1-3. Thangwi yanji Paulu akhadziwa kuti mbadakwanisa kunyindira Yahova? (Onani cithundzithundzi cakutoma.)

 UKHALI ndzidzi wakunentsa kakamwe kukhala Nkristu mu dziko ya Roma. Akristu akhapambizirwa kuti apisa nzinda mu caka 64 N.W. pontho akhazondwa thangwi akhapambizirwa kuti akhaida anthu. Mbamudakhala Nkristu mu ndzidzi unoyu, panango ntsiku zonsene mbamudathimbana na nyatwa yakumangwa na kuthabuswa. Panango abale na alongo anu anango mbadadyiwa na pinyama peno kukhomerwa pamuti mbapiswa toera kukhala ninga nyale camasiku.

² Panango mu ndzidzi unoyu wakunentsa kakamwe, mpostolo Paulu akhali nkaidi ku Roma paulendo waciwiri. Kodi Akristu anango mbadaenda kamphedza? Panango Paulu adzudzumika na pyenepi, thangwi iye alembera Timoti: ‘Pa miseru yanga mudalonga ine pyanga pakutoma, nee munthu m’bodzi andibvunulira. Onsene andisiya. Mulungu aleke kuabwerezera pyenepi.’ Ngakhale tenepo, Paulu akhadziwa kuti nee mbadasowa ciphedzo munjira zonsene. Iye alemba: ‘Mbwenye Mbuya akakhala na ine, mbandiwangisa.’ Inde, Yezu apasa Paulu mphambvu ikhafuna iye. Kodi ciphedzo ceneci  camphedza tani? Onani mafala adalemba Paulu: ‘Ndapulumuswa nkanwa mwa nkhalamu.’​—2 Tim. 4:16, 17. a

³ Kukumbuka pyenepi kwawangisa Paulu na kwancitisa kunyindira kuti Yahova mbadamphedza toera kupirira nyatwa zikhathimbana na iye na zinango zakuti mbazidaoneka ntsogolo. Mwandimomwene, iye alemba: “Mbuya anadzandipulumusa mu pinthu pyakuipa pyonsene.” (2 Tim. 4:18) Inde, Paulu apfundza kuti anthu angacimwana kupereka ciphedzo, ndzidzi onsene mbadakwanisa kunyindira ciphedzo ca Yahova na ca Yezu!

4, 5. (a) Mbani wakuti ndzidzi onsene anakwanisa kukuphedzani? (b) Munakwanisa tani kuwangisa uxamwali wanu na Yahova?

⁴ Kodi mwathimbana kale na nyatwa mbamusowa munthu wa kukuphedzani? Panango nyatwa yakusowa basa, mikakamizo yakuxikola, utenda peno makhaliro anango akunentsa. Panango mwaphemba ciphedzo, mbwenye mwatsukwala thangwi nkhabe adapereka ciphedzo cikhafuna imwe. Ndimomwene kuti nyatwa zinango nee zinakwanisa kumaliswa na anthu. M’midzidzi ineyi munacitanji? Bhibhlya isalonga: ‘Nyindira Yahova.’ (Mis. 3:5, 6) Munakwanisadi kunyindira kuti iye anakuphedzani? Inde! Bhibhlya iri na pitsandzo pizinji pinapangiza kuti Yahova asaphedza atumiki ace.

⁵ Natenepa, anthu angacimwana kukuphedzani, mbuto mwakuipirwa, onani pyenepi ninga mwai toera kunyindira Yahova na ntima onsene ninga pidacita Paulu, mbamuona citsalakano cace caufuni. Pyenepi pinawangisa cinyindiro canu kuna Mulungu na kukuphedzani kukhala na uxamwali wakuwanga kakamwe na iye.

