1-2. Kodi lemba ya Koelete 11:6 isabverana tani na basa yakumwaza mphangwa za Umambo?

M’MADZIKO anango anthu asakomerwa na kubva mphangwa zadidi. Pontho iwo asazifuna kakamwe. Mbwenye m’madziko anango anthu nee asakomerwa kakamwe na kubva mphangwa za m’Bhibhlya. Mphapo anthu a mucisa canu asaona tani mphangwa zenezi? Mwakukhonda tsalakana khala anthu atawire peno akhonde, Yahova asafuna kuti tipitirize kucita basa ineyi mpaka pa ndzidzi unafuna kulonga iye lekani kucita basa ineyi.

² Yahova akhazikisa ndzidzi toera kufunga basa yakumwaza mphangwa. Buluka penepo “kumala kunadzafika.” (Mat. 24:14, 36) Mbudzati kufika ndzidzi unoyu tinabvera tani mafala akuti ‘leka kupumisa manja ako’? *—Lerini Koelete 11:6.

3. Tinadzadinganji mu nsolo uno?

³ Nsolo udamala wafokotoza pinthu pinai pisafunika ife kucita toera kukhala amwazi mphangwa adidi. (Mat. 4:19) Mu nsolo uno tinadinga pinthu pitatu pyakuti pinatiphedza toera kupitiriza kumwaza mphangwa mwakukhonda tsalakana pinentso pinathimbana na ife. Pontho tinadzaona kuti thangwi yanji ndi pyakufunika (1) kuikha basa yakumwaza mphangwa pa mbuto yakutoma, (2) kukhala wakupirira na (3) kukhala na cikhulupiro cakuwanga.

4. Thangwi yanji tisafunika kuikha pa mbuto yakutoma basa idatipasa Yahova?

⁴ Yezu apanga anyakupfundzace thangwi ya makhaliro akuti anthu mbadaapangiza mu ntsiku zakumalisa na pinthu pyakuti mbipidacitika ntsiku zenezi. Iye acenjeza anyakupfundzace toera  ‘apitirize kukhala maso.’ (Mat. 24:42) Mu ntsiku za Nowa, pakhali na pinthu pizinji pyakuti pikhadzudzumisa anthu mbacimwana kubvesera mphangwa zikhalonga Nowa. Pinthu pibodzi pyene pinakwanisambo kutidzudzumisa lero. (Mat. 24:37-39; 2 Ped. 2:5) Na thangwi ineyi, tisafunika kuikha pa mbuto yakutoma basa idatipasa Yahova.

5. Mwakubverana Mabasa 1:6-8, kodi mphangwa zadidi za Umambo mbizidamwazwa mpaka papi?

⁵ Ndi pyakufunika kakamwe kwa ife lero kuikha basa yakumwaza mphangwa pa mbuto yakutoma. Yezu apanga anyakupfundzace kuti iwo mbadapitiriza kumwaza mphangwa iye angafa, pontho mbadacita basa ineyi kupiringana iye. (Juwau 14:12) Pidafa Yezu, anyakupfundzace anango asiya basa yakumwaza mphangwa mbaenda kacita mabasa awo akusodza nyama za m’madzi. Pidalamuswa Yezu muli akufa, iye acita cirengo mbaphedza anyakupfundzace anango toera kupha nyama za m’madzi zizinji. Pidamala iye kucita cirengo ceneci, Yezu apanga anyakupfundzace kuti basa yakumwaza mphangwa na yakucita anyakupfundza ndi yakufunika kakamwe kupiringana mabasa anango. (Juwau 21:15-17) Yezu mbadzati kuenda kudzulu, iye apanga anyakupfundzace kuti basa yakumwaza mphangwa mbidacitwa m’mbuto zizinji tayu basi mu Yerusalemu. (Lerini Mabasa 1:6-8.) Kubulukira m’masomphenya, Yezu apangiza Juwau pinthu pyakuti mbapidacitika ‘mu ntsiku za Mbuya.’ * M’masomphenya anewa, Juwau aonambo anju wakuti akhali na “mphangwa zadidi za kwenda na kwenda” toera kuzimwaza kuna anthu “a madzindza onsene, a pilongero pyonsene na mbumba zonsene.” (Apok. 1:10; 14:6) Mwandimomwene, Yahova asafuna kuti tiphate basa ineyi yakumwaza mphangwa mpaka kunkhomo.

