1. Ndi ntundu upi waufuni wakuti ndi wakufunika kakamwe, pontho thangwi yanji? (Onani cithundzithundzi cakutoma.)

YAHOVA ndi Phata ya ufuni. (1 Jwau 4:7) Ufuni unoyu usabulukira m’midida yakulungama. M’Bhibhlya, ntundu unoyu waufuni ndi fala Yacigerego yakuti agape. Ufuni unoyu usaphataniza kufuna na kupangiza mabvero kuna munthu unango, mbwenye usaphataniza pizinji kupiringana mabvero basi. Usapangizwa mukukhonda kucita pinafuna ife basi mbwenye pinafuna anango. Ufuni usatikulumiza toera kucita pinthu pyadidi kuna anango. Ntundu unoyu waufuni usaticitisa kukhala na umaso wakuphindulisa na wakutsandzayisa.

2, 3. Yahova apangiza tani ufuni ukulu kwa anthu?

² Ngakhale mbadzati kucita Adhamu na Eva, Yahova apangiza ufuni kuna anthu. Iye acita dziko yapantsi yakuti mbidakhala na pinthu pyonsene pinafuna ife. Kusiyapo pyenepi, iye aicita ninga mudzi toera tikwanise kutsandzaya na umaso. Yahova nee acita dziko toera kuphindulisa iye, mbwenye aicita toera kuphindulisa ife. Pidamala iye kucita dziko, acita anthu  mbaapasa cidikhiro cakukhala kwenda na kwenda m’paraizu pa dziko yapantsi.

³ Mukupita kwa ndzidzi, Yahova apangiza ufuni wace ukulu kakamwe kwa anthu. Maseze Adhamu na Eva nee abvera, Yahova akhali na cinyindiro cakuti anango a dzindza yawo mbadanfuna, pontho iye mbadapereka Mwanace toera kuapulumusa. (Genesi 3:15; 1 Jwau 4:10) Kutomera ndzidzi udapikira Yahova, pikhali ninga ciomboli ceneci acipereka kale. Natenepa, pyaka 4.000 patsogolo pace, Yahova apereka Mwanace m’bodzi ekha kwa anthu. (Jwau 3:16) Tisapereka takhuta kakamwe thangwi ya ufuni wa Yahova!

4. Tisadziwa tani kuti anthu akusowa ungwiro anakwanisa kupangiza ufuni ukulu?

⁴ Maseze ndife akusowa ungwiro, tinakwanisa kupangiza ufuni unoyu? Inde. Yahova aticita mwakulandana na iye, pontho aticita na maluso toera kuntowezera. Ndi pyakunentsa kakamwe kwa ife kupangiza ufuni ukulu, mbwenye ndi pyakukwanisika. Abheli apangiza ufuni ukulu kwa Mulungu mukupereka pinthu pyadidi kakamwe pikhali na iye. (Genesi 4:3, 4) Nowa apangiza ufuni ukulu mukupitiriza kumwaza mphangwa za Mulungu mu pyaka pizinji maseze anthu nee akhatawira. (2 Pedro 2:5) Abhrahamu apangizambo kuti akhafuna kakamwe Mulungu kupiringana pinthu pyonsene mukupereka na ntima onsene mwanace wakufunika Izaki ninga ntsembe. (Tyago 2:21) Ninga amuna anewa akukhulupirika, ife tisafunikambo kupangiza ufuni maseze pikhale pyakunentsa.

5. Tinapangiza tani ufuni wandimomwene?

⁵ Bhibhlya isalonga kuti ife tisafunika kupangiza ufuni wandimomwene ‘tayu na mafala basi peno na lirime, mbwenye kubulukira m’macitiro athu.’ (1 Jwau 3:18) Kodi pyenepi pisabveka kuti nee tinakwanisa kupangiza ufuni kubulukira m’mafala athu? Nkhabe. (1 Atesalonika 4:18) Pisabveka kuti nee tisafunika basi ene kulonga “Ndisakufuna.” Tisafunika kupangiza ufuni unoyu m’macitiro athu. Mwacitsandzo, khala abale peno alongo athu asowa cakudya peno cakubvala, iwo asafunika pizinji kupiringana mafala adidi. (Tyago 2:15, 16) Munjira ibodzi ene, nakuti tisafuna Yahova na abale athu, nee tisafunika basi ene kuphembera toera anthu azinji amwaze mphangwa na ife, mbwenye tisafunika kuwangisira kakamwe m’basa yakumwaza mphangwa.—Mateo 9:38.

