NSOLO WA PFUNDZIRO 41
Munaphedza Tani Anyakupfundza a Bhibhlya Toera Athambaruke Mpaka Kubatizwa?—Khundu Yakutoma
“Pisaoneka pakweca kuti imwe ndimwe tsamba ya Kristu idalembwa na ife ninga atumiki a Mulungu.”—2 AKOR. 3:3.
NYIMBO 78 ‘Kupfundzisa Anthu Mafala a Mulungu’
PINAFUNA IFE KUPFUNDZA *
1. Lemba ya 2 Akorinto 3:1-3, isatiphedza tani toera kupereka takhuta kuna Yahova thangwi ya mwai uli na ife wakupfundzisa munthu Bhibhlya mbabatizwa? (Onani foto iri patsamba yakutoma.)
MUSABVA tani mungaona nyakupfundza Bhibhlya wa mu mpingo mwanu mbabatizwa? Mwakukhonda penula, ndi pyakutsandzayisa kakamwe nyakupfundza Bhibhlya angabatizwa. (Mat. 28:19) Pontho khala munthu unoyu adabatizwa ndi nyakupfundza wanu wa Bhibhlya, imwe musakomerwa kakamwe. (1 Ates. 2:19, 20) Anyakupfundza anewa apswa ndi “matsamba analonga mwadidi” tayu basi thangwi ya ale adaapfundzisa, mbwenye kuna mpingo onsene.—Lerini 2 Akorinto 3:1-3.
2. (a) Ndi mbvundzo upi wakufunika kakamwe wakuti tisafunika kuunyerezera, pontho thangwi yanji? (b) Kodi pfundziro ya Bhibhlya ninji? (Onani cidzindikiro capantsi.)
2 Ndi pyakutsandzayisa kakamwe kuona kuti pyaka pinai nduli Mboni za Yahova pa dziko yonsene yapantsi zacitisa mapfundziro a Bhibhlya * cifupi na 10.000.000 miyezi yonsene. Pontho mu pyaka pyenepi, anthu akupiringana 280.000 akhabatizwa pa caka mbakhala anyakupfundza a Yezu Kristu. Mphapo lero tinakwanisa tani kuphedza anyakupfundza Bhibhlya azinji toera abatizwe? Yahova asapitiriza kupasa anthu mwai toera akhale atumiki ace. Natenepa tisafunika kucita pyonsene pinakwanisa ife toera kuphedza anthu anewa kuti abatizwe mwakucimbiza, thangwi ndzidzi uli kumala.—1 Akor. 7:29a; 1 Ped. 4:7.
3. Tinapfundzanji mu nsolo uno?
3 Nakuti ndi pyakufunika kakamwe toera kucita anyakupfundza cincino, Mathubo Akutonga aphemba maofesi a filiali toera kudziwa kuti ninji pinafunika kucitwa toera kuphedza anyakupfundza Bhibhlya kuti athambaruke mpaka kubatizwa. Mu nsolo uno na unatowera, tinaona kuti tinapfundzanji kubulukira mu pitsandzo pya apainiya, amisiyonariyo na ayang’aniri a cisa akuti asatumikira Yahova mu pyaka pizinji. * (Mis. 11:14; 15:22) Misolo ineyi inafokotoza kuti amwazi mphangwa pabodzi na anyakupfundza awo a Bhibhlya asafunika kucitanji toera pfundziro ya Bhibhlya ikhale yakuphindulisa kakamwe. Mu nsolo uno, tinapfundza pinthu pixanu pyakuti anyakupfundza Bhibhlya asafunika kupicita toera athambaruke mpaka kubatizwa.
PFUNDZANI MASUMANA ONSENE
4. Tisafunika kukumbukanji thangwi yakucitisa pfundziro ya Bhibhlya dalimira pa nsuwo wa mwanaciro nyumba?
4 Abale na alongo athu azinji asacitisa mapfundziro a Bhibhlya adalimira pa nsuwo wa mwanaciro nyumba. Maseze njira ineyi ndi yadidi toera kutomesa pfundziro ya Bhibhlya, mbwenye kazinji kene pfundziro ineyi isacitwa mwakucimbiza, pontho nee isacitwa masumana onsene. Toera kukulisa cifuno ca munthu unoyu, abale na alongo anango asaphemba numero yace ya telefoni toera midzidzi inango akwanise kuntumizira mphangwa za m’Bhibhlya. Panango iwo anacedza miyezi mizinji mukuphatisira njira ineyi toera kukulisa cifuno ca kupfundza Bhibhlya. Mphapo ndiye tani khala nyakupfundza Bhibhlya nee asawangisira toera kupfundza, kodi iye anathambaruka mbabatizwa? Nkhabe.
