Ndimomwene kuti anyakupfundza 70 nee akhalipo mu ndzidzi udacita Yezu Cakudya Cancidodo ca Mbuya, mbwenye pyenepi nee pisabveka kuti iwo akhadansiya peno kuti iwo nee akhali akutawirikabve kuna Yezu. Iye basi ene akhafuna kukhala na apostolo ace mu ndzidzi unoyu.

Apostolo 12 na anyakupfundza 70 akhali atowereri a Yezu. Pakutoma Yezu asankhula amuna 12 mwa anyakupfundza azinji akhali na iye, pontho aapasa dzina yakuti apostolo. (Luka 6:12-16) Pikhali iye ku Galileya, “Yezu acemera apostolo 12,” pontho “iye aatuma toera kuenda kamwaza mphangwa za Umambo wa Mulungu na kuwangisa atenda.” (Luka 9:1-6) Mukupita kwa ndzidzi, ku Yudeya, Yezu “asankhula anyakupfundza anango 70, mbaatuma awiri-awiri.” (Luka 9:51; 10:1) Natenepa, Yezu akhali na atowereri azinji m’mbuto zakusiyana-siyana akuti akhamwaza mphangwa.

Ayuda adakhala anyakupfundza a Yezu akhafunikambo kukumbuka Paskwa pa caka, pontho pisaoneka kuti iwo akhacita pyenepi pabodzi na mabanja awo. (Eks. 12:6-11, 17-20) Ndzidzi ungasi Yezu mbadzati kufa, iye na apostolo ace aenda ku Yerusalemu. Mbwenye nee acemera atowereri ace onsene, a ku Yudeya, a ku Galileya na a ku Pereya toera kucita Paskwa ikulu. Pisaonekeratu kuti Yezu basi ene akhafuna kukhala na apostolo ace mu ndzidzi unoyu. Iye aapanga: “Ndikhafuna kakamwe kudya Paskwa iyi pabodzi na imwe mbandidzati kuthabuka.”—Luka 22:15.

Yezu akhali na mathangwi adidi toera kucita pyenepi. Mwakukhonda dembuka, iye mbadafa ninga “Mwanabira wa Mulungu anabulusa madawo pa dziko!” (Juw. 1:29) Yezu mbadafa mu Yerusalemu, mbuto yakuti mu pyaka pizinji anthu akhapereka ntsembe kuna Mulungu. Paskwa ikhakumbusa Aizraeli pinthu pidacita Yahova toera kuabulusa mu ubitcu ku Ejitu. Mbwenye ntsembe ya Yezu ndi ikulu kakamwe, pontho inapulumusa anthu onsene ku madawo na kufa. (1 Akor. 5:7, 8) Thangwi ya kufa kwa Yezu, apostolo 12 mbadakhala akufunika kakamwe pakukhazikiswa kwa mpingo Wacikristu. (Aef. 2:20-22) Ndi pyakutsandzayisa kudziwa kuti nzinda wakucena wa Yerusalemu uli na “miyala 12,” pontho pa miyala ineyi palembwa “madzina 12 a apostolo 12 a Mwanabira.” (Apok. 21:10-14) Pyenepi pisapangiza kuti apostolo akukhulupirika mbadakhala na basa yakufunika kakamwe toera kukwanirisa cifuniro ca Mulungu. Natenepa, ife tinakwanisa kubvesesa kuti thangwi yanji Yezu akhafuna kukhala na apostolo ace pa Paskwa yakumalisa na Cakudya Cancidodo ca Mbuya cidacita iye.

Anyakupfundza 70 na anyakupfundza anango a Yezu nee akhali na iye pa Cakudya Cancidodo. Ngakhale tenepo, anyakupfundza onsene akuti akhali akukhulupirika mbadaphindula na Cakudya Cancidodo ceneci. Anyakupfundza onsene akuti adzakhala Akristu akudzodzwa mbadacitambo khundu ya cibverano ca umambo cidalonga Yezu kuna apostolo ntsiku ineyi namasiku.—Luka 22:29, 30.