1. Ndi cidikhiro cipi cidatipasa Yahova?

 YAHOVA atipasa cidikhiro cadidi kakamwe cakukhala na umaso wakukhonda mala. Anango ali na cidikhiro cakukhala kwenda na kwenda kudzulu na umaso wakukhonda kufa. (1 Akor. 15:50, 53) Mbwenye azinji ali na cidikhiro cakukhala kwenda na kwenda pa dziko yapantsi na umaso wakutsandzayisa, pontho na ungumi wadidi. (Apok. 21:3, 4) Mwakukhonda tsalakana khala cidikhiro cathu ndi ca kuenda kakhala kudzulu peno kukhala pa dziko yapantsi, cidikhiro cathu ndi cakufunika kakamwe kuna ife.

2. Thangwi yanji tisanyindira kuti pinthu pinadikhira ife pinadzacitikadi?

² Fala yakuti “cidikhiro” m’Bhibhlya isaphatisirwa toera kulonga “kudikhira pinthu pyadidi pinafuna kucitika.” Ife tiri na cinyindiro cakuti pinthu pinadikhira ife pinadzacitikadi thangwi ndi Yahova adapilonga. (Aroma 15:13) Ife tisadziwa pinthu pidapikira iye, pontho tisadziwa kuti iye ndzidzi onsene asacita pidapikira iye. (Num. 23:19) Kusiyapo pyenepi, ife tisadziwa kuti Yahova asafuna, pontho ali na mphambvu toera kucita pyonsene pidalonga iye kuti anadzapicita. Natenepa ife nee tisadikhira pinthu pyakuti mwandimomwene nee pinadzacitikadi, peno pinthu pyakuti basi ene tisapinyerezera. Mbwenye tisadikhira pinthu pyakuti tisadziwa kuti mwandimomwene pinadzacitikadi.

3. Tinapfundzanji mu nsolo uno? (Masalmo 27:14)

³ Babathu wakudzulu asatifuna, pontho iye asafuna kuti ife tin’nyindire. (Lerini Masalmo 27:14.) Cidikhiro cathu kuna Yahova cingakhala cakuwanga, ife tinakwanisa kupirira mayesero, pontho tinakwanisa kupirira nyatwa za ntsogolo mwacipapo na mwakutsandzaya. Mu nsolo uno ife tinapfundza kuti cidikhiro cathu cisatitsidzikiza tani, pontho calandana tani na nangula, pontho na capeu ca utale. Kusiyapo pyenepi, tinapfundza kuti tinakwanisa tani kuwangisa cidikhiro cathu.

4. Cidikhiro calandana tani na nangula? (Ahebheri 6:19)

⁴ Mu tsamba idalembera iye Ahebheri, mpostolo Paulu alandanisa cidikhiro cathu na nangula. (Lerini Ahebheri 6:19.) Nakuti kazinji kene mpostolo Paulu akhacita maulendo na bote, iye akhadziwa kuti nangula kazinji kene zikhaphatisirwa toera kutsidzikiza bote toera ikhonde kukwatwa na mphepo. Ntsiku inango iye akhacita ulendo na bote, natenepa paoneka condzi cikulu kakamwe. Mu ndzidzi ukhacitika condzi, iye aona anyakufambisa bote mbakaponya nangula m’madzi toera bote ikhonde kumenyekera pa miyala. (Mabasa 27:29, 39-41) Ninga nangula yakuti isatsidzikiza bote, cidikhiro cathu cisatitsidzikiza toera tikhonde kusiya Yahova tingatamba nyatwa. Cidikhiro cathu cisatiphedza toera tikhale akukhurudzika tingatamba nyatwa thangwi tisadziwa kuti ntsogolo pinthu pinadzakhala mwadidi kakamwe. Kumbukani kuti Yezu alonga kuti ife mbatidatcingwa. (Juwau 15:20) Natenepa kunyerezera mwadidi pinthu pinafuna kudzatipasa Mulungu, pinatiphedza toera tipitirize kukhala Akristu a cikhulupiro cakuwanga.

5. Cidikhiro caphedza tani Yezu pikhadikhira iye kuphiwa?

⁵ Onani kuti cidikhiro caphedza tani Yezu toera kupitiriza kukhala na cikhulupiro cakuwanga maseze akhadikhira kuphiwa munjira yakutsukwalisa kakamwe. Pa Pentekoste 33 Pakumala Kubalwa Kwa Kristu, mpostolo Pedhru alonga profesiya inagumanika m’bukhu ya Masalmo inapangiza kuti Yezu akhali na cinyindiro, pontho akhali wakukhurudzika. Profesiya ineyi ndi iyi: “Ine ndinakhala na cidikhiro; thangwi imwe nee munadzandisiya Munthumbi, pontho nee munadzatawirisa kuti manungo anga abvunde thangwi ndine wakukhulupirika kuna imwe. . . . Munadzadza ntima wanga na kusekera kukulu pamaso panu.” (Mabasa 2:25-28; Masal. 16:8-11) Ngakhale Yezu akhadziwa kuti mbadafa, iye akhali na cidikhiro cakuwanga cakuti Mulungu mbadamulamusa muli akufa, pontho mbadaenda kakhala pontho kudzulu pabodzi na Babace.—Aheb. 12:2, 3.

