Ndabalwa mu caka 1934. Anyakubalanga Fred na Edna Molohan, akhali kale anyakupfundza Bhibhlya (Mboni za Yahova) mu pyaka 20. Ndisapereka takhuta kakamwe kuna iwo thangwi andipfundzisa kufuna Yahova. Ife tikakhala ku Parsons, nzinda ung’ono ku sudoeste Kansas. Abale na alongo azinji mu mpingo mwathu akhali akudzodzwa. Banja yathu ikhaenda kumisonkhano na m’basa ya m’munda ndzidzi onsene. Kazinji kene n’Sabudu namaulo tikhamwaza mphangwa mu nseu, basa yakuti lero tisaicemera umboni wapakweca. Midzidzi inango tikhaneta, mbwenye baba akhatibalangaza na sorvete tingakotoka mu utumiki.

Mpingo wathu ung’ono ukhali na cisa cikulu kakamwe kuphatanizambo mizinda ming’ono na mamidzi mazinji. M’mbuto mwa kutipasa kobiri thangwi ya mabukhu athu, anthu akhatipasa masamba, mazai peno nkhuku za maso. Nakuti baba akhadacita kale pyakupereka pya mabukhu anewa, natenepa ife tikhadya pyakudya pikhapaswa ife.

Anyakubalanga akhaphatisira gramafone m’basa yakumwaza mphangwa. Ine ndikhali mwana kakamwe toera kuiphatisira, mbwenye ndikhakomerwa kuphedza baba na mama toera kuliza nkhani ya M’bale Rutherford m’maulendo akubwereza na m’mapfundziro a Bhibhlya.

Baba akhaikha atifulanti padzulu pa motokala wathu ukhacemerwa 1936 Ford, pontho wadzakhala motokala wakugaluza mafala. Ineyi ikhali basa ikulu. Kazinji kene, ife tikhatoma kuliza nyimbo toera kutundusa anthu, buluka penepo tikhaliza nkhani ya Bhibhlya. Tingamala tikhagawira mabukhu anthu adapangiza cifuno.

Mu nzinda ung’ono wa Cherryvale, Kansas, Baba akhacita ulendo kuenda ku parki na motokala wakugaluza mafala, mbuto yakuti ikhagumanika anthu azinji m’Madimingu. Buluka penepo, abwera mpolixa mbapanga baba kuti iye asafunika kuphatisira motokala wakugaluza mafala basi ene kunja kwa parki. Baba abulusa motokala  wawo mbaenda kausiya mu nseu cifupi na parki, natenepa anthu mbadakwanisa kubvesera mwadidi programu ineyi. Ndzidzi onsene pikhali pyakutsandzayisa kukhala pabodzi na Baba na m’bale wanga wankulu Jerry, m’midzidzi ineyi.

Mu pyaka pyenepi, ife tikhacita makampanya akupambulika mu pisa pyakuti anthu akhatcinga kakamwe basa yathu. Ninga mudalonga ine pakutoma, ife tikhalamuka tcititciti mbatisiya matratadho peno mabukhu mang’ono pantsi pamisuwo ya nyumba za anthu. Buluka penepo, ife tonsene tikhagumanyikana kunja kwa nzinda toera kuona khala alipo adaphatwa na mpolixa.

Khundu inango yakutsandzayisa ya utumiki wathu ikhacemerwa marcha informativa. Ife tikhabvala pidzindikiro pyakulapha mbatifamba mu nzinda onsene. Ndisakumbuka kuti ulendo unango abale akhadabwera mu nzinda mwathu, mbakabvala pidzindikiro pyakulembwa ‘A Religião É Laço e Extorsão.’ Iwo atoma panyumba pathu, mbafamba nsindzo wa kilometru ibodzi na hafu mu nzinda, buluka penepo abwerera panyumba. Mwakutsandzayisa, nee m’bodzi aakhondesa, mbwenye anthu azinji akhafuna kakamwe kudziwa pikhacitika.

Banja yathu kazinji kene ikhaenda kumisonkhano ya gawo ku Texas. Baba akhaphata basa mu kompanyia ferroviária, natenepa nee tikhalipa xitima pakuenda kumisonkhano ya gawo na kaona acibale athu. M’bale wace mama, Fred Wismar na nkazace Eulalie, akhakhala ku Temple, Texas. Tiu Fred apfundza undimomwene mu caka 1900 pikhali iye m’phale mbabatizwa, pontho apanga abale ace kuphatanizambo mai wanga pinthu pidapfundza iye. Abale a pakati pa nzinda wa Texas akhadziwa mwadidi Tiu Fred thangwi iye akhatumikira ninga servo de zona (cincino asacemerwa muyang’aniri wa cisa). Iye akhali munthu wadidi, wakuseka, waphinga, pontho akhali citsandzo cadidi kwa ine.

