1. Ndi mibvundzo ipi yakuti panango tinaicitwa kubasa peno kuxikola?

 MUSAPIBVA tani ndzanu wakubasa peno wakuxikola angakubvundzani thangwi ya pinthu pinakhulupira imwe? Kodi imwe musagopa? Azinji a ife asagopa. Mbwenye mbvundzo unoyu panango unatiphedza toera kubvesesa pinanyerezera munthu peno pinakhulupira iye, pontho unatiphedza toera kumwaza mphangwa zadidi. Mbwenye midzidzi inango, panango munthu anacita mbvundzo thangwi nee asaphedzera maonero athu peno thangwi asafuna kuketesana na ife. Kazinji kene pyenepi pisacitika iwo angabva mphangwa zakuphonyeka thangwi ya pinthu pinakhulupira ife. (Mabasa 28:22) Kusiyapo pyenepi, ife tiri kukhala “mu ntsiku zakumalisa,” mu ndzidzi wakuti anthu azinji ‘nkhabe funa cita cibverano’ pontho ndi “ausumankha.”—2 Tim. 3:1, 3.

2. Thangwi yanji tisafunika kukhala akukhurudzika?

² Panango munabvundzika: ‘Ndinakwanisa tani kutawira mwadidi munthu angafuna kuketesana na ine thangwi ya pinthu pinakhulupira ine?’ Ninji pinafuna kukuphedzani? Kukhurudzika kunakuphedzani. Munthu wakukhurudzika nee asaipirwa mwakucimbiza angasoswa peno angakhonda kudziwa kuti anacitanji. (Mis. 16:32) Mwandimomwene, kukhala wakukhurudzika midzidzi inango ndi kwakunentsa. Mphapo munakhala tani wakukhurudzika kakamwe? Munatawira tani mwakukhurudzika munthu angalonga mwaukali thangwi ya pinthu pinakhulupira imwe? Pontho khala ndimwe nyakubala, munaphedza tani ananu toera atsidzikize cikhulupiro cawo mwakukhurudzika? Tendeni tione.

3. Thangwi yanji kukhala akukhurudzika nee pisabveka kusowa mphambvu? (2 Timoti 2:24, 25)

³ Anthu akukhurudzika nee ndi akusowa mphambvu. Tisafunika kuwangisira toera kukhala akukhurudzika tingathimbana  na cinentso. Kukhurudzika ndi ubodzi mwa “misapo ya nzimu wakucena.” (Agal. 5:22, 23) Fala Yacigerego idathumburuzwa “kukhurudzika” midzidzi inango ikhaphatisirwa toera kulonga makavalo a ntsanga akuti akhafuyiwa. Maseze kavalo ineyi isakhala yakukhurudzika, pyenepi nee pisabveka kuti ndi yakusowa mphambvu. Mphapo ife anthu tinakwanisa tani kukulisa n’khaliro wakukhurudzika, mu ndzidzi ubodzi ene mbatikhala amphambvu? Toera tikwanise kucita pyenepi, ife tisafunika kuphemba nzimu wa Mulungu toera utiphedze kukulisa n’khaliro unoyu wadidi kakamwe. Pinthu pidacitika na anthu azinji pisapangiza kuti pyenepi ndi pyakukwanisika. Mboni za Yahova zizinji zisatawira mwakukhurudzika pakulonga na anyakutcinga, pontho pyenepi pisaphedza anthu toera akhale na maonero adidi thangwi ya ife. (Lerini 2 Timoti 2:24, 25.) Mphapo munakwanisa tani kukhala wakukhurudzika mu ndzidzi ubodzi ene mbamukhala wamphambvu?