6. M’bale Leonard alonganji thangwi ya cidikhiro?

⁶ Cidikhiro cisaphedza abale na alongo azinji toera kupirira nyatwa. Onani pidacitikira m’bale wathu wakukhulupirika anacemerwa Leonard Chinn anakhala ku Inglatera. Mu ndzidzi wa Nkhondo Yakutoma ya Dziko Yonsene, iye afungirwa nkaidi thangwi yakukhonda kuenda ku nkhondo. Iye afungirwa nkaidi miyezi miwiri pa mbuto yakuti akhali ekhene basi. Buluka penepo aphatiswa basa yakuwanga kakamwe. Mukupita kwa ndzidzi iye alemba: “Pinthu pidandicitikira pyandiphedza kudzindikira kuti tisafunika kukhala na cidikhiro toera kupirira nyatwa. Kusiyapo pyenepi ife tiri na citsandzo ca Yezu, apostolo na aprofeta kuphatanizambo mapikiro adidi kakamwe anagumanika m’Bhibhlya. Pyenepi pyonsene pisatipasa cidikhiro ca ntsogolo, pontho pisatipasa mphambvu toera kupirira nyatwa.” Cidikhiro cakhala ninga nangula kuna Leonard, pontho cinakwanisambo kukhala ninga nangula kuna ife.

7. Kodi mayesero anakwanisa kuwangisa cidikhiro cathu? (Aroma 5:3-5; Tiyago 1:12)

⁷ Cidikhiro cathu cisakhala cakuwanga kakamwe tingapirira mayesero mbationa kuti Yahova asatiphedza, pontho ali wakutsandzaya na ife. (Lerini Aroma 5:3-5; Tiyago 1:12.) Natenepa, cidikhiro cathu cisakhala cakuwanga kakamwe kupiringana pa ndzidzi udatoma ife kwene kupfundza undimomwene. Sathani asafuna kuti mayesero atifewese manungo, mbwenye na ciphedzo ca Yahova ife tinakwanisa kupirira mayesero onsene.

8. Cidikhiro cathu calandana tani na capeu ca utale? (1 Atesalonika 5:8)

⁸ Bhibhlya isalandanisambo cidikhiro cathu na capeu ca utale. (Lerini 1 Atesalonika 5:8.) Nyankhondo asabvala capeu ca utale toera atsidzikize nsolo wace kuti akhonde kuphekeswa na  pinthu pinamponyera nyamalwa wace. Nkhondo inamenya ife na Sathani, ife tisafunika kutsidzikiza manyerezero athu toera Sathani akhonde kufudza uxamwali wathu na Mulungu. Sathani asaphatisira pinthu pizinji toera kutiyesera, pontho asadzadza manyerezero athu na pinthu pyakuipa toera kufudza uxamwali wathu na Mulungu. Ninga capeu ca utale cakuti cisatsidzikiza nsolo wa nyankhondo, cidikhiro cathu cisatsidzikiza manyerezero athu toera tipitirize kukhala wakukhulupirika kuna Yahova.

9. Ndi pinthu pipi pinacita anthu akuti nee ali na cidikhiro?

⁹ Cidikhiro cathu cakukhala na umaso kwenda na kwenda cinatiphedza toera kucita pisankhulo pyadidi. Mbwenye cikhulupiro cathu cingafewa, mbatitawirisa kuti manyerezero akuipa apite muntima mwathu, ife tinaduwala cidikhiro ciri na ife cakukhala na umaso wakukhonda mala. Onani basi pidacita Akristu anango a ku Korinto. Iwo asiya kukhulupira pikiro yakufunika kakamwe idacita Mulungu, yakulamuswa kwa anthu muli akufa. (1 Akor. 15:12) Paulu alonga kuti ale anakhonda kukhulupira kulamuswa kwa anthu muli akufa, basi ene asacita pinthu pinakomerwa na iwo. (1 Akor. 15:32) Lero anthu azinji akuti nee ali na cidikhiro ca mapikiro adacita Mulungu, asacita pyonsene pinakomerwa na iwo toera akhale na umaso wakutsandzayisa cincino. Mbwenye ife tasiyana na iwo thangwi tisanyindira pinthu pidapikira Mulungu kuti anadzapicita ntsogolo. Cidikhiro cathu ndi ninga capeu ca utale cakuti cisatsidzikiza manyerezero athu, pontho cisatiphedza toera tikhonde kunyerezera pinthu pinakomerwa na ife basi pyakuti mbapidafudza uxamwali wathu na Yahova.—1 Akor. 15:33, 34.

