1. Thangwi yanji tonsene tisafuna cibalangazo?

IFE tonsene tisafuna cibalangazo. Panango ife tisadzudzumika kakamwe na pinthu pinacitika mu umaso wathu, peno tisatsukwala, peno kupswipa ntima. Panango tisanentseka thangwi ya utenda, kukalamba peno kuferwa na munthu anafuna ife. Anango a ife nee asatsalakanwa mwadidi na andzawo. Kusiyapo pyenepi, tazungulirwa na anthu akuti asacita uphanga. Mwandimomwene, ino ndi “midzidzi yakunentsa” yakuti isapangiza kuti tikukhala “mu ntsiku zakumalisa,” pontho, ntsiku na ntsiku tisakhala cifupi kakamwe na dziko ipswa. (2 Timoti 3:1) Panango ife tatoma kale kudikhira toera kuona kukwanirisika kwa mapikiro a Yahova peno tikuthimbana na nyatwa zizinji. Mphapo tinagumana kupi cibalangazo?

2, 3. (a) Ninji pinadziwa ife thangwi ya Abhakuki? (b) Thangwi yanji tisafunika kupfundza bukhu ya Abhakuki?

² Toera tigumane ntawiro wa mbvundzo unoyu tendeni  tipfundze pang’ono bukhu ya Abhakuki. Bhibhlya nkhabe longa pizinji thangwi ya mprofeta unoyu, mbwenye bukhu idalemba iye isatibalangaza kakamwe. Dzina ya Abhakuki panango isabveka “kukhumbatirana mwaufuni.” Panango mafala anewa asapangiza njira inabalangaza Yahova atumiki ace, ninga akutikhumbatira mwaufuni. Mafala anewa anakwanisambo kupangiza kufuna kwathu kutsidzikizwa na Yahova, ninga pinacita mwanang’ono kuna babace. Abhakuki acita mibvundzo mingasi kuna Yahova. Natenepa Yahova atsogolera Abhakuki toera kulemba pidacedza iwo, thangwi iye akhadziwa kuti mbitidaphedzekambo napyo.—Habakuki 2:2.

³ Basi ene pinatipanga Bhibhlya thangwi ya Abhakuki ndi kucedza kudacita Yahova na mprofeta unoyu wakutsukwala. Mbwenye bukhu yace isacita khundu ya ‘pinthu pyonsene pidalembwa kale’ m’Mafala a Mulungu, ‘pyakuti pyalembwa toera kutipfundzisa, kubulukira mukupirira kwathu na cibalangazo cinagumana ife m’Malemba, tikwanise kukhala na cidikhiro.’ (Aroma 15:4) Kodi bukhu ya Abhakuki inaphedza tani m’bodzi na m’bodzi wa ife? Inatiphedza toera kudziwa kuti kunyindira Yahova kusabvekanji. Profesiya ya Abhakuki isatipasa cinyindiro cakuti ife tinakwanisa kukhala na ntendere wa m’manyerezero mwakukhonda tsalakana nyatwa na mayesero anathimbana na ife.

4. Thangwi yanji Abhakuki akhali wakutsukwala?

⁴ Lerini Habakuki 1:2, 3. Abhakuki akhala m’midzidzi yakunentsa kakamwe. Iye akhadazungulirwa na anthu akuipa, pontho auphanga na pyenepi pyantsukwalisa kakamwe. Konsene kwene kukhayang’ana iye basi ene akhaona Aizraeli mbatsalakanana mwakuipa na mwakusowa ulungami. Abhakuki akhabvundzika: ‘Kuipa kweneku kunamala lini? Thangwi yanji Yahova akudembuka na kucita pinthu toera kumalisa pyenepi?’ Iye akhadamala ndzeru. Natenepa iye adembetera kuna Yahova toera amalise nyatwa. Panango Abhakuki akhanyerezera kuti Yahova nee akutsalakanabve mbumba yace, peno mbadamalisa nyatwa zawo. Kodi imwe mwatoma kale kupibva munjira ibodzi ene?

