1, 2. (a) Ninji pinadzudzumika na anyakubala anango mu ndzidzi unakula anawo? (b) Kodi ana Acikristu anakwanisa tani kuphindula mu ndzidzi unakula iwo?

ANYAKUBALA Acikristu asakomerwa kakamwe angaona mwanawo mbakabatizwa. Berenice ndi nyakubala wa ana anai, onsene abatizwa mbadzati kukwanirisa pyaka 14 pyakubalwa. Iye alonga: “Pikhali pyakutsandzayisa kakamwe kwa ife. Tapereka takhuta thangwi anathu akhafuna kutumikira Yahova.” Iye athimiza: “Mbwenye ife tikhadziwa kuti ninga ana athunga, iwo mbadathimbana na pinentso pizinji.” Khala muli na ana athunga peno ali kukula, imwe munakwanisa kubvesesa kudzudzumika kwa Berenice.

² Maseze ndzidzi unakula mwana pisakhala pyakunentsa kwa anyakubala na kwa ana, mamuna m’bodzi anatsalakana pya kukula kwa ana alonga: “Ndzidzi unakula mwana toera kukhala wathunga, nee si ndzidzi wakuti iye ‘akuzunguza’ peno ‘akucepa ndzeru.’ Ndi ndzidzi wakufunika wakukola manyerezero, kupfundza kukhala na anthu, na kupfundza kuphatisira maonero ace.” Mu ndzidzi unakula iwo, ananu anakwanisa kukhazikisa uxamwali wadidi na Yahova, kukhazikisa na kukwanirisa pifuno pyauzimu, na kucita pizinji mu ndzidzi unaperekeka iwo na kucita pizinji m’basa ya Mulungu. Iwo anakwanisa kuona ndzidzi wa kukula kwawo ninga ndzidzi wa kukula mwauzimu ninga  pidacita Yezu. (Lerini Luka 2:52.) Ninga nyakubala, ninji pisafunika imwe kucita mu pyaka pyenepi pyakufunika kakamwe? Onani kuti Yezu apangiza tani ufuni, kucepeseka na luso yakudzindikira pidamala iye kukula. Kodi makhaliro anewa anakuphedzani tani toera kupfundzisa mwananu wathunga kuti atumikire Yahova?

3. Thangwi yanji Yezu acemera apostolo ace kuti ndi axamwali ace?

³ Yezu akhali waufuni na xamwali wakunyindirika. (Lerini Jwau 15:15.) M’midzidzi ya Bhibhlya, patrau nee akhalonga manyerezero ace na mabvero ace onsene kuna mabitcu ace. Mbwenye Yezu apangiza kukhala mbuya na xamwali kuna apostolo ace akukhulupirika. Iye akhacedza na iwo, mbalonga manyerezero ace kuna iwo, pontho Yezu akhaabvesera mwacidikhodikho pikhalonga iwo mabvero awo. (Marko 6:30-32) Kucedza kweneku kwaufuni kwacitisa kuti Yezu na apostolo ace akhale na uxamwali wakuwanga kakamwe, pontho pyenepi pyaakhunganya toera kucita mabasa akhafuna iwo kucita ntsogolo.

4. Munakwanisa tani kukhala xamwali wa ananu mu ndzidzi ubodzi ene mbamupitiriza kupangiza utongi wanu ninga nyakubala? (Onani cithundzithundzi cakutoma.)

