1. Kodi tinakwanisa kucemera Yahova ninga ani?

ATUMIKI a Yahova asaphataniza Yezu wakuti ndi “mwana wautombo” na mwinji wa aanju. (Akol. 1:15; Masal. 103:20) Pikhali Yezu pa dziko yapantsi, iye aphedza anthu kubvesesa kuti iwo anakwanisa kucemera Yahova ninga Babawo. Pikhacedza iye na anyakupfundzace, iye acemera Yahova ninga “Babanga, wakuti ndi Babanumbo.” (Juwau 20:17) Ife tingaperekeka kuna Yahova mbatibatizwa, tisacita khundu ya abale na alongo akuti asafunana unango na ndzace.—Marko 10:29, 30.

2. Tinapfundzanji mu nsolo uno?

² Kuna anthu anango pisakhala pyakunentsa kuona Yahova ninga Baba waufuni. Pontho anango nee asadziwa kuti anapangiza tani ufuni kuna abale na alongo. Mu nsolo uno, ife tinapfundza kuti Yezu asatiphedza tani toera kuona Yahova ninga Baba waufuni wakuti tinakwanisa kunfendedzera cifupi. Kusiyapo pyenepi, tinapfundzambo kuti tinatowezera tani Yahova munjira inatsalakana ife abale na alongo athu.

3. Kodi phembero idapfundzisa Yezu isatiphedza tani toera kufendedzera cifupi Yahova?

³ Yahova ndi Baba waufuni. Yezu asafuna kuti tione Yahova ninga munamuonera iye. Yezu asaona Yahova ninga Baba waufuni, wakuti tinakwanisa kulonga naye ndzidzi onsene, tayu ninga munthu wakuuma ntima wakuti asatipanga toera kucita basi ene pinthu pinafuna iye. Ife tinakwanisa kuona pyenepi kubulukira mu phembero idapfundzisa Yezu anyakupfundzace. Iye apanga anyakupfundzace toera atome kulonga tenepa pakucita phembero: “Babathu.” (Mat. 6:9) Yezu mbadakwanisa kutipanga toera ticemere Yahova ‘Wamphambvu Zonsene,’ ‘Ule Adacita pinthu pyonsene,’ peno “Mambo wakwenda na kwenda.” Pyenepi nee ndi pyakudawika, thangwi Bhibhlya isaphatisira mafala  anewa toera kucemera Yahova. (Gen. 49:25; Iza. 40:28; 1 Tim. 1:17) Mbwenye Yezu atipanga kuti ticemere Yahova “Babathu.”

4. Tisadziwa tani kuti Yahova asafuna kuti tinfendedzere?

⁴ Kodi pisakhala pyakunentsa kuna imwe kuona Yahova ninga Baba waufuni? Kuna anango a ife ndi pyakunentsa. Khala babathu nee akhali wakukoma ntima, pinakhala pyakunentsa kuna ife kubvesesa kuti alipo Baba waufuni. Mbwenye ndi pyakubalangaza kudziwa kuti Yahova asabvesesa mabvero athu, pontho iye asadziwa mathangwi anaticitisa kukhala na mabvero anewa. Iye asafuna kukhala cifupi na ife. Na thangwi ineyi Bhibhlya isalonga: “Fendedzerani Mulungu, iye anakufendedzeranimbo.” (Tiya. 4:8) Yahova asatifuna, pontho iye asatipanga kuti anadzakhala Baba waufuni kakamwe.

5. Mwakubverana na Luka 10:22, kodi Yezu asatiphedza tani toera tifendedzere cifupi Yahova?

⁵ Yezu anakwanisa kutiphedza toera tifendedzere cifupi Yahova. Yezu asadziwa kakamwe Yahova, pontho iye asatowezera mwadidi kakamwe makhaliro ace, na thangwi ineyi iye alonga: “Ule anandiona akuonambo Baba.” (Juwau 14:9) Ninga mwana wakutoma kubalwa pabanja, Yezu asatipfundzisa kuti tisafunika kucitanji toera kubvera na kulemedza Babathu. Kusiyapo pyenepi, iye asatipfundzisambo pinthu pisafunika ife kucalira toera tikhale akutawirika kuna Yahova. Pikhali Yezu pa dziko yapantsi, iye apangiza pakweca kuti Yahova ndi Baba wakukoma ntima na waufuni. (Lerini Luka 10:22.) Tendeni tione pitsandzo pingasi pinapangiza pyenepi.

