1. Ndi cinthu cipi cakufunika kakamwe cidalonga Yezu kuna anyakupfundzace?

MASIKU akumalisa mbadzati kufa, pikhali Yezu pabodzi na anyakupfundzace, alonga fala yakuti ufuni cifupi na maulendo 30. Iye apanga anyakupfundzace kuti akhafunika ‘kufunana unango na ndzace.’ (Jwau 15:12, 17) Thangwi ya kufunana kwawo anthu mbadadzindikira kuti iwo ndi atowereri a Kristu. (Jwau 13:34, 35) Ufuni udalonga Yezu nee ndi mabvero basi; ndi n’khaliro wakufunika kakamwe na wakudzimana. Yezu alonga: ‘Nkhabe munthu ali na ufuni ukulu kakamwe kupiringana ule anapereka umaso wace thangwi ya axamwali ace. Mungacita pidakupangani ine, imwe munadzakhala axamwali anga.’—Jwau 15:13, 14.

2. (a) Kodi lero atumiki a Mulungu asadziwika nanji? (b) Ndi mibvundzo ipi inafuna ife kutawira mu nsolo uno?

² Lero, atumiki a Yahova asadziwika thangwi ya ufuni wawo wakudzimana na kuphatana kwawo. (1 Jwau 3:10, 11) Tisacita pyenepi mwakukhonda tsalakana dziko idabalwa ife, dzindza  yathu, cilongero cathu, kudabuluka ife peno makuziro athu. Kuzungulira dziko yonsene yapantsi, atumiki a Yahova asafunana kakamwe unango na ndzace. Thangwi yanji lero ufuni ndi wakufunika kakamwe? Kodi Yahova na Yezu asatiwangisa tani? Tinapangiza tani ufuni unoyu pakubalangaza na pakuwangisa anango?—1 Akorinto 8:1.

3. Kodi ‘ntsiku zino zakunentsa’ zisakhuya tani anthu?

³ Ife tikukhala mu ‘ntsiku zakunentsa,’ pontho umaso ‘wadzala na nyatwa na kutsukwala.’ (2 Timoti 3:1-5; Masalmo 90:10) Anthu azinji akuthabuka kakamwe mpaka kuluza cidikhiro. Anthu akupiringana 800.000, asapheka okha pyaka pyonsene, pyenepi pisabveka kuti munthu m’bodzi asafa pangapita masegundu 40. Mwakutsukwalisa, abale athu anango akhalambo na mabvero anewa mbapheka pyawo.

4. Ndi anthu api analongwa m’Bhibhlya akuti midzidzi inango akhafuna pyawo kufa?

⁴ M’midzidzi yakale, atumiki anango akukhulupirika a Mulungu atsukwala kakamwe thangwi ya nyatwa zawo mpaka kufuna kufa. Mwacitsandzo, Yobe akhabva kupha kakamwe mbalonga: ‘Ndisaida umaso wanga; nee ndisafunabve kupitiriza kukhala maso.’ (Yobe 7:16; 14:13) Yona atsukwala kakamwe mbalonga: ‘Cincino Yahova bulusani umaso wanga, thangwi mphyadidi kwa ine kufa kupita kukhala maso.’ (Yona 4:3) Mprofeta Eliya akhapibva ninga wakusowa cidikhiro mbalonga: ‘Cincino pyakwana! Bulusani umaso wanga.’ (1 Amambo 19:4) Mbwenye Yahova akhafuna kuti atumiki ace anewa akukhulupirika apitirize kukhala maso. Iye nee aasandika thangwi ya mabvero awo. M’mbuto mwace, iye aaphedza toera kukomerwa pontho na umaso wawo mbapitiriza kuntumikira mwakukhulupirika.