⁴ Michael, baba wa ana awiri alonga: “Ninga anyakubala nee tiri na thunga ibodzi ene na anathu, mbwenye tinakwanisa kukhala axamwali awo.” Axamwali asakhala na ndzidzi wakucedza pabodzi. Citani phembero toera kudinga kuti munapungula tani ndzidzi unaphatisira imwe kubasa peno mu pinthu pinango toera mukhale na ndzidzi uzinji wakucedza na ananu. Axamwali asakhala na pifuno pibodzi pyene. Natenepa, wangisirani toera kupangiza cifuno na pinthu pinakomerwa na ananu athunga ninga nyimbo, mafilimu peno masendzekero. Ilaria anakhala ku Italya alonga: “Anyakubalanga akhasaka kudziwa ntundu wa nyimbo zikhabvesera ine. Mwandimomwene, baba adzakhala xamwali wanga wapantima, pontho ndisakhala wakusudzuka toera kulonga naye pinthu pyonsene pinandidzudzumisa.” Kukhala xamwali wa ananu athunga mbamuaphedza toera kukhala na ‘uxamwali na Yahova,’ nee pisabveka kuti mukufewesa utongi wanu ninga nyakubala. (Sal. 25:14) M’mbuto mwace, musapangiza kuti musaafuna na kualemedza, pontho munadzakhala wakudzolowereka kakamwe. Natenepa, iwo anadzafuna kakamwe kukupangani pinthu pinaadzudzumisa.

5. Kodi Yezu aphedza tani anyakupfundzace toera akhale akutsandzaya mukucita pizinji m’basa ya Yahova?

⁵ Yezu akhafuna kuti anyakupfundzace akuti akhali axamwali ace, akhale akutsandzaya mukucita pizinji m’basa ya Yahova. Natenepa, iye aakulumiza toera kukhala aphinga m’mabasa auzimu, ninga yakucita anyakupfundza. Mwaufuni iye aapasa cinyindiro cakuti mbadaaphedza toera kukwanirisa basa ineyi.​—Mat. 28:18, 19.

6, 7. Thangwi yanji mphyaufuni kuti anyakubala akhazikise ndandanda yauzimu yakukhonda phonya na anawo?

⁶ Mwakukhonda penula, imwe musafuna kuti ananu athunga akhale na ungumi wadidi wauzimu. Pontho, Mulungu asafuna kuti ‘muapfundzise na kualanga ninga munafunira Yahova.’ (Aef. 6:4) Natenepa, phatisirani utongi udakupasani Yahova toera kukhazikisa ndandanda ya mabasa auzimu na kuacita mwakukhonda phonya. Mwacitsandzo: Ninga nyakubala, imwe musapitiriza kuwangisa ananu toera aende kapfundza kuxikola thangwi musadziwa kuti kupfundza ndi kwakufunika. Imwe musafunambo kuaphedza toera akomerwe na kupfundza. Munjira ibodzi ene, anyakubala aufuni asapitiriza kuwangisa anawo toera atambire ‘cipfundziso ca Yahova’ kubulukira mu kugumanika pa misonkhano ya mpingo na maprogramu anango auzimu. Nakuti cipfundziso cauzimu ndi cakufunika kakamwe, imwe musayesera kuphedza ananu kuti afune pinthu pyauzimu na kupasa ntengo udziwisi. (Mis. 24:14) Ninga mudaphedzera Yezu anyakupfundzace, imwe musaphedza ananu athunga toera kupembera mu utumiki mu kukulisa ufuni wawo ku cipfundziso  ca Mafala a Mulungu. Munakwanisambo kuaphedza toera kukhazikisa ndandanda yadidi ya basa yakumwaza mphangwa.

⁷ Kodi ndandanda yakukhonda phonya ya mabasa auzimu inaphedza tani ana athunga? Erin anakhala ku Afrika Wakubangwe alonga: “Pikhali ife anang’ono, kazinji kene tikhalira mbatidungunya thangwi ya pfundziro ya Bhibhlya, misonkhano na basa yakumwaza mphangwa. Midzidzi inango tikhacita pinthu toera kudzudzumisa pfundziro ya Bhibhlya ya pabanja toera tikhonde kugumanika. Mbwenye anyakubala athu nee akhatawirisa pyenepi.” Iye athimiza: “Cipfundziso ceneci candiphedza toera kukulisa nzimu wakupirira. Lero, ndandanda yanga yauzimu ingapingizika, ndisakhala na cifuno ca kuisasanyira mwakucimbiza. Anyakubalanga mbadakhonda kukhala akuwanga mu kukhazikisa ndandanda yakukhonda phonya, ine nee mbandidakwanisa kukulisa cifuno ceneci. Mbadabwerera nduli, mbipidakhala pyakukhonda nentsa kwa ine kuluza misonkhano peno mabasa anango auzimu.”