4. Citsandzo ca Izaki cisatipfundzisanji thangwi ya kukhurudzika?

⁴ M’Bhibhlya muli na pitsandzo pizinji pya anthu adapangiza n’khaliro wakukhurudzika. Onani citsandzo ca Izaki. Mu ndzidzi ukhali iye mu cisa ca Afilisti ku Jerari, anthu a bibvu afikira micera idakumba anyabasa a pai wace. M’mbuto mwa kulongezana nawo toera akhale pontho na micera yace, Izaki afuluka mbaenda kakhala kutali na iwo, mbakumba micera inango kweneko. (Gen. 26:12-18) Mbwenye Afilisti alonga kuti cisa ceneci cikhali cawo pontho. Mwakukhonda tsalakana pinthu pyenepi, Izaki acita pinthu mwakukhurudzika. (Gen. 26:19-25) Ninji pidam’phedza toera akhale wakukhurudzika maseze anthu anango akhansosa? Mwakukhonda penula, iye aona citsandzo ca anyakubalace mbapfundza na makhaliro a Abhrahamu na “kupfulika na kukhurudzika” kwa Sara.—1 Ped. 3:4-6; Gen. 21:22-34.

5. Ndi citsandzo cipi cinapangiza kuti anyakubala Acikristu anakwanisa kupfundzisa anawo kufunika kwakukhala akukhurudzika?

⁵ Anyakubala Acikristu, khalani na cinyindiro cakuti imwe munakwanisambo kupfundzisa ananu kufunika kwa kukhala akukhurudzika. Onani citsandzo ca Maxence wa pyaka 17 pyakubalwa. Iye akhafunika kucedza na anthu aukali kuxikola na mu utumiki. Anyakubalace am’phedza mwakupirira toera akulise n’khaliro wakukhurudzika. Iwo alonga: “Maxence abvesesa kuti angasoswa asafunika kukhala wamphambvu toera akhonde kutawira mwaukali peno kubwezera pyakuipa.” Mwakutsandzayisa, Maxence apfundza kukhala wakukhurudzika.

6. Phembero inatiphedza tani toera kukulisa n’khaliro wakukhurudzika?

⁶ Mphapo ndiye tani khala munthu akutisosa, ninga kulonga mwakuipa dzina ya Yahova na kupwaza Bhibhlya? Ife tisafunika kuphemba Yahova toera atipase udziwisi kuti tikwanise kutawira mwakukhurudzika. Mphapo ndiye tani khala mukupita kwa ndzidzi tadzindikira kuti nee tatawira mwadidi ninga mukhafunika ife? Tinakwanisa kuphemba pontho ciphedzo ca Yahova mbatinyerezera kuti tinatawira tani mwakukhurudzika ulendo unango. Tingacita pyenepi, Yahova anatipasa nzimu wace wakucena toera tikhale akudzitonga na akukhurudzika.

7. Kukumbuka mavesi anango a m’Bhibhlya kunatiphedza tani toera kutawira mwakukhurudzika? (Misangani 15:1, 18)

⁷ Mavesi anango a m’Bhibhlya anakwanisa kutiphedza toera tilonge mwakukhurudzika tingasoswa. Nzimu wa Mulungu unatiphedza toera tikwanise kukumbuka mavesi anewa. (Juw. 14:26) Mwacitsandzo, midida inagumanika m’bukhu ya Misangani inatiphedza toera tikhale akukhurudzika. (Lerini Misangani 15:1, 18.) Bukhu ineyi isapangizambo maphindu anafuna kukhala na ife tingapangiza n’khaliro unoyu.—Mis. 10:19; 17:27; 21:23; 25:15.

8. Thangwi yanji tisafunika kunyerezera mathangwi adacitisa munthu kucita mbvundzo thangwi ya pinakhulupira ife?

⁸ Udziwisi unakwanisambo kutiphedza. (Mis. 19:11) Munthu waudziwisi asakhala wakukhurudzika angacitwa mibvundzo mwaukali thangwi ya pinthu pinakhulupira iye. Kazinji kene anthu angaticita mibvundzo nee asatipanga mathangwi anaacitisa kucita mibvundzo ineyi. Natenepa, mbatidzati kutawira ndi pyadidi kudzindikira kuti panango nee tinadziwa mathangwi anacitisa munthu unoyu kucita mbvundzo.—Mis. 16:23.

