1. Kodi m’bale peno mulongo asapibva tani munthu anafuna iye angabuluswa mu mpingo?

KODI alipo munthu anafuna imwe wakuti abuluswa mu mpingo? Pyenepi ndi pyakutsukwalisa kakamwe. Mulongo unango anacemerwa Hilda * alonga: “Ine ndatsukwala kakamwe pidafa mamunanga wakukhulupirika wakuti takhala pabodzi ninga banja mu pyaka 41. Cinthu cinango cidatekeresa kutsukwala kwanga ndi mu ndzidzi udasiya mwananga, nkazace pabodzi na anace kutumikira Yahova.”

2-3. Mwakubverana na Masalmo 78:40, 41, kodi Yahova asapibva tani atumiki ace angasiya kuntumikira?

² Yahova atsukwala kakamwe pidaona iye aanju anango mbapanduka. (Yuda 6) Kusiyapo pyenepi, Yahova atsukwala kakamwe na Aizraeli akuti akhakhonda kum’bvera kazinji kene. (Lerini Masalmo 78:40, 41.) Natenepa dziwani kuti Babathu wakudzulu asatsukwalambo kakamwe munthu anafuna imwe angasiya kuntumikira. Iye asabvesesa kutsukwala kwanu. Pontho dziwani kuti iye anakuwangisani mbakupasani ciphedzo cinafuna imwe.

³ Mu nsolo uno, ife tinapfundza pinthu pisafunika ife kucita toera titambire ciphedzo ca Yahova, khala munthu anafuna ife asiya kuntumikira. Pontho tinadzapfundzambo kuti tisafunika kucitanji toera kuphedza abale na alongo mu mpingo anathimbana na nyatwa ineyi. Mbwenye pakutoma, tendeni tione pinthu pingasi pisafunika ife kucalira.

4. Kodi anyakubala azinji asapibva tani mwanawo wa mamuna peno wa nkazi angasiya kutumikira Yahova?

⁴ Mwana wa mamuna peno wankazi angasiya kutumikira Yahova, anyakubala asapasika mulando mbanyerezera kuti panango akhafunika  kucita pizinji toera kuphedza mwanawo kuti apitirize kutumikira Yahova. M’bale unango anacemerwa Luke alonga tenepa pidabuluswa mwanace mu mpingo: “Ine ndapasika mulando. M’midzidzi inango ndikhalota ndoto zakuipa thangwi ya pyenepi, buluka penepo ndikhalira, pontho ntima ukhandipha kakamwe.” Mulongo Elizabeth wakuti mwanace abuluswambo mu mpingo alonga kuti: “Kazinji kene ndikhabvundzika kuti ninji cidadawisa ine, buluka penepo ndikhapibva kuti nee ndacita pizinji toera kupfundzisa mwananga kuti afune Yahova.”

5. Mbani adadawisa khala munthu asiya kutumikira Yahova?

⁵ Ife tisafunika kukumbuka kuti Yahova apasa m’bodzi na m’bodzi wa ife ufulu wakusankhula. Na thangwi ineyi, ife tinakwanisa kusankhula khala tisafuna kum’bvera peno nkhabe. Ana anango nee akhali na anyakubala a citsandzo cadidi, mbwenye iwo asankhula kutumikira Yahova mbapitiriza kukhala akukhulupirika kuna iye. Ana anango anyakubala awo acita pyonsene pikhakwanisa iwo toera kuapfundzisa kufuna Yahova, mbwenye mukupita kwa ndzidzi iwo asiya kutumikira Yahova. Natenepa m’bodzi na m’bodzi wa ife asafunika kusankhula khala anatumikira Yahova peno nkhabe. (Yos. 24:15) Na thangwi ineyi, imwe anyakubala akuti musapasika mulando thangwi ya ananu adasiya kutumikira Yahova, lekani kunyerezera kuti ndimwe adadawisa.

