NSOLO WA PFUNDZIRO
Atumiki Akucepeseka a Yahova Ndi Akufunika Kakamwe Kuna Iye
‘Yahova . . . asaona anthu akucepeseka.’—MASAL. 138:6.
NYIMBO 48 Tifambe na Yahova Ntsiku Zonsene
PINAFUNA IFE KUPFUNDZA *
1. Yahova asaona tani anthu akucepeseka? Fokotozani.
YAHOVA asafuna anthu akucepeseka. Basi ene ndi anthu akucepeseka anakwanisa kukhala na uxamwali wakuwanga na iye. Mbwenye ‘anthu akudzikuza iye asaadziwa na kutali.’ (Masal. 138:6) Tonsene tisafuna kukomeresa Yahova, pontho tisafuna kukhala na uxamwali wakuwanga na iye. Natenepa, ife tiri na mathangwi adidi toera kupfundza kukhala akucepeseka.
2. Tinapfundzanji mu nsolo uno?
2 Mu nsolo uno tinadzatawira mibvundzo mitatu: (1) Kucepeseka ninji? (2) Thangwi yanji tisafunika kukhala akucepeseka? (3) Ndi makhaliro api akuti anakwanisa kuyesera kucepeseka kwathu? Ninga pinafuna ife kupfundza, tingakhala akucepeseka, tinakomeresa ntima wa Yahova, pontho pinaphedza ife.—Mis. 27:11; Iza. 48:17.
KUCEPESEKA NINJI?
3. Kucepeseka ninji?
3 Munthu wakucepeseka nee asanyerezera kuti ndi wakufunika kakamwe kupiringana anango, pontho iye nee ndi wakudzikuza. Bhibhlya isapangiza kuti munthu wakucepeseka asalemedza uxamwali wace na Yahova Mulungu, pontho asalemedza anthu anango. Munthu wakucepeseka asadzindikira kuti anthu anango ndi akulu kupiringana iye m’makhundu anango.—Afil. 2:3, 4.
4-5. Thangwi yanji midzidzi inango munthu anaoneka ninga wakucepeseka, mwandimomwene nee ndi wakucepeseka?
4 Anthu anango asaoneka ninga ndi akucepeseka, mbwenye mwandimomwene iwo nee ndi akucepeseka. Panango iwo ndi anthu amanyadzo. Panango iwo asalemedza anthu anango thangwi apfundziswa pyenepi na anyakubalawo. Mbwenye muntima mwawo, panango iwo ndi anthu akudzikuza kakamwe. Mukupita kwa ndzidzi, iwo anadzapangiza piri muntima mwawo.—Luka 6:45.
5 Anthu anango ndi akukhonda gopa, pontho asalonga pinanyerezera iwo, mbwenye pyenepi nee pisabveka kuti iwo ndi akudzikuza. (Juw. 1:46, 47) Anthu anewa asafunika kucita mphole-mphole toera akhonde kunyindira maluso awo. Mwakukhonda tsalakana khala ndife anthu amanyadzo peno nkhabe, tonsene tisafunika kuwangisira toera kukhala anthu akucepeseka.
Mpostolo Paulu akhali wakucepeseka, pontho nee akhanyerezera kuti ndi wakufunika kakamwe (Onani ndima 6) *
6. Mwakubverana na 1 Akorinto 15:10, tisapfundzanji na citsandzo ca mpostolo Paulu?
6 Onani citsandzo ca mpostolo Paulu. Iye aphatisirwa kakamwe na Yahova toera kukhazikisa mipingo mu nzinda ubodzi na ubodzi. Pisaoneka kuti iye acita pizinji kakamwe mu utumiki kupiringana apostolo onsene a Yezu Kristu. Mbwenye Paulu nee adzikuza pakati pa abaleace. Mwakucepeseka, iye alonga: “Ine ndine wang’ono kakamwe pakati pa apostolo, pontho nee ndathema kucemerwa mpostolo, thangwi ndikhatcinga mpingo wa Mulungu.” (1 Akor. 15:9) Buluka penepo, Paulu alonga kuti iye akhali na uxamwali wakuwanga na Yahova, thangwi Yahova apangiza kukoma ntima kukulu kuna iye, tayu thangwi Paulu akhali wakufunika kakamwe peno thangwi acita pizinji. (Lerini 1 Akorinto 15:10.) Paulu akhali citsandzo cadidi ca munthu wakucepeseka. Pidalembera iye tsamba Akristu a ku Korinto nee adzikuza, maseze anthu anango mu mpingo akhansumula.—2 Akor. 10:10.