5. Tisapfundzanji m’bukhu ya Abhakuki? (Onani cithundzithundzi cakutoma.)

⁵ Kodi Abhakuki acita mibvundzo ineyi yonsene thangwi iye akhadasiya kukhulupira Yahova na mapikiro ace? Nee pang’ono pene! Abhakuki abvundza Yahova toera am’phedze thangwi ya kudzudzumika kwace na nyatwa, pyenepi pyapangiza kuti iye nee akhadaluza cidikhiro, mbwenye akhapitiriza kun’khulupira. Basi ene Abhakuki akhadzudzumika. Iye nee akhabvesesa thangwi yanji Yahova akhadembuka kumalisa nyatwa, pontho thangwi yanji atawirisa kuti iye athabuke kakamwe. Abhakuki atsogolerwa na Yahova toera kulemba pinthu pikhandzudzumisa, pontho pyenepi pisatipfundzisa ntsonga yakufunika kakamwe. Ife nkhabe funika kugopa kupanga Yahova pinthu pyonsene pinatidzudzumisa. Iye asatiphemba toera timpange mabvero  athu onsene kubulukira mu phembero. (Masalmo 50:15; 62:8) Misangani 3:5 isatiphemba toera ‘tikhulupire Mulungu na ntima wathu onsene mbitileka kunyindira ndzeru zathu.’ Abhakuki aphatisira mafala anewa mu umaso wace.

6. Thangwi yanji kucita phembero ndi kwakufunika kakamwe?

⁶ Abhakuki anyindira Yahova wakuti ndi Xamwali wace na Babace, mbatoma kukhala cifupi na iye. Abhakuki nee akhanyindira mphambvu zace toera kumalisa nyatwa zikhadzudzumika na iye. M’mbuto mwace iye aphemba ciphedzo ca Yahova. Ceneci ndi citsandzo cadidi kwa ife. Yahova wakuti ndi Nyakubvesera maphembero athu, asatiphemba toera tin’khulupire mbatimpanga pyonsene pinatidzudzumisa kubulukira mu phembero. (Masalmo 65:2) Tingacita pyenepi, tinadzaona kuti Yahova asatawira tani maphembero athu. Ife tinadzapibva ninga akutikhumbatira mu ndzidzi unatibalangaza iye na kutitsogolera. (Masalmo 73:23, 24) Yahova anadzatiphedza toera kubvesesa kuti iye asaona tani makhaliro athu mwakukhonda tsalakana mayesero anathimbana na ife. Mwandimomwene njira ibodzi inapangiza kuti tisanyindira Yahova ndi kucita phembero.

7. Kodi Yahova acitanji pidapangwa iye na Abhakuki thangwi ya nyatwa zace?

⁷ Lerini Habakuki 1:5-7 Tradução do Novo Mundo da Bíblia Sagrada. Pidamala Abhakuki kulonga na Yahova thangwi ya nyatwa zace, panango iye abvundzika kuti Yahova mbadacitanji. Ninga Baba waufuni Yahova abvesesa kuti Abhakuki akhapibva tani. Iye akhadziwa kuti Abhakuki akuthabuka, pontho akhafuna ciphedzo. Natenepa Yahova nee apwekera Abhakuki mbwenye ampanga pikhafuna Iye cita kuna Ayuda akukhonda khulupirika. Panango Abhakuki ndi munthu wakutoma adapangwa na Yahova kuti kutcunyuswa kwawo mbukudacitika mwakukhonda dembuka.

