1, 2. Tisadziwa tani kuti lemba Aroma kapitulu 8 yalemberwa makamaka Akristu akudzodzwa?

PANANGO mwaleri kale Aroma 8:15-17 mu ndzidzi wa Cikumbuso ca kufa kwa Yezu. Mavesi anewa asafokotoza kuti Akristu akudzodzwa asadziwa tani kuti ali na cidikhiro cakukhala kudzulu kwenda na kwenda. Lemba ya Aroma 8:1 isalonga kuti akudzodzwa anewa ndi ‘akuphatana na Kristu.’ Mphapo lemba ya Aroma kapitulu 8 isaphatisirwa basi ene kwa akudzodzwa? Peno isaphatisirwambo kwa onsene ali na cidikhiro cakukhala pa dziko yapantsi kwenda na kwenda?

² Lemba ya Aroma kapitulu 8 yalemberwa makamaka Akristu akudzodzwa. Tisadziwa tani pyenepi? Vesi 23 ya lemba ineyi, Paulu alonga kuti akudzodzwa atambira nzimu wa Mulungu. Na thangwi ineyi iwo akudikhira kukhala ninga ana a Yahova mbatambira manungo akukhonda kuoneka kudzulu. Thangwi ya ntsembe ya Yezu, Yahova aalekerera madawo. Kwa iye, iwo  ndi akulungama mbakwanisa kukhala anace.—Aroma 3:23-26; 4:25; 8:30.

3. Thangwi yanji ale akuti ali na cidikhiro cakukhala pa dziko yapantsi kwenda na kwenda asafunikambo kupfundza lemba ya Aroma kapitulu 8?

³ M’makapitulu akutoma a bukhu ya Aroma, Paulu alemba thangwi ya mamuna unango wakuti nee akhali wakudzodzwa, mbwenye akhapitiriza kuoniwa wakulungama na Yahova. Mamuna unoyu wakukhulupirika akhali Abhrahamu. Iye akhala maso mu pyaka pizinji Yezu mbadzati kutifera ninga ciomboli. (Lerini Aroma 4:20-22.) Lero, Yahova asaonambo Akristu akukhulupirika akuti ali na cidikhiro cakukhala pa dziko yapantsi kwenda na kwenda ninga akulungama. Iwo asaphindulambo na uphungu wa lemba ya Aroma kapitulu 8.

4. Kodi tisafunika kubvundzikanji tingaleri Aroma 8:21?

⁴ Pa Aroma 8:21, Yahova asapangiza pakweca kuti anadzabweresa dziko ipswa, pontho anthu anadzasudzulwa m’madawo na kufa. Vesi ineyi isalonga kuti anthu anadzatsandzaya na ‘ufulu wambiri ya ana a Mulungu.’ Natenepa tisafunika kubvundzika: Ndisafunika kucitanji toera ndidzakhalembo n’dziko ipswa? Tendeni tidinge pyenepi.

5. Kodi Paulu akhafuna kulonganji pa Aroma 8:4-13?

⁵ Lerini Aroma 8:4-13. Pa Aroma kapitulu 8, Paulu afokotoza thangwi ya mitundu miwiri ya anthu akusiyana, akuti asakhala maso ‘mwakubverana na pinafuna manungo’ na ale anakhala maso ‘mwakubverana  na pinafuna nzimu.’ Anango asanyerezera kuti Paulu akhafokotoza pya ale akuti nee akhali Akristu kuphatanizambo Akristu. Mbwenye Paulu akhalemba pya Akristu ale ‘akhacemerwa toera kukhala anthu akucena.’ (Aroma 1:7) Natenepa, ale akuti asakhala maso ‘mwakubverana na pinafuna manungo’ na ale asakhala maso ‘mwakubverana na pinafuna nzimu’ akhali Akristu. Mphapo iwo akhadasiyana munjira ipi?

6, 7. (a) Kodi Bhibhlya ingaphatisira fala yakuti ‘pyakumanungo’ isafuna kulonganji? (b) Kodi fala yakuti ‘pyakumanungo’ yaphatisirwa tani pa Aroma 8:4-13?

