NSOLO WA PFUNDZIRO 45
Yahova Asatiphedza Tani Toera Kuphata Basa Yathu Yakumwaza Mphangwa?
‘Mwandimomwene iwo anadzadziwa kuti pakati pawo pakhali mprofeta.’—EZEK. 2:5.
NYIMBO 67 ‘Mwaza Mphangwa’
PINAFUNA IFE KUPFUNDZA a
1. Ndi pinthu pipi pisafunika ife kudziwa, pontho tisafunika kukhala na cinyindiro cipi?
MU NDZIDZI unamwaza ife mphangwa tisafunika kudziwa kuti tinatcingwa. Panango kutcingwa kweneku kunathimizirika ntsogolo. (Dan. 11:44; 2 Tim. 3:12; Apok. 16:21) Ngakhale tenepo, ife tinakwanisa kukhala na cinyindiro cakuti Yahova anatiphedza. Thangwi yanji? Thangwi Yahova ndzidzi onsene asaphedza atumiki ace toera akwanise kuphata mabasa awo mwakukhonda tsalakana khala ndi akunentsa. Mwacitsandzo, tendeni tione pinthu pingasi pidacitikira mprofeta Ezekyeli, wakuti amwazira mphangwa Ayuda akhali mu ubitcu ku Bhabhilonya.
2. Yahova alonga kuti anthu adamwazira mphangwa Ezekyeli akhali tani, pontho tinapfundzanji mu nsolo uno? (Ezekyele 2:3-6)
2 Anthu akhamwazira Ezekyeli mphangwa akhali tani? Yahova alonga kuti iwo akhali ‘akusowa manyadzo, akuuma ntima’ na ‘akukhonda bvera.’ Iwo akhali akugopswa ninga minga, pontho ninga anyakong’a. Na thangwi ineyi, Yahova apanga Ezekyeli mwakubwereza-bwereza kuti: ‘Leka kugopa.’ (Lerini Ezekyele 2:3-6.) Mu nsolo uno tinapfundza kuti Ezekyeli akwanisa kuphata basa yace yakumwaza mphangwa thangwi (1) atumwa na Mulungu (2) apaswa mphambvu na nzimu wa Mulungu, pontho (3) cikhulupiro cace cikhawangiswa na Mafala a Mulungu. Pinthu pyenepi pitatu pyaphedza tani Ezekyeli? Pontho pinatiphedzambo tani lero?
EZEKYELI ATUMWA NA YAHOVA
3. Ndi mafala api akuti panango awangisa Ezekyeli, pontho Yahova ampasa tani cinyindiro cakuti mbadam’phedza?
3 Yahova apanga Ezekyeli: ‘Ine ndiri kukutuma.’ (Ezek. 2:3, 4) Panango mafala anewa awangisa Ezekyeli. Thangwi yanji? Mwakukhonda penula, iye akumbuka kuti Yahova aphatisira mafala mabodzi ene pidatuma iye Mose na Izaiya. (Eks. 3:10; Iza. 6:8) Ezekyeli akhadziwambo kuti Yahova aphedza aprofeta anewa awiri toera kukunda pinentso. Natenepa Yahova pidapanga iye Ezekyeli kawiri kuti: ‘Ndiri kukutuma,’ Ezekyeli akhali na mathangwi adidi toera kunyindira ciphedzo ca Yahova. Kusiyapo pyenepi, m’maulendo mazinji ife tisagumana mafala awa m’bukhu ya Ezekyeli: ‘Ine ndatambira mafala awa a Yahova.’ (Ezek. 3:16) Pontho mafala akuti ‘Yahova alonga pontho na ine’ alembwa mwakubwereza-bwereza. (Ezek. 6:1) Mwakukhonda penula, Ezekyeli akhali na cinyindiro cakuti iye atumwa na Yahova. Kusiyapo pyenepi, thangwi yakukhala mwana wa nyantsembe, Ezekyeli panango akhadapfundziswa na pai wace kuti Yahova apasa tani aprofeta ace cinyindiro cakuti iye mbadaaphedza. Mwacitsandzo kuna Izaki, Yakobe na Yeremiya, Yahova akhadalonga mafala awa: ‘Ine ndiri na iwe.’—Gen. 26:24; 28:15; Yer. 1:8.