8. (a) Kodi Yezu adzindikira tani kucimwana kwace? (b) Kucepeseka kwa Yezu kwakhuya tani anyakupfundzace?

⁸ Maseze Yezu akhali munthu waungwiro, mwakucepeseka iye adzindikira kucimwana kwace mbanyindira ciphedzo ca Yahova. (Lerini Jwau 5:19.) Kodi kucepeseka kwa Yezu kwapungula kulemedzwa kwace na anyakupfundzace? Nkhabe. M’mbuto mwace, kunyindira kwace kakamwe Yahova, kwaphedza anyakupfundzace toera anyindirembo kakamwe Yezu. Mukupita kwa ndzidzi, iwo atowezera kucepeseka kwa Yezu.​—Mach. 3:12, 13, 16.

9. Mungacepeseka mbamuphemba kulekererwa na kudzindikira kucimwana kwanu, pinakhuya tani ananu?

⁹ Mwakusiyana na Yezu, ife ndife akusowa ungwiro, tisadodomeka, pontho pana pizinji pinacimwana ife. Mwakucepeseka, dzindikirani kucimwana kwanu mbamutawira madodo anu. (1 Jwau 1:8) Mbani analemedza imwe kakamwe? Patrau anaphemba kulekererwa angadawa, peno ule anakhonda kutawira kuti adawa? Munjira ibodzi ene, mungadodomeka mbamuphemba kulekererwa, mwananu wathunga anakulemedzani kakamwe. Iye anapfundzambo kuphemba kulekererwa angadawa. Rosemary, mama wa ana atatu akulu, alonga: “Ife tikhatawira madodo athu, pyenepi pikhaphedza anathu toera alonge na ife angathimbana na nyatwa. Tikhadzindikira kucimwana kwathu, natenepa, tapfundzisa anathu njira yadidi kakamwe yakumalisa nyatwa zawo. Ndzidzi onsene ukhafuna iwo ciphedzo, ife tikhadinga mabukhu athu, mbaticita phembero pabodzi.”

10. Kodi Yezu apangiza tani kucepeseka pidapereka iye mitemo kuna atowereri ace?

¹⁰ Yezu akhali na utongi toera kutuma peno kukhazikisa mitemo kuna atowereri ace. Mbwenye iye akhali wakucepeseka, kazinji kene akhafokotoza mathangwi a mitemo ineyi. Mwacitsandzo, pidapanga iye atowereri ace toera kuikha Umambo wa Mulungu na ulungami wace pa mbuto yakutoma, iye alonga: “Pinango pyonsene munadzapibayirwa.” Pakumala kulonga kuti: “Lekani kutonga,” Yezu afokotoza thangwi yace mukulonga: ‘Munadzatongwa sawasawa ninga munatongera imwe anango.’​—Mat. 6:31–7:2.

11. Khala mphyakuthema, thangwi yanji mphyadidi kufokotoza mathangwi a ntemo peno a cisankhulo canu?

¹¹ Khala mphyakuthema, mungakhazikisa ntemo peno kucita cisankhulo, fokotozani mathangwi ace. Mwananu wathunga angabvesesa manyerezero anu mu pinthu pyenepi, mphyakukhonda nentsa kukubverani na ntima onsene. Barry, adakuza ana anai alonga: “Kulonga mathangwi pisaphedza ana athunga toera kunyindira anyakubala. Natenepa, iwo asaona kuti pisankhulo nee pisacitwa mwakukhonda kunyerezera, mbwenye piri na mathangwi, pontho mphyakufunika.” Munjira ineyi, mwana wathunga asakula mbakulisambo ‘luso yace yakunyerezera.’ (Arom.  12:1) Barry afokotoza: “Ana athunga asafunika kupfundza kucita pisankhulo pyakuthema mu kuphatisira mathangwi, tayu kuphatisira mabvero awo.” (Sal. 119:34) Mungacepeseka mbamupangiza mathangwi a pisankhulo pyanu, mwananu wathunga anabvesesa kuti musadzindikira kuti iye akukula. Natenepa, iye anaona pyenepi, mbapfundza kucita pisankhulo mukuphatisira ‘luso yace yakunyerezera.’

