ABALE na alongo azinji akuti akhadaenda m’madziko anango a mpfuma, cincino abwerera pontho m’madziko awo. Thangwi yakufuna kwawo Yahova na anthu, iwo aenda katumikira m’mbuto zakuti ziri na amwazi mphangwa akucepa. (Mat. 22:37-39) Mphapo ndi nkhombo zipi zidaapasa Yahova thangwi yakuwangisira kwawo? Toera kudziwa pyenepi, tendeni tione pitsandzo pya abale na alongo angasi a dziko ya Camarões inagumanika mu Afrika.

Mu caka 1998, m’bale anacemerwa Onésime afuluka ku Camarões mbaenda kakhala ku dziko inango. Kweneko iye amala pyaka 14. Ntsiku inango, iye abva nkhani pa misonkhano ya mpingo ikhalonga thangwi ya basa yakumwaza mphangwa. M’bale akhacita nkhani aphatisira nsangani wakuti: “Anthu awiri akuti akhali axamwali akhamedza m’mbuto ziwiri zakusiyana. M’bodzi akhamanga nyama zizinji kupiringana ndzace. Kodi ule wakuti nee akhamanga nyama zizinji nee mbadaenda pa mbuto inamedza xamwali wace?” Nsangani unoyu wacitisa Onésime kunyerezera pya kubwerera ku Camarões, toera kaphedza anthu azinji kuti apfundze Bhibhlya. Mbwenye iye akhadzudzumika kakamwe khala mbadakwanisa pontho kudzolowera makhaliro a dziko ineyi idabalwa iye. Toera kumalisa kudzudzumika kwace, iye aenda kakhala ku Camarões miyezi mitanthatu. Buluka penepo, mu caka 2012 iye afuluka mbaenda kakhala mu dziko ineyi.

Onésime alonga: “Ine ndikhafunika kudzolowera pontho temperatura ya kweneko na makhaliro anango. Kusiyapo pyenepi, ine ndikhafunika kudzolowera pontho kukhalira mabhanku mu Nyumba ya Umambo. Mbwenye cinthu cikhandiphedza toera ndikhonde kunyerezera mipando ikhakhalira ine ku dziko inango ndi kubvesera kakamwe misonkhano.”

Mu caka 2013, Onésime amanga banja na Géraldine wakuti akhadamala pyaka pipfemba ku Fransa. Ndi nkhombo zidaapasa Yahova thangwi yakuikha pinthu pyauzimu pa mbuto yakutoma? Onésime alonga: “Ninga banja ife taenda ku Xikola ya Amwazi Mphangwa a Umambo, pontho tatumikira ku Bheteli. Caka cidamala, anyakupfundza Bhibhlya akukwana 20 a mu mpingo mwathu abatizwa. Natenepa cincino ndisaona kuti ndiri kumedza pa mbuto yadidi.” (Marko 1:17, 18) Géraldine alongambo: “Ine ndiri na nkhombo zizinji zakuti nee ndikhazidikhira.”

Judith akhadafuluka mbaenda kakhala ku Estados Unidos, mbwenye iye akhafuna kakamwe kucita pizinji m’basa yakumwaza mphangwa. Iye alonga: “Ndzidzi onsene ukhaenda ine kaona abale anga ku Camarões, ndikhalira pakufuna kubwerera ku Estados Unidos thangwi ndikhasiya anyakupfundza Bhibhlya azinji.” Mbwenye iye akhanyinyirika toera kufuluka mbaenda kakhala pontho ku Camarões. Thangwi iye akhali na basa yakuti ikhalipa kobiri izinji yakuti ikhamphedza toera kugulira mitombwe babace wakuti akhali ku Camarões.  Mbwenye Judith anyindira Yahova mbabwerera pontho ku Camarões. Iye alonga kuti asapitiriza kunyerezera umaso wadidi ukhali na iye ku Estados Unidos. Iye aphemba Yahova toera amphedze kukunda manyerezero anewa. Kusiyapo pyenepi, iye aphedzwambo na muyang’aniri wa cisa pabodzi na nkazace.

