1. Mwakubverana na Mateu 11:28-30, ninji pidapikira Yezu?

YEZU apikira cinthu cadidi kakamwe kuna mwinji ukulu ukhambvesera. Iye alonga: ‘Bwerani kuna ine, ine ndinadzakubalangazani.’ (Lerini Mateu 11:28-30.) Yezu nee alonga kwene basi mafala anewa, mbwenye acita pinthu mwakubverana na pidapikira iye. Mwacitsandzo, nyerezerani pidacita iye kuna nkazi wakuti akhanentseka na utenda wakugopswa kakamwe.

2. Yezu acitanji kuna nkazi akhaduwala?

² Nkazi unoyu akhafuna kakamwe ciphedzo. Iye akhadaenda kuna madotoro azinji thangwi akhanyerezera kuti mbadawangiswa. Pontho athabuka mu pyaka 12, mbwenye nkhabe munthu adakwanisa kum’phedza. Mwakubverana na Mwambo udapereka Yahova kuna Mose, nkazi unoyu akhali wakukhonda cena. (Lev. 15:25) Buluka penepo, iye abva kuti Yezu asakwanisa kuwangisa anthu anathabuka na utenda, natenepa nkazi unoyu aenda kuna iye. Pidafika iye kuna Yezu, aphata nguwo yace, penepo pene iye awangiswa! Mbwenye Yezu nee amuwangisa basi ene manungo ace, iye am’phedza toera kuona kuti ndi wakufunika. Mwacitsandzo, Yezu apangiza ufuni na cilemedzo kuna nkazi unoyu pidancemera iye kuti “mwananga.” Mwandimomwene, mafala anewa abalangaza nkazi unoyu!—Luka 8:43-48.

3. Ndi mibvundzo ipi inafuna ife kutawira?

³ Onani kuti nkazi unoyu awangisira kakamwe toera kuenda kuna Yezu. Munjira ibodzi ene, ife tisafunikambo kuwangisira toera ‘kuenda’ kuna Yezu. Lero, Yezu nee asawangisa mwacirengo  matenda a ale anakhala anyakupfundzace. Mbwenye iye asapitiriza kutiphemba: ‘Bwerani kuna ine, . . . ine ndinadzakubalangazani.’ Mu nsolo uno tinatawira mibvundzo mixanu: Tinaenda tani kuna Yezu? Kodi Yezu akhafuna kubvekesanji pidalonga iye: “Kwatani goli yanga?” Tinapfundzanji na citsandzo ca Yezu? Thangwi yanji kucita basa idatipasa Yezu kusatibalangaza? Tinapitiriza tani kubalangazwa tingakwata goli ya Yezu?

4-5. Ndi munjira zipi tinakwanisa ‘kuenda’ kuna Yezu?

⁴ Njira ibodzi ya ‘kuenda’ kuna Yezu ndi kucita pyonsene pinakwanisa ife toera kupfundza pizinji thangwi ya pinthu pidalonga iye na pidacita iye. (Luka 1:1-4) Nkhabe munthu anafuna kuticitira pyenepi, anafunika kupfundza pinalonga Bhibhlya thangwi ya Yezu ndife. Ife ‘tisaendambo’ kuna Yezu tingacita cisankhulo cakubatizwa, mbatikhala anyakupfundza a Kristu.

⁵ Njira inango ya ‘kuenda’ kuna Yezu ndi kuphemba ciphedzo kuna akulu a mpingo. Yezu asaphatisira ‘miyoni ya amuna’ toera kutsalakana mabirace. (Aef. 4:7, 8, 11; Juw. 21:16; 1 Ped. 5:1-3) Tisafunika kukhala akutoma kuphemba ciphedzo cawo. Nee tisafunika kudikhira kuti akulu a mpingo analotera pinanyerezera ife, mbadziwa pinafuna ife. M’bale unango anacemerwa Julian alonga: “Ine ndasiya kutumikira ku Bheteli thangwi ya nyatwa za ungumi, pontho xamwali wanga andipanga toera ndiphembe ciphedzo ca akulu a mpingo. Pakutoma, ine ndaona kuti pyenepi nee pikhali pyakufunika. Mbwenye mukupita kwa ndzidzi ndaphemba ciphedzo, pontho kundicedzera kudandicita akulu a mpingo kukhali ninga muoni wadidi kakamwe wakuti cipo ndautambira kale.” Akulu a mpingo akukhulupirika, ninga awiri adacedzera Julian, anakwanisa kutiphedza toera kudziwa “manyerezero a Kristu,” peno kutowezera njira yace yakunyerezera na makhaliro ace. (1 Akor. 2:16; 1 Ped. 2:21) Mwandimomwene, unoyu ndi muoni ukulu kakamwe wakuti iwo anakwanisa kutipasa.

