UKHALI ndzidzi wa malimwe mu caka 1931. Patsogolo pa thando yakudziwika kakamwe ya matsendzo ya ku Paris pakhadadzala na anthu adabuluka m’madziko akukwana 23. Miotokala ikhabweresa anthu pa mbuto ineyi, mwakukhonda dembuka mu thando ineyi mukhali anthu cifupi na 3.000. Anthu anewa nee agumanika pa mbuto ineyi toera kuona tsendzo, mbwenye toera kubvesera nkhani ya M’bale Joseph F. Rutherford wakuti akhatsogolera basa yathu yakumwaza mphangwa. Nkhani zace zakuphata ntima zathumburuzwa mu Cifransa, Cialemanya na cilongero ca ku Poloniya. Fala ya M’bale Rutherford ikhabveka m’mbuto zonsene za thando ineyi.

Nsonkhano unoyu wa gawo udacitika ku Paris wagomezera kakamwe kufunika kwa basa yakumwaza mphangwa za Umambo mu dziko ya Fransa. M’bale Rutherford akulumiza anthu onsene adagumanika pa nsonkhano unoyu toera kutumikira ninga apainiya a ndzidzi onsene mu dziko ya Fransa, makamaka aphale na atsikana. John Cooke mphale wa cilongero ca Cingerezi adagumanika pa nsonkhano unoyu cipo aduwala mafala awa akuphata ntima: “Imwe aphale na atsikana, nkhabepo cinthu cisafunika kukupingizani pantsi pano toera kutumikira ninga apainiya a ndzidzi onsene!”. *

Kusiyapo John Cooke wakuti mukupita kwa ndzidzi adzakhala misionaryo, anango azinji atawirambo ncemerero unoyu wa ku Masedonya. (Mach. 16:9, 10) Mwandimomwene, mu caka 1930 ku Fransa kukhali apainiya a ndzidzi onsene akukwana 27, mbwenye mu caka 1931 athimizirika mpaka 104. Kuthimizirika kweneku mu caka cibodzi basi kukhali kwakudzumisa kakamwe. Nakuti azinji mwa apainiya anewa nee akhalonga Cifransa, mbadakwanisa tani kumwaza mphangwa, mbadathimbana tani na nyatwa yakusowa pinthu pyakufunika na kutumikira m’mbuto zakutali?

Apainiya anewa a m’madziko anango akhaphatisira cartões de testemunho akuti akhaaphedza kulonga pya cidikhiro ca Umambo. Abale a ku Alemanya akuti akhamwaza mphangwa mwaphinga ku Paris alonga: “Ife tikhadziwa kuti Mulungu wathu ndi wamphambvu zonsene. Pikhali ife mu utumiki mitima yathu ikhapaluka, mbwenye nee pikhapangiza kuti tikhagopa munthu, basi ene tikhadzudzumika kuti tikhonde kuduwala mafala akucepa ninga awa: ‘Voulez-vous lire cette carte, s’il vous plaît? [Ndaphata miyendo munakwanisa kuleri cartão iyi?] Ife tikhanyindira kuti basa yathu ikhali yakufunika kakamwe.”

Pikhamwaza iwo mphangwa mu nyumba za ndzulu (predios), apainiya anewa kazinji kene akhathamangiswa na ale akhatsalakana nyumba zenezi. Ntsiku inango, alongo awiri a cilongero ca Cingerezi akuti nee akhalonga mwadidi Cifransa agumanikana na mamuna unango waukali wakuti akhali muimiriri wa nyumba yandzulu, buluka penepo abvundza alongo kuti akhafuna kuonana na ani. Mwakukhonda tsalakana ukali wace, mulongo unango aona pansuwo wa nyumba ya mamuna unoyu mafala awa: “Tournez le bouton [Lizani cingalingali].” Mulongo unoyu akhanyerezera kuti ndi dzina ya mwanaciro nyumba, natenepa mwakutsandzaya  antawira: “Tabwera kudzaonana na Mai ‘Tournez le bouton.’” Kulonga mafala adidi mwakusekesa pikhaphedza kakamwe apainiya anewa aphinga.

