1. Ndi mbvundzo upi wakuti panango tinabvundzika?

 KODI imwe midzidzi inango musadzudzumika munganyerezera thangwi ya pinthu pinafuna kucitika, ninga kufudzwa kwa mauphemberi authambi, kupomokerwa kwa Goge na Magoge na nkhondo ya Armajedhoni? Midzidzi inango imwe musabvundzika: ‘Kodi ine ndinapitiriza kukhala wakukhulupirika pinthu pyenepi pyakugoswa pingadzacitika?’ Khala imwe mwanyerezera thangwi ya pyenepi, mafala adalonga Yezu anagumanika pa lemba ya nsolo uno anakuphedzani kakamwe. Iye apanga anyakupfundzace: “Lekani kunentseka m’mitima yanu. Khulupirani Mulungu.” (Juwau 14:1) Cikhulupiro cakuwanga cinatiphedza toera kupirira nyatwa zinafuna kuthimbana na ife ntsogolo.

2. Tinawangisa tani cikhulupiro cathu, pontho tinaonanji mu nsolo uno?

² Ife tinakwanisa kuwangisa cikhulupiro cathu toera kupirira nyatwa za ntsogolo tinganyerezera mwadidi nyatwa zinayesera cikhulupiro cathu lero. Tinganyerezera mwadidi pyenepi, ife tinadzindikira pinthu pinafunika ife kucita toera kuwangisa cikhulupiro cathu. Ndzidzi onsene unapirira ife pinentso cikhulupiro cathu cisakhala cakuwanga kakamwe. Pyenepi pinatiphedza toera kupirira nyatwa zinafuna kuthimbana na ife ntsogolo. Mu nsolo uno, ife tinaona pinthu pingasi pyakuti pyapangiza kuti anyakupfundza a Yezu akhafunika kuthimizira cikhulupiro cawo. Buluka penepo, ife tinaona kuti tinapirira tani pinthu pibodzi pyene lero, pontho tinakhunganyika tani pinthu pinafuna kucitika ntsogolo.

3. Mwakubverana na Mateu 6:30, 33, Yezu alonganji thangwi ya cikhulupiro?

³ Ndi pyakudziwika kuti nsolo wa banja usafunika kutsalakana nkazace na anace mukuapasa cakudya, cakubvala na mbuto yakugona. Mbwenye kucita pyenepi ndi kwakunentsa kakamwe midzidzi  ino ya nyatwa. Midzidzi inango, abale na alongo athu asaluza mabasa awo, pontho pisakhala pyakunentsa kakamwe toera agumane mabasa anango maseze awangisire kakamwe. Pontho anango asakhonda mabasa akuti nee ndi akuthema kuna Akristu. Pinthu ninga pyenepi pingacitika, tisafunika kukhala na cikhulupiro cakuwanga cakuti Yahova anatsalakana banja yathu. Yezu alonga pyenepi kuna anyakupfundzace mu Nkhani yace ya Paphiri. (Lerini Mateu 6:30, 33.) Tingakhala na cinyindiro cakukwana cakuti Yahova cipo anatisiya, ife tinakwanisa kuikha Umambo pa mbuto yakutoma. Kusiyapo pyenepi, tingaona kuti Yahova asatitsalakana, ife tinakhala na uxamwali wakuwanga na iye, pontho cikhulupiro cathu cinakhala cakuwanga.

4-5. Ninji pidaphedza banja inango mu ndzidzi ukhadzudzumika iwo thangwi ya pinthu pyakumanungo pikhafuna iwo?

⁴ Onani citsandzo ca banja inango ku Venezuela yakuti yaona ciphedzo ca Yahova mu ndzidzi ukhadzudzumika iwo kuti anagumana tani pinthu pyakumanungo pikhafuna iwo. Nduli, banja ineyi ya Castro ikhali na munda wakuti ukhaaphedza toera agumane pinthu pyakumanungo pikhafuna iwo. Mbwenye mapanga aakwatira munda wawo buluka penepo mbaathamangisa. Miguel wakuti ndi nsolo wa banja ineyi alonga: “Cincino ife taphemba munda ung’ono wakuti tisaulima toera tikwanise kugumana cakudya. Ntsiku zonsene ine ndikhaphemba Yahova toera atitsalakane.” Banja ineyi iri na umaso wakunentsa kakamwe, mbwenye thangwi yakunyindira citsalakano ca Yahova iwo asagumanika pa misonkhano na basa yakumwaza mphangwa mwakukhonda phonya. Iwo asaikha Umambo wa Mulungu pa mbuto yakutoma, pontho Yahova asaatsalakana.