6. Ninji pinapangiza kuti Yahova akhabvesera maphembero a Yezu?

⁶ Yahova asabvesera anace. Onani njira idacita iye pyenepi na Mwanace wakutoma. Mwakukhonda penula, Yahova abvesera maphembero mazinji adacita Yezu mu ndzidzi ukhali iye pa dziko yapantsi. (Luka 5:16) Mwacitsandzo, iye abvesera Yezu mu ndzidzi ukhacita iye phembero thangwi ya pisankhulo pyakufunika kakamwe. Cibodzi mwa pisankhulo pyenepi cikhali pidasankhula iye apostolo akukwana 12. (Luka 6:12, 13) Kusiyapo pyenepi, Yahova abveserambo phembero ya Yezu mu ndzidzi ukhali iye wakutsukwala. Pontho mbadzati kusandukirwa na Yuda, Yezu acita phembero kuna  Babace thangwi ya pinthu pikhafuna kuncitikira. Yahova nee abvesera basi ene phembero ya Yezu, mbwenye atumambo anju toera awangise Mwanace wakufunika.—Luka 22:41-44.

7. Musapibva tani thangwi yakudziwa kuti Yahova asabvesera maphembero a atumiki ace?

⁷ Lero, Yahova asapitiriza kubvesera maphembero a atumiki ace, pontho iye asaatawira mu ndzidzi wakuthema na munjira yadidi. (Masal. 116:1, 2) Mwacitsandzo, mulongo unango wa ku Indiya akwanisa kuona njira idatawira Yahova maphembero ace. Iye akhali wakudzudzumika kakamwe, pontho iye acita phembero kuna Yahova na ntima onsene thangwi yakudzudzumika kwace. Iye alemba: “Programu ya JW Broadcasting^® ya Maio ya 2019 yabwera pa ndzidzi wakuthema thangwi iyo yandiphedza toera kudziwa kuti ndinathimbana tani na kudzudzumika, pontho iyo ikhali ntawiro wa maphembero anga.”

8. Kodi Yahova apangiza tani ufuni kuna Yezu?

⁸ Yahova asatifuna, pontho asatitsalakana ninga pidacita iye na Yezu mu ndzidzi ukhali iye pa dziko yapantsi. (Juwau 5:20) Mwacitsandzo, iye aphedza Yezu toera apitirize kukhala na cikhulupiro cakuwanga, amuwangisa mu ndzidzi ukhali iye wakutsukwala, pontho ampasa pinthu pyakufunika mu umaso wace. Kusiyapo pyenepi, Yahova apanga Mwanace kuti iye asanfuna, pontho asakomerwa naye kakamwe. (Mat. 3:16, 17) Yezu nee akhapibva kuti akhali ekhene thangwi iye akhadziwa kuti Babace waufuni ndzidzi onsene akhali na iye, pontho akham’phedza.—Juwau 8:16.

9. Ninji pinapangiza kuti Yahova asatifuna?

⁹ Ninga Yezu, tonsene tisakwanisa kuona kuti Yahova asapangiza ufuni kuna ife munjira zizinji. Mwacitsandzo, Yahova atitawirisa toera tikhale axamwali ace. Kusiyapo pyenepi, iye atipasa abale na alongo aufuni akuti asatiphedza toera tikhale akutsandzaya, pontho asatiwangisa tingatsukwala. (Juwau 6:44) Yahova asatipasambo pinthu pyonsene pinafuna ife toera tipitirize kukhala na cikhulupiro cakuwanga. Pontho iye asatiphedza toera tigumane pinthu pyakufunika mu umaso wathu. (Mat. 6:31, 32) Tinganyerezera pinthu pyenepi pyonsene pinatipasa Yahova, ife tisanfuna kakamwe.

10. Tisapfundzanji na njira inatsalakana Yahova abale na alongo athu?

¹⁰ Yahova asafuna abale na alongo athu. Mbwenye kuna ife panango pinakhala pyakunentsa kupangiza ufuni ndzidzi onsene kuna abale na alongo athu, thangwi ife takuzwa munjira yakusiyana, pontho tiri na makhaliro akusiyana. Kusiyapo pyenepi, ife tonsene tisadodoma, na thangwi ineyi tinakwanisa kutsukwalisa anango. Ngakhale tenepo, ife tisafunika kuwangisira toera kufuna kakamwe abale na alongo athu. Tinakwanisa tani kucita pyenepi? Ife tinakwanisa kucita pyenepi mukutowezera Babathu. (Aef. 5:1, 2; 1 Juwau 4:19) Natenepa tendeni tione kuti tinapfundzanji na citsandzo ca Yahova.

