1. Ndi munjira ipi kutsandzaya kwathu kusanyindira “kudziwa Mulungu”?

 KUTSANDZAYA kwandimomwene nee ndi basi ene kukomerwa kwakuti kusakhala mu ndzidzi wakucepa. Munthu anakwanisa kukhala wakutsandzaya mu umaso wace onsene. Munjira ipi? Yezu alonga pyenepi mu nkhani yace ya paphiri kuti: “Anyakutsandzaya ndi ale anadzindikira kuti asafunika kudziwa Mulungu.” (Mat. 5:3) Yezu akhadziwa kuti anthu acitwa na cifuno cakudziwa na kulambira Nciti wawo, Yahova Mulungu. Pontho nakuti Yahova ndi “Mulungu wakutsandzaya,” ale anamulambira anakwanisambo kukhala akutsandzaya.—1 Tim. 1:11.

2-3. (a) Mwakubverana na mafala a Yezu, mbani pontho anakwanisa kukhala wakutsandzaya? (b) Tinapfundzanji mu nsolo uno, pontho thangwi yanji pinthu pyenepi ndi pyakufunika?

² Kodi ife basi ene tinakhala akutsandzaya khala nee tisathimbana na nyatwa? Nkhabe. Mu nkhani yace ya paphiri, Yezu alonga cinthu cinango cakudzumatirisa kakamwe. Ngakhale ale akuti ‘asalira’ panango thangwi ya kupasika mulando na madawo awo peno thangwi ya nyatwa zinango, iwo anakwanisa kukhala akutsandzaya. Yezu alonga kuti “ale anatcingwa thangwi ya kucita pinthu pyadidi” peno ale anapirira ‘kutikanwa’ thangwi ya kukhala atowereri a Kristu anakwanisambo kukhala akutsandzaya. (Mat. 5:4, 10, 11) Pinakwanisika tani kukhala na kutsandzaya kwandimomwene m’makhaliro anewa?

³ Yezu atipfundzisa kuti kutsandzaya kwandimomwene nee kusanyindira pinthu pyadidi pinaticitikira mu umaso wathu. Mbwenye tisafunika kudziwa Mulungu na kukhala na uxamwali wakuwanga na iye. (Tiya. 4:8) Mu nsolo uno ife tinapfundza pinthu  pitatu pinafunika ife kucita toera tikhale na kutsandzaya kwandimomwene.

4. Ndi cinthu cipi cakutoma cinafunika ife kucita toera tikhale na kutsandzaya kwandimomwene? (Masalmo 1:1-3)

⁴ CINTHU 1: Toera tikhale na kutsandzaya kwandimomwene tisafunika kuleri na kupfundza Mafala a Mulungu. Anthu na pinyama asafunika kudya toera akhale m’maso, mbwenye basi ene ndi anthu anakwanisa kupfundza Mafala a Mulungu, pontho ife tisafunika kucita pyenepi. Na thangwi ineyi, Yezu alonga kuti: ‘Munthu nee asakhala m’maso thangwi ya cakudya basi, mbwenye na mafala onsene anabuluka pamulomo wa Yahova.’ (Mat. 4:4) Natenepa, ife nee tisafunika kusiya kuti ntsiku imale mbitikhonda kuleri Mafala a Mulungu, Bhibhlya. Nyamasalmo alonga: ‘Nyakutsandzaya ndi munthu anakomerwa na mwambo wa Yahova, pontho iye asauleri mwakukhonda galuza masiku na masikati.’—Lerini Masalmo 1:1-3.

5-6. (a) Ndi pinthu pipi pinapfundza ife m’Bhibhlya? (b) Kuleri Bhibhlya kunatiphedza tani? 

⁵ Mwaufuni, Yahova asaphatisira Bhibhlya toera kutipasa mphangwa zakufunika kakamwe zakuti zinatiphedza toera kukhala akutsandzaya. M’Bhibhlya, ife tisapfundza kuti thangwi yanji tiri na umaso, tisapfundza kuti tinakhala tani na uxamwali wakuwanga na Mulungu mbatilekererwa madawo athu. Pontho tisapfundza pinthu pyakutsandzayisa kakamwe pidapikira Mulungu kuti anadzapicita ntsogolo. (Yer. 29:11) Undimomwene unoyu unapfundza ife m’Bhibhlya usatitsandzayisa kakamwe! 

⁶ Ife tisadziwambo kuti Bhibhlya iri na uphungu wakuti unatiphedza ntsiku na ntsiku. Ife tingabvera uphungu unoyu, tinakhala na umaso wakutsandzayisa. Mungakhala wakutsukwala thangwi ya nyatwa, lerini Bhibhlya  mbamunyerezera mwadidi pinaleri imwe. Yezu alonga: “Anyakutsandzaya ndi ale anabva mafala a Mulungu mbaaphatisira!”—Luka 11:28. 

