1, 2. (a) Thangwi yanji tisathimbana na nyatwa? (Onani cithundzithundzi cakutoma.) (b) Kodi tinadzadinganji mu nsolo uno?

LERO, Sathani ‘asandzendza-ndzendza ninga nkhalamu yakulira, mbisaka munthu toera kumudya.’ (1 Pedro 5:8; Apokalipse 12:17) Na thangwi ineyi, umaso ndi wakunentsa kakamwe, ngakhale atumiki a Mulungu asathimbanambo na nyatwa. Atumiki a Mulungu akale akhathimbanambo na nyatwa. Mwacitsandzo, Bhibhlya isalonga kuti midzidzi inango Mambo Dhavidhi athimbana na nyatwa. (Masalmo 13:2) Pontho mpostolo Paulu athimbana na ‘nyatwa za anthu onsene m’mipingo.’ (2 Akorinto 11:28) Mphapo tisafunika kucitanji tingakhala n’nyatwa?

² Babathu waufuni, Yahova, aphedza atumiki ace akale toera kupungula nyatwa, pontho iye asafunambo kutiphedza lero. Bhibhlya isalonga: ‘Siyani nyatwa zanu zonsene kuna Yahova, thangwi iye asakutsalakanani.’ (1 Pedro 5:7) Mphapo munacita tani pyenepi? Tendeni tidinge njira zinai. (1) Kucita  phembero, (2) kuleri na kunyerezera mwacidikhodikho Mafala a Mulungu, (3) kutawira kuphedzwa na nzimu wakucena wa Yahova, na (4) kucedza na munthu ananyindira imwe thangwi ya mabvero anu. Mu ndzidzi unadinga ife njira zenezi, sakani kudziwa makhundu anafunika imwe kusasanyira.

3. Munasiya tani pyonsene pinakudzudzumisani kuna Yahova?

³ Njira yakutoma yakuti tinakwanisa kusiya nyatwa zathu kuna Yahova ndi kucita phembero. Mu ndzidzi unathimbana imwe na nyatwa, Babanu waufuni asafuna kuti mumpange pyonsene pinakudzudzumisani. Nyamasalmo Dhavidhi adembetera Yahova: ‘Mulungu, bveserani phembero yanga.’ Buluka penepo iye alonga: ‘Siya kuna Yahova pyonsene pinakudzudzumisa, pontho iye anadzakuphedza.’ (Masalmo 55:1, 22) Pakumala kucita pyonsene pinakwanisa imwe toera kumalisa nyatwa, kudembetera Yahova m’phembero kunadzaphedza kakamwe. Kodi phembero isaphedza tani? Inatiphedza tani toera kucalira kukundwa na nyatwa?—Masalmo 94:18, 19.

4. Thangwi yanji phembero ndi yakufunika kakamwe tingathimbana na nyatwa?

⁴ Lerini Afilipi 4:6, 7. Kodi Yahova asatawira tani maphembero anacita ife na ntima onsene, pontho mwakubwereza-bwereza? Iye asatiphedza toera kupungula na kucalira mabvero peno manyerezero akuipa. M’mbuto mwakudzudzumika na nyatwa zathu, Mulungu asatiphedza toera kukhala na ntendere wa m’manyerezero wakuti cipo takhala nawo. Abale na alongo athu azinji akwanisa kugumana ntendere unoyu. Imwe munakwanisambo. “Ntendere wa Mulungu” unakuphedzani toera kukunda pinentso pyonsene! Nyindirani na ntima onsene pikiro ya Yahova: ‘Leka kudzudzumika, thangwi ndine Mulungu wako. Ndinadzakuwangisa, inde, ndinadzakuphedza.’—Izaiya 41:10.

5. Kodi Mafala a Mulungu anakuphedzani tani toera kukhala na ntendere?

⁵ Njira yaciwiri toera kukhala na ntendere ndi kuleri na kunyerezera mwacidikhodikho mavesi a Bhibhlya. Thangwi yanji pyenepi mphyakufunika? Thangwi Bhibhlya ndi Mafala a Mulungu. Iyo iri na udziwisi na uphungu wakuphedza wa Nciti wathu. Mwakukhonda tsalakana ndzidzi unathimbana imwe na nyatwa, mungawangisira kubvera uphungu wa Mulungu na kuunyerezera mwacidikhodikho, munagumana mphambvu toera kuthimbana na nyatwa. Pyenepi pinakuphedzani toera kuzikunda, kuzipungula, ngakhale kuzicalira. Yahova alonga kuti munthu analeri Mafalace nkhabe ‘kutetemera nee kugopa.’  Mbwenye, asakhala ‘wacipapo na wamphambvu.’—Yoswa 1:7-9.

