NSOLO WA PFUNDZIRO 47
Lekani Kusiya Nee Cinthu Cibodzi Cikucimwaniseni Kutumikira Yahova
‘Ine ndisanyindira imwe Yahova.’—MASAL. 31:14.
NYIMBO 122 Tikhale Dzololo, Mbatileka Kufewa!
PINAFUNA IFE KUPFUNDZA a
1. Tisadziwa tani kuti Yahova asafuna kuti tikhale na uxamwali wakuwanga na iye?
YAHOVA asafuna kuti tikhale na uxamwali wakuwanga na iye. (Tiya. 4:8) Iye asafuna kukhala Mulungu wathu, Babathu na Xamwali wathu. Iye asatawira maphembero athu, pontho asatiphedza m’midzidzi ya nyatwa. Kusiyapo pyenepi, iye asaphatisira gulu yace toera kutipfundzisa na kutitsidzikiza. Mphapo tisafunika kucitanji toera tikhale na uxamwali wakuwanga na Yahova?
2. Tinakwanisa tani kukhala na uxamwali wakuwanga na Yahova?
2 Ife tinakwanisa kukhala na uxamwali wakuwanga na Yahova tingacita phembero kuna iye, tingaleri Bhibhlya na kunyerezera mwadidi pinaleri ife. Tingacita pyenepi, ife tinanfuna mbatipereka takhuta kuna iye. Pontho tinafuna kumbvera mbatimpasa mbiri yakuti basi ene ndiye adathema kuitambira. (Apok. 4:11) Tingadziwa mwadidi Yahova, ife tinanyindira kakamwe iye pabodzi na gulu inaphatisira iye toera kutiphedza.
3. Sathani asatiyesera tani toera ticimwane kukhala na uxamwali wakuwanga na Yahova, pontho ninji cinafuna kutiphedza toera tikhonde kusiya Mulungu wathu na gulu yace? (Masalmo 31:13, 14)
3 Sathani asatiyesera toera ticimwane kukhala na uxamwali wakuwanga na Yahova makamaka mu ndzidzi unatamba ife nyatwa. Kodi iye asacita tani pyenepi? Mwapang’ono na pang’ono iye asaticitisa toera tikhonde kunyindira Yahova na gulu yace. Mbwenye ife tinakwanisa kutsidzikizika ku mayesero anewa. Tingakhala na cikhulupiro cakuwanga mbatinyindira kakamwe Yahova nee tinasiya Mulungu wathu na gulu yace.—Lerini Masalmo 31:13, 14.
4. Tinapfundzanji mu nsolo uno?
4 Mu nsolo uno tinapfundza pinthu pitatu pinacitwa na anthu akuti nee asatumikira Yahova pyakuti pinaticitisa kusiya kunyindira Yahova na gulu yace. Kodi pinthu pyenepi pinaticimwanisa tani kukhala na uxamwali wakuwanga na Yahova? Pontho tinacitanji toera kutsidzikizika ku mayesero anewa a Sathani?
TINGATAMBA NYATWA
5. Kodi nyatwa zinatamba ife zinaticitisa tani kusiya kunyindira Yahova na gulu yace?
5 M’midzidzi inango ife tisatamba nyatwa ninga kutcingwa na anthu a pabanja pathu peno kuluza basa. Kodi nyatwa zenezi zinaticitisa tani kukhonda kunyindira gulu ya Yahova mbatisiya kuntumikira? Tingapirira nyatwa mu ndzidzi uzinji, panango nee tinakhalabve na cidikhiro, pontho tinakhala akutsukwala kakamwe. Sathani asabandza ndzidzi unoyu toera kuticitisa kupenula khala Yahova asatifuna. Iye asafuna tinyerezere kuti tiri kuona nyatwa thangwi ya Yahova peno gulu yace. Pyenepi pyacitika na Aizraeli anango ku Ejitu. Pakutoma iwo akhakhulupira kuti Yahova asankhula Mose na Aroni toera aabuluse mu ubitcu. (Eks. 4:29-31) Mbwenye mu ndzidzi udatekeresa Farau nyatwa zawo, iwo apasa mulando Mose na Aroni mbaapanga: ‘Imwe mwacitisa kuti tiidiwe na Farau pabodzi na atumiki ace, natenepa imwe mwaikha supada m’manja mwawo toera atiphe.’ (Eks. 5:19-21) Iwo apasa mulando atumiki akukhulupirika a Yahova. Pyenepi pikhali pyakutsukwalisa kakamwe. Khala imwe muli kupirira nyatwa mu ndzidzi uzinji, munapitiriza tani kunyindira Yahova na gulu yace?
