NSOLO WA PFUNDZIRO 42
Munaphedza Tani Anyakupfundza a Bhibhlya toera Athambaruke Mpaka Kubatizwa?—Khundu Yaciwiri
“Ndzidzi onsene cita mphole-mphole thangwi ya iwe, pontho thangwi ya cipfundziso cinapereka iwe.”—1 TIM. 4:16.
NYIMBO 77 Ceza mu Dziko Yacidima
PINAFUNA IFE KUPFUNDZA *
1. Tisadziwa tani kuti basa yakucita anyakupfundza ndi yakupulumusa umaso?
BASA yakucita anyakupfundza ndi yakupulumusa umaso. Tisadziwa tani pyenepi? Pa lemba ya Mateu 28:19, 20, Yezu apereka ntemo unalonga kuti: ‘Ndokoni mukacite anyakupfundza mbamuabatiza.’ Thangwi yanji ubatizo ndi wakufunika? Thangwi anthu onsene anafuna kupulumuka asafunika kubatizwa. Mbwenye munthu onsene anafuna kubatizwa asafunika kukhulupira kuti Yezu afera ife, pontho alamuswa muli akufa. Na thangwi ineyi mpostolo Pedhru apanga Akristu andzace kuti: ‘Ubatizo usakupulumusani cincino kubulukira mu kulamuswa kwa Yezu Kristu muli akufa.’ (1 Ped. 3:21) Natenepa, munthu angabatizwa iye anakwanisa kukhala na cidikhiro ca umaso wakwenda na kwenda.
2. Mwakubverana na 2 Timoti 4:1, 2, tisafunika kucitanji toera tikhale apfundzisi adidi?
2 Toera tikwanise kucita anyakupfundza tisafunika kuthimizira “luso yakupfundzisa.” (Lerini 2 Timoti 4:1, 2.) Thangwi yanji? Thangwi Yezu alonga: ‘Ndokoni mukacite anyakupfundza, pontho apfundziseni.’ Pontho mpostolo Paulu alonga kuti: ‘Pitiriza kucita basa ineyi, thangwi ungacita pyenepi unadzapulumusa umaso wako na wa ale anakubvesera.’ Ndi thangwi yace iye alonga kuti: ‘Cita mphole-mphole thangwi yacipfundziso cinapereka iwe.’ (1 Tim. 4:16) Nakuti ife tapaswa basa yakucita anyakupfundza, tisafunika kucita pyonsene pinakwanisa ife toera kupfundzisa anthu Bhibhlya.
3. Tinapfundzanji mu nsolo uno?
3 Ife tisapfundzisa Bhibhlya anthu azinji kakamwe pa dziko yonsene yapantsi. Ninga pidalongwa mu nsolo udamala, ife tisafuna kudziwa kuti tinakwanisa tani kuphedza anthu anewa toera abatizwe mbakhala anyakupfundza a Yezu Kristu. Mu nsolo uno, tinapfundza pinthu pinango pixanu pyakuti amwazi mphangwa asafunika kupicita toera kuphedza anyakupfundza awo a Bhibhlya kuti athambaruke mpaka kubatizwa.
PHATISIRANI BHIBHLYA PAKUPFUNDZISA
Phembani m’mwazi mphangwa wakuti ali na maluso akucitisa pfundziro ya Bhibhlya toera akuphedzeni kuthimizira maluso anu akuphatisira Bhibhlya pakupfundzisa (Onani ndima 4-6) *
4. Thangwi yanji nee tisafunika kulonga pinthu pizinji kakamwe mu ndzidzi unacitisa ife pfundziro ya Bhibhlya? (Onani cidzindikiro capantsi.)
