1, 2. Kodi lemba ya Aroma 5:12 isatiphedza tani?

LEMBA ya Aroma 5:12 isalonga: ‘Ninga mudapita madawo n’dziko thangwi ya munthu m’bodzi na kufa thangwi ya madawo, natenepa kufa kwapita mwa anthu onsene thangwi onsene acitambo madawo.’ Ineyi ndi ibodzi ya mavesi akuti tisaadziwa mwadidi kakamwe, pontho tisaiphatisira kazinji kene tingapfundza na anthu Bhibhlya.

² Vesi ineyi yaphatisirwa m’maulendo mazinji m’bukhu Kodi Mwandimomwene Bhibhlya Isapfundzisanji? na Kodi Bhibhlya Isatipfundzisanji? Tingapfundza na anathu peno anango kapitulu 3, 5 na 6, kazinji kene tisaleri lemba ya Aroma 5:12. Panango tisaphatisira vesi ineyi toera kuaphedza kubvesesa kuti thangwi yanji dziko nee ndi paradhizu, thangwi yanji tisafunika ciomboli, pontho thangwi yanji tisafa. Kusiyapo pyenepi, vesi ineyi isatiphedzambo toera kuthimizira kupereka kwathu takhuta thangwi ya uxamwali wathu na Yahova,  mbatikhala akutonga kunkomeresa na kupitiriza kudikhira mapikiro ace.

3. Kodi tisafunika kukumbukanji thangwi ya makhaliro athu?

³ Mwakutsukwalisa, tonsene ndife akudawa. Tisadodoma ntsiku zonsene. Mbwenye Yahova ndi wantsisi kakamwe. Iye asadziwa kuti ndife akusowa ungwiro, mbakhala dzololo toera kutilekerera. (Masalmo 103:13, 14) Yezu atipanga kuti tisafunika kuphemba Mulungu toera atilekerere madawo athu. (Luka 11:2-4) Yahova angatilekerera madawo adacita ife nduli, ife nee tisafunika kupitiriza kuanyerezera. Tendeni tidinge kuti Yahova asatilekerera tani.

4, 5. (a) Ninji cinafuna kutiphedza toera kubvesesa lemba ya Aroma 5:12? (b)  Kodi ‘kukoma ntima kwa Mulungu’ kusabvekanji?

⁴ Bukhu ya Aroma makamaka kapitulu 6, isatiphedza kubvesesa kuti Yahova asalekerera tani madawo athu. Kapitulu 3, tisapfundza kuti ‘anthu onsene adawa.’ Buluka penepo Paulu afokotoza: ‘Alungamiswa na kukoma ntima kwace thangwi yakuombolwa kudacitwa iwo kubulukira mwa Yezu mwakukhonda lipa.’ (Aroma 3:23, 24) Fala Yacigrego idathumburuzwa kuti ‘kukoma ntima’ isapangiza maonero akucita pinthu mwakukoma ntima kakamwe mwakukhonda dikhira kulipwa.

⁵ Nyakupfundza unango afokotoza kuti fala Yacigrego, kazinji kene isalonga pidacita Mulungu na Kristu toera kupulumusa anthu ku madawo na kufa. Natenepa, Bhibhlya ya Tradução do Novo Mundo ya Cingerezi yathumburuza fala ineyi Yacigrego ‘kukoma ntima kwa Mulungu.’ Tendeni tidinge pidaticitira Yahova na kuona kuti tinaphindula tani na kukoma ntima kwace cincino na ntsogolo.

6. Mbani anaphindula na kukoma ntima kwa Mulungu, pontho tani?

⁶ Nakuti Adhamu adawa, natenepa madawo na kufa pyakhuyambo anthu onsene akusowa ungwiro. Na thangwi ineyi Bhibhlya isalonga kuti ‘thangwi ya madawo a munthu m’bodzi kufa kusatonga ninga mambo.’ Mbwenye Yahova apangiza kukoma ntima kukulu mbapereka njira toera kusudzula anthu onsene kubulukira mwa ‘munthu m’bodzi, Yezu Kristu.’ (Aroma 5:12, 15, 17) ‘Thangwi yakubvera kwa munthu m’bodzi anthu onsene anadzakhala akulungama.’ Pontho anakwanisa kudikhira ‘umaso wakukhonda mala kubulukira mwa Yezu Kristu.’—Aroma 5:19, 21.