6. Kodi mwana anapibva tani khala nyakubalace asiya kutumikira Mulungu?

⁶ M’midzidzi inango, baba peno mama asasiya kutumikira Yahova, mbasiyambo banja yace. (Masal. 27:10) Pyenepi pisakhala pyakutsukwalisa kakamwe kuna ana akuti akhaona anyakubalawo ninga citsandzo cadidi. Esther wakuti pai wace abuluswa mu mpingo alonga: “Kazinji kene ine ndikhalira thangwi ndadzindikira kuti pai wanga akhadacita cisankhulo mwacakhomo toera asiye kutumikira Yahova. Ine ndisafuna babanga, na thangwi ineyi pidabuluswa iye mu mpingo, ine ndikhadzudzumika kakamwe na umaso wace, pontho ndikhatsukwala kakamwe.”

7. Kodi Yahova asapibva tani thangwi ya ana akuti anyakubalawo abuluswa mu mpingo?

⁷ Imwe anang’ono, khala anyakubalanu abuluswa mu mpingo, ife tisatsukwala kakamwe, pontho dziwani kuti Yahova asabvesesa kutsukwala kwanu. Iye asakufunani, pontho asakomerwa kakamwe thangwi yakukhulupirika kwanu. Kusiyapo pyenepi, abale na alongo anu mu mpingo asatsandzayambo kakamwe thangwi yakukhulupirika kwanu. Kumbukani kuti imwe nee muli na mulando thangwi ya pisankhulo pidacita anyakubalanu. Ninga pidalonga ife mu ndima 5, Yahova apasa anthu onsene ufulu wakusankhula. Natenepa munthu onsene adaperekeka kuna Yahova mbabatizwa, asafunika ‘kuthukula ntolo wace.’—Agal. 6:5.

8. Musafunika kucitanji mu ndzidzi unadikhira imwe munthu adasiya kutumikira Yahova toera abwerere kuna iye? (Onani bokosi ya nsolo wakuti “ Bwererani Kuna Yahova.”)

⁸ Munthu anafuna imwe angasiya kutumikira Yahova, imwe musapitiriza kukhala na cidikhiro cakuti kutsogolo iye anadzabwerera. Mphapo musafunika kucitanji mu ndzidzi unadikhira imwe kuti iye abwerere kuna Yahova? Imwe musafunika kucita pyonsene pinakwanisa imwe toera mupitirize kukhala na cikhulupiro cakuwanga. Imwe mungacita pyenepi, munakwanisa kukhazikisa citsandzo cadidi kuna anthu anango a pabanja panu kuphatanizambo munthu adabuluswa mu mpingo. Pontho pyenepi pinakupasani mphambvu toera mupirire kutsukwala. Mphapo musafunika kucitanji toera mupitirize kukhala na cikhulupiro cakuwanga?

9. Musafunika kucitanji toera mupitirize kukhala na cikhulupiro cakuwanga? (Onani bokosi ya nsolo wakuti “ Malemba Akuti Anakuwangisani Khala Munthu Anafuna Imwe Asiya Kutumikira Yahova.”)

⁹ Citani pyonsene pinakwanisa imwe toera mupitirize kukhala na cikhulupiro cakuwanga. Ndi pyakufunika kakamwe kupitiriza kuwangisa cikhulupiro canu na ca anthu a pabanja panu. Munakwanisa tani kucita pyenepi? Phembani Yahova toera akupaseni mphambvu kuti mukwanise kuleri Bhibhlya ntsiku zonsene na kunyerezera mwacidikhodikho pinaleri imwe, pontho gumanikani pa misonkhano ya mpingo. Joanna wakuti pai wace na m’baleace wa nkazi abuluswa mu mpingo alonga: “Ine ndisakhala wakukhurudzika ndingaleri mphangwa zinalonga pya Abhigaili, Esteri, Yobe, Zuze na Yezu. Pitsandzo pyawo pisandiwangisa, pontho pisandiphedza toera kukhala na maonero adidi. Kusiyapo pyenepi, nyimbo zathu zinango zisandiwangisa kakamwe.”

