Mwakubverana na lemba ya Yoswa 6:10-15, 20, anyankhondo a Aisraele azungulira nzinda wa Yeriko mu ntsiku zitanthatu. Pa ntsiku yacinomwe, iwo azungulira nzinda kanomwe. Buluka penepo, Mulungu acitisa kuti mipanda yakuwanga ya nzinda wa Yeriko igomoke. Pyenepi pyaphedza Aisraele toera kupita mu nzinda mbaufudza. Kodi anyakupfundza pya madembe agumana cinthu cinapangiza kuti nzinda wa Yeriko wakundwa mu ndzidzi wakucepa ninga munalonga Bhibhlya?

Mu ndzidzi wakale, toera kufudza nzinda wakuwanga, kazinji kene anyankhondo akhaufungira. Mwakukhonda tsalakana ndzidzi ukhamala iwo, anyakukunda akhatapata mpfuma na pinthu pyonsene pikhagumana iwo mu nzinda. Mbwenye m’madembe a nzinda wa Yeriko, anyakupfundza pya m’madembe agumana pyakudya pizinji pyakusala. Thangwi ya pyenepi, bukhu ya Biblical Archaeology Review yalonga: “Mwa pinthu pizinji pidagumana iwo m’madembe anewa, kusiyapo pikalango, agumanambo mbeu. . . . Ineyi ndi mbiri yakupambulika mwa mbiri za anyakupfundza pya m’madembe a ku Palestina. Kazinji kene anyakupfundza pya madembe akhagumana nkhali ibodzi peno ziwiri za mbeu, mbwenye kugumana mbeu zakunjipa ninga zenezi, pikhali pyakudzumisa kakamwe.”

Mwakubverana na pinalonga Bhibhlya, Aisraele akhali na mathangwi adidi toera kukhonda kutapata mbeu mu nzinda wa Yeriko. Yahova akhadaakhondesa kucita pyenepi. (Yos. 6:17,18) Aisraele afudza nzinda unoyu mu ndzidzi wa malimwe pakumala kubvunwa kwa mbeu, natenepa mbeu zikhali zakunjipa. (Yos. 3:15-17; 5:10) Mwandimomwene, mbeu zakunjipa zidagumana iwo mu nzinda wa Yeriko, zisapangiza kuti Aisraele afungira nzinda unoyu mu ndzidzi wakucepa ninga munalonga Bhibhlya.