4 Ife tisakomerwa kakamwe tingapfundzisa anango mukuphatisira Bhibhlya. Natenepa panango tinalonga pinthu pizinji kakamwe mu ndzidzi unapfundzisa ife Bhibhlya. Mbwenye ale anatsogolera Pfundziro ya Ncenjezi, Pfundziro ya Bhibhlya ya Mpingo, peno kucitisa pfundziro ya Bhibhlya nee asafunika kulonga pinthu pizinji kakamwe. Toera tikwanise kupfundzisa mukuphatisira Bhibhlya, ife tisafunika kucalira kufokotoza pinthu pyonsene pinadziwa ife thangwi ya Bhibhlya. * (Juwau 16:12) Nyerezerani cidziwiso ca Bhibhlya cikhali na imwe mu ndzidzi udabatizwa imwe na cidziwiso ciri na imwe cincino. Mwakukhonda penula, imwe mukhali na cidziwiso cakucepa kakamwe mu ndzidzi unoyu. (Aheb. 6:1) Pontho musafunika kudziwa kuti papita pyaka pizinji toera mukhale na cidziwiso ca Bhibhlya ciri na imwe cincino, natenepa lekani kupfundzisa nyakupfundza wanu pinthu pyonsene pinadziwa imwe mu ndzidzi ubodzi ene.
5. (a) Mwakubverana na 1 Atesalonika 2:13, tinaphedza tani nyakupfundza wathu toera abvesese pinapfundza iye? (b) Tinaphedza tani nyakupfundza wathu toera alonge pinthu pinapfundza iye?
5 Ife tisafuna kuphedza anyakupfundza athu toera adziwe kuti pinthu pinapfundza iwo pisabulukira m’Bhibhlya. (Lerini 1 Atesalonika 2:13.) Tinacita tani pyenepi? Pangani nyakupfundza wanu toera alonge pinthu pinapfundza iye. M’mbuto mwakufokotoza mwekha mavesi onsene a m’Bhibhlya, phembani nyakupfundza wanu toera afokotozembo mavesi anango. Phedzani nyakupfundza wanu toera aone kuti anaphatisira tani Mafala a Mulungu mu umaso wace. Nciteni mibvundzo yakuti inamphedza toera kufokotoza manyerezero ace na mabvero ace thangwi ya malemba adaleri iye. (Luka 10:25-28) Mwacitsandzo, nciteni mibvundzo iyi: “Pa lemba ineyi mwakwanisa kuona ubodzi mwa makhaliro a Yahova?” “Pinthu pidapfundza imwe m’Bhibhlya pinakuphedzani tani?” “Ndi mabvero api ali na imwe thangwi ya pinthu pidapfundza imwe?” (Mis. 20:5) Cinthu cakufunika kakamwe kuna nyakupfundza ndi kudziwa kuti anaphatisira tani pinthu pidapfundza iye, tayu basi kudziwa pizinji.
6. Thangwi yanji ndi pyakufunika kuenda pabodzi kacitisa pfundziro ya Bhibhlya na m’mwazi mphangwa unango wakuti ali na maluso akucitisa pfundziro ya Bhibhlya?
6 Mungaenda kacitisa pfundziro ya Bhibhlya, kodi musaendambo pabodzi na amwazi mphangwa anango akuti ali na maluso akucitisa pfundziro ya Bhibhlya? Mungaenda nawo, aphembeni toera alonge maonero awo thangwi ya njira idacitisa imwe pfundziro ya Bhibhlya, pontho aphembeni toera alonge maonero awo thangwi ya njira idaphatisira imwe Bhibhlya. Dziwani kuti toera mukhale mpfundzisi wadidi musafunika kukhala wakucepeseka. (Landanisani na Mabasa 18:24-26.) Buluka penepo, bvundzani m’mwazi mphangwa wa maluso toera alonge maonero ace khala nyakupfundza abvesesa pidapfundza iye. Imwe munakwanisambo kuphemba m’mwazi mphangwa unoyu toera acitise pfundziro yanu khala imwe mwabulukapo sumana ibodzi peno mazinji. Pyenepi pinaphedza toera pfundziro ya Bhibhlya ipitirize, pontho pinaphedza nyakupfundza wa Bhibhlya toera aone kuti pfundziro ya Bhibhlya ndi yakufunika kakamwe. Lekani kukhala na manyerezero akuti nyakupfundza unoyu ndi wanga, pontho nkhabe funika kupasa munthu unango toera ancitise pfundziro. Mbwenye musafunika kucita pyonsene pinakwanisa imwe toera nyakupfundza wanu apitirize kupfundza Bhibhlya mbathambaruka.
