1. Thangwi yanji anthu azinji lero nkhabe dziwa kuti ndi upi uphemberi wandimomwene?

LERO pana mauphemberi mazinji akuti asalonga kuti ndi Akristu, pontho asalonga kuti asalambira Mulungu munjira yakutawirika. Na thangwi ineyi, anthu azinji nkhabe dziwa kuti ndi upi uphemberi wandimomwene. Iwo asabvundza: “Kodi ulipo uphemberi wandimomwene, peno mauphemberi onsene asakomeresa Mulungu?” Kodi ife ninga Mboni za Yahova tiri na cinyindiro cakuti tisapfundzisa undimomwene, pontho kuti njira inalambira ife Yahova ndiyo basi ene yakutawirika kuna iye? Ndi pyakukwanisikadi kudziwa undimomwene wa pyenepi? Tendeni tione pinthu pinapangiza pyenepi.

2. Mwakubverana na 1 Atesalonika 1:5, thangwi yanji Paulu akhali na cinyindiro cakuti iye akhali mu undimomwene?

² Mpostolo Paulu akhali na cinyindiro cikulu cakuti iye akhali mu undimomwene. (Lerini 1 Atesalonika 1:5.) Iye nee akhali na cinyindiro ceneci basi ene thangwi pyenepi pikhantsandzayisa. Mbwenye thangwi iye akhapfundza mwadidi Mafala a Mulungu. Iye akhakhulupira kuti “Malemba onsene alembwa mukutsogolerwa na Mulungu.” (2 Tim. 3:16) Kodi iye apfundzanji? M’malemba, Paulu agumana undimomwene unapangiza kuti Yezu akhali Mesiya adapikirwa, pontho pyenepi pikhali pinthu pyakuti atsogoleri auphemberi Aciyuda nee akhapitawira. Atsogoleri a mauphemberi anewa akhalonga kuti akhapfundzisa anthu undimomwene unalonga pya Mulungu, mbwenye iwo akhapfundzisa anthu pinthu pyakuti Mulungu nee asakomerwa napyo. (Tito 1:16) Paulu nee akhali ninga amuna anewa. Iye nee akhasankhula pinthu pikhafuna iye kukhulupira na pinthu pyakuti nee akhafuna kupikhulupira m’Bhibhlya. Paulu akhali wakutonga toera kupfundzisa na kuphatisira ‘uphungu onsene wa Mulungu.’—Mabasa 20:27.

3. Kodi tisafunika kugumana matawiro a mibvundzo yathu yonsene toera kukhala na cinyindiro cakuti tiri mu undimomwene? (Onani bokosi ya nsolo wakuti “ Mabasa a Yahova na Manyerezero Ace ‘Ndi Mazinji Kakamwe Toera Kualonga.’”)

 ³ Anango asanyerezera kuti uphemberi wandimomwene usafunika kutawira mibvundzo yonsene, ngakhale mibvundzo yakuti matawiro ace nee asagumanika m’Bhibhlya. Kodi pyenepi ndi pyakukwanisika? Onani citsandzo ca Paulu. Iye apanga Akristu andzace toera ‘adinge pinthu pyonsene,’ mbwenye iye alongambo kuti pakhali na pinthu pizinji pyakuti nee akhapibvesesa. (1 Ates. 5:21) Iye alonga kuti: “Cidziwiso cathu si cakukwana tayu, tisaona na supeyu ya utale yakuti nkhabe kupangiza mwadidi pinthu.” (1 Akor. 13:9, 12) Paulu nee akhabvesesa pinthu pyonsene, pontho ife nee tisabvesesambo pinthu pyonsene. Mbwenye Paulu akhabvesesa undimomwene unalonga pya cifuno ca Yahova. Iye akhadziwa pinthu pikhampasa cinyindiro cakuti ali na undimomwene.

4. Ninji pinafuna kutiphedza toera kukhala na cinyindiro cakuti tiri mu undimomwene, pontho tinapfundzanji thangwi ya Akristu andimomwene?

⁴ Njira ibodzi yakuti inatiphedza toera kukhala na cinyindiro cakuti tiri mu undimomwene ndi kulandanisa pinthu pikhacita Yezu na pinacita Mboni za Yahova lero. Mu nsolo uno, ife tinaona kuti Akristu andimomwene (1) nee asalambira madzimunthu, (2) asalemedza dzina ya Yahova, (3) asafuna undimomwene, pontho (4) asafunana kakamwe unango na ndzace.