7. Thangwi yanji pidacita Mulungu kwa ife ndi kukoma ntima kukulu?

⁷ Nyerezerani ipi: Yahova nee akakamizwa toera kutumiza Mwanace ninga ciomboli. Mbwenye iye acita pyenepi thangwi ya kukoma ntima kwace toera kutipulumusa ku madawo na kufa. Nee m’bodzi wa ife  athema pidacita Mulungu na Yezu kwa ife. Tisapereka takhuta kakamwe thangwi tisalekererwa madawo na kudzakhala maso kwenda na kwenda! Tinapangiza kupereka kwathu takhuta kwa Mulungu kubulukira m’makhaliro athu a ntsiku na ntsiku.

8. Ndi manyerezero api akuti tisafunika kuacalira?

⁸ Ife tisadziwa kuti Mulungu ali dzololo toera kutilekerera madawo, ngakhale makulu. Mbwenye nee tisafunika kuona kukoma ntima kwa Yahova ninga thangwi toera kucita pinthu pyakuipa, mbitinyerezera kuti ‘Yahova anatilekerera.’ Mu ndzidzi wa apostolo, Akristu anango akhanyerezerambo tenepo. (Lerini Yuda 4.) Lero, tisafunika kucita mpholemphole toera tikhonde kukwatika na ndzeru za anango mbititoma kunyerezerambo munjira ibodzi ene.

9, 10. Kodi Paulu na Akristu anango asudzulwa tani ku madawo na kufa?

⁹ Paulu apanga Akristu kuti ndi pyakuipa kunyerezera kuti angapitiriza kucita madawo, Mulungu anaalekerera. Paulu alonga kuti iwo akhafunika kucalira manyerezero anewa thangwi ndi ‘kufa ku madawo.’ (Lerini Aroma 6:1, 2.) Kodi iye akhafuna kulonganji?

¹⁰ Kubulukira mu ciomboli, Mulungu alekerera madawo a Paulu na Akristu anango mu ndzidzi wa apostolo. Yahova aadzodza na nzimu wakucena toera kukhala anace. Natenepa, akhafunika kukhala akukhulupirika, toera kuenda kudzulu katonga na Kristu. Thangwi yanji Paulu alonga kuti iwo akhali ‘akufa ku madawo’ maseze akhali maso pa dziko ya pantsi? Iye akhalandanisa na pidacitika na Yezu. Paulu alonga kuti pidafa Yezu, alamuswa muli akufa toera kukhala kwenda na kwenda. Ndi thangwi yace ‘kufa kwacimwana kunkunda pontho.’ Munjira ibodzi ene, Akristu akhadafa ku madawo thangwi nee akhatawirisabve kutsogolerwa na pifuno pyawo pyakuipa. Iwo akhadasiya pyakuipa pyonsene, mbawangisira toera kukhala maso mwakubverana na midida ya Mulungu. Natenepa iwo ‘akhadafa ku madawo, mbwenye akhali maso kwa Mulungu mwa Kristu Yezu.’—Aroma 6:9, 11.

11. Ndi munjira ipi Akristu lero ‘asafa ku madawo’?

¹¹ Ndiye tani ife lero? Ifembo ‘tisafa ku madawo.’ Munjira ipi? Kale, panango tikhacita pinthu pizinji pyakuipa mbitikhonda nyerezera kuti Yahova asaona tani macitiro athu. Ife tikhali ninga ‘mabitcu a pyakunyanyasa na akusowa mwambo,’ peno ‘mabitcu a madawo.’ (Aroma 6:19, 20) Mbwenye pakumala kupfundza m’Bhibhlya kuti Mulungu asafunanji kwa ife, tacita macinjo mu umaso wathu, taperekeka kwa iye, mbitibatizwa. Ife tikhali na cifuno cikulu cakubvera Yahova na kukhala maso mu njira inakomeresa iye. Pontho ‘tasudzulwa ku madawo,’ ‘mbitikhala mabitcu aulungami.’—Aroma 6:17, 18.