7. Ninji pinafuna kukuphedzani toera muphatisire mwadidi ndzidzi unaleri imwe Bhibhlya? 

⁷ Mu ndzidzi unaleri imwe Bhibhlya, khalani na ndzidzi toera kunyerezera pinaleri imwe. Nyerezerani basi. Munthu unango aphika cakudya cakuti musakomerwa naco kakamwe. Mbwenye imwe nee muli na ndzidzi uzinji, pontho muli kudzudzumika thangwi ya kunyerezera pinthu pinango. Natenepa imwe musadya mwakucimbiza kakamwe mbamukhonda kubva kukoma kwa cakudya cinadya imwe. Mungamala kudya musadzindikira kuti mwadya mwakucimbiza kakamwe, pontho kuti mukhafunika kudya mwapang’ono-pang’ono toera mukwanise kubva kukoma kwa cakudya. Pyenepi pinakwanisambo kucitika tingaleri Bhibhlya. Midzidzi inango, panango tinaleri Bhibhlya mwakucimbiza kakamwe mbatikhonda kubvesesa pinatipfundzisa Yahova. Natenepa, khalani na ndzidzi toera kuleri Bhibhlya; mu ndzidzi unaleri imwe nyerezerani pinthu pinacitika, nyerezerani njira inalonga anthu, pontho nyerezerani pidaleri imwe. Mungacita pyenepi, imwe munakhala wakutsandzaya kakamwe. 

8. “M’bandazi wakukhulupirika na wandzeru” asacita tani basa yace? (Onani cidzindikiro capantsi.) 

⁸ Yezu asankhula “m’bandazi wakukhulupirika na wandzeru” toera kutipasa cakudya pa ndzidzi wakuthema, natenepa iye asatipasadi cakudya ceneci. b (Mat. 24:45) Cakudya cauzimu cakufunika kakamwe cinatipasa m’bandazi wakukhulupirika ndi Bhibhlya. (1 Ates. 2:13) Cakudya ceneci cauzimu cisatiphedza toera kudziwa manyerezero a Yahova mwakubverana na pinalonga Bhibhlya. Na thangwi ineyi, ife tisaleri marevista a Ncenjezi na Lamukani!, kuphatanizambo mphangwa zinango zinagumanika mu saiti jw.org. Tisakhunganyika misonkhano ya mpingo ya pakati pa sumana na yakumala kwa sumana. Pontho miyezi yonsene tisaona programu ya JW Broadcasting^®. Ife tingaleri na kupfundza Bhibhlya tinakwanisa kucita cinthu caciwiri cinafuna kutiphedza toera tikhale na kutsandzaya kwandimomwene. 

9. Ndi cinthu cipi caciwiri cinafuna kutiphedza toera kukhala na kutsandzaya kwandimomwene? 

⁹ CINTHU 2: Toera tikhale na kutsandzaya kwandimomwene ife tisafunika kubvera mitemo ya Yahova. Nyamasalmo alonga: ‘Nyakutsandzaya ndi ule anagopa Yahova, ule anafamba munjira zace.’ (Masal. 128:1) Kugopa Yahova ndi kumulemedza kakamwe na kucalira kucita pinthu pyakuti nee pisankomeresa. (Mis. 16:6) Natenepa, ife tisapitiriza kucita pyonsene pinakwanisa ife toera kubvera mitemo ya Mulungu inalonga thangwi ya pinthu pyadidi na pyakuipa, mwakubverana na Bhibhlya. (2 Akor. 7:1) Ife tinakhala akutsandzaya kakamwe tingacita pinthu pinakomerwa na Yahova mbaticalira pinthu pinaipirwa na iye.—Masal. 37:27; 97:10; Aroma 12:9. 

10. Mwakubverana na Aroma 12:2, tisafunika kucitanji? 

¹⁰ Lerini Aroma 12:2. Munthu panango anadziwa kuti Yahova ndi adathema kulonga kuti ndi pinthu pipi pyadidi na pyakuipa, mbwenye panango nee anatawira kubvera mitemo ya Mulungu. Mwacitsandzo, panango munthu anadziwa kuti mautongi ndiwo adathema kukhazikisa madire toera munthu akhonde kufamba mwakucimbiza kakamwe na karu peno mota, mbwenye panango iye nee anafuna kubvera mitemo ineyi. Na thangwi ineyi, iye asafamba mwakucimbiza kakamwe mbapiringana madire adakhazikiswa na mautongi. Ife tisafunika kupangiza na pinthu pinacita ife kuti mwandimomwene kubvera mitemo ya Yahova ndi cinthu cadidi kakamwe toera kucicita. (Mis. 12:28) Dhavidhi akhacita pyenepi, thangwi iye apanga Yahova:  ‘Imwe musandidziwisa njira inatsogolera ku umaso. Ule anakhala pamaso panu, asakhala wakutsandzaya kakamwe; ule ali kunkono wanu wamadyo asakhala wakutsandzaya kwenda na kwenda.’—Masal. 16:11. 