5. Ndi pinthu pipi pidalonga Yezu pa Luka 14:27-33 pyakuti tinakwanisa kupiphatisira toera kuphedza anyakupfundza athu a Bhibhlya?
5 Ulendo unango, Yezu aphatisira citsandzo toera kupangiza pinthu pyakuti munthu asafunika kupicita toera akhale nyakupfundza wace. Iye alonga citsandzo ca munthu wakuti asafuna kumanga nyumba na citsandzo ca mambo wakuti asafuna kuenda kunkhondo. Iye alonga munthu angafuna kumanga nyumba ‘pakutoma asakhala pantsi toera kuona khala kobiri yace inakwana,’ pontho mambo mbadzati kuenda kunkhondo pakutoma ‘asakhala pantsi na andzace mbacedza’ toera kuona khala ali wakukhunganyika toera kumenya nkhondo. (Lerini Luka 14:27-33.) Yezu akhadziwa kuti pyenepi pisacitikambo kuna munthu anafuna kukhala nyakupfundza wace. Natenepa munthu onsene anafuna kukhala nyakupfundza wa Yezu, pakutoma asafunika kunyerezera mwadidi kuti pisabvekanji kukhala nyakupfundza wa Yezu. Na thangwi ineyi, ife tisafunika kukulumiza anyakupfundza athu a Bhibhlya toera tipfundze nawo masumana onsene. Tinacita tani pyenepi?
6. Tisafunika kuyesera kucitanji toera nyakupfundza wathu wa Bhibhlya athambaruke?
6 Pakutoma musafunika kuthimizira ndzidzi unapfundza imwe na mwanaciro nyumba dalimira pa nsuwo pace. Panango imwe munakwanisa kuleri naye mavesi mazinji m’Bhibhlya mu ndzidzi unacedza imwe panyumba pace. Mwanaciro nyumba angadzolowera kucedza na imwe, mphembeni khala pinakwanisika kukhala pantsi toera mupitirize kucedza. Njira inafuna kutawira mwanaciro nyumba inapangiza khala iye asafuna kupfundza Bhibhlya peno nkhabe. Toera kumphedza kuti athambaruke mwakucimbiza, imwe musafunika kumphemba khala pinakwanisa kupfundza kawiri pa sumana. Kusiyapo pyenepi, imwe musafunika kucita pizinji kupiringana kupfundza kabodzi peno kawiri pa sumana.
KHUNGANYIKANI MBAMUDZATI KUCITISA PFUNDZIRO
7. M’mwazi mphangwa anakhunganyika tani nsolo unafuna iye kucitisa pfundziro ya Bhibhlya?
7 Ninga m’mwazi mphangwa, imwe musafunika kukhunganyika mwadidi nsolo unafuna imwe kupfundzisa nyakupfundza wanu. Pakukhunganyika, imwe musafunika kuleri ndima zonsene na malemba anagumanika mu ndima zenezi. Kumbukani ntsonga zakufunika ninga nsolo wa pfundziro, misolo ming’ono-ming’ono, mibvundzo, malemba anafuna kuleri imwe, mafoto na mavidhyu akuti panango munaapangiza toera kufokotoza nsolo unoyu. Buluka penepo nyerezerani thangwi ya nyakupfundza wanu, pontho nyerezerani kuti munafokotoza tani mphangwa zenezi kuna iye toera abvesese mwakukhonda nentsa na kuziphatisira.—Neh. 8:8; Mis. 15:28a.
8. Mafala anagumanika pa Akolose 1:9, 10 asapangiza tani kufunika kwa kucita phembero thangwi ya anyakupfundza athu a Bhibhlya?
8 Cinthu cinango cinafuna kucita imwe pa kukhunganyika ndi kucita phembero thangwi ya nyakupfundza wanu. Phembani Yahova kuti akuphedzeni toera mukwanise kupfundzisa mukuphatisira Bhibhlya, pontho toera mukwanise kukhuya ntima wa nyakupfundza wanu. (Lerini Akolose 1:9, 10.) Yeserani kunyerezera mwanyapantsi ntsonga zakuti panango nyakupfundza wanu ananentseka toera kuzibvesesa peno kuzitawira. Kumbukani kuti cifuno canu ndi kumphedza toera athambaruke mbabatizwa.
