NSOLO WA PFUNDZIRO 38
Aphale na Atsikana—Munacitanji mu Umaso Wanu?
“Luso yakubvesesa inakutsidzikiza.”—MIS. 2:11.
NYIMBO 135 Yahova Asatiphemba Mwaufuni: ‘Mwananga, Khala Wandzeru’
PINAFUNA IFE KUPFUNDZA a
1. Ndi pinentso pipi pidathimbana na Yeowasi, Uziya na Yosiya?
NYEREZERANI kuti mwakhazikiswa ninga mambo toera kutonga mbumba ya Mulungu mu ndzidzi wakuti muli mwana peno m’phale. Mbamudaphatisira tani cidzo canu? Bhibhlya isalonga pya aphale azinji adakhala amambo mu Yuda. Mwacitsandzo, Yeowasi akhali basi ene na pyaka 7 pyakubalwa, Uziya akhali na 16, pontho Yosiya akhali na pyaka 8. Panango pyenepi pikhali pyakunentsa kakamwe kuna iwo! Mbwenye mwakukhonda tsalakana pinentso pidathimbana na iwo, Yahova na anthu anango aaphedza toera kucita pinthu pizinji pyadidi.
2. Thangwi yanji tisafunika kupfundza citsandzo ca Yeowasi, Uziya na Yosiya?
2 Ife nee ndife amambo, mbwenye tinakwanisa kupfundza pizinji na citsandzo ca Yeowasi, Uziya na Yosiya. Ife tinaona kuti tinapfundzanji kubulukira mu pisankhulo pyadidi pidacita iwo na pisankhulo pyakuipa pidacita iwo. Kubulukira mu pitsandzo pyawo, tinaona kuti thangwi yanji tisafunika kusankhula axamwali adidi, kukhala akucepeseka na kupitiriza kusaka Yahova.
SANKHULANI AXAMWALI ADIDI
Ndi pyakukwanisika kutowezera citsandzo ca Yeowasi lero mukubvera uphungu wa axamwali adidi (Onani ndima 3, 7) c
3. Nyantsembe Wankulu Yeoyadha aphedza tani Mambo Yeowasi toera acite pisankhulo pyadidi?
3 Towezerani citsandzo ca Yeowasi pakucita pisankhulo. Pikhali iye mwana, Mambo Yeowasi acita pisankhulo pyandzeru. Maseze nee akhali na baba, iye atowezera citsogolero ca Nyantsembe Wankulu, Yeoyadha. Nyantsembe Yeoyadha apfundzisa Yeowasi ninga mwanace. Na thangwi ineyi, Yeowasi asankhula kutumikira Yahova na kuphedza anthu toera acitembo pibodzi pyene. Kusiyapo pyenepi, Yeowasi acita masasanyiro toera templo ya Yahova isasanyirwe.—2 Kro. 24:1, 2, 4, 13, 14.
4. Tinaphedzeka tani tingafuna Yahova na kubvera matongero ace? (Misangani 2:1, 10-12)
4 Khala anyakubalanu peno munthu unango asakupfundzisani toera kufuna Yahova na kubvera midida yace, imwe muli na mwai ukulu kakamwe. (Lerini Misangani 2:1, 10-12.) Anyakubalanu anakwanisa kukupfundzisani munjira zizinji. Onani kuti mulongo Katya aphedzwa tani na pai wace toera kucita pisankhulo pyadidi. Ntsiku zonsene zikhaenda iye na pai wace kamperekera kuxikola, akhacedza pya lemba ya ntsiku. Mulongo Katya alonga: “Kucedza kweneku kukhandiphedza toera kuthimbana na nyatwa zikhafuna kuoneka pa ntsiku ineyi.” Mphapo ndiye tani khala anyakubalanu asakupasani mitemo yakuti isabverana na Bhibhlya, mbwenye imwe panango musaona kuti mitemo ineyi nee isakupasani ufulu toera kucita pinafuna imwe? Ninji pinafuna kukuphedzani toera kubvera mitemo yawo? Mulongo anacemerwa Anastasia asakumbuka kuti anyakubalace acedza naye toera kunfokotozera kuti thangwi yanji iwo akhazikisa mitemo ineyi. Iye alonga: “Kucedza kweneku kwandiphedza toera kubvesesa kuti iwo nee akhazikisa mitemo ineyi toera kundipingiza pinthu pinango, mbwenye ndi toera kunditsidzikiza thangwi iwo asandifuna.”
