1. Ndi pinthu pipi pinacita munthu wakunyindirika?

 MUNTHU wakunyindirika asacita pinalonga iye, pontho asalonga undimomwene. (Masal. 15:4) Pontho anthu asadziwa kuti anakwanisa kun’nyindira. Ife tisafuna kuti abale na alongo athu atione kuti ndife akunyindirika. Mphapo ninji pinafuna kutiphedza toera tikhale akunyindirika?

2. Tinapangiza tani kuti tathema kunyindirwa?

² Ife nee tinakwanisa kukakamiza anango toera atinyindire. Mbwenye tisafunika kuwangisira toera kucita pinthu pinapangiza kuti tathema kunyindirwa. Cinyindiro ndi ninga kobiri. Ndi pyakunentsa toera kuigumana, mbwenye ndi pyakukhonda nentsa toera kuiluza. Yahova athema kunyindirwa. Ife tinakwanisa kun’nyindira thangwi ‘pyonsene pinacita iye ndi pyakunyindirika.’ (Masal. 33:4) Pontho iye asafuna kuti titowezere citsandzo cace. (Aef. 5:1) Natenepa tendeni tione pitsandzo pingasi pya atumiki a Yahova adatowezera citsandzo ca Babawo wakudzulu, mbapangiza kuti athema kunyindirwa. Pontho tinapfundza makhaliro maxanu anafuna kutiphedza toera tikhale akunyindirika.

3-4. Mprofeta Dhanyeli apangiza tani kuti akhali wakunyindirika, pontho tisafunika kubvundzikanji?

³ Mprofeta Dhanyeli apangiza citsandzo cadidi cakukhala wakunyindirika. Maseze iye akhadaendeswa ku ubitcu ku Bhabhilonya, iye apangiza kuti akhali wakunyindirika. Anthu atoma kun’nyindira kakamwe pidam’phedza Yahova toera kufokotoza ndoto za Mambo Nabhukodhonozore wa ku Bhabhilonya. Pa ndzidzi unango Dhanyeli akhafunika kupanga mambo kuti Yahova nee  akhakomerwa na pinthu pikhacita iye. Pontho mphangwa zenezi mambo nee mbadakomerwa nazo. Natenepa Dhanyeli akhafunika kukhala na cipapo toera kulonga mphangwa zenezi, thangwi mambo Nabhukodhonozore akhali wakukhonda nentsa kuipirwa. (Dan. 2:12; 4:20-22, 25) Mukupita kwa pyaka, Dhanyeli apangiza pontho kuti akhali wakunyindirika pidafokotoza iye mafala akuti anango nee akhakwanisa kuafokotoza akhadalembwa pa paredhi ya nyumba ya mambo wa ku Bhabhilonya. (Dan. 5:5, 25-29) Mukupita kwa ndzidzi, Dhariyo wa ku Medhya na anyabasa ace aonambo kuti ‘Dhanyeli akhali na luso yakudzumisa.’ Iwo adzindikira kuti Dhanyeli ‘akhali wakunyindirika, pontho nee akhapwaza pinthu peno kucita pinthu mwakusowa ulungami.’ (Dan. 6:3, 4) Ngakhale atongi akuti nee akhalambira Yahova aonambo kuti Dhanyeli akhali wakunyindirika.

⁴ Mu ndzidzi unanyerezera ife citsandzo ca Dhanyeli, tisafunika kubvundzika: ‘Ndi api makhaliro anandidziwa na anthu akuti nee asatumikira Yahova? Kodi ine ndisadziwika ninga munthu wakuti asacita mwadidi mabasace na wakunyindirika?’ Thangwi yanji tisafunika kubvundzika tenepo? Thangwi tingakhala akunyindirika ife tisapasa mbiri Yahova.

5. Thangwi yanji Ananiya akhadziwika ninga munthu wakunyindirika?

⁵ Mu caka ca 455 Kristu Mbadzati Kubalwa, pidamala ntongi Neemiya kumanga papswa mpanda wa Yerusalemu, iye asankhula amuna akunyindirika toera atsalakane nzinda. Mwa anthu anango, Neemiya asankhula Ananiya, nkadamu  wa Nyumba ya Citsidzikizo Camphambvu. Bhibhlya isalonga kuti Ananiya akhali ‘munthu wakunyindirika, pontho akhagopa kakamwe Mulungu kupiringana anango.’ (Neh. 7:2) Nakuti iye akhafuna Yahova, Ananiya aphata mwaphinga mabasa onsene akhapaswa iye. Makhaliro anewa anakwanisambo kutiphedza toera kukhala akunyindirika m’basa ya Yahova.

