1. Thangwi yanji tisafunika kupitiriza kukhala na uxamwali wakuwanga na Yahova?

 KODI imwe mwabatizwa ninga m’bodzi wa Mboni za Yahova? Khala ndi tenepo, muli na mwai wakufunika kakamwe​—kukhala na uxamwali na Mulungu. Mbwenye uxamwali unoyu uli pa ngozwi ya mikakamizo ya dziko ya Sathani na ya kusowa kwathu ungwiro. Akristu onsene asathimbana na mikakamizo ineyi. Natenepa, tisafunika kupitiriza kukhala na uxamwali wakuwanga na Yahova.

2. (a) Kodi uxamwali ninji? (Onani cidzindikiro capantsi.) (b) Tinawangisa tani uxamwali wathu na Yahova?

² Kodi uxamwali wanu na Yahova ndi wakuwanga? Musafuna kuwangisa uxamwali wanu na iye? Lemba ya Tyago 4:8 isakupangani kuti munakwanisa tani kucita pyenepi: ‘Fendedzerani Mulungu, tenepa Mulungu anadzakufendedzeranimbo.’ Onani kuti pyenepi pisaphataniza pinthu piwiri. a Ife tingacita pinthu toera kufendedzera cifupi Mulungu, iye anadzacitambo pinthu toera kutifendedzera cifupi.  Kucita pyenepi mwakubwereza-bwereza, mwapang’ono pang’ono pisawangisa uxamwali wathu na Yahova. Ninga maphindu, uxamwali unoyu unadzakhala wandimomwene kakamwe kwa ife. Ife tisakhala na cinyindiro ninga cikhali na Yezu mudalonga iye kuti: ‘Ule adandituma ndi wandimomwene. Ine ndisandziwa.’ (Jwau 7:28, 29) Mphapo, munacitanji toera kufendedzera cifupi Yahova?

3. Tinakwanisa tani kulonga na Yahova?

³ Kulonga na Yahova ndzidzi onsene ndi njira yakufunika kakamwe toera kunfendedzera cifupi. Munakwanisa tani kulonga na Mulungu? Kodi musalonga tani na xamwali wanu wakuti asakhala kutali na imwe? Panango imwe musalemberana matsamba peno kulonga pa ntokodzi kazinji kene. Imwe musalonga na Yahova mungacita phembero mwakukhonda phonya. (Lerini Masalmo 142:2.) Imwe musatawirisa Yahova toera alonge na imwe mungaleri Mafala ace, Bhibhlya na kunyerezera mwacidikhodikho pinaleri imwe. (Lerini Izaiya 30:20, 21.) Tendeni tione kuti njira ineyi ya makhundu mawiri yakucedza inacitisa tani uxamwali wanu na Yahova kukhala wakuwanga kakamwe.

4, 5. Kodi Yahova asalonga tani na imwe kubulukira m’Mafalace? Perekani citsandzo.

⁴ Mwakukhonda penula, imwe musatawira kuti Bhibhlya iri na mafala a Mulungu kwa anthu onsene. Mphapo, Bhibhlya inakwanisambo kukuphedzani toera kufendedzera cifupi Yahova? Inde. Pinakwanisika tani? Mungaleri Bhibhlya na kuipfundza mwakukhonda phonya, dingani mabvero anu ku pinthu pinaleri imwe, buluka penepo, nyerezerani kuti munapiphatisira tani mu umaso wanu. Mungacita pyenepi, imwe mukutawirisa Yahova toera kulonga na imwe kubulukira m’Mafalace. Pyenepi pinakucitisani kukhala na uxamwali wakuwanga na iye.​—Aheb. 4:12; Tgo. 1:23-25.

⁵ Mwacitsandzo, lerini mbamunyerezera mwacidikhodikho mafala a Yezu akuti “pantsi pano lekani kugumanya pinthu pyakupfumisa.” Mungaona kuti musaikha pinthu pya Umambo pa mbuto yakutoma mu umaso wanu, imwe munabva kuti Yahova asakomerwa na imwe. Munjira inango, mungaona kuti musafunika kululupisa umaso wanu toera kuikha pifuno pya Umambo pa mbuto yakutoma, Yahova akupangizani khundu yakuti musafunika kuisasanyira toera kunfendedzera cifupi.​—Mat. 6:19, 20.

