1. Makhaliro aumbirimi a dziko anakwanisa tani kukhuya kucepeseka kwathu?

THANGWI yanji ndi pyakunentsa kuphatisira pinapfundza ife m’Mafala a Mulungu? Thangwi ibodzi ndi yakuti toera kucita pinthu pyadidi tisafunika kukhala akucepeseka. ‘Ntsiku zino zakumalisa,’ ndi pyakunentsa toera kukhala akucepeseka, thangwi anthu azinji ndi ‘akufunika okha, akufuna kobiri, akugaya, akudzikuza na akukhonda kudzitonga.’ (2 Timoti 3:1-3) Ninga atumiki a Mulungu, tisadziwa kuti makhaliro anewa ndi akuipa, mbwenye pisaoneka ninga anthu ali na makhaliro anewa asathambaruka mbatsandzaya na umaso. (Masalmo 37:1; 73:3) Panango tinabvundzika: ‘Kodi mphyakufunikadi kuwangisira toera kuikha pifuno pya anango pa mbuto yakutoma? Anthu anapitiriza kundilemedza ndingacita pinthu mwakucepeseka?’ (Luka 9:48) Tingatawirisa kukhuyiwa na makhaliro aumbirimi a dziko, tinaluza uxamwali na abale athu, pontho pinacitisa anango kukhonda kutidzindikira kuti ndife Akristu. Mbwenye tingapfundza pya atumiki akucepeseka a Mulungu na kutowezera citsandzo cawo, tinadzakhala na maphindu adidi.

2. Tinapfundzanji kubulukira kwa atumiki akukhulupirika akale a Mulungu?

² Ninji pidaphedza atumiki akukhulupirika akale toera kukhala  axamwali a Mulungu? Iwo akhacitanji toera kunkomeresa? Ninji pidaaphedza toera kucita pinthu pyadidi? Tingaleri pya anthu anewa m’Bhibhlya na kunyerezera mwacidikhodikho pinaleri ife, cikhulupiro cathu cinakhala cakuwanga.

3, 4. (a) Kodi Yahova asatipfundzisa tani? (b) Thangwi yanji tisafunika kucita pizinji kupiringana kukhala na udziwisi toera kuwangisa cikhulupiro cathu?

³ Yahova atipasa pinafuna ife toera tipitirize kukhala na cikhulupiro cakuwanga. Ife tisatambira uphungu wadidi na cipfundziso kubulukira m’Bhibhlya, m’mabukhu athu, saiti yathu ya JW Broadcasting na m’misonkhano yathu yonsene. Mbwenye Yezu alonga kuti tisafunika kucita pizinji kupiringana kukhala na udziwisi. Iye alonga: ‘Cakudya canga ndi kucita pinafuna ule adandituma, mbandimalisa basa yace.’—Jwau 4:34.

⁴ Kucita cifuno ca Mulungu pikhali ninga cakudya kuna Yezu. Kudya cakudya cakupasa ungumi kusaticitisa kukhala na ungumi wadidi. Munjira ibodzi ene, kucita cifuno ca Mulungu kusaticitisa kukhala na cikhulupiro cakuwanga. Mwacitsandzo, kodi mwaenda kale m’basa ya m’munda muli wakuneta mbamubwerera kunyumba muli na mphambvu, pontho wakutsandzaya?

5. Ndi maphindu api anafuna kukhala na ife tingakhala andzeru?

⁵ Tingacita pinatiphemba Yahova, ndife andzeru. (Masalmo 107:43) Pontho pinthu pizinji pyadidi pisacitikira anthu ali na udziwisi. ‘Nkhabepo cinthu cakufunika kakamwe cinapiringana udziwisi. . . . Udziwisi ndi muti wa umaso kwa ale anauphatisira, pontho ale anapitiriza kuuphatisisa mwadidi anadzacemerwa akutsandzaya.’ (Misangani 3:13-18) Yezu alonga: ‘Khala musadziwa pinthu pyenepi, munatsandzaya mungapicita.’ (Jwau 13:17) Anyakupfundza a Yezu mbadakhala akutsandzaya mbadapitiriza kucita pidaapanga Yezu. Iwo akhafunika kukhala maso mwakubverana na pipfundziso pyace, pontho na citsandzo cace.

