1-2. Thangwi yanji ndi pyadidi kupfundza pinthu pidacitika mu umaso wa Samisoni?

 NINJI pinanyerezera imwe mungabva dzina ya Samisoni? Panango musanyerezera kuti iye akhali mamuna wamphambvu kakamwe. Unoyu ndi undimomwene. Mbwenye Samisoni acita pisankhulo pyakuipa pidam’bweresera nyatwa zizinji. Ngakhale tenepo, Yahova akumbuka kukhulupirika kwa Samisoni, pontho Iye alembesa citsandzo cace m’Bhibhlya toera kutiphedza.

² Yahova aphatisira Samisoni toera kuphedza Aizraeli. Pidapita pyaka pizinji pakumala kufa kwa Samisoni, Yahova aphatisira mpostolo Paulu toera kulemba dzina ya Samisoni pa ndandanda ya anthu akukhulupirika. (Aheb. 11:32-34) Citsandzo ca Samisoni cinatiwangisambo. Iye anyindira Yahova, ngakhale m’midzidzi ya nyatwa. Mu nsolo uno tinaona kuti tinapfundzanji na citsandzo ca Samisoni, pontho citsandzo cace cinatiwangisa tani.

3. Ndi basa ipi idatambira Samisoni?

³ Mu ndzidzi udabalwa Samisoni, Afilisti akhatonga mbumba ya Izraeli na kuithabusa. (Aton. 13:1) Aizraeli akhathabuka thangwi Afilisti akhali akuipa kakamwe. Yahova asankhula Samisoni toera ‘kupulumusa Aizraeli m’manja mwa Afilisti.’ (Aton. 13:5) Ineyi ikhali basa yakunentsa kakamwe. Natenepa toera kucita basa ineyi, Samisoni akhafunika kunyindira Yahova.

4. Yahova aphedza tani Samisoni toera athawe Afilisti? (Atongi 15:14-16)

 ⁴ Onani citsandzo cinapangiza kuti Samisoni akhanyindira Yahova na ciphedzo cace. Ntsiku inango, anyankhondo Afilisti aenda kamanga Samisoni ku Lei, kwakuti panango kukhali ku Yuda. Amuna a ku Yuda agopa kakamwe, natenepa iwo aona kuti pikhali pyadidi kupereka Samisoni kuna Afilisti. Iwo amanga Samisoni na nkhambala ziwiri zipswa mbampereka kuna Afilisti. (Aton. 15:9-13) Mbwenye “nzimu wa Yahova wampasa mphambvu” mbathumula nkhambala zikhadamangwa na iye. Buluka penepo, iye “aona ntsaya za buru imuna,” azikwata mbapha nazo Afilisti 1.000.—Lerini Atongi 15:14-16.

5. Samisoni apangiza tani kuti akhanyindira Yahova?

⁵ Thangwi yanji Samisoni aphatisira ntsaya za buru? Ceneci nee cikhali cida cakuthema toera kuciphatisira. Mbwenye Samisoni akhadziwa kuti Yahova mbadam’phedza toera kukunda Afilisti mwakukhonda tsalakana cida cikhaphatisira iye. Natenepa, mamuna unoyu wakukhulupirika aphatisira cinthu cidaona iye toera kukwanirisa cifuno ca Yahova. Mwakukhonda penula, Samisoni akunda amuna anewa onsene thangwi yakunyindira Yahova.

6. Tisapfundzanji na Samisoni thangwi yakucita mabasa a Yahova?

⁶ Ifembo tinakwanisa kupaswa mphambvu na Yahova toera kucita mwadidi mabasa anapaswa ife, maseze aoneke ninga akunentsa. Pontho Mulungu anakwanisa kutiphedza munjira yakuti nee tikhaidikhira. Nyindirani kuti Yahova adapasa mphambvu Samisoni anakuphedzanimbo toera kucita cifuno cace mungan’nyindira.—Mis. 16:3.