6, 7. (a) ‘Ufuni wakusowa umpfakafaka’ ninji? (b) Ndi pitsandzo pipi pya anthu adapangiza ufuni waciphamaso?

⁶ Mpostolo Juwau alonga kuti tisafunika kupangiza ufuni ‘wandimomwene kubulukira m’macitiro athu.’ Natenepa, ufuni wathu usafunika kukhala ‘wakusowa umpfakafaka.’ (Aroma 12:9; 2 Akorinto 6:6) Midzidzi inango munthu anapangiza ufuni waciphamaso. Mphapo ufuni unoyu ndi wandimomwene? Mpfakafaka nkhabe kwanisa kupangiza ufuni wandimomwene. Ufuni wace ndi wakusowa basa.

 ⁷ Tendeni tidinge pitsandzo pingasi pya anthu adapangiza ufuni waciphamaso. Pikhalonga Sathani na Eva m’munda wa Edheni, pikhapangiza ninga akhafuna udidi kuna Eva. Mbwenye macitiro ace nee apangiza pyenepi. (Genesi 3:4, 5) Pikhali Dhavidhi mambo iye akhali na xamwali wace anacemerwa Aitofele. Mbwenye Aitofele asandukira Dhavidhi toera kusaka maphindu ace. Macitiro ace apangiza kuti nee akhali xamwali wandimomwene. (2 Samwele 15:31) Lero, anyakupanduka na anango asacitisa mpingo kugawana mukuphatisira ‘mafala akukoma na akutapira.’ (Aroma 16:17, 18) Panango iwo anatsalakana anango mwaciphamaso, mbwenye mbasaka pinafuna iwo basi.

8. Ndi mbvundzo upi usafunika ife kucitika?

⁸ Ufuni waciphamaso makamaka usaphatisirwa toera kunyengeza anthu. Ngakhale tikwanise kunyengeza anthu, nee tinakwanisa kunyengeza Yahova. Yezu alonga kuti anthu ali na n’khaliro unoyu anadzatcunyuswa ‘kakamwe.’ (Mateo 24:51) Ninga atumiki a Yahova, nee tisafunika kukhala ampfakafaka. Natenepa tisafunika kubvundzika: ‘Ndzidzi onsene ndisapangiza ufuni wandimomwene, peno ndisacita pinthu mwaciphamaso?’ Tendeni tidinge njira zipfemba zakuti tinakwanisa kupangiza ufuni ‘wakusowa umpfakafaka.’

9. Kodi ufuni wandimomwene usatikulumiza toera kucitanji?

⁹ Khalani akutsandzaya mukutumikira Yahova maseze nee m’bodzi anakudzindikirani. Tisafunika kupangiza ufuni na kucita pinthu pyadidi kuna anango maseze nee m’bodzi anadziwa pinthu pyenepi. (Lerini Mateo 6:1-3.) Ananiya na Safira akhali na n’khaliro wakusiyana mudacita iwo pyakupereka. Iwo akhafuna kuti anango adziwe pyenepi, mbalonga uthambi thangwi ya kobiri idapereka iwo, natenepa iwo atcunyuswa thangwi ya uthambi wawo. (Machitiro 5:1-10) Khala ife tisafunadi abale athu, tinadzakhala akutsandzaya toera kucita pinthu pyadidi kuna iwo maseze anango akhonde kudziwa pinacita ife. Ife tinakwanisa kupfundza kubulukira kwa abale anaphedzera Mathubo Akutonga kukhunganya cakudya cauzimu. Iwo nee asadzikuza, pontho nee asapanga anango mabasa anacita iwo.

10. Tinapangiza tani cilemedzo kuna anango?

¹⁰ Pangizani cilemedzo kuna anango. (Lerini Aroma 12:10.) Yezu apangiza cilemedzo kuna apostolo ace mu ndzidzi udatsuka iye miyendo yawo. (Jwau 13:3-5, 12-15) Ife tisafunika kuwangisira toera kukhala akucepeseka ninga Yezu mbatitumikira anango. Apostolo nee akhadabvesesa mwadidi pidacita Yezu mpaka mu ndzidzi udatambira iwo nzimu wakucena. (Jwau 13:7) Ife tisapangiza cilemedzo kuna anango tayu mukunyerezera kuti ndife adidi kupiringana iwo thangwi tapfundza kakamwe, ndife akupfuma, peno tiri na  mabasa akupambulika. (Aroma 12:3) Ife nee tisakhala na bibvu anango angasimbwa, mbwenye tisatsandzaya na iwo maseze tisapibva kuti tikhafunikambo kusimbwa.