PANGIZANI KUTI MUSAKOMERWA NA PINAPFUNDZISA IMWE, PONTHO MUSAPIKHULUPIRA
Pangani nyakupfundza wanu pinthu pidacitika na abale anango pyakuti pinamphedza toera kuphatisira pinthu pinapfundza iye (Onani ndima 7-9) *
7. Ninji pinafuna kuphedza nyakupfundza wa Bhibhlya toera kukomerwa na pinthu pinapfundza iye?
7 Nyakupfundza wanu asafunika kuona kuti imwe musakomerwa na undimomwene unapfundzisa imwe, pontho musaukhulupira. (1 Ates. 1:5) Pyenepi pinamphedza toera akomerwembo na pinthu pinapfundza iye. Khala ndi pyakuthema, mpangeni kuti midida ya Bhibhlya isakuphedzani tani mu umaso wanu. Pyenepi pinamphedza toera kuona kuti m’Bhibhlya muli na pitsogolero pyakuti pinakwanisambo kumphedza.
8. Ndi pinthu pipi pinango pisafunika imwe kucita toera kuphedza nyakupfundza wanu wa Bhibhlya, pontho munacita tani pyenepi?
8 Mu ndzidzi unacitisa imwe pfundziro ya Bhibhlya, pangani nyakupfundza wanu nyatwa zidathimbana na abale na alongo anango zakuti ndi zakulandana na zace, pontho mpangeni kuti iwo azikunda tani. Imwe munakwanisa kuenda kacitisa pfundziro yanu pabodzi na m’bale peno mulongo wa mu mpingo mwanu wakuti athimbanambo na nyatwa zakulandana na zace. Peno imwe munakwanisa kuona naye pabodzi misolo yakuwangisa kakamwe inagumanika mu jw.org, pakhundu yakuti “Bhibhlya Isacinja Umaso wa Anthu.” * Misolo ineyi na mavidhyu anagumanika mwenemo pinaphedza nyakupfundza wanu toera kuona kuti ndi pyakufunika kakamwe kuphatisira midida ya Bhibhlya mu umaso wace.
9. Munaphedza tani nyakupfundza wanu wa Bhibhlya toera alonge pinapfundza iye kuna acibale ace na axamwali ace?
9 Khala munthu anapfundza na imwe Bhibhlya ndi wakumanga banja, kodi mamunace peno nkazace ali kupfundzambo Bhibhlya? Khala nee asapfundza Bhibhlya, mphembeni toera abveserembo mu ndzidzi unapfundza imwe na ndzace wa m’banja. Pontho mphembeni toera apangembo acibale ace na axamwali ace pinthu pinapfundza iye. (Juwau 1:40-45) Munacita tani pyenepi? Munakwanisa kuphatisira mibvundzo ninga iyi: “Munafokotoza tani pyenepi kuna acibale anu?” peno “Ndi lemba ipi yakuti munakwanisa kuiphatisira toera kupangiza undimomwene unoyu kuna xamwali wanu?” Munjira ineyi, imwe munakwanisa kupfundzisa nyakupfundza wanu toera akwanise kupfundzisa anthu Bhibhlya. Angathambaruka, iye anakwanisa kumwaza mphangwa pabodzi na abale na alongo ninga m’mwazi mphangwa wakukhonda batizwa. Imwe munakwanisa kubvundza nyakupfundza wanu khala iye asadziwa munthu unango wakuti asafunambo kupfundza Bhibhlya. Angakupangizani munthu unoyu pitani naye ncibverano mwakukhonda dembuka, pontho mphembeni khala asafuna kupfundza Bhibhlya. Pontho mpangizeni vidhyu ya nsolo wakuti Pfundziro ya Bhibhlya Isacitwa Tani? *
PHEDZANI ANYAKUPFUNDZA ANU TOERA AKHALE NA AXAMWALI MU MPINGO
Phedzani nyakupfundza wa Bhibhlya toera acite uxamwali na abale na alongo mu mpingo (Onani ndima 10-11) *