6. Ninji pinafuna kutiphedza toera kuikha basa yakumwaza mphangwa pa mbuto yakutoma?

⁶ Ife tinakwanisa kuikha basa yakumwaza mphangwa pa mbuto yakutoma tinganyerezera pinthu pyonsene pinacita Yahova toera  kutiphedza. Mwacitsandzo, iye asatipasa cakudya cauzimu cakunjipa kakamwe. Ninga mabukhu akudhindwa, a mu interneti, ma audhyu, mavidhyu na maprogramu a Broadcasting. Pontho mu saiti yathu musagumanika mphangwa mu pilongero pyakupiringana 1.000. (Mat. 24:45-47) Mu ndzidzi wakuti dziko iri yakugawika thangwi ya pinthu pya ndale, mauphemberi na pinthu pya mpfuma, Mboni za Yahova zakupiringana oito milhões zisapitiriza kukhala zakuphatana pa dziko yonsene yapantsi. Mwacitsandzo, pa ntsiku ya Cixanu ya 19 ya Abril ya 2019, Mboni za Yahova zaona vidhyu ikhapangiza kudingwa kwa lemba ya ntsiku. Pa ntsiku ibodzi ene namaulo, anthu akukwana 20.919.041 akumbuka kufa kwa Yezu. Tinganyerezera mwai unoyu uli na ife wakucita khundu mu gulu ya Yahova pinatiphedza toera kupitiriza kuikha basa yakumwaza mphangwa za Umambo pa mbuto yakutoma.

7. Kodi citsandzo ca Yezu cinatiphedza tani toera kuikha basa yakumwaza mphangwa pa mbuto yakutoma?

⁷ Njira inango inafuna kutiphedza toera kuikha basa yakumwaza mphangwa pa mbuto yakutoma ndi kutowezera citsandzo ca Yezu. Iye nee atawira kudzudzumiswa na pinthu pinango m’basa yace yakumwaza mphangwa. (Juwau 18:37) Mu ndzidzi udanyengererwa iye na Sathani toera kumpasa “mautongi onsene a dziko yapantsi na upfumi wawo,” iye akhonda. (Mat. 4:8, 9; Juwau 6:15) Kusiyapo pyenepi, iye nee adzudzumika na pinthu pya mpfuma peno kugopa anthu ale akhantcinga. (Luka 9:58; Juwau 8:59) Ife tingathimbana na mayesero, uphungu wa mpostolo Paulu unatiphedza toera kuikha basa yakumwaza mphangwa pa mbuto yakutoma. Iye akulumiza Akristu kuti atowezere citsandzo ca Yezu toera ‘akhonde kuneta nee kubwerera nduli.’—Aheb. 12:3.

8. Thangwi yanji kupirira ndi kwakufunika?

⁸ Anthu akupirira asadikhira mwakukhurudzika mpaka pa ndzidzi unacinja pinthu. Mwacitsandzo, mu ndzidzi unadikhira ife kuti uipi umale peno kuti pinthu pinafuna ife picitike tisafunika kukhala akupirira. Mprofeta Habhakuki akhafuna kakamwe kuti pinthu pyakuipa pikhacita anthu anango mu Yuda pimale. (Hab. 1:2) Anyakupfundza a Yezu akhadikhira kuti Umambo wa Mulungu “mbudaoneka mwakucimbiza” toera kuasudzula mu utongi Waciroma. (Luka 19:11) Munjira ibodzi ene, ife tisafuna kuti Umambo wa Mulungu umalise uipi onsene mbucitisa dziko yapantsi kukhala paraizu. (2 Ped. 3:13) Mbwenye tisafunika kukhala akupirira mpaka pa ndzidzi udakhazikisa Yahova toera kucita pyenepi. Cincino tendeni tidinge njira zingasi zakuti Yahova asatipfundzisa toera kukhala akupirira.