Karl F. Klein, akhali m’bale wakucepeseka adatumikira ninga m’bodzi wa Mathubo Akutonga (Onani ndima 7)
7. M’bale unango wakudziwika kakamwe, apangiza tani kuti akhali wakucepeseka? Perekani citsandzo.
7 Atumiki azinji a Yahova asawangiswa kakamwe na mbiri ya umaso ya M’bale Karl F. Klein, adatumikira ninga m’bodzi wa Mathubo Akutonga. Mu mbiri yace ya umaso, M’bale Klein mwakucepeseka alonga pinentso pidathimbana na iye mu pyaka pizinji. Mwacitsandzo, iye ayesera kumwaza mphangwa nyumba na nyumba pa ulendo wakutoma mu caka 1922. Pyenepi pikhali pyakunentsa kakamwe kwa iye, natenepa iye asiya kucita pyenepi mu pyaka piwiri. Mukupita kwa ndzidzi, pikhatumikira iye pa Bheteli, m’bale unango ampasa uphungu, mbwenye iye apitiriza kuipirwa pidamala iye kupaswa uphungu. Pontho iye anentseka na utenda unacemerwa colapso nervoso, mbwenye mukupita kwa ndzidzi adzawanga. Mwakukhonda tsalakana pinentso pyenepi, iye acita mabasa mazinji akutsandzayisa. Mwandimomwene, M’bale Klein akhali wakucepeseka kakamwe toera kulonga pinthu pidathimbana na iye, maseze akhali munthu wakudziwika kakamwe. Abale na alongo azinji asakomerwa kakamwe angakumbuka M’bale Klein na mbiri yace ya umaso * yadidi kakamwe.
THANGWI YANJI TISAFUNIKA KUKHALA AKUCEPESEKA?
8. Lemba ya 1 Pedhru 5:6 isapangiza tani kuti kucepeseka kusakomeresa Yahova?
8 Thangwi yakufunika kakamwe yakukhala akucepeseka ndi yakuti pyenepi pisakomeresa Yahova. Mpostolo Pedhru apangiza pyenepi pakweca. (Lerini 1 Pedhru 5:6.) Thangwi ya mafala a Pedhru, bukhu yakuti, “Bwera Dzanditowera” yalonga: ‘Kudzikuza ndi ninga venenu peno ntombwe wakupha. Pyakubwereswa pyace pinakwanisa kukhala pyakupha. Ndi n’khaliro wakuti unakwanisa kucitisa anthu kucita pinthu pizinji pyakuti nkhabe komeresa Mulungu. Munjira inango, kucepeseka kunakwanisa kucitisa kuti munthu wakupwazika akhale wakufunika kwa Yahova. . . . [Iye] . . . anadzakomerwambo na kukupasani nkhombo thangwi ya kucepeseka kwanu.’ * Cinthu cakufunika kakamwe cakuti ife tinakwanisa kucicita ndi kukomeresa ntima wa Yahova.—Mis. 23:15.
9. Kodi anthu anango anacitanji tingakhala akucepeseka?
9 Kusiyapo kukomeresa Yahova, ife tisatambira nkhombo zizinji tingakhala akucepeseka. Tingakhala akucepeseka, anthu anango anafuna kucita uxamwali na ife. Toera kubvesesa pyenepi, nyerezerani kuti ndi anthu api anakomerwa na imwe kucita nawo uxamwali. (Mat. 7:12) Ndi anthu akucepa anakomerwa kukhala na anthu akuti asakakamira maonero awo mbakhonda maonero a anango. Mbwenye ndi pyakutsandzayisa kakamwe kukhala pabodzi na abale na alongo athu angakhala na ‘manyerezero mabodzi ene, akubvera ntsisi, akufuna abale, acitsalakano kakamwe na akucepeseka.’ (1 Ped. 3:8) Khala ife tisakomerwa kukhala na anthu a makhaliro anewa, tisafunikambo kukhala akucepeseka toera iwo afunembo kukhala na ife.
10. Thangwi yanji mphyakukhonda nentsa kuna anthu akucepeseka kupirira nyatwa?
10 Kucepeseka kunacitisambo kuti umaso wathu ukhonde kukhala wakunentsa. Midzidzi inango panango tinaona peno tinathimbana na pinthu pyakukhonda kulungama. Mambo waudziwisi, Salomoni alonga: ‘Ndaona mabitcu mbafamba na makavalo, mbwenye ana a mambo mbafamba na miyendo ninga mabitcu.’ (Koel. 10:7) Midzidzi inango ale akuti ali na maluso kakamwe nee asasimbwa. Pontho ale akuti nee ali na maluso mazinji midzidzi inango asasimbwa kakamwe. Mbwenye Salomoni adzindikira kuti tisafunika kukomerwa na makhaliro athu, mbatikhonda kuikha manyerezero athu ku pinthu pyakuipa. (Koel. 6:9) Tingakhala akucepeseka, tinakomerwa na umaso uli na ife, mbatikhonda kudzudzumika na pinthu pyakuti nee tiri napyo.
