NSOLO WA PFUNDZIRO 36
NYIMBO 89 Bverani Toera Mupaswe Nkhombo
“Khalani Anyakucita Pinalonga Mafala”
“Khalani anyakucita pinalonga mafala, tayu anyakubva basi.” —TIYA. 1:22.
PINAFUNA IFE KUPFUNDZA
Nsolo uno unatiphedza toera kukulisa cifuno cathu cakuleri Bhibhlya ntsiku zonsene, kunyerezera pinaleri ife na kupiphatisira mu umaso wathu.
1-2. Thangwi yanji atumiki a Mulungu ndi akutsandzaya? (Tiyago 1:22-25)
YAHOVA na Mwanace asafuna kuti tikhale akutsandzaya. Nyakulemba Masalmo 119:2 alonga: “Anyakutsandzaya ndi ale anabvera macenjezo ace, ale anansaka na ntima wawo onsene.” Yezu alongambo: “Anyakutsandzaya ndi ale anabva mafala a Mulungu mbaaphatisira!”—Luka 11:28.
2 Ninga atumiki a Yahova, ndife anthu akutsandzaya. Thangwi yanji? Tiri na mathangwi mazinji, mbwenye thangwi yakufunika kakamwe ndi yakuti ife tisaleri Mafala a Mulungu ntsiku zonsene, pontho tisawangisira toera kuphatisira pinapfundza ife.—Lerini Tiyago 1:22-25.
3. Tisaphedzeka tani tingaphatisira pinaleri ife m’Mafala a Mulungu?
3 Pali na njira zizinji zakuti tinakwanisa kuphedzeka tingakhala “anyakucita pinalonga mafala.” Mwacitsandzo, tingaphatisira pinapfundza ife m’Mafala a Mulungu tisatsandzayisa Yahova, pontho ife tisakhalambo akutsandzaya. (Ekle. 12:13) Kusiyapo pyenepi, tisakhala na banja yakutsandzaya, pontho tisakhala na uxamwali wakuwanga na abale na alongo athu. Panango pyenepi pyacitika kuna imwe. Kusiyapo pyenepi, ife tisacalira nyatwa zizinji zinakhala na anthu thangwi yakukhonda kubvera mitemo ya Yahova. Mwandimomwene, pisakhala ninga pidalonga Mambo Dhavidhi. Pakumala kulonga mitemo ya Yahova na matongero ace, iye amalisa na mafala akuti: “Kukoya njira zenezi kusabweresa nkhombo.”—Mas. 19:7-11.
4. Thangwi yanji midzidzi inango ndi pyakunentsa kucita pinalonga Mafala a Mulungu?
4 Mwandimomwene, midzidzi inango pisanentsa kuna ife toera kucita pinalonga Mafala a Mulungu. Maseze tiri na pinthu pizinji toera kucita mu umaso, ife tisafunika kukhala na ndzidzi wakuleri na kupfundza Bhibhlya toera tikwanise kubvesesa pinafuna Yahova kuna ife. Natenepa, tinapfundza pinthu pingasi pyakuti pinatiphedza toera kuleri Bhibhlya ntsiku zonsene. Kusiyapo pyenepi, tinapfundza pinthu pinafuna kutiphedza toera kunyerezera pinaleri ife na kuona kuti tinaphatisira tani mu umaso wathu pinthu pinapfundza ife.
KHALANI NA NDZIDZI WAKULERI MAFALA A MULUNGU
5. Ndi mabasa api ali na ife toera kucita?
5 Atumiki azinji a Yahova ali na mabasa mazinji toera kucita. Ife tisaphatisira ndzidzi uzinji toera kucita pinthu pinalonga Bhibhlya kuti ndi pyakufunika kakamwe. Mwacitsandzo, azinji a ife asaphata basa toera kutsalakana mabanja awo na iwo ene. (1 Tim. 5:8) Anango asatsalakana acibale awo akuduwala peno akukalamba. Pontho ife tonsene tisafunika kukhala na ndzidzi toera kutsalakana ungumi wathu. Kusiyapo mabasa anewa, ife tisapaswambo mabasa anango mu mpingo. Ibodzi mwa mabasa akufunika kakamwe ndi basa yathu yakumwaza mphangwa zadidi. Na mabasa anewa onsene, munakwanisa tani kukhala na ndzidzi wakuleri Bhibhlya ntsiku zonsene, kunyerezera pinaleri imwe na kupiphatisira?