⁵ Midzidzi ineyi yakunentsa, Miguel na nkazace asaona kuti Yahova asaatsalakana tani. Midzidzi inango, Yahova aphatisira abale na alongo toera aphedze banja ineyi na kuphedza Miguel toera agumane basa. Kusiyapo pyenepi, Yahova aphatisira abale a pa Bheteli toera aaphedze mukuapasa pikhafunika kuna iwo. Yahova asaaphedza ndzidzi onsene. Na thangwi ineyi cikhulupiro ca banja ineyi ndi cakuwanga kakamwe. Pidamala iye kulonga cinthu cibodzi cakuti Yahova aaphedza, mwanawo wakutoma anacemerwa Yoselin alonga: “Ndi pyakuwangisa kakamwe kuona pakweca kuti Yahova ali kutiphedza. Iye ndi xamwali wanga, pontho ndiri na cinyindiro cakuti ndzidzi onsene iye anandiphedza.” Yoselin athimiza: “Nyatwa zidathimbana na ife ninga banja, zatikhunganya toera tithimbane na nyatwa zikulu kakamwe zinadikhira ife ntsogolo.”

6. Munawangisa tani cikhulupiro canu mungathimbana na nyatwa yakusowa kobiri?

⁶ Kodi imwe musathimbana na nyatwa yakusowa kobiri? Khala ndi tenepo, midzidzi ineyi ndi yakunentsa kakamwe kuna imwe. Ngakhale tenepo, imwe munakwanisa kuphatisira midzidzi ineyi toera kuwangisa cikhulupiro canu. Citani phembero kuna Yahova, pontho lerini mafala a Yezu anagumanika pa Mateu 6:25-34, buluka penepo anyerezereni mwacidikhodikho. Nyerezerani mwadidi pitsandzo pya atumiki a Yahova lero pyakuti pisapangiza kuti Yahova asatsalakana ale anaphatisira ndzidzi wawo toera kuntumikira. (1 Akor. 15:58) Mungacita pyenepi, imwe munakhala na cikhulupiro cakuti Yahova anakuphedzani munjira ibodzi ene idaphedza iye atumiki ace anango akuti athimbana na nyatwa zakulandana na zanu. Iye asadziwa pinthu pinafunika imwe, pontho asadziwa kuti anakuphedzani tani. Mungaona ciphedzo ca Yahova, imwe munakhala na cikhulupiro cakuwanga cakuti cinakuphedzani toera kupirira nyatwa za ntsogolo.—Hab. 3:17, 18.

7. Mwakubverana na Mateu 8:23-26, kodi “condzi cikulu” cayesera tani cikhulupiro ca anyakupfundza a Yezu?

⁷ Mu ndzidzi ukhacita Yezu ulendo pabodzi na anyakupfundzace m’mwadiya, catoma condzi cikulu m’bara. Pontho Yezu aphatisira condzi ceneci toera kuphedza anyakupfundzace kubvesesa kuti iwo akhafunika kukhala na cikhulupiro cakuwanga. (Lerini Mateu 8:23-26.) Mu ndzidzi ukhacitika condzi, pontho mu ndzidzi ukhamenywa mwadiya na mabimbi, Yezu akhagona. Mu ndzidzi udalamuswa Yezu na anyakupfundzace akuti akhagopa kakamwe mbam’phemba toera aapulumuse, iye aabvundza: “Thangwi yanji musagopa kakamwe, imwe anthu a cikhulupiro cakucepa?” Anyakupfundza anewa akhafunika kudzindikira kuti Yahova mbadatsidzikiza Yezu pabodzi na iwo. Kodi pinthu pyenepi pisatipfundzisanji? Cikhulupiro cakuwanga cinatiphedza toera kupirira nyatwa ikulu yakulandana na condzi.

8-9. Kodi cikhulupiro ca Anel cayeserwa tani, pontho ninji pidam’phedza?