10. Mwakubverana na 1 Atesalonika 2:7, 8, amwazi mphangwa anatowezera tani citsandzo ca Paulu?
10 Amwazi mphangwa asafunika kupangiza citsalakano cadidi kakamwe kuna anyakupfundza awo a Bhibhlya. Pontho aoneni kuti mwakukhonda dembuka, iwo anakwanisa kukhala abale peno alongo. (Lerini 1 Atesalonika 2:7, 8.) Kusiyapo pyenepi, tisafunika kudziwa kuti ndi pyakunentsa kuna iwo kusiya axamwali awo a kudziko mbacita macinjo toera kutumikira Yahova. Natenepa tisafunika kuaphedza toera agumane axamwali adidi mu mpingo. Kusiyapo pyenepi, khalani na ndzidzi toera kucedza na nyakupfundza wanu wa Bhibhlya tayu basi ene mu ndzidzi unapfundza imwe Bhibhlya. Imwe munakwanisa kucita pyenepi mukucedza naye na telefoni, kuntumizira mphangwa na telefoni peno kucedza naye mu ndzidzi pang’ono mbamudzati peno pakumala kucitisa pfundziro ya Bhibhlya.
11. Kodi anyakupfundza Bhibhlya anakwanisa tani kucita uxamwali na abale na alongo mu mpingo, pontho thangwi yanji pyenepi ndi pyakufunika?
11 Pana nsangani unango unalonga kuti: “Ntsoi ya nyumba ya ntsukuli nkhabe kukwizwa na munthu m’bodzi.” Pyenepi pisapangiza kuti m’bodzi na m’bodzi mu mpingo anakwanisa kuphedzera kuthambaruka kwa nyakupfundza wa Bhibhlya. Na thangwi ineyi, amwazi mphangwa asafunika kuphedza anyakupfundza awo a Bhibhlya toera acite uxamwali na abale na alongo mu mpingo akuti anaaphedza toera kukhala na uxamwali wakuwanga na Yahova. Anyakupfundza Bhibhlya anakhala akutsandzaya kakamwe angacita uxamwali na abale na alongo akuti anaaphedza mu ndzidzi unathimbana iwo na nyatwa. Ife tisafunika kuphedza anyakupfundza athu a Bhibhlya toera aone kuti iwo asafuniwa kakamwe na abale na alongo mu mpingo. Kusiyapo pyenepi, ife tisafunikambo kuaphedza toera aone kuti asafuniwa kakamwe na abale na alongo pa dziko yonsene yapantsi. Natenepa, pyenepi pinaaphedza toera asiye kucita uxamwali na anthu akuti nee anaaphedza toera kufuna Yahova. (Mis. 13:20) Pontho angasiya kucita uxamwali na anthu anewa, iwo anakwanisa kugumana axamwali andimomwene mu gulu ya Yahova.—Marko 10:29, 30; 1 Ped. 4:4.
GOMEZERANI KUFUNIKA KWA KUPEREKEKA NA KUBATIZWA
Mwapang’ono-pang’ono nyakupfundza wa Bhibhlya anakwanisa kukhala wakuthema toera kubatizwa! (Onani ndima 12-13)
12. Thangwi yanji tisafunika kugomezera kakamwe kuna nyakupfundza wathu kufunika kwa kuperekeka kuna Yahova na kubatizwa?
12 Imwe musafunika kugomezera kakamwe kuna nyakupfundza wanu kufunika kwa kuperekeka kuna Yahova na kubatizwa. Thangwi cifuno cathu cakutoma cakupfundzisa munthu Bhibhlya ndi toera kumphedza kuti abatizwe mbakhala nyakupfundza. Natenepa tingapfundza Bhibhlya na munthu miyezi mingasi, makamaka mu ndzidzi unatoma iye kugumanika pa misonkhano, iye asafunika kudziwa kuti cifuno cakupfundza Bhibhlya ndi toera kumphedza kuti akhale m’bodzi wa Mboni za Yahova.
