1. Kodi Yahova asatisiya toera ticitenji?

YAHOVA asatisiya toera ticite pisankhulo pyathu. Iye asatipfundzisa kuti tinacita tani pisankhulo pyadidi, pontho asatiphedza toera kupembera na pisankhulo pyathu. (Masal. 119:173) Tingaphatisira udziwisi unapfundza ife m’Bhibhlya, tinacita pisankhulo pyadidi kakamwe.—Aheb. 5:14.

2. Ndi pinentso pipi pyakuti panango tinathimbana napyo pakumala kucita cisankhulo?

² Maseze ticite pisankhulo pyadidi, panango pinanentsa kuna ife kucita pidasankhula ife. Onani pitsandzo pingasi: M’bale atonga kuleri Bhibhlya yonsene. Iye acita pyenepi masumana mangasi, mbwenye buluka penepo asiya. Mulongo atonga kutumikira ninga mpainiya wa ndzidzi onsene, mbwenye nee asacita pyenepi ntsiku idakhazikisa iye ingafika. Nsoka wa akulu a mpingo wabverana toera kucedzera abale na alongo mu mpingo, mbwenye papita miyezi mizinji mbadzati kutoma basa ineyi. Pinthu pyenepi pyonsene ndi pyakusiyana, mbwenye onsene asathimbana na nkandzo ubodzi ene. Iwo acita pisankhulo, mbwenye nee akwanirisa pidasankhula iwo. Akristu a mu ndzidzi wa apostolo ku Korinto athimbanambo na nkandzo ubodzi ene. Tendeni tione kuti tinapfundzanji na citsandzo cawo.

3. Ndi cisankhulo cipi cikhadacita Akristu a ku Korinto, mphapo ninji pidacitika?

³ Mu pyaka 55 Yezu Mbadamala Kale Kubalwa, Akristu a ku Korinto acita cisankhulo cakufunika kakamwe. Iwo abva kuti abale ku Yerusalemu na ku Yudeya akhali pa nyatwa, pontho mipingo inango ikhagumanyiza kobiri toera kuaphedza. Thangwi ya kukoma ntima na kupasa mwakudzala manja, Akristu a ku Korinto afunambo kuphedza abale anewa, natenepa iwo abvundza mpostolo  Paulu kuti mbadacita tani pyenepi. Iye apereka pitsogolero ku mpingo mbasankhula Tito toera atsalakane kobiri ikhaperekwa. (1 Akor. 16:1; 2 Akor. 8:6) Mbwenye pakupita miyezi mingasi, Paulu abva kuti Akristu a ku Korinto akhadzati kucita pyakupereka pidalonga iwo. Na thangwi ineyi, pyakupereka pyawo nee mbapidagumanywa mu ndzidzi wakuthema toera piendeswe ku Yerusalemu pabodzi na pyakupereka pidacita mipingo inango.—2 Akor. 9:4, 5.

4. Mwakubverana na 2 Akorinto 8:7, 10, 11, Paulu akulumiza Akristu a ku Korinto toera acitenji?

⁴ Akristu a ku Korinto akhadacita cisankhulo cadidi, pontho Paulu aasimba thangwi ya cikhulupiro cawo na cifuno cawo ca kupasa mwakudzala manja. Mbwenye iye aakulumizambo toera amalise basa ikhadatoma iwo. (Lerini 2 Akorinto 8:7, 10, 11.) Citsandzo cawo cisatipfundzisa kuti ngakhale kuna Akristu akukhulupirika panango pinakhala pyakunentsa kucita pidasankhula iwo.

5. Ndi mibvundzo ipi inafuna kutawira ife?

⁵ Ninga Akristu a ku Korinto, panango pinakhala pyakunentsa kwa ife kucita pinthu pidalonga ife. Thangwi yanji? Thangwi yakusowa ungwiro, panango tinacimwana kucita pinthu mu ndzidzi udakhazikisa ife. Pontho, midzidzi inango pinthu pyakukhonda dikhira pinacitisa kukhala pyakunentsa kucita pinthu pikhanyerezera ife. (Koel. 9:11; Aroma 7:18) Tisafunika kucitanji khala tisafuna kucinja cisankhulo cidacita ife? Pontho ninji cinafuna kutiphedza toera timalise basa idatoma ife?

6. Thangwi yanji panango tisafunika kucinja pisankhulo pyathu?

⁶ Pisankhulo pinango pyakufunika nee tisafunika kupicinja. Mwacitsandzo, ife tasankhula kutumikira Yahova, pontho tiri akutonga toera kukhala wakukhulupirika kuna ndzathu wa m’banja. (Mat. 16:24; 19:6) Mbwenye pisankhulo pinango, panango pisafunika kucinjwa. Thangwi yanji? Thangwi makhaliro asacinja. Ninji pinafuna kutiphedza toera kucita pisankhulo pyadidi kakamwe?