6. Citsandzo ca mprofeta Abhakuki cisatipfundzisanji thangwi yakupirira nyatwa? (Habakuki 3:17-19)
6 Longani pyonsene piri muntima mwanu kuna Yahova mbamudikhira ciphedzo cace. Mprofeta Abhakuki atamba nyatwa zizinji kakamwe. Pontho ndzidzi unango iye apenula khala Yahova akhantsalakana peno nkhabe. Natenepa iye alonga pyonsene pikhali muntima mwace kuna Yahova kuti: ‘Mpaka lini ndinakhuwa toera kuphemba ciphedzo, imwe mbamukhonda kundibva? Thangwi yanji imwe musasiya anthu anaponderera andzawo?’ (Hab. 1:2, 3) Yahova atawira phembero ya ntumiki wace unoyu wakukhulupirika. (Hab. 2:2, 3) Pidamala iye kunyerezera kuti Yahova apulumusa tani atumiki ace, Abhakuki akhala pontho wakutsandzaya. Iye akhali na cinyindiro cakuti Yahova akhantsalakana, pontho mbadam’phedza toera kupirira nyatwa zonsene. (Lerini Habakuki 3:17-19.) Pyenepi pisatipfundzisanji? Mungathimbana na nyatwa citani phembero kuna Yahova, pontho mpangeni pinakudzudzumisani, buluka penepo dikhirani ciphedzo cace. Mungacita pyenepi munakwanisa kukhala na cinyindiro cakuti Yahova anakupasani mphambvu toera mupirire nyatwa. Pontho mungaona kuti Yahova ali kukuphedzani, cikhulupiro canu cinakhala cakuwanga kakamwe.
7. Shirley ayeserwa tani na m’bale wace, pontho ninji pidam’phedza toera apitirize kukhulupira Yahova?
7 Pitirizani kucita pinthu pyakuti pinakuphedzani toera kukhala na uxamwali wakuwanga na Yahova. Onani kuti pyenepi pyaphedza tani mulongo Shirley wa ku Papua-Nova Guiné mu ndzidzi ukhatamba iye nyatwa. b Banja yace ikhali yakutcerenga, pontho midzidzi inango iwo akhanentseka toera kugumana cakudya. M’bale wace unango ayesera kuncitisa kuti asiye kunyindira Yahova mbampanga: “Iwe usalonga kuti nzimu wa Mulungu uli kukuphedza, mphapo ciphedzo cace ciri kupi? Banja yako iri kupitiriza kukhala yakutcerenga, iwe uli kubvunga ndzidzi wako na basa yakumwaza mphangwa.” Shirley alonga: “Ine ndabvundzika: ‘Kodi Mulungu asatitsalakanadi?’ Natenepa mwakukhonda dembuka ine ndacita phembero kuna Yahova mbandimpanga pinthu pyonsene pikhali muntima mwanga. Ine ndapitiriza kuleri Bhibhlya na mabukhu athu anango, pontho ndapitiriza kumwaza mphangwa na kugumanika pa misonkhano.” Mwakukhonda dembuka iye atoma kudzindikira kuti Yahova akhatsalakana banja yace. Banja yace nee yathabuka na njala, pontho iwo akhali akutsandzaya. Shirley alonga: “Ine ndaona kuti Yahova atawira maphembero anga.” (1 Tim. 6:6-8) Munjira ibodzi ene, imwe mungapitiriza kucita pinthu pyakuti pinakuphedzani toera kukhala na uxamwali wakuwanga na Yahova, nee munatawirisa nyatwa peno kupenula pikucitiseni kusiya kutumikira Yahova.