6. Thangwi yanji pisanentsa kunyindira Yahova makamaka tingathimbana na nyatwa zakunentsa?

⁶ Panango musathimbana na nyatwa yakuti isakutsukwalisani. Mwacita pyonsene pinakwanisa imwe thangwi ya nyatwa ineyi, mbamucita phembero toera kuphemba ciphedzo ca Yahova. Munakwanisa kukhurudzika thangwi yakunyindira kuti iye anadzakuphedzani? Inde! (Lerini Masalmo 62:8; 1 Pedro 5:7.) Kupfundza kunyindira Yahova ndi kwakufunika toera kukhala na uxamwali wakuwanga na iye. Mbwenye midzidzi inango pisanentsa kunyindira kuti Yahova anadzakupasani pinafuna imwe. Thangwi yanji? Thangwi ibodzi ndi yakuti midzidzi inango Yahova nee asatawira maphembero mwakucimbiza.​—Sal. 13:1, 2; 74:10; 89:46; 90:13; Hab. 1:2.

7. Thangwi yanji midzidzi inango Yahova nee asatawira mwakucimbiza maphembero athu?

⁷ Thangwi yanji midzidzi inango Yahova nee asatawira mwakucimbiza maphembero athu? Kumbukani kuti Iye asalandanisa uxamwali wathu na iye ninga wa baba na anace. (Sal. 103:13) Mwana nee asadikhira kuti anyakubala ace anampasa pyonsene pinaphemba iye peno kumpasa mwakucimbiza. Midzidzi inango mwana asaphemba cinthu cakuti mwandimomwene nee ndi cakufunika kakamwe kwa iye. Pinthu pinango asafunika kupidikhira mpaka pa ndzidzi wakuthema. Pinango nee ndi pyakuthema kuna mwana peno kwa anango. Kusiyapo pyenepi, baba angapasa mwakucimbiza pyonsene pinaphemba mwanace, baba anakhala ninga ntumiki wa mwanace. Munjira ibodzi ene, Yahova ali na mathangwi adidi toera kutawirisa kuti upite ndzidzi ungasi mbatidzati kuona pakweca ntawiro wa maphembero athu. Ninga Nciti, Mbuya waufuni, na Babathu wakudzulu, iye asadziwa pinafuna ife na ndzidzi wakuthema toera kutipasa pinaphemba ife. Kutawira mwakucimbiza maphembero athu onsene mbapidacitisa Yahova kukhala ninga ntumiki wathu.​—Landanisani na Izaiya 29:16; 45:9.

8. Kodi Yahova asapikiranji mwakubverana na pinakwanisa ife kupirira?

⁸ Thangwi inango ndi yakuti Yahova asadziwa mwadidi kucimwana kwathu. (Sal. 103:14) Natenepa, iye nee asadikhira kuti tipirire basi  ene mukuphatisira mphambvu zathu, mbwenye asatiphedza. Ndimomwene kuti midzidzi inango tinaona kuti nee tinakwanisabve kupirira. Mbwenye Yahova asatipasa cinyindiro cakuti cipo anadzatawirisa kuti atumiki ace aone nyatwa zakuti anacimwana kuzipirira. Inde, iye ‘anakupasani ndzeru toera kuzikunda.’ (Lerini 1 Akorinto 10:13.) Natenepa, tiri na mathangwi adidi toera kunyindira kuti pinatawirisa Yahova toera kupirira mphyakulinganira kwa ife.

9. Tinacitanji khala tacita phembero mbatikhonda kutambira ciphedzo mwakucimbiza?

⁹ Tingacita phembero mbatikhonda kutambira ciphedzo mwakucimbiza tisafunika kudikhira kwa Yahova, wakuti asadziwa ndzidzi wakuthema toera kutiphedza. Kumbukani kuti iye asafuna kakamwe kutiphedza, mbwenye asadikhira mwakupirira ndzidzi wakuthema toera kutipulumusa. Bhibhlya isalonga: “Yahova asadikhira mwakupirira toera kukuonesani ntsisi zace mu ulinganiri wace. Yahova ndi Mulungu wacilungamo. Anyakutsandzaya ndi ale onsene anapitiriza kun’dikhira.”​—Iza. 30:18, Tradução do Novo Mundo.

10-12. (a) Ninji cinafuna kucitisa kukhala kwakunentsa kutsalakana acibale anathimbana na utenda wakukhonda kuwanga? (b) Kodi kunyindira Yahova m’midzidzi ya nyatwa kunakhuya tani uxamwali wathu na iye? Perekani citsandzo.

