NSOLO WA PFUNDZIRO 40
‘Kucitisa Anthu Azinji Kukhala Akulungama’
‘Ale anacitisa anthu azinji kukhala akulungama, anadzayetimira ninga nyenyezi kwenda na kwenda.’—DAN. 12:3.
NYIMBO 151 Iye Anadzacemera
PINAFUNA IFE KUPFUNDZA a
1. Ndi pinthu pipi pyakutsandzayisa pinafuna kucitika mu Utongi wa Pyaka Cikwi?
NTSIKU inafuna kutoma kulamuswa anthu muli akufa mu Utongi wa Kristu wa Pyaka Cikwi inadzakhala yakutsandzayisa kakamwe! Thangwi anthu onsene adaferwa na anyakufunika awo asafuna kakamwe kuaona pontho. Kusiyapo pyenepi, Yahova asafunambo kakamwe kuaona pontho. (Yobe 14:15) Mwandimomwene pinadzakhala pyakutsandzayisa kakamwe kuona anyakufunika athu mbalamuswa muli akufa. Ninga pidapfundza ife mu nsolo udamala, “anthu akulungama” akuti madzina awo alembwa m’bukhu ya umaso, ‘anadzalamuswa toera kukhala m’maso.’ (Mabasa 24:15; Juwau 5:29) Panango azinji mwa anyakufunika athu anadzakhalambo mu nsoka wa ale anafuna kutoma kulamuswa muli akufa pakumala kwa Armajedhoni. b Kusiyapo pyenepi, “anthu akukhonda kulungama,” ninga ale adafa mbakhonda kudziwa Yahova peno kuntumikira mwakukhulupirika ‘anadzalamuswa muli akufa toera kutongwa.’
2-3. (a) Mwakubverana na Izaiya 11:9, 10, ndi basa ipi ikulu kakamwe inafuna kucitwa? (b) Ndi mibvundzo ipi inafuna kutawira ife mu nsolo uno?
2 Anthu onsene anafuna kulamuswa muli akufa anadzafunika kupfundziswa. (Iza. 26:9; 61:11) Natenepa panadzacitwa basa ikulu kakamwe yakupfundzisa anthu yakuti cipo yacitwa kale. (Lerini Izaiya 11:9, 10.) Thangwi yanji? Thangwi anthu akukhonda kulungama anafuna kudzalamuswa muli akufa anadzafunika kupfundza thangwi ya Yezu Kristu, Umambo wa Mulungu, ntsembe ya ciomboli ya Yezu na kufunika kwa dzina ya Yahova, pontho thangwi yanji ndiye basi athema kutonga. Ngakhale anthu akulungama anadzafunikambo kupfundziswa pinthu pikhapfundzisa Yahova atumiki ace thangwi ya cifuniro cace na dziko yapantsi. Thangwi anango mwa anthu anewa akukhulupirika afa Bhibhlya mbidzati maliswa kulembwa. Natenepa anthu akukhonda kulungama na akulungama anadzafunika kupfundza pinthu pizinji.
3 Mu nsolo uno, ife tinatawira mibvundzo iyi: Basa ineyi ikulu kakamwe yakupfundzisa anthu inadzacitwa tani? Njira inafuna kutawira anthu pinthu pinafuna kupfundziswa iwo inakhuya tani cisankhulo cakusiya kuti madzina awo apitirize m’bukhu ya umaso peno afudzwe? Mitawiro ya mibvundzo ineyi ndi yakufunika kakamwe kuna ife lero. Ninga pinafuna kuona ife, maprofesiya anango akutsandzayisa a m’bukhu ya Dhanyeli na Apokalipse anatiphedza toera kubvesesa pinthu pinafuna kucitika anthu angalamuswa muli akufa. Pakutoma, tendeni tione pinthu pyakutsandzayisa pinalongwa m’profesiya ya Danyele 12:1, 2.
‘ANTHU ADAFA ANADZALAMUKA’
4-5. Mwakubverana na Danyele 12:1, ninji pinafuna kudzacitika pa ndzidzi wakumalisa?
