NSOLO WA PFUNDZIRO 41
Pitirizani Kukhala Akukhulupirika mu Ndzidzi wa “Nyatwa Ikulu”
‘Funani Yahova, imwe atumiki ace onsene! Yahova asakoya anthu ace akukhulupirika.’—MASAL. 31:23.
NYIMBO 129 Tinapitiriza Kupirira
PINAFUNA IFE KUPFUNDZA *
1-2. (a) Mwakukhonda dembuka atsogoleri a dziko anadzalonganji? (b) Ndi mibvundzo ipi inafuna ife kutawira?
NYEREZERANI kuti atsogoleri a dziko yonsene amala kulonga mafala akuti akhadikhirwa kakamwe a “ntendere na citsidzikizo.” Mwakudzikuza panango iwo ananyerezera kuti akwanisa kubweresa ntendere na citsidzikizo. Atsogoleri a dziko anadzafunambo kuti ife tonsene tinyerezere kuti iwo amalisa nyatwa pa dziko yonsene. Mbwenye iwo nkhabe dziwa pinafuna kudzacitika ntsogolo! Thangwi yanji? Mwakubverana na profesiya ya Bhibhlya, “penepo pene kufudzwa kwawo kunafika mwakututumusa . . . pontho iwo nee anadzapulumuka.”—1 Ates. 5:3.
2 Pana mibvundzo yakufunika kakamwe yakuti tisafunika kuitawira: Ninji pinafuna kucitika mu ndzidzi wa “nyatwa ikulu”? Kodi Yahova asadikhira kuti tidzacitenji pa nyatwa ikulu? Tinakhunganyika tani cincino toera tikhale akukhulupirika mu ndzidzi wa nyatwa ikulu?—Mat. 24:21.
NINJI PINAFUNA KUCITIKA MU NDZIDZI WA “NYATWA IKULU”?
3. Mwakubverana na Apokalipse 17:5, 15-18, kodi Mulungu anadzafudza tani “Bhabhilonya Wankulu”?
3 Lerini Apokalipse 17:5, 15-18. “Bhabhilonya Wankulu” anadzafudzwa! Ninga pidalongwa pa ndima yakutoma, atsogoleri a dziko nkhabe dziwa pinafuna kudzacitika pa ndzidzi unoyu. Thangwi yanji? Thangwi “Mulungu aikha m’mitima yawo cifuno cakucita pinanyerezera iye.” Manyerezero anewa ndi api? Akufudza mauphemberi onsene authambi, kuphatanizambo ale analonga kuti ndi Acikristu. Mulungu anadzaikha manyerezero m’mitima ya “nyanga khumi” za “cikala cakufuira.” Nyanga khumi zisaimirira mautongi onsene anaphedzera “cikala,” cakuti ndi Nações Unidas. (Apok. 17:3, 11-13; 18:8) Atongi a dziko angatoma kufudza uphemberi wauthambi, ndi cipangizo cakuti nyatwa ikulu yatoma. Unoyu unadzakhala ndzidzi wakugopswa kakamwe kwa anthu.
4. (a) Ndi mathangwi api akuti panango anacitisa atsogoleri a dziko kufudza uphemberi wauthambi? (b) Ndi pinthu pipi pyakuti panango anthu ali mu uphemberi wauthambi anadzapicita?
4 Ife nkhabe dziwa kuti ninji pinafuna kucitisa atsogoleri a dziko kupomokera Bhabhilonya Wankulu. Panango iwo analonga kuti mauphemberi a dziko asapingiza ntendere pa dziko yonsene thangwi asacita khundu ya ndale. Panango iwo analonga kuti mauphemberi anewa asakoya mpfuma izinji. (Apok. 18:3, 7) Pisaoneka kuti kufudzwa kwa Bhabhilonya Wankulu nee kusabveka kufudzwa kwa anthu onsene anacita khundu mu uphemberi wauthambi. Pontho pisaoneka kuti atsogoleri a dziko nee anadzacitabve khundu ya misoka ya mauphemberi. Mauphemberi onsene authambi angadzafudzwa, anthu akuti akhacita khundu ya mauphemberi anewa anadzindikira kuti atsogoleri awo nkhabe cidakwanisa iwo. Pontho iwo panango anadzalonga kuti nee asacitabve khundu ya mauphemberi anewa.