6, 7. (a) Kodi kupfundza Bhibhlya kusakhuya tani ufuni wathu kwa Yahova na ufuni wace kwa ife? (b) Tisafunika kukhala na cifuno cipi pakucita pfundziro yathu patekha?

⁶ Kupfundza Bhibhlya kusatiphedza munjira zizinji kupiringana kuona makhundu auzimu wathu akuti tisafunika kuasasanyira. Kusatiphedzambo toera kupereka takhuta ku masasanyiro  a Yahova, na kuticitisa kunfuna kakamwe. Ufuni wathu kwa Mulungu ungakula, ufuni wace kwa ife usakulambo, pyenepi pisawangisa uxamwali wathu na iye.​—Lerini 1 Akorinto 8:3.

⁷ Mbwenye toera kufendedzera Yahova, tisafunika kupfundza Bhibhlya na cifuno cadidi. Lemba ya Jwau 17:3, Tradução do Novo Mundo, isalonga: “Umaso wakukhonda mala ndi uyu, anthu akudziweni imwe mwekha Mulungu wandimomwene, adziwembo Yezu Kristu ule adatuma imwe.” Natenepa, cifuno cathu nee cisafunika basi ene kukhala na cidziwiso, mbwenye tisafunika ‘kudziwa’ mwadidi Yahova ninga Munthu.​—Lerini Eksodo 33:13; Sal. 25:4.

8. (a) Mwakubverana na 2 Amambo 15:1-5, kodi anango anakwanisa kunyerezeranji thangwi ya njira idatsalakanira Yahova mambo Azariya? (b) Thangwi yanji kudziwa kwathu Yahova kusatiphedza toera kukhonda kupenula macitiro ace?

⁸ Tingadziwa mwadidi Yahova, nee tinadzudzumika kakamwe khala mbiri zinango za Bhibhlya nee tisazibvesesa kuti thangwi yanji Yahova acita pinthu munjira ineyi. Mwacitsandzo, musaona tani njira idatsalakanira Yahova Mambo Azariya wa ku Yuda? (2 Am. 15:1-5) Onani kuti maseze ‘anthu akhapitiriza kupereka ntsembe na makala akununkhira,’ Azariya apitiriza ‘kucita pinthu pyadidi pamaso pa Yahova.’ Ngakhale tenepo, Yahova ‘apasa mambo utenda wa matanya mpaka kufa kwace.’ Thangwi yanji? Mbiri ineyi nkhabe kupangiza pyenepi. Kodi pyenepi pisafunika kutidzudzumisa peno kunyerezera kuti Yahova atcinyusa Azariya mwakusowa mathangwi? Tingadziwa mwadidi njira za Yahova nee tinanyerezera tenepo. Pyenepi pisaphataniza kudziwa kuti Yahova ndzidzi onsene asalanga anthu ‘mwakukhonda piringana midida.’ (Yer. 30:11) Cidziwiso ceneci cisatipasa cinyindiro cakuti maseze nee tisadziwa kuti thangwi yanji Yahova acita pinthu munjira ineyi kuna Azariya, ife tinakwanisa kunyindira kuti kutonga Kwace ndi kwakulungama.