9. Ndi pinthu pipi pinapangiza kuti Yahova ndi wakupirira?

⁹ Yahova ndi citsandzo cadidi kakamwe ca kupirira. Iye apasa ndzidzi wakukwana Nowa toera kumanga Bote, pontho toera ‘kumwaza mphangwa za ulungami.’ (2 Ped. 2:5; 1 Ped. 3:20) Yahova abvesera mwakupirira mu ndzidzi ukhabvundzwa iye na Abhrahamu thangwi ya cisankhulo cidacita Yahova cakufudza anthu akuipa a mu nzinda wa Sodhoma na Gomora. (Gen. 18:20-33) Yahova apirira mu pyaka pizinji thangwi ya kukhonda kukhulupirika kwa Aizraeli. (Neh. 9:30, 31) Ife tisakwanisambo kuona kupirira kwa Yahova lero thangwi iye asapasa ndzidzi wakukwana anthu onsene anafuna kukhala axamwali ace toera “atcunyuke.” (2 Ped. 3:9; Juwau 6:44; 1 Tim. 2:3, 4) Kupirira kwa Yahova kusatiphedza toera kukhala akupirira mu ndzidzi unapitiriza ife kumwaza mphangwa na kupfundzisa anthu. Yahova asatipfundzisambo kukhala akupirira kubulukira kwa anthu anango analongwa m’Bhibhlya.

10. Kodi citsandzo ca nyakulima analongwa pa lemba ya Tiyago 5:7, 8, cisatipfundzisanji?

¹⁰ Lerini Tiyago 5:7, 8. Citsandzo ca anyakulima cisatipfundzisa kufunika kwakukhala akupirira. Ndimomwene kuti pinthu pinango pinalima anthu pisakula mwakucimbiza. Mbwenye pinango  pyakuti pisabala misapo pisakwata ndzidzi uzinji toera kutokota. Mu ndzidzi ukhabzwala Aizraeli pinthu pyawo, iwo akhadikhira miyezi mitanthatu toera pinthu pyenepi pikule. Madzi akutoma angabvumba, nyakulima asabzwala mbeu zace, pontho asakolola pinthu pidalima iye m’miyezi yakuti madzi nkhabe bvumba kakamwe. (Marko 4:28) Natenepa, ndi pyakufunika kakamwe kutowezera kupirira kwa nyakulima unoyu maseze ndi pyakunentsa.

11. Kodi kupirira kunatiphedza tani m’basa yakumwaza mphangwa?

¹¹ Ninga anthu akusowa ungwiro, kazinji kene ife tisafuna kakamwe kuti pinthu pinafuna ife picitike mwakucimbiza. Mbwenye nyakulima asafunika kusakulira mundace toera pinthu pidabzwala iye pibuluke mwadidi. Munjira ibodzi ene, khala tisafuna kucita anyakupfundza, tisafunikambo kuwangisira kakamwe. Pontho pisakwata ndzidzi toera anyakupfundza athu akwanise kukhala aufuni na akusowa tsankhulo. Mbwenye kupirira kunatiphedza toera tikhonde kubwerera nduli anthu angakhonda kubvesera pinapfundzisa ife. Maseze anthu anango abvesere pinthu pinaapfundzisa ife, ife tisafunika kupitiriza kukhala akupirira. Ife nee tisafunika kukakamiza anyakupfundza Bhibhlya toera akhale na cikhulupiro cakuwanga. Ngakhale mu ndzidzi ukhapfunzisa Yezu anyakupfundzace nee akhabvesesa pyonsene pikhapfundzisa iye. (Juwau 14:9) Ife tisafunika kukumbuka kuti panango tinabzwala mbatithirira, mbwenye asakulisa ndi Mulungu.—1 Akor. 3:6.