7. Longani citsandzo cinapangiza kuti ndi pyakufunika kusaka citsogolero ca Yahova.

⁷ Abale na alongo azinji anaphedzera basa yakumanga Nyumba za Umambo asapangiza kuti asanyindira Yahova. Kale, abale akhamanga Nyumba za Umambo zizinji na nyumba zinango. Mbwenye nakuti anthu azinji kakamwe ali kubatizwa, gulu ya Yahova yacita macinjo. Abale anatsogolera aphemba citsogolero  ca Yahova mbatoma kuphatisira njira zipswa, ninga kugula nyumba zidamangwa kale na kuzisasanyira. M’bale Robert, wakuti aphata basa yakumanga pyaka pizinji pa dziko yonsene alonga: “Pakutoma pikhali pyakunentsa kuna anango toera kuphatisira njira ineyi.” Iye athimiza: “Pikhali pyakusiyana kakamwe na pikhacita ife mu pyaka pizinji. Mbwenye abale na alongo akhali dzololo toera kudzolowera njira ineyi ipswa, pontho pisaoneka pakweca kuti Yahova ali kupasa nkhombo macinjo anewa.” Ceneci ndi cibodzi mwa pitsandzo pinapangiza kuti Yahova ali kutsogolera atumiki ace toera kukwanirisa cifuno cace. Natenepa, ife tonsene tisafunika kubvundzika: ‘Kodi ine ndisasaka citsogolero ca Yahova, pontho ndiri dzololo toera kucita macinjo kuti ndintumikire munjira yadidi?’

8. Ntsiku inango pikhali iye na nyota kakamwe, Samisoni acitanji?

⁸ Panango imwe musakumbuka pinthu pinango pyakudzumatirisa pidacita Samisoni. Iye apha nkhalamu, pontho mukupita kwa ndzidzi apha Afilisti 30 ku Asikaloni. (Aton. 14:5, 6, 19) Samisoni akhadziwa kuti nee mbadakwanisa kucita pinthu pyenepi mbadasowa ciphedzo ca Yahova. Iye apangiza pyenepi mu ndzidzi ukhali iye na nyota ikulu kakamwe pakumala kupha Afilisti 1.000. Ninji pidacita iye? M’mbuto mwakunyindira mphambvu zace na maluso ace toera kugumana madzi, iye aphemba ciphedzo ca Yahova.—Aton. 15:18.

9. Yahova atawira tani phembero ya Samisoni? (Atongi 15:19)

⁹ Yahova atawira phembero ya Samisoni mukumpasa madzi mwacirengo. Pidamwa iye madzi anewa, “akhala pontho na mphambvu mbakhala mwadidi.” (Lerini Atongi 15:19) Pisaoneka kuti mbuto idabuluka madzi anewa yapitiriza kuoneka mu pyaka pizinji mpaka mu ndzidzi udalemba Samweli bukhu ya Atongi. Aizraeli akhaona madzi anewa, panango akhakumbuka kuti anganyindira Yahova, iye anaphedza atumiki ace akukhulupirika mu ndzidzi unafuna iwo ciphedzo.

10. Tisafunika kucitanji toera titambire ciphedzo ca Yahova? (Onanimbo foto.)

¹⁰ Ife tisafunikambo kuphemba ciphedzo ca Yahova mwakukhonda tsalakanana maluso athu peno pinthu pidakwanisa ife kucita m’basa yace. Ife tisafunika kukhala akucepeseka mbatitawira kuti tinakwanisa kucita mwadidi mabasa a Yahova basi ene tinga’nyindira. Ninga Samisoni wakuti akhala na mphambvu pidamwa iye madzi adampasa Yahova, ife tinakhalambo akuwanga mwauzimu tingaphatisira pinthu pyonsene pinatipasa Yahova.—Mat. 11:28.

11. Tinaphedzeka tani na pinthu pinatipasa Yahova? Perekani citsandzo.

¹¹ Onani citsandzo ca Aleksey, m’bodzi mwa abale a ku Rusya wakuti ali kupirira kutcingwa. Ninji pidamphedza toera akwanise kupirira pinentso pyonsene? Iye na nkazace asapfundza Bhibhlya na kulambira Yahova ntsiku zonsene. Iye alonga: “Ndisawangisira toera kucita pfundziro yanga ya munthu paekha na kuleri Bhibhlya ntsiku zonsene. Ntsiku zonsene namacibese ine na nkazanga tisaleri lemba ya ntsiku pabodzi mbaticita phembero kuna Yahova.” Tisapfundzanji na pyenepi? M’mbuto mwakunyindira maluso athu, ife tisafunika kunyindira Yahova. Tinacita tani pyenepi? Tingacita pinthu pinawangisa cikhulupiro cathu ninga kupfundza Bhibhlya, kucita phembero, kugumanika pa misonkhano na kumwaza mphangwa. Tingacita  pyenepi, Yahova anatiphedza toera tipitirize kuntumikira. Mwakukhonda penula, Iye anatipasambo mphambvu ninga pidacita iye na Samisoni.