11-12. (a) Tingadzudzumika peno tingatsukwala tisafunika kucita mphole-mphole nanji? (b) Kodi mafala anagumanika pa Afilipi 4:8 anatiphedza tani toera kusankhula mwadidi ubalangazi? 

¹¹ Tingatsukwala peno tingadzudzumika, panango tinafuna kucita cinthu cakuti cinatiphedza toera tisiye kukhala wakudzudzumika. Pyenepi nee ndi pyakuipa. Mbwenye tisafunika kucita mphole-mphole toera tikhonde kucita pinthu pyakuti Yahova asapiida.—Aef. 5:10-12, 15-17. 

¹² Tsamba idalembera iye Akristu a ku Filipi, mpostolo Paulu aacenjeza toera apitirize kunyerezera pinthu pyakuti ndi ‘pyakulungama, pyakucena, pyakuthema kufuniwa na pyadidi.’ (Lerini Afilipi 4:8.) Ngakhale kuti Paulu nee alemba thangwi ya ubalangazi, pinthu pidalonga iye pisafunika kutiphedza toera kusankhula mwadidi ubalangazi. Yeserani kucita ipi: Ndzidzi onsene unaona imwe fala yakuti “pinthu” pa vesi, icinjeni na fala yakuti “nyimbo,” “mafilimu,” “manovela” na “ma video game.” Mungacita pyenepi munakwanisa kudzindikira pinthu pyakuti ndi pyakutawirika kuna Mulungu na pinthu pyakuti nee ndi pyakutawirika kuna iye. Ife tisafuna kubvera mitemo yakulungama ya Yahova. (Masal. 119:1-3) Tingacita pyenepi tinakhala na cikumbuntima cakucena, pontho tinakwanisa kucita cinthu cacitatu cinafuna kutiphedza toera kukhala na kutsandzaya kwandimomwene.—Mabasa 23:1. 

13. Ndi cinthu cipi cacitatu cinafuna kutiphedza toera kukhala na kutsandzaya kwandimomwene? (Juwau 4:23, 24) 

¹³ CINTHU 3: Citani pyonsene pinakwanisa imwe toera kulambira Yahova kukhale cinthu cakutoma mu umaso wanu. Nakuti Yahova ndiye adaticita, iye athema kulambirwa. (Apok. 4:11; 14:6, 7) Natenepa, cinthu cakufunika kakamwe mu umaso wathu cisafunika kukhala kulambira Yahova munjira inafuna iye, peno kumulambira “mukutsogolerwa na nzimu na undimomwene.” (Lerini Juwau 4:23, 24.) Ife tisafuna kuti nzimu wakucena wa Mulungu utitsogolere toera ticite pinthu mwakubverana na undimomwene unagumanika m’Bhibhlya. Kulambira Yahova kusafunika kukhala pa mbuto yakutoma, ngakhale kuti mu dziko inakhala ife basa yathu ikhondeswe. Cincino, abale na alongo athu akupiringana 156 afungirwa nkaidi basi ene thangwi yakukhala Mboni za Yahova. c Ngakhale tenepo, mwakutsandzaya, iwo asacita pyonsene pinakwanisa iwo toera kuphembera, kupfundza Bhibhlya na kupanga anango thangwi ya Mulungu wathu na Umambo wace! Anthu angatixola peno angatitcinga, ife tinakwanisa kukhala akutsandzaya thangwi Yahova ali na ife, pontho iye anadzatipasa nkhombo.—Tiya. 1:12; 1 Ped. 4:14. 

14. Ninji pidacitikira m’bale unango wa ku Tajikistão, pontho thangwi yanji? 

¹⁴ Pinthu pinacitikira abale na alongo athu pisapangiza kuti pinthu pitatu pidapfundza ife pisaphedza munthu toera kukhala na kutsandzaya kwandimomwene mwakukhonda tsalakana nyatwa zinaona iye. Onani basi pidacitikira m’phale unango wa pyaka 19 pyakubalwa anacemerwa Jovidon Bobojonov, wa ku Tajikistão thangwi yakukhonda kwenda kunkhondo. Ntsiku 4 ya Outubro ya caka ca 2019, iye akwatwa panyumba pace mbafungirwa nkaidi m’miyezi mingasi, pontho atsalakanwa ninga phanga. Pinthu pyenepi pyakusowa ulungami pyalongwa m’matelevizau, m’majornali na m’maradhyo m’madziko mazinji. Iwo akhalonga kuti iye amenywa mbakakamizwa toera  acite dumbiro ya unyankhondo, pontho toera abvale nguwo za anyankhondo. Buluka penepo, thando yakutongera miseru yalonga kuti iye akhali na mulando, natenepa antumiza ku mazunde toera kucita basa yakuwanga mpaka pidalekererwa iye na prezidhenti wa dziko ineyi mbansudzula. Mu ndzidzi unoyu onsene, Jovidon apitiriza kukhala wakukhulupirika na wakutsandzaya. Ninji pidam’phedza? Pidam’phedza ndi pyakuti ndzidzi onsene iye akhapfundza Mafala a Mulungu, pontho akhacita phembero. 