6. Tikiko apangiza tani kuti akhali xamwali wakunyindirika kuna mpostolo Paulu?

⁶ Onani citsandzo ca Tikiko, m’bale akhanyindirwa na mpostolo Paulu. Pikhali Paulu nkaidi ku Roma, iye anyindira Tikiko mbalonga kuti akhali ‘ntumiki wakukhulupirika.’ (Aef. 6:21, 22) Paulu anyindira Tikiko toera kutumiza matsamba kuna abale a ku Efeso na a ku Kolose, pontho toera aawangise na kuabalangaza. Citsandzo ca Tikiko cisatikumbusa abale akukhulupirika na akunyindirika anatitsalakana mwauzimu lero.—Akol. 4:7-9.

7. Musapfundzanji thangwi yakunyindirika kwa akulu a mpingo na atumiki akutumikira mu mpingo mwanu?

⁷ Lero ife tisapereka takhuta kakamwe thangwi yakukhala na akulu a mpingo na atumiki akutumikira akunyindirika. Ninga Dhanyeli, Ananiya na Tikiko, iwo asacita mabasa awo mwaphinga. Mwacitsandzo, ife tingagumanika pa misonkhano ya pakati pa sumana tisadziwa kuti makhundu onsene amala kugawiwa kuna abale anafuna kuacita. Pontho akulu a mpingo asapereka takhuta kuna abale angakhunganya mwadidi makhundu awo na kuacita. Kusiyapo pyenepi, tingacemera anyakupfundza athu toera agumanike pa misonkhano ya kumala kwa sumana tisakhala na cinyindiro cakuti m’bale adapaswa nkhani ya pakweca anaicita. Pontho ife tisanyindira kuti tinakhala na mabukhu anafuna ife toera kuaphatisira m’basa ya m’munda. Abale anewa akukhulupirika asatitsalakana mwadidi kakamwe, pontho ife tisapereka takhuta kuna Yahova thangwi ya iwo. Mphapo ife, tinapangizambo tani kuti ndife akunyindirika?

8. Tinakhala tani akulinganira mu ndzidzi unapangiza ife kuti tisafuna abale na alongo athu? (Misangani 11:13)

⁸ Ife tisafuna abale na alongo athu, pontho nee tisafuna kuti iwo athimbane na nyatwa. Mbwenye tisafunika kucita mphole-mphole toera tikhonde kupanga anango mphangwa zacibisobiso za abale na alongo athu. Akristu anango a mu ndzidzi wa apostolo ‘akhalonga mapsweda, pontho akhadzudzumika na pinthu pyakuti nee ndi pyawo, mbalonga pinthu pyakuti nee akhafunika kupilonga.’ (1 Tim. 5:13) Ife nee tisafunika kukhala ninga Akristu anewa. Mphapo nyerezerani kuti munthu atipanga mphangwa zace zacibisobiso, pontho atiphemba toera tikhonde kupanga anango. Mwacitsandzo, panango mulongo anatipanga nyatwa zace za ungumi peno nyatwa zinango mbatiphemba toera tikhonde kupanga anango mphangwa zenezi. Pyenepi pingacitika, ife tisafunika kucita pidatipanga iye. b (Lerini Misangani 11:13.) Cincino tendeni tione makhundu anango akuti ndi akufunika kukoya cibisobiso.

9. Anthu a pabanja anapangiza tani kuti ndi akunyindirika?

⁹ M’banja. M’bodzi na m’bodzi m’banja asafunika kuwangisira toera akhonde kulonga pinthu pyacibisobiso pya m’banja. Mwacitsandzo, m’bale panango anaona kuti nkazace ali na nsambo wakucita pinthu pyakuti nee pisankomeresa. Kodi iye anapanga anango pinthu pyenepi mbapasa manyadzo nkazace? Nkhabe. Thangwi iye asafuna nkazace, pontho nee mbadafuna kucita pinthu pyakuti pinantsukwalisa. (Aef. 5:33) Ana asafunika kutsalakanwa mwacilemedzo, pontho anyakubala asafunika kukumbuka pyenepi.  Iwo nee asafunika kupanga anango madodo anacita anawo, thangwi angacita pyenepi anaapasa manyadzo. (Akol. 3:21) Kusiyapo pyenepi, anapiana asafunika kuwangisira toera akhonde kulonga pinthu pyakuti pinapasa manyadzo anthu a pabanja pawo. (Deut. 5:16) Natenepa, m’bodzi na m’bodzi angawangisira toera kukoya pinthu pyacibisobiso pabanja pawo, banja yawo inakhala yakuphatana.