6. Kodi Yezu akhafuna kulonganji na mafala akuti: “Kwatani goli yanga”?

⁶ Pidalonga Yezu kuti: “Kwatani goli yanga,” panango akhafuna kulonga “Ndibvereni.” Panango akhafunambo kulonga “Kwatani goli pabodzi na ine, pontho tendeni titumikire Yahova pabodzi.” Munjira ziwiri zene, mafala anewa asabveka kuphata basa.

7. Mwakubverana na Mateu 28:18-20, ndi basa ipi idapaswa ife, pontho tisafunika kukhala na cinyindiro cipi?

⁷ Ife tisatawira phembo ya Yezu tingaperekeka kuna Yahova mbatibatizwa. Yezu asaphemba anthu onsene toera aende kuna iye, pontho iye nee anakhonda kutambira munthu anafuna kutumikira Mulungu. (Juw. 6:37, 38) Atowereri onsene a Kristu apaswambo basa idapaswa Yezu na Yahova. Ife tinakwanisa kukhala na cinyindiro cakuti ndzidzi onsene Yezu anatiphedza toera kucita basa ineyi.—Lerini Mateu 28:18-20.

8-9. Thangwi yanji anthu akucepeseka akhaenda kuna Yezu, pontho ndi mibvundzo ipi inafunika ife kucitika?

⁸ Anthu akucepeseka akhaenda kuna Yezu. (Mat. 19:13, 14; Luka 7:37, 38) Thangwi yanji? Onani kusiyana kwa Yezu na Afarisi. Atsogoleri anewa auphemberi akhali akusowa ufuni na akudzikuza. (Mat. 12:9-14) Yezu akhali waufuni na wakucepeseka. Afarisi akhali anthu akuti akhafuna pinthu pizinji, pontho akhadzikuza thangwi ya cidzo cikhali na iwo pacisa. Yezu alonga kuti pyenepi nee ndi pyadidi, natenepa iye apfundzisa anyakupfundzace toera akhale akucepeseka, mbatumikira anango. (Mat. 23:2, 6-11) Afarisi akhaponderera anthu, thangwi iwo akhagopa pinthu pikhafuna kuacitikira angakhonda kubvera Afarisi. (Juw.  9:13, 22) Yezu abalangaza anango, kubulukira m’macitiro ace aufuni na mafalace adidi.

⁹ Pyenepi ndi pinthu pinapfundza ife kubulukira mu citsandzo ca Yezu. Natenepa bvundzikani: ‘Kodi anthu anango asandidziwa ninga munthu wadidi na wakucepeseka? Ndiri dzololo kucita mabasa akucepeseka toera kuphedza anango? Ndine wakukoma ntima kuna anango?’

12-14. Thangwi yanji basa idatipasa Yezu ndi yakubalangaza?

¹² Thangwi yanji pisatibalangaza kuphata basa idatipasa Yezu? Pana mathangwi mazinji, mbwenye tendeni tione mangasi.

¹³ Ife tiri na ayang’aniri adidi kakamwe. Yahova, wakuti ndi Muyang’aniri wathu Wankulu Kakamwe nee ndi wakukhonda kupereka takhuta na waukali. Iye asakomerwa na basa inacita ife. (Aheb. 6:10) Pontho asatipasa mphambvu zinafuna ife toera kutsalakana basa idatipasa iye. (2 Akor. 4:7; Agal. 6:5, cidzindikiro capantsi) Mambo wathu Yezu apangiza citsandzo cakuti tinatsalakana tani anango. (Juw. 13:15) Pontho akulu a mpingo anatitsogolera, asawangisira toera kutowezera citsandzo ca Yezu, “nkumbizi wankulu.” (Aheb. 13:20; 1 Ped. 5:2) Iwo asawangisira toera kukhala akukoma ntima na akubalangaza anango, pontho asatipfundzisa, asatitsogolera na kutitsalakana.

¹⁴ Ife tiri na axamwali adidi kakamwe. Nkhabepo anthu anango akuti ali na axamwali aufuni, pontho ali na basa yakutsandzayisa ninga iri na ife. Nyerezerani basi: Ife tisaphata basa pabodzi na abale na alongo akuti ali na makhaliro adidi kakamwe, mbwenye iwo nee asanyerezera kuti ndi adidi kakamwe kupiringana anango. Iwo ali na maluso, mbwenye ndi akucepeseka, pontho asaona anango ninga akulu kupiringana iwo. Iwo nee asationa basi ene ninga anthu anaphata basa pabodzi na iwo, mbwenye asationambo ninga axamwali. Ufuni wawo kuna ife ndi ukulu kakamwe kwakuti asakhala dzololo toera kutifera!