6. Kodi mafala a Yezu anakuphedzani tani?

⁶ Bhibhlya isapangiza kuti Yezu akhalonga tani na anthu. Iwo akhafuna kakamwe kumbvesera thangwi mafalace akhali acibalangazo na akutsandzayisa, makamaka kwa ale akuneta peno akutsukwala. (Lerini Mateo 11:28-30.) Yezu akhadzudzumika kakamwe na mabvero a anthu. (Marko 6:30-32) Ninga pidapikira Yezu kuphedza apostolo akhacita na iye ulendo, iye anatiphedzambo lero. Ife nee tisafunika kukhala na Yezu toera kutambira ciphedzo. Ninga Mambo wathu wakudzulu, Yezu asapitiriza kutifuna kakamwe. Natenepa, mungathimbana na nyatwa, khalani na cinyindiro cakuti iye anakuphedzani pa ndzidzi wakuthema. Yezu asatipasa cidikhiro na cipapo cakuti cisatiphedza kukunda nyatwa.—Ahebere 2:17, 18; 4:16.

7. Kodi tisaphindula tani na nzimu wakucena wa Mulungu?

⁷ Yezu apikira kuti Babathu anadzatipasa nzimu wakucena tingauphemba. (Luka 11:10-13) Kodi njira iyi yacitatu inatiphedza tani toera kupungula nyatwa? Nzimu wakucena wa Mulungu, peno mphambvu, unatiphedza toera kukulisa makhaliro akuti Mulungu ali nawo. (Akolose 3:10) M’Bhibhlya, makhaliro anewa acemerwa ‘misapo ya nzimu.’ (Lerini Agalata 5:22, 23, Tradução do Novo Mundo.) Tingakulisa makhaliro anewa adidi, uxamwali wathu na anango unadzathimizirika, pontho tinadzacalira makhaliro anacitisa kudzudzumika. Tendeni tione kuti misapo ya nzimu inatiphedza tani.

8-12. Kodi misapo ya nzimu wakucena wa Mulungu inakuphedzani tani?

⁸ ‘Ufuni, kutsandzaya, ntendere.’ Kutsalakana anango mwacilemedzo kunakuphedzani toera kupungula nyatwa zanu. Munjira ipi? Mungapangiza ufuni kuna abale na alongo, citsalakano na cilemedzo, munadzacalira makhaliro anabweresa mabvero akuipa ninga kuipirwa, kutsukwala na kudzudzumika. Natenepa, pinadzakhala pyakukhonda nentsa kukhazikisa ntendere na anango.—Aroma 12:10.

⁹ ‘Kupirira, kukoma ntima, udidi.’ Bhibhlya isalonga: ‘Khalani akukoma ntima kuna unango na ndzace, akubvera ntsisi, lekeleranani unango na ndzace.’ (Aefesi 4:32) Tingabvera uphungu unoyu, tinadzakhala mwantendere kakamwe na anango, pontho tinadzacalira makhaliro akutsukwalisa. Kusiyapo pyenepi, pinadzakhala pyakukhonda nentsa kuthimbana na nyatwa zakunentsa kakamwe zakuti zisatigwera thangwi yakusowa kwathu ungwiro.

¹⁰ ‘Cikhulupiro.’ Lero, ife kazinji tisadzudzumika thangwi ya kobiri na pinthu pyakumanungo. (Misangani 18:11) Mphapo tinacalira tani kudzudzumika na pinthu pyenepi? Tisafunika kuphatisira uphungu  wa mpostolo Paulu toera ‘tikwane na pire pina ife.’ Cikhulupiro cakuwanga kuna Yahova cinatiphedza toera kunyindira kuti iye anadzatipasa mwaufuni pinthu pinafuna ife. Iye apikira: ‘Cipo ndinadzakusiya, mbandikukhonda.’ Na thangwi ineyi tinakwanisa kulonga ninga Paulu: ‘Yahova ndi mphedzi wanga, nkhabe kudzagopa cinthu. Munthu anadzandicitanji?’—Ahebere 13:5, 6.