5. Pinthu pinacita imwe pisakhuya tani anyakubala anu na Yahova? (Misangani 22:6; 23:15, 24, 25)
5 Anyakubalanu anatsandzaya kakamwe mungabvera uphungu unakupasani iwo kubulukira m’Bhibhlya. Kusiyapo pyenepi, imwe munatsandzayisa Yahova mbamukhala na uxamwali wakuwanga na iye. (Lerini Misangani 22:6; 23:15, 24, 25.) Anewa ndi mathangwi adidi toera kutowezera citsandzo ca Yeowasi mu ndzidzi ukhali iye mwana.
6. Pidafa Yeoyadha, ndi uphungu upi udatoma kubvera Mambo Yeowasi, pontho ninji pidacitika? (2 Kronika 24:17, 18)
6 Pfundzani na pisankhulo pyakuipa pidacita Yeowasi. Pidafa Yeoyadha, Yeowasi asankhula axamwali akuipa. (Lerini 2 Kronika 24:17, 18.) Iye abvera atsogoleri a ku Yuda akuti nee akhafuna Yahova. Panango munatawirambo kuti Yeowasi nee akhafunika kucita uxamwali na anthu anewa, thangwi iwo akhacita pinthu pyakuipa. (Mis. 1:10) Mbwenye iye abvera uphungu wawo wakuipa. Na thangwi ineyi, pidasandikwa iye na Zakariya, mwana wa nyantsembe Yeoyadha, Yeowasi am’phesa. (2 Kro. 24:20, 21; Mat. 23:35) Pyenepi pikhali pyakuipa na pyakusowa ndzeru! Umaso wa Yeowasi watoma mwadidi, mbwenye mwakutsukwalisa iye adzakhala nyakupanduka na phanga. Pakumalisa iye adzaphiwa na anyabasa ace. (2 Kro. 24:22-25) Umaso wa Yeowasi mbudakhala wakusiyana kakamwe mbadapitiriza kubvera Yahova na ale akhafuna Yahova. Mwapfundzanji na citsandzo ceneci?
7. Ndi anthu api asafunika kukhala axamwali anu? (Onanimbo foto.)
7 Cinthu cibodzi cinapfundza ife thangwi ya cisankhulo cakuipa cidacita Yeowasi ndi cakuti tisafunika kusankhula axamwali akuti asafuna Yahova, pontho asafuna kuntsandzayisa. Ife nee tisafunika kucita uxamwali basi ene na anthu a thunga yathu. Kumbukani, Yeowasi akhali mwana kakamwe kupiringana xamwali wace, Yeoyadha. Bvundzikani tenepa thangwi ya axamwali anasankhula imwe: ‘Kodi iwo asandiphedza toera ndiwangise cikhulupiro canga kuna Yahova? Kodi iwo asandiwangisa toera ndibvere midida ya Mulungu? Kodi iwo asalonga thangwi ya Yahova na pinthu pinapfundza iwo m’Bhibhlya? Asapangiza kuti asalemedza midida ya Mulungu? Kodi iwo asandipanga basi ene pinakomerwa na ine peno asandisandika ndingacita cinthu cakuipa?’ (Mis. 27:5, 6, 17) Mwandimomwene, khala axamwali anu nee asafuna Yahova, iwo nee anakuphedzani. Mbwenye khala iwo asafuna Yahova, ndzidzi onsene anakuphedzani!—Mis. 13:20.
8. Tisafunika kukumbukanji khala tisaphatisira interneti?
8 Midzidzi inango interneti ndi njira yadidi toera kucedza na acibale athu kuphatanizambo axamwali. Mbwenye azinji asaphatisira interneti toera kupangiza mafoto na mavidhyu a pinthu pidagula iwo peno pidacita iwo. Khala imwe musaphatisira interneti, bvundzikani: ‘Kodi cifuno canga ndi kupangiza anango pinthu piri na ine? Ndisafuna kupangiza anango pinthu pyadidi peno ndisafuna kuti iwo andisimbe? Ndiri kutawirisa kuti maonero a anango akhuye munjira yakuipa manyerezero anga, malongero anga na pinthu pinacita ine?’ M’bale Nathan Knorr, wakuti akhatumikira ninga m’bodzi wa Mathubo Akutonga apereka uphungu uyu: “Lekani yesera kukomeresa anthu, thangwi mungacita pyenepi nkhabe anafuna imwe kukomeresa. Basi ene komeresani Yahova, pontho mungacita pyenepi anthu onsene anafuna Yahova anakomerwa.”