4. Ndi mafala api akuti panango apasa mphambvu Ezekyeli?
4 Kodi Aizraeli azinji mbadacitanji thangwi ya mphangwa zikhafuna kumwaza Ezekyeli? Yahova alonga: ‘Mbumba ya Izraeli nee inatawira kukubvesera, thangwi iwo nee asafuna kundibvesera.’ (Ezek. 3:7) Thangwi yakukhonda mphangwa zikhamwaza Ezekyeli, iwo akhakhonda Yahova. Mbwenye Mafala anewa apasa cinyindiro Ezekyeli kuti kukhonda kubvera kwa Aizraeli nee kukhabveka kuti iye nee acita mwadidi basa yace. Yahova apasambo cinyindiro Ezekyeli cakuti angadzatonga mbumba ya Izraeli iwo ‘anadzadziwa kuti pakati pawo pakhali mprofeta.’ (Ezek. 2:5; 33:33) Mwakukhonda penula, mafala anewa akubalangaza apasa Ezekyeli cinyindiro cikhafuna iye toera akwanirise basa yace yakumwaza mphangwa.
LERO TISATUMWA NA YAHOVA
Ninga Ezekyeli, panango tinatcingwa, mbwenye tisadziwa kuti Yahova ali na ife (Onani ndima 5-6)
5. Mwakubverana na Izaiya 44:8, mphambvu zathu zisabulukira kupi?
5 Kudziwa kuti tatumwa na Yahova kusatipasambo mphambvu lero. Iye atipasa mwai wakucemerwa “mboni” zace. (Iza. 43:10) Unoyu ndi mwai ukulu kakamwe. Yahova apanga Ezekyeli toera ‘akhonde kugopa.’ Munjira ibodzi ene iye asatipangambo toera ‘tikhonde kugopa.’ Thangwi yanji nee tisafunika kugopa anyamalwa athu? Thangwi ninga Ezekyeli, ife tisatumwa na Yahova, pontho iye asatiphedza.—Lerini Izaiya 44:8.
6. (a) Yahova asatipasa tani cinyindiro cakuti anatiphedza? (b) Ninji cinatipasa mphambvu na cibalangazo?
6 Yahova asatipasa cinyindiro cakuti anatiphedza. Mwacitsandzo, mbadzati kulonga kuti: ‘Imwe ndimwe mboni zanga,’ Yahova alonga kuti: ‘Ungapita na m’madzi, ine ndinadzakhala na iwe, ungawambuka mikulo, iyo nee inadzakubiza. Ungafamba pakati pa moto, iwo nee unadzakupisa, pontho malirimi a moto nee anadzakubvula.’ (Iza. 43:2) Mu ndzidzi unaphata ife basa yathu yakumwaza mphangwa, midzidzi inango tisathimbana na nyatwa zakulandana na kudzala kwa madzi, pontho tisathimbana na pinentso pyakulandana na moto. Ngakhale tenepo, na ciphedzo ca Yahova tisapitiriza kumwaza mphangwa. (Iza. 41:13) Ninga mu ntsiku za Ezekyeli, anthu azinji lero asakhonda mphangwa zinamwaza ife. Mbwenye ife tisakumbuka kuti kukhonda kwawo nee kusabveka kuti ife nee tiri kumwaza mphangwa mwadidi. Ife tisapaswa mphambvu, pontho tisabalangazwa thangwi yakudziwa kuti Yahova asakomerwa angaona kuti tiri kupitiriza kumwaza mphangwa mwakukhulupirika. Mpostolo Paulu alonga: “M’bodzi na m’bodzi anadzatambira muoni wace mwakubverana na basa yace.” (1 Akor. 3:8; 4:1, 2) Mulongo unango wakuti ndi mpainiya mu pyaka pizinji alonga: “Ndisatsandzaya thangwi yakudziwa kuti Yahova asapasa nkhombo kuwangisira kwanga.”
EZEKYELI APASWA MPHAMBVU NA NZIMU WA MULUNGU
Ezekyeli ali kuona masomphenya a ngolo ya kudzulu ya Yahova mu ndzidzi wa condzi.(Onani ndima 7)
7. Kunyerezera masomphenya adaona iye kukhaphedza tani Ezekyeli? (Onani foto iri patsamba yakutoma.)
7 Ezekyeli aona kuti nzimu wa Mulungu ndi wamphambvu kakamwe. Pidaona Ezekyeli m’masomphenya pyam’phedza toera kudzindikira kuti nzimu wakucena ukhaphedza aanju amphambvu toera kufambisa maroda makulu a ngolo yakudzulu ya Yahova. (Ezek. 1:20, 21) Iye alemba: ‘Pidaona ine pyenepi ndagodama.’ Thangwi yakuona pinthu pidan’dzumatirisa, Ezekyeli agodama. (Ezek. 1:28) Mukupita kwa ndzidzi, Ezekyeli anyerezera mwadidi masomphenya anewa, pontho pyenepi panango pyam’phedza toera kuona kuti nzimu wakucena wa Mulungu mbudam’phedza toera akwanise kucita basa yace yakumwaza mphangwa.