Judith asakumbuka: “Mu pyaka pitatu ine ndapfundzisa Bhibhlya anthu anai mpaka kubatizwa.” Mukupita kwa ndzidzi, atoma kutumikira ninga mpainiya wakupambulika. Lero, iye asatumikira Yahova pabodzi na mamunace anacemerwa Sam-Castel wakuti ndi muyang’aniri wa cisa. Mphapo pidacitika na babace Judith? Iye pabodzi na acibale ace akwata babawo mbaenda naye ku hospitali mu dziko inango toera acitwe operasau. Mwakutsandzayisa, operasau idacitwa babace yafamba mwadidi.

M’bale anacemerwa Victor akhadafuluka mbaenda kakhala ku Kanada. Pidamala kuleri nsolo unango unagumanika mu A Sentinela unalonga pya universidade, iye akhala pantsi mbanyerezera pyenepi. Buluka penepo iye asiya kuenda ku universidade mbatoma kucita kursu ya ndzidzi wakucepa. Iye alonga: “Pyenepi pyandiphedza toera kugumana basa mwakucimbiza, pontho pyandiphedza toera kutumikira ninga mpainiya.” Mukupita kwa ndzidzi, Victor amanga banja na Caroline, pontho uwiri wawo aenda kaona dziko ya Camarões. Mu ndzidzi udaenda iwo kaona Bheteli ya ku Camarões, abale anango aawangisa toera anyerezere pya kutumikira mu dziko ineyi. Victor alonga: “Nakuti ife nee tikhali na pinthu pizinji toera kucita tatawira kutumikira mu dziko ineyi.” Maseze Caroline akhali na nkandzo wa ungumi, iwo atonga kufuluka mbaenda katumikira ku dziko ineyi.

Victor na Caroline atoma kutumikira ninga apainiya a ndzidzi onsene toera kuphedza anthu onsene akuti akhafuna kupfundza Bhibhlya. Nakuti iwo akhadakoya dinyero izinji, iwo nee asaka basa mwakucimbiza. Pidamala dinyero yawo, iwo abwerera pontho ku Kanada mbaphata basa miyezi mingasi toera akwanise katumikira pontho ninga apainiya ku Camarões. Ndi nkhombo zipi zidakhala na iwo? Iwo akursari Xikola ya Amwazi Mphangwa a Umambo, buluka penepo atumikira ninga apainiya akupambulika, pontho cincino asacita mabasa akumanga Nyumba za Umambo. Victor alonga: “Nakuti ife tasankhula kukhonda khala na pinthu pizinji, ife tisanyindira Yahova, pontho iye asatitsalakana.”

Mu caka 2002, Alain wakuti akhapfundza ku universidade ku Alemanya, aleri tratadho ya nsolo wakuti Aphale Na Atsikana—Munadzacitanji Na Umaso Wanu? mphangwa zidaleri iye mu tratadho ineyi zancitisa toera akhale na manyerezero anango. Mu caka 2006, iye akurusari Xikola Yakupfundzisa Basa ya Utumiki, buluka penepo iye atumizwa ku Camarões dziko idabalwa iye.

Ku Camarões, Alain agumana basa yakuti akhaicita midzidzi mingasi pa ntsiku. Mukupita kwa ndzidzi, iye agumana basa yadidi kakamwe. Mbwenye iye akhali wakudzudzumika kakamwe khala basa ineyi mbidaphedza toera kucita pizinji mu utumiki. Mu ndzidzi udapangwa Alain toera atumikire ninga mpainiya wakupambulika, iye atawira na ntima onsene. Pidabva patrau wace pyenepi, ampanga kuti anan’thimizira thimizira dinyero ikhatambira iye pa mwezi, mbwenye Alain akhonda mbaenda katumikira ninga mpainiya wakupambulika. Mukupita kwa ndzidzi Alain amanga banja na Stéphanie wakuti akhala pyaka pizinji ku Fransa. Ndi pinentso pipi pidathimbana na mulongo Stéphanie pidaenda iye kakhala ku Camarões?