6. Thangwi yanji tisafunika kupitiriza kuphatisira pinapfundza ife?

⁶ Lero, tisafunikambo kupitiriza kuphatisira pinapfundza ife. Nyerezerani nyakusasanya miotokala wakuti ali na mafaramentu na udziwisi. Pyenepi pinam’phedza basi ene angapiphatisira. Iye panango ali na pyaka pizinji mbacita basa ineyi, mbwenye khala asafuna kukhala nyakusasanya miotokala wadidi, asafunika kupitiriza kuphatisira pidapfundza iye. Munjira ibodzi ene, pidatoma ife kupfundza undimomwene, tikhakomerwa thangwi tikhaphatisira pinthu pikhaleri ife m’Bhibhlya. Mbwenye toera kukhala akutsandzaya kwenda na kwenda, tisafunika kupitiriza kuphatisira pinatipfundzisa Yahova ntsiku zonsene.

7. Tisafunika kucitanji toera kupfundza kubulukira mu pitsandzo pya m’Bhibhlya?

⁷ Mu nsolo uno, tinadinga makhaliro mangasi akuti panango pinakhala pyakunentsa kwa ife kukhala akucepeseka. Tinapfundza kuti atumiki akukhulupirika akale apitiriza tani kukhala akucepeseka. Mbwenye tisafunika kucita pizinji kupiringana kuleri basi ene mphangwa zenezi. Tisafunika kunyerezera mphangwa zenezi na kuziphatisira mu umaso wathu.

8, 9. Tisapfundzanji thangwi ya kucepeseka kwa Paulu kubulukira pa lemba ya Machitiro 14:8-15? (Onani cithundzithundzi cakutoma.)

⁸ Mulungu asafuna kuti anthu a mitundu  yonsene ‘apulumuke, pontho adziwe mwadidi undimomwene.’ (1 Timoti 2:4) Kodi musaona tani anthu akuti adzati kupfundza undimomwene? Mpostolo Paulu amwazira mphangwa Ayuda akuti akhadziwa kale pya Yahova. Mbwenye iye amwazirambo mphangwa ale akhalambira alungu authambi. Kumwaza mphangwa kuna anthu anewa, kwayesera kucepeseka kwa Paulu. Munjira ipi?

⁹ Pa ulendo wakutoma wa Paulu ninga misionaryo, iye aenda na Bharnabhe ku nzinda wa Listra. Anthu a cilongero ca ku Likaoniya akhakhala kweneku atsalakana Paulu na Bharnabhe ninga anthu akupambulika kakamwe, pontho aacemera na madzina a alungu awo authambi Zeu na Herme. Kodi Paulu na Bharnabhe akomerwa na citsalakano ceneci? Kodi iwo aona pyenepi ninga macinjo akutsandzayisa thangwi ya kutcingwa kudacitwa iwo m’mizinda miwiri yakumalisa? Kodi iwo anyerezera kuti pyenepi mbapidaphedza anthu toera kubvesera mphangwa zadidi? Nkhabe! Iwo aipirwa kakamwe mbalonga: ‘Thangwi yanji mukucita pinthu pyenepi? Ife ndife anthu anaonambo nyatwa ninga imwe.’—Machitiro 14:8-15.

10. Thangwi yanji Paulu na Bharnabhe nee adzikuza kuna anthu ku Likaoniya?

¹⁰ Pidalonga Paulu na Bharnabhe kuti iwo ndi anthu anaonambo nyatwa, akhafuna kulonga kuti ndi akusowa ungwiro. Iwo nee akhafuna kulonga kuti asalambira Mulungu m’bodzi ene wa anthu a cilongero ca ku Likaoniya. Paulu na Bharnabhe akhadatumwa na Mulungu ninga amisionaryo. (Machitiro 13:2) Iwo akhadadzodzwa na nzimu wakucena, pontho akhali na cidikhiro cakutsandzayisa kakamwe. Mbwenye ineyi nee ikhali thangwi kwa iwo toera kudzikuza. Iwo akhadziwa kuti anthu anewa angatawira mphangwa zadidi mbadakhalambo na cidikhiro ca kuenda kudzulu.

