1. Tisafunika kucitanji tingakalamba?

TINGAKALAMBA, panango tinatoma kudzudzumika mbatinyerezera kuti ine nee ndine wakufunikabve kuna Yahova ninga pikhali ine m’phale peno ntsikana. Mwandimomwene, panango mu ndzidzi unoyu tinasowa mphambvu zakukwana, mbwenye ife tinakwanisa kuphatisira udziwisi wathu na maluso athu toera kuphedza aphale na atsikana kuti acite mwadidi mabasa awo. Nkulu wa mpingo unango wakuti atumikira mu pyaka pizinji alonga: “Pidaona ine kuti ndikukalamba ine ndakhala wakutsandzaya kakamwe thangwi pakhali na aphale akuthema akuti akhali dzololo toera kucita mabasa akhacita ine.”

2. Tinapfundzanji mu nsolo uno?

² Nsolo udamala wafokotoza maphindu anafuna kukhala na aphale na atsikana angacedza na abale na alongo akukalamba. Mu nsolo uno, ife tinapfundza kuti kucepeseka, kudzindikira pinthu pinakwanisa ife kucita, kupereka takhuta na kupasa mwakudzala manja pinaphedza abale na alongo akukalamba toera aphate basa pabodzi na aphale na atsikana toera pinthu pifambe mwadidi mu mpingo.

3. Mwakubverana na Afilipi 2:3, 4, kodi Nkristu wakucepeseka asafunika kucitanjii, pontho pyenepi pinamphedza tani?

³ Abale na alongo akukalamba asafunika kukhala akucepeseka toera akwanise kuphedza aphale na atsikana. Munthu wakucepeseka asaona anango kukhala akulu kupiringana iye. (Lerini Afilipi 2:3, 4.) Abale na alongo akukalamba anapangiza n’khaliro unoyu asabvesesa kuti kazinji kene anakwanisa kucita pinthu munjira zakusiyana-siyana mwakubverana na pinalonga Bhibhlya. Natenepa, iwo nee anadikhira kuti anthu onsene acite pinthu ninga munjira ikhacita iwo. (Koel. 7:10) Maseze abale na alongo akukalamba asapanga aphale pinthu pizinji pidapfundza iwo mu undimomwene, iwo asadziwambo  kuti “makhaliro a dziko ali kucinja.” Natenepa, iwo asatawira macinjo onsene anacitika mu gulu.—1 Akor. 7:31.

4. Kodi ayang’aniri a cisa lero asapangiza tani makhaliro mabodzi ene ninga akhali na Alevi?

⁴ Abale na alongo akukalamba akuti ndi akucepeseka asadziwa kuti iwo nee anakwanisabve kucita pizinji ninga pikhacita iwo kale. Mwacitsandzo, onani pinacitika na abale anatumikira ninga ayang’aniri a cisa. Iwo angafikisa pyaka 70 pyakubalwa, asaphembwa toera kusiya basa ineyi mbacita mabasa anango. Pyenepi panango pinakhala pyakunentsa. Iwo akhakomerwa kakamwe kuphedza abale na alongo awo. Kusiyapo pyenepi, iwo akhakomerwambo kakamwe kutumikira ninga ayang’aniri a cisa, pontho cincino asapitiriza kufuna kakamwe basa ineyi. Mbwenye iwo asabvesesa kuti ndi pyakufunika kakamwe kuti aphale acite basa ineyi. Iwo asapangiza makhaliro mabodzi ene ninga akhali na Alevi a mu Izraeli akuti angafikisa pyaka 50, iwo akhaphembwa toera kusiya kucita mabasa a pa tabhernakulo. Alevi anewa akuti akhasiya kutumikira pa tabhernakulo thangwi yakukalamba akhakomerwa na mabasa anango akhacita iwo. Iwo akhacita pyonsene pikhakwanisa iwo toera kuphedza aphale. (Num. 8:25, 26) Lero, abale akuti asiya kutumikira ninga ayang’aniri a cisa thangwi yakukalamba nee asacedzerabve mipingo mizinji, mbwenye iwo asaphedza kakamwe na kuwangisa mpingo unasonkhana iwo.