8-9. (a) Ninji pidacitika kuna Ezekyeli pidapangwa iye toera alamuke? (b) Yahova apasa tani mphambvu Ezekyeli mucisa cace cakunentsa?
8 Yahova apanga Ezekyeli: ‘Iwe mwana wa munthu, khala dzololo toera ine ndilonge na iwe.’ Yahova pidapanga iye Ezekyeli kuti alamuke, Ezekyeli akhala na mphambvu mbalamuka. Ezekyeli alemba: ‘Nzimu wace wapita muna ine, mbundilimirisa dzololo.’ (Ezek. 2:1, 2) Ndzidzi onsene ukhacita iye basa yakumwaza mphangwa, Ezekyeli akhatsogolerwa na nzimu wakucena wa Mulungu. (Ezek. 3:22; 8:1; 33:22; 37:1; 40:1) Nzimu wakucena wapasa mphambvu Ezekyeli toera akwanise kumwaza mphangwa kuna anthu ‘akuuma nsolo na akuuma ntima’ mucisa cace. (Ezek. 3:7) Yahova apanga Ezekyeli: ‘Ine ndinadzaumisa ntima wako mbukhala wakuuma ninga mitima yawo, pontho ndinadzaumisa nkhope yako mbikhala yakuuma ninga nkhope zawo. Ine ndacitisa nkhope yako kukhala ninga dhiamanti, mbikhala yakuuma kakamwe kupiringana mwala. Leka kuagopa, pontho leka kugopa maonekero a nkhope zawo.’ (Ezek. 3:8, 9) Pyenepi pikhali ninga kuti Yahova akhapanga Ezekyeli kuti: ‘Leka tawirisa kuti kukhonda kubvera kwa anthu anewa kukufewese. Ine ndinakupasa mphambvu.’
9 Buluka penepo, nzimu wa Mulungu ukhali na Ezekyeli ndzidzi onsene ukhamwaza iye mphangwa ncisa cace. Ezekyeli alemba: ‘Mphambvu ya nzimu wa Yahova yatoma kuphata basa mwakuwanga muna ine.’ Papita sumana yamumphu toera Ezekyeli akwanise kubvesesa mwadidi mphangwa zikhafuna iye kumwaza toera azimwaze na cinyindiro. (Ezek. 3:14, 15) Buluka penepo Yahova apanga Ezekyeli toera aende ku gowa, pontho kweneko ‘nzimu wa Mulungu wapita muna iye.’ (Ezek. 3:23, 24) Natenepa Ezekyeli akhali dzololo toera kutoma basa yace yakumwaza mphangwa.
LERO TISAPASWA MPHAMBVU NA NZIMU WA MULUNGU
Ninga Ezekyeli, ninji pinafuna kutiphedza toera tiphate basa yathu yakumwaza mphangwa?(Onani ndima 10)
10. Ndi ciphedzo cipi cinafuna ife toera tiphate basa yakumwaza mphangwa, pontho thangwi yanji?
10 Ndi ciphedzo cipi cinafuna ife toera ticite basa yathu yakumwaza mphangwa? Toera kutawira mbvundzo unoyu nyerezerani pinthu pidacitikira Ezekyeli. Mbadzati kutoma basa yace yakumwaza mphangwa, nzimu wa Mulungu wampasa mphambvu. Ninga Ezekyeli, ife tinakwanisa kucita basa yathu yakumwaza mphangwa basi ene na ciphedzo ca nzimu wa Mulungu. Thangwi yanji? Thangwi Sathani asamenyana na ife toera tisiye kuphata basa yathu yakumwaza mphangwa. (Apok. 12:17) Kuna anthu pisaoneka kuti Sathani ali kutikunda. Mbwenye thangwi ya basa yathu yakumwaza mphangwa anankunda ndife. (Apok. 12:9-11) Munjira ipi? Mu ndzidzi unamwaza ife mphangwa tisapangiza kuti nee tiri kugopa Sathani. Thangwi ndzidzi onsene unamwaza ife mphangwa tisakunda Sathani. Mphapo ninji pinadzindikira ife tingaona kuti tiri kukwanisa kumwaza mphangwa mwakukhonda tsalakanwa kutcingwa? Ife tisadzindikira kuti tisapaswa mphambvu na nzimu wakucena, pontho ndife akutawirika kuna Yahova.—Mat. 5:10-12; 1 Ped. 4:14.