11. Tinakhala tani akucepeseka ninga Paulu pakumwaza mphangwa?

¹¹ Pana njira ibodzi yakuti tinakwanisa pangiza kuti ndife akucepeseka ninga Paulu. Ife nee tisafunika kudzikuza thangwi ya basa yathu yakumwaza mphangwa peno pinthu pinango pinacita ife na ciphedzo ca Yahova. Ife tinakwanisa kubvundzika: ‘Ndisaona tani anthu anamwazira ine mphangwa mu cisa canga? Ndisasankhula mitundu inango ya anthu? Pa dziko yonsene, Mboni za Yahova zisayesera kusaka anthu ali na cifuno cakubvesera mphangwa zadidi. Anango asawangisira kupfundza cilongero peno misambo ya anthu anaoniwa na anango ninga akupwazika. Mbwenye iwo nee asapibva kuti ndi akufunika kakamwe kupiringana ale anamwazira iwo mphangwa. M’mbuto mwace, iwo asayesera kubvesesa m’bodzi na m’bodzi toera kuphedza anthu azinji kutawira mphangwa za Umambo.

12. Kodi Epafra apangiza tani kuti akhatsalakana anango na ntima onsene?

¹² Njira inango toera kupangiza kuti ndife akucepeseka ndi kucita phembero thangwi ya abale na alongo athu akuti ali na ‘cikhulupiro cadidi kakamwe ninga cathu.’ (2 Pedro 1:1) Pyenepi ndi pidacita Epafra. Bhibhlya isalonga pya iye maulendo matatu basi. Pikhali Paulu nkaidi ku Roma, iye alembera tsamba Akristu a ku Kolose mbalonga pya Epafra: ‘Ndzidzi onsene iye asacita maphembero mwaphinga thangwi ya imwe.’ (Akolose 4:12) Epafra akhadziwa mwadidi abale, pontho akhaatsalakana mwadidi. Paulu ancemera ‘ndzanga wa nkaidi,’  natenepa Epafra akhalimbo na nyatwa zace. (Filemoni 23) Mbwenye iye akhapitiriza kutsalakana anango, mbacita pinthu toera kuaphedza. Epafra akhaphembera thangwi ya abale na alongo, ife tinakwanisambo kucita pibodzi pyene, ngakhale kuathula madzina awo. Maphembero ninga anewa asaphedza kakamwe.—2 Akorinto 1:11; Tyago 5:16.

13. Munatowezera tani citsandzo ca Epafra pakucita phembero?

¹³ Nyerezerani munthu wakuti munakwanisa kulonga dzina yace mu phembero yanu. Panango musadziwa axamwali anu mu mpingo peno wacibale wanu wakuti asathimbana na pinentso. Panango asanentseka toera kucita pisankhulo peno kupirira mayesero. Imwe munakwanisambo kuphataniza abale mu phembero yanu akuti madzina awo asagumanika mu jw.org. Pa khundu yakuti IMPRENSA > CASOS JURÍDICOS, pana nsolo wakuti “Testemunhas de Jeová presas por causa de sua fé.” Imwe munakwanisambo kuphataniza mu phembero yanu ale adaferwa na abale awo, ale anathabuka na pidengwa peno nkhondo, kuphatanizambo ale anathabuka thangwi yakusowa kobiri. Pana abale na alongo azinji akuti tisafunika kuaphataniza m’maphembero athu. Tingacita pyenepi, tinapangiza kuti nee tisanyerezera basi pyakufuna pyathu, mbwenye tisanyerezerambo pyakufuna pya anango. (Afilipi 2:4) Yahova asabvesera maphembero anewa.

14. Thangwi yanji tisalonga kuti Yahova ndi nyakubvesera wadidi kakamwe?

¹⁴ Njira inango yakupangiza kuti ndife akucepeseka ndi kukhala nyakubvesera wadidi. Lemba ya Tyago 1:19 isatipanga toera ‘tikhale akucimbiza kubva.’ Yahova ndi nyakubvesera wadidi kakamwe. (Genesi 18:32; Yoswa 10:14) Mwacitsandzo, lerini mphangwa zinagumanika pa Eksodo 32:11-14. (Lerini.) Maseze nee akhafuna maonero a Mose, Yahova antawirisa toera kulonga piri muntima mwace. Kodi imwe munakwanisa kubvesera mwakupirira munthu adadodoma mbamutawira  maonero ace? Mbwenye Yahova asabvesera mwakupirira anthu onsene anaphembera na cikhulupiro.

