Pfundzisani Mwananu Wang’ono Toera Kutumikira Yahova
‘Siyani kuti anju wa Mulungu wandimomwene atipfundzise pinafunika ife kucita na mwana anafuna kubalwa.’—ATON. 13:8.
NYIMBO: 41, 6
1. Kodi Manowa acitanji pidabva iye kuti mbadakhala baba?
MANOWA na nkazace akhadziwa kuti cipo mbadakhala na mwana. Mbwenye ntsiku inango, anju wa Yahova apanga nkazi wa Manowa kuti mbadakhala na mwana. Nkazi apanga mamunace mphangwa zenezi, Manowa akomerwa kakamwe. Mbwenye iye na nkazace anyerezera kuti mbadakuza tani mwana unoyu toera kutumikira Mulungu, thangwi mu Israele anthu azinji akhacita pinthu pyakuipa kakamwe. Natenepa, Manowa adembetera Yahova toera kutumiza pontho anju wace, iye alonga: ‘Siyani kuti anju wa Mulungu wandimomwene adatuma imwe, abwere pontho toera atipfundzise pinafunika ife kucita na mwana anafuna kubalwa.’—Aton. 13:1-8.
2. Kodi kupfundzisa ananu kusaphatanizanji? (Onani bokosi, “ Anyakupfundza Anu a Bhibhlya Akufunika Kakamwe.”)
2 Khala ndimwe nyakubala, panango muli na mabvero mabodzi ene ninga a Manowa. Imwembo muli na basa yakuphedza ananu toera kudziwa na kufuna Yahova. (Mis. 1:8) Toera kucita pyenepi, anyakubala Acikristu asacita masasanyiro a Kulambira kwa Banja kwakuphindulisa. Toera kuphedza ananu musafunika kucita pizinji kupiringana kupfundza Bhibhlya na iwo masumana onsene. (Lerini Deuteronomyo 6:6-9.) Mphapo ninji cinafuna kukuphedzani toera kupfundzisa ananu undimomwene wa Yahova? Nsolo uno na unatowera unadzadinga kuti anyakubala anatowezera tani citsandzo ca Yezu. Maseze iye nee akhali na ana, Yezu ndi citsandzo cadidi kwa anyakubala, thangwi iye aphatisira ufuni, kucepeseka na luso yakudzindikira toera kupfundzisa anyakupfundzace. Tendeni tidinge makhaliro anewa.
FUNANI ANANU
3. Kodi Yezu apangiza tani kuti akhafuna anyakupfundzace?
3 Yezu akhapanga anyakupfundzace kuti akhaafuna. (Lerini Jwau 15:9.) Iye apangizambo ufuni wace mukucedza na iwo kazinji kene. (Marko 6:31, 32; Jwau 2:2; 21:12, 13) Yezu nee akhali mpfundzisi wa anyakupfundzace basi, mbwenye akhalimbo xamwali wawo. Natenepa, anyakupfundzace nee akhapenula kuti iye akhaafuna. Munatowezera tani njira yakupfundzisa ya Yezu?
4. Munapangiza tani ananu kuti musaafuna? (Onani cithundzithundzi cakutoma.)
4 Pangani ananu kuti musaafuna, pontho ndzidzi onsene apangizeni kuti ndi akufunika kakamwe kwa imwe. (Mis. 4:3; Tito 2:4) Samuel wa ku Australya alonga: “Pikhali ine mwana, Baba akhandileriri Bukhu Yanga Ya Mbiri za Bibilya ntsiku zonsene camasiku. Iye akhatawira mibvundzo yanga, akhandikhumbatira na kundimpswompswona mbandidzati gona. Mukupita kwa ndzidzi ndadzumatirwa kakamwe pidadzindikira ine kuti Baba akuzwa m’banja yakuti kukhumbatirwa na kumpswompswonwa nee pikhacitwa kazinji kene! Mbwenye awangisira kakamwe toera kupangiza ufuni wace kwa ine. Pyenepi pyandiphedza toera kukulisa uxamwali wakuwanga kakamwe na iye, pontho ndikhali wakutsandzaya na wakutsidzikizika.” Phedzani mwananu toera akhalembo na mabvero anewa, mu kumpanga kazinji kene kuti: “Ndisakufuna.” Pangizani ufuni wanu kwa iwo. Cedzani nawo, dyani na iwo, mbamusendzeka nawo.