 Stéphanie alonga: “Ine ndaphatwa na utenda wa alerijiya na mautenda anango, mbwenye ndamwa mitombwe mbandiwanga.” Yahova apasa nkhombo banja ineyi thangwi ya kupirira kwawo. Alain alonga: “Pidaenda ife kamwaza mphangwa ku cisa ca kutali cinacemerwa Katé, tagumana anthu azinji akuti akhafuna kupfundza Bhibhlya. Natenepa, ife tikhapfundza nawo Bhibhlya mukuphatisira telefoni. Mukupita kwa ndzidzi, awiri mwa anyakupfundza Bhibhlya anewa abatizwa, pontho ku cisa ceneci kwadzakhala na amwazi mphangwa akukwana axanu.” Stéphanie athimiza: “Ndi pyakutsandzayisa kakamwe kuphedza anthu toera atumikire Yahova. Ife tisakwanisa kuona pyenepi mu ndzidzi unatumikira ife kuno.” Lero Alain asatumikira ninga muyang’aniri wa cisa pabodzi na nkazace anacemerwa Stéphanie.

Gisèle abatizwa mu ndzidzi ukhacita iye kursu ya infermero ku Italya. Iye akhapfundzisa na Banja ibodzi yakuti ikhatumikira ninga apainiya. Pontho iye akhasirira kakamwe umaso ukhali na banja ineyi, na thangwi ineyi iye akhafuna kucitambo pizinji mu utumiki. Natenepa Gisèle atoma kutumikira ninga mpainiya wa ndzidzi onsene mu ndzidzi ukhamalisa iye kursu yace.

Gisèle akhafuna kubwerera ku Camarões toera kucita pizinji m’basa ya Yahova, mbwenye iye akhanyinyirika. Iye alonga: “Ine ndikhafunika kusiya ufulu ukhali na ine wakukhala mu dziko ya Italya, axamwali anga na acibale anga.” Ngakhale tenepo, mwezi wa Maio wa 2016, Gisèle abwerera ku Camarões. Mukupita kwa ndzidzi, mulongo amanga banja na Léonce, pontho Bheteli ya ku Camarões yaphemba banja ineyi toera ikatumikire ku Ayos, nzinda wakuti ukhali na amwazi mphangwa akucepa.

Kodi ndi makhaliro api adagumana iwo ku Ayos? Gisèle alonga: “Ndzidzi onsene maluju akhathima, pontho nee tikhakwanisa ku karegari matelefoni athu. Natenepa ife tikhaphatisira matelefoni athu ndzidzi onsene. Ine ndapfundza kuphika na nkhuni, kusiyapo pyenepi, nakuti pa ncera pakhadzala kakamwe na anthu, ife tikhaenda katunga madzi na masiku mukuphatisira karinya na laterna.” Ninji pidaphedza banja ineyi toera kupirira makhaliro anewa? Gisèle alonga: “Ife tapirira makhaliro anewa na ciphedzo ca Yahova, kuphedzana unango na ndzace, pontho na ciphedzo cikhatambira ife kuna acibale athu na axamwali athu.”

Kodi Gisèle ali wakutsandzaya pidabwerera iye ku dziko yawo? Iye alonga: “Mwakukhonda penula, pakutoma ife tikhali akutsukwala thangwi ya pinentso pikhathimbana na ife, mbwenye pidakunda ife pinentso pyenepi, ine na mamunanga tiri wakutsandzaya thangwi tisadziwa kuti tiri kucita pinthu ninga mukhafunira ife. Ife tisanyindira Yahova, pontho tisaona kuti tiri cifupi na iye.” Léonce na Gisèle akurusari Xikola ya Amwazi Mphangwa a Umambo, pontho cincino asatumikira ninga apainiya akupambulika.

Ninga anyakumedza akuti asathimbana na pinentso pizinji toera kupha nyama, abale na alongo anabwerera mu dziko idabalwa iwo asathimbana na pinentso pizinji toera kumwaza mphangwa za Umambo. Mbwenye Yahova nee anadzadwala kuwangisira kunacita abale na alongo anewa anapangiza ufuni kuna dzina yace. (Neh. 5:19; Aheb. 6:10) Khala imwe musakhala ku dziko inango, pontho musadziwa kuti ku dziko yanu kuli na amwazi mphangwa akucepa, kodi munakwanisa kubwerera? Mungacita pyenepi, imwe munadzakhala na nkhombo zizinji kakamwe.—Mis. 10:22.