15. Tinatowezera tani Yahova mukulemedza anango?

¹⁵ Bvundzikani: ‘Khala Yahova ndi wakucepeseka kakamwe mpaka kubvesera anthu ninga pidabvesera iye Abhrahamu, Rakele, Mose, Yoswa, Manowa, Eliya, na Ezekiya, ine nee ndinakwanisambo kucita pibodzi pyene? Kodi ndinakwanisa kulemedza abale anga mukubvesera maonero awo na kuaphatisira pingakwanisika? Kodi pana munthu unango mu mpingo mwathu peno wacibale wanga wakuti ndisafunika kumbvesera kakamwe? Ndinacita tani pyenepi?’—Genesi 30:6; Atongi 13:9; 1 Amambo 17:22; 2 Pya dziko ya Israele 30:20.

16. Kodi Mambo Dhavidhi acitanji pidatsalakanwa iye mwakuipa na Simei?

¹⁶ Kucepeseka kusatiphedzambo toera kukhala akudzitonga tingatsalakanwa mwakuipa na anango. (Aefesi 4:2) Tinaona citsandzo cadidi kakamwe pa 2 Samwele 16:5-13. (Lerini.) Simei, wacibale wa Mambo Sauli, atikana na kupomokera Dhavidhi na anyankhondo ace. Dhavidhi mbadakhondesa Simei, mbwenye iye apirira kutikanwa na iye. Kodi Dhavidhi akwanisa tani kukhala wakudzitonga? Ife tinakwanisa kudziwa pizinji tingadinga Salmo wacitatu.

17. Ninji cidaphedza Dhavidhi toera kukhala wakudzitonga, pontho tinantowezera tani?

¹⁷ Dhavidhi alemba Salmo wacitatu mu ndzidzi ukhafuna kuphiwa iye na mwanace Absaloni. Ukhali ndzidzi unoyu udapomokerwa Dhavidhi na Simei, mbwenye Dhavidhi akwanisa kugumana mphambvu yakupirira. Munjira ipi? Pa Masalmo 3:4, tisaleri mafala a Dhavidhi: ‘Ndinadzacemera Yahova mwakugaluza, pontho iye anadzanditawira kubulukira paphiri yace yakucena.’ Tingatsalakanwa mwakuipa, tisafunika kuphembera ninga pidacita Dhavidhi. Natenepa Yahova anadzatipasa nzimu wace wakucena toera tikwanise kupirira. Kodi musakhala wakudzitonga peno musalekerera munthu unango angakutsalakanani mwakuipa? Musanyindira kuti Yahova anatsalakana nyatwa zanu, pontho anadzakuphedzani mbakupasani nkhombo?

18. Tinaphindula tani tingaphatisira pipfundziso pya Yahova?

¹⁸ Tingacita pinthu pinadziwa ife kuti ndi pyadidi, tinakhala na ndzeru mbatipaswa nkhombo na Yahova. Lemba ya Misangani 4:7 isalonga: ‘Udziwisi ndi cinthu cakufunika kakamwe.’ Udziwisi usaphataniza pizinji kupiringana kubvesesa cinthu. Udziwisi usaphataniza pisankhulo pinacita ife. Ngakhale nyerere zisapangizambo udziwisi mukugumanya cakudya toera kudya mu ndzidzi wa khoni. (Misangani 30:24, 25) Kristu, wakuti asacemerwa ‘udziwisi wa Mulungu,’ ndzidzi onsene akhacita pinthu pinakomeresa Babace. (1 Akorinto 1:24; Jwau 8:29) Mulungu anadzatipasa nkhombo tingapangiza udziwisi mukusankhula kucita pinthu pinadziwa ife kuti ndi pyadidi. (Lerini Mateo 7:21-23, Tradução do Novo Mundo.) Natenepa pitirizani kucitisa mpingo kukhala mbuto yakuti onsene anakwanisa kutumikira Yahova mwakucepeseka. Pisaphemba ndzidzi na kupirira toera kucita pinthu pinadziwa ife kuti ndi pyadidi. Mbwenye kucita pyenepi kusapangiza kucepeseka, pontho kucepeseka kunatitsandzayisa lero mpaka kwenda na kwenda.