5. Kodi njira ikhalambira Yezu babace wakudzulu isatipfundzisanji?

⁵ Nakuti Yezu akhafuna kakamwe Yahova, iye akhalambira basi ene Yahova pikhali iye kudzulu, ngakhale pidabwera iye pa dziko yapantsi. (Luka 4:8) Iye apfundzisa anyakupfundzace toera alambirembo basi ene Yahova. Yezu  na anyakupfundzace akukhulupirika nee aphatisira madzimunthu toera kualambira. Mulungu nkhabe kuoneka, natenepa nkhabe munthu anakwanisa kucita cinthu cakulandana na iye. (Iza. 46:5) Mphapo ndiye tani kucita madzimunthu a anthu akuti anango asaaona ninga akucena mbaalambira? Mu Matongero Khumi, Yahova alonga: ‘Leka kucita dzimunthu peno kusasanya cinthu cinango cakulandana na cinthu ciri kudzulu peno ciri pa dziko yapantsi . . . Leka kuagodamira.’ (Eks. 20:4, 5) Anthu akuti asafuna kukomeresa Mulungu asadziwa kuti nee asafunika kulambira madzimunthu.

6. Mboni za Yahova zisatowezera citsandzo cipi lero thangwi yakulambira?

⁶ Anthu anapfundza thangwi ya pinthu pyakale alonga kuti mu ndzidzi wa apostolo, Akristu akhalambira basi ene Mulungu. Mwacitsandzo, bukhu inango isalonga kuti Akristu anewa “akhaida” maonero akuphatisira madzimunthu m’mbuto zawo zakulambira. Lero, Mboni za Yahova zisatowezera citsandzo ca Akristu a mu ndzidzi wa apostolo. Ife nee tisalambira madzimunthu a anthu akuti anango asaaona ninga akucena peno aanju, pontho nee tisalambira Yezu. Kusiyapo pyenepi, ife nee tisalambira bandera peno kucita pinthu pinapangiza kuti tisalambira dziko yathu. Mwakukhonda tsalakana pinthu pinafuna kuticitikira, ife tiri akutonga toera kubvera mafala a Yezu akuti: “Ndi Yahova Mulungu wako anafunika iwe kulambira.”—Mat. 4:10.

7. Ndi munjira ipi Mboni za Yahova ndi zakusiyana kakamwe na mauphemberi anango onsene?

⁷ Lero, anthu azinji asakomerwa na kubvesera pinthu pinalonga atsogoleri a mauphemberi. Midzidzi inango, iwo asatsalakana atsogoleri anewa a mauphemberi ninga alungu awo. Anthu azinji asaenda m’magereja mwawo, mbagula mabukhu awo, pontho asaapasa kobiri zizinji peno asaphedzera misoka ya atsogoleri anewa auphemberi. Anthu anango asakhulupira pinthu pyonsene pinalonga iwo. Pontho nkhabe dziwika kuti mbadaona Yezu Kristu mbadakhulupirambo pyonsene pikhalonga iye. Mbwenye alambiri andimomwene a Yahova nee asakhulupira pinalonga atsogoleri anewa auphemberi. Maseze ife tisalemedza ale anatsogolera mu gulu yathu, ife tisabvera mafala adalonga Yezu kuti: “Monsene ndimwe abale.” (Mat. 23:8-10) Ife nee tisalambira anthu, mwakukhonda tsalakana khala ndi atsogoleri a mauphemberi peno atsogoleri a ndale za dziko. Kusiyapo pyenepi, ife nee tisaphedzera ulambiri wawo peno pinthu pinacita anthu a ndale za dziko. Natenepa, ife ndife akusiyana kakamwe na mauphemberi anango analonga kuti ndi Akristu.—Juwau 18:36.

8. Tisadziwa tani kuti Yahova asafuna kuti tipase mbiri dzina yace na kuphedza anango toera adziwembo dzina ineyi?

⁸ Paulendo unango, Yezu aphembera: “Baba, pasani mbiri dzina yanu.” Yahova atawira phembero ineyi mwakugaluza kubulukira kudzulu, mbapikira kuti mbadapasa mbiri dzina yace. (Juwau 12:28) Mu utumiki wace pa dziko yapantsi, Yezu apasa mbiri dzina ya babace. (Juwau 17:26) Natenepa ndi mwai ukulu kakamwe kuna Akristu andimomwene kuphatisira dzina ya Mulungu na kuphedza anango toera adziwembo dzina ineyi.

9. Kodi Akristu a mu ndzidzi wa apostolo apangiza tani kuti akhalemedza dzina ya Mulungu?

⁹ Mu ndzidzi wa apostolo, pidamala kwene kukhazikiswa mpingo Wacikristu, Yahova “atoma kutawira anthu a madzindza anango, mbasankhula anango pakati pawo toera acemerwe na dzina yace.” (Mabasa 15:14) Akristu anewa a mu ndzidzi wa apostolo akhakomerwa na kuphatisira dzina ya Mulungu, pontho akhaphedza anango toera adziwembo dzina ineyi. Apostolo na anyakupfundza a Yezu aphatisira  dzina ya Mulungu mu ndzidzi ukhamwaza iwo mphangwa na mu ndzidzi ukhalemba iwo mabukhu a m’Bhibhlya. * Munjira ineyi, iwo apangiza pakweca kuti basi ene ndiwo akhaphedza anango toera kudziwa dzina ya Mulungu.—Mabasa 2:14, 21.

