1-3. Ninji pikhadacitika pakati pa Evodya na Sintike? Mphapo tinacalira tani mikandzo ninga ineyi? (Onani cithundzithundzi cakutoma.)

IFE tisalemedza kakamwe Bhibhlya thangwi tisadziwa kuti ndi Mafala a Mulungu. Bhibhlya iri na uphungu wakuti usatiphedza toera kucalira nyatwa na kutisandika tingacita madodo. Kodi tisatowezera uphungu unoyu? Nyerezerani pya alongo awiri akudzodzwa a mu ndzidzi wa mpostolo Paulu, Evodya na Sintike. Bhibhlya isalonga kuti iwo anentsana, mbwenye nee isalonga thangwi yanji. Tendeni tione kuti ninji pikhadacitika.

² Panango Evodya akhadacemera abale na alongo anango toera kudzadya kunyumba kwace. Mbwenye iye nee akhadacemerambo Sintike. Natenepa, pidabva Sintike abale anango mbakalonga kuti atsandzaya kakamwe na cakudya, iye aipirwa kakamwe. Panango iye anyerezera: ‘Nee ndisatawira kuti Evodya nee andicemerambo! Ndikhanyerezera kuti tikhali axamwali a ponda ndi pondembo.’ Sintike akhapibva kuti Evodya nee akhanfuna na ntima onsene. Ndi thangwi yace Sintike acemera anthu angasi toera kudzadya kusiyapo  Evodya! Panango nkandzo unoyu wakhuyambo anango mu mpingo. Bhibhlya isapangiza kuti Paulu asandika alongo awiri anewa mbaawangisa toera akhazikise ntendere. Pisaoneka kuti iwo abvera uphungu wa Paulu mbapitiriza kutumikira Yahova mwakutsandzaya.—Afilipi 4:2, 3.

³ M’mipingo mwathu lero, midzidzi inango tinakhalambo na nkandzo na m’bale peno mulongo. Mbwenye tingatowezera uphungu wa m’Bhibhlya, tinakwanisa kutsalakana mikandzo ineyi, ngakhale kuicalira. Pontho tingabvera pinalonga Bhibhlya, tinapangiza pakweca kuti tisalemedza Mafala a Yahova.—Masalmo 27:11.

4, 5. Ndi uphungu upi usatipasa Mafala a Mulungu thangwi yakukhonda kuipirwa mwakucimbiza?

⁴ Mphyakunentsa kakamwe kukhonda ipirwa mwakucimbiza. Panango tinaipirwa khala munthu unango alonga mafala akudzidzida peno atitsalakana mwakuipa, panango thangwi ya misambo yathu, ntundu wa khanda yathu, peno maonekero athu. Pontho tinaipirwa kakamwe khala adaticitira pyenepi ndi m’bale peno mulongo. Ndi uphungu upi wa m’Mafala a Mulungu wakuti unakwanisa kutiphedza?

⁵ Yahova asadziwa kuti ninji pinacitika tingakhala na nsambo wakuipirwa mwakucimbiza. Tingaipirwa, panango tinalonga peno kucita pinthu pyakuti mukupita kwa ndzidzi tinatsumbikika napyo. M’Bhibhlya, Yahova asatipanga kuti nee tisafunika kuipirwa mwakucimbiza. Iye asalonga: ‘Leka kuipirwa mwakucimbiza.’ Nyerezerani nyatwa zinafuna ife kucalira tingabvera uphungu unoyu wakukhonda kuipirwa mwakucimbiza! (Lerini Koelete 7:9, NM; Misangani 16:32.) Bhibhlya isatipangambo kuti tisafunika kulekerera anango. Yezu alonga kuti tingakhonda kulekerera anango, Yahova nee anadzatilekererambo. (Mateo 6:14, 15) Kodi musafuna kukhala wakupirira kakamwe na kulekerera anango?

6. Ninji pinafuna kucitika tingaipirwa mwakucimbiza?

⁶ Tingaipirwa mwakucimbiza, pinaticitisa kuida ndzathu. Peno tinacitisa anango mu mpingo kukhala na mabvero mabodzi ene. Maseze tiyesere kubisa mabvero athu akuipirwa, abale na alongo anatidzindikira, mbatoma kuticalira. (Misangani 26:24-26) Akulu a mpingo anadzatiphedza mukuphatisira uphungu wa Bhibhlya toera tikunde mabvero anewa mbatilekerera anango. (Levitiko 19:17, 18; Aroma 3:11-18) Angacita pyenepi, kodi tinadzatowezera pitsogolero pya Mafala Yahova?

