1-2. (a) Ninji pinafuna kutiphedza toera kupitiriza kupirira nyatwa? Fokotozani. (b) Tinapfundzanji mu nsolo uno?

“NDINGANYEREZERA nyatwa zidathimbana na ine, ndisaona kuti nee mbandidakwanisa kuzikunda ndekha.” Mwatoma kale kulonga mafala ninga anewa? Azinji a ife taalonga. Panango imwe mwalonga mafala anewa thangwi mwakwanisa kupirira utenda wakugopswa peno kuferwa na nyakufunika wanu. Munganyerezera nyatwa zenezi musaona kuti basi ene mwakwanisa kupirira thangwi nzimu wakucena wa Yahova wakupasani “mphambvu yakupiringana yacibaliro.”—2 Akor. 4:7-9.

² Ife tisafunambo ciphedzo ca nzimu wakucena toera tikwanise kucalira kukhuyiwa na pinthu pya dziko ino yakuipa. (1 Juw. 5:19) Kusiyapo pyenepi, ife tisafunika kuwangisira toera tikwanise kuthimbana na “mphambvu za madimonyo.” (Aef. 6:12) Mukunyerezera nyatwa zenezi zonsene, mu nsolo uno tinapfundza njira ziwiri zakuti nzimu wakucena usatiphedza tani toera kuthimbana nazo. Buluka penepo, tinaona kuti tisafunika kucitanji toera tiphedzwe mwakukwana na nzimu wakucena.

3. Ndi njira ipi ibodzi yakuti Yahova asatiphedza toera kupirira nyatwa?

³ Nzimu wakucena wa Yahova usatiphedza mukutipasa mphambvu toera tikwanise kucita pinthu pyonsene pinafuna iye mwakukhonda tsalakana pinentso. Mpostolo Paulu adzindikira kuti akhakwanisa kutumikira Yahova thangwi akhanyindira “mphambvu za Kristu” mwakukhonda tsalakana pinentso. (2 Akor. 12:9) Paulendo wace waciwiri ninga misionaryo, Paulu aphata basa kakamwe, tayu toera kumwaza mphangwa basi, mbwenye aphatambo basa toera  kugumana cakudya na pyakubvala. Iye akhala ku Korinto panyumba ya Akila na Prisila, akuti akhacita matenti. Nakuti Paulu akhadziwambo basa ineyi, iye aphata basa pabodzi na iwo mu ntsiku zingasi. (Mabasa 18:1-4) Nzimu wakucena wapasa mphambvu Paulu toera kuphata basa kuti akwanise kugumana cakudya na pyakubvala, mu ndzidzi ubodzi ene mbacita basa yace yakumwaza mphangwa.

4. Mwakubverana na 2 Akorinto 12:7b-9, ndi nyatwa zipi zikhali na Paulu?

⁴ Lerini 2 Akorinto 12:7b-9. M’mavesi anewa, Paulu akhafuna kulonganji pidalonga iye kuti akhali na “munga m’manungo”? Mbamudakhala na munga m’manungo mwanu, mwandimomwene mbamudabva kupha kakamwe. Natenepa, Paulu akhalonga kuti akhathimbana na cinentso cikulu kakamwe m’manungo mwace. Iye alonga kuti cinentso ceneci cikhali ninga “anju wa Sathani” akhapitiriza ‘kum’menya mbama.’ Panango Sathani na madimonyo ace nee ndiwo akhacitisa pinentso pikhathimbana na Paulu, pyakuti pikhali ninga munga m’manungo mwace. Pisaoneka kuti pidadzindikira mizimu yakuipa kuti Paulu akhali na “munga” m’manungo mwace, iyo yabandza mwai unoyu toera kuthimizira nyatwa za Paulu kuti abve kupha kakamwe. Kodi Paulu acitanji?

5. Yahova atawira tani maphembero a Paulu?

⁵ Pakutoma, Paulu akhafuna kuti Yahova abuluse “munga” m’manungo mwace. Iye alonga: “Ine ndadembetera Mbuya [Yahova] katatu, toera abuluse munga unoyu m’manungo mwanga.” Mbwenye, mwakukhonda tsalakana maphembero a Paulu, munga ukhapitiriza m’manungo mwace. Kodi pyenepi pisabveka kuti Yahova nee atawira maphembero a Paulu? Nkhabe. Iye atawira maphembero ace. Yahova nee amalisa nyatwa, mbwenye iye apasa mphambvu Paulu toera akwanise kuzipirira. Yahova alonga: “Mphambvu yanga isapangizika mwakukwana mu kufewa kwako.” (2 Akor. 12:8, 9) Na ciphedzo ca Mulungu, Paulu akwanisa kupitiriza kukhala wakutsandzaya na wakukhurudzika!—Afil. 4:4-7.