¹¹ ‘Kupfulika, kudzitonga.’ Nyerezerani kufunika kwa kupangiza makhaliro a kupfulika na kudzitonga. Makhaliro anewa anakuphedzani toera kucalira kucita peno kulonga pinthu pyakuti pinakucitisani kukhala wakudzudzumika, pontho toera kucalira ‘nyongo, kuipirwa, ukali na kulonga mwakuxola.’—Aefesi 4:31.

¹² Musafunika kukhala wakucepeseka toera kunyindira ‘djanja ya mphambvu ya Mulungu’ na ‘kusiya nyatwa zanu zonsene kwa iye.’ (1 Pedro 5:6, 7) Mungakhala wakucepeseka, Yahova anadzakuphedzani na kukutsalakanani. Mungadzindikira pinthu pinakwanisa imwe kucita na pinacimwana imwe, munacalira kunyindirika. Pontho munadzapungula kudzudzumika thangwi musanyindira Mulungu.—Mikeya 6:8.

13. Kodi Yezu akhafuna kulonganji m’mafalace akuti: ‘Lekani kudzudzumika’?

¹³ Pa Mateo 6:34, NM (lerini), Yezu apereka uphungu wandzeru kwa ife. Iye alonga: ‘Lekani kudzudzumika.’ Uphungu unoyu unaoneka ninga wakunentsa kwa ife toera kuuphatisira. Mphapo Yezu akhafuna kulonganji? Ife tadinga kuti Dhavidhi na Paulu akhathimbanambo na nyatwa m’midzidzi inango. Yezu nee akhafuna kulonga kuti munthu anatumikira Mulungu nkhabe kudzudzumika. M’mbuto mwace, Yezu akhaphedza anyakupfundzace toera kubvesesa kuti kudzudzumika kakamwe, peno kwakusowa mathangwi, nkhabe kumalisa nyatwa. Ntsiku zonsene tiri na pinthu toera kucita. Natenepa Akristu nee asafunika kunyerezera kakamwe nyatwa zidathimbana na iwo nduli, peno zantsogolo. Kodi uphungu wa Yezu unakuphedzani tani toera kupungula kudzudzumika kakamwe?

14. Munapungula tani kudzudzumika kwanu ninga pidacita Dhavidhi?

¹⁴ Midzidzi inango anthu asadzudzumika thangwi ya pinthu pyakuipa pidacita iwo nduli. Panango iwo asakhala na mabvero akupasika mulando kakamwe na pidacita iwo, maseze papita pyaka pizinji. Midzidzi  inango Mambo Dhavidhi akhadzudzumikambo na pinthu pyakuipa pidacita iye. Iye alonga: ‘Ndikukhuwa thangwi ndikunentseka muntima mwanga.’ (Masalmo 38:3, 4, 8, 18) Mu ndzidzi unoyu, Dhavidhi acita pinthu mwandzeru. Iye anyindira kuti Yahova mbadambvera ntsisi na kumulekerera. Pontho iye akhala wakutsandzaya mukudziwa kuti Mulungu amulekerera.—Lerini Masalmo 32:1-3, 5.

15. (a) Tisapfundzanji na citsandzo ca Dhavidhi? (b) Kodi munacitanji toera kupungula nyatwa zanu? (Onani bokosi “ Njira Zinango Zakuphedza toera Kupungula Kudzudzumika.”)

¹⁵ Midzidzi inango, panango munadzudzumika na pinthu pinathimbana na imwe cincino. Mwacitsandzo, ndzidzi udalemba Dhavidhi Masalmo 55, iye akhagopa kuphiwa. (Masalmo 55:2-5) Mbwenye, iye nee atawirisa kuti kudzudzumika kwace kufudze cinyindiro cace kwa Yahova. Dhavidhi adembetera Yahova toera amphedze n’nyatwa zace, mbwenye iye akhadziwa kuti ninji pikhafunika iye kucita thangwi ya makhaliro ace. (2 Samwele 15:30-34) Tisapfundzanji na citsandzo ca Dhavidhi? M’mbuto mwakutawirisa kuti tikundwe na nyatwa, tendeni ticite pyonsene pinakwanisa ife toera kumalisa nyatwa, mbitinyindira kuti Yahova anatitsalakana.