9. Ninji pinapangiza kuti Yahova akhali na mathangwi adidi toera kuthabusa Azariya na utenda wa matanya?

⁹ Mbwenye Bhibhlya iri na mphangwa zakuthimizirika thangwi ya umaso wa Mambo Azariya, wakuti akhadziwika na dzina ya Mambo Uziya. (2 Am. 15:7, 32) Mbiri inagumanika m’bukhu ya 2 Pya dziko ya Israele 26:3-5, 16-21, isapangiza kuti maseze Uziya acita pinthu pyadidi pamaso pa Yahova mu ndzidzi ungasi, mukupita kwa ndzidzi, ‘ntima wace wadzala na umbirimi peno kudzikuza mbabweresa nyatwa kwa iye.’ Mwakudzikuza, iye ayesera kucita mabasa a unyantsembe, akuti basi ene akhafunika kucitwa na anyantsembe. Anyantsembe makumasere na m’bodzi ayesera kumpanga kuti pikhafuna iye kucita pikhali pyakuipa, mbankhondesa. Kodi Uziya atawira tani? Iye apangiza kuti akhali wakudzikuza mbaipirwa na anyantsembe. Natenepa, si pyakudzumisa tayu kuti Yahova ampasa utenda wa matanya!

10. Thangwi yanji nee tisafunika kudziwa mathangwi onsene a njira zinacitira Yahova pinthu? Tinakhala tani na cinyindiro cakuwanga cakuti ndzidzi onsene Yahova asacita pinthu munjira yakulungama?

¹⁰ Ndi ntsonga ipi yakufunika kakamwe inapfundza ife? M’mbiri ya Mambo Azariya tisagumana unyomonyomo uzinji unatiphedza toera kubvesesa kuti thangwi yanji Yahova antcinyusa. Mphapo ndiye tani m’mbiri zakuti Bhibhlya nkhabe kupereka mphangwa zizinji? Munapenula khala mwandimomwene Yahova acita pinthu mwakulungama? Peno mbamudanyerezera kuti Bhibhlya iri na mphangwa zizinji zinatipasa cinyindiro cakuti ndzidzi onsene Yahova asacita pinthu munjira yakulungama? (Deut. 32:4) Tingadziwa mwadidi Yahova, ufuni wathu kwa iye usathimizirika, natenepa nee tinadzafuna kudziwa mathangwi onsene a njira zinacitira iye pinthu. Khalani na cinyindiro cakuti kubvesesa kweneku kunadzathimizirika mwakubverana na kuwangisira kwanu toera kupfundza na kunyerezera mwacidikhodikho pire pinaleri imwe m’Mafalace. (Sal. 77:12, 13) Kucita pyenepi  kunadzawangisa uxamwali wanu na Yahova, na kundziwa mwadidi.

11-13. Musadziwa tani kuti Yahova asabvesera maphembero? (Onani cithundzithundzi cakutoma.)

¹¹ Kubulukira mu phembero, ife tisafendedzera cifupi Yahova, tisansimba, tisapereka takhuta kuna iye, na kusaka citsogolero cace. (Sal. 32:8) Mbwenye toera uxamwali wanu na Yahova ukhale wakuwanga, musafunika kunyindira kuti iye asabvesera maphembero.

¹² Anthu anango asanyerezera kuti phembero isacitwa basi ene toera kuphedza munthu kuti akhale na manyerezero adidi. Iwo asanyerezera kuti khala musaona kuti phembero yatawirwa, ndi thangwi yakuti basi ene imwe mwanyerezera pya nyatwa zanu mbamusaka njira yanu ene toera kuzimalisa. Kusiyapo maphindu anewa, musadziwa tani kuti mwandimomwene Yahova asabvesera maphembero anu?

¹³ Dingani ipi: Mbadzati kubwera pa dziko yapantsi, Yezu aona Yahova mbakatawira maphembero a atumiki Ace a pa dziko yapantsi. Buluka penepo, mu utumiki wace pa dziko yapantsi, Yezu aphatisira phembero toera kulonga pya mabvero ace kuna Babace wakudzulu. Pa ndzidzi unango, Yezu aphuphudza na kucita phembero. (Luka 6:12; 22:40-46) Kodi iye mbadacita pyenepi khala akhanyerezera kuti mwandimomwene Yahova nee asabvesera maphembero? Mbidakhala iye akhanyerezera kuti phembero ndi toera kuphedza munthu kukhala na manyerezero adidi basi, mbadapfundzisa atowereri ace toera kucita phembero? Mwandimomwene, Yezu akhadziwa kuti Yahova asabvesera maphembero. Pa ndzidzi unango, Yezu alonga: ‘Baba, ndinakucitani takhuta thangwi mwandibvera. Ine ndisadziwa kuti musandibvesera ntsiku zonsene.’ Ife tinakwanisambo kukhala na cinyindiro cakuti Yahova ‘asabvesera maphembero.’​—Jwau 11:41, 42; Sal. 65:2.