13. Kodi nyakupfundza asafunika kucitanji toera abatizwe?
13 Pana pinthu pizinji pyakuti nyakupfundza Bhibhlya asafunika kupicita toera abatizwe. Cakutoma, nyakupfundza Bhibhlya asafunika kudziwa Yahova, kunfuna na kunkhulupira. (Juwau 3:16; 17:3) Munjira ineyi, nyakupfundza Bhibhlya anakwanisa kukhala na uxamwali wakuwanga na Yahova mbakhala wakuphatana na mpingo. (Aheb. 10:24, 25; Tiya. 4:8) Caciwiri, nyakupfundza Bhibhlya asafunika kutcunyuka madawo ace mbasiya pinthu pyakuipa pikhacita iye. (Mabasa 3:19) Kusiyapo pyenepi, iye asapanga anango pinthu pinapfundza iye m’Bhibhlya. (2 Akor. 4:13) Buluka penepo iye asaperekeka kuna Yahova mbabatizwa. (1 Ped. 3:21; 4:2) Pontho ntsiku ineyi inabatizwa iye isakhala yakutsandzayisa kakamwe kuna anthu onsene. Nyakupfundza angawangisira toera kubatizwa, imwe musafunika kunsimba na ntima onsene toera apitirize kuthambaruka mwauzimu.
NDZIDZI ONSENE ONESESANI KUTHAMBARUKA KWA NYAKUPFUNDZA WANU
14. Kodi m’mwazi mphangwa anakwanisa tani kuona kuthambaruka kwa nyakupfundzace wa Bhibhlya?
14 Ife tisafunika kukhala akupirira mu ndzidzi unaphedza ife nyakupfundza Bhibhlya toera athambaruke mbabatizwa. Mbwenye midzidzi inango, ife tisafunika kuonesesa khala nyakupfundza wa Bhibhlya asafuna kutumikira Yahova peno nkhabe. Kodi pinthu pinacita nyakupfundza wa Bhibhlya pisapangiza kuti iye asawangisira toera kubvera matongero a Yezu? Kodi iye asafuna basi ene kukhala na cidziwiso ca Bhibhlya?
15. M’mwazi mphangwa anakwanisa tani kudziwa kuti nyakupfundza Bhibhlya ali wakuthema toera kubatizwa?
15 Ndzidzi onsene, onesesani mwadidi kuthambaruka kwa nyakupfundza wa Bhibhlya. Mwacitsandzo, kodi iye asacita phembero kuna Yahova toera kulonga pinthu pinan’nentsa? (Masal. 116:1, 2) Kodi iye asakomerwa na kuleri Bhibhlya? (Masal. 119:97) Kodi iye asagumanika pa misonkhano mwakukhonda phonya? (Masal. 22:22) Kodi iye asacita macinjo mu umaso wace toera kupangiza kuti asaphatisira pinapfundza iye? (Masal. 119:112) Kodi iye asalonga pinthu pinapfundza iye kuna acibale ace na axamwali ace? (Masal. 9:1) Kusiyapo pyenepi, kodi iye asafuna kukhala m’bodzi wa Mboni za Yahova? (Masal. 40:8) Khala nyakupfundza Bhibhlya nee asacita pinthu pyenepi, mwacilemedzo sakani kudziwa kuti thangwi yanji buluka penepo, mpangeni pinthu pinafunika iye kucita. *
16. Ndi ndzidzi upi wakuti tisafunika kusiya kupfundzisa munthu Bhibhlya?
16 Mibvundzo inatowera, inakuphedzani toera kuona khala musafunika kupitiriza kupfundza na nyakupfundza wanu peno nkhabe. ‘Kodi nyakupfundza wanu asacimwana kukhunganyika nsolo unafuna kupfundza iye? Kodi iye asadjomba misonkhano? Kodi iye asapitiriza kucita pinthu pyakuipa? Kodi iye asapitiriza kuenda ku gereja yace?’ Khala ntawiro wa mibvundzo ineyi ndi inde, kupitiriza kupfundza na munthu unoyu ndi ninga kupfundzisa munthu kusambirira wakuti nee asafuna kugwera m’madzi. Natenepa khala nyakupfundza Bhibhlya nee asakomerwa na pinapfundza iye, pontho nkhabe funa kucita macinjo mu umaso wace, nee musafunika kupitiriza kupfundza naye Bhibhlya.