10. Ninji pinapangiza kuti basi ene ndi Mboni za Yahova zisadziwika na dzina ya Yahova?

¹⁰ Mboni za Yahova ndi anthu akuti asadziwika na dzina ya Yahova. Onani pinthu pinapangiza pyenepi. Lero, atsogoleri azinji a mauphemberi asacita pyonsene pinakwanisa iwo toera kuphimbira undimomwene wakuti Mulungu ali na dzina. Iwo asabulusa dzina ya Mulungu m’Mabhibhlya awo, pontho asakhondesa anthu toera kuphatisira dzina ineyi m’magereja mwawo. * Pyenepi pisapangiza pakweca kuti basi ene ndi Mboni za Yahova zinalemedza dzina ya Mulungu. Ife tisadziwisa anthu dzina ya Mulungu kupiringana mauphemberi anango onsene. Na thangwi ineyi, ninga Mboni za Yahova tisacita pyonsene pinakwanisa ife toera kukhala m’maso mwakubverana na dzina ineyi. (Iza. 43:10-12) Ife tacita Mabhibhlya a Tradução do Novo Mundo da Bíblia Sagrada akupiringana mamiliyau 240 akuti musagumanika dzina ya Yahova m’mbuto zakuti m’Mabhibhlya anango dzina ineyi nee isagumanika. Kusiyapo pyenepi, ife tisacita mabukhu akubuluswa m’Bhibhlya akuti asaphatisira dzina ya Yahova mu pilongero pyakupiringana 1.000.

11. Kodi Akristu a mu ndzidzi wa apostolo apangiza tani kuti akhafuna undimomwene?

¹¹ Yezu akhafuna undimomwene unalonga pya Mulungu na cifuniro cace. Umaso wa Yezu pa dziko yapantsi ukhapangiza kuti iye akhadziwa undimomwene, pontho aphedzambo anango toera kudziwa undimomwene unoyu. (Juwau 18:37) Atowereri andimomwene a Yezu akhafunambo kakamwe undimomwene. (Juwau 4:23, 24) Mpostolo Pedhru alonga kuti cikhulupiro ca Akristu ndi “njira ya undimomwene.” (2 Ped. 2:2) Thangwi yakufuna kakamwe undimomwene, Akristu a mu ndzidzi wa apostolo nee akhatawira maonero a mauphemberi, misambo yawo na pinthu pinango pyakuti nee pikhabverana na undimomwene. (Akol. 2:8) Munjira ibodzi ene lero, Akristu andimomwene asawangisira kakamwe toera “kufamba mu undimomwene,” pontho pinthu pyonsene pinacita iwo na pinakhulupira iwo pisabverana na Mafala a Yahova.—3 Juwau 3, 4.

12. Kodi Mathubo Akutonga asacitanji angaona kuti tisafunika kucinja kubvesesa kwathu undimomwene, pontho thangwi yanji asacita pyenepi?

¹² Mboni za Yahova nee zisalonga kuti ndzidzi onsene zisabvesesa pinthu pyonsene pinalongwa m’Bhibhlya. Midzidzi inango, iwo asadodomeka njira inafokotoza iwo pipfundziso pya m’Bhibhlya na njira inasasanyira iwo pinthu mu mpingo. Ife nee tisafunika kudzumatirwa na pyenepi, thangwi Bhibhlya isalonga pakweca kuti cidziwiso candimomwene cisathimizirika mwapang’ono na pang’ono. (Akol. 1:9, 10) Yahova asabvekesa undimomwene wace mwapang’ono na pang’ono, pontho ife tisafunika kudikhira mwakupirira toera kubvesesa mwadidi undimomwene unoyu. (Mis. 4:18) Mathubo Akutonga angaona kuti asafunika kucinja kubvesesa kwathu undimomwene, iwo asacita macinjo anewa mwakukhonda dembuka. Magereja mazinji lero asacinja njira yakupfundzisa pinthu toera kukomeresa anthu awo peno toera akhale akubvekera kakamwe pa dziko. Mbwenye Mboni za Yahova zisacita macinjo thangwi ife tisafuna kukhala na uxamwali wakuwanga na Mulungu na kumulambira munjira ninga idacita Yezu. (Tiya. 4:4) Ife nee tisacita macinjo toera kutowezera maonero a anthu a dziko, mbwenye tisacita macinjo thangwi tabvesesa mwadidi undimomwene wa Bhibhlya. Ife tisafuna kakamwe undimomwene.—1 Ates. 2:3, 4.