NDI MAKHALIRO API AKUTI ANAKWANISA KUYESERA KUCEPESEKA KWATHU?
Thangwi yanji ndi pyakunentsa kukhala akucepeseka m’makhaliro anewa? (Onani ndima 11-12) *
11. Tisafunika kucitanji tingapaswa uphungu?
11 Ntsiku zonsene tisakhala na miyai mizinji toera kupangiza kucepeseka. Onani pitsandzo pingasi. Tingapaswa uphungu. Tisafunika kukumbuka kuti munthu angawangisira toera kutipasa uphungu, panango ndi thangwi yakuti tacita pinthu pyakuipa kakamwe kupiringana pikhanyerezera ife. Tingapaswa uphungu, panango tisakhala na cipendamiro cakukhonda uphungu. Panango ife tinaipirwa na munthu adatipasa uphungu peno njira idalonga iye. Mbwenye tingakhala akucepeseka, tinawangisira toera kukhala na maonero adidi.
12. Mwakubverana na Misangani 27:5, 6, thangwi yanji tisafunika kupereka takhuta munthu angatipasa uphungu? Perekani citsandzo.
12 Munthu wakucepeseka asapereka takhuta angapaswa uphungu. Mwacitsandzo: Nyerezerani kuti muli pa misonkhano Yacikristu. Pakumala kucedza na abale azinji, m’bale unango asakucemerani pakhundu, mbakupangani kuti m’madzino mwanu mwaphatirira cakudya. Mwakukhonda penula, imwe munakhala na manyadzo. Mbwenye munapereka takhuta kuna iye. Mwandimomwene, imwe mbamudakomerwa kakamwe khala munthu unango akupangani pyenepi nakweru! Munjira ibodzi ene, ife tisafunika kupereka takhuta kuna m’bale peno mulongo wakuti ali na cipapo cakutipasa uphungu unafuna ife. Tisaona munthu unoyu ninga xamwali wathu, tayu ninga nyamalwa wathu.—Lerini Misangani 27:5, 6; Agal. 4:16.
Thangwi yanji tisafunika kukhala akucepeseka anango angapaswa miyai yakutumikira? (Onani ndima 13-14) *
13. Tinakhala tani akucepeseka anango angapaswa miyai yakutumikira?
13 Anango angapaswa miyai yakutumikira. Nkulu wa mpingo anacemerwa Jason alonga: “Ndingaona anango mbakapaswa miyai yakutumikira, midzidzi inango ndisabvundzika kuti thangwi yanji ine nee ndapaswambo.” Kodi imwe mwakhala kale na mabvero anewa? Nee ndi pyakuipa ‘kuwangisira’ toera kukhala na miyai yakutumikira. (1 Tim. 3:1) Mbwenye tisafunika kucita mphole-mphole na pinanyerezera ife. Thangwi tingakhonda kucita mphole-mphole tinatoma kudzikuza. Mwacitsandzo, panango m’bale anatoma kunyerezera kuti ndiye adathema kakamwe toera kuphata basa ineyi pa mpingo. Peno mulongo panango ananyerezera kuti: ‘Mamunanga ndi wakuthema kakamwe kupiringana m’bale unango!’ Mbwenye tingakhala anthu akucepeseka, tinacalira manyerezero anewa akudzikuza.
14. Tisapfundzanji na pidacita Mose mu ndzidzi udatambira anango miyai yakutumikira?
14 Ife tinakwanisa kupfundza na pidacita Mose mu ndzidzi udatambira anango miyai yakutumikira. Mose akhakomerwa kakamwe na basa idapaswa iye yakutsogolera mbumba ya Izraeli. Mphapo, pidasankhula Yahova anthu anango toera aphate basa pabodzi na Mose, iye acitanji? Mose nee akhala na bibvu. (Num. 11:24-29) Iye akhali wakucepeseka, mbatawirisa anango toera kum’phedza m’basa yace yakutonga anthu. (Eks. 18:13-24) Buluka penepo, Aizraeli akhali na amuna azinji akuti mbadakwanisa kuphata basa ineyi, natenepa iwo nee mbadadikhira mu ndzidzi uzinji toera miseru yawo itongwe. Pyenepi pisapangiza kuti Mose akhadzudzumika kuti anaphedza tani mbumba, m’mbuto mwakufuna kukhala na miyai mizinji. Ceneci ndi citsandzo cadidi kakamwe kuna ife! Khala tisafuna kuphatisirwa na Yahova, tisafunika kukumbuka kuti kucepeseka ndi kwakufunika kakamwe kupiringana kukhala na maluso mazinji. Maseze ‘Yahova ali kudzulu, iye asaona anthu akucepeseka.’—Masal. 138:6.
