1, 2. (a) Kodi macinjo akututumusa asatikhuya tani? (Onani cithundzithundzi cakutoma.) (b) Mwakubverana na Masalmo 131, ninji cinafuna kutiphedza toera kukhala na ntendere wa m’manyerezero?

PIDAMALA Lloyd na Alexandra kutumikira pa Bheteli pyaka pyakupiringana 25, iwo acinjwa toera katumikira ninga apainiya. Pakutoma iwo atsukwala. Lloyd alonga: “Ndikhapibva ninga Bheteli na basa ikhacita ine ndi pikhadziwika na ine. Ndapereka takhuta thangwi ya macinjo, mbwenye papita miyezi mbandiri na mabvero akuphonyeka.” Midzidzi inango Lloyd akhali na mabvero adidi, mbwenye midzidzi inango akhali na mabvero akuphonyeka thangwi ya macinjo.

² Ndzidzi onsene, panagumanika macinjo akuti nee tikhaadikhira, natenepa panango iwo anatidzudzumisa na kutitsukwalisa. (Misangani 12:25) Khala macinjo ndi akunentsa toera kuatawira, tinacitanji toera tikhale akupfulika? (Lerini Masalmo 131:1-3.) Tendeni tione kuti atumiki anango a Yahova  akale na acincino, akhala tani na ntendere wa m’manyerezero maseze agwerwa na macinjo mwakututumusa.

3. Kodi umaso wa Zuze wacinja tani mwakututumusa?

³ Nyerezerani citsandzo ca Zuze. Mwa ana onsene a Yakobe, Zuze akhali wakufunika kakamwe. Pyenepi pyacitisa abale ace kukhala na bibvu. Pikhali Zuze na pyaka 17 pyakubalwa, iwo an’gulisa ninga bitcu. (Genesi 37:2-4, 23-28) Iye amala pyaka cifupi na 13 mbakathabuka ku Ejito, pakutoma ninga bitcu, mukupita kwa ndzidzi mbaikhwa nkaidi. Zuze akhali kutali na babace wakuti akhanfuna kakamwe. Makhaliro ace mbadancitisa kukhala wakusowa cidikhiro na wakuipirwa, mbwenye iye nee akhala na mabvero anewa. Ninji cidam’phedza?

4. (a) Kodi Zuze acitanji pikhali iye nkaidi? (b) Yahova atawira tani maphembero a Zuze?

⁴ Mu ndzidzi ukhathabuka Zuze nkaidi, iye akhanyerezera basi ene kuti Yahova akham’phedza tani. (Genesi 39:21; Masalmo 105:17-19) Panango iye akhanyerezera pya ndoto zidalota iye pikhali iye m’phale mbakhala na cinyindiro cakuti Yahova akhali na iye. (Genesi 37:5-11) Panango iye akhacita phembero kazinji kene mbapanga Yahova pyonsene pikhali muntima mwace. (Masalmo 145:18) Yahova atawira phembero ya Zuze mukumpasa cinyindiro cakuti mbadakhala “na iye” mwakukhonda tsalakana pikhafuna citika.—Machitiro 7:9, 10. * (Onani cidzindikiro capantsi.)

5. “Ntendere wa Mulungu” unatiphedza tani toera kupitiriza kutumikira Yahova?

⁵ Mwakukhonda tsalakana nyatwa zinathimbana na ife, tinakwanisa kukhala na “ntendere wa Mulungu” wakuti usatsidzikiza ‘manyerezero’ athu mbatikhala akupfulika. (Lerini Afilipi 4:6, 7.) Tingakhala akudzudzumika na akutsukwala, “ntendere wa Mulungu” unakwanisa kutipasa mphambvu toera kupitiriza kutumikira Yahova, tayu kubwerera nduli. Tendeni tidinge pitsandzo pingasi pya abale na alongo a ntsiku zino akuti athimbanambo na macinjo.