5. Yahova apikiranji thangwi ya nyatwa ikulu, pontho thangwi yanji?
5 Bhibhlya nkhabe longa kuti kufudzwa kwa Bhabhilonya Wankulu kunakwata ndzidzi ungasi, mbwenye pinadziwa ife ndi pyakuti unakwata ndzidzi wakucepa. (Apok. 18:10, 21) Yahova apikira kuti “ntsiku zenezi zinadzagwandizirwa” pa nyatwa ikulu toera “anthu adasankhula” iye apulumuke pabodzi na uphemberi wandimomwene. (Marko 13:19, 20) Mphapo Yahova asadikhira kuti ticitenji kubulukira pakutoma kwa nyatwa ikulu mpaka kunkhomo kwa nkhondo ya Armajedhoni?
PITIRIZANI KUPHEDZERA ULAMBIRI WANDIMOMWENE WA YAHOVA
6. Thangwi yanji nee pyakwana kukhonda kucita khundu ya uphemberi wauthambi?
6 Ninga pidapfundza ife mu nsolo udamala, Yahova asadikhira kuti alambiri ace akhonde kucita khundu ya Bhabhilonya Wankulu. Mbwenye nee pyakwana kubuluka mu uphemberi wauthambi. Tisafunika kukhala akutonga toera kutumikira Yahova. Onani njira ziwiri zakuti tinacita tani pyenepi.
Nee tisafunika kusiya kusonkhana, ngakhale m’midzidzi yakunentsa (Onani ndima 7) *
7. (a) Tinapitiriza tani kubvera mwacipapo midida yakulungama ya Yahova? (b) Mwakubverana na Ahebheri 10:24, 25, thangwi yanji misonkhano ndi yakufunika kakamwe lero?
7 Pakutoma, tisafunika kuphedzera midida yakulungama ya Yahova. Ife nkhabe funika kutawira maonero a dziko. Mwacitsandzo, ife nkhabe kuphedzera ulukwali, kuphatanizambo kumanga banja mamuna na mamuna peno nkazi na nkazi. (Mat. 19:4, 5; Aroma 1:26, 27) Caciwiri, tisafunika kupitiriza kulambira Yahova pabodzi na Akristu andzathu. Ife tinakwanisa kucita pyenepi, mwakukhonda tsalakana khala ndi mu Nyumba za Umambo, nyumba za abale peno mbuto zakubisika. Mwakukhonda tsalakana pinafuna kucitika, ife cipo tinasiya kusonkhana toera kutumikira Yahova pabodzi na abale athu. Mwandimomwene, tisafunika kusonkhana ‘makamaka mu ndzidzi unaona ife kuti ntsiku ya Mulungu ikufika.’—Lerini Ahebheri 10:24, 25.
8. Ndi macinjo api akuti panango anacitika na mphangwa zinafuna ife kumwaza ntsogolo?
8 Panango mu ndzidzi wa nyatwa ikulu mphangwa zinafuna kumwaza ife zinadzakhala zakusiyana. Cincino tisamwaza mphangwa zadidi za Umambo, pontho tisawangisira kucita anyakupfundza. Mbwenye pa ndzidzi unoyu, mphangwa zinafuna ife kumwaza zinadzakhala zakuwanga kakamwe ninga miyala yakulemera kakamwe ya matalala. (Apok. 16:21) Panango tinadzamwaza mphangwa zakuti dziko ya Sathani iri cifupi toera kufudzwa. Ndzidzi unoyu ungafika, mwandimomwene tinadziwa mphangwa zinafuna ife kumwaza, pontho kuti tinazimwaza tani. Kodi tinadzamwaza mphangwa munjira ibodzi ene ninga pinacita ife mu pyaka pyakupiringana 100? Peno tinadzaphatisira njira zinango? Tisafunika kudikhira toera tione. Mwakukhonda tsalakana njira inafuna ife kuphatisira, pisaoneka kuti tinadzakhala na mwai wakumwaza mphangwa zakutonga kwa Yahova mwacipapo!—Ezek. 2:3-5.