TISAFUNIKA KUKHALA AKUCEPESEKA
9. Yahova aphedza Uziya toera acitenji? (2 Kronika 26:1-5)
9 Towezerani Uziya pakucita pisankhulo. Pikhali iye m’phale, Mambo Uziya akhali wakucepeseka. Iye apfundziswa “toera agope Mulungu wandimomwene.” Iye afa na pyaka 68 pyakubalwa, pontho Yahova ampasa nkhombo mu pyaka pizinji pya umaso wace. (Lerini 2 Kronika 26:1-5.) Uziya akunda anyamalwa azinji, pontho acitisa kuti Yerusalemu akhale wakutsidzikizika. (2 Kro. 26:6-15) Mwakukhonda penula, Uziya akhali wakutsandzaya thangwi ya pinthu pidacita iye na ciphedzo ca Mulungu.—Ekl. 3:12, 13.
10. Ninji pidacitika na Uziya?
10 Pfundzani na pisankhulo pyakuipa pidacita Uziya. Mambo Uziya akhadadzolowera kupasa anango pitsogolero. Panango ndi pyenepi pidancitisa kunyerezera kuti anakwanisa kucita pyonsene pinafuna iye. Thangwi ntsiku inango Uziya apita mu templo ya Yahova mwakudzikuza toera kupisa insenso pa guwa.Amambo nee akhatawiriswa kucita pyenepi. (2 Kro. 26:16-18) Nyantsembe Wankulu Azariya ayesera kunkhondesa, mbwenye Uziya aipirwa kakamwe. Mwakutsukwalisa, Uziya asiya kukhala wakukhulupirika, pontho Yahova antcunyusa na matanya. (2 Kro. 26:19-21) Mbadapitiriza kukhala wakucepeseka, umaso wace mbudakhala wadidi kakamwe.
M’mbuto mwakudzikuza thangwi ya pinthu pinacita ife, tisafunika kupereka takhuta kuna Yahova thangwi ya pinthu pinakwanisa ife kucita (Onani ndima 11) d
11. Ninji pinafuna kutiphedza toera tipitirize kukhala akucepeseka? (Onanimbo foto.)
11 Uziya pidakhala iye wamphambvu, iye aduwala kuti ndi Yahova akhampasa mphambvu zenezi. Pyenepi pisatipfundzisanji? Ife tisafunika kukumbuka kuti ndi Yahova anatipasa nkhombo na miyai yonsene iri na ife. M’mbuto mwakudzikuza thangwi ya pinthu pinakwanisa ife kucita, ife tisafunika kupereka takhuta kuna Yahova thangwi ya pinthu pyenepi. b (1 Akor. 4:7) Ife tisafunikambo kudzindikira mwakucepeseka kuti ndife akusowa ungwiro, pontho tisafunika kusandikwa. M’bale unango wakuti ali cifupi na pyaka 60 alonga: “Ine ndapfundza kuti nee ndisafunika kuipirwa peno kubwerera nduli anango angandisandika. Ndingasandikwa thangwi ya madodo anacita ine midzidzi inango, ndisawangisira toera ndipitirize kutumikira Yahova munjira yadidi.” Tingabvera Yahova mbatikhala akucepeseka, tinakhala akutsandzaya kakamwe.—Mis. 22:4.
PITIRIZANI KUSAKA YAHOVA
12. Yosiya asaka tani Yahova pikhali iye m’phale? (2 Kronika 34:1-3)
12 Towezerani Yosiya pakucita pisankhulo. Yosiya akhali na pyaka 16 pyakubalwa pidatoma iye kusaka Yahova. Iye akhafuna kupfundza thangwi ya Yahova na kucita cifuno cace. Mbwenye umaso ukhali wakunentsa kuna mambo unoyu. Thangwi mu ndzidzi unoyu, anthu azinji akhalambira alungu authambi, natenepa Yosiya akhafunika kuphedza anthu toera asiye kucita pyenepi. Pontho iye acita pyenepi. Mbadzati kukhala na pyaka 20 pyakubalwa, Yosiya atoma kufudza ulambiri wauthambi mu Yuda na Yerusalemu.—Lerini 2 Kronika 34:1-3.