Mu caka 1941, tacita ulendo na xitima kuenda ku St. Louis, Missouri, ku nsonkhano ukulu wa gawo. Aphale na atsikana onsene acemerwa toera akhale pabodzi cifupi na platifomu toera kubvesera nkhani ya M’bale Rutherford ya nsolo wakuti “Filhos do Rei.” Pidamala iye nkhani yace, aphale na atsikana akukwana 15.000 adzumatirwa kakamwe. M’bale Rutherford pabodzi na andzace apasa ife tonsene bukhu ipswa yakuti Filhos.

Mwezi wa Abril wa caka 1943, ife tagumanika pa nsonkhano wa cisa ku Coffeyville, Kansas wa nsolo wakuti “Chamada à Ação.” Kweneko tabva cidziwiso cakuti mipingo yonsene isafunika kukhala na Xikola ipswa ya Utumiki wa Mulungu. Ife tatambirambo mabukhu mang’ono a misolo 52 yakuti tikhafunika kuiphatisira pa xikola. Pidamala caka ceneci ndacita nkhani yanga yakutoma. Nsonkhano unoyu ukhalimbo wakupambulika kwa ine, thangwi ine pabodzi na anango tabatizwa mu thawala cifupi na munda.

Ndamalisa xikola sekundarya mu caka 1951, natenepa ndikhafunika kucita cisankhulo cakuti mbandidacitanji na umaso wanga. M’bale wanga Jerry akhatumikira ku Bheteli. Ine ndikhafunambo kakamwe kuenda ku Bheteli, natenepa ndatumiza petisau yanga. Buluka penepo, ndacemerwa ku Bheteli mbinditoma kutumikira kweneko ntsiku 10 ya Março ya caka 1952. Ceneci cikhali cisankhulo cadidi kakamwe cidandiphedza toera kutumikira Mulungu mwakukwana.

Ine ndikhadikhira kuphata basa yakudhinda toera kuphedzera kucitwa kwa marevista athu na mabukhu anango. Mbwenye nee ndi pyenepi pidacitika. Ine ndapaswa basa ya kupereka cakudya, buluka penepo ndaphata basa m’mbuto yakuphikira. Ine ndikhakomerwa kakamwe na basa ineyi, pontho ndapfundza pinthu pizinji. Ife tikhaphata basa mwakupitisirana, natenepa ndikhali na midzidzi mingasi yakupuma pa ntsiku. Kazinji kene ndikhaenda m’bhibhliyoteka ya Bheteli, mbandiphatisira mabukhu mazinji toera kucita pfundziro yanga. Pyenepi pyawangisa cikhulupiro canga na uxamwali wanga na Yahova. Cifuno canga cakutumikira pa Bheteli cathimizirika  ninga mukhafunira ine. Jerry akhadasiya kutumikira pa Bheteli mu caka 1949 mbamanga banja na Patricia, mbwenye iwo akhakhala cifupi na Brooklyn, natenepa iwo akhandiphedza pikhali ine mupswa ku Bheteli.

Pidafika ine kwene ku Bheteli, abale atoma kusaka anatumikira pa Bheteli toera kuaikha pa ndandanda ya anyakucita nkhani. Abale akhali pa ndandanda ineyi akhatumwa toera kacedzera mipingo ya nsindzo wa makilometru 320 kubulukira ku Brooklyn. Kweneko iwo akhacita nkhani ya pakweca na kuenda mu utumiki na mpingo. Ine ndikhali m’bodzi mwa abale anewa. Mwakugopa, ine ndatoma kucedzera mipingo na kucita nkhani za pakweca. Mu ndzidzi unoyu nkhani za pakweca zikhali za ndzidzi ubodzi. Kazinji kene ndikhacita ulendo na xitima toera kacedzera mipingo. Ine ndisakumbuka mwadidi pidacitika n’Dimingu namasikati mu ndzidzi wa khoni mu caka 1954. Ndakwira xitima yakuenda ku Nova York, mbandinyerezera kuti ndinafika nakweru ku Bheteli. Mbwenye pikhabwerera ine, kwatoma condzi cikulu kakamwe na nkhungu. Xitima yagudjuka, natenepa nee ndafika ku Nova York mpaka n’Ciposi namacibese ndzidzi uxanu. Ndakwira xitima inafamba pantsi pa mataka ikhaenda ku Brooklyn, pidatcita ine ndaenda kaphata basa m’mbuto yakuphikira. Ndadembuka pang’ono, pontho ndikhadaneta thangwi nee ndagona namasiku. Mbwenye kutumikira mipingo pabodzi na abale na alongo apswa kukhali kwakufunika kakamwe kupiringana kuwangisira konsene kudacita ine.