5. Mwapfundzanji na citsandzo ca Dan na Katie?

⁵ Onani citsandzo ca Dan wakuti atumikira  ninga muyang’aniri wa cisa mu pyaka 23. Pidafikisa Dan pyaka 70 pyakubalwa, iye na nkazace Katie aphembwa toera aende katumikira ninga apainiya akupambulika. Kodi iwo asaona tani basa yawo ipswa? Dan alonga kuti cincino ali na mabasa mazinji kupiringana kale. Iye asacita mabasa mazinji mu mpingo, asaphedza abale toera akhale akuthema kutumikira ninga atumiki akutumikira, pontho asapfundzisa anango toera akwanise kumwaza mphangwa m’mizinda na m’makaidi. Abale na alongo akukalamba, mwakukhonda tsalakana khala muli m’basa ya ndzidzi onsene peno nkhabe, imwe munakwanisa kucita pizinji toera kuphedza anango. Mphapo munacita tani pyenepi? Komerwani na makhaliro anu mapswa, khazikisani pifuno pipswa, pontho ikhani manyerezero anu ku pinthu pinakwanisa imwe kucita, tayu ku pinthu pinacimwana imwe kucita.

6. Thangwi yanji ndi pyakufunika kudzindikira pinthu pinakwanisa ife kucita? Perekani citsandzo.

⁶ Munthu angadzindikira pinthu pinakwanisa iye kucita anapangiza kuti ndi wakucepeseka. (Mis. 11:2) Pyenepi pinamphedza toera akhonde kudikhira kucita pizinji kupiringana pire pinakwanisa iye. Pontho anakhala wakutsandzaya, mbapitiriza kuphata basa mwaphinga. Ife tinakwanisa kulandanisa munthu wakuti asadzindikira pinthu pinakwanisa iye kucita na munthu wakuti ali kutcova njinga, pontho asafuna kuwambuka ponti ing’ono kakamwe. Iye asafunika kutcova njinga yace pang’ono-pang’ono toera akwanise kuwambuka mwadidi. Munjira ibodzi ene, munthu wakuti asadziwa pinthu pinakwanisa iye kucita asadziwa ndzidzi “wakucinja” toera akwanise kukhala waphinga m’basa ya Yahova.—Afil. 4:5.

7. Ninji pinapangiza kuti Bharzilai, akhadzindikira pinthu pikhakwanisa iye kucita?

⁷ Onani citsandzo ca Bharzilai, wakuti pikhali iye na pyaka 80 pyakubalwa acemerwa na Mambo Dhavidhi toera acite khundu mu umambo wace. Nakuti Bharzilai akhadzindikira pinthu pikhakwanisa iye kucita, iye nee atawira. Bharzilai akhadziwa kuti iye nee mbadakwanisa kucita pizinji thangwi yakukalamba, na thangwi ineyi iye aphemba kuti m’phale anacemerwa Kimani aende na Dhavidhi. (2 Sam. 19:35-37) Ninga Bharzilai, abale akukalamba asakomerwa kupasa mabasa aphale.

8. Kodi Mambo Dhavidhi apangiza tani kuti akhadzindikira pinthu pikhakwanisa iye kucita mu ndzidzi ukhafuna iye kumanga templo?

⁸ Mambo Dhavidhi apangizambo kuti iye akhadzindikira pinthu pikhakwanisa iye kucita. Iye akhafuna kakamwe kumanga nyumba ya Yahova. Mbwenye pidapangwa iye na Yahova kuti anafuna kumanga nyumba ineyi ndi Salomoni, Dhavidhi atawira cisankhulo ca Yahova, pontho aphedzera na ntima onsene basa yakumanga. (1 Pya dziko. 17:4; 22:5) Dhavidhi nee anyerezera kuti akhali wakuthema kakamwe toera kumanga nyumba ya Yahova thangwi mwanace ndi ‘wakusowa maluso.’ (1 Pya dziko. 29:1) Dhavidhi akhadziwa kuti toera basa ineyi yakumanga ifambe mwadidi pikhanyindira nkhombo za Yahova, tayu thunga peno maluso a anthu akhafuna kuimanga. Ninga Dhavidhi, abale akukalamba lero asapitiriza kukhala aphinga mwakukhonda tsalakana mabasa anacita iwo. Pontho iwo asadziwa kuti Yahova anapasa nkhombo aphale akuti asacita mabasa akhacita iwo kale.