15. Jovidon akhakwanisa tani kuleri Bhibhlya pikhali iye nkaidi? 

¹⁵ Pikhali iye nkaidi, Jovidon apitiriza kupfundza pya Yahova maseze nee akhali na Bhibhlya peno mabukhu athu. Pyenepi pyakwanisika tani? Abale na alongo akhaenda kampasa cakudya, pontho akhalemba lemba ya ntsiku m’mapasta akhaikhira iwo cakudya. Natenepa, Jovidon akhakwanisa kuleri Bhibhlya na kunyerezera mwadidi pikhaleri iye ntsiku zonsene. Pidabuluka iye nkaidi, apereka uphungu uyu kuna ale akuti adzati kutcingwa: “Musafunika kuphatisira ndzidzi uno wakuti mudzati kutcingwa toera kuleri Bhibhlya na mabukhu athu anango kuti mudziwe mwadidi Yahova.” 

16. Ndi pinthu pipi pikhanyerezera Jovidon? 

¹⁶ Jovidon akhabvera mitemo ya Yahova. Iye nee akhapitiriza kunyerezera pinthu pyakuipa na kucita pinthu pyakuipa, mbwenye akhanyerezera  Yahova na pinthu pyakuthema. Jovidon akhakomerwa kakamwe na kuona pinthu pyakubalika pidacita Mulungu. Ntsiku zonsene kunja kungaca, iye akhalamuka mbabvesera kulira kwa mbalame. Camasiku, iye akhayang’anisa mwezi na nyenyezi. Jovidon alonga: “Pinthu pyenepi pidacita Yahova pisandiphedza toera ndikhale wakutsandzaya, pontho pisandiwangisa.” Ife tingapereka takhuta kuna Yahova thangwi ya cakudya cauzimu na pinthu pyakumanungo pinatipasa iye, tinakhala akutsandzaya, pontho kutsandzaya kweneko kunatiphedza toera tipirire tingatamba nyatwa. 

17. Lemba ya 1 Pedhru 1:6, 7 inaphedza tani munthu wakuti ali kutamba nyatwa zibodzi zene zidatamba Jovidon? 

¹⁷ Jovidon akhaonambo kulambira Yahova ninga cinthu cakufunika kakamwe mu umaso wace. Iye akhadziwa kuti mphyakufunika kupitiriza kukhala wakukhulupirika kuna Mulungu wandimomwene. Yezu alonga: “Ndi Yahova Mulungu wako asafunika iwe kulambira, pontho ndiye basi anafunika iwe kutumikira.” (Luka 4:8) Akulu a anyankhondo na anyankhondo anango akhafuna kuti Jovidon asiye kukhala Mboni wa Yahova. Mbwenye Jovidon akhapitiriza kucita maphembero akudembetera ntsiku zonsene, masiku na masikati. Iye akhaphemba Yahova toera am’phedze kuti akhonde kufewa manungo mbakhonda kusiya kukhala wakukhulupirika. Maseze Jovidon atsalakanwa mwakuipa kakamwe, mbwenye iye apitiriza kukhala wakukhulupirika kuna Yahova. Natenepa cincino iye ali na cinthu cakuti nee akhali naco mbadzati kuphatwa, kumenywa na kufungirwa nkaidi. Cincino iye ali na cikhulupiro cakuwanga kakamwe thangwi cikhulupiro cace cayeserwa.—Lerini 1 Pedro 1:6, 7. 

18. Tinapitiriza tani kukhala akutsandzaya?

¹⁸ Yahova asadziwa mwadidi pinthu pinafuna ife toera tikhale na kutsandzaya kwandimomwene. Mungacita pinthu pitatu pyakuti pinakuphedzani toera mukhale na kutsandzaya kwandimomwene, imwe munakwanisa kupitiriza kukhala wakutsandzaya mwakukhonda tsalakana nyatwa zinatamba imwe. Pontho munakwanisa kulonga kuti: ‘Yakutsandzaya ndi mbumba yakuti Mulungu wawo ndi Yahova!’—Masal. 144:15.