9. Kodi m’mwazi mphangwa anaphedza tani nyakupfundza wace toera akhunganyike mwadidi pfundziro? Fokotozani.
9 Cifuno cathu pakucitisa pfundziro ya Bhibhlya mwakukhonda phonya ndi toera kuphedza nyakupfundza toera apereke takhuta thangwi ya pinthu pyonsene pinacita Yahova na Yezu kuna iye, pontho toera akhale na cifuno ca kupfundza pizinji. (Mat. 5:3, 6) Toera nyakupfundza Bhibhlya akwanise kuphindula mwadidi, iye asafunika kubvesera mwadidi pinapfundza iye. Kusiyapo pyenepi, m’mwazi mphangwa asafunika kumpanga toera akhunganyike mwanyapantsi nsolo unafuna kupfundza iye, pontho toera anyerezere kuti anaphatisira tani pinthu pyenepi mu umaso wace. Kodi m’mwazi mphangwa anaphedza tani anyakupfundza ace toera adziwe mwadidi kukhunganyika? Khunganyikani nsolo ubodzi pabodzi na nyakupfundza wanu toera adziwe kuti pisacitwa tani. * Mpangizeni kuti anagumana tani ntawiro, pontho angaugumana asafunika alembe nthemba basi ene pa ntawiro toera kumphedza kukumbuka ntawiro unoyu. Buluka penepo mphembeni toera atawire mukuphatisira mafalace, tayu kuleri ntawiro. Angacita pyenepi, imwe munakwanisa kuona kuti nyakupfundza wanu ali kubvesesa mwadidi pinapfundza iye. Mbwenye pana pinthu pinango pyakuti imwe musafunika kuphedza nyakupfundza wanu toera apicite.
PFUNDZISANI NYAKUPFUNDZA WANU TOERA ALONGE NA YAHOVA NTSIKU ZONSENE
10. Thangwi yanji nyakupfundza Bhibhlya asafunika kuleri Bhibhlya ntsiku zonsene, pontho asafunika kucitanji toera kuphindula mwakukwana na pinthu pinaleri iye m’Bhibhlya?
10 Kusiyapo kupfundza Bhibhlya masumana onsene na mpfundzisi wace, nyakupfundza asafunikambo kulonga na Yahova ntsiku zonsene. Anacita tani pyenepi? Cakutoma iye anakwanisa kubvesera Yahova mukuleri Bhibhlya ntsiku zonsene. (Yos. 1:8; Masal. 1:1-3) Mpangizeni kuti anaphatisira tani “Ndandanda Yakuleri Bhibhlya” inagumanika mu jw.org. * Toera nyakupfundza wanu aphindule mwakukwana na pinthu pinaleri iye m’Bhibhlya, mpangeni kuti asafunika kunyerezera mwadidi pinaleri iye m’Bhibhlya thangwi ya Yahova, pontho anyerezere kuti anapiphatisira tani mu umaso wace.—Mabasa 17:11; Tiya. 1:25.
11. Tinaphedza tani nyakupfundza wathu wa Bhibhlya toera acite phembero munjira yadidi, pontho thangwi yanji ndi pyakufunika kuna iye kucita phembero ntsiku zonsene?
11 Pfundzisani nyakupfundza wanu toera alonge na Yahova mukucita phembero ntsiku zonsene. Mbamudzati kucitisa pfundziro na mungamala kucitisa pfundziro musafunika kucita phembero, pontho mu ndzidzi unacita imwe phembero musafunikambo kulonga thangwi ya nyakupfundza wanu. Nyakupfundza wanu angabvesera maphembero anacita imwe, pinamphedza toera kucitambo phembero na ntima onsene kuna Yahova Mulungu kubulukira mu dzina ya Yezu Kristu. (Mat. 6:9; Juwau 15:16) Mwakukhonda penula, nyakupfundza wanu anakhala na uxamwali wakuwanga kakamwe na Mulungu, angabvesera Yahova mukuleri Bhibhlya ntsiku zonsene na kulonga na Yahova mukucita phembero. (Tiya. 4:8) Nyakupfundza wanu angacita pyenepi ntsiku zonsene, pinamphedza toera aperekeke kuna Yahova mbabatizwa. Ndi cinthu cipi cinango cakuti nyakupfundza wanu asafunika kucicita?