6, 7. Kodi maphembero athu anatiphedza tani toera kukhala pontho na ntendere wa m’manyerezero? Perekani citsandzo.

⁶ Pidabva Ryan na Juliette kuti basa yawo yakutumikira ninga apainiya akupambulika a ndzidzi wakucepa yamala, iwo atsukwala. Ryan alonga: “Ife tadziwisa pyenepi Yahova mu phembero. Ife tikhadziwa kuti tiri na mwai wakupambulika toera kunyindira Yahova. Abale na alongo azinji mu mpingo wathu akhali apswa mu undimomwene, natenepa ife taphembera kuna Yahova toera atiphedze kupangiza citsandzo cadidi ca cikhulupiro.”

⁷ Kodi Yahova atawira tani phembero yawo? Ryan alonga: “Mwakukhonda dembuka, pakumala kucita phembero, mabvero akuphonyeka na kudzudzumika kukhali na ife kwamala. Ntendere wa Mulungu watsidzikiza mitima na manyerezero athu. Ife tadzindikira kuti mbatidapitiriza kuphatisirwa mwakukwana na Yahova tingakhala na makhaliro adidi.”

8-10. (a) Nzimu wa Mulungu unatiphedza tani tingakhala akudzudzumika? (b) Yahova asatiphedza tani tingapitiriza kuntumikira?

 ⁸ Nzimu wa Mulungu unakwanisa kutiphedza kukhala akupfulika, pontho unakwanisa kutitsogolera toera kugumana mavesi a Bhibhlya akuti anatiphedza kubvesesa pinthu pyakufunika kakamwe mu umaso. (Lerini Jwau 14:26, 27.) Onani pidacitikira Philip na Mary, banja idatumikira pa Bheteli cifupi na pyaka 25. Nkati mwa miyezi minai, anyakubalawo acikazi na wacibale wawo unango alowa, pontho iwo akhafunika kutsalakana babace Mary, wakuti akhali na utenda wa nsala.

⁹ Philip alonga: “Ine ndikhanyerezera kuti ndikhacita pinthu mwadidi, mbwenye cinthu cinango cikhasala. Ndagumana lemba ya Akolose 1:11 mu Ncenjezi wa pfundziro. Mwandimomwene ndikhapirira, mbwenye tayu mwakukwana. Ndikhafunika ‘kupirira mwakukwana na mwakutsandzaya.’ Vesi ineyi yandikumbusa kuti kutsandzaya kwanga nee kusanyindira makhaliro anga, mbwenye njira inatsogolera nzimu wa Mulungu umaso wanga.”

¹⁰ Nakuti Philip na Mary apitiriza kutumikira Yahova, iye aapasa nkhombo munjira zizinji. Pidamala iwo kwene kubuluka pa Bheteli, iwo akhala na anyakupfundza Bhibhlya akuthambaruka akuti akhafuna kupfundza maulendo mazinji pasumana. Mary alonga: “Iwo akhatitsandzayisa, pontho kubulukira mwa iwo Yahova akhatipanga kuti pinthu pyonsene mbapidafamba mwadidi.”

11, 12. (a) Kodi Zuze acitanji toera Yahova ampase nkhombo? (b) Yahova apasa tani nkhombo Zuze?

¹¹ Umaso ungacinja mwakukhonda dikhira, panango tinadzudzumika kakamwe mbatinyerezera basi ene nyatwa zathu. Pyenepi mbipidacitikirambo Zuze. Mbwenye, iye asankhula kucita pyonsene pidakwanisa iye toera kuthimbana na macinjo. Ninga pikhaphatira iye basa mwaphinga Farau, iye aphatambo mwaphinga basa yonsene ikhapaswa iye na nkulu wa anyakaidi.—Genesi 39:21-23.

