahova, tisatawirisa kuti manyerezero athu akhale ninga ace.
3. Thangwi yanji midzidzi inango pinakhala pyakunentsa kunyerezera ninga Yahova?
3 Maseze tisakomerwa kupfundza kunyerezera ninga Yahova, mbwenye midzidzi inango pisanentsa kunyerezera ninga iye thangwi ndife anthu akusowa ungwiro. Mwacitsandzo, ife tisadziwa kuti Yahova asaona tani ulukwali, makhaliro adidi, mpfuma, basa yakumwaza mphangwa, kuphatisira ciropa mwakuipa na pinthu pinango. Mbwenye panango pinakhala pyakunentsa kubvesesa kuti thangwi yanji iye asaona pyenepi munjira ineyi. Mphapo tinapfundza tani kunyerezera ninga Yahova? Pyenepi pinatiphedza tani toera kucita pinthu pyadidi cincino na ntsogolo?
MANYEREZERO ATHU ANALANDANA TANI NA A MULUNGU
4. Kodi pisabvekanji kucinja manyerezero athu?
4 Lerini Aroma 12:2. Pa vesi ineyi, mpostolo Paulu alonga pinafunika ife kucita toera tinyerezere ninga Yahova. Iye alonga kuti “nee tisafunika kutawirisa kuti dziko ititsogolere.” Ninga pidapfundza ife mu nsolo udamala, pyenepi pisabveka kuti nee tisafunika kutowezera maonero na misambo ya dziko. Mbwenye Paulu alongambo kuti tisafunika kucinja manyerezero athu. Pyenepi pisabveka kupfundza Mafala a Mulungu, kubvesesa manyerezero ace, kuanyerezera mwacidikhodikho na kuwangisira toera tione pinthu ninga munanyerezera Mulungu.
5. Fokotozani kusiyana kwa kupfundza na kuleri.
5 Kupfundza kwasiyana kakamwe na kuleri mphangwa mwakucimbiza peno kuikha cidzindikiro panagumanika ntawiro. Pakupfundza tisafunika kunyerezera kuti mphangwa zenezi zisatipfundzisanji thangwi ya Yahova, pidacita iye na manyerezero ace. Tisafunika kubvesesa kuti thangwi yanji Yahova asatitawirisa kucita pinthu pinango mbatikhondesa kucita pinango. Tisafunikambo kunyerezera pinthu pinafunika ife kucinja mu umaso wathu na njira inanyerezera ife. Mwandimomwene nee tinakwanisa kunyerezera mwacidikhodikho ntsonga zonsene zinapfundza ife. Mbwenye tisafunika kugawa ndzidzi wakupfundza toera tinyerezere mwacidikhodikho pidapfundza ife.—Masalmo 119:97; 1 Timoti 4:15.
6. Ninji pinacitika tinganyerezera mwacidikhodikho Mafala a Mulungu?
6 Tingakhala na ndzidzi wakunyerezera mwacidikhodikho Mafala a Mulungu pasacitika pinthu pyakudzumatirisa. Ife tisadzindikira kuti njira inanyerezera Yahova ndi yadidi. Pontho tisadziwa njira inaonera iye pinthu na ife tisacita pinthu mwakubverana na pinafuna iye. Natenepa manyerezero athu asacinja mbatitoma kunyerezera munjira inango. Mwapang’ono pang’ono ife tisatoma kunyerezera ninga Yahova.
MANYEREZERO ATHU ASAKHUYA MACITIRO ATHU
7, 8. (a) Yahova asaona tani pinthu pyakumanungo? (Onani pithundzithundzi pyakutoma.) (b) Tingaona pinthu pyakumanungo ninga munapionera Yahova, ninji pinafuna kudzakhala pyakufunika kakamwe kwa ife?
7 Manyerezero athu asakhuya macitiro athu. (Marko 7:21-23; Tiyago 2:17) Tendeni tione pitsandzo pitatu toera tibvesese mwadidi ntsonga ineyi. Citsandzo cakutoma cisalonga thangwi ya kubalwa kwa Yezu. Citsandzo ceneci cisapangiza kuti Yahova asaona tani pinthu pyakumanungo. Mulungu asankhula Zuze na Mariya toera akuze Mwanace maseze akhali akutcerenga. (Levitiko 12:8; Luka 2:24) Pidabalwa Yezu Mariya ‘an’gonesa munadyera pifuyo, thangwi nyumba yakufikira alendo nee ikhalibve na mbuto.’ (Luka 2:7) Yahova mbadapifuna mbadacitisa kuti Yezu abalwe pa mbuto yadidi kakamwe. Mbwenye Yahova akhafuna kuti Yezu akuzwe pa banja inaikha kulambira Mulungu pa mbuto yakutoma. Pyenepi pikhali pyakufunika kakamwe kwa Yahova.