11. Nzimu wakucena unatiphedza toera kucitanji, pontho tisafunika kucitanji toera tipitirize kuutambira?
11 Ndi cinyindiro cipi cinango cinakhala na ife thangwi yakudziwa kuti Yahova apasa mphambvu Ezekyeli toera kumwaza mphangwa? Nzimu wa Mulungu unakwanisa kutiphedza toera kukunda pinentso pyonsene pinathimbana na ife mu utumiki wathu. (2 Akor. 4:7-9) Mphapo tisafunika kucitanji toera tipitirize kutambira nzimu wa Mulungu? Tisafunika kupitiriza kucita phembero na cinyindiro cakuti Yahova anabvesera maphembero athu. Yezu apfundzisa anyakupfundzace: “Pitirizani kuphemba, . . . pitirizani kusaka, . . . pitirizani kugogodza nsuwo.” Mungacita pyenepi Yahova “anadzapasa nzimu wakucena ale anam’phemba.”—Luka 11:9, 13; Mabasa 1:14; 2:4.
MAFALA A MULUNGU AWANGISA CIKHULUPIRO CA EZEKYELI
12. Mwakubverana na Ezekyele 2:9–3:3, mpukutu wabuluka kupi, pontho ukhadalembwanji?
12 Ezekyeli nee aphedzwa na nzimu wa Mulungu basi, mbwenye apaswambo mphambvu na Mafala a Mulungu. M’masomphenya, iye aona djanja mbikaphata mpukutu. (Lerini Ezekyele 2:9–3:3.) Mpukutu unoyu wabuluka kupi? Ninji pikhadalembwa mwenemo? Pontho wawangisa tani cikhulupiro ca Ezekyeli? Tendeni tione. Mpukutu wabuluka pa mpando wa Umambo wa Mulungu. Panango Yahova aphatisira m’bodzi wa aanju anai adaona Ezekyeli toera kumpasa mpukutu. (Ezek. 1:8; 10:7, 20) Mpukutu unoyu ukhadalembwa Mafala a Mulungu akuti ndi mphangwa zakutonga zikhafuna kumwaza Ezekyeli kuna Ayuda akukhonda bvera adabuluka ku ubitcu. (Ezek. 2:7) Mphangwa zenezi zikhadalembwa makhundu mawiri ene a mpukutu.
13. Yahova apanga Ezekyeli toera kucitanji na mpukutu, pontho thangwi yanji ukhatapira?
13 Yahova apanga mprofeta wace toera adye mpukutu ‘mbadzadza mimba yace na mpukutu unoyu.’ Ezekyeli abvera mbadya mpukutu onsene. Pyenepi pisabvekanji? Ezekyeli akhafunika kubvesesa mwadidi mphangwa zikhafuna iye kumwaza. Iye akhafunika kukhulupira mphangwa zenezi toera akhale na cifuno ca kuzimwaza kuna anango. Buluka penepo cacitika cinthu cakudzumisa. Ezekyeli adzindikira kuti mpukutu unoyu ‘ukhatapira ninga uci.’ (Ezek. 3:3) Thangwi yanji? Thangwi kuna Ezekyeli kuimirira Yahova kukhali nkhombo ikulu, pontho kukhankomeresa. (Masal. 19:8-11) Iye akhapereka takhuta kuna Yahova thangwi ya kutumikira ninga mprofeta wace.
14. Ninji cidaphedza Ezekyeli kukhala dzololo toera kucita basa yace?
14 Buluka penepo, Yahova apanga Ezekyeli: ‘Bvesera mafala anga onsene anakupanga ine, pontho akoye muntima mwako.’ (Ezek. 3:10) Na pitsogolero pyenepi, Yahova apanga Ezekyeli toera akoye muntima mwace na kunyerezera mwadidi mafala adalembwa mpukutu. Kucita pyenepi kwawangisa cikhulupiro ca Ezekyeli, pontho kwam’phedza toera kukhala na mphangwa za mphambvu toera kudziwisa anthu. (Ezek. 3:11) Nakuti Ezekyeli akhali na mphangwa za Mulungu muntima mwace na pamulomo pace, iye akhali dzololo toera kucita basa yace.—Onani Masalmo 19:14.