¹⁰ Mungathimbana na nyatwa yakunentsa kakamwe, panango munabva ninga mudabvera Paulu​—kuti muli ‘nkanwa mwa nkhalamu’ peno cifupi na pa mulomo wace. M’midzidzi ineyi, kunyindira Yahova kusanentsa kakamwe​—mbwenye ndi kwakufunika kakamwe. Mwacitsandzo, nyerezerani kuti mukutsalakana m’bale wanu wakufunika wakuti akuthimbana na utenda wakukhonda kuwanga. Panango imwe mwacita phembero toera kukhala na udziwisi na mphambvu. b Pakumala kucita pyonsene pinakwanisa imwe mu nkhani ineyi, munakwanisa kukhala na ntendere mu kudziwa kuti maso a Yahova asaona pyonsene pinatamba imwe. Iye anadzakupasani pinafuna imwe toera kupirira mwakukhulupirika.—Sal. 32:8.

¹¹ Panango munaona ninga Yahova nee akukuphedzani. Panango munapaswa maonero akuphonyeka na adotoro. Peno acibale akhanyindira imwe kuti anakubalangazani, panango munaona kuti akutekeresa nyatwa yanu. Pitirizani kunyindira mphambvu ya Yahova. Pitirizani kunfendedzera cifupi. (Lerini 1 Samwele 30:3, 6.) Mukupita kwa ndzidzi mungaona kuti Yahova asakuphedzani, uxamwali wanu na iye unadzakhala wakuwanga.

¹² Linda c adzindikira pyenepi mudapita pyaka pingasi mbakatsalakana anyakubalace akuti akhaduwala mu pyaka pyakumalisa pya umaso wawo. Iye alonga: “M’midzidzi ineyi, ine, mamunanga na m’bale wanga, kazinji kene nee tikhadziwa pikhafunika ife kucita. M’midzidzi inango tikhabva ninga akusowa ciphedzo. Mbwenye tingakumbuka, tisaona pakweca kuti Yahova akhali na ife. Iye atiwangisa na atipasa pikhafuna ife, ngakhale m’midzidzi ikhaona ife ninga nee tikhali na cakucita.”

13. Kodi kunyindira Yahova kwaphedza tani mulongo Rhonda toera kuthimbana na nyatwa zizinji?

¹³ Cinyindiro cakuwanga kwa Yahova cinatiphedzambo tingagwerwa na cidengwa. Mulongo Rhonda athimbana na pyenepi. Mamunace wakuti nee ndi Mboni ya Yahova akhacita masasanyiro toera kumwalana, mu ndzidzi unoyu m’bale wace Rhonda aphatwa na utenda wakugopswa unacemerwa lúpus. Mudapita  nthanda zingasi nkazi wa m’bale wace afa. Pakumala kwa nyatwa zenezi zakutsukwalisa kakamwe, mudaona iye kuti akhali mbwenye pang’ono, Rhonda atoma kutumikira ninga mpainiya wa ndzidzi onsene. Mwakukhonda dembuka, mai wace amwalira. Ninji pidaphedza Rhonda toera kuthimbana na nyatwa zenezi? Iye afokotoza: “Ndikhalonga na Yahova ntsiku zonsene, ngakhale pakufuna kucita cisankhulo cing’ono. Kucita pyenepi, pyandiphedza toera kuona kuti Yahova ndi wandimomwene kwa ine. Pyenepi pyandipfundzisa toera kunyindira iye mbuto mwakunyindirika peno kunyindira anthu anango. Ciphedzo cidandipasa iye cikhali cakuthema toera kutsalakana pyonsene pikhafuna ine. Ninga maphindu, ndakhala na mwai wakuphata basa mwakuphatana na Yahova.”

14. Kodi Nkristu anakwanisa kukhala na cinyindiro canji khala wacibale wace abuluswa m’mpingo?

¹⁴ Onani citsandzo cinango. Nyerezerani kuti wacibale wanu abuluswa m’mpingo. Imwe musadziwa pinalonga Bhibhlya kuti tisafunika kutsalakana tani anthu adabuluswa m’mpingo. (1 Akor. 5:11; 2 Jwau 10) Mbwenye m’midzidzi inango kubvera peno kuphedzera pitsogolero pyenepi kusanentsa kakamwe peno kuona ninga nkhabe kwanisika. d Munakwanisa kunyindira kuti Babanu wakudzulu anakwanisa kukupasani mphambvu inafuna imwe toera kutonga kubvera na ntima onsene citsogolero ca Bhibhlya cinalonga pya anthu akubuluswa m’mpingo? Munakwanisa kuona pyenepi ninga mwai toera kuwangisa uxamwali wanu na Yahova na kunfendedzera cifupi?