10. Kodi lemba ya Masalmo 32:6-8 isatiphedza tani toera kupirira kutsukwala?

¹⁰ Pangani Yahova pinthu pyonsene pinakudzudzumisani. Pontho mu ndzidzi unakhala imwe wakutsukwala, lekani kusiya kucita phembero kuna iye. Phembani Yahova toera akuphedzeni kuona pinthu pyenepi ninga munapionera iye, pontho mphembeni toera ‘akupaseni udziwisi mbakupfundzisani njira inafunika imwe kufamba.’ (Lerini Masalmo 32:6-8.) Mwandimomwene, panango pinakhala pyakunentsa kupanga Yahova mabvero anu. Mbwenye Yahova asabvesesa kakamwe kutsukwala kwanu. Iye asakufunani kakamwe, na thangwi ineyi iye asakukulumizani toera mumpange pinthu pya muntima mwanu.—Eks. 34:6; Masal. 62:7, 8.

11. Mwakubverana na Ahebheri 12:11, thangwi yanji ife tisafunika kunyindira masasanyiro aufuni adacita Yahova akubulusa mu mpingo munthu wakukhonda tcunyuka? (Onani bokosi ya nsolo wakuti “ Kubulusa mu Mpingo Munthu Wakukhonda Tcunyuka Ndi Masasanyiro Aufuni a Yahova.”)

¹¹ Phedzerani cisankhulo cidacita akulu a mpingo. Yahova ndiye adacita masasanyiro akubulusa  mu mpingo munthu wakukhonda tcunyuka. Masasanyiro anewa asaphedza anthu onsene, kuphatanizambo nyakudawa. (Lerini Ahebheri 12:11.) Anthu anango mu mpingo panango analonga kuti akulu a mpingo nee acita cisankhulo cadidi cakubulusa munthu unoyu mu mpingo, mbwenye kumbukani kuti anthu anewa ndi ale akuti nee akhafuna kulonga madawo akhacita munthu unoyu adabuluswa mu mpingo. Ife nee tisadziwa undimomwene wa pinthu pyenepi pyonsene. Natenepa ndi pyandzeru kunyindira kuti akulu a mpingo adatsalakana nseru unoyu acita pyonsene pidakwanisa iwo toera kuphatisira Malemba, mbatonga ‘mu dzina ya Yahova.’—2 Pya dziko. 19:6.

12. Kodi anango aphindula tani thangwi yakuphedzera masasanyiro a Yahova akubulusa mu mpingo munthu wakukhonda tcunyuka?

¹² Mungaphedzera cisankhulo cidacita akulu a mpingo cakubulusa mu mpingo munthu anafuna imwe, imwe munakwanisa kuphedza munthu unoyu toera abwerere kuna Yahova. Elizabeth adalongwa mu ndima zidamala alonga kuti: “Pikhali pyakunentsa kakamwe kuna ife kucedza na mwana wathu wankulu. Mbwenye pidabwerera iye kuna Yahova, iye akwanisa kubvesesa kuti cisankhulo cakubuluswa mu mpingo cikhali cadidi kuna iye. Mukupita kwa ndzidzi iye alonga kuti apfundza pinthu pizinji pyadidi. Natenepa ine ndapfundza kuti ndzidzi onsene Yahova asasandika munjira yadidi.” Mark, mamunace Elizabeth alonga: “Mukupita kwa ndzidzi, mwanathu atipanga kuti cinthu cinango cidam’phedza toera kubwerera kuna Yahova ndi cakuti ife nee tikhacedza naye. Ndisapereka takhuta kuna Yahova thangwi yakutiphedza kukhala akubvera.”