8 Mbiri inalonga pyakubalwa kwa Yezu isatipfundzisa kuti Yahova asaona tani pinthu pyakumanungo. Anyakubala anango asafuna kuti anawo akhale na pinthu pizinji pyakumanungo, ngakhale kuti pyenepi pinafewesa uxamwali wawo na Yahova. Mwakukhonda penula Yahova asaona uxamwali wathu na iye kukhala wakufunika kakamwe. Kodi imwe musanyerezera ninga Yahova? Kodi macitiro anu asapangizanji?—Lerini Ahebheri 13:5.
9, 10. Tinapangiza tani kuti tisaona kugwegwedusa anango ninga munaonera Yahova?
9 Citsandzo caciwiri ndi cakuti Yahova asaona tani munthu anagwegwedusa anango, peno ule anacitisa anango kudawa mbasiya kutumikira Yahova. Yezu alonga: “Mbwenye munthu onsene anagwegwedusa m’bodzi wa anthu awa akucepeseka akuti asandikhulupira, mphyadidi amangirwe mwala ukulu n’khosi mwace, ninga ule unazungunuswa na buru pakupeya, mbaponywa m’bara.” (Marko 9:42) Mafala anewa ndi amphambvu kakamwe! Pontho ife tisadziwa kuti Yezu ali na makhaliro ninga a Babace. Natenepa, khala iye akhaipirwa na pinthu pyenepi, ndiye tani Yahova? Mwakukhonda penula iye asaipirwa munthu angagwegwedusa m’bodzi mwa atowereri a Yezu.—Juwau 14:9.
10 Kodi ife tisaona kugwegwedusa anango ninga munaonera Yahova na Yezu? Kodi macitiro athu asapangizanji? Mwacitsandzo, nyerezerani kuti ife tisakomerwa na ntundu unango wa mabvaliro na makhunganyikiro. Mphapo tinacitanji khala mabvaliro peno makhunganyikiro anewa asagwegwedusa anango mu mpingo peno asacitisa anango kukhala na maonero aulukwali? Kodi kufuna kwathu abale kunaticitisa kusiya mabvaliro peno makhunganyikiro anewa?—1 Timoti 2:9, 10.
11, 12. Kuida pinaida Yahova na kukhala akudzitonga kunatiphedza tani?
11 Citsandzo cacitatu: Yahova asaida kusowa ulungami. (Izaiya 61:8) Mwandimomwene, iye asadziwa kuti midzidzi inango pisakhala pyakunentsa kwa ife kucita pinthu pyadidi thangwi ndife anthu akusowa ungwiro. Ngakhale tenepo, iye asafuna kuti tiide pinthu pyakuipa ninga pinacita iye. (Lerini Masalmo 97:10.) Kudziwa kuti thangwi yanji Yahova asaida pinthu pyakuipa, kunatiphedza toera ticite pinthu mwakubverana na manyerezero ace na pyenepi pinatipasa mphambvu yakucalira pinthu pyakuipa.
Pinthu pinango pyakuipa pyakuti nkhabe ntemo wa Bhibhlya unalonga thangwi ya pyenepi
12 Tingapfundza kuida pinthu pyakuipa, tinadzindikira pinthu pinango pyakuipa pyakuti nkhabe ntemo wa Bhibhlya unalonga thangwi ya pyenepi. Mwacitsandzo, mabviniro anango anacemerwa lap dancing * (Onani cidzindikiro capantsi.) asadziwika kakamwe pa dziko yonsene lero. Anthu anango nee asacalira mabviniro a ntundu unoyu, thangwi iwo asanyerezera kuti pyenepi pyasiyana na kupita m’mabonde na munthu. Mphapo Yahova asaona tani pyenepi? Kumbukani kuti Yahova asaida kakamwe makhaliro onsene akuipa. Mphyadidi kukhala akudzitonga toera kucalira pinthu pyakuipa mbitiida pinaida Yahova.—Aroma 12:9.
NYEREZERANI PYA NTSOGOLO
13. Thangwi yanji kunyerezera ninga Yahova kunatiphedza toera kucita pisankhulo pyadidi ntsogolo?
13 Tingapfundza tisafunika kunyerezera kuti Yahova asaona tani pinthu, thangwi pyenepi pinatiphedza toera kucita pisankhulo pyadidi, pontho pinatiphedza tingafuna kucita cisankhulo mwakucimbiza. (Misangani 22:3) Tendeni tione pitsandzo pingasi pya m’Bhibhlya.