9. Kodi m’bale Shigeo apangiza tani kuti asadzindikira pinthu pinakwanisa iye kucita?

⁹ Citsandzo cinango ca munthu wakuti asadzindikira pinthu pinakwanisa iye kucita ndi  ca m’bale anacemerwa Shigeo. Mu caka ca 1976, pikhali iye na pyaka 30 pyakubalwa, iye akhazikiswa toera kutumikira ninga m’bodzi wa Komiti ya Filiali. Mu caka ca 2004 iye adzakhala mbveranisi wa Komiti ya Filiali. Mbwenye mukupita kwa ndzidzi, thangwi yakukalamba iye adzindikira kuti nee mbadakwanisabve kupitiriza kutumikira ninga mbveranisi. Iye acita phembero thangwi ya pyenepi, pontho aona kuti ndi pyadidi kuti m’phale atumikire ninga mbveranisi. Shigeo nee asatumikirabve ninga mbveranisi wa Komiti ya Filiali, mbwenye iye asapitiriza kutumikira ninga m’bodzi wa abale a Komiti ya Filiali. Ninga taona mu citsandzo ca Bharzilai, Mambo Dhavidhi na Shigeo, munthu wakucepeseka asanyerezera pinthu pyakuti aphale asakwanisa kupicita, tayu basi ene pinthu pyakuti iwo asafunika kupipfundza toera akwanise kupicita. Pontho iye nee ananyerezera kuti iwo akucita pinthu mwamapika, mbwenye anaaona ninga anyabasa andzace.—Mis. 20:29.

10. Kodi abale na alongo akukalamba asafunika kuona tani aphale na atsikana mu mpingo?

¹⁰ Abale na alongo akukalamba asaona aphale na atsikana ninga muoni wa Yahova, pontho iwo asapereka takhuta kakamwe thangwi ya pinthu pinacita aphale na atsikana anewa. Mu ndzidzi unapitiriza iwo kukalamba, abale na alongo anewa asapereka takhuta kakamwe thangwi yakukhala na aphale na atsikana akuti ali na mphambvu toera kucita mabasa akusiyana-siyana mu mpingo.

11. Kodi lemba ya Rute 4:13-16 isapangiza tani kuti abale na alongo akukalamba anaphindula angatawira ciphedzo ca aphale na atsikana?

¹¹ Naomi analongwa m’Bhibhlya, ndi citsandzo cadidi kakamwe thangwi iye atawira ciphedzo ca ntsikana na ntima onsene. Pidafa  mwanace, iye apanga Rute wakuti akhali nkwenyace, toera abwerere kuna acibale ace. Mbwenye Rute akhonda kusiya Naomi, natenepa iwo aenda onsene ku Bhetelehemu. Naomi atsandzaya kakamwe thangwi yakukhala pabodzi na Rute, pontho iye atawira ciphedzo cace. (Rute 1:7, 8, 18) Pontho pyenepi pyabweresa nkhombo kuna iwo. (Lerini Rute 4:13-16.) Abale na alongo akukalamba akuti ndi akucepeseka anakwanisa kutowezera citsandzo ca Naomi.

12. Ninji pinapangiza kuti mpostolo Paulu akhali wakupereka takhuta?

¹² Mpostolo Paulu apereka takhuta kakamwe thangwi ya ciphedzo cikhapaswa iye na abale. Mwacitsandzo, iye apereka takhuta kuna Akristu a ku Filipi thangwi ya pinthu pidatumiza iwo. (Afil. 4:16) Iye akhaperekambo takhuta thangwi ya kuphedzwa na Timoti. (Afil. 2:19-22) Kusiyapo pyenepi, Paulu aperekambo takhuta kuna Mulungu thangwi ya abale adamuwangisa mu ndzidzi ukhaendeswa iye nkaidi ku Roma. (Mabasa 28:15) Paulu akhali wamphambvu kakamwe, na thangwi ineyi iye akhakwanisa kufamba misindzo yakulapha toera kumwaza mphangwa na kuwangisa mipingo. Mbwenye iye akhali wakucepeseka, pontho akhatawira kuphedzwa na abale na alongo ace.

13. Kodi abale na alongo akukalamba anapangiza tani kupereka takhuta thangwi yakukhala na aphale na atsikana mu mpingo?

¹³ Abale na alongo akukalamba, imwe munakwanisa kupereka takhuta kuna aphale na atsikana mu mpingo mwanu munjira zizinji. Khala iwo asafuna kukupasani bhuleya, kukugulirani pinthu peno kukuphedzani na pinthu pinango, tawirani ciphedzo cawo. Dziwani kuti ciphedzo cawo cisapangiza kuti Yahova asakufunani. Imwe munakwanisa kucita uxamwali wakuwanga kakamwe na ale anakuphedzani. Natenepa, ndzidzi onsene phedzani aphale na atsikana toera akhale na uxamwali wakuwanga na Yahova, pontho apangeni kuti musakomerwa kakamwe na kuona kuwangisira kwawo toera kuphedza mpingo. Kusiyapo pyenepi, khalani na ndzidzi toera kucedza nawo na kuapanga pinthu pidakucitikirani mu umaso wanu. Mungacita pyenepi, imwe munapangiza kuti ‘musapereka takhuta ndzidzi onsene’ kuna Yahova thangwi yakukhala na aphale na atsikana mu mpingo.—Akol. 3:15; Juwau 6:44; 1 Ates. 5:18.