5. Thangwi yanji tisafunika kufuna kakamwe abale na alongo athu?

⁵ Lero, tisafunika kufuna abale na alongo athu, thangwi azinji a iwo asathimbana na makhaliro akunentsa. Anango asasingirirwa peno kutcingwa. Anango asapirira kuthabuswa peno kulongwa psweda kubasa kwawo. Panango iwo asaneta kakamwe thangwi yakuphata basa ndzidzi uzinji peno ali na mabasa akunetesa. Anangombo asathimbana na nyatwa zizinji m’banja. Panango iwo amanga banja na munthu wakuti nee asatumikira Yahova wakuti asaasandika kazinji kene. Thangwi ya pyenepi na pinentso pinango, azinji asamala mphambvu mbaoneka ninga akusowa basa. Mphapo mbani anafuna kuaphedza?

6. Ufuni wa Yahova usawangisa tani atumiki ace?

⁶ Yahova asapasa cinyindiro atumiki ace kuti asaafuna, pontho anaafuna kwenda na kwenda. Nyerezerani kuti Aizraeli apibva tani mudaapanga Yahova kuti: ‘Thangwi ndiwe wakufunika kakamwe kuna ine, ndisakufuna mbandikulemedza,’ pontho ‘Leka gopa, thangwi ine ndiri na iwe’! (Izaiya 43:4, 5) Tisadziwa kuti m’bodzi na m’bodzi wa ife ndi wakufunika kwa Yahova. * (Onani cidzindikiro capantsi.) Bhibhlya isapikira: ‘Ninga nyankhondo wamphambvu, iye anadzapulumusa. Iyembo anadzakomerwa na iwe na kusekera.’—Sofoniya 3:16, 17.

7. Ufuni wa Yahova walandana tani na mama anayamwisa mwanace?

 ⁷ Yahova asapikira kuwangisa na kubalangaza atumiki ace mwakukhonda tsalakana nyatwa zawo. Iye alonga: ‘Anadzaakwata m’manja na kuayamwisa mwaufuni pa miyendo pace. Ninga mama anabalangaza mwanace, inembo ndinadzakubalangazani.’ (Izaiya 66:12, 13) Nyerezerani kuti khombwani asapibva tani angakwatwa na mai wace mbasendzeka naye! Yahova asafuna kakamwe toera mukhale akutsidzikizika. Lekani kupenula kuti ndimwe akufunika kakamwe kuna Yahova.—Yeremiya 31:3.

8, 9. Kodi ufuni wa Yezu usatiwangisa tani?

⁸ Pana thangwi inango inapangiza kuti Yahova asatifuna: ‘Mulungu afuna kakamwe dziko yapantsi mbapereka Mwanace m’bodzi ekha, toera munthu onsene anan’khulupira akhonde kufudzwa, mbwenye agumane umaso wakukhonda mala.’ (Jwau 3:16) Ntsembe ya Yezu isapangiza pakweca kuti iye asatifunambo, pontho ufuni wace usatiwangisa. Bhibhlya isalonga kuti nee ‘nyatwa peno kutsukwala pinakwanisa kuticimwanisa kutambira ufuni wa Kristu.’—Aroma 8:35, 38, 39.

⁹ Midzidzi inango tinathimbana na nyatwa zakuti zinafewesa manungo athu peno manyerezero athu mbatiluza kutsandzaya pakutumikira Yahova. Mbwenye kukumbuka ufuni udapangiza Yezu kuna ife kusatipasa mphambvu toera kupirira. (Lerini 2 Akorinto 5:14, 15.) Ufuni wa Yezu usatipasa cifuno cakupitiriza kukhala maso mbatitumikira Yahova. Iwo unakwanisa kutiphedza toera tikhonde kubwerera nduli, maseze tithabuke thangwi ya pidengwa, kutcingwa, kutsukwala, peno kupswipa ntima.

10, 11. Mbani asafunika kuwangisa abale akutsukwala? Fokotozani.

¹⁰ Yahova asaphatisirambo mpingo toera kutiwangisa na ufuni wace. Tingafuna abale na alongo athu, tisapangiza ufuni wathu kuna Yahova. Tisacita pyonsene pinakwanisa ife toera kupangiza kuti abale athu ndi akufunika, pontho Yahova asaafuna. (1 Jwau 4:19-21) Mpostolo Paulu alemba: ‘Pitirizani kubalangazana, mbamuwangisana unango na ndzace, ninga munacitira imwe.’ (1 Atesalonika 5:11) Nee ndi akulu a mpingo basi anafunika kucita pyenepi. M’bodzi na m’bodzi wa ife anakwanisa kutowezera Yahova na Yezu pakubalangaza abale na alongo athu.—Lerini Aroma 15:1, 2.