10. Tinapangiza tani kuti ndife xamwali wandimomwene? (Misangani 17:17)

¹⁰ Kuna axamwali athu. Midzidzi inango ife tisakhala na cifuno cakupanga xamwali wathu cibisobiso cathu. Mbwenye midzidzi inango pyenepi pinakhala pyakunentsa. Panango ife nee tadzolowera kupanga anango pinthu pyathu pyacibisobiso, pontho mbitidakhala wakutsukwala kakamwe tingabva kuti xamwali wathu apangambo anango pinthu pidampanga ife. Mbwenye ife tisapereka takhuta kakamwe kuna axamwali athu akuti tingaapanga mphangwa zacibisobiso iwo nee asapangambo anango. Thangwi iwo ndi ‘axamwali andimomwene.’—Lerini Misangani 17:17.

11. (a) Akulu a mpingo pabodzi na akazawo anapangiza tani kuti ndi akunyindirika? (b) Tisapfundzanji na citsandzo ca nkulu wa mpingo na nkazace adalongwa pa ndima? (Onani foto.)

¹¹ Mu mpingo. Akulu a mpingo anakoya cibisobiso ndi ninga ‘mbuto yakuthawira mphepo na mbuto yakubisalira mu ndzidzi wa condzi’ kuna abale na alongo awo. (Iza. 32:2) Ife tinakwanisa kucedza na akulu a mpingo mwakusudzuka thangwi tisadziwa kuti iwo nee anapanga anango pinthu pinaapanga ife. Pontho ife nee tisafunika kuakakamiza toera atipange pinthu pyacibisobiso pinadziwa iwo. Kusiyapo pyenepi, ife tisapereka takhuta kuna akazi a akulu a mpingo thangwi iwo nee asakakamiza amunawo toera aapange mphangwa zacibisobiso za anthu anango. Mwandimomwene, ndi pyakufunika kakamwe kuti nkazi wa nkulu wa mpingo akhonde kupangwa mphangwa zacibisobiso za abale na alongo mu mpingo. Nkazi wa nkulu wa mpingo unango alonga: “Ine ndisapereka takhuta kuna mamunanga thangwi iye nee asandipanga mphangwa zacibisobiso za abale na alongo anacedzera iye peno ale anaphemba ciphedzo cace. Pontho iye nee asandipanga  madzina awo. Ndisaperekambo takhuta kakamwe thangwi nee ndisadzudzumika na pinthu pyakuti nee pisafunika kutsalakanwa na ine. Pyenepi pisandiphedza toera ndicedze munjira ibodzi ene na abale na alongo onsene mu mpingo. Pontho ndisakhala na cinyindiro cakuti ndingapanga mamunanga pinthu pyacibisobiso, iye nee anapangambo anthu anango pinthu pyenepi.” Mwandimomwene, ife tonsene tisafuna kukhala akunyindirika. Mphapo ndi makhaliro api anafuna kutiphedza toera tikhale akunyindirika? Tendeni tione makhaliro maxanu.

12. Thangwi yanji ufuni ndi wakufunika kakamwe toera kunyindirana? Perekani citsandzo.

¹² Ufuni ndi n’khaliro wakufunika kakamwe toera kunyindirana. Yezu alonga kuti matongero mawiri makulu kakamwe ndi kufuna Yahova na kufuna andzathu. (Mat. 22:37-39) Ufuni wathu kuna Yahova usatiphedza toera kutowezera citsandzo cace cakukhala akunyindirika. Pontho kufuna abale na alongo athu kunatikulumiza toera tikhonde kupanga anango mphangwa zawo zacibisobiso. Ife nee tisafunika kupanga anango pinthu pyakuti pinacitisa abale na alongo athu kuthimbana na nyatwa, kukhala na manyadzo peno kutsukwala.—Juwau 15:12.

13. Kucepeseka kunatiphedza tani toera tikhale akunyindirika?

¹³ Kucepeseka kunatiphedza toera tikhale akunyindirika. Nkristu wakucepeseka nee anayesera kupangiza anango kuti asadziwa pinthu pizinji mukukhala wakutoma toera kulonga pinthu pinadziwa iye. (Afil. 2:3) Iye nee asayesera kucitisa anango kunyerezera kuti iye asadziwa pinthu pyacibisobiso pyakuti nee asafunika kupilonga. Kucepeseka kunatiphedzambo toera tikhonde kupanga anango maonero athu thangwi ya pinthu pyakuti nee pisalongwa m’Bhibhlya peno m’mabukhu athu.