⁸ Onani kuti mulongo unango anacemerwa Anel wa ku Porto Rico awangisa tani cikhulupiro cace mu ndzidzi udapirira iye cinentso cikulu. Mu caka ca 2017 iye agwerwa na “condzi cikulu” cinacemerwa Maria, cakuti cafudza nyumba yace. Pontho thangwi ya condzi ceneci iye aluza basa yace. Anel alonga: “Mu ndzidzi unoyu wakunentsa, ine ndikhadzudzumika kakamwe, mbwenye ndapfundza kuti ndikhafunika kunyindira Yahova mukucita phembero mbandikhonda kutawirisa kuti kudzudzumika kweneku kundicitise kusiya pinthu pikhafunika ine kucita.”

⁹ Anel alongambo kuti kubvera kwam’phedza toera kupirira pinentso pyenepi. Iye alonga: “Kubvera pitsogolero pya gulu kwandiphedza toera ndikhale wakukhurudzika. Yahova andiphedza mukuphatisira abale na alongo. Iwo andiwangisa, pontho andipasa pinthu pyakuti pyandiphedza kakamwe.” Iye athimiza: “Yahova andipasa pizinji kakamwe kupiringana pire pidaphemba ine, pontho cikhulupiro canga cakhala cakuwanga kakamwe.”

10. Musafunika kucitanji mungathimbana na nyatwa ikulu yakulandana na condzi?

¹⁰ Kodi imwe muli kuthimbana na nyatwa yakulandana na condzi? Panango imwe mwagwerwa na cidengwa cacibaliro. Panango imwe muli kuthimbana na utenda wakuti usakucitisani kukhala wakutsukwala kakamwe mbamusowa cidikhiro. Midzidzi inango panango imwe munadzudzumika kakamwe, mbwenye lekani kutawirisa kuti kudzudzumika kweneko kukucitiseni kusiya kunyindira Yahova. Khalani cifupi na iye mukucita phembero yakubulukira muntima. Wangisani cikhulupiro canu mukunyerezera midzidzi  idakuphedzani Yahova nduli. (Masal. 77:11, 12) Pontho khalani na cinyindiro cakuti iye cipo anakusiyani.

11. Thangwi yanji tisafunika kupitiriza kubvera pitsogolero pinapereka abale anatsogolera mu gulu ya Yahova?

¹¹ Ndi pinthu pipi pinango pyakuti pinakwanisa kukuphedzani toera kupirira pinentso? Anel alonga thangwi yakubvera. Nyindirani ale ananyindirwa na Yahova pabodzi na Yezu. Midzidzi inango, abale anatsogolera, panango anatipasa pitsogolero pyakuti pinaoneka ninga pyakusowa basa kuna ife. Mbwenye Yahova asapasa nkhombo ale anambvera. Kubulukira m’Mafalace na pitsandzo pya atumiki ace akukhulupirika, ife tisadziwa kuti kubvera kusapulumusa umaso. (Eks. 14:1-4; 2 Pya dziko. 20:17) Nyerezerani mwacidikhodikho thangwi ya pitsandzo pyenepi. Mungacita pyenepi munawangisa cifuno canu cakubvera pitsogolero pinapereka gulu ya Yahova cincino na pitsogolero pinafuna kupereka iyo ntsogolo. (Aheb. 13:17) Natenepa imwe nee munakhala na mathangwi toera kugopa nyatwa ikulu yakuti inadzabwera mwakukhonda dembuka.—Mis. 3:25.

12. Mwakubverana na Luka 18:1-8, kodi cikhulupiro cinatiphedza tani toera kupirira tingatsalakanwa mwakusowa ulungami?

¹² Yezu akhadziwa kuti kusowa ulungami mbakudayesera cikhulupiro ca anyakupfundzace. Toera kuaphedza kupirira pyenepi, iye aapanga nsangani wakuti usagumanika m’bukhu ya Luka. Yezu alonga pya nzice wakuti apitiriza kulira kuna nyakutonga miseru wakuti antonga mwakusowa ulungami. Iye akhali na cinyindiro cakuti angapitiriza kulira, nyakutonga unoyu mbadam’phedza. Natenepa nyakutonga miseru atawira phembo yace. Kodi nsangani unoyu usatipfundzisanji? Yahova nee ndi wakusowa Ulungami. Yezu alonga: “Maseze Mulungu asapangiza kupirira kwace kuna anthu ace adasankhulwa akuti asalira kuna iye masiku na masikati, kodi iye nee anacita pyonsene toera iwo acitirwe ulungami?” (Lerini Luka 18:1-8.) Buluka penepo Yezu athimiza: ‘Mwana wa munthu angafika, anadzagumanadi anthu akuti ali na cikhulupiro pa dziko yapantsi?’ Tingatsalakanwa mwakusowa ulungami, ife tisafunika kupirira toera kupangiza kuti tiri na cikhulupiro cakuwanga ninga ca nzice unoyu. Tingakhala na cikhulupiro cakuwanga, ife tinakwanisa kukhala na cinyindiro cakuti Yahova anatiphedza. Kusiyapo pyenepi, ife tisafunikambo kukhulupira kuti maphembero athu ali na mphambvu kakamwe. Midzidzi inango, panango maphembero athu anatawirwa munjira yakuti nee tikhaidikhira.