7. Tisafunika kuphembanji, pontho thangwi yanji?

⁷ Phembani udziwisi. Yahova apumira Tiyago toera kulemba: “Khala munthu nee ali na udziwisi wakukwana, mbapitirize kuuphemba kuna Mulungu, iye anadzaupaswa, thangwi Mulungu asapasa onsene mwakudzala manja.” (Tiya. 1:5) Nkhabepo munthu ali na “udziwisi” mu pinthu pyonsene. Natenepa, phembani Yahova toera akuphedzeni mu ndzidzi unacita imwe cisankhulo na mungafuna kucinja cisankhulo cidacita imwe. Yahova anadzakuphedzani toera kucita pisankhulo mwandzeru.

8. Tisafunika kufufudzanji mbatidzati kucita cisankhulo?

⁸ Fufudzani mwadidi. Lerini Bhibhlya, mabukhu a gulu ya Yahova, pontho cedzani na anthu ananyindira imwe. (Mis. 20:18) Kufufudza kweneku ndi kwakufunika mbamudzati kucita cisankhulo thangwi ya basa, kufuluka peno ntundu wa kursu toera mugumane kobiri yakuti inakuphedzani mbamupitiriza kutumikira Yahova.

9. Thangwi yanji tisafunika kukhala akunyindirika?

⁹ Dingani mathangwi a cisankhulo canu. Yahova nee asaona basi ene pisankhulo pyathu, mbwenye asaonambo kuti thangwi yanji tacita pisankhulo pyenepi. (Mis. 16:2) Iye asafuna kuti tikhale akunyindirika mu pinthu pyonsene. Natenepa, pakucita pisankhulo tisafunikambo kukhala akunyindirika kwa ife ene na kuna anango. Tingakhonda khala akunyindirika, panango pinakhala pyakunentsa kwa ife kucita pidalonga ife. Mwacitsandzo, panango m’bale anasankhula kutumikira ninga mpainiya wa ndzidzi onsene. Mbwenye mukupita kwa ndzidzi, pisanentsa kuna iye toera kukwanirisa maora anaphembwa mpainiya wa ndzidzi onsene. Panango iye nee anakomerwabve na kumwaza mphangwa. Panango iye akhanyerezera kuti thangwi ikulu idancitisa kutumikira ninga mpainiya ndi toera kukomeresa Yahova. Mbwenye panango  thangwi yandimomwene idancitisa kutumikira ninga mpainiya ndi toera kukomeresa anyakubalace, peno munthu unango.

10. Ninji pinafunika toera munthu acite macinjo?

¹⁰ Nyerezerani nyakupfundza Bhibhlya wakuti atonga kusiya kufumali. Iye asiya kufumali sumana ibodzi peno mawiri maseze pikhali pyakunentsa. Buluka penepo atoma pontho kufumali. Mbwenye pakumalisa iye asiyiratu! Ufuni wace kuna Yahova, pontho na kufuna kwace kunkomeresa pyam’phedza toera kukunda nsambo unoyu.—Akol. 1:10; 3:23.

11. Thangwi yanji tisafunika kukhazikisa pifuno?

¹¹ Khazikisani pifuno. Mungakhazikisa pifuno, pinakhala pyakukhonda nentsa kumalisa pidatoma imwe kucita. Mwacitsandzo, panango imwe mwatonga kuleri Bhibhlya ntsiku zonsene. Mbwenye khala imwe nee muli na ndandanda m’manyerezero mwanu, pinakhala pyakunentsa kuileri ntsiku zonsene. * Panango akulu a mpingo abverana toera kucedzera abale na alongo kazinji kene, mbwenye mukupita kwa ndzidzi iwo asiya kucita pyenepi. Toera kukwanirisa mwadidi pidabverana iwo, asafunika kubvundzika: “Kodi ife tacita ndandanda ya abale na alongo anafuna kucedzera ife? Kodi takhazikisa ndzidzi toera kuacedzera?”

12. Ndi pinthu pipi pyakuti panango tisafunika kupicita, pontho thangwi yanji?

¹² Khalani na maonero akulinganira. Nee m’bodzi wa ife ali na ndzidzi, mpfuma peno mphambvu toera kucita pinthu pyonsene pinafuna ife. Natenepa khalani na maonero akulinganira. Mungadzindikira kuti cisankhulo cidacita imwe nee munakwanisa kucikwanirisa, panango musafunika kucinja. (Koel. 3:6) Nyerezerani kuti mwadinga cisankhulo canu, mwacita macinjo akufunika mbamuona kuti munakwanisa kucita pidasankhula imwe. Ninji pinafuna kukuphedzani toera kumalisa basa idatoma imwe? Onani pinthu pixanu.

13. Munakhala tani na mphambvu toera kukwanirisa cisankhulo canu?

¹³ Phembani mphambvu. Mulungu anakupasani “mphambvu toera mucite pinafuna iye” mbamukwanirisa cisankhulo canu. (Afil. 2:13) Natenepa, phembani nzimu wakucena wa Yahova toera ukupaseni mphambvu zinafuna imwe. Pitirizani kucita phembero maseze muone kuti ntawiro wa phembero yanu ukudembuka. Yezu alonga: ‘Pitirizani kuphemba [nzimu wakucena], natenepa munadzaupaswa.’—Luka 11:9, 13.