LERO CIKHULUPIRO CATHU CISAWANGISWA NA MAFALA A MULUNGU
15. Ninji pisafunika ife ‘kubvesera’ toera tikwanise kupirira?
15 Toera tipirire m’basa yathu yakumwaza mphangwa, tisafunikambo kupitiriza kuwangisa cikhulupiro cathu na Mafala a Mulungu. Ife tisafunika ‘kubvesera’ mafala onsene anatipanga Yahova. Lero Yahova asaphatisira Bhibhlya toera kulonga na ife. Mphapo tinakhala tani na cinyindiro cakuti Mafala a Mulungu asapitiriza kutsogolera manyerezero athu, mabvero athu na pisankhulo pyathu?
16. Tisafunika kucitanji na Mafala a Mulungu, pontho iwo anawangisa tani cikhulupiro cathu?
16 Ife tisakhala na ungumi wadidi tingadya cakudya mbaticitafuna mwadidi. Munjira ibodzi ene, tinakhala na ungumi wadidi wauzimu tingapfundza Mafala a Mulungu mbatinyerezera mwadidi pinapfundza ife. Ndi pyenepi pinapfundza ife kubulukira m’masomphenya a mpukutu. Yahova asafuna kuti ‘tidzadze mimba zathu’ na Mafalace pyakuti ndi kubvesesa mwadidi Mafalace. Ife tinakwanisa kucita pyenepi tingacita phembero, kuleri na kunyerezera mwadidi pinaleri ife. Pakutoma tisacita phembero toera kukhunganya ntima wathu kuti utambire manyerezero a Mulungu. Buluka penepo tisaleri Bhibhlya. Tingamala tisalimira toera kunyerezera mwadidi pinthu pidaleri ife. Tingacita pyenepi, ndi maphindu api anafuna kukhala na ife? Tingakhala na ndzidzi uzinji toera kunyerezera mwadidi pinaleri ife, tinabvesesa mwadidi Mafala a Mulungu, pontho iwo anawangisa cikhulupiro cathu.
17. Thangwi yanji kunyerezera mwadidi pinaleri ife m’Bhibhlya ndi kwakufunika?
17 Thangwi yanji kuleri Bhibhlya na kunyerezera mwadidi pinaleri ife ndi kwakufunika? Kucita pyenepi kunatipasa mphambvu toera kumwaza mphangwa za Umambo cincino, pontho kunatiphedza ntsogolo toera kumwaza mphangwa zakutonga. Pontho tinganyerezera mwadidi makhaliro adidi a Yahova, uxamwali wathu na iye usakhala wakuwanga kakamwe. Tingacita pyenepi ife tinatsandzaya thangwi yakukhala na ntendere wa m’manyerezero.—Masal. 119:103.
KHALANI DZOLOLO TOERA KUPIRIRA
18. Ndi pinthu pipi pinafuna dzindikira anthu mucisa cathu, pontho thangwi yanji?
18 Mwakusiyana na Ezekyeli, ife nee ndife aprofeta. Ngakhale tenepo, ife tiri dzololo toera kupitiriza kumwaza mphangwa zidalembesa Yahova m’Bhibhlya mpaka ndzidzi wakuti basa ineyi yakumwaza mphangwa nee inadzacitwabve. Ndzidzi wakutonga ungafika, anthu mucisa cathu nee anakhala na mathangwi toera kulonga kuti iwo nee acenjezwa, peno kuti Mulungu nee aatsalakana. (Ezek. 3:19; 18:23) Mbwenye iwo anadzindikira kuti mphangwa zidamwaza ife zabuluka kuna Mulungu.
19. Ninji pinatipasa mphambvu toera tiphate basa yathu yakumwaza mphangwa?
19 Ninji pinatipasa mphambvu toera tiphate mwadidi basa yathu yakumwaza mphangwa? Ndi pinthu pitatu pidaphedzambo Ezekyeli. Ife tisapitiriza kumwaza mphangwa thangwi tisadziwa kuti tatumwa na Mulungu, tisapaswa mphambvu na nzimu wa Mulungu, pontho cikhulupiro cathu cisawangiswa na Mafala a Mulungu. Na ciphedzo ca Yahova, ife tiri dzololo toera kupitiriza kumwaza mphangwa “mpaka kunkhomo.”—Mat. 24:13.
NYIMBO 65 Pitirizani!
a Mu nsolo uno, tinaona pinthu pitatu pidaphedza mprofeta Ezekyeli toera kuphata basa yace yakumwaza mphangwa. Mu ndzidzi unaona ife kuti Yahova aphedza tani mprofeta unoyu, ife tinakhala na cinyindiro cakuwanga cakuti Yahova anatiphedzambo munjira ibodzi ene toera kuphata basa yathu yakumwaza mphangwa.