11. Thangwi yanji tisafunika kusimba anango na ntima onsene?

¹¹ Simbani anango na ntima onsene. Sakani mwai toera kusimba anango. Tonsene tisadziwa kuti kusimba ndi kwadidi toera kuwangisana unango na ndzace. (Aefesi 4:29) Mbwenye tisafunika kukhala na cinyindiro cakuti pinalonga ife pisabulukira muntima, tayu kunyengeza anango. Ife nee tisafunika kusimba munthu mwaciphamaso basi ene toera kucalira kumpasa uphungu. (Misangani 29:5) Ife tinakhala ampfakafaka tingasimba anango buluka penepo mbatitoma kualonga mwakuipa. Ufuni wa mpostolo Paulu ukhali wandimomwene. Pidalembera iye Akristu a ku Korinto, aasimba thangwi ya pinthu pyadidi pidacita iwo. (1 Akorinto 11:2) Mbwenye mu ndzidzi ukhafuna iwo uphungu, iye afokotoza mathangwi ace mwakukoma ntima na mwakubveka mwadidi.—1 Akorinto 11:20-22.

12. Tinapangiza tani ufuni wandimomwene tingatambira alendo?

¹² Khalani akutambira alendo. Yahova asatipfundzisa toera kukhala akupasa mwakudzala manja abale na alongo athu. (Lerini 1 Jwau 3:17.) Mbwenye tisafunika kucita pyenepi na mathangwi adidi. Tinakwanisa kubvundzika: ‘Kodi ndisacemera axamwali anga basi kunyumba kwanga peno ale anaona ine kuti ndi akufunika mu mpingo? Kodi ndisacemera basi ene anthu akuti mukupita kwa ndzidzi anandicemerambo? Ndisapasa mwakudzala manja abale na alongo akuti nee ndisaadziwa mwadidi peno akuti nee anakwanisa kundicitira pinthu?’ (Luka 14:12-14) Nyerezerani tenepa: Ndiye tani khala m’bale asafuna ciphedzo thangwi ya pisankhulo pyakuphonyeka pidacita iye? Peno ndiye tani khala tacemera munthu unango kunyumba kwathu mbakhonda kupereka takhuta? Yahova asatipanga: ‘Tambirani alendo mwakukhonda dungunya.’ (1 Pedro 4:9) Ife tinadzakhala akutsandzaya tingapasa na mathangwi adidi.—Machitiro 20:35.

13. (a) Ndi ndzidzi upi unafunika ife kukhala akupirira? (b) Tisafunika kucitanji toera kuphedza anthu akufewa?

¹³ Phedzani anthu akufewa. Bhibhlya isalonga: “Phedzani ale anasowa mphambvu, khalani akukhurudzika kuli anthu onsene.” (1 Atesalonika 5:14) Ndi pyakunentsa kakamwe kubvera ntemo unoyu. Abale azinji akuti ndi akufewa mukupita kwa ndzidzi asakhala na cikhulupiro cakuwanga. Mbwenye kwa anango tisafunika  kupitiriza kupirira na kuaphedza mwaufuni. Tinaaphedza tani? Ife tinakwanisa kuphatisira Bhibhlya toera kuawangisa, kumwaza nawo mphangwa, peno kuabvesera. Pontho, nee tisafunika kunyerezera kuti abale na alongo athu ndi “akuwanga” peno “akufewa.” Mbwenye, tisafunika kukumbuka kuti tonsene tiri na makhundu akuwanga na akufewa. (2 Akorinto 12:9, 10) Tonsene tisafunika ciphedzo na kuwangisana unango na ndzace.

