MUNGAFUNA kudziwa ndzidzi, musacita tani? Panango musayang’ana rorojo yanu. Panango munaona kuti ndi ndzidzi ubodzi wakumaulo na mphindi 30. Munatawira tani xamwali wanu angakubvundzani kuti, “Ndzidzi uli tani?”

Pyonsene pisanyindira mbuto inakhala imwe. Mwacitsandzo, panango munatawira, “Ndi 1:30” peno “Ndi 13:30.” M’mbuto zinango anango asalonga, “pasala mphindi 30 toera ukwane ndzidzi uwiri.”

Kodi mu ndzidzi wakale anthu akhalonga tani? Iwo akhalonga munjira zakusiyana-siyana. M’malemba Acihebheri tisagumana mafala ninga ‘namacibese,’ ‘namasikati,’ pontho ‘namaulo.’ (Genesi 8:11; 19:27; 43:16; Deuteronomyo 28:29; 1 Amambo 18:26) Mbwenye midzidzi inango Bhibhlya isaphatisira mafala akufunika kakamwe.

Mu Izraeli wakale, kazinji kene anthu akhali na nyakuonera, makamaka namasiku. Aizraeli akhagawa masiku m’makhundu matatu. (Masalmo 63:6) Lemba ya Atongi 7:19, isalonga pya ‘tcititciti.’ Mbwenye mu ndzidzi udabalwa Yezu, Ayuda akhagawa masiku m’makhundu manai ninga pikhacita Agerego na Aroma.

Maevanjelyu asalonga pya midzidzi ineyi kazinji kene. Mwacitsandzo, ‘ndzidzi ukhalira madzongwe akumalisa,’ Yezu afamba padzulu pa madzi mbaenda kuna mwadiya ukhali anyakupfundzace. (Mateo 14:25) Pontho mu nsangani unango Yezu alonga: ‘Khala mwanaciro nyumba asadziwa ndzidzi unafuna kufika mbava, iye nee mbadagona, pontho nee mbadatawirisa kuti mbava apite n’nyumba mwace.’—Mateo 24:43.

Yezu alonga pya makhundu manai onsene pidapanga iye anyakupfundzace toera akhale maso thangwi iwo ‘nkhabe kudziwa ntsiku inafuna kubwera mwanaciro nyumba, peno pa kudoka kwa dzuwa, peno tcititciti, peno m’madzongwe, peno m’bambakuca.’ (Marko 13:35) Khundu yakutoma, yakuti ndi ‘pa kudoka kwa dzuwa’ yatomera pa kubira kwa dzuwa mpaka ndzidzi 9 wakumasiku. Khundu yaciwiri, yakuti ndi ‘tcititciti’ yatomera pa ndzidzi 9 wakumasiku mpaka tcititciti. Khundu yacitatu, yakuti ndi ‘m’madzongwe’ yatomera tcititciti mpaka ndzidzi utatu wakumacibese. Panango ukhali ndzidzi unoyu udalira dzongwe, masiku adaphatwa Yezu. (Marko 14:72) Khundu yacinai, yakuti ndi ‘m’bambakuca’ yatomera ndzidzi utatu wakumacibese mpaka kubuluka kwa dzuwa.

Natenepa, maseze ndzidzi wakale anthu nee akhali na marorojo ninga ali na ife lero, iwo akhaphatisirambo njira yawo toera kulonga ndzidzi.