15. Ndi macinjo api adathimbana na abale azinji?
15 Makhaliro athu angacinja. Abale na alongo azinji adatumikira Yahova mu pyaka pizinji apaswa mabasa mapswa. Mwacitsandzo mu caka 2014, ayang’aniri a gawo na akazi awo acinjwa toera kucita ntundu unango wa basa ya ndzidzi onsene. Kutomera mu caka cibodzi cene, ayang’aniri a cisa asasiya basa yawo angakhala na pyaka 70 pyakubalwa. Pontho abale a pyaka 80 pyakubalwa peno pyakupiringana nee anatumikirabve ninga mbveranisi wa akulu a mpingo. Kusiyapo pyenepi, abale na alongo azinji akhatumikira pa Bheteli, acinjwa toera katumikira ninga apainiya. Anango asiya basa ya ndzidzi onsene thangwi ya nyatwa za ungumi, kutsalakana banja peno mathangwi anango.
16. Kodi abale na alongo athu apangiza tani kucepeseka mu ndzidzi udacinja makhaliro awo?
16 Macinjo anewa akhali akunentsa kuna abale na alongo anewa. Mwandimomwene, iwo akhafuna kakamwe basa ikhacita iwo pakutoma, makamaka basa ikhacita iwo mu pyaka pizinji. Abale anango pidapaswa iwo basa ipswa, midzidzi inango akhatsukwala kakamwe thangwi akhakomerwa na basa ikhacita iwo kale. Mbwenye mukupita kwa ndzidzi, iwo akwanisa kudzolowera makhaliro mapswa. Thangwi yanji? Thangwi iwo asafuna kakamwe Yahova. Iwo asadziwa kuti aperekeka kuna Mulungu, tayu kuna basa, cidzo peno miyai yakutumikira. (Akol. 3:23) Iwo asatsandzaya kakamwe na kutumikira Yahova mwakucepeseka, mwakukhonda tsalakana basa inacita iwo. Iwo ‘asapereka kuna iye pinthu pyonsene pinaadzudzumisa,’ thangwi asadziwa kuti Yahova asaatsalakana.—1 Ped. 5:6, 7.
17. Thangwi yanji ndi pyakufunika kubvera uphungu wa Bhibhlya unalonga pya kucepeseka?
17 Tisapereka takhuta kakamwe thangwi Bhibhlya isatiphedza toera kukhala akucepeseka. Tingakhala akucepeseka, anango anakomerwa kukhala na ife, pontho pyenepi pinatiphedza. Tinakwanisambo kupirira nyatwa zinathimbana na ife. Kusiyapo pyenepi, tinakhala na uxamwali wakuwanga na Babathu wakudzulu. Tiri akutsandzaya kakamwe thangwi yakudziwa kuti maseze iye ndi ‘Wapadzulu na Wankulu,’ asafuna atumiki ace akucepeseka, pontho asaalemedza!—Iza. 57:15.
NYIMBO 45 Ndinanyerezera Mwacidikhodikho
^ ndima 5 Ndi pyakufunika kakamwe kwa ife kukhala akucepeseka. Kucepeseka ninji? Thangwi yanji tisafunika kukhala akucepeseka? Pontho thangwi yanji pinakhala pyakunentsa kukhala akucepeseka makhaliro athu angacinja? Nsolo uno unadzatawira mibvundzo ineyi yakufunika kakamwe.
^ ndima 7 Onani nsolo wakuti “Jeová tem lidado comigo de modo recompensador” mu Despertai! ya 22 de setembro de 1987.
^ ndima 8 Onani nsolo 3, ndima 23.
^ ndima 53 FOTO TSAMBA: Mpostolo Paulu ali panyumba ya m’bale pabodzi na abale anango, kuphatanizambo anapiana.
^ ndima 57 FOTO TSAMBA: M’bale akutawira uphungu wa m’Bhibhlya unapaswa iye na m’bale unango wakuti ndi m’phale..
^ ndima 59 FOTO TSAMBA: M’bale wakukalamba nee ali na bibvu na m’bale wa m’phale wakuti ali na mwai wakutumikira mu mpingo.