6. Munacitanji toera mukhale na ndzidzi wakuleri Bhibhlya? (Onanimbo foto.)
6 Kuleri Bhibhlya ndi cibodzi mwa ‘pinthu pyakufunika kakamwe’ kuna ife ninga Akristu, natenepa tisafunika kuikha pyenepi pa mbuto yakutoma. (Afil. 1:10) Bukhu ya Masalmo 1:1, 2 isalonga tenepa thangwi ya munthu wakutsandzaya: “Iye asakomerwa na mwambo wa Yahova, pontho iye asaleri mwambo Wace mwakukhonda galuza masiku na masikati.” (Mas. 1:1, 2) Pyenepi pisapangiza kuti tisafunika kukhala na ndzidzi wakuleri Bhibhlya. Mphapo ndi upi ndzidzi wadidi toera kuleri Bhibhlya? Ntawiro wa mbvundzo unoyu usanyindira m’bodzi na m’bodzi wa ife. Mbwenye pyakufunika ndi kusankhula ndzidzi toera kuleri Bhibhlya ntsiku zonsene. M’bale anacemerwa Victor alonga: “Ine ndisakomerwa kuleri Bhibhlya namacibese. Maseze nee ndisakomerwa kulamuka namacibese kakamwe, mbwenye mu ndzidzi unoyu nee ndisakhala wakudzudzumika. Manyerezero anga asakhala pa mbuto, pontho ndisakwanisa kubvesesa pinaleri ine.” Panango pyenepi pisacitikambo kuna imwe. Natenepa bvundzikani: ‘Ndi ndzidzi upi wadidi kakamwe kuna ine toera kuleri Bhibhlya?’
Ndi upi ndzidzi wadidi toera kuleri Bhibhlya? Munakwanisa tani kucita pyenepi ndzidzi onsene? (Onani ndima 6)
NYEREZERANI PINALERI IMWE
7-8. Ndi pinthu pipi pinafunika ife kucalira pakuleri Bhibhlya toera tiphedzeke na pinaleri ife? Perekani citsandzo.
7 Pakumala kukhazikisa ndzidzi toera kuleri Bhibhlya, pali na cinthu cinango cakuti musafunika kucionesesa mwadidi. Kodi imwe mwaleri kale pinthu, buluka penepo mbamuduwala pidaleri imwe? Pyenepi pisacitika kuna ife tonsene. Panango pinacitikambo pakuleri Bhibhlya. Mwacitsandzo, panango tasankhula kuleri makapitulu mazinji a Bhibhlya pa ntsiku. Pyenepi ndi pyadidi. Thangwi ife tisafunika kukhazikisa pifuno mbatiwangisira toera kupikwanirisa. (1 Akor. 9:26) Mbwenye toera kuphedzeka na pinaleri ife m’Bhibhlya, tisafunika kucita pizinji kupiringana basi ene kuleri.
8 Miti, tsanga na pinthu pyonsene pyakumera pisafuna madzi toera pipitirize kukula. Mbwenye madzi angabvumba kakamwe mu ndzidzi ubodzi ene, mataka asatota kakamwe, pontho madzi asadzala. Pyenepi pingacitika, madzi anewa nee asaphedza toera pinthu pyonsene pyakumera pikule. Ndi pyadidi kakamwe madzi angabvumba pang’ono-pang’ono, thangwi iwo asapita pantsi mbaphedza pinthu pyenepi toera pikule. Munjira ibodzi ene, ife nee tisafunika kuleri Bhibhlya mwakuthamanga mbatikhonda kukhala na ndzidzi wakunyerezera pinaleri ife, kupikumbuka na kupiphatisira.—Tiya. 1:24.
Munjira ibodzi ene yakuti mataka asafuna ndzidzi toera madzi apite pantsi, ife tisafunika kukhala na ndzidzi toera kunyerezera na kuphatisira pinaleri ife m’Mafala a Mulungu (Onani ndima 8)