⁶ Bhibhlya ingaphatisira fala yakuti ‘pyakumanungo’ isalonga pizinji kakamwe. Midzidzi inango isalonga pya manungo athu. (Aroma 2:28; 1 Akorinto 15:39, 50) Midzidzi inango isalongambo pya dzindza ya munthu. Mwacitsandzo, Bhibhlya isalonga kuti Yezu akhali ninga munthu wa ‘dzindza ya Dhavidhi,’ pontho Paulu alonga kuti Ayuda akhali ‘abale ace akumanungo.’—Aroma 1:3; 9:3.

⁷ Kodi Paulu akhafuna kulonganji m’mafala akuti ale asakhala maso ‘mwakubverana na pinafuna manungo’ pa Aroma 8:4-13? Lemba ya Aroma 7:5 inatiphedza toera kugumana ntawiro. Pa lemba ineyi Paulu alonga: ‘Mu ndzidzi ukhakhala ife maso mwakubverana na pinafuna manungo, pifuno pya madawo pikhaoneka thangwi ya Mwambo ukhaphata basa m’manungo mwathu.’ Pa vesi ineyi Paulu afokotoza kuti anthu anakhala maso ‘mwakubverana na pinafuna manungo’ ndi ale asanyerezera basi ene pinthu pyakucita madawo, mwakukhonda tsalakana kuti anango anapibva tani.

8. Thangwi yanji Paulu akhafunika kucenjeza Akristu toera acalire kukhala maso ‘mwakubverana na pinafuna manungo’?

 ⁸ Thangwi yanji Paulu acenjeza Akristu akudzodzwa toera kucalira kukhala maso ‘mwakubverana na pinafuna manungo’? Pontho thangwi yanji Akristu lero asafunikambo cenjezo ineyi? Thangwi ntumiki onsene wakukhulupirika wa Mulungu anakwanisa kucita pinafuna iye. Mwacitsandzo, Paulu alembera abale anango a ku Roma akuti akhali mabitcu a ‘pifuno pyawo basi.’ Natenepa iye akhalonga kuti anango akhaona pinthu pyaubalangazi ninga pyakufunika kakamwe mu umaso wawo, ninga pyaulukwali, cakudya na pinango. (Aroma 16:17, 18; Afilipi 3:18, 19; Yuda 4, 8, 12) Onani pidacitika mu mpingo wa ku Korinto. M’bale unango akhacita ulukwali ‘na nkazi wa babace.’ (1 Akorinto 5:1) Pyenepi pisapangiza pakweca kuti Akristu anewa akhafunika kupaswa uphungu unoyu toera kucalira kukhala maso ‘mwakubverana na pinafuna manungo.’—Aroma 8:5, 6.

9. Kodi Paulu nee akhafuna kulonganji pa Aroma 8:6?

⁹ Cenjezo ineyi isaphatisirwambo lero. Ngakhale munthu wakuti asatumikira Yahova mu pyaka pizinji anakwanisa kutoma kukhala maso ‘mwakubverana na pinafuna manungo.’ Mphapo, Paulu akhalonga kuti nee tisafunika kunyerezera pinthu ninga cakudya, basa, ubalangazi, peno kumanga banja? Nkhabe. Pyenepi pisacita khundu ya umaso. Ngakhale Yezu atsandzaya na cakudya mbadyesambo anango. Iye adzindikirambo kuti akhafunika kupuma. Pontho Paulu alemba kuti kwa anthu akumanga banja, kupita m’mabonde ndi cinthu cakufunika.

10. Kodi mafala akuti ‘kuikha manyerezero’ asabvekanji?

¹⁰ Kodi Paulu akhafuna kulonganji na mafala akuti ‘kuikha manyerezero’? Fala Yacigrego idaphatisira Paulu isabveka kuikha manyerezero onsene pa cinthu cibodzi basi. Nyakupfundza unango afokotoza kuti munthu anaikha manyerezero ace pa cinthu, “asakhala na cifuno cikulu, asalonga basi ene thangwi ya cinthu ceneci,” pontho asadzudzumika kakamwe na cinthu cinafuna iye. Munthu unoyu asatawirisa kutsogolerwa na pifuno pyace.