5, 6. (a) Maseze Yezu akhafuna anyakupfundzace, kodi iye acitanji kuna iwo? (b) Fokotozani kuti thangwi yanji kulanga mwakuthema kusaphedza ana toera kukhala na mabvero akutsidzikizika na akufuniwa.
5 Yezu alonga: ‘Ale anafuna ine, ndinaalanga mbandiasandika.’ * (Apok. 3:19) Maseze anyakupfundza a Yezu akhaketesana mwakubwereza-bwereza kuti mbani akhali nkulu pakati pawo, Yezu nee asiya kuaphedza. Pontho iye nee abwerera nduli pidacimwana iwo kubvera uphungu wace. Mwaufuni na mwakupfulika, Yezu aasandika pa ndzidzi wadidi na pa mbuto yakuthema.—Marko 9:33-37.
6 Pangizani kuti musafuna ananu mu kuasandika. Midzidzi inango mphyadidi basi ene kufokotoza kuti thangwi yanji njira zinango ndi zakuipa zinango ndi zadidi. Mbwenye midzidzi inango, panango ana nee anabvera pinalonga imwe. (Mis. 22:15) Pyenepi pingacitika, towezerani citsandzo ca Yezu. Sankhulani ndzidzi na mbuto yakuthema toera kualanga mwaufuni. Pontho mwakupirira apfundziseni na kuapasa pitsogolero. Mulongo Elaine wa ku Afrika Wakubangwe alonga: “Anyakubalanga akhapitiriza kundilanga. Pikhandicenjeza iwo kuti ndingakhonda kubvera anandisandika, ndzidzi onsene iwo akhacita pyenepi. Mbwenye iwo cipo andilanga mwaukali peno kukhonda kufokotoza mathangwi a kundilanga kwawo. Pyenepi pikhandiphedza toera kukhala wakutsidzikizika. Ndikhadziwa mwadidi madire akakhazikisa iwo kwa ine, pontho ninji pikhafunika ine kucita.”
PANGIZANI KUCEPESEKA
7, 8. (a) Yezu apangiza tani kucepeseka mu maphembero ace? (b) Kodi maphembero anu anapfundzisa tani ananu toera kunyindira Mulungu?
7 Ibodzi mwa maphembero ace akumalisa pa dziko yapantsi, Yezu alonga: ‘Abba, Baba, pyonsene mphyakukwanisika kwa imwe; bulusani kalise iyi pana ine; lekani kucita pinafuna ine, mbwenye citani pinafuna imwe.’ * (Marko 14:36) Nyerezerani kuti anyakupfundza a Yezu apibva tani pidabva iwo, peno pidadziwa iwo kuti Yezu alonga mafala anewa! Kubulukira m’mafala akudembetera a Yezu, atowereri ace apfundza kuti maseze Yezu akhali Mwana waungwiro wa Mulungu, mwakucepeseka iye aphemba ciphedzo ca Mulungu. Natenepa, iwo akhafunikambo kucita pibodzi pyene.
8 Kodi ananu asapfundzanji kubulukira mu maphembero anu? Ndimomwene kuti imwe nee musaphembera kuna Yahova basi ene toera kupfundzisa ananu. Mbwenye mungacita phembero mwakucepeseka pamaso pa ananu, iwo anapfundza kunyindira Yahova. Ana wa ku Brazil alonga: “Pikhathimbana ife na nyatwa, ninga kuduwala kwa ayavu anga, anyakubalanga akhaphemba Yahova kuti aapase mphambvu toera kuthimbana na makhaliro anewa na udziwisi toera kucita pisankhulo pyadidi. Maseze athimbane na nyatwa ikulu, iwo akhasiya nyatwa ineyi m’manja mwa Yahova. Pyenepi pyandipfundzisa toera kunyindira Yahova.” Mungacita phembero pabodzi na ananu, lekani kuphemba Yahova toera aphedze ananu basi. Phembani Yahova toera akuphedzenimbo—panango kuti akuphedzeni toera kulonga na patrau wanu kuti akupaseni ndzidzi toera kugumanika pa nsonkhano wa gawo, kukupasani cipapo cakupereka umboni kuna anyakuendekana anu peno akuphedzeni munjira zinango. Mwakucepeseka nyindirani Mulungu, natenepa ananu anapfundzambo kucita pibodzi pyene.
9. (a) Kodi Yezu apfundzisa tani anyakupfundzace toera kutumikira anango mwakucepeseka? (b) Mungatumikira anango na ntima onsene, kodi ananu anapfundzanji?