8. Thangwi yanji Abhakuki nee akhadikhira kuti mbadatawirwa munjira ineyi na Yahova?

⁸ Yahova apanga Abhakuki kuti iye ali dzololo toera kumalisa nyatwa. Iye mbadautcunyusa Ayuda akhacita pinthu pyakuipa. Pidalonga Yahova kuti pyenepi pinacitika ‘mu ntsiku zanu’ akhapangiza kuti kutongwa kweneku mbukudacitika Abhakuki peno Aizraeli mbadzati kufa. Abhakuki nee akhadikhira kuti anatawirwa munjira ineyi na Yahova. Akaldheya, peno Abhabhilonya akhali anthu akuipa kakamwe. Iwo akhali auphanga kupiringana Aizraeli, thangwi Aizraeli akhadziwa matongero a Yahova. Mphapo, thangwi yanji Yahova aphatisira anthu anewa akuipa toera kutcunyusa mbumba yace? Pyenepi mbipidathimizira nyatwa kuna Ayuda. * (Onani cidzindikiro capantsi.) Mbamudapibva tani khala ndimwe Abhakuki?

9. Ndi ipi mibvundzo inango idacita Abhakuki?

⁹ Lerini Habakuki 1:12-14, 17 NM. Maseze Abhakuki abvesesa kuti Yahova akhapitiriza kuphatisira Abhabhilonya toera kutcunyusa anthu ace, iye akhapitiriza kukhala wakudzudzumika. Mbwenye iye acepeseka, pontho akhadatonga toera kupitiriza kunyindira Yahova. Natenepa iye alonga kuti Yahova apitiriza kukhala “Mwala” wace. (Deuteronomyo 32:4; Izaiya 26:4) Abhakuki akhakhulupira kuti Mulungu ndi waufuni, pontho ndi wakukoma ntima, na thangwi ineyi iye  nee agopa kucita Yahova mibvundzo inango ninga iyi: Thangwi yanji Yahova atawirisa kuti Ayuda apitirize kuthabuka mbasiya mbumba yace mbitamba nyatwa zizinji? Thangwi yanji iye nee amalisa nyatwa mwakucimbiza? Thangwi yanji Mulungu Wamphambvu Zonsene ‘asamatama pyace’ mbatawirisa uipi konsene kwene? Kusiyapo pyenepi, Yahova ‘ndi Wakucena,’ pontho ‘iye nkhabe kukomerwa na pinthu pyakuipa.’

10. Thangwi yanji midzidzi inango tinapibva ninga Abhakuki?

¹⁰ Panango ife midzidzi inango tinapibva ninga Abhakuki. Ife tisabvera Yahova, tisan’nyindira, tisaleri na kupfundza Mafalace, na pyenepi pisawangisa cidikhiro cathu. Ife tisapfundzambo pya mapikiro ace tingabvesera pinatipanga gulu yace. Mbwenye panango tinapitiriza kubvundzika, ‘Kodi nyatwa zathu zinamala lini?’ Mu ndima zinatowera tinapfundza pinthu pingasi pidacita Abhakuki.

11. Kodi Abhakuki akhadatonga kucitanji?

¹¹ Lerini Habakuki 2:1. Kucedza kudacita Abhakuki na Yahova kwancitisa kukhala na ntendere wa m’manyerezero. Pyenepi pyancitisa kudikhira kuti Yahova acite pinthu. Abhakuki apangiza kuti akupitiriza kudikhira Yahova pidalonga iye kuti: ‘Ndinapfulika pyanga na kudikhira kufika kwa ntsiku ineyi ya utcerengi.’ (Habakuki 3:16) Atumiki anango a Mulungu asapitirizambo kudikhira mwakupirira kuti Yahova acite pinthu. Pitsandzo pyawo pisatiwangisa thangwi pisapangiza kuti tinakwanisambo kucita pibodzi pyene.—Mikeya 7:7; Tiyago 5:7, 8.