¹² Ntsiku inango, Zuze apaswa basa yakutsalakana anyakaidi awiri akhaphata basa panyumba ya Farau. Zuze aakomera ntima, pontho amuna akhali akusudzuka toera kumpanga kudzudzumika kwawo na ndoto zidalota iwo. (Genesi 40:5-8) Zuze nee akhadziwa pya ndoto zenezi, mbwenye kucedza  kwawo mbakudantsogolera toera kubuluswa nkaidi. Pakupita pyaka piwiri, iye abuluswa nkaidi mbakhala ntongi wamphambvu mu Ejito. Basi ene Zuze akhagopa Farau!—Genesi 41:1, 14-16, 39-41.

13. Mwakukhonda tsalakana makhaliro athu, tisafunika kucitanji toera Yahova atipase nkhombo?

¹³ Ninga Zuze, panango ife tinathimbanambo na makhaliro akunentsa. Mbwenye tingapirira mbaticita pinakwanisa ife, Yahova anadzatipasa nkhombo. (Masalmo 37:5) Maseze tidzudzumike na kutsukwala, ife nee tinakhala akusowa cidikhiro. (2 Akorinto 4:8) Yahova anakhala na ife, makamaka tingaikha manyerezero athu m’basa yakumwaza mphangwa.

14-16. Kodi m’mwazi mphangwa Filipi aikha tani manyerezero ace mu utumiki maseze umaso wace ukhadacinja?

¹⁴ M’mwazi mphangwa Filipi akhali citsandzo cadidi kakamwe ca munthu wakuikha manyerezero mu utumiki wace mwakukhonda tsalakana macinjo. Pakutoma, iye akomerwa na basa ipswa ikhacita iye mu Yerusalemu. (Machitiro 6:1-6) Buluka penepo pinthu pyacinja. Pidamala kuphiwa Estevau, paoneka kutcingwa kwa Akristu, natenepa iwo athawa mu Yerusalemu. Nakuti Filipi akhafuna kupitiriza kutumikira Yahova, iye aenda mu nzinda wa Samariya, nzinda wakuti anthu akhafunika kubva mphangwa zadidi.—Mateo 10:5; Machitiro 8:1, 5.

¹⁵ Filipi akhali dzololo toera kuenda kukhantsogolera nzimu wa Mulungu. Natenepa Yahova am’phatisira toera kumwaza mphangwa m’mbuto zakuti anthu nee akhadabva mphangwa zadidi. Ayuda azinji akhapwaza Asamariya na kuatsalakana mwakuipa. Mbwenye Filipi nee akhali na tsankhulo, natenepa aamwazira mphangwa zadidi na ntima onsene. Pontho Asamariya abvesera mwadidi pikhalonga iye!—Machitiro 8:6-8.

¹⁶ Nzimu wa Mulungu watsogolera pontho Filipi toera kamwaza mphangwa m’mizinda ya Azoto na Sezareya, mizinda yakuti ikhali na Ajentiyu azinji. (Machitiro 8:39, 40) Buluka penepo umaso wa Filipi wacinja pontho. Iye akhazikika mbamanga banja. Mbwenye mwakukhonda tsalakana kucinja kwa umaso wace, Filipi apitiriza na utumiki wace, pontho Yahova apitiriza kupasa nkhombo iye pabodzi na banjace.—Machitiro 21:8, 9.

17, 18. Kukhala akuphatika mu utumiki kunatiphedza tani mu ndzidzi unacinja umaso wathu?

¹⁷ Abale na alongo azinji ali m’basa ya  ndzidzi onsene asalonga kuti kuikha manyerezero mu utumiki wawo kusaaphedza toera kukhala akutsandzaya, mwakukhonda tsalakana macinjo. Mwacitsandzo, Osborne na Polite akuti ndi banja ibodzi ya ku Afrika do Sul pidasiya iwo kutumikira pa Bheteli, akhanyerezera kuti mbipidakhala pyakukhonda nentsa kugumana basa na mbuto yakukhala. Mbwenye Osborne alonga: “Mwakutsukwalisa, nee tagumana basa ninga pikhanyerezera ife.” Polite alonga: “Papita miyezi mitatu mbatidzati kugumana basa, pontho ife nee tikhali na kobiri. Ceneci cikhali cinentso cikulu.”