¹¹ Anango mu mpingo akuti asathabuka thangwi ya kutsukwala na kupswipa ntima, panango anafunika ciphedzo ca dotoro na kupaswa mitombwe. (Luka 5:31) Akulu a mpingo na anango mu mpingo asadziwa kuti maseze nee ndi madotoro, ciphedzo na cibalangazo cawo ndi pyakufunika kakamwe. Onsene mu mpingo anakwanisa ‘kubalangaza akutsukwala, kuwangisa ale adafewa, kukhala akupirira kuna anthu onsene.’ (1 Atesalonika 5:14) Tisafunika kuyesera kubvesesa mabvero a abale athu. Tisafunika kukhala akupirira mbatilonga mwacibalangazo kuna abale athu akutsukwala. Kodi musayesera kuwangisa anango? Musafunika kucitanji toera mukhale wakubalangaza na wakuwangisa anango?

12. Perekani citsandzo cinapangiza munthu adawangiswa na ufuni wa abale a mu mpingo mwace.

¹² Mulongo m’bodzi wa ku Europa alonga: “Midzidzi inango ndikhali na manyerezero  akupheka ndekha, mbwenye ndikhali na ciphedzo cadidi. Mpingo ukhasonkhana ine wapulumusa umaso wanga. Ndzidzi onsene abale na alongo akhandiwangisa na kundifuna kakamwe. Maseze apibve ndi anthu akucepa kuti ndikunentseka, mpingo onsene ukhabwera kudzandiona ndzidzi onsene. Banja ibodzi isakhala ninga anyakubalanga auzimu. Iwo asanditsalakana mwadidi, pontho asakhala na ine ntsiku yamumphu.” Mwandimomwene, nee ndi onsene anakwanisa kuphedza munjira ineyi. Mbwenye ife tinakwanisa kucita pyonsene toera kutsalakana abale na alongo athu. * (Onani cidzindikiro capantsi.)

13. Tisafunika kucitanji toera kubalangaza anango?

¹³ Khalani nyakubvesera wadidi. (Tyago 1:19) Ife tisapangiza ufuni tingabvesera anango mwaufuni. Citani mibvundzo yadidi yakuti inakuphedzani toera kubvesesa mwadidi pinathimbana na m’bale wanu. Nkhope yanu na citsalakano canu cadidi pinancitisa kudziwa kuti musambvesera. Mu ndzidzi unalonga iye, mbvesereni mwakupirira, pontho lekani kun’gwandira mafala. Mungakhala nyakubvesera wadidi, munadziwa mwadidi mabvero ace, pontho pinam’phedza toera kukunyindirani. Buluka penepo pinadzakhala pyakukhonda nentsa kwa iye kubvesera pinafuna kulonga imwe mu ndzidzi unam’phedza imwe. Mungatsalakana mwadidi anango, munakwanisa kuabalangaza mwadidi.

14. Thangwi yanji nee tisafunika kusumula?

¹⁴ Lekani kusumula anango. Munthu wakutsukwala anathimizira kutsukwala kwace angadzindikira kuti tikunsandika. Natenepa pinakhala pyakunentsa kuna ife toera kum’phedza. ‘Alipo anthu anakwaza andzawo na mafala awo ninga dipa, mbwenye mulomo wa munthu wandzeru usakondza andzace.’ (Misangani 12:18) Maseze nee tisafuna kutsukwalisa munthu na mafala athu, tinakwanisa kuthimizira nyatwa zace tingalonga pinthu mbatidzati kunyerezera mwadidi. Toera kubalangaza m’bale wathu, tisafunika kumpasa cinyindiro cakuti mwandimomwene tisabvesesa nyatwa zace.—Mateo 7:12.