Caka cidatoma ine kutumikira pa Bheteli, ndatomambo kucita programu ya pfundziro ya Bhibhlya yakuti ikhali broadcast masumana onsene pa radhyo yathu, WBBR. Estúdio ikhali mu segundo andar ku 124 Columbia Heights. M’bale Alexander H. Macmillan, wakuti atumikira pa Bheteli mu pyaka pizinji, akhacita maprogramu anewa ntsiku zonsene. Tikhancemera M’bale Mac. Iye akhali citsandzo cadidi kwa ife aphale pa Bheteli thangwi akhapitiriza kukhala wakukhulupirika mwakukhonda tsalakana pinentso.

Mu caka 1958, ndacinjwa mbanditoma kuphata basa yakuphedzera abale akhamalisa Xikola ya Gileadhe. Ine ndikhaphedza amuna na akazi anewa aphinga toera akwanise kucita ulendo wa basa ya umisionaryo, pontho ndikhacita masasanyiro a ulendo wawo. Kucita ulendo na ndeka kukhadhula kakamwe, natenepa azinji mwa abale anewa adaenda ku Afrika na ku Azya akhafunika kucita ulendo na xitima ya m’madzi. Mukupita kwa pyaka, kucita ulendo na ndeka nee kukhadhulabve, natenepa amisionaryo azinji adzacita ulendo na ndeka.

Mu caka 1960, basa yanga ikhaphataniza kulugari ndeka zakubuluka ku Estados Unidos kuenda kumisonkhano ya dziko yonsene ku Europa mu caka 1961. Ine ndakwirambo ibodzi mwa ndeka zenezi kuenda kumisonkhano ya ku Hamburgo, Alemanya. Pakumala kwa nsonkhano, ine pabodzi na abale atatu a pa Bheteli talugari motokala mbatipita na ku Alemanya kuenda ku Italya toera  kacedzera ofesi ya filiali ku Roma. Pidabuluka ife, taenda ku Fransa mbitipita na M’mapiri a Pireneus mbatifika ku Espanya, dziko yakuti basa yathu ikhatcingwa. Ife tikhafunika kupasa mabukhu mangasi abale a ku Barcelona, akuti tikhadaapyangirira ninga miyoni toera akhonde kudzindikirwa. Pikhali pyakutsandzayisa kakamwe kuonana na abale anewa! Buluka penepo, taenda ku Amsterdã mbatikwira ndeka mbitibwerera ku Nova York.

Mu caka 1962, ndapaswa basa yakucita masasanyiro a ulendo wa abale na alongo akukwana 583 akuti akhafunika kuenda kumisonkhano yakupambulika ya dziko yonsene. Nsonkhano unoyu ukhali wa nsolo wakuti “Boas Novas Eternas”, mu caka 1963. Akhasankhulwa abale toera kuenda kacita misonkhano ku Europa, Azya na ku Pacífico Sul, pontho akhafunika kuenda ku Honolulu, Havaí na ku Pasadena, Califórnia. Ulendo unoyu ukhaphatanizambo kuenda ku Libano na ku Yordani toera kuona madziko anango akale. Dhepartamentu yathu yacita masasanyiro a ndeka, maoteli na pyonsene pikhafunika.

Caka 1963 cikhali cakufunikambo kakamwe kwa ine na thangwi inango. Ntsiku 29 ya Junho ndamanga banja na Lila Rogers wa ku Missouri, wakuti akhadabwera ku Bheteli mu caka 1960. Sumana ibodzi pakumala kumanga banja, ine na Lila tacita khundu ya nsoka wa abale akhafuna kucita ulendo madziko mazinji, tapita na ku Gresya, Ejito na Libano. Buluka penepo, takwira ndeka toera kuenda ku Yordani. Mbwenye basa yathu ikhatcingwa kweneko, pontho atongi nee akhapasa maphaso Mboni za Yahova. Natenepa nee tikhadziwa pikhafuna kucitika pidafika ife. Nyerezerani kutsandzaya na kudzumatirwa kudakhala na ife pidaona ife nsoka wa abale na alongo adalimira kunkhomo kwa thando ya ndeka mbakaphatira cinthu cikulu cidalembwa kuti “Bweraniko Mboni za Yahova”! Pikhali pyakutsandzayisa kakamwe kuona mbuto za kale zikhakhala Abhrahamu, Izaki na Yakobe, mbuto zikhamwaza mphangwa Yezu na apostolo, pontho kudatoma kumwazika Cikristu ‘mpaka kunkhomo kwa dziko yapantsi.’—Machitiro 13:47.