4 Lerini Danyele 12:1. Bukhu ya Dhanyeli isalonga pinthu pyakutsandzayisa pinafuna kucitika mu ndzidzi wakumalisa. Mwacitsandzo, lemba ya Danyele 12:1 isalonga kuti Migeli wakuti ndi Yezu Kristu ‘anaphedza mbumba ya Mulungu.’ Khundu ineyi ya profesiya yatoma kukwanirisika mu caka ca 1914 pidakhazikiswa Yezu ninga Mambo wa Umambo wa Mulungu kudzulu.
5 Mbwenye Dhanyeli alongambo kuti Yezu ‘mbadaphedza’ atumiki a Mulungu mu ‘ndzidzi wa nyatwa wakuti cipo waoneka kale kutomera ndzidzi udatoma madzindza mpaka mu ndzidzi unoyu.’ ‘Ndzidzi unoyu wa nyatwa’ ndi “nyatwa ikulu” inalongwa pa Mateu 24:21. Yezu anaphedza peno anatsidzikiza atumiki a Mulungu kunkhomo kwa ndzidzi unoyu wa nyatwa pa Armajedhoni. Bukhu ya Apokalipse isalonga kuti anthu anewa anafuna kutsidzikizwa ndi ‘mwinji ukulu unafuna kudzabuluka mu nyatwa ikulu.’—Apok. 7:9, 14.
6. Ninji pinafuna kucitika mwinji ukulu ungapulumuka pa nyatwa ikulu? Fokotozani. (Onani mu revista ino nsolo wakuti “Mibvundzo Inacitwa na Anyakuleri” unalonga pya anthu anafuna kulamuswa muli akufa toera kukhala pa dziko yapantsi.)
6 Lerini Danyele 12:2. Ninji pinafuna kucitika mwinji ukulu ungapulumuka pa nyatwa ikulu? Profesiya ineyi nee isalonga pya kulamuswa muli akufa kwakuphipirisa peno kulamuswa muli akufa kwauzimu kwa atumiki a Mulungu kunacitika mu ntsiku zakumalisa, ninga njira ikhabvesesa ife kalene. c Mbwenye isalonga pya kulamuswa kwa anthu muli akufa kunafuna kucitika n’dziko ipswa. Thangwi yanji tisalonga tenepo? Fala yakuti ‘mataka’ peno ‘pfumbi’ yaphatisirwambo pa Yobe 17:16, pontho iri na mabvekero mabodzi ene na fala yakuti “Nthumbi.” Pyenepi pisapangiza kuti lemba ya Danyele 12:2 isalonga pya kulamuswa muli akufa kwandimomwene kunafuna kucitika kunkhomo kwa ntsiku zakumalisa na pakumala kwa nkhondo ya Armajedhoni.
7. (a) Kodi kulamuswa muli akufa kwa anthu anango toera ‘akhale m’maso kwenda na kwenda’ kusabvekanji? (b) Thangwi yanji ‘kulamuswa muli akufa kweneku ndi kwadidi kakamwe’?
7 Kodi lemba ya Danyele 12:2 isabvekanji ingalonga kuti anthu anango anadzalamuswa muli akufa toera ‘akhale m’maso kwenda na kwenda’? Pyenepi pisabveka kuti nkati mwa pyaka 1.000, ale anafuna kulamuswa muli akufa mbadziwa peno mbapitiriza kudziwa na kubvera Yahova na Yezu, anadzatambira umaso wakukhonda mala. (Juwau 17:3) ‘Kulamuswa muli akufa kweneku kunadzakhala kwadidi kakamwe’ kupiringana kudacitika mu ndzidzi wakale. (Aheb. 11:35) Thangwi yanji? Thangwi anthu anewa adalamuswa muli akufa mu ndzidzi wakale mukupita kwa ndzidzi adzafa pontho.
8. Kodi mafala akuti anango anadzalamuswa muli akufa ‘toera apaswe manyadzo na kuidiwa kwenda na kwenda’ asabvekanji?
8 Mbwenye nee ndi anthu onsene analamuswa muli akufa anafuna kudzatawira kupfundziswa na Yahova. Profesiya ya Dhanyeli isalonga kuti anthu anango anadzalamuswa muli akufa ‘toera apaswe manyadzo, pontho toera aidiwe kwenda na kwenda.’ Nakuti nee anadzatawira pinthu pinafuna kupfundziswa iwo na Yahova, madzina awo nee anadzalembwa m’bukhu ya umaso, pontho iwo nee anadzatambira umaso wakukhonda mala. Mbwenye iwo, ‘anadzaidiwa kwenda na kwenda’ peno kufudzwa. Natenepa, lemba ya Danyele 12:2 isalonga pinthu pinafuna kucitika kuna anthu anafuna kudzalamuswa muli akufa mwakubverana na pinafuna kucita iwo angamala kulamuswa muli akufa. d (Apok. 20:12) Anango anadzatambira umaso wakukhonda mala; mbwenye anango anadzafudzwa.