12. Kodi Yezu aphatisira tani luso yakudzindikira toera kuphedza Pedhro?

¹² Yezu apangiza luso yakudzindikira, pontho akhadziwa makhundu akuti anyakupfundzace akhafuna ciphedzo. Mwacitsandzo, na cifuno cadidi mpostolo Pedhro akulumiza Yezu toera abvereke ntsisi ekhene kuti akhonde kuphiwa. Mbwenye Yezu akhadziwa kuti maonero a Pedhro akhali akuphonyeka. Toera kuphedza Pedhro na anyakupfundza anango, Yezu apereka uphungu wakuwanga, mbapangiza ngozwi yakubvereka ntsisi. Buluka penepo, iye alonga pya nkhombo zakupangiza nzimu wakudzimana. (Mat. 16:21-27) Pedhro abvesesa ntsonga ineyi.​—1 Ped. 2:20, 21.

13, 14. (a) Ninji cinafuna kupangiza kuti cikhulupiro ca mwananu cikufewa? (b) Munakwanisa tani kuphatisira luso yakudzindikira toera kuphedza mwananu?

¹³ Phembani Yahova kuti akupaseni luso yakudzindikira toera kubvesesa makhundu akuti mwananu wathunga asafuna ciphedzo. (Sal. 32:8) Mwacitsandzo, ninji cinafuna kupangiza kuti cikhulupiro ca mwananu cikufewa? Panango akuluza kutsandzaya, kulonga mwakuipa abale Acikristu peno kukhonda kulonga pinandzudzumisa. Lekani kunyerezera mwakucimbiza kuti akucita pyakuipa peno madawo makulu. * Mbwenye lekani kupwaza pidzindikiro pyenepi peno kunyerezera kuti akucita pyenepi thangwi ya thunga yace.

¹⁴ Ninga Yezu, citani mibvundzo munjira yadidi na yacilemedzo. Pyenepi ndi ninga kutunga madzi mu ncera. Mungakwewa n’thepu mwakucimbiza kakamwe, madzi anango anatayika. Munjira ibodzi ene, mungalonga mwaukali na mwananu, panango munaluza mwai wadidi kakamwe wakudzindikira manyerezero ace na pifuno pyace. (Lerini Misangani 20:5.) Ilaria adalongwa pakutoma, athimiza: “Pikhali ine ntsikana,  ndikhali na manyerezero akugawika, ndikhafuna kutumikira Yahova, mbwenye ndikhafunambo kakamwe kucedza na andzanga akuxikola. Nkhondo ineyi ya muntima yakhuya kutsandzaya kwanga, anyakubalanga adzindikira pyenepi. Ntsiku inango namasiku, iwo alonga basi ene kuti akhaona kuti ndikhali wakutsukwala pang’ono, mbandibvundza kuti thangwi yanji ndikhali wakutsukwala. Ndatoma kulira, ndaapanga pikhandidzudzumisa mbandiphemba ciphedzo. Iwo andikhumbatira mbalonga kuti asabvesesa mwadidi makhaliro anga, mbandipanga kuti anandiphedza.” Mwakukhonda dembuka, anyakubala a Ilaria atoma kumphedza toera kukhala na axamwali apswa mbwenye adidi kakamwe m’mpingo.