14. Luso yakudzindikira inatiphedza tani toera tikhale akunyindirika?

¹⁴ Luso yakudzindikira inaphedza Nkristu toera kudziwa ‘ndzidzi wakumatama na ndzidzi wakulonga.’ (Koel. 3:7) Azinji asalonga kuti “kulonga ndi ninga parata, mbwenye kumatama ndi ninga ouro.” Munjira inango, pana midzidzi inango yakuti ndi pyakufunika kakamwe kumatama m’mbuto mwakulonga. Na thangwi ineyi, lemba ya Misangani 11:12 isalonga: ‘Munthu wakuti ali na luso yandimomwene yakudzindikira asakhala wakumatama.’ Mwacitsandzo, nkulu wa mpingo m’bodzi wa maluso, kazinji kene asaphembwa kuti aphedze mipingo inango toera kutsalakana pinentso pyawo. Nkulu wa mpingo unango alonga tenepa thangwi ya iye: “Ndzidzi onsene iye asawangisira toera akhonde kupanga anango mphangwa zacibisobiso za mipingo inango.” Nakuti nkulu wa mpingo unoyu ali na udziwisi, akulu a mpingo anango a mu mpingo mwace asamulemedza kakamwe. Iwo ali na cinyindiro cakuti iye cipo analonga pinthu pyawo pyacibisobiso kuna anthu anango.

15. Perekani citsandzo cinapangiza maphindu akukhala wakukhulupirika kuna anango.

¹⁵ Kukhala wakukhulupirika ndi n’khaliro unango wakufunika toera tinyindirane. Ife tisanyindira munthu wakukhulupirika thangwi tisadziwa kuti ndzidzi onsene iye asalonga undimomwene. (Aef. 4:25; Aheb. 13:18) Mwacitsandzo nyerezerani kuti imwe musafuna kuthimizira maluso anu akupfundzisa. Natenepa musaphemba munthu toera abvesere nkhani yanu mbakupasani maonero toera mudziwe kuti munaicita tani mwadidi kakamwe. Mbani anafuna imwe kunyindira toera akupaseni uphungu wakuphedza? Kodi imwe munasankhula munthu anakupangani pinthu pinakomerwa na imwe? Peno munthu anakupangani undimomwene mwakukoma ntima? Bhibhlya isalonga: ‘Mphyadidi kusandika munthu pakweca m’mbuto mwa kunfuna mbukhonda kupangiza kuti usanfuna.  Pironda pyakuphekeswa na xamwali wakukhulupirika ndi pyadidi.’ (Mis. 27:5, 6) Maseze pakutoma pinatitsukwalisa, mbwenye mafala akunyindirika a xamwali wathu anatiphedza kakamwe mukupita kwa ndzidzi.

16. Lemba ya Misangani 10:19 isapangiza tani kufunika kwa kukhala wakudzitonga?

¹⁶ Kudzitonga ndi kwakufunika kakamwe toera tikhale akunyindirika. N’khaliro unoyu unatiphedza toera tikhale akumatama tingayeserwa toera tilonge mphangwa zacibisobiso zidatipanga anthu anango. (Lerini Misangani 10:19.) Pyenepi panango pinakhala pyakunentsa kakamwe tingacedza na anango mukuphatisira interneti, thangwi tingakhonda kucita mphole-mphole, ife tinalonga mphangwa zacibisobiso kuna anthu azinji. Pontho tingacita pyenepi, ife nee tinakwanisabve kuona kuti anthu anango anaphatisira tani mphangwa zenezi peno pinthu pyakuipa pinafuna kucitika thangwi ya mphangwa zenezi. Kudzitonga kunatiphedzambo toera tikhale akumatama tingakakamizwa toera tilonge mphangwa zakuti zinaikha pangozwi umaso wa abale na alongo athu. Pyenepi panango pinacitika tingacitwa mibvundzo na apolixa mu dziko yakuti basa yathu isakhondeswa. Mu ndzidzi unoyu na midzidzi inango ife tinakwanisa kuphatisira n’dida unagumanika pa Masalmo 39:1 unalonga kuti: ‘Ndinafunga mulomo wanga toera kuuonera.’ (Masal. 39:1) Mwandimomwene ife tisafunika kukhala akunyindirika pabanja pathu, na axamwali athu, na abale na alongo, kuphatanizambo anthu anango. Pontho toera tikhale akunyindirika, tisafunika kukhala akudzitonga.

17. Tisafunika kucitanji toera tikhale akunyindirika mu mpingo?

¹⁷ Ife tisapereka takhuta kakamwe kuna Yahova thangwi iye atibweresa mu gulu yace yakuti iri na abale na alongo akufunana na akunyindirika. Pontho ife tonsene tisafunika kuwangisira toera tikhale akunyindirika kuna abale na alongo athu. Kusiyapo pyenepi, ife tonsene tisafunika kuwangisira toera kupangiza ufuni, kucepeseka, luso yakudzindikira, kukhulupirika na kudzitonga toera tikhale akunyindirana unango na ndzace mu mpingo. Ife tisafunika kupitiriza kuwangisira toera tipangize kuti tathema kunyindirwa. Natenepa, tendeni titowezere citsandzo ca Yahova Mulungu wathu mbatipitiriza kupangiza kuti tathema kunyindirwa.