10. Cidikhiro cinakuphedzani tani toera mukhonde kukwatika na manyerezero akuipa?

¹⁰ Cidikhiro cathu cinakwanisambo kutsidzikiza manyerezero athu toera tikhonde kunyerezera kuti nee tinakwanisa kutsandzayisa Yahova. Panango anthu anango ananyerezera tenepa: “Ine nee ndinakwanisa kukhala m’bodzi wa ale anafuna kukhala na umaso wakwenda na kwenda thangwi nee ndine munthu wadidi. Ine cipo ndinakwanisa kucita pinthu pinafuna Mulungu. Kumbukani kuti Elifaji akhali na maonero mabodzi ene pidalonga iye na Yobe. Elifaji alonga: ‘Pinakwanisika tani kuti munthu akhale wakucena?’ Buluka penepo iye alonga tenepa thangwi ya Mulungu: ‘Ona, iye nkhabe kunyindira aanju ace, nee kudzulu si kwakucena tayu pamaso pace.’ (Yobe 15:14, 15) Unoyu ndi uthambi ukulu kakamwe! Kumbukani kuti anacitisa anthu kunyerezera tenepo ndi Sathani. Iye asadziwa kuti imwe mungapitiriza kunyerezera tenepo cidikhiro canu cinafewa. Natenepa imwe nee musafunika kukwatika na uthambi unoyu. Mbwenye nyindirani mapikiro a Yahova. Lekani kupenula kuti iye asafuna kuti imwe mukhale na umaso wakwenda na kwenda, pontho iye anakuphedzani toera imwe mukhale na umaso unoyu.—1 Tim. 2:3, 4.

11. Thangwi yanji tisafunika kudikhira mwakupirira kuti Mulungu acite pidapikira iye?

¹¹ Midzidzi inango pisakhala pyakunentsa kukhala na cidikhiro cakuwanga. Panango tinaneta kudikhira Mulungu toera acite pidapikira iye. Mbwenye Yahova asakhala kwenda na kwenda. Natenepa pinthu pinaona ife kuti piri kudembuka, iye asapiona mwakusiyana. (2 Ped. 3:8, 9) Iye anacita pinthu pidapikira iye munjira yadidi kakamwe. Mbwenye panango nee anapicita pa ndzidzi unadikhira ife. Mphapo ninji cinafuna kutiphedza toera tikhale na cidikhiro cakuwanga mu ndzidzi unadikhira ife mwakupirira kuti Mulungu acite pidapikira iye?—Tiya. 5:7, 8.

12. Mwakubverana na Ahebheri 11:1, 6, toera tikhale na cidikhiro, thangwi yanji tisafunika kukhulupira kuti Yahova alipo?

¹² Ife tinakhala na cidikhiro cakuwanga tingapitiriza kukhala na uxamwali wakuwanga na Yahova thangwi ndiye anatipasa cidikhiro. Toera tikhale na cidikhiro, ife tisafunika kukhulupira kuti Yahova alipo, pontho iye asapasa “nkhombo ale anansaka na ntima onsene.” (Lerini  Ahebheri 11:1, 6.) Tingakhulupira kuti mwandimomwene Yahova alipo, tinanyindira kuti iye anacita pyonsene pinapikira iye. Cincino tendeni tione pinthu pingasi pinafuna kutiphedza toera tikhale na uxamwali wakuwanga na Yahova mbatiwangisa cidikhiro cathu.

13. Tinakhala tani na uxamwali wakuwanga na Mulungu?

¹³ Citani phembero kuna Yahova, pontho lerini Bhibhlya. Ngakhale ife nee tinakwanisa kuona Yahova, ife tinakwanisa kukhala na uxamwali wakuwanga na iye. Toera kulonga naye ife tinakwanisa kucita phembero na cinyindiro cakuti iye anatibvesera. (Yer. 29:11, 12) Ife tinakwanisa kubvesera pinalonga iye mu ndzidzi unaleri ife Bhibhlya mbatinyerezera mwadidi pinaleri ife. Mu ndzidzi unaleri ife mphangwa zinalonga kuti Yahova atsalakana tani atumiki ace akukhulupirika nduli cikhulupiro cathu cinakhala cakuwanga kakamwe. Thangwi “pinthu pyonsene pinagumanika m’Bhibhlya pyalembwa toera kutipfundzisa toera kubulukira mukupirira kwathu na cibalangazo cathu cinagumana ife m’malemba tikwanise kukhala na cidikhiro.”—Aroma 15:4.