12. Tisapfundzanji kubulukira kwa Abhakuki?

¹² Ninji pinapfundza ife kubulukira mu cisankhulo ca Abhakuki? Cakutoma, nee tisafunika kusiya kucita phembero kwa Yahova mwakukhonda tsalakana nyatwa zinatamba ife. Caciwiri, tisafunika kubvera pinatipanga Yahova kubulukira m’Mafalace na gulu yace. Cacitatu, tisafunika kudikhira mwakupirira kuti Yahova acite pinthu mbatinyindira kuti iye anadzamalisa nyatwa zathu pa ndzidzi wakuthema. Tingatowezera Abhakuki, tinakhala na ntendere wa m’manyerezero mbatipirira. Cidikhiro cathu cinatiphedza toera kukhala akupirira na akutsandzaya mwakukhonda tsalakana nyatwa zathu. Ife tiri na cinyindiro cakuti Babathu wakudzulu anadzamalisa uipi onsene.—Aroma 12:12.

13. Yahova awangisa tani Abhakuki?

¹³ Lerini Habakuki 2:3. Ife tisadziwa kuti Yahova atsandzaya pidasankhula Abhakuki kudikhira kuti Iye acite pinthu. Mulungu Wamphambvu Zonsene akhadziwa mwadidi kuti Abhakuki akhathabuka, na thangwi ineyi Iye awangisa mprofeta unoyu, pontho mwaufuni ampasa cinyindiro cakuti Iye anadzatawira mibvundzo yace. Abhakuki akhadasala pang’ono toera kuona kumaliswa kwa nyatwa zace zonsene. Pikhali ninga Yahova akupanga Abhakuki kuti: ‘Dikhira mwakupirira mbundinyindira. Ndinadzatawira phembero  yako, maseze papite ndzidzi uzinji.’ Yahova akumbusa Abhakuki kuti Iye akhadasankhula kale ndzidzi toera kukwanirisa mapikiro ace. Natenepa iye awangisa Abhakuki toera apitirize kudikhira, thangwi kucita pyenepi mbukudam’phedza toera akhonde kutsumbikika kutsogolo.

14. Tisafunika kucitanji tingathimbana na mayesero?

¹⁴ Ife tisafunikambo kudikhira kuti Yahova acite pinthu na kubvera pinatipanga iye. Tingacita pyenepi tinakhala na cinyindiro na ntendere wa m’manyerezero mwakukhonda tsalakana mayesero anathimbana na ife. Yezu atipanga kuti nee tisafunika kudzudzumika na pya ‘ntsiku na ndzidzi’ thangwi Mulungu nee asatipanga pyenepi. (Mabasa 1:7) Tisafunika kunyindira kuti Yahova asadziwa mwadidi ndzidzi toera kucita pinthu. Natenepa nee tisafunika kubwerera nduli, mbwenye tisafunika tikhale akucepeseka, akupirira na akukhulupira Mulungu. Munadikhira ife Yahova, tisafunika kuphatisira mwandzeru ndzidzi wathu toera kuntumikira na ntima onsene.—Marko 13:35-37; Agalata 6:9.

15, 16. (a) Ndi mapikiro api anagumana ife m’bukhu ya Abhakuki? (b) Kodi mapikiro anewa asatipfundzisanji?

¹⁵ Yahova apikira: ‘Anyakulungama anadzakhala maso, thangwi ya cikhulupiro cawo,’ pontho ‘dziko yapantsi inadzadzala na udziwisi wa mbiri ya Yahova.’ (Habakuki 2:4, 14) Inde, Yahova asapikira kupasa umaso wakukhonda mala ale anapirira na kun’nyindira.

 ¹⁶ Pikiro inagumanika pa lemba ya Habakuki 2:4 ndi yakufunika kakamwe, ndi thangwi yace mpostolo Paulu aibwerezera m’maulendo matatu mu matsamba ace! (Aroma 1:17; Agalata 3:11; Ahebheri 10:38) Ife tinakwanisa kukhala na cinyindiro cakuti mwakukhonda tsalakana nyatwa zinathimbana na ife, tinganyindira Yahova, tinadzaona kukwanirisika kwa mapikiro ace. Yahova asafuna kuti tiikhe manyerezero pa cidikhiro cathu ca ntsogolo.