‘KUCITISA ANTHU AZINJIKUKHALA AKULUNGAMA’
9-10. Ndi pinthu pipi pinango pinafuna kucitika pakumala kwa nyatwa ikulu, pontho mbani ‘anafuna kudzayetimira ninga kudzulu’?
9 Lerini Danyele 12:3. Ndi pinthu pipi pinango pinafuna kucitika pakumala kwa ‘ndzidzi wa nyatwa’? Kusiyapo pinalongwa pa Danyele 12:2, vesi 3 isalonga pinthu pinango pinafuna kucitika pakumala kwa nyatwa ikulu.
10 Mbani ‘anafuna kudzayetimira ninga kudzulu’? Lemba ya Mateu 13:43 inatiphedza toera kutawira mbvundzo unoyu. Thangwi iyo isalonga: “Pa ndzidzi unoyu, anthu akulungama anadzayetimira kakamwe ninga dzuwa mu Umambo wa Babawo.” Pa vesi ineyi, Yezu akhalonga “ana a Umambo,” akuti ndi abale ace akudzodzwa anafuna kudzatonga na iye mu Umambo wakudzulu. (Mat. 13:38) Natenepa, pisaoneka kuti lemba ya Danyele 12:3 isalonga pya Akristu akudzodzwa na basa inafuna kudzacita iwo mu Utongi wa Pyaka Cikwi.
Akristu akudzodzwa akukwana 144.000 anadzaphata basa pabodzi na Yezu Kristutoera kutsogolera basa yakupfundzisa inafuna kudzacitwa mu pyaka 1.000 (Onani ndima 11)
11-12. Ndi basa ipi inafuna kudzacita Akristu akudzodzwa akukwana 144.000 nkati mwa pyaka 1.000?
11 Kodi Akristu akudzodzwa anadzacitisa tani ‘anthu azinji kukhala akulungama’? Akristu akudzodzwa anadzaphata basa pabodzi na Yezu Kristu toera kutsogolera basa yakupfundzisa inafuna kudzacitwa pa dziko yapantsi nkati mwa pyaka 1.000. Kusiyapo pyenepi, iwo anadzatonga ninga amambo na anyantsembe. (Apok. 1:6; 5:10; 20:6) Natenepa, iwo anadzaphedzera basa “yakuwangisa madzindza a anthu,” pontho anadzaphedza anthu toera akhale pontho aungwiro mwapang’ono na pang’ono. (Apok. 22:1, 2; Ezek. 47:12) Basa ineyi inadzakhala yakutsandzayisa kakamwe kuna Akristu akudzodzwa!
12 Mbani anafuna kudzacita khundu ya ‘anthu azinji anafuna kukhala akulungama.’ Anewa ndi ale anafuna kulamuswa muli akufa na ale anafuna kupulumuka pa nkhondo ya Armajedhoni kuphatanizambo ana anafuna kubalwa n’dziko ipswa. Kunkhomo kwa pyaka 1.000, anthu onsene pa dziko yapantsi anadzakhala aungwiro. Mphapo ndi ndzidzi upi unafuna kulembwa madzina awo na tinta yakukhonda fudzika m’bukhu ya umaso?
MAYESERO AKUMALISA
13-14. Anthu onsene aungwiro pa dziko yapantsi anadzafunika kucitanji toera atambire umaso wakukhonda mala?
13 Ife tisafunika kukumbuka kuti munthu nee anadzakhala na umaso wakukhonda mala basi ene thangwi ndi waungwiro. Mwacitsandzo, Adhamu na Eva akhali aungwiro, mbwenye iwo akhafunika kubvera Yahova Mulungu toera akhale na umaso wakukhonda mala. Mbwenye mwakutsukwalisa, iwo nee am’bvera.—Aroma 5:12.