11. Ndi pinthu pipi pidacita Yezu toera kupangiza kuti Yahova ndi wa “ntsisi zikulu”?

¹¹ Yahova ndi wa “ntsisi zikulu.” (Luka 1:78) Munthu wantsisi asadzudzumika kakamwe angaona anthu mbathabuka, iye asasaka njira toera kuaphedza na kuabalangaza. Munjira ikhatsalakana Yezu anthu, pisapangiza kuti iye akhatowezera Yahova wakuti asapangiza ntsisi kuna anthu. (Juwau 5:19) Pidaona Yezu mwinji wa anthu, “aabvera ntsisi, thangwi iwo akhapwazwa na kutsalakanwa mwakuipa ninga mabira akusowa nkumbizi.” (Mat. 9:36) Kusiyapo kuabvera ntsisi, Yezu aaphedza mukuwangisa ale akhaduwala na kubalangaza ale “adaneta na adalemerwa.”—Mat. 11:28-30; 14:14.

12. Tinabvera tani ntsisi abale na alongo athu?

¹² Tinganyerezera nyatwa zinathimbana na abale na alongo athu, ife tinakwanisa kuabvera  ntsisi. Mwacitsandzo, panango panagumanika mulongo wakuti ali na utenda wakugoswa. Iye nee asapanga munthu thangwi ya utenda unoyu, mbwenye anatsandzaya kakamwe pangaoneka munthu toera kumphedza. Panango iye asanentseka kakamwe toera kutsalakana anthu a pabanja pace mu pinthu pyakufunika kuna iwo. Kodi ife tinakwanisa kumphedza kuphika cakudya peno kupswaira n’nyumba mwace? Panango panaoneka m’bale wakuti aluza basa yace. Ife tinakwanisa kumpasa dinyero, panango mbatikhonda kumpanga kuti adabulusa dinyero ineyi ndife, na cifuno ca kumphedza mpaka mu ndzidzi unafuna iye kugumana basa inango.

13-14. Tinakwanisa tani kupasa mwakudzala manja ninga Yahova?

¹³ Yahova ndi wakupasa mwakudzala manja. (Mat. 5:45) Ninga Yahova, ife tisafunika kubvera ntsisi abale na alongo athu na kuaphedza, tayu kudikhira mu ndzidzi unaphemba iwo ciphedzo. Yahova ntsiku zonsene asabulusa dzuwa, pontho ife nee tisacita kumphemba toera acite pyenepi. Pontho anthu onsene asaphindula na dzuwa ineyi, tayu basi ene ale anapereka takhuta kuna iye. Thangwi ya pinthu pyonsene pinatipasa Yahova, iye asapangiza kuti asatifuna. Natenepa, ife tisanfuna kakamwe thangwi yakukhala wakukoma ntima na wakupasa mwakudzala manja.

¹⁴ Mukutowezera Babathu wakudzulu, abale na alongo azinji asapasa anango mwakudzala manja. Mwacitsandzo, mu caka ca 2013 condzi cinacemerwa Super Typhoon Haiyan cafudza pinthu pizinji mu dziko ya Filipina. Abale na alongo azinji aluza nyumba zawo na pinthu pyawo. Mbwenye abale na alongo a pa dziko yonsene yapantsi, mwakucimbiza apereka ciphedzo kuna iwo. Azinji apereka kobiri peno aphedzera kusasanyira na kumanga paswa nyumba cifupi na 750 mbacidzati kumala caka. Mu ndzidzi wa utenda wa Koronaviru, Mboni za Yahova zaphata basa mwakuwanga toera kuphedza abale na alongo awo. Natenepa tingacita pinthu mwakucimbiza toera kuphedza abale na alongo athu, tisapangiza kuti tisaafuna.

15-16. Mwakubverana na Luka 6:36, tisafunika kucitanji toera kutowezera Babathu wakudzulu?

¹⁵ Yahova ndi wantsisi na wakulekerera. (Lerini Luka 6:36.) Ntsiku zonsene, Babathu  wakudzulu asatibvera ntsisi na kutilekerera. (Masal. 103:10-14) Anyakupfundza a Yezu akhali akusowa ungwiro, na thangwi ineyi, iye akhaabvera ntsisi na kualekerera. Kusiyapo pyenepi, Yezu apereka umaso wace ninga ntsembe toera tilekererwe madawo athu. (1 Juwau 2:1, 2) Natenepa, ntsisi za Yahova na Yezu zisaticitisa kuafendedzera cifupi.

¹⁶ Tingalekererana unango na ndzace, ufuni wathu kuna abale na alongo usathimizirika. (Aef. 4:32) Mwandimomwene, midzidzi inango pisakhala pyakunentsa kulekerera anango, na thangwi ineyi tisafunika kuwangisira toera kucita pyenepi. Mulongo unango aphindula kakamwe pidaleri iye nsolo wa A Sentinela wakuti “Perdoem uns aos outros liberalmente.” * Iye alemba: “Nsolo unoyu wandiphedza toera kubvesesa kuti kulekerera anango kusandiphedza tani. Iwo wafokotoza kuti kulekerera anango nee pisabveka kuti pyakuipa pidacita iwo ndi pyadidi peno ndi pyakukhonda kutsukwalisa. Mbwenye pisabveka kukhonda kukoya muntima pinthu pyakuipa pidacita iwo na kupitiriza kukhala antendere.” Natenepa, ife tingalekerera na ntima onsene abale na alongo athu, tinapangiza kuti tisaafuna, pontho tisatowezera Babathu Yahova.