ABALE ANATITSOGOLERA ANGATCINGWA
8. Ndi pinthu pipi pyakuti panango pinacitikira abale anatitsogolera mu gulu ya Yahova?
8 Anyamalwa athu asaphatisira maradhyo, matelevizau na majornali kuphatanizambo interneti toera kulonga uthambi peno kuticitisa kupenula abale anatitsogolera mu gulu ya Yahova. (Masal. 31:13) Abale anango aikhwa nkaidi mbatsalakanwa ninga mapanga. Pyenepi pyacitikambo kuna Akristu a mu ndzidzi wa apostolo pidapambizirwa mpostolo Paulu kuti ali na nseru mbaikhwa nkaidi. Mphapo iwo acitanji?
9. Akristu anango acitanji pidaikhwa Paulu nkaidi?
9 Akristu anango a mu ndzidzi wa apostolo, asiya kuphedzera Paulu pidaikhwa iye nkaidi ku Roma. (2 Tim. 1:8, 15) Thangwi yanji? Kodi iwo akhali na manyadzo thangwi anthu akhaona Paulu ninga phanga? (2 Tim. 2:8, 9) Peno akhagopa kuti panango mbadatcingwambo? Mwakukhonda tsalakana mathangwi akhali na iwo, panango Paulu atsukwala kakamwe. Iye akhadapirira nyatwa zizinji ngakhale kuikha umaso wace pangozwi thangwi ya iwo. (Mabasa 20:18-21; 2 Akor. 1:8) Ife nee tisafunika kukhala ninga Akristu adasiya Paulu mu ndzidzi ukhafuna iye ciphedzo. Mphapo tisafunika kukumbukanji abale anatitsogolera angatcingwa?
10. Tisafunika kukumbukanji abale anatitsogolera angatcingwa, pontho thangwi yanji tisatcingwa?
10 Kumbukani kuti thangwi yanji tisatcingwa, pontho mbani anacitisa kuti titcingwe. Lemba ya 2 Timoti 3:12 isalonga: “Onsene anafuna kukhala na umaso wakuperekeka kuna Mulungu mwakuphatana na Kristu Yezu, anadzatcingwambo.” Natenepa ife nee tisafunika kudzudzumika tingaona Sathani mbatcinga kakamwe abale anatitsogolera. Iye asaatcinga thangwi asafuna kuti abale anewa asiye kukhulupira Yahova, pontho asafuna kutigopesa.—1 Ped. 5:8.
Maseze Paulu akhali nkaidi, mwacipapo Onesiforo apitiriza kum’phedza. Lero abale na alongo athu asaphedza Akristu andzawo anaikhwa nkaidi (Onani ndima 11-12)
11. Tisapfundzanji na citsandzo ca Onesiforo? (2 Timoti 1:16-18)
11 Pitirizani kuphedzera abale anu mbamukhala akukhulupirika kuna iwo. (Lerini 2 Timoti 1:16-18.) Nkristu unango wa mu ndzidzi wa apostolo anacemerwa Onesiforo acita pinthu mwakusiyana pidaikhwa Paulu nkaidi. ‘Iye nee akhala na manyadzo thangwi ya kumangwa’ kwa Paulu, mbwenye asaka Paulu, pontho pidan’gumana iye ampasa pinthu pikhafuna iye. Thangwi yakucita pyenepi, Onesiforo akhaikha umaso wace pangozwi. Pyenepi pisatipfundzisanji? Ife nee tisafunika kutawirisa kuti kugopa anthu kuticimwanise kuphedza abale athu anatcingwa. Mbwenye tisafunika kucita pyonsene pinakwanisa ife toera kuaphedza. (Mis. 17:17) Thangwi iwo asafuna citsalakano cathu na ciphedzo cathu.
12. Pinthu pinacita abale na alongo athu ku Rusiya pisatipfundzisanji?
12 Onani kuti abale na alongo athu a ku Rusiya asaphedza tani abale na alongo anango anaikhwa nkaidi. Abale na alongo anango angaendeswa ku thando yakutongera miseru, Akristu andzawo azinji asaendambo kweneko toera kuaphedza. Pyenepi pisatipfundzisanji? Abale anatitsogolera angalongwa mwakuipa, angamangwa peno kutcingwa, lekani kugopa. Citani phembero thangwi ya iwo, tsalakanani mabanja awo, pontho sakani njira zinango toera kuaphedza.—Mabasa 12:5; 2 Akor. 1:10, 11.