9 Kubulukira m’mafalace na macitiro ace Yezu apfundzisa anyakupfundzace toera kutumikira anango mwakucepeseka. (Lerini Luka 22:27.) Iye apfundzisa apostolo ace toera kukhala akudzimana m’basa ya Yahova na pakutsalakana Akristu andzawo. Mungapangiza makhaliro akucepeseka toera kuphedza anango, munakwanisa kupfundzisa ananu toera kucitambo pibodzi pyene. Debbie mama wa ana awiri alonga: “Ine cipo ndisaipirwa thangwi ya ndzidzi unaphatisira mamunanga toera kucedza na anango ninga nkulu wa mpingo. Ndisadziwa kuti banja yathu ingafuna ciphedzo cace, iye ali dzololo toera kutiphedza.” (1 Tim. 3:4, 5) Mamunace, anacemerwa Pranas athimiza: “Mukupita kwa ndzidzi, anathu akhafuna kakamwe kucita khundu m’mabasa pa misonkhano yacisa na mabasa anango Acikristu. Iwo athambaruka kakamwe, acita uxamwali, pontho akhafuna kakamwe kukhala pabodzi na abale na alongo! Lero banja yonsene isatumikira Yahova m’basa ya ndzidzi onsene. Mungakhala akucepeseka na akudzimana, ananu anakwanisa kupfundza kutumikira anango na ntima onsene.
PANGIZANI LUSO YAKUDZINDIKIRA
10. Pidabwera mwinji wa anthu toera kuona Yezu, kodi iye apangiza tani luso yakudzindikira?
10 Yezu apangiza luso yakubvesesa mu kudzindikira tayu basi ene pikhacita anthu, mbwenye thangwi yanji akhacita pyenepi. Ntsiku inango, anyakubvesera ace anango ku Galileya aenda kuna iye mbafuna kuntowerera. (Jwau 6:22-24) Mbwenye Yezu akhakwanisa kuona manyerezero awo mbadzindikira kuti anthu anewa akhafuna kakamwe cakudya cakumanungo, mbuto mwa pidapfundzisa iye. (Jwau 2:25) Iye aona manyerezero awo akuphonyeka, aapasa uphungu mwakukhurudzika, mbaapangiza kuti anacinja tani manyerezero awo.—Lerini Jwau 6:25-27.
Kodi ananu asaona basa yakumwaza mphangwa kukhala yakutsandzayisa na yakuphindulisa? (Onani ndima 11)
11. (a) Perekani citsandzo cinapangiza kuti luso yakudzindikira inakuphedzani tani toera kudziwa khala ananu asakomerwa na utumiki. (b) Munacitisa tani utumiki kukhala wakutsandzayisa na wakuphindulisa kwa ananu?
11 Maseze nee musakwanisa kudziwa piri muntima, imwe munakwanisambo kupangiza luso yakudzindikira mu kupfundza mabvero a ananu thangwi ya basa yakumwaza mphangwa. M’mbuto zinango, anyakubala angamwaza mphangwa na anawo, asapuma pang’ono mbagula pinthu toera kudya, pyenepi pisaphedza anawo toera akhale na mphambvu zipswa. Khala musacita pyenepi, bvundzikani: ‘Kodi mwananga asakomerwa na utumiki peno asakomerwa na ndzidzi wakupuma toera kudya?’ Mungadzindikira kuti ananu nee asakomerwa kakamwe na utumiki, khazikisani pifuno pyauzimu kuna iwo. Phatisirani njira zinango toera kuphedza ananu kuti acite khundu mwakukwana angamwaza mphangwa na imwe.
12. (a) Kodi Yezu apangiza tani luso yakudzindikira pidacenjeza iye anyakupfundzace thangwi ya ulukwali? (b) Thangwi yanji cenjezo ya Yezu ikhali yakufunika kwa anyakupfundzace?