14. Kodi Mambo Dhavidhi apangiza tani kuti akhali wakupasa mwakudzala manja?

¹⁴ Mambo Dhavidhi apangizambo nkhaliro unango wakufunika kakamwe wakuti abale na alongo akukalamba anakwanisa kuutowezera. Nkhaliro unoyu ndi kupasa mwakudzala manja. Iye apereka kobiri na pinthu pizinji pyakufunika, toera kuphedzera kumangwa kwa templo. (1 Pya dziko. 22:11-16; 29:3, 4) Iye acita pyenepi na ntima onsene maseze akhapidziwa kuti templo ineyi mbidacemerwa na dzina ya mwanace, Salomoni. Khala ife nee tiri na mphambvu yakuphedzera mabasa akumanga mu gulu ya Yahova, ife tinakwanisa kupitiriza kuphedzera mukucita pyakupereka mwakubverana na pire pinakwanisa ife. Pontho tinakwanisa kuphedza aphale na atsikana mukuphatisira maluso ali na ife.

15. Timoti apfundziswanji na mpostolo Paulu?

¹⁵ Mpostolo Paulu akhalimbo wakupasa mwakudzala manja. Mwacitsandzo, iye acemera Timoti toera akhale pabodzi na iye m’basa ya umisionaryo, pontho ampfundzisa njira zakumwaza mphangwa na zakupfundzisa. (Mabasa 16:1-3) Njira zenezi zaphedza Timoti toera akhale m’mwazi mphangwa na mpfundzisi wadidi kakamwe. (1 Akor. 4:17) Pontho Timoti  aphatisirambo njira zenezi zidapfundziswa iye na Paulu toera kupfundzisambo anango.

16. Thangwi yanji Shigeo asapfundzisa anango?

¹⁶ Abale akukalamba lero nee asagopa kuoniwa ninga akukhonda funika angapfundzisa aphale toera kucita mabasa akhacita iwo. Mwacitsandzo, mu pyaka pizinji, Shigeo adalongwa mu ndima zakutoma asapfundzisa abale anatumikira na iye pabodzi mu Komiti ya Filiali. Iye asacita pyenepi toera kuphedzera basa ya Umambo mu dziko inatumikira iye. Natenepa, pidafika ndzidzi wakuthema, m’bale m’bodzi adapfundzisa iye adzatumikira ninga mbveranisi wa Komiti ya Filiali. Shigeo asatumikira ninga m’bodzi wa Komiti ya Filiali mu pyaka pyakupiringana 45, pontho iye asapitiriza kuphatisira maluso ace toera kupfundzisa aphale. Abale anapangiza makhaliro ninga a Shigeo asaphedza kakamwe atumiki a Yahova.

17. Mwakubverana na Luka 6:38, ndi pinthu pipi pyakuti abale na alongo akukalamba anakwanisa kupipasa anango?

¹⁷ Imwe abale na alongo akukalamba ndimwe citsandzo cadidi kakamwe cinapangiza kuti kutumikira Yahova mwakukhulupirika ndi pyakufunika kakamwe mu umaso. Citsandzo canu cisapangiza kuti ndi pyakufunika kakamwe kupfundza midida ya Bhibhlya na kuiphatisira mu umaso wathu. Imwe musadziwa njira ikhacitwa pinthu kale, mbwenye mwaona kufunika kwa kucita macinjo thangwi ya makhaliro acincino. Imwe abale na alongo akukalamba akuti mwabatizwa cincino, munakwanisambo kuphedza anango mukuapanga kuti imwe muli akutsandzaya kakamwe thangwi yakudziwa Yahova. Aphale na atsikana anakomerwa kakamwe na kubva pinthu pidakucitikirani na pidapfundza imwe. Natenepa ‘mungapitiriza’ kupfundzisa anango pinthu pyenepi, Yahova anakupasani nkhombo kakamwe.—Lerini Luka 6:38.

18. Abale na alongo akukalamba na aphale na atsikana anaphedzana tani unango na ndzace?

¹⁸ Abale na alongo akukalamba angacita uxamwali na aphale na atsikana, iwo anakwanisa kuphedzana unango na ndzace. (Aroma 1:12) Thangwi onsene ali na pinthu pyakufunika kakamwe. Abale na alongo akukalamba ali na udziwisi na maluso. Aphale na atsikana ali na mphambvu. Aphale na atsikana angaphata basa pabodzi na abale na alongo akukalamba ninga axamwali, anapasa mbiri Babathu wakudzulu, pontho pyenepi pinabweresa nkhombo kuna onsene mu mpingo.