ANTHU ANGATISINGIRIRA
13. Kodi kusingirirwa kunaticitisa tani kusiya kunyindira Yahova na gulu yace?
13 Abale athu akuti nee asatumikira Yahova, andzathu akubasa peno akuxikola panango anatisingirira thangwi ya basa yathu yakumwaza mphangwa peno thangwi yakubvera kwathu mitemo ya Yahova. (1 Ped. 4:4) Panango iwo anatipanga: “Ndisakomerwa na iwe, mbwenye uphemberi wako usakhondesa pinthu pizinji, pontho usapfundzisa pinthu pyakale.” Pontho thangwi ya njira inatsalakana ife anthu adabuluswa mu mpingo, panango anthu anango analonga: “Pinacita imwe nee pisapangiza kuti muli na ufuni.” Mafala ninga anewa anaticitisa kupenula khala mitemo ya Yahova ndi yadidi peno nkhabe. Panango tinatoma kubvundzika: ‘Kodi Yahova asafuna ndicite pinthu pyakuti nee ndinakwanisa kupicita? Kodi gulu yace isandicitisa kukhala munthu wakusowa ufulu?’ Khala pyenepi pikucitika kuna imwe, munakwanisa tani kupitiriza kukhala na uxamwali wakuwanga na Yahova mbamunyindira gulu yace?
Yobe nee atawira uthambi wa anthu akhalonga kuti ndi axamwali ace, mbwenye akhali dzololo toera kupitiriza kukhala wakukhulupirika kuna Yahova (Onani ndima 14)
14. Tisafunika kucitanji anango angatisingirira thangwi yakubvera mitemo ya Yahova? (Masalmo 119:50-52)
14 Khalani dzololo toera kubvera mitemo ya Yahova. Yobe akhabvera mitemo ya Yahova mwakukhonda tsalakanwa kusingirirwa kukhacitwa iye thangwi yakucita pyenepi. Mamuna m’bodzi wakuti akhalonga kuti ndi xamwali wa Yobe ayesera kucitisa Yobe kunyerezera kuti kuna Mulungu nkhabe basa khala iye akhabvera mitemo Yace peno nkhabe. (Yobe 4:17, 18; 22:3) Mbwenye Yobe nee atawira uthambi unoyu. Iye akhadziwa kuti mitemo ya Yahova inalonga thangwi ya pinthu pyadidi na pyakuipa ndi yadidi. Pontho iye akhali dzololo toera kuibvera. Yobe nee atawirisa kuti anthu anango ancitise kusiya kukhala wakukhulupirika kuna Yahova. (Yobe 27:5, 6) Pyenepi pisatipfundzisanji? Lekani kutawirisa kuti kusingirirwa kukucitiseni kupenula khala mitemo ya Yahova ndi yadidi peno nkhabe. Nyerezerani pinthu pidakucitikirani mu umaso wanu. Panango imwe mwaona kuti umaso wanu ndi wadidi kakamwe thangwi yakubvera mitemo a Yahova. Khalani dzololo toera kuphedzera gulu ya Yahova yakuti isakuphedzani toera kubvera mitemo ineyi. Mungacita pyenepi, imwe nee munasiya kutumikira Yahova mwakukhonda tsalakana khala anthu azinji asakusingirirani.—Lerini Masalmo 119:50-52.
15. Thangwi yanji mulongo Brizit akhasingirirwa?
15 Onani citsandzo ca mulongo Brizit wa ku Indiya. Iye akhasingirirwa na abale ace thangwi yacikhulupiro cace. Pidapita ndzidzi ungasi pakumala kubatizwa mu caka ca 1997, mamunace wakuti nee akhali Mboni wa Yahova aluza basa. Natenepa aona kuti iye, Brizit pabodzi na anawo akhafunika kuenda kakhala na anyakubalace akuti akakhala mu nzinda unango. Mbwenye kweneko, Brizit mbadatamba nyatwa zizinji. Nakuti mamunace akhadaluza basa, iye mbadafunika kuphata basa mu ndzidzi uzinji toera kutsalakana banja. Kusiyapo pyenepi, toera kufika ku mpingo ukhasonkhana iwo, akhafunika kufamba nsindzo wa makilometru akukwana 350. Pontho abale a mamunace akhantcinga thangwi yacikhulupiro cace. Pyenepi pyadzatekera kakamwe. Natenepa Brizit pabodzi na banja yace afuluka pontho. Buluka penepo mwakukhonda dikhira mamunace alowa. Mukupita kwa ndzidzi, mwanace m’bodzi wa nkazi alowa na utenda wa cancro pikhali iye na pyaka 12 pyakubalwa. Kusiyapo pyenepi, abale ace Brizit akhampasa mulando thangwi ya pinthu pyenepi. Iwo akhalonga kuti iye mbadakhonda kukhala m’bodzi wa Mboni za Yahova pinthu pyenepi pyonsene nee mbapidacitika. Ngakhale tenepo, Brizit apitiriza kunyindira Yahova na gulu yace.