12. Ndi cisankhulo cipi cidacita Samisoni, pontho pyenepi pyasiyana tani na nkazi akhafuna iye kumanga naye banja pakutoma?

¹² Samisoni akhali wakusowa ungwiro ninga ife, natenepa midzidzi inango akhacita pisankhulo pyakuipa. Cibodzi mwa pisankhulo pidacita iye cabweresa nyatwa zizinji. Mu ndzidzi ukhatumikira iye ninga ntongi, Samisoni, ‘asirira nkazi akhacemerwa Dhalila ku gowa ya Soreki.’ (Aton. 16:4) Mbadzati kusirira Dhalila, Samisoni akhafuna kumanga banja na nkazi unango wa ku Filisti, mbwenye “adacitisa pyenepi ndi Yahova,” thangwi iye “akhasaka njira toera amenyane na Afilisti.” Mukupita kwa ndzidzi, Samisoni akhala n’nyumba mwa puta unango mu nzinda wa Gaza ku Filisti. Pa ndzidzi unoyu, Mulungu apasa mphambvu Samisoni toera athukule misuwo ya nzinda, mbukhala wakusowa citsidzikizo. (Aton. 14:1-4; 16:1-3) Mbwenye Dhalila panango akhali Muizraeli, natenepa kumanga banja na iye nee mbakudapasa mwai Samisoni toera kumenyana na Afilisti.

13. Dhalila acitanji kuna Samisoni?

¹³ Dhalila atawira dinyero izinji idapaswa iye na Afilisti toera aaphedze kumanga Samisoni. Panango thangwi yakufuna kakamwe Dhalila, Samisoni nee adzindikira pinthu pikhafuna kucita Dhalila. Mwakukhonda tsalakana mathangwi a pyenepi, Dhalila apitiriza kukakamiza Samisoni toera kumpanga pikhancitisa kukhala na mphambvu, pontho pakumalisa Samisoni adzampanga. Mwakutsukwalisa, cisankhulo cidacita Samisoni cancitisa kuluza mphambvu zace na kusiya kukhala wakutawirika  kuna Yahova mu ndzidzi ungasi.—Aton. 16:16-20.

14. Ndi nyatwa zipi zidathimbana na Samisoni thangwi yakunyindira Dhalila?

¹⁴ Samisoni athabuka kakamwe thangwi yakunyindira Dhalila m’mbuto mwakunyindira Yahova. Afilisti am’manga mbamphola maso. Iwo anfungira nkaidi ku Gaza, kwakuti iye akhadakhutca nsuwo ukulu wa nzinda, pontho ancitisa kukhala bitcu toera kupeya tirigu. Buluka penepo, Afilisti akwata Samisoni mbamuendesa pa phwando yawo toera kumpasa manyadzo. Iwo apereka ntsembe ikulu kuna mulungu wawo wauthambi Dhagoni, thangwi akhanyerezera kuti ndiye adaaphedza kumanga Samisoni. Iwo abulusa Samisoni nkaidi mbaenda naye pa phwando yawo toera ‘aasekese.’—Aton. 16:21-25.

15. Samisoni apangiza tani kuti akhanyindira pontho Yahova? (Atongi 16:28-30) (Onani foto iri patsamba yakutoma.)

¹⁵ Samisoni akhadacita cinthu cakuipa kakamwe, mbwenye nee abwerera nduli. Iye asaka mwai toera kucita basa idapaswa iye na Mulungu yakuti ikhali basa yakumenya nkhondo na Afilisti. (Lerini Atongi 16:28-30.) Samisoni adembetera kuna Yahova: ‘Nditawiriseni toera ndibwezere pyakuipa pidacita Afilisti.’ Mulungu wandimomwene atawira phembero ya Samisoni mukumpasa pontho mphambvu mwacirengo. Samisoni apha Afilisti azinji kakamwe pa ndzidzi unoyu kupiringana midzidzi inango yonsene.