12 Yezu apangizambo luso mu kudzindikira makhaliro anatsogolera ku madawo. Mwacitsandzo, atowereri ace akhadziwa kuti ulukwali ndi wakuipa. Mbwenye Yezu aacenjeza thangwi ya makhaliro anatsogolera ku ulukwali pidalonga iye kuti: ‘Munthu onsene anayang’anisa nkazi mbansirira, acita naye kale upombo muntima mwace. Diso yako ya nkono wa madyo ingafuna kukucitisa madawo, uikolole mbuitaya kutali.’ (Mat. 5:27-29) Mafala anewa alongwa pa ndzidzi wakuthema kwa Akristu akuti akhali pantsi pa utongi Waciroma. Thangwi ya matsendzo Aciroma, nyambiri unango alemba: “Maso akhaona na makutu akhabva pinthu pyakuipa. Pinthu pyakuzuda kakamwe, ndipyo pikhamenyerwa manja kakamwe.” Natenepa, Yezu apangiza ufuni kakamwe mu kucenjeza anyakupfundzace toera kucalira kuona pinthu pyonsene pyakuti mbapidaapingiza toera kukhala anthu a makhaliro akucena!
13, 14. Munatsidzikiza tani ananu toera kucalira ubalangazi wakuipa?
13 Luso yakudzindikira inakuphedzani toera kutsidzikiza ananu ku ngozwi yauzimu. Mwakutsukwalisa, lero anang’ono ali pa ngozwi yakuona ucipezipezi na pinthu pinango pinapangiza ulukwali. Mwandimomwene, anyakubala Acikristu asapanga anawo kuti ubalangazi wakukhonda cena ndi wakuipa. Mbwenye luso yakudzindikira inakuphedzani toera kudziwa makhaliro anafuna kucitisa mwananu kufuna kuona ucipezipezi. Natenepa, bvundzikani: ‘Ninji cinafuna kuyesera mwananga toera kuona ucipezipezi? Kodi iye asadziwa kuti thangwi yanji ndi wakugopswa kakamwe? Ndine wakudzolowereka, kodi iye anadzabwera kuna ine mu kusaka ciphedzo angayeserwa toera kuona ucipezipezi?’ Mwakukhonda tsalakana khala mwananu ndi wang’ono, munakwanisa kumpanga: “Ungapita mu Interneti mbuona cipangizo ca pinthu pyakuipa mwakukhonda dikhira, ungayeserwa toera kupiona, ndaphata miyendo bwera udzalonge na ine. Leka kukhala na manyadzo. Ine ndisafuna kukuphedza.”
14 Luso yakudzindikira inakuphedzanimbo toera kusankhula ubalangazi mwandzeru. Pranas adalongwa pakutoma, athimiza: “Pinthu pinatawirisa ife anyakubala ninga nyimbo, mabukhu peno masendzekero pisakhuya banja. Imwe munakwanisa kulonga pinthu pizinji kakamwe, mbwenye ananu anaona pinacita imwe mbakutowezerani.” Natenepa, ananu angakuonani mbamusankhula ubalangazi wadidi, mwakukhonda penula, pyenepi pinaaphedza toera kucitambo pibodzi pyene.—Arom. 2:21-24.
MULUNGU WANDIMOMWENE ANADZAKUBVESERANI
15, 16. (a) Thangwi yanji musanyindira kuti Mulungu anadzakuphedzani toera kupfundzisa ananu? (b) Tinadzadinganji mu nsolo unatowera?
15 Ninji pidacitika pidaphemba Manowa ciphedzo toera kukuza mwanace? ‘Mulungu wandimomwene abvesera phembero ya Manowa.’ (Aton. 13:9) Anyakubala, Yahova anadzakubveseranimbo. Iye anadzatawira maphembero anu mbakuphedzani toera kupfundzisa ananu. Munakwanisa kupembera mungapangiza ufuni, kucepeseka na luso yakudzindikira.
16 Yahova asaphedza anyakubala toera kupfundzisa mwadidi anawo ang’ono, natenepa, iye anakwanisa kuphedzambo anyakubala toera kupfundzisa anawo athunga. Nsolo unatowera unadzadinga kuti munatowezera tani Yezu, mukupangiza ufuni, kucepeseka na luso yakudzindikira mu ndzidzi unapfundzisa imwe ananu athunga toera kutumikira Yahova.
^ ndima 5 Mwakubverana na Bhibhlya, kupfundzisa kusaphataniza kutsogolera mwaufuni, kupfundzisa, kusandika, pontho midzidzi inango kutcinyusa, mbwenye tayu mwaukali.
^ ndima 7 The International Standard Bible Encyclopedia isalonga: “M’mafala a ntsiku na ntsiku a ndzidzi wa Yezu, fala yakuti ‘abba’ ikhaphatisirwa na ana toera kupangiza uxamwali na cilemedzo kuna ababawo.”