9. Atsogoleri a dziko anadzaona tani mphangwa zinafuna ife kudzamwaza, mbwenye ife tisafunika kukhala na cinyindiro cipi?
9 Pyonsene pisapangiza kuti atsogoleri a dziko anadzaipirwa na mphangwa zinafuna ife kumwaza. Panango iwo anayesera kutikhondesa kumwaza mphangwa. Na thangwi ineyi, tisafunika kunyindira Yahova. Lero iye asatipasa pyonsene pinafuna ife toera kumwaza mphangwa zadidi. Tinakwanisa kukhala na cinyindiro cakuti ntsogolo Mulungu anatipasa mphambvu toera kukwanirisa cifuniro cace.—Mik. 3:8.
KHALANI AKUKHUNGANYIKA PA NTSIKU YAKUPOMOKERWA KWA MBUMBA YA MULUNGU
10. Mwakubverana na pinalongwa pa Luka 21:25-28, kodi anthu azinji anadzacitanji pa nyatwa ikulu?
10 Lerini Luka 21:25-28. Pa nyatwa ikulu anthu anadzakhala akudzudzumika. Pyonsene pikhanyindira iwo kuti pinaaphedza mu dziko ino pinadzafudzika. Iwo ‘anadzatsukwala,’ anadzagopa kufa pa ndzidzi unoyu wakugopswa kakamwe. (Sof. 1:14, 15) Pa ndzidzi unoyu umaso unadzakhala wakunentsa kakamwe, ngakhale kuna mbumba ya Yahova. Nakuti tisapitiriza kukhonda kucita khundu ya dziko, ife tinadzathabuka kakamwe. Panango tinadzasowa pinthu pinango pyakufunika.
11. (a) Thangwi yanji anthu anadzadzudzumika basi ene na Mboni za Yahova? (b) Thangwi yanji nee tisafunika kugopa nyatwa ikulu?
11 Nkati mwa nyatwa ikulu, unafika ndzidzi wakuti anthu akuti akhali m’mauphemberi authambi adamala kufudzwa, anadzaona kuti Mboni za Yahova zikupitiriza na uphemberi wawo. Pyenepi pinacitisa anthu anewa kuipirwa kakamwe. Nyerezerani uviyaviya unafuna kudzaoaneka, kuphatanizambo mu interneti. Anthu pabodzi na ntongi wawo Sathani anadzatiida thangwi uphemberi wathu ndiwo basi unafuna kukhonda kufudzwa. Iwo anaona kuti nee akwanirisa cifuniro cawo cakufudza mauphemberi onsene pa dziko yapantsi. Na thangwi ineyi, iwo anadzudzumika basi ene na ife. Ndi ndzidzi unoyu wakuti madzindza a anthu anakhala Goge wa Magoge. * Iwo anadzaphatana pabodzi toera kupomokera mbumba ya Yahova na mphambvu zawo zonsene. (Ezek. 38:2, 14-16) Ife panango tinadzudzumika thangwi ya pinthu pinafuna kucitika mu ndzidzi wa nyatwa ikulu, thangwi nee tisadziwa pyonsene pinafuna kucitika. Mbwenye tisafunika kukhala na cinyindiro ici: Ife nee tisafunika kugopa nyatwa ikulu. Yahova anadzatipasa pitsogolero toera kupulumusa umaso wathu. (Masal. 34:19) Ife ‘tinakhala dzololo mbatilamusa misolo’ yathu thangwi tinadziwa kuti ‘cipulumuso cathu ciri cifupi.’ *
12. “M’bandazi wakukhulupirika na wandzeru” akutikhunganya tani toera kuthimbana na pinthu pinafuna kudzacitika ntsogolo?