15. Tisafunika kuona tani basa inacita ife?

¹⁵ Ife tiri na basa yadidi kakamwe. Tisapfundzisa anthu undimomwene unalonga pya Yahova, pontho tisapangiza pakweca uthambi unalongwa na Dyabo. (Juw. 8:44) Sathani asathabusa anthu na uthambi wakuti usaacitisa kukhala akusowa cidikhiro. Mwacitsandzo, iye asafuna tikhulupire kuti Yahova nee asatilekerera madawo athu, pontho nee asatifuna. Unoyu ndi uthambi ukulu wakuti usacitisa anthu kukhala akutsukwala kakamwe. Tingaenda kuna Yezu, madawo athu asalekererwa. Undimomwene ndi wakuti Yahova asafuna kakamwe ife tonsene. (Aroma 8:32, 38, 39) Mphyakutsandzayisa kakamwe kuphedza anthu toera anyindire Yahova, mbakhala na umaso wadidi!

16. Kodi ntolo unatiphemba Yezu toera kuuthukula wasiyana tani na mitolo inathukula ife?

¹⁶ Ntolo unatiphemba Yezu toera kuuthukula wasiyana na mitolo inathukula ife ntsiku na ntsiku. Mwacitsandzo, azinji angakotoka kubasa, kusiyapo kukhala akuneta, iwo asakhalambo akutsukwala. Mbwenye tingatumikira Yahova na Kristu, tisakhala akutsandzaya kakamwe. Panango tisakhala akuneta kakamwe tingakotoka kubasa, mbwenye tisawangisira toera kuenda kumisonkhano pa ntsiku ineyi. Natenepa tingakotoka kumisonkhano tisabwerera na mphambvu, pontho akutsandzaya. Pyenepi pisacitikambo tingaenda kamwaza mphangwa na kucita pfundziro ya Bhibhlya ya munthu paekha. Tingawangisira toera kucita pyenepi, tisakhala na mphambvu, pontho akutsandzaya.

17. Tisafunika kubvesesanji thangwi ya makhaliro athu, pontho tisafunika kucita mphole-mphole nanji?

¹⁷ Tisafunika kudziwa kuti m’bodzi na m’bodzi wa ife ali na mphambvu zace. Natenepa tisafunika kucita mphole-mphole na pinthu pinacita ife. Mwacitsandzo, panango tinabvunga mphambvu zathu mbatigumanya pinthu pyakumanungo. Onani pidalonga Yezu kuna m’phale wakupfuma, adambvundza kuti: “Ndisafunika kucitanji toera ndigumane umaso wakukhonda mala?” M’phale unoyu akhabvera kale Mwambo. Pisaoneka kuti iye akhali munthu wadidi, thangwi Bukhu ya Marko isalonga kuti Yezu “akhanfuna.” Natenepa Yezu apanga m’phale unoyu kuti: ‘Ndoko kagulise pinthu pyako, buluka penepo bwera ukhale nyakupfundza wanga.’ M’phale unoyu akhafuna kutowera Yezu, mbwenye iye nee akhafuna kusiya pinthu “pizinji kakamwe” pikhali na iye. (Marko 10:17-22) Natenepa, iye akhonda goli idampasa Yezu, mbapitiriza kukhala bitcu wa “Mpfuma.” (Mat. 6:24) Khala ndimwe, mbamudacitanji?

18. Kodi midzidzi inango tisafunika kucitanji, pontho thangwi yanji?

¹⁸ Tingakhala, midzidzi inango ndi pyadidi kunyerezera kuti ndi pinthu pipi pinaikha ife pa mbuto yakutoma mu umaso wathu. Thangwi yanji? Tingacita pyenepi, tinakhala na cinyindiro cakuti tikuphatisira mphambvu zathu mwandzeru. M’phale unango anacemerwa Mark alonga: “Mu pyaka pizinji, ndikhanyerezera kuti ndiri na umaso wakukhonda funa pizinji. Ndikhatumikira ninga mpainiya, mbwenye ndzidzi onsene ndikhanyerezera pya kobiri, pontho kuti ndinakhala tani na umaso wadidi. Ndikhadzudzumika kuti thangwi yanji umaso wanga ukhali wakunentsa. Buluka penepo, ndadzindikira kuti ndikhaikha pifuno pyanga pa mbuto yakutoma, mbandiikha pifuno pya Yahova pa mbuto yaciwiri.” Mark acinja manyerezero ace na makhaliro ace, mbatoma kucita pizinji m’basa ya Yahova. Mark alonga: “Midzidzi inango, ndisadzudzumika thangwi ya kobiri, mbwenye na ciphedzo ca Yahova na ca Yezu, ndisakwanisa kukunda pinentso pyenepi.”