14 Ninji pinafuna kudzacitika kuna anthu pa dziko yapantsi kunkhomo kwa pyaka 1.000? Anthu onsene anadzakhala aungwiro. Mphapo anthu anewa aungwiro anadzaphedzera utongi wa Yahova kwenda na kwenda? Peno anango anadzakhala ninga Adhamu na Eva akuti maseze akhali aungwiro, iwo nee abvera Yahova? Mibvundzo ineyi isafunika kutawirwa. Mphapo tinaitawira tani?
15-16. (a) Ndi ndzidzi upi wakuti anthu onsene anadzakhala na mwai wakupangiza kukhulupirika kwawo kuna Yahova? (b) Ninji pinafuna kudzacitika kunkhomo kwa mayesero akumalisa?
15 Nkati mwa pyaka 1.000, Sathani anadzafungirwa nkaidi. Mu ndzidzi unoyu, iye nee anadzakwanisa kupeusa anthu. Mbwenye kunkhomo kwa pyaka 1.000, Sathani anadzabuluswa nkaidi. Natenepa iye anadzayesera kupeusa anthu aungwiro. Mu ndzidzi wa mayesero anewa, anthu onsene aungwiro pa dziko yapantsi anadzafunika kupangiza pakweca khala iwo asalemedza dzina ya Mulungu na kuphedzera utongi wace. (Apok. 20:7-10) Pinthu pinafuna kudzacita m’bodzi na m’bodzi wa anthu anewa aungwiro, pinadzapangiza khala madzina awo athema kulembwa na tinta yakukhonda fudzika m’bukhu ya umaso.
16 Bhibhlya isalonga kuti anthu anango anadzakhala akukhonda khulupirika ninga pidacita Adhamu na Eva, mbakhonda utongi wa Yahova. Mphapo ninji pinafuna kudzacitika kuna anthu anewa? Lemba ya Apokalipse 20:15 isalonga: “Munthu wakuti dzina yace nee yalembwa m’bukhu ya umaso, aponywa mu thawala ya moto.” Pyenepi pisabveka kuti anthu anewa akukhonda bvera anadzafudzwa kwenda na kwenda. Mbwenye anthu azinji aungwiro anadzapitiriza kukhala akukhulupirika, pontho madzina awo anadzalembwa m’bukhu ya umaso na tinta yakukhonda fudzika.
‘MU NDZIDZI WAKUMALISA’
17. Ndi pinthu pipi pidapangwa Dhanyeli pyakuti mbapidacitika mu ndzidzi wathu uno? (Danyele 12:4, 8-10)
17 Ndi pyakutsandzayisa kakamwe kunyerezera pinthu pyenepi pinafuna kucitika ntsogolo! Mbwenye Dhanyeli apangwambo mphangwa zinango zakufunika kakamwe na anju thangwi ya ndzidzi wathu uno, wakuti ndi ‘ndzidzi wakumalisa.’ (Lerini Danyele 12:4, 8-10; 2 Tim. 3:1-5) Anju unoyu apanga Dhanyeli kuti: ‘Udziwisi wandimomwene unadzanjipa.’ Natenepa, pyenepi pisabveka kuti mafala a m’bukhu ineyi ya Dhanyeli mbadabveseswa mwadidi kakamwe na atumiki a Mulungu. Kusiyapo pyenepi, anju unoyu alongambo kuti mu ndzidzi unoyu ‘anthu akuipa anadzacita pyakuipa, pontho nee m’bodzi wakucita pyakuipa anadzabvesesa pyenepi.’
18. Ninji pinafuna kudzacitika kuna anthu akuipa?
18 Lero, panango pinaoneka ninga anthu anacita pyakuipa nee asasandikwa thangwi ya pyakuipa pinacita iwo. (Mal. 3:14, 15) Mbwenye mwakukhonda dembuka, Yezu anadzatonga anthu analandaniswa na mbuzi mbaagawa toera akhale akusiyana na anthu analandaniswa na mabira. (Mat. 25:31-33) Natenepa, anthu anewa akuipa nee anadzapulumuka pa nyatwa ikulu, pontho nee anadzalamuswa muli akufa toera akhale n’dziko ipswa. Madzina awo nee anadzalembwa ‘m’bukhu yakuti iri na madzina a ale anafunika kukumbukirwa’ inalongwa pa Malakiya 3:16.