7, 8. (a) Kodi Yahova asatsogolera tani atumiki ace? (b) Ndi pipi pitsogolero pingasi pinagumana ife m’Bhibhlya, pontho thangwi yanji tisafunika kupibvera?

⁷ Kodi Yahova asatsogolera tani na kupfundzisa atumiki ace pa dziko ya pantsi? Iye akhazikisa Kristu ninga ‘nsolo wa mpingo,’ na Kristu akhazikisa ‘m’bandazi wakukhulupirika na wa ndzeru’ toera kupfundzisa na kutsogolera atumiki a Mulungu. (Aefesi 5:23; Mateo 24:45-47) Ninga mathubo akutonga a mu ndzidzi wa apostolo, m’bandazi asalemedza kakamwe Bhibhlya thangwi ndi Mafala a Mulungu. (Lerini 1 Atesalonika 2:13.) Ndi pitsogolero pipi pingasi pinagumanika m’Bhibhlya?

 ⁸ Bhibhlya isalonga kuti tisafunika kugumanika pa misonkhano mwakukhonda phonya. (Ahebere 10:24, 25) Isatiwangisa tonsene kukhulupira pipfundziso pibodzi pyene pya Bhibhlya. (1 Akorinto 1:10) Pontho isatipanga toera ‘kuikha Umambo pakutoma.’ (Mateo 6:33) Bhibhlya isatipanga toera timwaze mphangwa nyumba na nyumba, m’mbuto za pakweca, na mbuto zonsene zinagumanika anthu. (Mateo 28:19, 20; Machitiro 5:42; 17:17; 20:20) Isatsogolerambo akulu a mpingo toera kuphedza mpingo kuti upitirize kukhala wakucena. (1 Akorinto 5:1-5, 13; 1 Timoti 5:19-21) Bhibhlya isatipfundzisa kuti tisafunika kukhala akucena mbiticalira pinthu pinaida Yahova.—2 Akorinto 7:1.

9. Kodi Yezu akhazikisa ani toera kutiphedza kubvesesa Mafala a Mulungu?

⁹ Anthu anango asaona kuti nee asafuna ciphedzo ca munthu unango toera kubvesesa Bhibhlya. Kutomera mu caka 1919, Yezu asaphatisira ‘m’bandazi wakukhulupirika na wa ndzeru’ toera kuphedza atumiki a Mulungu kubvesesa pipfundziso pya Bhibhlya mbapitowezera. Mukubvera Bhibhlya, tisaphedza mpingo toera kukhala mwantendere, wakucena na wakuphatana. Natenepa, bvundzikani: ‘Kodi ndiri wakukhulupirika kwa Yezu na kutowezera citsogolero ca m’bandazi wakukhulupirika?’

10. Ndi masomphenya api adaona Ezekyeli?

¹⁰ Kubulukira m’Bhibhlya, tisapfundza kuti aanju a Yahova asacitambo pinthu mu njira yadidi. Mwacitsandzo, Ezekyeli aona m’masomphenya Yahova mbakafambisa gareta yakuti ikhafamba mwakucimbiza kakamwe. Pontho gareta ineyi ikhaenda konsene kukhafuna Yahova. (Ezekyele 1:4-28) Gareta ineyi isaimirira khundu ya gulu yakudzulu ya Mulungu, yakuti isatowezera citsogolero cace mwakucimbiza. Atumiki a Yahova pa dziko ya pantsi asatowezerambo citsandzo cibodzi cene. Nyerezerani pya macinjo mangasi adacitwa mu gulu ya Mulungu m’pyaka khumi nduli. Dziwani kuti ndi Yahova akhatsogolera macinjo anewa. Mwakukhonda dembuka Kristu na aanju anadzafudza dziko ino yakuipa. Nee m’bodzi anadzakhonda pontho kulemedza Yahova peno dzina yace! Onsene anadzatawira utongi wa Mulungu.

11, 12. Kodi gulu ya Yahova ikucitanji ntsiku zino zakumalisa?

¹¹ Tendeni tidinge pinacita gulu ya Yahova ntsiku zino kumalisa. Basa yakumanga Nyumba za Umambo. Abale na alongo azinji aphata basa mwakuwanga toera kumanga ofesi ikulu ya Mboni za Yahova ku Warwick, Nova York, E.U.A. Abale na alongo akuperekeka pa dziko yonsene asamanga Nyumba za Umambo na maofesi a filiali. Abale na alongo anewa, asatsogolerwa  na Departamento Mundial de Projeto/Cons- trução. Tisatsandzaya kakamwe thangwi ya basa yakuwanga inacitwa na abale na alongo! Pontho atumiki a Yahova pa dziko yonsene asacita pyonsene pinakwanisa iwo toera kuphedzera basa ineyi yakumanga Nyumba za Umambo. Yahova asapasa nkhombo atumiki ace thangwi yakucepeseka na kukhulupirika kwawo.—Luka 21:1-4.