14. Thangwi yanji tisafunika kunyerezera pinthu pidacitira Yahova atumiki ace anango?

¹⁴ Nyerezerani pinthu pidapikira Yahova mbapicita. Onani pinthu pidacita Mulungu kuna Abhrahamu na Sara. Iwo akhadakalamba kakamwe. Natenepa nee mbadakwanisabve kubala ana. Mbwenye Mulungu apikira kuti iwo mbadabala mwana. (Gen. 18:10) Mphapo Abhrahamu acitanji? Bhibhlya isalonga: “Iye akhulupira kuti mbadakhala baba wa madzindza mazinji.” (Aroma 4:18) Maseze Abhrahamu nee akhadziwa kuti Yahova mbadacita tani pinthu pikhadapikira iye, iye akhali na cinyindiro cakuti Yahova mbadapicita. Abhrahamu nee atsukwaliswa, thangwi Yahova acita pidapikira iye. (Aroma 4:19-21) Pyenepi pisatipfundzisa kuti ndzidzi onsene tisafunika kunyindira mapikiro a Yahova mwakukhonda tsalakana khala pinthu pinapikira iye tisapiona kuti ndi pyakunentsa kupitawira.

15. Thangwi yanji tisafunika kunyerezera pinthu pidaticitira Mulungu?

 ¹⁵ Nyerezerani pinthu pidakucitirani Yahova. Nyerezerani kuti mwaphedzeka tani thangwi yakukwanirisika kwa mapikiro a Mulungu anagumanika m’Bhibhlya. Mwacitsandzo, Yezu apikira kuti Babace anadzakupasani pinthu pyonsene pinafuna imwe toera mukhale m’maso. (Mat. 6:32, 33) Yezu alongambo kuti tingaphemba nzimu wakucena, Yahova anatipasa. (Luka 11:13) Yahova asacita pyenepi. Panango imwe munanyerezera pinthu pinango pidapikira Yahova mbakucitirani. Mwacitsandzo, iye apikira kuti anakulekererani, anakubalangazani, pontho anakupfundzisani toera mukhale na uxamwali wakuwanga na iye. (Mat. 6:14; 24:45; 2 Akor. 1:3) Munganyerezera pinthu pidacita Mulungu kuna imwe, munakhala na cidikhiro cakuwanga thangwi ya pinthu pinafuna kukucitirani iye ntsogolo.

16. Thangwi yanji cidikhiro ndi muoni wadidi kakamwe udatipasa Mulungu?

¹⁶ Cidikhiro cathu cakukhala na umaso wakukhonda mala ndi muoni wadidi kakamwe udatipasa Mulungu. Ife tisadikhira pinthu pyadidi kakamwe pinafuna kucitika ntsogolo, pontho tiri na cinyindiro cakuti pinthu pyenepi pinadzacitikadi. Cidikhiro cathu cisakhala ninga nangula thangwi ico cisatiphedza toera kupirira mayesero, kutcingwa, pontho cisatiphedza toera kupirira anthu angafuna kutipha. Cidikhiro cathu cisakhalambo ninga capeu ca utale thangwi cisatsidzikiza manyerezero athu toera tikhonde pinthu pyakuipa mbaticita pinthu pyadidi. Kusiyapo pyenepi cidikhiro cinakhala na ife thangwi yakupfundza Bhibhlya cisatiphedza toera kukhala na uxamwali wakuwanga na Yahova, pontho cisapangiza kuti Yahova asatifuna kakamwe. Natenepa cidikhiro cathu cingapitiriza kukhala cakuwanga ico cinatiphedza kakamwe.

17. Thangwi yanji cidikhiro cathu cisatitsandzayisa?

¹⁷ Mpostolo Paulu alemba tenepa mu tsamba idalembera iye Akristu a ku Roma: “Tsandzaya thangwi ya cidikhiro canu.” (Aroma 12:12) Paulu mbadakwanisa kutsandzaya thangwi iye akhadziwa kuti angapitiriza kukhala wakukhulupirika iye mbadakhala na umaso wakukhonda mala kudzulu. Ife tinakwanisambo kutsandzaya thangwi ya cidikhiro cathu thangwi tisadziwa kuti Yahova anacita pinthu pidapikira iye. Nyamasalmo alemba: ‘Nyakutsandzaya ndi ule wakuti asadikhira Yahova Mulungu wace. Ule wakuti ndi wakukhulupirika ndzidzi onsene.’—Masal. 146:5, 6.