PHEDZANI NYAKUPFUNDZA WANU TOERA AKHALE NA UXAMWALI WAKUWANGA NA YAHOVA
12. Munaphedza tani nyakupfundza wanu toera akhale na uxamwali wakuwanga na Yahova?
12 Pinthu pya m’Bhibhlya pinapfundzisa imwe nyakupfundza wanu nee pisafunika basi ene kukhala m’manyerezero mwace, mbwenye pisafunikambo kukhuya ntima wace. Thangwi yanji? Thangwi pinthu pyenepi pingakhuya ntima wace, pinamphedza toera kucita macinjo mu umaso wace. Yezu akhapfundzisa anthu pinthu pizinji, pontho anthu anewa akhakomerwa kakamwe na pinthu pikhapfundzisa iye. Mbwenye anthu akhatowera Yezu thangwi pinthu pikhapfundzisa iye pikhakhuyambo mitima yawo. (Luka 24:15, 27, 32) Nyakupfundza wanu asafunika kuona Yahova ninga munthu wandimomwene, wakuti anakwanisa kucita naye uxamwali, pontho asafunika kumuona ninga Babace na Mulungu wace. (Masal. 25:4, 5) Mu ndzidzi unacitisa imwe pfundziro ya Bhibhlya, phedzani nyakupfundza wanu toera akwanise kuona makhaliro adidi a Mulungu wathu. (Eks. 34:5, 6; 1 Ped. 5:6, 7) Mwakukhonda tsalakana nsolo unapfundza imwe, gomezerani makhaliro anewa a Yahova kuna nyakupfundza wanu. Phedzani nyakupfundza wanu toera akwanise kuona kuti Yahova ndi waufuni, wakukoma ntima na wantsisi. Yezu alonga kuti “matongero makulu kakamwe na akutoma” ndi “funa Yahova Mulungu wako.” (Mat. 22:37, 38) Natenepa phedzani nyakupfundza wanu toera akulise ufuni wace kuna Yahova.
13. Munaphedza tani nyakupfundza wanu wa Bhibhlya toera adziwe makhaliro a Yahova?
13 Mu ndzidzi unacedza imwe na nyakupfundza wanu, longani mathangwi anakucitisani toera kufuna Yahova. Pyenepi pinakwanisa kuphedza nyakupfundza wanu toera kudzindikira kuti asafunikambo kukhala na uxamwali wakuwanga na Mulungu. (Masal. 73:28) Mwacitsandzo, kodi pa ndima ineyi peno pa lemba ineyi mwakwanisa kuona mafala mangasi anapangiza ufuni wa Yahova, udziwisi wace, ulungami peno mphambvu zace pyakuti pisakhuya ntima wanu? Longani kuna nyakupfundza wanu kuti thangwi ibodzi inakucitisani kufuna Yahova ndi yakuti iye asapangiza makhaliro anewa. Mbwenye pana cinthu cinango cakuti anyakupfundza onsene a Bhibhlya asafunika kucicita toera athambaruke mbabatizwa.
PHEDZANI NYAKUPFUNDZA WANU TOERA AGUMANIKE PA MISONKHANO YA MPINGO
14. Mwakubverana na Ahebheri 10:24, 25, misonkhano ya mpingo inaphedza tani nyakupfundza Bhibhlya toera athambaruke?
14 Tonsene tisafuna kuti anyakupfundza athu athambaruke mbabatizwa. Njira ibodzi toera kuaphedza Masal. 111:1) Abale na alongo anango asapanga anyakupfundza awo kuti anakwanisa kupfundza pinthu pizinji angagumanika pa misonkhano ya mpingo. Lerini Ahebheri 10:24, 25 pabodzi na nyakupfundza wanu, pontho mpangeni nkhombo zinafuna kukhala na iye angagumanika pa misonkhano ya mpingo. Mpangizeni vidhyu ya nsolo wakuti Ninji Pinacitwa pa Nyumba ya Umambo? * Pontho phedzani nyakupfundza wanu toera akhonde kudjomba misonkhano.
kuti athambaruke ndi kuapanga toera agumanike pa misonkhano yathu. Abale na alongo akuti asacitisa mapfundziro a Bhibhlya mu ndzidzi uzinji alonga kuti anyakupfundza anagumanika pa misonkhano asathambaruka mwakucimbiza. (15. Tisafunika kucitanji toera kuphedza anyakupfundza Bhibhlya toera agumanike pa misonkhano masumana onsene?