6. (a) Ndi munjira ipi panango Yahova anatawira maphembero athu? (b) Kodi malemba anagumanika pa ndima anakuphedzani tani toera mukhale na mphambvu?

⁶ Ninga Paulu, kodi imwe mwaphemba kale Yahova toera amalise nyatwa zinathimbana na imwe? Panango mwacita phembero kazinji kene, mbwenye nyatwa zanu zisapitiriza kutekera, panango pyenepi pinakucitisani kunyerezera kuti Yahova nee asakutsalakanani. Khala ndi tenepo, kumbukani citsandzo ca Paulu. Nakuti Yahova atawira maphembero ace, natenepa iye anatawirambo maphembero anu. Panango Yahova nee anamalisa nyatwa zanu. Mbwenye kubulukira mu nzimu wakucena anakupasani mphambvu toera kupirira nyatwa zenezi. (Masal. 61:3, 4) Panango ‘munagwiswa pantsi,’ mbwenye Yahova nee anakusiyani.—2 Akor. 4:8, 9; Afil. 4:13.

7-8. (a) Ndi munjira ipi nzimu wakucena walandana na mphepo? (b) Pedhru alemba kuti nzimu wakucena usaphata tani basa?

⁷ Ndi njira ipi inango yakuti nzimu wakucena usatiphedza? Ife tinakwanisa kulandanisa nzimu wakucena na mphepo. Ninga mphepo yakuti isakwanisa kukwekweta bote mpaka kunafunika iyo mwakutsidzikizika, nzimu wakucena unakwanisa kutiphedza toera tipitirize kutumikira Yahova mwakukhonda tsalakana pinentso, mpaka mu dziko ipswa idapikira Mulungu.

⁸ Nakuti mpostolo Pedhru akhali nyakumedza, iye akhadziwa mwadidi kufambisa bote. Panango ndi thangwi ineyi, Pedhru alandanisa njira inaphata basa nzimu wakucena na kufambisa bote. Iye alemba: “Profesiya cipo yalongwa mwakubverana na pinafuna munthu, mbwenye anthu alonga mphangwa za Mulungu mukutsogolerwa na nzimu wakucena.” Fala Yacigerego idathumburuzwa “mukutsogolerwa” isabveka “mukukulumizwa.”—2 Ped. 1:21; cidzindikiro capantsi.

9. Kodi Pedhru akhanyerezeranji pidaphatisira iye fala yakuti “mukukulumizwa”?

⁹ Kodi Pedhru akhanyerezeranji pidaphatisira  iye fala yakuti “mukukulumizwa”? Luka, wakuti ndi mulembi wa bukhu ya Mabasa, aphatisirambo fala ibodzi ene Yacigerego toera kulonga pya bote ‘inakwekwetwa na mphepo.’ (Mabasa 27:15) Nyakupfundza Bhibhlya unango alonga kuti pidalemba Pedhru kuti anyakulemba Bhibhlya ‘akulumizwa,’ iye aphatisira fala “yakuphipirisa na yakudzumatirisa.” Natenepa, Pedhru akhalonga kuti ninga bote yakuti isakwekwetwa na mphepo mpaka kufika kunaenda iyo, anyakulemba Bhibhlya na aprofeta akulumizwa na nzimu wakucena toera kukwanirisa mabasa awo. Nyakupfundza Bhibhlya m’bodzi ene alonga: “Aprofeta akhali dzololo toera kucita basa ikhatsogolerwa iwo na nzimu wakucena.” Yahova acita khundu yace. Iye atuma “mphepo,” peno nzimu wakucena. Anyakulemba Bhibhlya acitambo khundu yawo. Iwo aphata basa mwakubverana na citsogolero ca nzimu unoyu.

10-11. Ndi pinthu pipi piwiri pinafunika ife kucita toera tikhale na cinyindiro cakuti tisatsogolerwa na nzimu wakucena? Perekani citsandzo.

¹⁰ Lero, Yahova nee asaphatisirabve nzimu wace wakucena toera kutsogolera anthu kuti alembe mabukhu a Bhibhlya. Mbwenye, Yahova asapitiriza kucita khundu yace. Iye asaphatisira nzimu wace wakucena toera kutsogolera atumiki ace. Khala tisafuna kutsogolerwa na nzimu wakucena, tisafunika kuona khala tikucita khundu yathu. Tinacita tani pyenepi?