14. Kodi ntawiro wa Zuze kuna nkazi wa Potifara usatipfundzisanji?
14 Nkazi wa Potifara pidakulumiza iye Zuze toera apite naye m’mabonde, Zuze athawa mwakucimbiza. Mwakukhonda penula, Zuze anyerezera kuti Yahova asaona tani banja. (Lerini Genesi 39:8, 9.) Zuze apanga nkazi wa Potifara: ‘Ndicitirenji pyakuipa pikulu ninga pyenepi, mbindidawira Mulungu?’ Pyenepi pisapangiza kuti iye akhanyerezera ninga Mulungu. Ndiye tani ife? Mbitidacitanji khala ndzathu wakubasa asapangiza kuti asatifuna? Peno mbitidacitanji khala tatambira mphangwa zinalonga pyaulukwali peno pithundzithundzi mu ntokodzi mwathu? * (Onani cidzindikiro capantsi.) Khala tikhadapfundza kale kunyerezera ninga Yahova pinakhala pyakukhonda nentsa kudziwa cakucita.
15. Tinapitiriza tani kukhala akukhulupirika kwa Yahova ninga pidacita Ahebheri atatu?
15 Tendeni tionembo citsandzo ca Ahebheri atatu akhadziwika na Sadhrake, Misake na Abhedhenego. Mudatonga Mambo Nabhukodhonozore kuti iwo alambire dzimunthu ya ouro ikhadacita iye, iwo akhonda. Ntawiro wawo wapangiza kuti iwo akhadziwa kale kuti kukhala wakukhulupirika kwa Yahova pisabvekanji. (Eksodo 20:4, 5; Danyele 3:4-6, 12, 16-18) Ndiye tani ife lero? Mbitidacitanji khala patrau wathu atiphemba toera tiperekembo kobiri toera kuphedzera phwando yakuti isacita khundu ya uphemberi wace wauthambi? Mbuto mwakudikhira kuti ticitikirwe na pinthu ninga pyenepi, mphyadidi kupfundza cincino kunyerezera ninga Yahova. Natenepa, tingadzagumanika m’makhaliro ninga anewa pinakhala pyakukhonda nentsa kudziwa pinafuna ife longa na kucita ninga pidacita Ahebheri atatu.
Kodi imwe mwafufudza mphangwa zakufunika na kusinari tsamba inalonga pya ukondzi na kucedza na dotoro wanu? (Onani ndima 16)
16. Kubvesesa mwadidi pinanyerezera Yahova kunatiphedza tani pangaoneka ngozwi mbatifuna kukondzwa mwakucimbiza?
16 Kunyerezera ninga Yahova kunatiphedza toera kukhala akukhulupirika kuna iye pangaoneka ngozwi mbatifuna kukondzwa mwakucimbiza. Mwandimomwene, ife tatonga kukhonda kuikhwa ciropa peno kuciphatisira mwakuipa. (Mabasa 15:28, 29) Mbwenye pana njira zinango za ukondzi zakuti zisanyindira cisankhulo ca Nkristu m’bodzi na m’bodzi mukuphatisira midida ya m’Bhibhlya. Ndi upi ndzidzi wadidi wakucita cisankhulo? Ndi ndzidzi wakuti muli kunyumba ya ungumi mukubva kupha mbamukakamizwa toera kucita cisankhulo? Mwandimomwene nkhabe. Uno ndi ndzidzi wadidi toera kufufudza mphangwa zinalonga thangwi ya pyenepi, na kusinari tsamba inalonga mwadidi pya ukondzi unafuna imwe, pontho musafunika kucedza na dotoro wanu. * (Onani cidzindikiro capantsi.)
17-19. Thangwi yanji tisafunika kupfundza cincino manyerezero a Yahova pakutsalakana pinthu? Perekani citsandzo.
17 Pakumalisa nyerezerani kuti Yezu atawira tani pidalonga Pedhru kuti: “Mbuya, bverekani ntsisi mwekhene.” Yezu akhadziwa kale pikhafuna Mulungu toera iye apicite na maprofesiya analonga pya umaso wace na kufa kwace pa dziko yapantsi. Cidziwiso ceneci campasa mphambvu toera apitirize kukhala wakukhulupirika kuna Yahova na kupereka umaso wace ninga ntsembe kwa ife tonsene.—Lerini Mateu 16:21-23.