9. Jidhiyoni apangiza tani udziwisi na kukhurudzika pakulonga na amuna a ku Efraimu?

⁹ Onani kuti Jidhiyoni atawira tani amuna a ku Efraimu. Amuna anewa abvundza Jidhiyoni mwakuipirwa kuti thangwi yanji nee aacemera toera aende kamenya pabodzi nkhondo pakumenyana na anyamalwa Aizraeli. Panango iwo akhadaipirwa thangwi akhadanyerezera kuti dzindza yawo ndi yakufunika kakamwe kupiringana madzindza anango mu Izraeli. Mwakukhonda tsalakana mathangwi adaacitisa kuipirwa, Jidhiyoni abvesesa mabvero awo mbaatawira mwakukhurudzika. Na thangwi ineyi Bhibhlya isalonga kuti “pidalonga iye mafala anewa, iwo akhurudzika.”—Aton. 8:1-3.

10. Ninji pinafuna kutiphedza toera kudziwa kuti tinatawira tani ale anacita mibvundzo thangwi ya pinakhulupira ife? (1 Pedhru 3:15)

 ¹⁰ Panango andzathu a kubasa peno a kuxikola anatibvundza kuti thangwi yanji tisabvera midida ya Bhibhlya. Ife tisafunika kuwangisira toera kufokotoza kuti thangwi yanji midida ya Bhibhlya ndi yadidi kakamwe, pontho mu ndzidzi ubodzi ene tisafunika kupangiza cilemedzo kuna munthu anacita mbvundzo unoyu. (Lerini 1 Pedhru 3:15.) Natenepa m’mbuto mwakunyerezera kuti iye ali kucita mbvundzo unoyu toera kukulongani mwakuipa, nyerezerani kuti mbvundzo unoyu unakuphedzani tani toera mudziwe pinthu pyakufunika kuna iye. Mwakukhonda tsalakana mathangwi anacitisa munthu kucita mbvundzo, ife tisafunika kutawira mwakukhurudzika na mwakukoma ntima. Panango ntawiro wathu unancitisa kucinja manyerezero ace. Maseze aoneke ninga munthu waukali peno asalonga mwakutikana, ndzidzi onsene tisafunika kutawira munjira yadidi.—Aroma 12:17.

11-12. (a) Ndi pinthu pipi pyakuti panango tisafunika kupinyerezera mbatidzati kutawira mbvundzo wakunentsa? (Onanimbo foto.) (b) Perekani citsandzo cinapangiza kuti mbvundzo unacita munthu unakwanisa kutiphedza toera kucedza naye mwadidi.

¹¹ Mwacitsandzo, ndzanu wakubasa angakubvundzani kuti thangwi yanji nee musacita phwando ya ntsiku yakubalwa bvundzikani: Kodi iye ali kudzudzumika khala ife tisatawiriswa kucita masendzekero? Peno asanyerezera kuti kukhonda kwathu kucita phwando ya ntsiku yakubalwa kunacitisa andzathu a pa basa akhonde bverana? Ife tinakwanisa kuphedza ndzathu wa m’basa toera akhonde kukhala wakudzudzumika mukunsimba thangwi ya citsalakano cace kuna anango na kumpanga kuti ife tisafuna kucita masendzekero akutsandzayisa pa basa. Pyenepi panango pinatipasa mwai wakucedza naye mwadidi pinthu pinalonga Bhibhlya thangwi ya phwando ya ntsiku yakubalwa.

