Vesi ineyi isalonga: ‘Mu provinsya yako ungaona kuti ntongi akuponderera ntcerengi, mbakhonda kupangiza ulungami na pinthu pyadidi kuna ale anatonga iye, leka kudzudzumika na pyenepi. Thangwi ule anatonga, asaoniwa na munthu wankulu kupiringana iye, pontho pali na anangombo akuti ali na cidzo cikulu kupiringana iwo.’—Koel. 5:8.

M’maonero a anthu, vesi ineyi isalonga pya mautongi a anthu. Mbwenye tinganyerezera mwadidi vesi ineyi, iyo isalongambo undimomwene wa Yahova wakuti ndi wakufunika kakamwe kuna ife.

Lemba ya Koelete 5:8 isalonga pya ntongi wakuti asaponderera anyakutcerenga mbakhonda kupangiza ulungami kuna iwo. Ntongi unoyu asafunika kudziwa kuti pana munthu anamuona wakuti ndi wapadzulu kakamwe kupiringana iye. Pontho iwo asafunika kudziwa kuti pana anango akuti ndi apadzulu kakamwe kupiringana iwo. Mbwenye mwakutsukwalisa mautongi anewa onsene ndi aumbirimi, pontho anthu asathabuka thangwi iwo asatonga mwakusowa ulungami.

Mwakukhonda tsalakana nyatwa zinathimbana na ife thangwi ya mautongi anewa, ife tisabalangazwa mu kudziwa kuti Yahova asadziwa pyonsene pinacita mautongi anewa. Kusiyapo pyenepi, ife tinakwanisa kuphemba Yahova mbatintulira nyatwa zathu zonsene. (Masal. 55:22; Afil. 4:6, 7) Pontho tisadziwa kuti ‘maso a Yahova asayang’ana pa dziko yonsene yapantsi toera kupangiza mphambvu zace kuna anthu akukhulupirika kuna iye.’—2 Pya dziko. 16:9.

Lemba ya Koelete 5:8 isatiphedza kudziwa kuti pa mautongi onsene a anthu alipo ntongi wa padzulu kakamwe kupiringana iwo. Pontho cinthu cakufunika kakamwe ndi cakuti lemba ineyi isatiphedza kudziwa kuti Yahova ndi wa padzulu kakamwe kupiringana pyonsene. Cincino Yahova ali kutonga mukuphatisira mwanace Yezu Kristu, wakuti ndi Mambo wa Umambo wa Mulungu. Yahova wamphambvu zonsene, wakuti asaona pinthu pyonsene ndi wakulungama pontho mwanace ndi wakulungamambo.