13. Ndi nkhaliro upi wakufunika kakamwe udapangiza Akristu a mu ndzidzi wa apostolo, pontho Mboni za Yahova zisapangizambo tani nkhaliro unoyu lero?

¹³ Akristu a mu ndzidzi wa apostolo akhadziwika na makhaliro mazinji adidi, mbwenye nkhaliro wakufunika kakamwe ukhadziwika na iwo ukhali ufuni. Yezu alonga: “Imwe mungafunana unango na ndzace, anthu onsene anadzindikira kuti ndimwe anyakupfundza anga.” (Juwau 13:34, 35) Lero, kuzungulira dziko yonsene yapantsi Mboni za Yahova zisafunana kakamwe, pontho ndi zakuphatana. Ife tasiyana kakamwe na mauphemberi anango onsene, thangwi tisakhala ninga banja, mwakukhonda tsalakana khala tabuluka m’madziko akusiyana peno makhaliro athu. Ife tisakwanisa kuona ufuni unoyu pa misonkhano yathu ya mpingo, ya cisa na ya gawo. Pyenepi pisatiphedza toera kukhala na cinyindiro cakuti tisalambira Yahova munjira yakutawirika kuna iye.

14. Mwakubverana na Akolose 3:12-14, tisafunika kucitanji toera kupangiza kuti tisafunana kakamwe unango na ndzace?

¹⁴ Bhibhlya isatikulumiza toera ‘kufunana kakamwe unango na ndzace.’ (1 Ped. 4:8) Njira ibodzi yakupangiza ufuni ndi kulekerera unango na ndzace na kupirirana madodo athu. Kusiyapo  pyenepi, ife tisasaka miyai toera kukhala akupasa mwakudzala manja na kupangiza kutambira alendo kuna onsene mu mpingo, ngakhale kuna ale akuti panango atitsukwalisa. (Lerini Akolose 3:12-14.) Tingafunana munjira ineyi, tinapangiza pakweca kuti ndife Akristu andimomwene.

15. Ndi pinthu pipi pinango pinapangiza kuti tisatowezera citsandzo ca Akristu a mu ndzidzi wa apostolo thangwi ya kulambira?

¹⁵ Pana pinthu pinango pinapangiza kuti tisatowezera citsandzo ca Akristu a mu ndzidzi wa apostolo thangwi ya kulambira. Mwacitsandzo, ife tiri na masasanyiro mabodzi ene ninga akhali na Akristu a mu ndzidzi wa apostolo. Ife tiri na ayang’aniri a cisa, akulu a mpingo na atumiki akutumikira. (Afil. 1:1; Tito 1:5) Pontho ninga Akristu a mu ndzidzi wa apostolo, ife tisalemedza mitemo ya Yahova thangwi ya kupita m’mabonde na kumanga banja, tisalemedza pinalonga Mulungu thangwi yakuphatisira ciropa, pontho tisatsidzikiza mpingo kuna ale anakhonda kubvera mitemo ya Mulungu.—Mabasa 15:28, 29; 1 Akor. 5:11-13; 6:9, 10; Aheb. 13:4.

16. Kodi lemba ya Aefesi 4:4-6 isatipfundzisanji?

¹⁶ Yezu alonga kuti anthu azinji mbadalonga kuti ndi anyakupfundzace, mbwenye nee ndi onsene akuti mbadakhala anyakupfundzace andimomwene. (Mat. 7:21-23) Kusiyapo pyenepi, Bhibhlya yalonga kuti mu ntsiku zakumalisa azinji “anadzaoneka ninga anthu adaperekeka kuna Mulungu.” (2 Tim. 3:1, 5) Mbwenye Bhibhlya isalongambo mwapakweca kuti pali na “cikhulupiro cibodzi” cakuti ndi cakutawirika kuna Mulungu.—Lerini Aefesi 4:4-6.

17. Mbani ali mu ulambiri wandimomwene lero, pontho asatowezera citsandzo ca Yezu?

¹⁷ Mbani ali mu ulambiri wandimomwene lero? Ife taona pinthu pinapangiza kuti mbani ali mu ulambiri wandimomwene. Kusiyapo pyenepi, ife taona pinthu pidapfundzisa Yezu thangwi ya ulambiri wandimomwene na citsandzo ca Akristu a mu ndzidzi wa apostolo. Natenepa ntawiro ndi ubodzi basi, ndi Mboni za Yahova. Ndi mwai ukulu kakamwe kwa ife kukhala m’bodzi wa atumiki a Yahova na kudziwa undimomwene thangwi ya Yahova na cifuniro cace! Natenepa tendeni ticite pyonsene pinakwanisa ife toera tikhale na cinyindiro cakuwanga cakuti tiri mu undimomwene.