Mu pyaka 1930 anthu azinji ku Fransa akhathimbana na utcerengi, natenepa apainiya a m’madziko akunja akhathimbanambo na makhaliro anewa. Mulongo Mona Brzoska wakuti akhalonga Cingerezi athimbanambo na pinentso pabodzi na mpainiya ndzace, iye alonga: “Nyumba ikakhala ife ikhali na makhaliro akale, pontho nyatwa ikulu ikhathimbana na ife kukhali kupisa mu ndzidzi wakuthondola. Kazinji kene tikhakakamizika kukhala nkwartu yakuthondola kakamwe, mwenemu tikhaswa gelo mbitiikha mu khomitco ya madzi camacibese mbatidzati kusamba.” Kodi apainiya anewa akhali akutsukwala thangwi yakusowa pinthu pyadidi? Nee pang’ono pene! M’bodzi wa iwo alonga mwakutsandzaya thangwi ya pinentso pidathimbana na iwo: “Ife nee tikhali na pinthu, mbwenye nee tasowa pinthu.”​—Mat. 6:33.

Cinentso cinango cidathimbana na apainiya anewa ndi kutumikira m’mbuto zakutali. Pa kutoma kwa pyaka 1930, ku Fransa kukhali amwazi mphangwa za Umambo akukwana 700, pontho azinji mwa iwo akhadamwazika m’mbuto zonsene za dziko ineyi. Ninji cidaphedza apainiya anewa akhatumikira kutali toera kupitiriza kukhala akutsandzaya? Mulongo Mona wakuti athimbana na pinentso pyenepi pabodzi na mpainiya ndzace afokotoza: “Ife takunda cinentso ceneci mu kupfundza pabodzi ndzidzi onsene mabukhu a gulu yathu. M’midzidzi ineyi nee tikhakwanisa kucita maulendo akubwereza na kucitisa mapfundziro a Bhibhlya a panyumba. Camasiku tikhalemba matsamba mbitiatumiza kuna acibale athu, mbwenye makamaka kuna apainiya anango toera kulonga pyakugumana napyo pyathu na kuwangisana unango na ndzace.”​—1 Ates. 5:11.

Mwakukhonda tsalakana pinentso pidathimbana na iwo, apainiya anewa akudzimana apitiriza na maonero akulinganira. Maonero anewa asapangizika m’matsamba adatumiza iwo ku ofesi ya filiali mu pyaka pingasi pakumala kutumikira ninga apainiya ku Fransa. Angakumbuka pyaka pyenepi, mulongo wakudzodzwa Annie Cregeen wakuti atumikira m’mbuto zizinji mu dziko ineyi pabodzi na mamunace kutomera mu caka 1931 mpaka 1935 asalonga: “Tikhali na umaso wakutsandzayisa kakamwe, pontho taona pinthu pizinji! Ninga apainiya, tikhabverana kakamwe ninga nsoka. Ninga mudalonga mpostolo Paulu: ‘Ine ndabzwala, Apolo athirira, Mulungu apitiriza kukulisa mbeu.’ Pyenepi mphyakutsandzayisa kakamwe kwa ife adakhala na mwai wakuphedzera basa ineyi mu pyaka pizinji nduli.”​—1 Akor. 3:6.

Mwandimomwene, apainiya anewa akutoma apangiza citsandzo cadidi cakupirira na caphinga kwa ale anafuna kuthimizira utumiki wawo. Lero, ku Fransa kuli na apainiya a ndzidzi onsene akukwana 14.000. Azinji a iwo asatumikira m’misoka peno m’mipingo ya cilongero cakunja. * Mukutowezera apainiya akutoma, iwo nee asatawirisa cinthu consene pantsi pano toera kuapingiza!​—Mphangwa zathu zakale ku Fransa.