¹² Mapfunziro. Yahova asafuna kakamwe kupfundzisa atumiki ace. (Izaiya 2:2, 3) Nyerezerani maxikola mazinji ali na ife. Tiri na Xikola ya Basa ya Upainiya, Xikola ya Amwazi Mphangwa a Umambo, Xikola ya Gileade, Xikola ya Anyakutumikira Apswa pa Bheteli, Xikola ya Ayang’aniri a Cisa na Akazawo, Xikola ya Akulu a Mpingo, Xikola ya Utumiki wa Umambo, Xikola ya Piwalo Pya Komiti ya Filiali na Akazawo. Pontho mu website yathu, jw.org, tisagumana Bhibhlya na mabukhu anango mu pilongero pizinji kakamwe. Website yathu irimbo na makhundu akufunika kakamwe analonga pya anapiana, mabanja na  khundu ya mphangwa. Kodi musaphatisira jw.org mu utumiki na pakulambira kwanu kwa banja?

13. Kodi atumiki a Yahova asafunika kucitanji?

¹³ Ndi mwai ukulu kakamwe kucita khundu ya gulu ya Yahova na kudziwa pinafuna iye kwa ife! Nakuti tisadziwa pinakomerwa na Mulungu, tisafunika kumbvera na kucita pinthu pyadidi. Maseze anthu azinji asafuna kucita pinthu pyakuipa, ife tisafunika ‘kuida pinthu pyakuipa,’ ninga pinacita Yahova. (Masalmo 97:10) Cipo tisafunika kukhala ninga ale anaona kuti ‘pyadidi ndi pyakuipa na pyakuipa ndi pyadidi.’ (Izaiya 5:20) Ife tisafuna kukomeresa Yahova, natenepa tisafunika kukhala akucena m’makhundu onsene a umaso wathu. (1 Akorinto 6:9-11) Pinatipanga Yahova kubulukira m’Bhibhlya, pisatiphindulisa kakamwe. Ife tisafuna Yahova na kukhala akukhulupirika kwa iye. Ndi thangwi yace tisatowezera pitsogolero pyace m’banja, mu mpingo, kubasa, kuxikola, peno mbuto yonsene inagumanika ife. (Misangani 15:3) Ndi makhundu api asafunika ife kukhala akukhulupirika kwa Mulungu?

14. Kodi anyakubala anakhala tani akukhulupirika kwa Yahova?

¹⁴ Pakupfundzisa anathu. Kubulukira m’Bhibhlya, Yahova asapereka pitsogolero kwa anyakubala kuti anapfundzisa tani anawo. Akristu asafunika kucita mpholemphole toera akhonde kutowezera ndzeru za dziko pa nkhani ineyi. (Aefesi 2:2) Mwacitsandzo, m’mbuto zinango baba ananyerezera: ‘N’dziko yathu, basa yakupfundzisa ana ndi ya nkazi.’ Mbwenye Bhibhlya isalonga mwapakweca kuti ababa asafunika kupfundzisa anawo pya Yahova. (Aefesi 6:4) Anyakubala akuti asafuna Yahova asafunambo kuti anawo akhale na uxamwali wakuwanga na iye, ninga pidacita Samweli pikhali iye mwana.—1 Samwele 3:19.

15. Tinakhala tani akukhulupirika kwa Yahova pakucita pisankhulo pyakufunika?

¹⁵ Pakucita pisankhulo. Mbatidzati kucita pisankhulo pyakufunika mu umaso, tisafunika kudinga maonero a Yahova toera tipitirize kukhala akukhulupirika kwa iye. Tinakwanisa kugumana ciphedzo kubulukira m’Bhibhlya na mu gulu ya yace. Mwacitsandzo, anyakubala anango lero asafuluka mbaenda kaphata basa ku dziko inango toera kuwina kobiri izinji. Angabalala mwana asaona kuti mphyadidi kuntumiza ku dziko yawo toera akakhale na acibale awo. Ndimomwene kuti cisankhulo ceneci ndi ca munthu paekha, mbwenye anyakumanga banja asafunika kubvundzika, ‘Kodi cisankhulo cathu cinadzakomeresa Yahova?’ (Lerini Aroma 14:12.) Mbatidzati kucita pisankhulo pyakufunika thangwi ya banja na basa yathu, mphyadidi kufufudza pinalonga Bhibhlya.  Tisafunika ciphedzo ca Babathu thangwi nee tinakwanisa kutsogolera njira zathu.—Yeremiya 10:23.