13. Ninji cinafuna kukuphedzani toera kupirira kutsukwala?

¹³ Cedzani na axamwali akuti asabvesesa mabvero anu. Cedzani pabodzi na abale na alongo akukola mwauzimu akuti anakuphedzani kupitiriza kudikhira. (Mis. 12:25; 17:17) Joanna adalongwa mu ndima za nduli alonga: “Ine ndikhapibva ninga ndiri ndekhene. Mbwenye pidalonga ine mabvero anga kuna axamwali akunyindirika pyandiphedza toera kupirira.” Mphapo musafunika kucitanji khala athu anango mu mpingo asalonga pinthu pyakuti pisathimizira kutsukwala kwanu?

14. Thangwi yanji tisafunika ‘kupitiriza kupirirana unango na ndzace mbatilekererana na ntima onsene?’

¹⁴ Khalani akupirira thangwi ya pinthu pinalonga abale na alongo anu. Ife nee tisafunika kudikhira kuti anthu onsene analonga pinthu pyadidi ndzidzi onsene. (Tiya. 3:2) Tonsene ndife akusowa ungwiro, natenepa lekani kudzumatirwa khala anango alonga mafala akuti nee mukhaadikhira peno mwakukhonda funa alonga mafala akuti akutsukwalisani. Pontho kumbukani mafala adalonga mpostolo Paulu kuti: “Pitirizani kupirirana unango na ndzace mbamulekererana na ntima onsene, mwakukhonda tsalakana khala munthu ali na thangwi toera kutsukwala na pidacitirwa iye na ndzace.” (Akol. 3:13) Mulongo unango wakuti wacibale wace abuluswa mpingo alonga: “Yahova andiphedza toera kulekerera abale akuti akhayesera kundiphedza, mbwenye mu ndzidzi ubodzi ene akhanditsukwalisa.” Kodi abale na alongo mu mpingo anaphedza tani acibale akukhulupirika a munthu adabuluswa mu mpingo?

15. Tisafunika kucitanji toera kuphedza acibale a munthu adabuluswa mu mpingo?

¹⁵ Khalani akukoma ntima kuna acibale akukhulupirika a munthu adabuluswa mu mpingo.  Mulongo unango anacemerwa Miriam alonga kuti akhanentseka toera kuenda ku misonkhano mu ndzidzi udabuluswa m’baleace mu mpingo. Iye alonga: “Ine ndikhagopa pinthu pikhafuna kulonga anthu anango mu mpingo. Mbwenye pakhali abale na alongo azinji akuti akhatsukwalambo na pinthu pyenepi. Pontho iwo nee akhalonga mwakuipa m’baleanga adabuluswa mu mpingo. Thangwi ya pinthu pyenepi pidacita iwo, ine nee ndikhapibva kuti ndiri ndekhene.” Mulongo unango alonga: “Pidabuluswa mwanathu mu mpingo, axamwali athu abwera kudzatibalangaza. Anango atipanga kuti nee akhadziwa pinthu pikhafuna iwo kulonga. Anango akhalira pabodzi na ine, anangombo andilembera tsamba toera kundiwangisa. Pinthu pyenepi pidacita iwo pyandiphedza kakamwe.”

16. Kodi abale na alongo anaphedza tani acibale a munthu adabuluswa mu mpingo?

¹⁶ Pitirizani kuphedza acibale akukhulupirika a munthu adabuluswa mu mpingo. Mu ndzidzi unoyu, iwo asafuna kakamwe kuti mupangize ufuni kuna iwo na kuawangisa. (Aheb. 10:24, 25) Midzidzi inango, acibale a munthu adabuluswa mu mpingo asaona kuti abale na alongo anango mu mpingo nee asacedza nawo. Pyenepi pisaacitisa kupibva ninga abuluswambo mu mpingo. Mbwenye ife nee tisafuna kuti iwo akhale na mabvero anewa. Ife tisafunika kusimba na kuwangisa aphale na atsikana akuti anyakubalawo asiya undimomwene. Maria wakuti mamunace abuluswa mu mpingo mbansiya alonga: “Axamwali anga anango abwera kunyumba kwanga, andiphedza kuphika cakudya, pontho andiphedza kupfundza Bhibhlya pabodzi na ananga. Iwo akhabvesesa kutsukwala kwanga, pontho akhalira pabodzi na ine. Iwo akhanditsidzikiza mu ndzidzi ukhandilonga anthu anango mwakuipa. Mwandimomwene, iwo andiwangisa kakamwe.”—Aroma 12:13, 15.