9. Tisafunika kucitanji tingadzindikira kuti tiri kuleri Bhibhlya mwakucimbiza kakamwe?
9 Kodi imwe mwaleri kale Bhibhlya mbamudzindikira kuti muli kuleri mwakucimbiza kakamwe? Mphapo musafunika kucitanji? Lerini pang’ono-pang’ono. Wangisirani toera kunyerezera pinthu pinaleri imwe peno pidamala imwe kuleri. Kucita pyenepi nee ndi pyakunentsa. Imwe munakwanisa kuthimizira ndzidzi wanu wakupfundza Bhibhlya toera mukwanise kunyerezera pinapfundza imwe. Peno munasankhula kuleri mavesi akucepa mbamuphatisira ndzidzi unango toera kunyerezera pidaleri imwe. M’bale Victor adalongwa pa ndima 6, alonga: “Pakuleri Bhibhlya, ine nee ndisaleri pinthu pizinji kakamwe. Midzidzi inango basi ene ndisaleri kapitulu ibodzi. Nakuti ndisaleri Bhibhlya namacibese kakamwe, ine ndisakwanisa kupitiriza kunyerezera pidaleri ine pa ntsiku.” Mwakukhonda tsalakana njira inaphatisira imwe, ndi pyakufunika kakamwe kuleri munjira yakuti munakwanisa kukhala na ndzidzi toera kunyerezera pidaleri imwe.—Mas. 119:97; onani bokosi ya nsolo wakuti “ Mibvundzo Toera Kuinyerezera.”
10. Perekani citsandzo cinapangiza kuti munaphatisira tani pinapfundza imwe. (1 Atesalonika 5:17, 18)
10 Mungaleri mavesi mangasi a Bhibhlya, nyerezerani kuti munaaphatisira tani. Mu ndzidzi unaleri imwe Mafala a Mulungu, bvundzikani: ‘Ndinaphatisira tani mphangwa zenezi cincino peno ntsogolo?’ Mwacitsandzo, nyerezerani kuti imwe mwaleri lemba ya 1 Atesalonika 5:17, 18. (Lerini.) Pakumala kuleri mavesi anewa mawiri, munakwanisa kulimira mbamunyerezera kuti musacita phembero kangasi. Pontho munakwanisa kunyerezera pinthu pyakuti musapereka takhuta thangwi yakukhala napyo. Panango munasankhula kupereka takhuta kuna Yahova thangwi ya pinthu pitatu. Maseze munyerezere pyenepi mu ndzidzi wakucepa, imwe munakwanisa kubva na kucita pinalonga Mafala a Mulungu. Mungacita pyenepi ntsiku zonsene pakumala kuleri mavesi anango a Bhibhlya, imwe munaphedzeka kakamwe. Natenepa munakhala nyakucita pinalonga Mafala a Mulungu. Mphapo munacitanji mungaona kuti pali na pinthu pizinji pinafunika imwe kusasanyira?
KHAZIKISANI PIFUNO PYAKUTI MUNAKWANISA KUPIKWANIRISA
11. Thangwi yanji midzidzi inango panango munatsukwala? Perekani citsandzo.
11 Mungaleri Bhibhlya, midzidzi inango panango munatsukwala thangwi yakudzindikira kuti pali na pinthu pizinji pinafunika imwe kusasanyira. Mwacitsandzo, nyerezerani kuti ntsiku inango mwaleri mphangwa zinapangiza kuti nee tisafunika kukhala a tsankhulo. (Tiya. 2:1-8) Imwe musaona kuti musafunika kucinja njira inatsalakana imwe anango, natenepa musacita macinjo anewa. Pyenepi ndi pyadidi kakamwe! Ntsiku inango musaleri mphangwa zinapangiza kuti ndi pyakufunika kucita mphole-mphole na pinthu pinalonga ife. (Tiya. 3:1-12) Imwe musadzindikira kuti midzidzi inango musalonga mafala akuti nee ndi adidi na akutsukwalisa anango. Natenepa musasankhula kutoma kulonga mafala akuwangisa kakamwe pakucedza na anango. Ntsiku inangombo musaleri mphangwa zinapangiza kuti nee tisafunika kucita uxamwali na dziko. (Tiya. 4:4-12) Pontho musaona kuti musafunika kucita mphole-mphole na pinthu pinaleri imwe, pinaona imwe na pinabvesera imwe. Mbwenye ntsiku inango panango munaona kuti ndi pyakunentsa kakamwe kucita macinjo anewa onsene.
12. Thangwi yanji nee musafunika kutsukwala mungadzindikira pakuleri kwanu Bhibhlya kuti musafunika kucita macinjo? (Onanimbo cidzindikiro capantsi.)
12 Imwe nee musafunika kutsukwala mungaona kuti musafunika kucita macinjo mazinji. Pyenepi pisapangiza kuti ndimwe wakucepeseka, pontho musaleri Bhibhlya na mathangwi adidi. Munthu wakucepeseka asaleri Bhibhlya mbasaka njira zakucita macinjo. a Kumbukani kuti ife tisafunika kupitiriza ‘kubvala uunthu upswa.’ (Akol. 3:10) Ninji pinafuna kukuphedzani toera kupitiriza kukhala nyakucita pinalonga Mafala a Mulungu?