19. Thangwi yanji ndi pyakufunika kakamwe kukhala na maonero adidi?

¹⁹ Ife tinapitiriza kubalangazwa na goli ya Yezu tingacita pinthu pitatu. Cakutoma, pitirizani kukhala na maonero adidi. Ife tikuphata basa ya Yahova, natenepa tisafunika kuphata basa ineyi munjira inafuna iye. Ife ndife anyabasa, pontho Yahova ndi Mbuyathu. (Luka 17:10) Tingaphata basa ninga munafuna ife, pinakhala pyakunentsa kakamwe. Nyerezerani pinafuna kucitika na ng’ombe inayesera kubuluka pagoli toera ithawe mbienda kunafuna iyo. Ngakhale ng’ombe ineyi ikhale yamphambvu kakamwe, iyo inaneta mbiphekeka. Mbwenye tingaphata basa munjira inafuna Yahova, tinakwanisa kucita pinthu pyakuti cipo tapinyerezera kale, mbatikunda pinentso pyakuti cipo tapinyerezera kale kuti tinapikunda. Kumbukani kuti Yahova angafuna cinthu cicitike, nkhabe  munthu anafuna kwanisa kumpingiza!—Aroma 8:31; 1 Juw. 4:4.

20. Ninji cinafuna kutikulumiza toera kukwata goli ya Yezu?

²⁰ Caciwiri, phatani basa na cifuno cadidi. Cifuno cathu ndi kupasa mbiri Babathu waufuni, Yahova. Anthu a mu ndzidzi wa Yezu akuti akhafuna pinthu pyawo basi, mwakukhonda dembuka adzakhala akutsukwala, mbasiya kukwata goli ya Yezu. (Juw. 6:25-27, 51, 60, 66; Afil. 3:18, 19) Mbwenye ale akhakulumizwa na ufuni wandimomwene kuna Mulungu na kuna andzawo, akhakwata mwakutsandzaya goli ya Yezu mu umaso wawo pa dziko yapantsi, mbakhala na cidikhiro cakutumikira pabodzi na Kristu kudzulu. Ninga iwo, ife tinakhala akutsandzaya tingakwata goli ya Yezu na cifuno cadidi.

21. Mwakubverana na Mateu 6:31-33, tisadikhira kuti Yahova anacitanji?

²¹ Cacitatu, khalani na cidikhiro cadidi. Ife tingatawira goli ya Yezu, tisakhala na cifuno cakuphedza anango, mbatiphata basa mwaphinga. Yezu aticenjeza kuti tinadzatcingwa. Mbwenye tisanyindira kuti Yahova anadzatipasa mphambvu toera kupirira pinentso pyonsene. Tingapirira kakamwe, tinakhalambo akuwanga. (Tiya. 1:2-4) Ife tisadikhirambo kuti Yahova anatipasa pinthu pinafuna ife, Yezu anatitsogolera, pontho abale na alongo athu anatiwangisa. (Lerini Mateu 6:31-33; Juw. 10:14; 1 Ates. 5:11) Mwakukhonda penula, tiri na pyonsene pinafuna ife toera kupirira.

22. Ndi pinthu pipi pinaticitisa kupereka takhuta?

²² Nkazi adawangisa Yezu abalangazwa pa ntsiku ibodzi ene idawangiswa iye. Mbwenye toera apitirize kubalangazwa, iye akhafunika kukhala nyakupfundza wakukhulupirika wa Kristu. Musanyerezera kuti iye acitanji? Khala iye atawira kukwata goli ya Yezu, atambira nkhombo yakutumikira pabodzi na Yezu kudzulu! Nkhombo zidatambira iye thangwi yakutowera Kristu zapiringana pinthu pyonsene pidasiya iye. Mwakukhonda tsalakana khala cidikhiro cathu ndi cakuenda kudzulu peno kukhala pa dziko yapantsi, ife tinakwanisa kupereka takhuta thangwi ya mafala adalonga Yezu kuti: “Bwerani kuna ine.”