¹¹ Nyerezerani citsandzo ici. Toera nyakufambisa bote aphedzeke na mphepo, iye asafunika kucita pinthu piwiri. Cakutoma, iye asafunika kuzungunusa bote yace kunaenda mphepo. Mbwenye iye angapitiriza pa mbuto yakuti nee isamenya mphepo, bote yace nee inabuluka pa gombe. Caciwiri, iye asafunika kufuthula mwadidi mavela a bote. Ngakhale kucite mphepo kakamwe, basi ene bote inakwanisa kufamba khala yafuthulwa mwadidi mavela, mbamenywa na mphepo. Munjira ibodzi ene, ife tinapitiriza kutumikira Yahova basi ene na ciphedzo ca nzimu wakucena. Toera kuphedzwa na nzimu wakucena, tisafunika kucita pinthu piwiri. Cakutoma, tisafunika kucita pinthu pyakuti nzimu wa Mulungu usatsogolera atumiki ace toera kupicita. Caciwiri, tisafunika “kufuthula mwadidi mavela athu,” peno kuwangisira toera  kucita pyonsene pinakwanisa ife m’basa ineyi. (Masal. 119:32) Tingacita pyenepi, nzimu wakucena unatipasa mphambvu toera tipitirize kutumikira Yahova mwakukhulupirika, mpaka kupita mu dziko ipswa ya Mulungu.

12. Ninji pinafuna ife kudinga cincino?

¹² Mpaka pano, taona njira ziwiri zakuti nzimu wakucena usatiphedza. Nzimu wakucena usatipasa mphambvu, pontho usatiphedza toera kukhala akukhulupirika mu ndzidzi unathimbana ife na nyatwa. Pontho, nzimu wakucena usatitsogolera toera kucita basa inafuna Yahova kuti tiicite na kutiphedza toera tipitirize munjira ya umaso wakukhonda mala. Cincino tinadinga pinthu pinai pyakuti tisafunika kupicita toera tiphedzwe na nzimu wakucena.

13. Mwakubverana na 2 Timoti 3:16, 17, Bhibhlya inakwanisa kucitanji kuna ife, pontho ife tisafunika kucitanji?

¹³ Cakutoma, pfundzani Mafala a Mulungu. (Lerini 2 Timoti 3:16, 17.) Fala Yacigerego idathumburuzwa “mukutsogolerwa na Mulungu” isabveka “kupumirwa na Mulungu.” Yahova aphatisira nzimu wace toera “kupumira” manyerezero ace anyakulemba Bhibhlya. Tingaleri Bhibhlya na kunyerezera mwadidi pinaleri ife, pitsogolero pya Mulungu pisapita m’manyerezero na muntima mwathu. Manyerezero anewa asatiphedza toera kucita macinjo mu umaso wathu mbatikomeresa Yahova. (Aheb. 4:12) Mbwenye toera kuphedzwa mwakukwana na nzimu wakucena, tisafunika kukhala na ndzidzi wakupfundza Bhibhlya ntsiku zonsene, mbatinyerezera mwadidi pinaleri ife. Natenepa, Mafala a Mulungu anadzakhuya pinalonga ife na pinacita ife.

14. (a) Thangwi yanji tinakwanisa kulonga kuti nzimu wakucena usagumanika pa misonkhano yathu? (b) Tisafunika kucitanji toera kuphedzwa mwakukwana na nzimu wakucena pa misonkhano yathu?

¹⁴ Caciwiri, lambirani Mulungu pabodzi. (Masal. 22:22) Nzimu wa Yahova usagumanika pa misonkhano. (Apok. 2:29) Thangwi yanji tikulonga tenepo? Thangwi tingagumanika pa misonkhano pabodzi na Akristu andzathu, tisaphemba nzimu wakucena, tisaimba nyimbo za Umambo zakubuluswa m’Mafala a Mulungu, pontho tisabvesera nkhani zakubuluswa m’Bhibhlya zinacitwa na abale adakhazikiswa na nzimu wakucena. Nzimu unoyu wakucena usaphedza alongo toera kukhunganyika na kucita makhundu anapaswa iwo. Mbwenye toera tiphedzwe mwakukwana na nzimu wakucena, tisafunika kukhunganyika toera kupereka matawiro pa misonkhano. Tingacita pyenepi, tinakhala ninga bote yakuti iri na “mavela akufuthulwa.”