13. Kuperekeka kuna Yahova kusabvekanji kuna imwe?
13 Maseze ndimwe m’phale kakamwe, imwe munakwanisa kutowezera citsandzo ca Yosiya mukusaka Yahova na kupfundza thangwi ya makhaliro Ace. Pyenepi pinakucitisani kufuna kuperekeka kuna iye. Mphapo kuperekeka kweneku kunakhuya tani umaso wanu? Luke wakuti abatizwa na pyaka 14 pyakubalwa alonga: “Kutomera lero, ndinaikha kutumikira Yahova pa mbuto yakutoma mu umaso wanga mbandiwangisira toera kuntsandzayisa.” (Marko 12:30) Pinakhala pyakutsandzayisa kakamwe kuna imwe mungasankhula kucitambo pibodzi pyene!
14. Perekani citsandzo ca aphale angasi akuti atowezera citsandzo ca Mambo Yosiya.
14 Ndi pinentso pipi pyakuti panango munathimbana napyo ninga m’phale anatumikira Yahova? Johan wakuti abatizwa na pyaka 12 pyakubalwa alonga kuti andzace a kuxikola akhankakamiza toera afumali. Toera kukunda mayesero anewa, Johan akumbuka kuti kufumali mbakudaphekesa ungumi wace, pontho mbakudafudza uxamwali wace na Yahova. Rachel wakuti abatizwa na pyaka 14, afokotoza pinthu pidamphedza toera kukunda mayesero anathimbana na iye kuxikola. Iye alonga: “Ndisayesera kuona pinthu pinandikumbusa thangwi ya Bhibhlya na Yahova. Mwacitsandzo, ndingapfundza disciplina ya Istorya panango ndisakumbuka profesiya peno mphangwa zinango za m’Bhibhlya. Midzidzi inango ndingacedza na anango kuxikola, ndisakumbuka lemba yakuti ndinakwanisa kuileri kuna iwo.” Pinentso pinathimbana na imwe panango pinakhala pyakusiyana na pidathimbana na Mambo Yosiya, mbwenye imwe munakwanisa kukhala wandzeru na wakukhulupirika ninga iye. Kuthimbana na pinentso mu uphale wanu kunakuphedzani toera kuthimbana na pinentso pinango pinafuna kuoneka ntsogolo.
15. Ninji pidaphedza Yosiya toera atumikire Yahova mwakukhulupirika? (2 Kronika 34:14, 18-21)
15 Pikhali iye na pyaka 26 pyakubalwa, Mambo Yosiya atoma kusasanyira templo. Mu ndzidzi ukhacitwa basa ineyi, iwo agumana “bukhu ya Mwambo wa Yahova udaperekwa na Mose.” Pidabva Yosiya pikhalerwi mwambo unoyu, iye acita pinthu mwakubverana na pidalembwa mwenemo. (Lerini 2 Kronika 34:14, 18-21.) Kodi imwe musafuna kuleri Bhibhlya ntsiku zonsene? Panango musapicita kale pyenepi; mphapo musakomerwa napyo? Kodi imwe musaikha cidzindikiro m’mavesi anaona imwe kuti anakuphedzani mu umaso wanu? Luke adalongwa pakutoma asalemba n’kadernu angagumana pinthu pyakuti pinamphedza. Kucita pyenepi kunakuphedzani toera kukumbuka mavesi a Bhibhlya na pinthu pinapfundza imwe m’mavesi anewa. Mungadziwa kakamwe Bhibhlya na kukomerwa nayo, imwe munafunambo kakamwe kutumikira Yahova. Ninga Mambo Yosiya, pyenepi pinakuphedzani toera kubvera Mafala a Mulungu.