¹⁸ Ninji cidaphedza Osborne na Polite m’makhaliro anewa akunentsa? Osborne alonga: “Kumwaza mphangwa pabodzi na mpingo kwatiphedza toera kupitiriza kukhala na maonero akulinganira.” M’mbuto mwakukhala panyumba mbakadzudzumika na nyatwa zawo, iwo asankhula kukhala akuphatika mu utumiki. Kucita pyenepi kwaaphedza toera kukhala akutsandzaya kakamwe! Pontho Osborne athimiza: “Tamala ndzidzi uzinji mbatikasaka basa, buluka penepo taigumana.”

19-21. (a) Ninji pinafuna kutiphedza toera kukhala na ntendere wa m’manyerezero? (b) Ndi nkhombo zipi zinakhala na ife tingatawira macinjo anabwera mwakukhonda dikhira?

¹⁹ Ninga mudaona ife, tingacita pyonsene pinakwanisa ife mbatinyindira Yahova na ntima onsene, tinakwanisa kukhala na ntendere wa m’manyerezero mwakukhonda tsalakana pinafuna kucitika. (Lerini Mikeya 7:7, Tradução do Novo Mundo.) Mukupita kwa ndzidzi, panango tinadzindikira kuti macinjo adacita ife awangisa uxamwali wathu na Yahova. Polite afokotoza kuti kucinjwa kwawo buluka pa Bheteli kwam’phedza toera kubvesesa kuti pisabvekanji kunyindira Yahova, maseze umaso ukhali wakunentsa kakamwe. Iye alonga: “Uxamwali wanga na Yahova wadzakhala wakuwanga kakamwe.”

 ²⁰ Mary, adalongwa mu ndima zakutoma, asapitiriza kutsalakana babace wakugwesera mbatumikira ninga mpainiya wa ndzidzi onsene. Iye alonga: “Ndapfundza kuti ndingakhala wakudzudzumika, ndisafunika kucita phembero mbandikhurudzika. Ndisaona kuti cinthu cakufunika kakamwe cidapfundza ine ndi kusiya pinthu m’manja mwa Yahova, pontho pyenepi pinadzakhala pyakufunikambo ntsogolo.”

²¹ Lloyd na Alexandra alonga kuti macinjo adagwerwa na iwo ayesera cikhulupiro cawo munjira yakuti nee akhaidikhira. Mbwenye macinjo anewa aaphedza. Lero iwo asaona kuti cikhulupiro cawo ndi cakuwanga na cisaabalangaza mu ndzidzi wa nyatwa, pontho cincino asapibva kuti ndi anthu adidi kakamwe.

22. Tingacita pyonsene pinakwanisa ife mwakukhonda tsalakana makhaliro athu, tinakhala na cinyindiro cipi?

²² Ntsiku zino, umaso wathu unakwanisa kucinja mwakututumusa. Panango tinapaswa basa ipswa mu gulu ya Yahova, nyatwa za ungumi, peno tinafunika kutsalakana wacibale wathu munjira inango. Mbwenye mwakukhonda tsalakana pinafuna kucitika, khalani na cinyindiro cakuti Yahova anakutsalakanani na kukuphedzani pa ndzidzi wakuthema. (Ahebere 4:16; 1 Pedro 5:6, 7) Natenepa, mwakukhonda tsalakana makhaliro anu, citani pyonsene pinakwanisa imwe. Citani phembero kuna Babanu Yahova, pontho pfundzani kun’nyindira na ntima onsene. Munjira ineyi, mwakukhonda tsalakana macinjo anafuna kukugwerani, ndzidzi onsene munakhala na ntendere wa m’manyerezero wakuti usabuluka kwa Yahova.