12 “M’bandazi wakukhulupirika na wandzeru” akutikhunganya toera tikhale akukhulupirika pa nyatwa ikulu. (Mat. 24:45) Iye akucita pyenepi munjira zizinji, mwacitsandzo, misonkhano ya gawo ya caka 2016 mpaka 2018 isapangiza pyenepi. Misonkhano ineyi yagomezera makhaliro anafunika ife kukhala nawo toera tipulumuke pa ntsiku ya Yahova. Tendeni tione mwacigwagwa makhaliro anewa.
PITIRIZANI KUWANGISA KUKHULUPIRIKA KWANU, KUPIRIRA NA CIPAPO CANU
Khunganyikani cincino toera kupulumuka pa “nyatwa ikulu” (Onani ndima 13-16) *
13. Tinawangisa tani kukhulupirika kwathu kuna Yahova, pontho thangwi yanji tisafunika kucita pyenepi cincino?
13 Kukhulupirika: Nsonkhano wa gawo wa caka 2016 ukhali na nsolo wakuti “Pitirizani Kukhala Wakukhulupirika Kuna Yahova!” Nsonkhano unoyu watipfundzisa kuti tingakhala na uxamwali wakuwanga na Yahova, tinadzakhala akukhulupirika kuna iye. Nkhani zagomezera kuti tinakwanisa kukhala na uxamwali wakuwanga na Yahova tingacita maphembero akubulukira muntima mbatipfundza mwaphinga Mafalace. Tingacita pyenepi ife tinakhala akuwanga mwauzimu, mbatikunda pinentso pikulu kakamwe. Nakuti kumala kwa makhaliro a dziko ya Sathani kuli dhuzi, tisadikhira kuthimbana na nyatwa zakuti zinayesera kukhulupirika kwathu kuna Mulungu na Umambo wace. Panango anthu anapitiriza kutisingirira. (2 Ped. 3:3, 4) Pyenepi pinacitika, makamaka thangwi ife nee tisacita khundu ya dziko ya Sathani. Tisafuna kuwangisa kukhulupirika kwathu cincino toera tikhale akukhulupirika pa nyatwa ikulu.
14. (a) Ndi macinjo api anafuna kudzacitika kuna abale anatsogolera atumiki a Yahova pa dziko yapantsi? (b) Thangwi yanji tisafunika kukhala akukhulupirika pyenepi pingacitika?
14 Lero, ndi Mathubo Akutonga anatsogolera mbumba ya Yahova. Mbwenye nkati mwa nyatwa ikulu iwo nee anadzagumanika pa dziko yapantsi. Akristu onsene akudzodzwa anadzagumanywa kudzulu toera kucita khundu pa nkhondo ya Armajedhoni. (Mat. 24:31; Apok. 2:26, 27) Mbwenye mwinji ukulu unadzapitiriza kukhala wakuphatana ninga nsoka. Abale aluso akuti asacita khundu ya mabira anango anadzatsogolera mbumba ya Mulungu. Pyenepi pingacitika pinaphemba kupangiza kukhulupirika kwathu mukuphedzera abale anewa na kutowezera pitsogolero pinafuna iwo kupaswa na Mulungu, thangwi kupulumuka kwathu kusanyindira pyenepi!