13. Ndi njira ipi yadidi toera kuphatisira pinthu pinapfundza imwe? (Onanimbo foto.)
13 M’mbuto mwakuyesera kuphatisira pinthu pyonsene pinapfundza imwe ndzidzi ubodzi ene, wangisirani toera kuphatisira basi ene cinthu cibodzi peno piwiri. (Mis. 11:2) Yeserani kucita ipi: Khalani na ndandanda ya pinthu pinafunika imwe kuphatisira, buluka penepo sankhulani cibodzi peno piwiri mwa pinthu pyenepi mbamusasanyira pinthu pinango mukupita kwa ndzidzi. Mphapo ndi pinthu pipi pinafunika imwe kutoma kuphatisira?
M’mbuto mwakuwangisira toera kuphatisira pinthu pyonsene pinaleri imwe mu ndzidzi ubodzi ene, wangisirani toera kuphatisira cinthu cibodzi peno piwiri (Onani ndima 13-14)
14. Ndi pinthu pipi pyakuti munakwanisa kutoma kupiphatisira?
14 Panango munasankhula kutoma kuphatisira pinthu pyakukhonda nentsa. Peno munasankhula kuphatisira pinthu pyakuti musafunika kucita macinjo mwakucimbiza. Mungamala kusankhula pinthu pinafuna imwe kuphatisira, fufudzani m’mabukhu athu mukuphatisira Índice das Publicações da Torre de Vigia peno Bukhu Inaphatisira Mboni za Yahova Pakufufudza. Phembani Yahova kuti akupaseni “cifuno na mphambvu toera mucite pinafuna iye.” (Afil. 2:13) Buluka penepo wangisirani toera kuphatisira pidapfundza imwe. Mungaona kuti mwaphatisira pinthu pidapfundza imwe, pyenepi pinakukulumizani toera kuphatisira pinthu pinango. Pontho mungaona kuti mwakwanisa kucita macinjo mu umaso wanu peno mwakwanisa kukulisa n’khaliro Wacikristu, pinakhala pyakukhonda nentsa toera kucita macinjo anango.
SIYANI KUTI MAFALA A MULUNGU ‘APHATE BASA MUNA IMWE’
15. Atumiki a Yahova asiyana tani na anthu azinji analeri Bhibhlya? (1 Atesalonika 2:13)
15 Anthu anango asalonga kuti aleri Bhibhlya yonsene kazinji kene. Kodi iwo asakhulupira pinapfundzisa Bhibhlya? Kodi iwo asaphatisira pinapfundzisa iyo? Peno asatawirisa kuti uphungu wa Bhibhlya ucinje umaso wawo? Nkhabe. Anthu azinji nee asaphatisira uphungu wa Bhibhlya. Mbwenye atumiki a Yahova asaphatisira pinapfundzisa Bhibhlya. Ninga Akristu a mu ndzidzi wa apostolo, ife tisatawira Bhibhlya ‘ninga Mafala a Mulungu, tayu ninga mafala a anthu.’ Pontho tisacita pyonsene pinakwanisa ife toera kuphatisira uphungu wa Bhibhlya.—Lerini 1 Atesalonika 2:13.
16. Ninji pinafuna kutiphedza toera kukhala anyakucita pinalonga Mafala?
16 Midzidzi inango pisakhala pyakunentsa kuleri Mafala a Mulungu na kuaphatisira. Panango pisakhala pyakunentsa kuna ife toera kugumana ndzidzi wakuleri. Peno panango tisaleri Bhibhlya mwakucimbiza kakamwe mbatikhonda kunyerezera pinaleri ife. Panango tinatsukwala tingaona macinjo onsene anafunika ife kucita. Mwakukhonda tsalakana pinentso pyenepi pyonsene, imwe munakwanisa kupikunda na ciphedzo ca Yahova. Natenepa mbatikhaleni dzololo toera kutawira ciphedzo cace mbatikhonda kuduwala mwakucimbiza pinabva ife, mbwenye mbatikhala anyakucita pinalonga Mafala a Mulungu. Mwakukhonda penula, tingawangisira toera kuleri Mafala a Mulungu na kuaphatisira, ife tinakhala akutsandzaya.—Tiya. 1:25.
NYIMBO 94 Tisapereka Takhuta Thangwi ya Bhibhlya
a Onani mu jw.org vidhyu ya nsolo wakuti Pinalonga Aphale na Atsikana Andzanu—Kuleri Bhibhlya.