16. Ndi cisankhulo cipi cidacita nkazi unango? Ninji pidamphedza toera kucita cisankhulo cadidi?

¹⁶ Pidafuluka banja ibodzi kuenda kudziko inango, abala mwana wa m’phale, buluka penepo iwo anyerezera kuntumiza ku dziko yawo toera akuzwe na yavu awo. Mbwenye mu ndzidzi unoyu, nkazi atoma kupfundza Bhibhlya na Mboni za Yahova. Iye apfundza kuti ikhali basa yace kupfundzisa mwanace pya Yahova. (Masalmo 127:3; Misangani 22:6) Natenepa, acita phembero kwa Yahova, ninga pinalonga Bhibhlya, mbamphemba toera amphedze kucita pinthu pyadidi. (Masalmo 62:7, 8) Iye alongambo pya nyatwa zace kuna mulongo akhapfundza na iye Bhibhlya na kuna anango mu mpingo. Maseze acibale ace na axamwali ace akhankakamiza toera atumize mwanace kuna yavu wace, iye aona kuti nee cikhali cisankhulo cadidi. Mamunace aona kuti abale na alongo akhaphedza kakamwe nkazace na mwanawo. Iye adzumatirwa kakamwe mbatoma kupfundza Bhibhlya na kugumanika pa misonkhano pabodzi na banjace. Nkazi unoyu atsandzaya kakamwe mukuona kuti Yahova atawira phembero yace!

17. Tingapfundza na munthu Bhibhlya, kodi tisafunika kutowezera citsogolero cipi?

¹⁷ Pakutowezera pitsogolero. Khala ndife akukhulupirika kwa Yahova, tinadzatowezera pitsogolero pinatambira ife mu gulu yace. Mwacitsandzo, tendeni tidinge pinafuna ife kucita tingatoma kupfundza na munthu bukhu Kodi Mwandimomwene Bhibhlya Isapfundzisanji? Tapangwa kuti tisafunika kukhala na mphindi zakucepa pakumala kucitisa pfundziro toera kuphedza nyakupfundza kudziwa pizinji pya gulu ya Yahova. Tinakwanisa kuphatisira vidyu Ninji Pinacitwa Pa Nyumba Ya Umambo? na bruxura Mbani Anacita Cifuno Ca Yahova Lero? Tingamala kupfundza naye bukhu Bhibhlya Isapfundzisanji, tinakwanisa kumphedza ‘kukula mu cikhulupiro’ mukupfundza naye bukhu ‘Khalani mu Ufuni wa Mulungu,’ ngakhale kuti abatizwa. (Akolose 2:7) Kodi musatowezera citsogolero ceneci ca mu gulu ya Yahova?

18, 19. Ndi api mathangwi mangasi anaticitisa kupereka takhuta kwa Yahova?

¹⁸ Tiri na mathangwi mazinji toera kupereka takhuta kwa Yahova! Kusiyapo pyenepi, ‘Mwa iye tiri na umaso, tisafamba, pontho tiripo.’ (Machitiro 17:27, 28) Iye atipasambo Mafalace, Bhibhlya. Ninga Akristu a ku Tesalonika, tisapasa ntengo Bhibhlya thangwi ndi Mafala a Mulungu.—1 Atesalonika 2:13.

¹⁹ Bhibhlya isatiphedza toera kukhala cifupi na Yahova, iye mbakhalambo cifupi na ife. (Tyago 4:8) Ife tisapereka takhuta kakamwe thangwi ya kucemerwa na Babathu toera kucita khundu ya gulu yace! Tisapibva ninga nyamasalmo adalemba: ‘Perekani takhuta kwa Yahova thangwi iye ndi wadidi; ufuni wace ndi wakukhonda mala.’ (Masalmo 136:1) Vesi ibodzi na ibodzi ya ya kapitulu ineyi, nyamasalmo asabwerezera mafala akuti ‘ufuni wace ndi wakukhonda mala.’ Inde, khala ndife akukhulupirika kwa Yahova na kutowezera pitsogolero pinatipasa iye kubulukira mu gulu yace, iye anadzatipasa umaso wakukhonda mala mbitipitiriza kufuniwa na iye!