16. Tisapfundzanji na cisankhulo cakuipa cidacita Samisoni?

¹⁶ Maseze Samisoni athabuka kakamwe thangwi ya madodo ace, iye nee asiya kucita cifuno ca Yahova. Ngakhale ticite madodo mbatisandikwa peno mbatiluza mwai wakutumikira, ife nee tisafunika kubwerera nduli. Kumbukani kuti Yahova ali dzololo toera kutilekerera. (Mas. 103:8-10) Mwakukhonda tsalakana madodo adacita ife, tinakwanisa kuphatisirwa pontho na Yahova ninga pidacita iye na Samisoni.

17-18. Citsandzo ca Michael cisakuwangisani tani? (Onanimbo foto.)

¹⁷ Onani citsandzo ca m’phale anacemerwa Michael. Iye akhatumikira Yahova mwaphinga ninga ntumiki wakutumikira na mpainiya wa ndzidzi onsene. Mwakutsukwalisa, iye acita madodo adancitisa kuluza miyai yakutumikira mu mpingo. Iye alonga: “Mpaka ndzidzi unoyu ine ndikhatumikira Yahova mwadidi.”  Buluka penepo, ine ndapibva kuti ndikhali wakusowa basa kuna Yahova. Ine cipo ndanyerezera kuti Yahova mbadandisiya, mbwenye ndabvundzika khala uxamwali wanga na iye mbudakhala pontho wakuwanga peno khala mbandidakhala pontho na mwai wakuntumikira mu mpingo ninga kale.”

¹⁸ Michael nee abwerera nduli. Iye athimiza: “Ine ndawangisira toera kukhala pontho na uxamwali wakuwanga na Yahova mukucita phembero ndzidzi onsene, kupfundza Bhibhlya na kunyerezera mwadidi pikhapfundza ine.” Mukupita kwa ndzidzi, Michael akhala pontho na miyai yakutumikira mu mpingo. Cincino iye asatumikira ninga nkulu wa mpingo, pontho ninga mpainiya wa ndzidzi onsene. Iye alonga: “Ciphedzo na ciwangiso cidatambira ine makamaka kubulukira kwa akulu a mpingo pyandiphedza toera kudzindikira kuti Yahova akhapitiriza kundifuna. Ine ndisakwanisa kutumikira pontho mu mpingo na cikumbuntima cakucena. Pyenepi pyandipfundzisa kuti Yahova analekerera ale anatcunyuka na ntima onsene.” Ife tinakwanisa kukhala na cinyindiro cakuti Yahova anatiphatisirambo, pontho anatipasa nkhombo; ngakhale kuti tacita madodo; mbwenye tisafunika kucita pyonsene pinakwanisa ife toera tikhale pontho na uxamwali wakuwanga na iye mbatipitiriza kun’nyindira.—Mas. 86:5; Mis. 28:13.

19. Citsandzo ca Samisoni cisakuwangisani tani?

¹⁹ Mu nsolo uno taona pinthu pingasi pyakudzumatirisa pidacitika mu umaso wa Samisoni. Iye akhali wakusowa ungwiro, mbwenye nee asiya kutumikira Yahova, maseze pakumala kucita cisankhulo cakuipa thangwi ya Dhalila. Pontho Yahova nee ansiya. Mulungu apasa pontho mphambvu Samisoni toera kucita cifuno cace. Yahova akhapitiriza kumuona ninga munthu wakukhulupirika, pontho alembesa dzina yace pa ndandanda ya madzina a anthu akukhulupirika inagumanika pa Ahebheri 11. Ndi pyakuwangisa kakamwe kudziwa kuti tisatumikira Baba unoyu waufuni, wakuti asafuna kakamwe kutipasa mphambvu, makamaka tingathimbana na pinentso mbatifuna ciphedzo cace. Natenepa ninga Samisoni, mbatidembetereni Yahova: “Ndikumbukeni, pontho ndipaseni mphambvu.”—Aton. 16:28.