17. Mwakubverana na Mateu 5:16, tisafunika kucitanji toera kupasa mbiri Babathu wakudzulu?

¹⁷ Ife tisapereka takhuta kakamwe thangwi yakukhala na abale na alongo pa dziko yonsene ya pantsi akuti asafunana unango na ndzace. Ife tisafuna kuti anthu azinji abwere toera kudzalambira Mulungu pabodzi na ife. Na thangwi ineyi, ife cipo tisafunika kucita pinthu pyakuti pinacitisa anthu kuona mwakuipa Yahova na atumiki ace. Ndzidzi onsene tisafunika kupangiza makhaliro adidi akuti anacitisa anthu kufuna kupfundza pya Yahova na kuntumikira.—Lerini Mateu 5:16.

18. Ninji cinafuna kutiphedza toera kumwaza mphangwa mwacipapo?

¹⁸ Midzidzi inango, anthu anango anakwanisa kutipokanya peno kutitcinga thangwi tisabvera Babathu wakudzulu. Mphapo tisafunika kucitanji khala tisagopa kulonga na anango pinthu pinakhulupira ife? Ife tisafunika kunyindira ciphedzo  ca Yahova pabodzi na Mwanace. Yezu apanga anyakupfundzace kuti iwo nee asafunika kudzudzumika thangwi ya pinthu pinafuna iwo kulonga. Thangwi yanji? Yezu afokotoza: “Thangwi pa ndzidzi unoyu Mulungu anadzakupangani pinafunika imwe kulonga; thangwi simwe basi tayu anafuna kulonga, mbwenye nzimu wa Babanu wakudzulu unadzakuphedzani toera kulonga.”—Mat. 10:19, 20.

19. Longani pinthu pidacitikira m’bale unango wakuti amwaza mphangwa mwacipapo.

¹⁹ Onani pidacitikira m’bale Robert. Iye akhali nyakupfundza Bhibhlya, pontho nee akhali na cidziwiso cakukwana ca Bhibhlya. Natenepa iye acemerwa ku thando yakutongera miseru ya ku Afrika do Sul toera afokotoze mathangwi anancitisa kukhonda kucita basa ya unyankhondo. Mwacipapo, iye afokotoza kuna thando yakutongera miseru kuti asakhonda kucita basa ya unyankhondo thangwi asafuna abale ace Acikristu. M’bale Robert apereka takhuta thangwi yakucita khundu ya atumiki a Yahova. Nyakutonga miseru ambvundza: “Mbani abale ako?” M’bale Robert nee akhadikhira mbvundzo unoyu, mbwenye toera kutawira iye akumbuka lemba ya Mateu 12:50 inalonga kuti: “Ule anacita pinafuna Babanga wakudzulu, unoyu ndiye m’baleanga wamamuna, wankazi na mai wanga.” Maseze m’bale Robert akhali nyakupfundza Bhibhlya mupswa, nzimu wa Yahova wamphedza toera kutawira mbvundzo unoyu na mibvundzo inango yakuti nee akhaidikhira. Yahova akomerwa kakamwe na pidacita m’bale Robert. Munjira ibodzi ene, Yahova asakomerwambo kakamwe na ife tingan’nyindira toera kumwaza mphangwa mwacipapo m’midzidzi yakunentsa.

20. Tisafunika kukhala akutonga toera kucitanji? (Juwau 17:11, 15)

²⁰ Tisapereka takhuta kakamwe thangwi yakucita khundu ya abale na alongo akuti asafunana unango na ndzace. Ife tiri na Baba wadidi kakamwe na abale na alongo azinji akuti asatifuna. Natenepa, ndzidzi onsene ife tisafunika kupereka takhuta thangwi ya pinthu pyenepi. Sathani na ale anantowera asaticitisa kuti tipenule ufuni unapangiza Babathu wakudzulu, pontho asayesera kufudza kuphatana kwathu. Mbwenye Yezu acita phembero kuna Yahova toera atiphedze kuti tipitirize kukhala akuphatana. (Lerini Juwau 17:11, 15.) Yahova ali kutawira phembero ineyi. Ninga Yezu, ife cipo tisafunika kupenula ufuni na ciphedzo ca Babathu wakudzulu. Tendeni tikhale akutonga toera kupitiriza kufuna kakamwe abale na alongo athu.