12. Tinapangiza tani kupirira mu ndzidzi unamwazira ife mphangwa acibale athu?

¹² Panango pinakhala pyakunentsa kuna ife toera kukhala akupirira tingamwazira mphangwa acibale athu. Mbwenye mafala anagumanika pa lemba ya Koelete 3:1, 7 anakwanisa kutiphedza. Lemba ineyi isalonga: “Ulipo ndzidzi wakumatama na ndzidzi wakulonga.” Makhaliro athu adidi anakwanisa kuphedza acibale athu toera kubvesera mphangwa zinaamwazira ife. Mu ndzidzi ubodzi ene ife tisafunika kukhala dzololo toera kuapanga undimomwene unalonga pya Yahova. (1 Ped. 3:1, 2) Ife tisafunika  kumwaza mphangwa na kupfundzisa mwacipapo, mbwenye ndzidzi onsene tisafunika kukhala akupirira kuphatanizambo mu ndzidzi unamwazira ife mphangwa acibale athu.

13-14. Ndi pitsandzo pipi pya anthu adapangiza kupirira pyakuti tisafunika kupitowezera?

¹³ Ife tinakwanisa kukhala akupirira tingatowezera pitsandzo pya atumiki akukhulupirika akale na a cincino. Habakuki akhafuna kakamwe kuti uipi umale, mbwenye iye apangiza kuti akhali wakupirira mudalonga iye kuti: ‘Ine ndinapfulika pyanga ninga nyakuonera pa mbuto yace.’ (Hab. 2:1) Pontho mpostolo Paulu akhafuna kakamwe “kumalisa” basa yace yakumwaza mphangwa. Mbwenye, mwakupirira iye apitiriza “kupereka umboni wakukwana wa mphangwa zadidi.”—Mabasa 20:24.

¹⁴ Onani citsandzo ca banja ibodzi idakursari xikola ya Gileadhi mbitumizwa ku dziko yakuti nee kuli na mboni za Yahova zizinji, pontho anthu azinji ku dziko ineyi nee asaphembera. Kusiyapo pyenepi, anthu azinji ku dziko ineyi nee asafuna kupfundza Bhibhlya. Mbwenye andzawo adakursari na iwo pabodzi xikola ya Jileadhi akuti asatumikira m’madziko anango aapanga kuti anthu azinji asapfundza Bhibhlya, pontho anango asakhala Mboni za Yahova. Mbwenye banja ineyi yapitiriza kumwaza mphangwa mwakupirira, maseze anthu azinji a mu dziko ineyi nee akhabvesera mphangwa zikhamwaza iwo. Pakumala pyaka pisere mbakamwaza mphangwa mu dziko ineyi, iwo adzatsandzaya kakamwe thangwi yakuona nyakupfundza wawo wa Bhibhlya m’bodzi mbabatizwa. Kodi pitsandzo pyenepi pya atumiki akale na a cincino pisatipfundzisanji? Atumiki anewa apitiriza kuphata basa mwaphinga, pontho Yahova apasa nkhombo kupirira kwawo. Mwakukhonda penula, pitsandzo pyenepi pisatikulumiza toera kutowezera “ale akuti kubulukira mu cikhulupiro na kupirira, atambira pinthu pidapikirwa.”—Aheb. 6:10-12.

15. Kodi kukhala na cikhulupiro cakuwanga kunatiphedza tani toera kumwaza mphangwa?

¹⁵ Ife tisakhulupira mphangwa zinamwaza ife, natenepa tisafunambo kakamwe kupanga anthu azinji pingakwanisika. Ife tisakhulupira mapikiro anagumanika m’Mafala a Mulungu. (Masal. 119:42; Iza. 40:8) Ife tisaona kukwanirisika kwa maprofesiya a Bhibhlya lero. Pontho tisaona anthu azinji mbacinja umaso wawo mu ndzidzi unatoma iwo kuphatisira uphungu wa Bhibhlya. Pinthu pyenepi pisatipasa cinyindiro cakuti mphangwa zadidi za Umambo ndi zakufunika kuna anthu onsene.