15. Fokotozani kuti Yezu apangiza tani luso yakudzindikira pakutsalakana anango?

¹⁵ Yezu apangizambo luso yakudzindikira mukuona makhundu akuti anyakupfundzace akhafuna ciphedzo na makhundu akhacita iwo mwadidi. Mwacitsandzo, pidabva Natanaele kuti Yezu akhali wa ku Nazarete, iye alonga: “Mphyanji pyadidi pinabuluka ku Nazarete?” (Jwau 1:46) Mwakubverana na mbvundzo unoyu, ndi dzina yanji ikhafuna imwe kupasa Natanaele? Nyakupokanya? Munthu wa tsankhulo? Peno wakusowa cikhulupiro? Yezu aphatisira luso yakudzindikira mbasaka kuona pyadidi mu umaso wa Natanaele. Yezu alonga kuti iye akhali ‘Muisraele wadidi kakamwe, mwa iye nkhabe uthambi.’ (Jwau 1:47) Yezu akhakwanisa kuona pya muntima, natenepa iye aphatisira luso ineyi toera kuona pyadidi mwa anango.

16. Munaphedza tani mwananu wathunga toera kukulisa makhaliro adidi?

¹⁶ Imwe nee munakwanisa kuona pya muntima, mbwenye na ciphedzo ca Mulungu, munakwanisa kupangiza luso yakudzindikira. Munaphatisira tani luso ineyi toera kuona pyadidi mwa mwananu wathunga? Nkhabe anakomerwa kuthulwa “nyakusosa nyatwa.” Cipo, lekani kupangiza kubulukira m’manyerezero anu peno mafala anu kuti mwananu ndi “mwana wakupanduka” peno “mwana wakusosa nyatwa.” Maseze mwananu wathunga nee asacita pinafuna imwe m’makhundu anango, pangizani kuti imwe musadziwa kuti iye ali na cifuno cakucita pyadidi pontho anakwanisa kucita pyenepi. Onani makhundu anapangiza kuti akukula na kuthambaruka, mbamunsimba. Khala mphyakuthema, mphedzeni toera kukulisa makhaliro adidi mu kumpasa mabasa akuthimizirika. Yezu acita pyenepi na anyakupfundzace. Mudapita caka na hafu pakumala kudziwana na Natanaele (wakuti akhacemerwambo Bartolomeu), Yezu ansankhula toera kukhala mpostolo, Natanaele apangiza kukhala Nkristu waphinga kakamwe. (Luka 6:13, 14; Mach. 1:13, 14) Mungasimba na kuwangisa mwananu, pinamphedza toera kuona kuti iye nee ndi munthu wakuti nkhabe cinakwanisa iye ndzidzi onsene, mbwenye ninga Nkristu wakuti anakwanisa kuphatisirwa na Yahova.

17, 18. Ndi maphindu api anafuna kukhala na imwe mungapitiriza kuwangisira toera kuphedza ananu kuti atumikire Yahova?

¹⁷ Mu ndzidzi unakuza imwe ananu, panango munakhala na mabvero ninga a mpostolo Paulu wakuti adzakhala baba wauzimu wa anthu azinji. Iye athimbana na ‘kutsukwala maningi na kupswipa ntima’ thangwi ya ‘ufuni ukulu’ ukhali na iye kwa anace auzimu a ku Korinto. (2 Akor. 2:4; 1 Akor. 4:15) Victor akuza ana awiri acimuna na m’bodzi wankazi. Iye alonga: “Pyaka pikhakula anathu pikhali pyakunentsa. Mbwenye midzidzi yakutsandzayisa idakhala na ife isapiringana pinentso pyonsene. Na ciphedzo ca Yahova, takwanisa kukhala na uxamwali wakuwanga na anathu.”

¹⁸ Pitirizani kuwangisira kakamwe toera kupfundzisa ananu kuti atumikire Yahova. Pitirizani kupangiza kuti musaafuna kakamwe. Munacita imwe pyenepi, tisadikhira kuti munadzakhala wakutsandzaya kakamwe mu kudziwa kuti ananu asankhula kutumikira Yahova ‘mbapitiriza kufamba mu undimomwene.’​—3 Jwau 4.