15. Thangwi yanji Adhamu nee abvera ntemo wa Yahova mu Edeni?

¹⁵ M’makhaliro anewa, nyerezerani pya mamuna wakutoma, Adhamu. Kodi iye anyerezera kuti mbadakhonda kubvera Yahova, mbadapitiriza kukhala maso? Nkhabe, thangwi Bhibhlya  isalonga kuti Adhamu ‘nee anyengezwa.’ (1 Tim. 2:14) Mphapo, thangwi yanji iye akhonda kubvera Yahova? Adhamu adya nsapo udapaswa iye na Eva thangwi yakufuna kakamwe nkazace kupiringana kufuna kwace Yahova. Natenepa, mbuto mwakubvera ntemo wa Yahova, iye abvera fala ya nkazace.​—Gen. 3:6, 17.

16. Mbani asafunika ife kufuna kakamwe, thangwi yanji?

¹⁶ Kodi pyenepi pisabveka kuti nee tisafunika kupangiza ufuni wakuwanga kuna acibale athu? Nkhabe! Mbwenye ufuni wathu ukulu kakamwe tisafunika kuupangiza kuna Yahova. (Lerini Mateo 22:37, 38.) Pyenepi mphyakufunika kakamwe kuna acibale athu, mwakukhonda tsalakana khala asapitiriza kutumikira Yahova peno nkhabe. Natenepa, pitirizani kuwangisa ufuni wanu na cinyindiro canu kwa Yahova. Mbwenye khala musanentseka thangwi yakubuluswa kwa wacibale wanu, citani phembero mbamufungula ntima wanu kuna Yahova. e (Arom. 12:12; Afil. 4:6, 7) Phatisirani makhaliro anewa akunentsa toera kuwangisa kakamwe uxamwali wanu na Yahova. Pyenepi pinakuphedzani toera kunyindira kuti Yahova anakupasani maphindu adidi kakamwe.

17. Tingapitiriza kucita pizinji m’basa yakumwaza mphangwa, tisapangiza tani kuti tisanyindira Yahova?

¹⁷ Thangwi yanji Paulu apulumuswa ‘nkanwa mwa nkhalamu’? Iye alonga: ‘Toera ndimalisire mapfundzisiro anga, toera anthu onsene apibve.’ (2 Tim. 4:17) Ninga Paulu, tingacita pizinji m’basa yakumwaza mphangwa, tisanyindira kuti Yahova anadzacita pyonsene toera ‘kuthimizira’ pinthu pyonsene pinafuna ife. (Mat. 6:33) Ninga amwazi mphangwa za Umambo, ife tanyindirwa basa ‘yakumwaza mphangwa zadidi,’ pontho, Yahova asationa ninga ‘anyakuphedza ace.’ (1 Ates. 2:4; 1 Akor. 3:9) Tingakhala aphinga kakamwe m’basa ya Mulungu, pinakhala pyakukhonda nentsa kakamwe kudikhira ciphedzo ca Yahova.

18. Ndi munjira zipi zakuti tinakwanisa kukulisa cinyindiro cathu kuna Yahova na kuwangisa uxamwali wathu na iye?

¹⁸ Natenepa, tendeni tiphatisire ndzidzi wathu lero toera kuwangisa uxamwali wathu na Yahova. Mungathimbana na nyatwa, phatisirani makhaliro anewa toera kufendedzera cifupi Yahova. Inde, tipitirizeni kuleri, kupfundza, na kunyerezera mwacidikhodikho Mafala a Mulungu. Tipitirizeni kucita phembero na kucita pizinji m’mabasa auzimu, mbatinyindira kuti Yahova anatiphedza mu nyatwa zathu lero kuphatanizambo m’makhaliro onsene anafuna kuthimbana na ife ntsogolo.