16. Mwakubverana na Masalmo 46:1-3, kodi kukhulupira Yahova na Yezu kunatiphedza tani toera kumwaza mphangwa?

¹⁶ Ife tisakhulupirambo Yahova wakuti ndi Mwanaciro mphangwa zinamwaza ife, pontho tisakhulupira Yezu ule adakhazikiswa na Yahova ninga Mambo wa Umambo. (Juwau 14:1) Mwakukhonda tsalakana pinthu pinathimbana na ife, ndzidzi onsene Yahova ndi pakuthawira pathu na mphambvu yathu. (Lerini Masalmo 46:1-3.) Kusiyapo pyenepi, ife tisakhulupira kuti Yezu ali kutsogolera basa yakumwaza mphangwa bulukira kudzulu mukuphatisira mphambvu zidapaswa iye na Yahova.—Mat. 28:18-20.

17. Ndi citsandzo cipi cinapangiza kuti tisafunika kupitiriza kumwaza mphangwa?

¹⁷ Cikhulupiro cisatipasa cinyindiro cakuti Yahova anapasa nkhombo kuwangisira kwathu, midzidzi inango iye anacita pyenepi munjira yakuti nee tikhaidikhira. (Koel. 11:6) Mwacitsandzo, ntsiku zonsene anthu azinji kakamwe asaona mabukhu athu m’meza zinamwaza na ife mphangwa na m’makarinya anaphatisira ife toera kumwaza mphangwa. Kodi njira ineyi yakumwaza mphangwa isaphedza? Inde. Utumiki Wathu wa Umambo wa mwezi wa Novembro wa 2014 walonga pya ntsikana unango akhapfundza ku Universidhadhe wakuti akhafuna kulemba mphangwa thangwi ya Mboni za Yahova. Iye nee akhakwanisa  kugumana Nyumba ya Umambo, mbwenye ntsiku inango iye aona meza yakuti ikhali na mabukhu athu, pontho agumana mphangwa zikhafuna iye. Cincino iye abatizwa, pontho asatumikira ninga mpainiya wa ndzidzi onsene. Citsandzo ceneci cisatikulumiza toera kupitiriza kumwaza mphangwa thangwi cisapangiza kuti aciripo anthu azinji akuti asafuna kubva mphangwa za Umambo.

18. Thangwi yanji tiri na cinyindiro cakuti basa yakumwaza mphangwa za Umambo inadzamaliswa ninga munafuna Yahova?

¹⁸ Ife tiri na cinyindiro cakuti basa yakumwaza mphangwa za Umambo inadzamala pa ndzidzi wakuthema. Onani pinthu pidacitika mu ntsiku za Nowa. Yahova apangiza pakweca kuti ndzidzi onsene iye asacita pinthu pa ndzidzi wakuthema. Pikhadasala pyaka cifupi na 120 toera Cigumula cicitike, Yahova alonga mwanyapantsi ndzidzi ukhafuna kucitika ico. Yahova apanga Nowa toera kucita bote mu ndzidzi wakuti pakhadasala pyaka pizinji toera cigumula cicitike. Pisaoneka kuti Nowa amala pyaka 40 peno 50 toera kucita basa ineyi yakumanga bote. Maseze anthu nee akhambvesera, Nowa apitiriza na kumwaza mphangwa zakucenjeza mpaka pa ndzidzi udampanga Yahova toera apitise pinyama m’bote. Buluka penepo, pa ndzidzi wakuthema ‘Yahova afunga nsuwo wa bote.’—Gen. 6:3; 7:1, 2, 16.

19. Ndi nkhombo zipi zinafuna kudzakhala na ife tingakhonda kupumisa manja athu?

¹⁹ Mwakukhonda dembuka, Yahova anadzatipanga kuti basa yakumwaza mphangwa zadidi za Umambo yamala. Buluka penepo, iye anadzafudza dziko ya Sathani mbabweresa dziko ipswa yakuti inadzadzala na anthu akubvera Mulungu. Mpaka ndzidzi unoyu, ife tisafunika kupitiriza kutowezera Nowa, Habakuki na atumiki anango a Yahova akuti nee apumisa manja awo. Pontho, ife tisafunika kupitiriza kuikha basa yakumwaza mphangwa pa mbuto yakutoma, kukhala akupirira na kuwangisa cikhulupiro cathu kuna Yahova na mapikiro ace.