¹² Ife tinakwanisa kucita pibodzi pyene munthu angaticita mibvundzo inango yakunentsa. Ndzathu wakuxikola panango analonga kuti Mboni za Yahova zisafunika kucinja maonero awo thangwi yakupita m’mabonde kwa mamuna na mamuna peno nkazi na nkazi. Kodi iye asalonga pyenepi thangwi nee asabvesesa mwadidi pinalonga Mboni za Yahova thangwi yakupita m’mabonde kwa mamuna na mamuna peno nkazi na nkazi? Kodi iye ali na xamwali peno wacibale wakuti asapita m’mabonde mamuna na mamuna? Kodi iye asanyerezera kuti ife tisaida anthu ali na nsambo unoyu? Panango tinafunika kumpasa cinyindiro cakuti tisafuna anthu onsene, pontho tisalemedza ufulu uli na m’bodzi na m’bodzi toera kucita cisankhulo. b (1 Ped. 2:17) Buluka penepo, panango tinakwanisa kumpanga pinthu pinalonga Bhibhlya, pontho kuti kubvera pinthu pyenepi kusatiphedza tani toera kukhala na umaso wakutsandzaya.

13. Munaphedza tani munthu wakuti asakupwazani thangwi ya kukhulupira Mulungu?

¹³ Tingagumana munthu wakuti nee asaphedzera maonero athu, nee tisafunika kunyerezera kuti tisadziwa pinthu pinakhulupira munthu unoyu. (Tito 3:2) Mwacitsandzo, munacitanji khala ndzanu wakuxikola asalonga kuti ndi pyakusowa ndzeru kukhulupira Mulungu. Kodi imwe munanyerezera kuti iye asakhulupira kuti pinthu pyacita kusanduka, pontho asadziwa pizinji thangwi ya pyenepi? Panango iye alonga pyenepi thangwi ya pinthu pidabva iye. M’mbuto mwa kuketesana naye, imwe munakwanisa kumpanga pinthu pyakuti anapinyerezera mukupita kwa ndzidzi. Panango munampangiza mphangwa zinalonga pya kucitwa kwa pinthu zinagumanika mu jw.org. Panango mukupita kwa ndzidzi iye anafuna kucedza thangwi ya misolo idaleri iye peno mavidhyu adaona iye mu saiti ineyi. Tingacedza na munthu munjira ineyi, panango pinamphedza toera kucinja maonero ace mbafuna kupfundza Bhibhlya.

14. Niall aphatisira tani mwadidi saiti yathu toera kuphedza ndzace wakuxikola kumalisa maonero akuphonyeka ali na anthu thangwi ya Mboni za Yahova?

 ¹⁴ M’phale anacemerwa Niall aphatisira saiti yathu toera kupangiza kuti pinanyerezera anthu anango thangwi ya Mboni za Yahova nee ndi pyandimomwene. Iye alonga: “Ndzanga unango wa kuxikola kazinji kene akhandipanga kuti nee ndisatawira pinalonga siyensiya thangwi ndisanyindira Bhibhlya.” Nakuti m’phale unoyu nee atawirisa Niall kufokotoza pinakhulupira iye, Niall ampanga toera aende kaleri khundu yakuti: “A Ciência e a Bíblia.” mu jw.org. Mukupita kwa ndzidzi, Niall aona kuti ndzace unoyu wa kuxikola aleri mphangwa zidampanga iye, pontho akhafuna kakamwe kucedza toera adziwe kuti umaso watoma tani. Panango pyenepi pinacitikambo kuna imwe.

15. Anyakubala anaphedza tani anawo toera atawire mwakukhurudzika angacitwa mibvundzo na andzawo akuxikola thangwi ya pinakhulupira iwo?

¹⁵ Anyakubala anakwanisa kupfundzisa anawo kuti anatawira tani mwakukhurudzika angacitwa mibvundzo thangwi yacikhulupiro cawo. (Tiya. 3:13) Anyakubala anango asapfundza kuti anacita tani pyenepi mu ndzidzi wakulambira kwa banja. Iwo asacedza pinthu pyakuti panango anawo anabvundzwa kuxikola, asapangiza kuti anatawira tani, pontho asaapfundzisa toera atawire mwakukhurudzika.—Onani bokosi ya nsolo wakuti “ Kukhunganyika Mwanyapantsi Kunaphedza Banja Yanu.”