14. N’dida unagumanika pa Misangani 21:5, unakuphedzani tani toera kukwanirisa cisankhulo canu?

¹⁴ Khunganyikani. (Lerini Misangani 21:5.) Toera kumalisa basa yonsene inatoma imwe, musafunika kukhunganyika. Buluka penepo musafunika kucita pinthu mwakubverana na pidakhunganya imwe. Munjira ibodzi ene, mungacita cisankhulo citani ndandanda ya pinthu pinafuna imwe toera kupikwanirisa. Mungaona kuti basa inacita imwe ndi ikulu, igaweni m’makhundu mang’ono, natenepa pinakhala pyakukhonda nentsa kuona kuthambaruka kwanu. Paulu akulumiza Akristu a ku Korinto toera akoye cinthu pakhundu “masumana onsene, pa ntsiku yakutoma” toera acite pyakupereka, mbuto mwakudikhira iye angafika toera iwo acite pyakupereka. (1 Akor. 16:2) Kugawa basa ikulu m’makhundu mang’ono kunakuphedzanimbo toera kucalira manyerezero akuti nee munakwanisa kuimalisa.

15. Mungamala kulemba pinafuna kucita imwe, musafunika kucitanji?

¹⁵ Mungalemba pinthu pinafuna kucita imwe, pinakhala pyakukhonda nentsa kupicita. (1 Akor. 14:40) Mwacitsandzo, misoka ya akulu a mpingo yatambira pitsogolero toera kusankhula nkulu wa mpingo m’bodzi toera alembe pisankhulo pinacita nsoka wa akulu a mpingo.  Nkulu adasankhulwa asalemba dzina ya m’bale adasankhulwa toera kucita basa idabverana nsoka na ndzidzi unafuna kuimalisa iye. Akulu a mpingo angatowezera pitsogolero pyenepi pisakhala pyakukhonda nentsa kucita pidabverana iwo. (1 Akor. 9:26) Imwe munakwanisambo kucita pibodzi pyene mu pinthu pinacita imwe ntsiku na ntsiku. Mwacitsandzo, musafunika kucita ndandanda ya pinthu pinafuna imwe kucita ntsiku zonsene, pontho lembani cinthu cakutoma cinafuna imwe kucita. Pyenepi nee pinakuphedzani basi ene toera kumalisa basa idatoma imwe, mbwenye pinakuphedzanimbo toera kucita pizinji mu ndzidzi wakucepa.

16. Musafunika kucitanji mungamala kucita cisankhulo, pontho pyenepi pisabverana tani na lemba ya Aroma 12:11?

¹⁶ Wangisirani. Musafunika kuwangisira toera kutowezera ndandanda yanu na kumalisa basa idatoma imwe. (Lerini Aroma 12:11.) Paulu apanga Timoti toera ‘apitirize kukhala waphinga’ pontho ‘apitirize’ kukhala mpfundzisi wadidi. Ife tinakwanisa kuphatisira uphungu wa Paulu mu pinthu pyonsene pinafuna kucita ife m’basa ya Yahova.—1 Tim. 4:13, 16.

17. Tinaphatisira tani lemba ya Aefesi 5:15, 16, toera kucita pidasankhula ife?

¹⁷ Phatisirani mwandzeru ndzidzi wanu. (Lerini Aefesi 5:15, 16.) Khazikisani ndzidzi toera kucita pidasankhula imwe, pontho lekani kucinja ndzidzi unoyu. Lekani kudikhira ndzidzi wakuti nee mwaphatika kakamwe na pinthu pinango toera kucita pidasankhula imwe, thangwi ndzidzi unoyu panango nee unagumanika. (Koel. 11:4) Citani mphole-mphole toera mukhonde kutawirisa kuti pinthu pyakukhonda funika pibvunge ndzidzi wanu na mphambvu zakuti musafunika kuziphatisira mu pinthu pyakufunika. (Afil. 1:10) Pingakwanisika, khazikisani ndzidzi wakuti nee munadzudzumiswa na anango. Pangani anango kuti nee musafuna kudzudzumiswa. Fungani ntokodzi wanu, pontho lekani kuleri mphangwa mu e-mail peno kuphatisira interneti mu ndzidzi unoyu. *

18-19. Ninji cinafuna kukuphedzani toera mukhonde kubwerera nduli pakumala kucita cisankhulo maseze muthimbane na nyatwa?

¹⁸ Ikhani manyerezero anu ku nkhombo. Nkhombo zinafuna kukhala na imwe thangwi ya cisankhulo canu, zalandana na mbuto inaenda imwe pakucita ulendo. Khala musafuna kufika kunaenda imwe, musafunika kupitiriza na ulendo wanu maseze njira ifungwe mbamucinja toera kuenda na njira inango. Munjira ibodzi ene, tingaikha manyerezero athu ku nkhombo zinafuna kukhala na ife nee tinabwerera nduli ngakhale tithimbane na nyatwa.—Agal. 6:9.

¹⁹ Kucita pisankhulo ndi pyakunentsa, pontho kupiphatisira ndi pyakunentsambo. Mbwenye na ciphedzo ca Yahova tinakwanisa kukhala na udziwisi na mphambvu zinafuna ife toera kumalisa basa idatoma ife.