11. Ndi pinthu pipi pinango pyakuti pinakwanisa kukhala pyakufunika kakamwe kwa ife?

¹¹ Akristu a ku Roma akhafunika kudingika okhene toera kuona kuti ndi pinthu pipi pyakufunika kwa iwo. Lero, tisafunikambo kucita pibodzi pyene. Ndi pinthu pipi pisakomerwa na ife kucedza? Ndi pinthu pipi pisafuna kucita ife kakamwe? Anango adzindikira kuti kazinji kene asanyerezera kumwa mitundu yakusiyana-siyana ya vinyu, kubalikisa nyumba zawo, kugula nguwo zipswa, kuwina kobiri izinji, peno mbuto inafuna kwenda iwo angabuluka ferya. Panango nee ndi pyakuipa kunyerezera pinthu pyenepi. Mwacitsandzo, Yezu apereka vinyu pa phwando yakumanga banja, pontho Paulu apanga Timoti toera amwe “vinyu pang’ono” thangwi ya utenda wace. (1 Timoti 5:23; Jwau 2:3-11) Mbwenye vinyu nee ikhali yakufunika kakamwe kwa iwo. Ndiye tani kwa ife? Ndi cinthu cipi cakufunika kakamwe mu umaso wathu?

12, 13. Thangwi yanji tisafunika kucita mpholemphole na pinanyerezera ife?

 ¹² Paulu acenjeza: ‘Kuikha manyerezero mu pinthu pyakumanungo pisabveka kufa.’ (Aroma 8:6) Kodi iye akhafuna kulonganji? Tingakhala maso ‘mwakubverana na pinafuna manungo,’ tinakwanisa kuluza uxamwali wathu na Yahova cincino na kuluza umaso wakukhonda mala ntsogolo. Mbwenye pyenepi nee pisafunika kucitika kwa ife. Munthu asakwanisa kucinja. Musakumbuka m’bale adacita ulukwali na nkazi wa babace ku Korinto mbabuluswa mu mpingo? Iye acinja mbasiya kutowezera pifuno pyace pyaulukwali. Buluka penepo, atoma pontho kutumikira Yahova munjira yakutawirika.—2 Akorinto 2:6-8.

¹³ Mamuna unoyu akhali citsandzo cakuipa kakamwe ca kukhala maso ‘mwakubverana na pinafuna manungo,’ mbwenye akhali dzololo toera kucinja. Natenepa Nkristu angatoma kutowezera pifuno pyakuipa m’mbuto mwakutowezera midida ya Yahova, iye anakwanisambo kucinja. Kukumbuka cenjezo ya Paulu kunatiphedza toera kucita macinjo onsene anafunika.

14, 15. (a) Kodi tisafunika kuikha kupi manyerezero athu? (b) Kodi mafala akuti ‘kuikha manyerezero mu pinthu pyauzimu’ asabvekanji?

¹⁴ Pakumala kulonga thangwi ya ‘kuikha manyerezero mu pinthu pyakumanungo,’ Paulu afokotoza: ‘Kuikha manyerezero mu pinthu pyauzimu pisabveka umaso na ntendere.’ Zenezi ndi mphangwa zakutsandzayisa kakamwe kwa ife!

¹⁵ Mbwenye ‘kuikha manyerezero mu pinthu pyauzimu’ nee pisabveka kuti munthu asafunika kunyerezera na kulonga basi ene pya Yahova na Bhibhlya. Akristu nee akukhala n’dziko yawo okha. Mwacitsandzo, atumiki a Mulungu a mu ndzidzi wa Paulu akhakomerwambo na kudya, kumwa, kumanga banja, kubala ana na kuphata basa toera kutsalakana mabanja awo.—Marko 6:3; 1 Atesalonika 2:9.