15. Tinawangisa tani kupirira kwathu, pontho thangwi yanji mphyakufunika kucita pyenepi cincino?
15 Kupirira: Nsonkhano wa gawo wa caka 2017 ukhali na nsolo wakuti “Lekani Kubwerera Nduli!” Nsonkhano unoyu watiphedza toera kuwangisa maluso athu akupirira mayesero. Tapfundza kuti kupirira kwathu nee kusanyindira makhaliro athu adidi. Tinakwanisa kuwangisa kupirira kwathu tinganyindira Yahova. (Aroma 12:12) Ife cipo tisafunika kuduwala pidapikira Yezu: “Ule anapirira mpaka kunkhomo, anadzapulumuswa.” (Mat. 24:13) Pikiro ineyi isapangiza kuti tisafunika kupitiriza kukhala akukhulupirika mwakukhonda tsalakana nyatwa zinathimbana na ife. Tingapirira nyatwa lero, tinapitiriza kukhala akuwanga mbatikhonda kubwerera nduli nyatwa ikulu ingatoma.
16. Ninji pinapangiza kuti ndife acipapo, pontho tinawangisa tani cipapo cathu lero?
16 Cipapo: Nsonkhano wa gawo wa caka 2018 ukhali na nsolo wakuti “Khalani Acipapo!” Nsonkhano unoyu watikumbusa kuti toera kukhala acipapo nee pisanyindira maluso athu. Nakuti tisanyindira Yahova toera kupirira, toera kukhala na cipapo candimomwene tisafunikambo kunyindira Yahova. Tinawangisa tani cinyindiro cathu kwa iye? Tinacita pyenepi tingaleri Bhibhlya ntsiku zonsene mbatinyerezera mwadidi kuti Yahova apulumusa tani atumiki ace a ndzidzi wakale. (Masal. 68:20; 2 Ped. 2:9) Atsogoleri a dziko angayesera kutifudza nkati mwa nyatwa ikulu, tinadzafunika kukhala acipapo mbatinyindira kakamwe Yahova kupiringana kale. (Masal. 112:7, 8; Aheb. 13:6) Tinganyindira Yahova cincino, tinadzakhala na cipapo cinafuna ife toera kupirira tingapomokerwa na Goge. *
DIKHIRANI CIPULUMUSO CANU
Mwakukhonda dembuka, Yezu pabodzi na anyankhondo ace akudzulu anadzakwira pa makavalo mbamenya nkhondo ya Armajedhoni toera kufudza anyamalwa a Mulungu! (Onani ndima 17)
17. Thangwi yanji nee tisafunika kugopa Armajedhoni? (Onani foto iri pa tsamba yakutoma.)
17 Ninga pidafokotozwa mu nsolo udamala, azinji a ife tikukhala mu ntsiku zakumalisa kutomera padabalwa ife. Mbwenye tisadikhirambo kupulumuka pa nyatwa ikulu. Armajedhoni inadzakhala nkhondo yakumalisa toera kufudza makhaliro ano a dziko. Mbwenye ife nkhabe funika kugopa. Thangwi yanji? Thangwi ndi nkhondo ya Mulungu. (Mis. 1:33; Ezek. 38:18-20; Zak. 14:3) Yahova angapereka citsogolero, Yezu Kristu anadzatsogolera anyankhondo a Mulungu pa nkhondo. Iye anadzamenya nkhondo ineyi pabodzi na Akristu akudzodzwa adalamuswa muli akufa, kuphatanizambo pikwi na pikwi pya aanju. Onsene anadzamenyana na Sathani, madimonyo ace na anyankhondo awo pa dziko yapantsi.—Dan. 12:1; Apok. 6:2; 17:14.
18. (a) Ndi cinyindiro cipi cinatipasa Yahova? (b) Ndi munjira ipi lemba ya Apokalipse 7:9, 13-17 isakupasani cinyindiro ca pinthu pinafuna kucitika ntsogolo?