Mu pyaka 55, Lila ndi ndzanga wakukhulupirika m’mabasa athu onsene. Ife taenda ku Espanya na ku Portugal m’maulendo mazinji mu ndzidzi ukhatcingwa basa yathu. Tikhafunika kuwangisa abale na alongo, kuapasa mabukhu na pinthu pinango pyakufunika. Ife tikhafunikambo kuenda kaona abale athu angasi akuti akhali nkaidi ku Cádiz, Espanya. Pikhali pyakutsandzayisa kakamwe kwa ine kuacitira nkhani yakuwangisa.

Kutomera mu caka 1963, ndikhali na basa yakukhunganya maulendo a misonkhano yakupambulika ku Afrika, Australya, América Central, América do Sul, Europa, Extremo Oriente, Havaí, Nova Zelândia na Porto Rico. Lila na ine takhala na nkhombo yakugumanika pa misonkhano mizinji ya gawo, ninga udacitika ku Warsaw, Poland mu caka 1989. Abale azinji a ku Rusiya agumanikambo pa nsonkhano unoyu ukulu. Unoyu ukhali  nsonkhano wawo wakutoma! Tasonkhana na abale na alongo akuti akhali nkaidi mu pyaka pizinji ku União Soviética thangwi ya cikhulupiro cawo.

Basa inango idanditsandzayisa kakamwe ikhali yakucedzera na kuwangisa mabanja a Bheteli na amisionaryo pa dziko yonsene. Paulendo wathu wakumalisa, tacedzera Coreia do Sul, takwanisa kusonkhana na abale athu akukwana 50 akuti akhali nkaidi ku Suwon. Onsene akhali na maonero adidi kakamwe, pontho akhali dzololo toera kupitiriza kutumikira Yahova mwakukhonda tsalakana kutcingwa. Kukhala pabodzi na iwo kwatiwangisa kakamwe!—Aroma 1:11, 12.

Yahova apasa nkhombo kakamwe atumiki ace mu pyaka pyenepi. Mu caka 1943 cidabatizwa ine, pakhali na amwazi mphangwa cifupi na 100.000. Cincino pasagumanika Mboni za Yahova zakupiringana 8.000.000 m’madziko 240. Basa ikulu ya abale na alongo adamalisa xikola ya Gileadhe yaphedzera kakamwe kuthimizirika kweneku. Mphyakutsandzayisa kakamwe kwa ine kuphata basa na azinji mwa amisionaryo anewa na kuaphedzera m’mabasa awo.

Ndiri wakutsandzaya kakamwe thangwi pikhali ine m’phale ndasankhula kuphatisira umaso wanga m’basa ya Yahova mbandienda ku Bheteli. Yahova andipasa nkhombo kakamwe mu pyaka pyenepi. Kusiyapo pyonsene pinatikomera m’basa ya Bheteli, ine na Lila tatsandzaya m’basa yakumwaza mphangwa na mipingo mizinji ku Brooklyn mu pyaka 50, pontho takhala na axamwali azinji andimomwene.

Ndisapitiriza kutumikira pa Bheteli na ciphedzo ca Lila ntsiku zonsene. Maseze cincino ndiri na pyaka 84 pyakubalwa, ndisatsandzaya thangwi ndisakwanisa kucita basa yakutsalakana matsamba pa Bheteli.

Kucita khundu ya gulu ya Yahova kusanditsandzayisa kakamwe. Tisakwanisa kuona kusiyana kwa ale anatumikira Yahova na ale anakhonda kuntumikira. Pyenepi pisabverana na pinalonga Malakiya 3:18 kuti: ‘Munadzaona pontho kusiyana kwa pyadidi na pyakuipa na kusiyana kwa ale anatumikira Mulungu na ale anakhonda kuntumikira.’ Ntsiku zonsene tisaona kuti dziko ya Sathani ikutekera, anthu nee ali na cidikhiro, pontho nee asatsandzaya na umaso. Mbwenye ale anafuna Yahova na kuntumikira asakhala akutsandzaya ngakhale ntsiku zino zakunentsa, pontho ali na cidikhiro ca ntsogolo. Mwandimomwene ndi mwai kupanga anango mphangwa zadidi! (Mateo 24:14) Mwakukhonda dembuka, Umambo wa Mulungu unadzacinja dziko ino yakale mbikhala paraizu. Pinadzakhala pyakutsandzayisa kakamwe kukhala mu dziko ineyi! Thangwi anthu onsene pa dziko yapantsi anadzakhala akutsandzaya na ungumi wadidi kwenda na kwenda.