14, 15. (a) Tisaphindula tani tingacita phembero mbatilonga pinthu pinatidzudzumisa? (b) Kodi maphembero a mulongo Kathy amphedza tani toera kuwangisa uxamwali wace na Yahova?

¹⁴ M’maphembero anu, mungalonga pinthu pinakudzudzumisani, imwe musaona kuti Yahova asatawira maphembero anu, ngakhale matawiro anewa nee asaoneka pakweca. Kutawirwa kwa maphembero anu, kunacitisa Yahova kukhala wandimomwene kwa imwe. Pontho, mungacita phembero kazinji kene mbamulonga  kuna Yahova pinthu pinakudzudzumisani, iye anadzakufendedzerani cifupi.

¹⁵ Dingani citsandzo ca Kathy. b Maseze iye akhaenda mu utumiki mwakukhonda phonya, iye nee akhakomerwa na basa ineyi. Iye alonga: “Ine nee ndikhafuna kuenda mu utumiki. Ndisafuna kulonga kuti, mwandimomwene nee ndikhakomerwa na basa ineyi. Mu ndzidzi udasiya ine kuphata basa ya kudziko toera kutambira phanceni, nkulu wa mpingo m’bodzi alonga kuti akhadikhira kuti mbidatumikira ninga mpainiya wa ndzidzi onsene; iye akhadandipasa formularyo ya upainiya. Ndatonga kukhala mpainiya, mbwenye ndatomambo kucita phembero kuna Yahova ntsiku zonsene toera andipase cifuno cakukomerwa na utumiki.” Kodi Yahova atawira maphembero ace? Mulongo alonga: “Cino ndi caka cacitatu cakuti ndikutumikira ninga mpainiya. Nakuti ndisaphatisira ndzidzi uzinji mu utumiki na kupfundza kubulukira kwa alongo anango, mwapang’ono pang’ono ndisathimizira maluso anga akupereka umboni. Lero, nee ndisakomerwa na utumiki, mbwenye ndisaufuna. Cakufunika kakamwe ndi cakuti uxamwali wanga na Yahova ndi wakuwanga kakamwe kupiringana kalene.” Mwandimomwene, maphembero a Kathy amphedza toera kukhala na uxamwali wakuwanga na Yahova.

16, 17. (a) Tisafunika kucitanji toera uxamwali wathu na Yahova upitirize kukula na kukhala wakuwanga? (b) Ninji pinafuna ife kudzadinga mu nsolo unatowerera?

¹⁶ Kukulisa uxamwali wakuwanga na Yahova ndi cinthu cakuti tisafunika kucicita mu umaso wathu onsene. Tisafunika kufendedzera cifupi Mulungu khala tisafuna kuti iye atifendedzere. Mwa pyonsene, tendeni tipitirize kulonga na Mulungu ndzidzi onsene kubulukira mu kupfundza Bhibhlya na kucita phembero. Ninga maphindu, uxamwali wakuwanga na Yahova unadzatiphedza toera kuthimbana na nyatwa mbatipembera.

¹⁷ Mbwenye cinentso cakupambulika cinaoneka khala nyatwa zathu zisapitiriza mwakukhonda tsalakana maphembero anacita ife. M’midzidzi ineyi, cinyindiro cathu kuna Yahova cinapunguka. Panango tinatoma kupenula khala Yahova asabveseradi maphembero athu, peno khala iye asaonadi kuti ali na uxamwali na ife. Tinakwanisa tani kuthimbana na makhaliro anewa na cinyindiro cakuti uxamwali wathu na Mulungu ndi wandimomwene? Nsolo unatowerera unadzadinga ntsonga ineyi.