18 Yahova asatipasa cinyindiro ici: ‘Nkhabepo cida cidacitwa toera kukulasani cakuti cinapembera.’ (Iza. 54:17) “Mwinji ukulu” wa alambiri akukhulupirika a Yahova ‘anabuluka mu nyatwa ikulu’ na umaso! Buluka penepo, iwo anadzapitiriza kuntumikira! (Lerini Apokalipse 7:9, 13-17.) Ndi pyakutsandzayisa kakamwe kudziwa kuti Bhibhlya isatipasa cinyindiro ca pinthu pinafuna kucitika ntsogolo! Ife tisadziwa kuti ‘Yahova anatsidzikiza atumiki ace akukhulupirika.’ (Masal. 31:23) Onsene anafuna Yahova na kunsimba anadzatsandzaya kakamwe angaona Yahova mbacenesa dzinace.—Ezek. 38:23.
19. Ndi cidikhiro cipi cakutsandzayisa ciri na ife ntsogolo?
19 Nyerezerani kuti mafala a 2 Timoti 3:2-5 mbadakhala tani khala akulonga pya dziko ipswa mu ndzidzi wakuti anthu nee mbadakhuyiwabve na makhaliro a dziko ya Sathani. (Onani bokosi yakuti “ Makhaliro Anafuna Kudzapangiza Anthu.”) M’bale George Gangas, * adatumikira ninga m’bodzi wa Mathubo Akutonga alonga tenepa: “Dziko ino mbidakhala yadidi kakamwe mbidakhala basi ene na abale peno alongo! Thimize pano munakhala na mwai wakukhala mu dziko ipswa. Munadzakhalambo na umaso wakukhonda mala ninga Yahova. Ife tinadzakhala maso kwenda na kwenda.” Ceneci ndi cidikhiro cakutsandzayisa kakamwe!
NYIMBO 122 Tikhale Dzololo, Mbatileka Kufewa!
^ ndima 5 Ife tisadziwa kuti mwakukhonda dembuka anthu onsene anathimbana na “nyatwa ikulu.” Ninji pinafuna kudzacitikira atumiki a Yahova mu ndzidzi unoyu? Kodi Yahova asadikhira kuti tidzacitenji? Ndi makhaliro api akuti tisafunika kukhala nawo cincino toera tipitirize kukhala akukhulupirika pa nyatwa ikulu? Tinatawira mibvundzo ineyi mu nsolo uno.
^ ndima 11 MABVEKERO A MAFALA ANANGO: Fala yakuti Goge wa Magoge (yakuti mwacigwagwa ndi Goge) isabveka kuphatana kwa madzindza akuti anadzapomokera atumiki a Mulungu nkati mwa nyatwa ikulu.
^ ndima 11 Toera kugumana mphangwa zakuthimizirika thangwi ya pinthu pinafuna kucitika nkhondo ya Armajedhoni mbidzati kutoma, onani nsolo 21 wa bukhu yakuti Umambo wa Mulungu Ukutonga! Toera kugumana mphangwa zakuthimizirika thangwi yakupomokera kwa Goge wa Magoge, pontho kuti Yahova anatsidzikiza tani mbumba yace nkati mwa nkhondo ya Armajedhoni, onani nsolo 17 na 18 wa bukhu yakuti A Adoração Pura de Jeová É Restaurada!
^ ndima 16 Nsolo wa nsonkhano wa gawo wa caka 2019 wakuti “Ufuni Nkhabe Kumala!” watipasa cinyindiro cakuti tinakwanisa kupitiriza kukhala akutsidzikizika mu ufuni wa Yahova.—1 Akor. 13:8.
^ ndima 19 Onani nsolo wakuti “Suas obras o seguirão” mu A Sentinela ya 1 de Dezembro de 1994.
^ ndima 64 MAFOTO PA TSAMBA: Nkati mwa nyatwa ikulu, nsoka ung’ono wa Mboni za Yahova ukupangiza cipapo mukucita misonkhano ya mpingo munsitu.
^ ndima 66 MAFOTO PA TSAMBA: Mwinji ukulu wa alambiri akukhulupirika a Yahova anadzapulumuka pa nyatwa ikulu, pontho mwakutsandzaya!