15. Nzimu wakucena usatiphedza tani pakumwaza mphangwa?

¹⁵ Cacitatu, mwazani mphangwa. Tingaphatisira Bhibhlya pakumwaza mphangwa na pakupfundzisa, tisatawirisa nzimu wakucena toera utiphedze mu utumiki. (Aroma 15:18, 19) Mbwenye toera kuphedzwa mwakukwana na nzimu wa Mulungu, tisafunika kumwaza mphangwa ndzidzi onsene na kuphatisira Bhibhlya pingakwanisika. Ife tinakwanisa kucedza mwadidi na anthu pakumwaza mphangwa, tingaphatisira khundu yakuti mafala akukhonda nentsa toera kutomesa makani inagumanika pa tsamba yakutoma ya Umaso Wathu Wacikristu na Utumiki.

16. Ndi njira ipi yakufunika kakamwe toera kutambira nzimu wakucena?

¹⁶ Cacinai, citani phembero kuna Yahova. (Mat. 7:7-11; Luka 11:13) Njira ibodzi yakufunika kakamwe toera kutambira nzimu wakucena ndi kuphembera kuna Yahova. Nkhabe cinthu cinakwanisa kupingiza maphembero athu toera acimwane kufika kuna Yahova, peno kupingiza nzimu wa Mulungu toera ucimwane kufika kuna ife. Ngakhale tiri nkaidi, nzimu wakucena unakwanisa kutiphedza, pontho Sathani nee anakwanisa kupingiza toera tikhonde kutambira nzimu wakucena. (Tiya. 1:17) Tinacita tani phembero khala tisafuna kuphedzwa mwakukwana na nzimu wakucena? Toera kutawira mbvundzo unoyu, tendeni tione citsandzo cakuti cisagumanika basi  ene mu Evanjelyu ya Luka. * Citsandzo ceneci cinatiphedza toera kupfundza pizinji thangwi ya phembero.

17. Kodi nsangani wa Yezu unagumanika pa Luka 11:5-9, 13, usatipfundzisanji thangwi ya phembero?

¹⁷ Lerini Luka 11:5-9, 13. Nsangani wa Yezu usapangiza kuti tinaphemba tani nzimu wakucena. Mu nsangani unoyu, mamuna apaswa pikhafuna iye “thangwi yakupitiriza kwace kucemera nee kubwerera nduli.” Iye nee agopa kuphemba ciphedzo kuna xamwali wace maseze akhali masiku kakamwe. (Onani Umaso Wathu Wacikristu wa Julho wa 2018.) Pidalonga Yezu mu nsangani unoyu pisatipfundzisanji thangwi ya phembero? Iye alonga: “Pitirizani kuphemba, munadzapaswa; pitirizani kusaka, munadzagumana; pitirizani kugogodza nsuwo, munadzafungulirwa.” Mafala anewa asatipfundzisanji? Toera kutambira ciphedzo ca nzimu wakucena, tisafunika kucita phembero ndzidzi onsene.

18. Mwakubverana na nsangani wa Yezu, thangwi yanji tiri na cinyindiro cakuti Yahova anatipasa nzimu wace wakucena?

¹⁸ Nsangani wa Yezu usatiphedzambo toera kuona kuti thangwi yanji Yahova anatipasa nzimu wakucena. Mamuna adalongwa mu nsangani akhafuna kutsalakana mwadidi mulendo wace. Iye akhapibva kuti akhafunika kupasa cakudya mulendo wace adafika namasiku, mbwenye nee akhali na cinthu toera kumpasa. Yezu alonga kuti mamuna wa mu nsangani aphedzwa thangwi yakupitiriza kwace kuphemba. Kodi Yezu akhafuna kupfundzisanji? Khala munthu wakusowa ungwiro asakwanisa kuphedza ndzace anapitiriza kuphemba, Babathu wakudzulu Yahova, wakuti ndi wakukoma ntima, ali dzololo toera kuphedza ale anapitiriza kuphemba nzimu wace wakucena. Natenepa, tinakwanisa kukhala na cinyindiro cakuti Yahova anatawira maphembero athu tingaphemba nzimu wakucena.—Masal. 10:17; 66:19.

19. Thangwi yanji tiri na cinyindiro cakuti tinakwanisa kupirira?

¹⁹ Sathani nee anasiya kutiyesera. Mbwenye ife tinakwanisa kukhala na cinyindiro cakuti tinapembera. Thangwi yanji? Thangwi nzimu wakucena usatiphedza munjira ziwiri. Yakutoma, nzimu wakucena usatipasa mphambvu toera kupirira nyatwa. Yaciwiri, nzimu wakucena ndi mphambvu inatiphedza toera kupitiriza kutumikira Yahova mpaka mu dziko ipswa. Na thangwi ineyi, tendeni tipitirize kucita pyonsene pinakwanisa ife toera tiphedzwe mwakukwana na nzimu wakucena!