17. Mwakubverana na 1 Timoti 4:16, amwazi mphangwa onsene asafunika kucitanji?
17 Basa yakucita anyakupfundza ndi yakufunika kakamwe kuna ife, natenepa tisafunika kuphedza anyakupfundza athu a Bhibhlya toera athambaruke mpaka kubatizwa. Na thangwi ineyi, ife tisafunika kuphatisira Bhibhlya pakupfundzisa munthu. Kusiyapo pyenepi ife tisafunika kulonga mwakugalamuka na kupangiza kuna nyakupfundza Bhibhlya kuti tisakhulupira pinapfundzisa ife. Pontho tisafunika kuphedza nyakupfundza Bhibhlya kuti acite uxamwali na abale na alongo mu mpingo. Mu ndzidzi unapfundzisa ife nyakupfundza wathu Bhibhlya tisafunika kugomezera kakamwe kufunika kwa kuperekeka kuna Yahova na kubatizwa, pontho ndzidzi onsene tisafunika kuonesesa kuthambaruka kwace. (Onani bokosi iri pa tsamba 13, ya nsolo wakuti “ Amwazi Mphangwa Asafunika Kucitanji Toera Kuphedza Anyakupfundza Bhibhlya Kuti Abatizwe?”) Ife tisakhala akutsandzaya kakamwe kucita basa ineyi yakupulumusa umaso. Natenepa tendeni ticite pyonsene pinakwanisa ife toera kuphedza anyakupfundza Bhibhlya kuti athambaruke mpaka kubatizwa.
NYIMBO 79 Apfundziseni Toera Akhale Dzololo
^ ndima 5 Ife tiri na mwai ukulu wakupfundzisa anthu Bhibhlya toera akhale na makhaliro akutawirika kuna Yahova. Nsolo uno unafokotoza kuti tinathimizira tani maluso athu pakupfundzisa anthu Bhibhlya.
^ ndima 4 Onani nsolo wakuti “Calirani Madodo Awa Pakucitisa Pfundziro ya Bhibhlya” unagumanika mu programu ya Misonkhano ya Umaso Wathu Wacikristu na Utumiki ya mwezi wa Setembro wa 2016.
^ ndima 8 Pitani pakhundu yakuti PYA IFE > PYAKUGUMANA NAPYO.
^ ndima 9 Mu JW Library®, pitani pa MIDIA > AS NOSSAS REUNIÕES E OBRA DE PREGAÇÃO > AJUDAS PARA A PREGAÇÃO.
^ ndima 15 Onani misolo iyi: “Kufuna Yahova na Kupereka Takhuta Kuna Iye Kunakukulumizani Toera Kubatizwa” na “Kodi Muli Dzololo Toera Kubatizwa?” isagumanika mu Ncenjezi wa mwezi wa Março wa caka 2020.
^ ndima 77 FOTO: Pakumala kucitisa pfundziro ya Bhibhlya, mulongo wakuti ali na maluso akucitisa pfundziro ya Bhibhlya akuphedza mulongo akhacitisa pfundziro ya Bhibhlya toera kuona kuti asafunika kucitanji toera akhonde kulonga kakamwe pakucitisa pfundziro ya Bhibhlya.
^ ndima 79 FOTO: Mu ndzidzi wa pfundziro ya Bhibhlya nyakupfundza akunyerezera kuti anakhala tani nkazi wadidi kakamwe. Buluka penepo, iye akupangambo mamunace pinthu pinapfundza iye m’Bhibhlya.
^ ndima 81 FOTO: Nyakupfundza wa Bhibhlya na mamunace akucedza panyumba ya banja inango idadziwana na iwo Kunyumba ya Umambo.