18 Lero Mulungu asafuna kuti tikhale axamwali ace mbaticita pyonsene pinakwanisa ife toera timwaze mphangwa zadidi. (Mateu 6:33; 28:19, 20; Tiyago 4:8) Mbwenye anthu anango anayesera kutipingiza toera tikhonde kucita basa ineyi, mbanyerezera kuti akucita pinthu pyadidi, ninga pidacita Pedhru kuna Yezu. Mwacitsandzo, nyerezerani kuti patrau wanu akuphembani kuti muphate basa ndzidzi uzinji wakuti mukhauphatisira toera kuenda kumisonkhano na kumwaza mphangwa pabodzi na mpingo mbwenye alonga kuti anakupasani kobiri izinji. Peno nyerezerani kuti kuxikola kwanu apfundzisi anu akupasani mwai wakuenda kapfundza maxikola makulu mwakukhonda lipa kutali na acibale anu. Kodi musafunika kucitanji pyenepi pingakucitikirani? Mbamudzati kucita cisankhulo musafunika kucita phembero, kufufudza malemba, kupanga anthu a pabanja panu peno akulu a mpingo. Mphyadidi kupfundza cincino kuti Yahova asaona tani pinthu na kunyerezera ninga iye. Buluka penepo, mungadzapaswa mwai ninga unoyu nee munadzauonabve ninga mayesero akunentsa kakamwe. Imwe munadziwa pinafuna imwe kucita thangwi mwasankhula kale kupitiriza kutumikira Yahova.
19 Panango imwe munakwanisa kunyerezera pinthu pinango pyakuti pinayesera kukhulupirika kwanu kwa Yahova. Mwandimomwene ife nee tinakwanisa kukhunganyika toera kuthimbana na nyatwa zonsene. Mbwenye tinganyerezera mwacidikhodikho pya manyerezero a Yahova pa pfundziro yathu tekha, pinakhala pyakukhonda nentsa kukumbuka pidapfundza ife na kudziwa kuti tinapiphatisira tani mu umaso wathu. Natenepa mu ndzidzi unapfundza ife, tisafunika kuona kuti tinanyerezera tani ninga Yahova, pontho pinatiphedza tani toera kucita pisankhulo pyadidi cincino na ntsogolo.
KUNYEREZERA NINGA YAHOVA KUSATIPASA TSOGOLO YADIDI
20, 21. (a) Ndi ufulu upi unafuna khala na ife mu dziko ipswa? (b) Kodi tinakwanisa tani kukhala akutsandzaya cincino?
20 Tonsene tisadikhira dziko ipswa. Azinji mwa ife tisadikhira kukhala kwenda na kwenda m’paraizu pa dziko yapantsi. Umambo wa Mulungu ungadzatonga pa dziko yonsene nee tinadzabva pontho kupha nee kutamba nyatwa. Ife tinadzapitiriza kukhala na ufulu wakusankhula kucita pinafuna ife na pinakomerwa na ife.
21 Mbwenye pyenepi nee pisabveka kuti ufulu wathu unadzakhala wakusowa madire. Anthu adidi anadzapitiriza kucita pisankhulo mwakubverana na matongero na manyerezero a Yahova. Pyenepi pinadzacitisa anthu kukhala akutsandzaya na ntendere wakunjipa kakamwe. (Masalmo 37:11) Maseze ndzidzi unoyu udzati kufika, mbwenye ife tinakwanisa kutsandzaya cincino, manyerezero athu angabverana na a Yahova.
^ ndima 12 Lap dancing ndi ntundu unango wakubvina wakuti nyakubvina wankazi peno wamamuna nee asabvala nguwo zamaso, pontho asakhala kunsana kwa unango mbakabvina ninga akupita m’mabonde. Natenepa, mwakubverana na pidacitika, munthu anabvina munjira ineyi m’midzidzi inango anaoniwa ninga acita ulukwali na anakwanisa kutongwa na komiti yakutonga miseru. Khala alipo m’bale peno mulongo adabvina kale Lap dancing asafunika kuphemba ciphedzo ca akulu a mpingo.—Tiyago 5:14, 15.
^ ndima 14 Kuphatisira ntokodzi toera kutumiza mphangwa, mafoto peno mavidhyu anapangiza pya ulukwali pisacemerwa sexting. Mwakubverana na pidacitika, m’bale peno mulongo wakuti ali na nsambo wakucita Sexting anakwanisa kutongwa na komiti yakutonga miseru. Ngakhale anang’ono m’midzidzi inango asatongwa na mautongi a dziko thangwi yakucita pyenepi. Toera kudziwa pizinji thangwi ya pyenepi pitani mu saiti yathu jw.org na lerini nsolo wakuti “Os Jovens Perguntam—O que preciso saber sobre sexting?” (Onani pa khundu yakuti ENSINOS BÍBLICOS > ADOLESCENTES. ) Peno onani nsolo wakuti “Como conversar com seu filho sobre sexting” mu Despertai! ya Novembro de 2013, tsamba 4-5.
^ ndima 16 Toera kubva mphangwa zizinji za midida ya Bhibhlya yakuti inakwanisa kukuphedzani, onani bukhu yakuti Continue a Amar a Deus, tsamba 246-249.