15 Musafunika kucitanji khala nyakupfundza wanu adzati kugumanika pa misonkhano peno khala asadjomba? Mpangeni mwakutsandzaya pinthu pidapfundza imwe pa misonkhano. Kucita pyenepi kunaphedza kakamwe nyakupfundza wanu, m’mbuto mwakumpanga basi ene toera agumanike pa misonkhano. Mpaseni Ncenjezi peno Umaso Wathu Wacikristu na Utumiki unapfundza imwe mwezi unoyu pa misonkhano. Mpangizeni pinthu pinafuna kupfundza imwe pa nsonkhano unatowera, pontho mbvundzeni kuti ndi pinthu pipi pidakomerwa na iye. Dziwani kuti nyakupfundza wanu angagumanika pa misonkhano paulendo wakutoma iye anakomerwa kakamwe kupiringana magereja anango adaenda iye. (1 Akor. 14:24, 25) Iye anakwanisa kudziwana na anthu anango a makhaliro adidi akuti anakwanisa kumphedza toera athambaruke mbabatizwa.
16. Tisafunika kucitanji toera kuphedza anyakupfundza Bhibhlya toera athambaruke mpaka kubatizwa, pontho tinapfundzanji mu nsolo unatowera?
16 Tinaphedza tani anyakupfundza Bhibhlya toera athambaruke mpaka kubatizwa? Ife tinakwanisa kuphedza anyakupfundza athu mukuapanga kuti tisafunika kupfundza masumana onsene na kukhunganyika misolo inafuna ife kupfundza. Ife tisafunikambo kupanga nyakupfundza wathu Bhibhlya toera alonge na Yahova ntsiku zonsene, pontho toera akhale na uxamwali wakuwanga na Iye. Kusiyapo pyenepi, ife tisafunika kuphedza anyakupfundza athu a Bhibhlya toera agumanike pa misonkhano ya mpingo. (Onani bokosi iri pa tsamba 12, ya nsolo wakuti “ Anyakupfundza Bhibhlya Asafunika Kucitanji Toera Athambaruke Mpaka Kubatizwa?”) Mu nsolo unatowera tinapfundza pinthu pixanu pyakuti abale na alongo asafunika kupicita toera aphedze anyakupfundza Bhibhlya kuti abatizwe.
NYIMBO 76 Musapibva Tani?
^ ndima 5 Kupfundzisa Munthu pisabveka kumphedza toera acinje makhaliro ace. Lemba yathu ya caka ca 2020, inagumanika pa Mateu 28:19 isatikulumiza kupfundzisa anthu Bhibhlya toera abatizwe mbakhala anyakupfundza a Yezu Kristu. Mu nsolo uno na unatowera tinaona kuti tinacita tani mwadidi basa ineyi yakufunika kakamwe.
^ ndima 2 MABVEKERO A MAFALA ANANGO: Khala imwe kazinji kene musacedza na munthu mukuphatisira Bhibhlya, pyenepi pisabveka kuti imwe mukucitisa pfundziro ya Bhibhlya. Mbwenye munakwanisa kulengesa munthu unoyu ninga pfundziro yanu basi ene mungampangiza kuti pfundziro ya Bhibhlya isacitwa tani, mbamupfundza naye kawiri, pontho mungakhala na cinyindiro cakuti iye anapitiriza kupfundza Bhibhlya.
^ ndima 3 Misolo ineyi miwiri isaphatanizambo maonero anagumanika m’misolo yakuti “Como Dirigir Estudos Bíblicos Progressivos” yakuti isagumanika mu Nosso Ministério do Reino kutomera mwezi wa Julho 2004 mpaka mwezi wa Maio 2005.
^ ndima 9 Onani vidhyu ya mphindi zinai ya nsolo wakuti, Kupfundzisa Anyakupfundza Athu Toera Akhunganyike. Mu JW Library®, pitani pa AUDIO E VIDEO > AS NOSSAS REUNIÕES E OBRA DE PREGAÇÃO > COMO SER UM PUBLICADOR MELHOR.
^ ndima 10 Pitani mu jw.org pa PIPFUNDZISO PYA M’BHIBHLYA > PINTHU PINAPHATISIRWA PAKUPFUNDZA BHIBHLYA.
^ ndima 14 Pitani mu JW Library®, pa AUDIO E VIDEO > AS NOSSAS REUNIÕES E OBRA DE PREGAÇÃO > AJUDAS PARA A PREGAÇÃO.