16-17. Kukhunganyika kunaphedza tani aphale na atsikana?

¹⁶ Kukhunganyika kunaphedza Akristu toera akhale na cinyindiro ca pinthu pinakhulupira iwo na kupifokotoza mwacinyindiro. Khundu yakuti “Os Jovens Perguntam” mu jw.org isaphataniza misolo yakuti atividades para adolescentes. Misolo ineyi yacitwa toera kuphedza aphale na atsikana toera akhale na cinyindiro thangwi ya pinthu pinakhulupira iwo na kuaphedza  toera akwanise kutawira mukuphatisira mafala awo ene mibvundzo inaacita anthu. Tingapfundza misolo inagumanika pa khundu ineyi pabodzi na banja yathu, tonsene tinadziwa kuti tinatsidzikiza tani cikhulupiro cathu munjira yadidi na mwakukhurudzika.

¹⁷ M’phale anacemerwa Matthew alonga kuti kukhunganyika kusamphedza tani. Pakulambira kwawo kwa banja Matthew na anyakubalace kazinji kene asafufudza pinthu pyakuti panango anapibvundzwa kuxikola. Iye alonga: “Ife tisanyerezera mibvundzo yakuti panango inacitwa, pontho tisapfundza kuti tinaitawira tani mwakubverana na pidafufudza ife. Ndingadziwa mwadidi mathangwi anandicitisa kunyindira pinakhulupira ine, ndisakhala na cinyindiro, pontho ndisaona kuti ndi pyakukhonda nentsa kutawira mwakukhurudzika anango angandicita mibvundzo.”

18. Mwakubverana na Akolose 4:6, tisafunika kucitanji?

¹⁸ Maseze tilonge pinthu munjira yakubveka mwadidi nee ndi anthu onsene anafuna kutawira pinalonga ife. Mbwenye kulonga mwacilemedzo na mwakukhurudzika kusaphedza. (Lerini Akolose 4:6.) Kulonga pinakhulupira ife kunakwanisa kulandaniswa na kumenya bhola. Ife tinakwanisa kuimenya mwadidi peno na mphambvu kakamwe. Tingaimenya mwadidi, ndzathu anakwanisa kuiphata mbatipitiriza kuimenya. Munjira ibodzi ene tingalonga mwacilemedzo na mwakukhurudzika, panango anthu anakhala na cifuno cakutibvesera mbatipitiriza kucedza. Mbwenye munthu angafuna kuketesana na ife peno kupwaza pinakhulupira ife, nee tisafunika kupitiriza kucedza naye. (Mis. 26:4) Ngakhale tenepo, anango panango nee anafuna kuketesana mbwenye anafuna kutibvesera.

19. Ninji pinafuna kutiphedza toera tikhale akukhurudzika pakutsidzikiza pinakhulupira ife?

¹⁹ Mwakukhonda penula, ife tinaphedzeka kakamwe tingawangisira toera kukhala akukhurudzika. Phembani Yahova toera akupaseni mphambvu kuti mukhale wakukhurudzika mu ndzidzi unatawira imwe mibvundzo inacita anthu mwakuipirwa peno mwakupwaza. Kumbukani kuti kukhala wakukhurudzika kunakuphedzani toera mukhonde kuketesana na anthu. Pontho mungatawira anthu mwakukhurudzika na mwacilemedzo, panango anacinja maonero awo thangwi ya ife na undimomwene wa Bhibhlya. Khalani ‘akukhunganyika ndzidzi onsene toera kutawira mwakukhurudzika na mwacilemedzo kakamwe munthu anasaka kudziwa pya cikhulupiro canu.’ (1 Ped. 3:15) Natenepa khalani akukhurudzika na amphambvu!