15. Ndi Mafaramentu api akuti tinakwanisa kuaphatisira toera kubalangaza anango?

¹⁵ Phatisirani Mafala a Mulungu toera kuwangisa anango. (Lerini Aroma 15:4, 5.) Bhibhlya yabulukira kwa ‘Mulungu anatipasa mphambvu toera kupirira na kutibalangaza,’ natenepa nee ndi pyakudzumisa kuti tinagumana cibalangazo m’mafalace. Pontho ife tiri na Índice das Publicações da Torre de Vigia na Guia de Pesquisa para Testemunhas de Jeová. Tingaphatisira mafaramentu anewa tinakwanisa kugumana malemba na mabukhu akuti tinakwanisa kuaphatisira toera kubalangaza na kuwangisa abale na alongo athu.

16. Ndi makhaliro api anafuna kutiphedza toera kuwangisa munthu wakutsukwala?

¹⁶ Khalani wacitsalakano na wakukoma ntima. Yahova ndi ‘Baba wantsisi zikulu, Mulungu wacibalangazo consene’ kuna atumiki ace. (Lerini 2 Akorinto 1:3-6; Luka 1:78; Aroma 15:13) Paulu ndi citsandzo cadidi ca n’khaliro unoyu thangwi akhatowezera  Yahova. Iye alonga: ‘Ife takhala akukoma ntima kuna imwe, ninga mama anayamwisa wakuti asatsalakana anace mwaufuni. Nakuti ife tisakufunani kakamwe, ife tikhali dzololo, tayu basi toera kukumwazirani mphangwa zadidi za Mulungu, mbwenye toera kupereka umaso wathu thangwi ya imwe, thangwi imwe mwadzakhala anthu akufuniwa kakamwe na ife.’ (1 Atesalonika 2:7, 8) Tingakhala acitsalakano ninga Yahova, tinakwanisa kubalangaza m’bale wathu!

17. Tisafunika kukhala na maonero api toera kuwangisa abale athu?

¹⁷ Lekani kudikhira kuti abale anu akhale aungwiro. Khalani na maonero adidi. Mungadikhira kuti abale anu akhale aungwiro, munatsukwala. (Koelete 7:21, 22) Kumbukani kuti Yahova asasaka pinthu pyadidi kuna ife. Natenepa tisafunika kupirirana unango na ndzace. (Aefesi 4:2, 32) Ife cipo tisafunika kucitisa abale athu kupibva kuti ndi akusowa basa peno kualandanisa na anango. M’mbuto mwace, ife tisaawangisa na kulonga pinthu pyadidi pinacita iwo. Pyenepi pinaaphedza toera akhale akutsandzaya munatumikira iwo Yahova.—Agalata 6:4.

18. Thangwi yanji tisafunika kuwangisa anango mwaufuni?

¹⁸ Atumiki onsene a Yahova ndi akufunika kwa iye na kwa Yezu. (Agalata 2:20) Tisafuna kakamwe abale na alongo athu, natenepa tisafunika kuatsalakana mwakukoma ntima. Ife tisafunika ‘ticite pinakwanisa ife toera tikhale muntendere, mbaticita pinthu pyakuti pinatiphedza toera kuwangisana unango na ndzace.’ (Aroma 14:19) Tisadikhira kakamwe Paraizu, yakuti nee m’bodzi anadzakhala na thangwi toera kutsukwala! Pontho nee munadzagumanika utenda na nkhondo. Anthu nkhabe kudzafabve thangwi ya madawo, nee kutcingwa, nyatwa za m’banja, peno kutsukwala. Pakumala kwa pyaka cikwi, anthu onsene anadzakhala aungwiro. Ale anapitiriza kukhala akukhulupirika pa mayesero akumalisa anadzakhala ana a Yahova pa dziko yapantsi mbakhala na ‘ufulu wa mbiri ya ana a Mulungu.’ (Aroma 8:21) Natenepa tendeni tonsene tipangize ufuni wakuti usawangisa na kuphedzana unango na ndzace toera kupulumuka mbatipita n’dziko ipswa ya Mulungu.