17. Akulu a mpingo asafunika kucitanji toera kubalangaza ale akuti ali akutsukwala?

¹⁷ Akulu a mpingo, phatisirani ndzidzi uli na imwe toera kuwangisa acibale akukhulupirika a munthu adabuluswa mu mpingo. Thangwi imwe muli na basa yakupambulika yakubalangaza acibale a munthu adasiya kutumikira Yahova. (1 Ates. 5:14) Natenepa khalani na ndzidzi toera kuawangisa misonkhano ya mpingo mbidzati kutoma, peno pakumala kwa misonkhano. Acedzereni m’manyumba mwawo mbamucita phembero pabodzi na iwo, bulukani pabodzi na iwo m’basa ya  m’munda, pontho m’midzidzi inango aphembeni toera kudzakhala na imwe pabodzi pakulambira kwanu kwa banja. Akulu a mpingo asafunika kutsalakana ale akuti ali akutsukwala, pontho asafunika kuabvera ntsisi na kupangiza ufuni kuna iwo.—1 Ates. 2:7, 8.

18. Mwakubverana na 2 Pedhru 3:9, kodi Yahova asafuna kuti ale adasiya kuntumikira acitenji?

¹⁸ Yahova “nee asafuna kuti munthu afudzwe, mbwenye asafuna kuti anthu onsene atcunyuke.” (Lerini 2 Pedhru 3:9.) Maseze munthu acite madawo makulu, umaso wace usapitiriza kukhala wakufunika kuna Mulungu. Kumbukani kuti Yahova apereka Mwanace wakufunika ninga ntsembe wakuti ndi ntengo ukulu kakamwe toera kuombola ife tonsene. Natenepa, mwaufuni, Yahova asayesera kuphedza anthu anewa adasiya kuntumikira toera abwerere kuna iye. Ninga nsangani udalonga Yezu wa mwana wakutayika, Yahova asadikhira kuti ale adasiya kuntumikira anabwerera kuna iye. (Luka 15:11-32) Anthu azinji adasiya kutumikira Yahova, mukupita kwa ndzidzi abwerera kuna iye. Pontho abale na alongo mu mpingo aatambira na manja mawiri. Elizabeth adalongwa mu ndima zakutoma, atsandzaya kakamwe pidabwezereswa mwanace mu mpingo. Iye alonga: “Mwandimomwene ndisapereka takhuta kakamwe kuna ale onsene akhandiwangisa toera ndikhonde kuluza cidikhiro.”

19. Thangwi yanji tisafunika kupitiriza kunyindira Yahova?

¹⁹ Ife tisafunika kunyindira Yahova ndzidzi onsene, thangwi uphungu wace cipo unatiphekesa. Iye ndi Baba wantsisi, wakupasa mwakudzala manja, pontho asafuna kakamwe ale onsene anamulambira. Natenepa khalani na cinyindiro cakuti Yahova cipo anakusiyani mu ndzidzi unakhala imwe akutsukwala. (Aheb. 13:5, 6) Mwacitsandzo, Mark adalongwa mu ndima zidamala alonga kuti: “Yahova cipo atisiya. Iye cipo anasiya kutiphedza mu ndzidzi unathimbana ife na nyatwa.” Yahova anapitiriza kukupasani “mphambvu yakupiringana yacibaliro.” (2 Akor. 4:7) Natenepa imwe munakwanisa kupitiriza kukhala wakukhulupirika na kudikhira ngakhale mu ndzidzi wakuti munthu anafuna imwe asiya kutumikira Yahova.