12. Ndi cisankhulo cipi cakuti tonsene tisafunika kucicita?

¹² Ngakhale tenepo, Paulu alonga: ‘Lekani tawirisa kuti madawo apitirize kutonga manungo anu akuti asafa mbakucitisani kubvera pifuno pyawo.’ (Aroma 6:12) Pyenepi pisapangiza kuti ife tiri na cisankhulo. Ife tinakwanisa kusiya manyerezero na  pifuno pyathu pyakuipa peno kupitawirisa. Natenepa bvundzikani: ‘Kodi ndisatawirisa pifuno pyanga pyakuipa kukula kakamwe mpaka kucita pinthu pyakuipa? Peno ndisapikunda mwakucimbiza?’ Khala tisapasa ntengo kukoma ntima kwa Mulungu, tinadzacita pyonsene toera kunkomeresa.

13. Thangwi yanji tiri na cinyindiro cakuti tinakwanisa kucita pinthu pyadidi?

¹³ Mu ndzidzi wa apostolo, anthu anango ku Korinto akhali mambava, akhapita m’mabonde mamuna na mamuna peno nkazi na nkazi, aupombo, akulambira adzimunthu na akuledzera. Mbwenye pidadziwa iwo Yahova na kunfuna, iwo acinja, mpaka kukhala na manyadzo na pikhacita iwo. (Aroma 6:21; 1 Akorinto 6:9-11) Akristu a ku Roma akhafunikambo kucinja. Paulu aapanga: ‘Lekani kupereka manungo anu m’madawo ninga pida pyakucita napyo pyakukhonda lungama, mbwenye perekekani kwa Mulungu ninga anthu adalamuswa muli akufa, pontho perekani manungo anu kuna Mulungu ninga pida pyakucita napyo pyakulungama.’ (Aroma 6:13) Paulu akhali na cinyindiro cakuti iwo anacita pinthu pyakulungama mbapitiriza kuphindula na kukoma ntima kwa Mulungu.

14, 15. Kodi tisafunika kubvundzikanji?

¹⁴ Lero, abale na alongo athu anango akhalimbo na makhaliro ninga a Akristu a ku Korinto. Mbwenye pidadziwa iwo Yahova, acinja mbatoma kucita pinthu pyadidi. Toera kukomeresa Yahova, tonsene tacita macinjo mu umaso wathu. Ngakhale tenepo, tisafunika kupereka takhuta thangwi ya kukoma ntima kwa Mulungu. Natenepa, ife tiri dzololo toera kukunda pifuno pyathu pyakuipa mbitipitiriza kutumikira Yahova.

¹⁵ Ndimomwene kuti ife tisafunika kucalira kucita madawo makulu ninga pikhacita Akristu a ku Korinto. Ife nee tisafunika kupitiriza kucita madawo ninga anewa mbitidikhira kuti Mulungu anapangiza kukoma ntima kwace kwa ife mbatilekerera. Ndiye tani pya madawo akuti anango asaaona ninga ndi mang’ono? Kodi tiri dzololo toera kucita pyonsene pinakwanisa ife toera kubvera Yahova mu pinthu pyonsene?—Aroma 6:14, 17.

16. Tisadziwa tani kuti tisafunika kucalira madawo akuti nee alongwa pa 1 Akorinto 6:9-11?

¹⁶ Paulu nee akhacita pinthu pyakuipa pinalongwa pa 1 Akorinto 6:9-11. Mbwenye iye nee akhali munthu waungwiro. Iye alemba: ‘Ine ndine munthu waunyama, thangwi nee ndisadziwa pinacita ine. Thangwi nee ndisakwanisa kucita pinafuna ine, mbwenye ndisacita pinthu pinaida ine.’ (Aroma 7:14, 15) Toera kukomeresa Yahova, iye akhadziwa kuti akhafunika kuwangisira kakamwe toera akhonde  kucita pinthu pyakuipa. (Lerini Aroma 7:21-23.) Tisafunika kutowezera citsandzo ca Paulu na kucita pyonsene pinakwanisa ife toera kubvera Yahova.