16. Ndi cinthu cipi cikhali cakufunika kakamwe mu umaso wa Paulu?

¹⁶ Mbwenye Paulu na Akristu anango a mu ndzidzi wace nee atawirisa kuti mabasa a dziko akhale cinthu cakufunika kakamwe mu umaso wawo. Mwacitsandzo, ife tisadziwa kuti Paulu akhacita matenti mwaphinga toera kutsalakana umaso wace. Mbwenye basa yace nee ikhali yakufunika kakamwe mu umaso wace. Cinthu cakufunika kakamwe mu umaso wa Paulu cikhali kutumikira Mulungu. Paulu akhaikha manyerezero ace m’basa yakumwaza mphangwa na kupfundzisa. (Lerini Machitiro 18:2-4; 20:20, 21, 34, 35, Tradução do Novo Mundo.) Abale na alongo a ku Roma akhafunika kutowezera citsandzo ca Paulu. Natenepa tisafunikambo kucita pibodzi pyene.—Aroma 15:15, 16.

17. Ndi nkhombo zipi zinafuna kukhala na ife tingaikha manyerezero athu mu pinthu pyauzimu?

¹⁷ Kodi umaso wathu unadzakhala tani tingaikha manyerezero athu m’basa ya  Yahova? Lemba ya Aroma 8:6 isalonga: ‘Kuikha manyerezero mu pinthu pyauzimu pisabveka umaso na ntendere.’ Kucita pyenepi kusaphataniza kutawirisa manyerezero athu kutsogolerwa na nzimu wa Yahova na kunyerezera ninga iye. Yahova asatipikira umaso wakutsandzayisa lero na wakukhonda mala ntsogolo.

18. Tinakhala tani na ntendere tingaikha manyerezero athu mu pinthu pyauzimu?

¹⁸ Kodi Paulu akhafuna kulonganji na mafala akuti ‘kuikha manyerezero mu pinthu pyauzimu’ kunaticitisa kukhala na ntendere?’ Munthu onsene asafuna ntendere, makamaka ntendere wa m’manyerezero, mbwenye ndi anthu akucepa anaugumana. Kupereka takhuta kuna Yahova, kunaticitisa kukhala na ntendere wandimomwene wa m’manyerezero. Kunacitisambo kukhala na ntendere m’mabanja mwathu na abale mu mpingo. Nakuti ndife akusowa ungwiro, midzidzi inango tinadzathimbana na mikandzo na abale na alongo athu. Pyenepi pingacitika, tisafunika kubvera uphungu wa Yezu: ‘Khazikisa ntendere na m’bale wako.’ (Mateo 5:24) Dziwani kuti m’bale peno mulongo wanu asatumikirambo Yahova, “Mulungu anapasa anthu ntendere.”—Aroma 15:33; 16:20.

19. Ndi ntundu upi wa ntendere wakuti tinakwanisa kukhala nawo?

¹⁹ Tingaikha ‘manyerezero athu mu pinthu pyauzimu,’ tinakwanisambo kukhala na ntendere wa Mulungu. Mprofeta Izaiya alemba: ‘Imwe Yahova munadzatsizikiza ale anakunyindirani; na kupitiriza kuapasa ntendere, thangwi asakunyindirani.’—Izaiya 26:3; lerini Aroma 5:1.

20. Thangwi yanji tisapereka takhuta kakamwe na uphungu unagumanika pa Aroma kapitulu 8?

²⁰ Mwakukhonda tsalakana khala tisadikhira kukhala kwenda na kwenda kudzulu peno pa dziko yapantsi, tonsene tinakwanisa kuphindula na mafala audziwisi anagumanika pa lemba ya Aroma kapitulu 8. Tisapereka takhuta thangwi Bhibhlya isatiwangisa toera kuikha manyerezero athu m’basa ya Yahova, tayu pifuno pyathu. Ife tisadziwa kuti tingaikha ‘manyerezero mu pinthu pyauzimu,’ tinadzakhala na nkhombo zakutsandzayisa kakamwe. Paulu alemba: ‘Muoni unapasa Mulungu ndi umaso wakukhonda mala mwa Kristu Yezu Mbuyathu.’—Aroma 6:23.