16. Ndi nkhombo zipi zidakhala na Brizit thangwi yakupitiriza kunyindira Yahova na gulu yace?
16 Nakuti Brizit akakhala kutali na nyumba ya Umambo, muyang’aniri wa cisa ampanga toera amwaze mphangwa mucisa cace na kutsogolera misonkhano panyumba pace. Pakutoma iye akhali wakudzudzumika kakamwe, mbwenye acita pidapangwa iye. Iye akhamwaza mphangwa, akhacitisa misonkhano panyumba pace, pontho akhacita kulambira kwa banja pabodzi na anace. Mphapo ninji pidacitika? Brizit atoma kupfundza Bhibhlya na anthu azinji, pontho anyakupfundzace azinji abatizwa. Mu caka ca 2005, iye atoma kutumikira ninga mpainiya wa ndzidzi onsene. Iye apaswa nkhombo thangwi yakunyindira Yahova na gulu yace. Anace ali kupitiriza kutumikira Yahova mwakukhulupirika, pontho mucisa cinakhala iye cincino muli na mipingo miwiri. Brizit ali na cinyindiro cakuti Yahova ampasa mphambvu toera kupirira kusingirirwa kukhacitwa iye na abale ace na nyatwa zikhatamba iye.
PITIRIZANI KUNYINDIRA YAHOVA NA GULU YACE
17. Tisafunika kukhala dzololo toera kucitanji?
17 Sathani asafuna tinyerezere kuti Yahova asatisiya mu ndzidzi unatamba ife nyatwa, pontho kuti kuphedzera gulu ya Yahova kunatibweresera nyatwa zizinji. Sathani asafuna kuti tigope tingaona abale anatitsogolera mu gulu ya Yahova mbapambizirwa, kutcingwa peno kuikhwa nkaidi. Iye asaphatisira anthu kuti atisingirire toera kuticitisa kusiya kunyindira mitemo ya Yahova na gulu yace. Mbwenye ife tisadziwa mwadidi misampha inaphatisira iye, pontho nee anakwanisa kutinyengeza. (2 Akor. 2:11) Natenepa tisafunika kukhala dzololo toera tikhonde kunyengezwa na Sathani, pontho tisafunika kupitiriza kunyindira Yahova na gulu yace, mbatikumbuka kuti Yahova cipo anatisiya. (Masal. 28:7) Nee tisafunika kutawirisa kuti cinthu cinango citicimwanise kukhala na uxamwali wakuwanga na Yahova.—Aroma 8:35-39.
18. Tinapfundzanji mu nsolo unatowera?
18 Mu nsolo uno tapfundza pinthu pitatu pinacitwa na anthu akuti nee asatumikira Yahova pyakuti panango pinaticitisa kusiya kunyindira Yahova na gulu yace. Mbwenye pyenepi pinakwanisambo kucitika mu mpingo. Mphapo pyenepi pingacitika tinakwanisa tani kupitiriza kunyindira Yahova na gulu yace? Tinapfundza pyenepi mu nsolo unatowera.
NYIMBO 118 ‘Thimizirani Cikhulupiro Cathu’
a Toera tipirire mwakukhulupirika mu ntsiku zino zakumalisa, tisafunika kupitiriza kunyindira Yahova na gulu yace. Mbwenye Sathani asatiyesera toera tikhonde kunyindira Yahova na gulu yace. Mu nsolo uno tinaona pinthu pitatu pinaphatisira Sathani, pontho tinaona pinthu pinafunika ife kucita toera tikhale akukhulupirika kuna Yahova na gulu yace.
b Madzina anango acinjwa.