13. Kodi phembero yaphedza tani banja inango yakuti yatsalakanwa mwakusowa ulungami?

¹³ Onani citsandzo ca mulongo unango anacemerwa Vero wakuti asakhala ku República Democrática do Congo. Vero na mamunace wakuti nee asatumikira Yahova, pabodzi na mwanawo wantsikana wa pyaka 15 pyakubalwa, athawa mu nzinda mwawo thangwi mukhadapita anyankhondo mbatoma kuliza mpfuti. Mu ndzidzi ukhathawa iwo, iwo agumanikana na anyankhondo njira akuti aapanga kuti mbadaapha. Vero pidatoma iye kulira, mwanace atoma kucita phembero mwakugaluza toera am’phedze  kumatama, pontho iye akhaphatisira dzina ya Yahova m’phembero. Pidamala iye kucita phembero, nkulu wa nsoka unoyu wa anyankhondo ambvundza: “Ntsikana, mbani akupfundzisa kucita phembero?” Iye atawira: “Andipfundzisa ndi mai wanga mukuphatisira citsandzo cinagumanika pa Mateu 6:9-13.” Nkulu wa anyankhondo alonga: “Ntsikana, ndoko mwantendere na anyakubalako, pontho Yahova Mulungu wanu mbakutsidzikizeni!”

14. Ndi pinthu pipi pyakuti panango pinayesera cikhulupiro cathu, pontho ninji cinafuna kutiphedza toera kupirira?

¹⁴ Citsandzo ceneci cisatipfundzisa kuti phembero ndi yakufunika kakamwe. Mphapo ndiye tani khala maphembero anu nee asatawirwa mwakucimbiza? Ninga nzice adalongwa mu nsangani wa Yezu, pitirizani kucita phembero na cinyindiro cakuti Mulungu wathu cipo anakusiyani, pontho iye anatawira maphembero anu. Pitirizani kuphemba nzimu wakucena wa Yahova. (Afil. 4:13) Kumbukani kuti mwakukhonda dembuka Yahova anakupasani nkhombo zizinji, pontho munaduwala nyatwa zonsene zinathimbana na imwe. Mungapirira pinentso na ciphedzo ca Yahova, imwe munakhala wakuwanga kakamwe, pontho munakwanisa kupirira pinentso pinadikhira ife ntsogolo.—1 Ped. 1:6, 7.

15. Mwakubverana na Mateu 17:19, 20, ndi cinentso cipi cidathimbana na anyakupfundza a Yezu?

¹⁵ Yezu apfundzisa anyakupfundzace kuti cikhulupiro mbacidaaphedza toera kupitiriza kutumikira Yahova mwakukhonda tsalakana pinentso pikhathimbana na iwo. (Lerini Mateu 17:19, 20.) Pa ulendo unango, iwo nee akwanisa kubulusa dimonyo maseze akhadakwanisa kucita pyenepi midzidzi inango nduli. Thangwi yanji? Yezu alonga kuti iwo akhafunika kuthimizira cikhulupiro cawo. Iye aapanga kuti angakhala na cikhulupiro cakuwanga mbadakwanisa kupirira pinentso pikulu pyakulandana na mapiri. Lero, panango ife tinathimbanambo na pinentso pyakuti pinaoneka ninga pyakunentsa kakamwe toera kupirira.