16. Kodi mabvekero a dzina ya Mulungu asawangisa tani cikhulupiro cathu?

¹⁶ Midzidzi inango tisadzudzumika na pinthu pyakuti panango pinacitika ntsogolo. Mbwenye nee tisafunika kudzudzumika kakamwe na pinthu pyakuti pidzati citika. Thangwi yanji? Thangwi kazinji kene, pinthu nee pisacitika ninga mukhadikhira ife. Kusiyapo pyenepi, dziwani kuti Mulungu asadziwa pyonsene pinacitika. Dzina yace isabveka kuti “Iye Asacitisa Pinthu Kukhalapo.” (Eksodo 3:14) Natenepa, nee tisafunika kudzudzumika kakamwe na pya ntsogolo, thangwi dzina ya Mulungu isapangiza kuti cifuniro cace kwa anthu cinadzakwanirisika. Tinakwanisa kukhala na cinyindiro cakuti Mulungu anadzapasa nkhombo atumiki ace akukhulupirika na kuaphedza toera kupungula kudzudzumika thangwi ya pinthu pidaacitikira nduli, pinaacitikira cincino na pinafuna kuacitikira ntsogolo.

17, 18. Kodi kucedza mwakusudzuka na munthu ananyindira ife kunatiphedza tani mu ndzidzi unathimbana ife na nyatwa?

¹⁷ Njira yacinai toera kugumana ciphedzo tingathimbana na nyatwa ndi kucedza mwakusudzuka na munthu ananyindira ife.  Ndzanu wa m’banja, xamwali wanu wapantima, peno nkulu wa mpingo panango anakwanisa kukuphedzani toera kubvesesa mwadidi nyatwa zanu. Bhibhlya isalonga: ‘Nyatwa zisatsukwalisa munthu, mbwenye mafala adidi asabalangaza.’ (Misangani 12:25) Pontho Misangani 15:22 isalonga: ‘Munthu angacita pinthu pyace nee kubvundzisa, anabwerera nduli, mbwenye angakhala na aphungu azinji anaenda kutsogolo.’

¹⁸ Misonkhano yathu isatiphedzambo toera kupungula nyatwa zathu. Pa misonkhano yonsene, tisakhala na mwai wakucedza na abale na alongo athu akuti asatifuna na kutiwangisa. (Ahebere 10:24, 25) ‘Kubalangazana’ kweneku kunadzatiwangisa na kutiphedza toera kukunda nyatwa zonsene.—Aroma 1:12.

19. Thangwi yanji musanyindira kuti uxamwali wanu na Mulungu unakuphedzani mungathimbana na nyatwa?

¹⁹ Nkulu wa mpingo unango ku Kanada adzindikira kufunika kwa kusiya nyatwa zace kuna Yahova. Iye akhatsukwala kakamwe thangwi ya basa yace ninga mpfundzisi wakuxikola, pontho thangwi ya nyatwa yaungumi. Ninji cidamphedza toera kukhala wakuwanga? Iye awangisira kakamwe toera kuwangisa uxamwali wace na Yahova. Axamwali ace apantima amphedzambo kakamwe mu ndzidzi ukhathimbana iye na nyatwa, pontho akhacedza mwakusudzuka na nkazace pya mabvero ace. Kusiyapo pyenepi, na ciphedzo ca akulu a mpingo anango na muyang’aniri wa cisa, iye akwanisa kuona pinthu ninga munapionera Yahova. Dotoro aphedzambo m’bale unoyu toera kubvesesa nyatwa yace yaungumi, mbacita macinjo toera kugumana ndzidzi wakupuma na kuthathamula manungo. Mwapang’ono pang’ono, iye apfundza kuti anatsalakana tani nyatwa yace na mabvero ace. Angathimbana na pinthu pyakunentsa, asanyindira Yahova kuti anamphedza.

20. (a) Tinasiya tani nyatwa zathu kuna Mulungu? (b) Tinadzadinganji mu nsolo unatowera?

²⁰ Mu nsolo uno, tapfundza kufunika kwa kusiya nyatwa zathu kuna Mulungu mukucita phembero kuna Yahova, kuleri Bhibhlya na kunyerezera mwacidikhodikho pinaleri ife. Tapfundzambo kufunika kwa kutawira kuphedzwa na nzimu wakucena wa Yahova, kucedza na munthu ananyindira ife na kugumanika pa misonkhano Yacikristu. Mu nsolo unatowerera, tinadzadinga kuti Yahova asatiphedza tani na muoni wacidikhiro udatipasa iye.—Ahebere 11:6.