14. Tisafunika kucitanji toera kukhazikisa ntendere na abale athu?

¹⁴ Khazikisani ntendere. Kukhazikisa ntendere na abale athu ndi kwakufunika kakamwe. Khala tabvesesa mwakuphonyeka peno tatsalakanwa mwakuipa, tisafunika kucita pyonsene pinakwanisa ife toera kukhazikisa ntendere. (Lerini Aroma 12:17, 18.) Khala ife tatsukwalisa munthu unango, tisafunika kuphemba kulekererwa. Mbwenye tisafunika kucita pyenepi na ntima onsene. Mwacitsandzo, m’mbuto mwakulonga kuti “Unandilekerera thangwi ya pidacitika,” pinakhala pyadidi kudzindikira madodo athu mbitilonga: “Unandilekerera thangwi ya kukutsukwalisa na mafala adalonga ine.” Ntendere ndi wakufunikambo kakamwe m’banja. Ndi pyakuipa kuna mamuna peno nkazi kucita pinthu ninga asafunana pamaso pa anthu mbwenye angakhala paokha nee asacedza, asalonga mafala akudzidzida, peno kumenyana.

15. Tinapangiza tani kuti talekerera na ntima onsene?

¹⁵ Lekererani na ntima onsene. Khala munthu atitsukwalisa, tisafunika kumulekerera, mbitikhonda kukoya pinthu muntima. Ife tisafunika kucita pyenepi maseze akhonde kudzindikira kuti atitsukwalisa. Tisafunika kumulekerera na ntima onsene ‘kupirirana unango na ndzace mwaufulu na kutsalakanana mwantendere.’  (Aefesi 4:2, 3) Toera kulekerera na ntima onsene, tisafunika kuduwala pyonsene pidaticitira anango. Ufuni “nkhabe kukoya pinthu muntima.” (1 Akorinto 13:4, 5) Natenepa, tingakoya pinthu muntima, tinaluza uxamwali wathu na abale na alongo, pontho na Yahova. (Mateo 6:14, 15) Ife tinapangiza kuti talekerera na ntima onsene mukucita phembero thangwi ya munthu adatitsukwalisa.—Luka 6:27, 28.

16. Tisafunika kuona tani miyai yathu yakutumikira Yahova?

¹⁶ Perekekani toera kucita pizinji. Tingapaswa basa yakupambulika n’gulu ya Yahova, tinakwanisa kupangiza kuti ufuni wathu ndi wandimomwene ‘mukukhonda kusaka udidi wathu, mbwenye udidi wa anango.’ (1 Akorinto 10:24) Mwacitsandzo, m’misonkhano yathu ya cisa na ya gawo, akalindi asafunika kufika nakweru, pontho iwo nee asabandza mwai unoyu toera kukoya mbuto zawo peno kukoyera acibale awo. Kusiyapo pyenepi, akalindi azinji asasankhula kukhala dalimira mbapasa abale mbuto zawo. Mukucita pyenepi, asapangiza ufuni wandimomwene. Munakwanisa tani kutowezera citsandzo cawo cadidi?

17. Nkristu angacita madawo makulu, ufuni wandimomwene unankulumiza toera kucitanji?

¹⁷ Lekani kubisa madawo anu. Akristu anango asacita madawo makulu mbayesera kuabisa. Panango asakhala na manyadzo peno nee asafuna kutsukwalisa anango. (Misangani 28:13) Mbwenye kubisa madawo kusaphekesa iye na anango. Munjira ipi? Yahova anasiya kupasa nkhombo mpingo na nzimu wace wakucena, pontho mpingo nee usakhala mu ntendere. (Aefesi 4:30) Natenepa, Nkristu angacita madawo makulu, ufuni wandimomwene unankulumiza toera kubweka kuna akulu a mpingo mbatambira ciphedzo.—Tyago 5:14, 15.

18. Thangwi yanji ufuni wandimomwene ndi wakufunika?

¹⁸ Ufuni ndi n’khaliro ukulu kakamwe kupiringana makhaliro onsene. (1 Akorinto 13:13) Usaphedza anthu kuona kuti mbani atowereri andimomwene a Yezu, pontho toera kuona kuti mbani mwandimomwene anatowezera Yahova, Mulungu waufuni. (Aefesi 5:1, 2) Paulu alonga: ‘Ndingasowa ufuni nkhabe basa.’ (1 Akorinto 13:2) Natenepa, tonsene tisafunika kupitiriza kupangiza ufuni wathu tayu ‘na mafala’ basi, mbwenye ‘kubulukira m’macitiro athu.’