16. Kodi cikhulupiro caphedza tani Geydi toera kupirira nyatwa yakuferwa na mamunace?

¹⁶ Onani citsandzo ca Geydi, mulongo unango wa ku Guatemala. Mamunace aphiwa mu ndzidzi ukhabwerera iwo kunyumba buluka ku misonkhano. Kodi cikhulupiro ca Geydi cam’phedza tani toera kupirira nyatwa ineyi? Iye alonga: “Phembero yandiphedza toera kusiya nyatwa zanga m’manja mwa Yahova, pontho pyenepi pyandiphedza toera kukhala na ntendere wa m’manyerezero. Ine ndakwanisa kuona citsalakano ca Yahova kubulukira mwa acibale anga na axamwali anga mu mpingo. Kucita pizinji m’basa ya Yahova kwandiphedza toera kupungula nyatwa zanga mbandikhonda kudzudzumika kakamwe na pinthu pinafuna kucitika mangwana. Pyenepi pyandipfundzisa kuti mwakukhonda tsalakana nyatwa zinafuna kuthimbana na ine ntsogolo, ndinakwanisa kupirira na ciphedzo ca Yahova, Yezu na gulu ya Yahova.”

17. Tisafunika kucitanji tingathimbana na nyatwa ikulu yakulandana na phiri?

¹⁷ Kodi imwe muli wakutsukwala thangwi yakuferwa  na nyakufunika wanu? Wangisani cikhulupiro canu ku cidikhiro cakulamuswa muli akufa mukuleri mphangwa za m’Bhibhlya zinalonga pya anthu adalamuswa muli akufa. Kodi imwe muli wakutsukwala thangwi m’bodzi wa pabanja panu abuluswa mu mpingo? Pfundzani toera mukhale na cinyindiro cakuti Yahova ndzidzi onsene asalanga mwadidi kakamwe. Mwakukhonda tsalakana nyatwa zinathimbana na imwe, phatisirani ndzidzi unoyu wa nyatwa toera kuwangisa cikhulupiro canu. Pangani Yahova pinthu pyonsene piri muntima mwanu. Lekani kukhala mwekhene, mbwenye khalani cifupi na abale na alongo anu. (Mis. 18:1) Citani mabasa akuti anakuphedzani toera kupirira, maseze imwe musakumbuka pinthu pyakutsukwalisa pidakucitikirani. (Masal. 126:5, 6) Pitirizani kuenda ku misonkhano, kumwaza mphangwa na kuleri Bhibhlya. Pontho nyerezerani pinthu pyadidi kakamwe pidapikira Yahova toera kukupasani ntsogolo. Mungaona njira inakuphedzani Yahova cincino, cikhulupiro canu cinakhala cakuwanga kakamwe.

18. Musafunika kucitanji mungaona kuti nee muli na cikhulupiro cakuwanga?

¹⁸ Khala nyatwa zidathimbana na imwe peno zinathimbana na imwe cincino zisafewesa cikhulupiro canu, lekani kubwerera nduli. Onani pyenepi ninga mwai toera kuwangisa cikhulupiro canu. Citani phembo ibodzi ene ninga idacita apostolo a Yezu akuti alonga: “Thimizirani cikhulupiro cathu.” (Luka 17:5) Kusiyapo pyenepi, nyerezerani pitsandzo pidapfundza ife mu nsolo uno. Ninga Miguel na Yurai, kumbukani midzidzi yonsene idakuphedzani Yahova. Ninga mwana wantsikana wa Vero na Anel, citani phembero na ntima onsene kuna Yahova makamaka mungathimbana na nyatwa. Pontho ninga Geydi, dziwani kuti Yahova anakwanisa kukuphedzani na pinthu pinafunika kuna imwe mukuphatisira acibale anu peno axamwali anu. Mungatawirisa kuti Yahova akuphedzeni kupirira pinentso pinathimbana na imwe cincino, imwe munakwanisa kukhala na cinyindiro cakuti iye anakuphedzani toera kupirira pinentso pinafuna kuthimbana na imwe ntsogolo.

19. Ndi cinyindiro cipi cikhali na Yezu, pontho imwe musafunikambo kukhala na cinyindiro cipi?

¹⁹ Yezu aphedza anyakupfundzace toera aone kuti akhafunika kucitanji toera athimizire cikhulupiro cawo, mbwenye iye nee apenula kuti Yahova mbadaaphedza toera kupirira mayesero akhafuna kuthimbana na iwo ntsogolo. (Juwau 14:1; 16:33) Iye akhali na cinyindiro cakuti cikhulupiro cakuwanga mbicidaphedza mwinji ukulu wa anthu toera kupulumuka pa nyatwa ikulu. (Apok. 7:9, 14) Kodi imwe munadzapulumukambo pabodzi na anthu anewa? Imwe munadzapulumukambo pabodzi na anthu anewa na ciphedzo ca Yahova, mungacita pyonsene pinakwanisa imwe cincino toera kuwangisa cikhulupiro canu!—Aheb. 10:39.