19. Kodi uno ndi ndzidzi toera kucitanji, pontho thangwi yanji? (Malakiya 3:16-18)
19 Uno ndi ndzidzi toera kupangiza na makhaliro athu kuti nee tisacita khundu ya anthu akuipa. (Lerini Malakiya 3:16-18.) Thangwi Yahova ali kugumanya anthu anaona iye kuti ndi ‘akupambulika’ peno akufunika kakamwe kuna iye. Mwakukhonda penula, ife tisafuna kucita khundu mu nsoka wa anthu anewa.
Pinadzakhala pyakutsandzayisa kakamwe kuona Dhanyeli, anyakufunika athu na anthuanango azinji ‘mbalamuswa muli akufa’ toera kutambira unthaka wawo n’dziko ipswa! (Onani ndima 20)
20. Ndi pikiro ipi idacita Yahova kuna Dhanyeli, pontho thangwi yanji musafunika kudikhira mwakutsandzaya kukwanirisika kwa pikiro ineyi?
20 Mwandimomwene, ife tiri kukhala mu ndzidzi wakutsandzayisa kakamwe. Mbwenye mwakukhonda dembuka, panadzacitika pinthu pinango pyakutsandzayisa kakamwe. Ife tinadzaona kufudzwa kwa pinthu pyonsene pyakuipa. Buluka penepo, tinaona kukwanirisika kwa pikiro idacita Yahova kuna Dhanyeli kuti: ‘Kunkhomo kwa ntsiku zakumalisa iwe unadzalamuswa toera kutambira unthaka wako.’ (Dan. 12:13) Kodi imwe musadikhira mwakutsandzaya ntsiku yakuti Dhanyeli pabodzi na anyakufunika anu ‘anadzalamuswa muli akufa’? Khala ndi tenepo, citani pyonsene pinakwanisa imwe toera mupitirize kukhala wakukhulupirika, pontho mungacita pyenepi munakwanisa kukhala na cinyindiro cakuti dzina yanu inapitiriza m’bukhu ya umaso ya Yahova.
NYIMBO 80 ‘Yeserani Muone Kuti Yahova Ndi Wadidi’
a Nsolo uno unafokotoza kucinja kwa kubvesesa kwathu basa ikulu yakupfundzisa inalongwa pa Danyele 12:2, 3. Ife tinaona kuti basa ineyi inacitwa lini, pontho mbani anafuna kucita basa ineyi. Kusiyapo pyenepi, ife tinaona kuti basa ineyi yakupfundzisa inaphedza tani anthu pa dziko yapantsi toera apitirize kukhala akukhulupirika pa mayesero akumalisa kunkhomo kwa Utongi wa Kristu wa Pyaka Cikwi.
b Panango anthu anafuna kutoma kulamuswa muli akufa ndi ale adafa mwakukhulupirika mu ntsiku zakumalisa, buluka penepo anadzalamuswambo anthu adafa kale kakamwe. Kulamuswa muli akufa kungacitika munjira ineyi, anthu adafa kale kakamwe anadzakhala na mwai wa kutambirwa na anthu akhadziwa iwo. Mwakukhonda tsalakana pinafuna kucitika, Bhibhlya isalonga kuti kulamuswa muli akufa kwa anyakudzodzwa kunadzacitika ‘mwakulinganira.’ Natenepa, ife tinakwanisambo kukhala na cinyindiro cakuti kulamuswa kwa anthu muli akufa toera kukhala pa dziko yapantsi kunadzacitikambo mwakulinganira.—1 Akor. 14:33; 15:23.
c Mphangwa zenezi zisacinja kubvesesa kwathu mphangwa zinagumanika m’bukhu yakuti Preste Atenção à Profecia de Daniel! nsolo 17 na mu A Sentinela ya 1 de Julho de 1987, tsa. 21-25.
d Mwakusiyana na pyenepi, mafala akuti “anthu akulungama” na “akukhonda kulungama” anagumanika pa Mabasa 24:15 na mafala akuti “ale adacita pinthu pyadidi” na “ale adacita pinthu pyakuipa” anagumanika pa Juwau 5:29 asalonga pinthu pikhacita anthu anafuna kudzalamuswa muli akufa mbadzati kufa.