16. Thangwi yanji Yosiya acita madodo makulu, pontho pyenepi pisatipfundzisanji?
16 Pfundzani na cisankhulo cakuipa cidacita Yosiya. Pikhali Yosiya na pyaka 39 pyakubalwa, iye acita madodo akuti ancitisa kuphiwa. Iye anyindira ndzeru zace m’mbuto mwakusaka citsogolero ca Yahova. (2 Kro. 35:20-25) Tisapfundzanji? Mwakukhonda tsalakana khala ndife nkulu peno mwana peno khala tiri kupfundza Bhibhlya mu pyaka pizinji, tisafunika kupitiriza kusaka citsogolero ca Yahova. Pyenepi pisaphataniza kuphemba citsogolero cace ndzidzi onsene, kupfundza Mafalace na kubvera uphungu wa Akristu akukola mwauzimu. Tingacita pyenepi, tinacalira kucita madodo makulu, pontho tinakhala akutsandzaya.—Tiya. 1:25.
APHALE NA ATSIKANA—IMWE MUNAKWANISA KUKHALA NA UMASO WAKUTSANDZAYA
17. Tisapfundzanji na pidacitikira amambo atatu a ku Yuda?
17 Pana pinthu pizinji pyakutsandzayisa pyakuti munakwanisa kupicita mu uphale wanu. Citsandzo ca Yeowasi, Uziya na Yosiya cisapangiza kuti aphale na atsikana anakwanisa kucita pisankhulo pyandzeru mbakomeresa Yahova mu umaso wawo. Ndimomwene kuti aphale anewa acita pisankhulo pyakuipa pyakuti pyaabweresera nyatwa. Mbwenye mungatowezera pinthu pyadidi pidacita iwo, munacalira kucita madodo mabodzi ene mbamukhala akutsandzaya.
Kutomera mu uphale wace, Dhavidhi akhali na uxamwali wakuwanga na Yahova. Iye akhali wakutawirika kuna Mulungu, pontho akhali na umaso wakutsandzaya (Onani ndima 18)
18. Ndi pitsandzo pipi pya m”Bhibhlya pinapangiza kuti imwe munakwanisa kukhala na umaso wakutsandzaya? (Onanimbo foto.)
18 M’Bhibhlya muli na pitsandzo pya aphale akuti akhali na uxamwali wakuwanga na Yahova, akhali akutawirika kuna iye, pontho akhali na umaso wakutsandzaya. Dhavidhi akhali m’bodzi wa iwo. Pikhali iye m’phale, asankhula kulambira Yahova, pontho mukupita kwa ndzidzi adzakhala mambo wakukhulupirika. Ndimomwene kuti midzidzi inango Dhavidhi akhacita madodo, mbwenye Mulungu akhamuona ninga munthu wakukhulupirika. (1 Ama. 3:6; 9:4, 5; 14:8) Mungapfundza thangwi ya Dhavidhi, citsandzo cace cinakukulumizani toera kutumikira Yahova mwakukhulupirika. Imwe munakwanisambo kupfundza pizinji na citsandzo ca Marko na Timoti. Iwo atoma kutumikira Yahova pikhali iwo ana kakamwe, pontho apitiriza kuntumikira mwakukhulupirika. Yahova atsandzaya kakamwe na cisankhulo cidacita iwo, pontho iwo akhalambo akutsandzaya.
19. Ninji pinafuna kukuphedzani toera kukhala na umaso wakutsandzaya?
19 Njira inaphatisira imwe umaso wanu cincino inakhuyambo umaso wanu ntsogolo. Munganyindira Yahova mbuto mwakunyindira ndzeru zanu, iye anakuphedzani toera mucite pisankhulo pyandzeru. (Mis. 20:24) Imwe munakwanisa kukhala na umaso wakutsandzaya. Kumbukani kuti Yahova asakomerwa kakamwe na pinacita imwe kuna iye. Nkhabepo njira yadidi kakamwe yakuphatisira umaso wanu kupiringana kutumikira Babathu wakudzulu, Yahova.
NYIMBO 144 Pitirizani Kuyang’ana Sagwati!
a Aphale na atsikana, Yahova asadziwa kuti imwe musathimbana na pinentso pyakuti pinayesera kukhulupirika kwanu kuna iye. Munakwanisa tani kucita pisankhulo pyakuti pinakomeresa Babanu wakudzulu? Ife tinaona pitsandzo pya aphale atatu akuti adzakhala amambo a ku Yuda. Onani kuti munapfundzanji na pisankhulo pidacita iwo.
b Onani bokosi ya nsolo wakuti “Cuidado com a ‘Falsa Modéstia’” inagumanika mu nsolo wakuti “É importante ser popular nas redes sociais?” mu jw.org.