17. Thangwi yanji tisafunika kukhala akunyindirika?

¹⁷ Mwacitsandzo, ife tisadziwa kuti toera kutumikira Yahova tisafunika kukhala akunyindirika. (Lerini Misangani 14:5; Aefesi 4:25.) Ife nkhabe funa kukhala ninga Sathani, wakuti ndi ‘Baba wauthambi.’ Pontho tisadziwa kuti Ananiya na nkazace afa thangwi yauthambi. Natenepa ife nkhabe kulonga uthambi. (Jwau 8:44; Machitiro 5:1-11) Mbwenye kukhala wakunyindirika pisabveka pizinji kupiringana kukhonda longa uthambi. Khala tisaperekadi takhuta thangwi ya kukoma ntima kwa Mulungu, tinadzakhalambo akunyindirika m’makhundu onsene.

18, 19. Kodi pisabvekanji kukhala akunyindirika?

¹⁸ Yahova apanga Aisraeli: ‘Khalani akucena, thangwi ine Yahova Mulungu wanu ndine wakucena.’ Kodi iwo akhafunika kucitanji toera akhale akucena? Yahova athimiza: ‘Lekani kuba, lekani kulonga uthambi, lekanimbo kucitirana umpfakafaka.’ (Levitiko 19:2, 11) Maseze ife nkhabe funika kulonga uthambi, tingacitisa anango  kukhulupira pinthu pyakuti nee ndi pyandimomwene, tikukhala akukhonda nyindirika.

¹⁹ Mwacitsandzo, panango nyabasa anapanga patrau wace peno anyabasa andzace kuti asafuna kukotoka na kweru thangwi akubva kupha. Mbwenye iye asafuna kukotoka na kweru thangwi asafuna kucita ulendo. Basi ene asaenda kunyumba ya ungumi toera akwanise kukhala na tsamba ya kudzapangiza patrau wace. Kodi iye ndi wakunyindirika, peno ndi mpfakafaka? Iye acitisa anango kukhulupira pinthu pyakuti nee ndi pyandimomwene. Midzidzi inango, anthu asalonga uthambi toera akwanise cinthu cinafuna iwo peno toera akhonde kutcunyuswa. Mbwenye Yahova alonga: ‘Lekani kulonga uthambi.’ Natenepa tisafunika kucita pinalonga iye kuti ndi pyadidi na pyakucena.—Aroma 6:19.

20, 21. Tisafunika kucitanji toera kukomeresa Yahova?

²⁰ Ndimomwene kuti tisafunika kucalira upombo, kuledzera na madawo anango makulu. Mbwenye toera kukomeresa Yahova, tisafunika kucita pizinji kupiringana pyenepi. Mwacitsandzo, ife tisacalira ulukwali, natenepa tisafunikambo kucalira ubalangazi wakuipa. Ife tisacalira kuledzera, natenepa nee tisafunikambo kumwa mpaka kuledzera. Panango pinanentsa kakamwe kukhonda kugwa m’mayesero ninga anewa, mbwenye mphyakukwanisika.

²¹ Ife tisafunika kucita ninga pidalonga Paulu: ‘Lekani tawirisa kuti madawo apitirize kutonga manungo anu akuti asafa mbakucitisani kubvera pifuno pyawo.’ (Aroma 6:12; 7:18-20) Ndimomwene kuti ife nkhabe kwanisa kucalira madawo onsene. Mbwenye tingawangisira toera kukunda ntundu onsene wa madawo, tinapangiza kuti tisaperekadi takhuta thangwi yakukoma ntima kudacita Mulungu na Kristu kwa ife.

22. Kodi tinadzawinanji tingabvera Yahova?

²² Yahova atilekerera madawo athu na anakwanisa, pontho anapitiriza kutilekerera. Tisapereka takhuta kakamwe thangwi yakukoma ntima kwa Mulungu! Natenepa, tendeni ticite pyonsene pinakwanisa ife toera kucalira kucita pinthu pinalonga iye kuti ndi pyakuipa, ngakhale anango asapiona ninga nee ndi madawo. Tinadzawinanji tingacalira kucita pinthu pyakuipa? Paulu alonga: ‘Nakuti cincino mwasudzulwa m’madawo mbamukhala mabitcu a Mulungu, misapo inabala imwe ndi yakucena na pakumalisa munadzakhala na umaso wakwenda na kwenda.’—Aroma 6:22.