17. Yahova asatipanga kuti anaticitiranji tingan’nyindira?

¹⁷ Bukhu ya Abhakuki iri na ntsonga zakufunika kakamwe kwa ife tonsene tinakhala mu ntsiku zakumalisa. Yahova apikira kupasa umaso wakukhonda mala anthu akulungama na ale anan’nyindira. Natenepa tendeni tipitirize kuwangisa kunyindira kwathu Mulungu mwakukhonda tsalakana nyatwa zinathimbana na ife. Pidalonga Yahova kuna Abhakuki pisatipasa cinyindiro cakuti Iye anadzatitsidzikiza na kutipulumusa. Mwakukoma ntima Yahova asatiphemba toera tin’nyindire na kudikhira mwakupirira ndzidzi udakhazikisa iye toera Umambo wace utonge dziko yapantsi. Mu ndzidzi unoyu dziko yapantsi inadzadzala na anthu akulambira Yahova mwakutsandzaya, pontho mwantendere.—Mateu 5:5; Ahebheri 10:36-39.

18. Mafala a Yahova akhuya tani Abhakuki?

¹⁸ Lerini Habakuki 3:16-19. Mafala a Yahova akhuya kakamwe Abhakuki. Iye anyerezera mwacidikhodikho pinthu pyakudzumatirisa pidacitira Yahova mbumba yace kale. Natenepa kunyindira kwace Yahova kwathimizirika. Iye akhakhulupira kuti Yahova mbadacita pinthu mwakucimbiza! Pyenepi pyawangisa mprofeta unoyu, maseze iye akhadziwa kuti midzidzi inango mbadapitiriza kuthabuka. Abhakuki nee akhapenulabve. Kusiyapo pyenepi, Abhakuki akhakhulupira na ntima onsene kuti Yahova anadzampulumusa. Natenepa, mafala adalonga iye pa vesi 18 asapangiza kuti iye akhanyindira kakamwe Bhibhlya. Anyakupfundza anango asakhulupira kuti mafala anewa asabveka: “Ine ndinanumpha na kusekera muna Mbuya; ndinabvina-bvina thangwi yakukomerwa na Mulungu wanga.” Ndi ntsonga ipi yakufunika idapfundza ife! Yahova nee asatipasa basi ene mapikiro akutsandzayisa a ntsogolo, mbwenye iye asatipasambo cinyindiro cakuti thimize pano, iye anadzakwanirisa maprofesiya anewa.

19. Kodi tisafunika kucitanji toera tibalangazwe na Yahova ninga pidacita iye kuna Abhakuki?

¹⁹ Ntsonga yakufunika kakamwe inapfundza ife m’bukhu ya Abhakuki ndi kufunika kwa kunyindira Yahova. (Habakuki 2:4) Toera tipitirize kunyindira Yahova, tisafunika kuwangisa uxamwali wathu na iye. Natenepa ife tisafunika (1) Kupitiriza kucita phembero toera kupanga Yahova nyatwa zathu zonsene. (2) Kubvera pinatipanga Yahova kubulukira m’Mafalace na kubvera pitsogolero pinatipasa iye kubulukira mu gulu yace. (3) Kukhala na cikhulupiro na kupirira mu ndzidzi unadikhira ife kuti Yahova akwanirise mapikiro ace. Ndi pyenepi pidacita Abhakuki. Maseze pidatoma iye kucedza na Yahova akhadatsukwala mbwenye pidamala iwo kucedza, iye awangiswa mbatsandzaya! Tingatowezera Abhakuki, ife tinadzawangiswambo na Babathu wa kudzulu Yahova mu nyatwa zathu. Ndi cibalangazo cipi cikulu cinapaswa ife n’dziko ino yakuipa?